البصائر والذخائر

البصائر والذخائر، طبعة دار صادر - بيروت / المجلد #5

by Abu Hayyan Al-Tawhidi, أبو حيان التوحيدي, وداد القاضي (Editor)

نبذة الناشر: إن هذا الكتاب ثمرة مطالعات التوحيدي ومشاهداته وسماعاته وقد ذكر التوحيدي في مطالع كتابه المصادر الرئيسية التي أعتمد عليها في تصنيفه هذا الأثر الضخم فهي تشتمل إلى جانب مؤلفات الجاحظ، على أمهات المتب المعروفة مثل "النوادر" لأبي عبد الله محمد بن زياد الاعرابي و"الكامل" للمبرد و"عيون الأخبار" لأبن قتيبة و"مجالسات ثعلب" و"المنظوم والمنثور" لأبن أبي طاهر و"الأوراق" للصولي و"الوزراء" لأبن عبدوس و"الحيوانات" لقدامة هذا عدا القرآن والسنة، ولا شك في أن التوحيدي أقدم على أختيار ما وتدوين ما دوّن بدافع من ذوقه وهواه ومزاجه وثقافته الدينية التقليدية ومذهبه الفلسفي في الاعتزال.

317 pages, Hardcover

First published January 1, 1988

Reviews

[عاشور الناجي · Rating 4 out of 5]

أنا فهمت أثناء القراءة إنه ده كتاب أدبي بالمقام الأول يعني مش علمي ولا تعليمي ، وهو مش بس كتاب أدبي لكنه بمثابة موسوعة مصغرة لأغلب الأدب المتداول بين الناس في القرن الرابع الهجري يعني من حوالي ألف سنة تقريبا ، جمعه التوحيدي علي مدار فترة طويلة جدا - ورجع حرق النسخة الأصلية مع باقي مؤلفاته قبل مايموت - وطبعا وأكيد لا وجه للمقارنة بينه وبين أي أدب متداول في بلاد العرب بعد ألف سنة ، والتعليق أو النقد أظنه هيبقي أحق بيه حد متخصص أو علي الأقل حد قارئ تاريخ وعارف تفاصيل أكتر عن الفترة الزمنية أو الأشخاص والحوادث اللي بيدور في فلكها الكتاب ، فيعني دي مش مراجعة للكتاب أكتر من كونها مجرد ملاحظات شخصية أثناء القراءة لخصتها في 10 نقاط لا أكثر لتذكر الفائدة مستقبلا:

1. الكتاب وكأنه حائط الفيسبوك بتاعهم في القرن الرابع الهجري ، التوحيدي لم يترك شاردة وواردة إلا وذكرها ، ولقيت كتير من القصص/الحكايات/النكت حتي المتداولة أيامنا دي أغلبها مذكورة فيه بتصرفات كتيرة ، للدقة هو الكتاب حائط تويتر - مبحبش اقول اكس - كمان مش فيسبوك لأنه نادرا ما بتلاقي حاجة فيه أزيد من كام سطر ، الراجل كان أسلوبه موجز وبليغ بشكل كبير وطبعا مش هنتكلم علي لغته ، باقولك بينقل كلام من أعراب الصحراء وعايش في القرن الرابع الهجري.

2. بالبحث - اللي هو سألت شات جي بي تي يعني مش جوجل - طلع إنه كتير من مواد الكتاب أساسا منقولة من كتب تانية معاصرة ليه أو أقدم ، لكنه مذكرش مراجع ولا صرح بالنقل - إلا في حالات قليلة قال قرأت كذا بخط فلان وبس - هو ذكر إنه جمعها وخلاص ، حِكم وأشعار وأقوال وتأملات في الأخلاق والدين والفلسفة والسلوك الإنساني وطبائع البشر وتجاربهم وطرائف ونوادر ، وحاجات كتير تاني بعضها كان ليه مناسبة وبعضها لا ، وبعضها مفهوم وأغلبها لا ، الكتاب لم يتخصص في فن واحد ولكنه اتكلم في كل حاجة وأي حاجة من أول تفسير الآيات وشرح الاحاديث لحد النكت الأبيحة اللي كانت بتتقال في عصره

3. يمكن مكنش في خياله طبعا إنه الزمن هيتغير وإنه اللي جمعه هيتقرأ بعد ألف سنة فمهتمش حتي يوضح مين الناس اللي هو بيتكلم عنهم أصلا وافترض في القارئ إنه عارفهم ، فلان قال كذا ورد عليه فلان كذا وعلّق فلان عليهم بكذا ، وانت دور وراهم بقي لو مهتم ، المحققة الفاضلة لم تدخر وسعا في بيان الأشخاص المتحدثين وكل واحد منهم سيرته وردت في موسوعة تانية محتاجة قراءة هي كمان وهتبقي دايرة مش هتخلص ، واكتشفت كمان انه في أمثال بنكررها الأيام دي بعضها عادي - وبعضها أبيح - مذكور في كتاب من القرن الرابع الهجري عادي جدا

4. في جمل كتير جدا مفهمتش المعني أصلا وكأنها طلاسم ، وفي جمل فسرتها من ع النت بس مفهمتش ممكن يكون حطها ليه ولا الحكمة منها ايه ، وطبعا ناهيك عن الحاجات اللي هو حاططها علي سبيل النكتة والهزار والضحك وهي مش بتضحك أصلا بمعاييرنا ، زي ماتكتب إفيه علي الفيسبوك علي ماتش كورة مثلا ومن غير ماتوضح ولا تشرح وللناس بتضحك عادي وبعد شوية سنين لا هتبقي فاكر الكلام كان علي ايه ولا فين موطن الضحك فما بالك بناس هتيجي بعد سنين أطول مكنوش حاضرين الموقف اللي كنت بتسخر وبتقفي عليه ولا فاكرين الموقف ككل
غالبا لا هيفهموا ولا هيضحكوا.

5. الكتاب في تقديري مش محتاج لا مزيد من العناية والتهذيب ولا حتي الحذف ، عشان ده مش من حقنا أصلا ، بس علي الاقل محتاج ترتيب وتنظيم هنقول إنه الوقت مأسعفش التوحيدي يعمله ، زي ما وعد بحاجات في النص يكتبها ومكتبش أو ممكن يكون كتب والمخطوطات ضاعت مين عارف ؟؟ باقول ترتيب مش تهذيب لأنه مش منطقي يبقي بيكلمني عن صحابي أو تابعي وبينقل كلمة عن الآخرة وبعدها مباشرة نكتة أبيحة قالتها جارية بعدها كلام لفيلسوف وبعدها شرح لقاعدة نحوية ، ده ولا الريلز العشوائي بتاع الفيسبوك ياعم الحاج اللي بيعمل تعفن في الدماغ

6. مقدمات كل كتاب في التسعة والدعاء اللي بيستفتح بيه وهمية وكانت من أجمل ما قرأت لحد دلوقتي - بعيدا إنه ده أول كتاب أصلا 😁 - كل مقدمة منهم ينفع تُقرأ لوحدها أصلا بعيدا عن الكتاب من جمال صياغتها وبلاغتها رغم السجع والإطناب المتكرر

7. الأجزاء من بعد التاني بدأ يحط تعليقات علي حاجات هو عارف ومتأكد انه الناس هتعلق عليها ومش هتعجبها ، ورد علي ناس انتقدته في وقتها ردود جيدة أحيانا وردود مستاءة من قلة التقدير أحيان تانية ، وبرضه عمل ده بشكل مختصر جدا وقال في نهاية كذا جزء ما معناه يعني إنه خد من الكتاب ما ينفعك ودع ما لا ينفعك.

8. الكتاب لو ركزت معاه هتحسه زي مفكرة ضخمة - كناشة - جمع فيها كل حاجة جت تحت إيده وقرر في لحظة ينشرها للعامة ، المحققة في الدراسة اللي في آخر الكتاب - وهي دراسة رائعة بالمناسبة- بتقول انها بتخمن انه عمل الكتاب لأحد الأغنياء عشان يبقي زي راعي رسمي ليه أو يبقي مديله زي منحة يكمل بيها الكتاب وإنه الشخص ده هو المقصود بالمخاطبة في المقدمات مش القارئ العادي بس مفيش دليل علي ده ، واكتئابه آخر عمره اللي وصله لحرق الكتب والتبرؤ منها بيقول كلام غير ده خالص.

9. الكتاب علي الأغلب لم يتم تقديره في زمانه وقرأت مقولة بتقول : ‏
أبو حيان التوحيدي لخّص حال الناس في سطور: «لقد صحبتُ الناس أربعين سنة فما رأيتُهم غفروا لي ذنبًا ولا ستروا لي عيبًا ولا حفظوا لي غيبًا، ولا أقالوا لي عَثرة ولا رحِموا لي عَبرة ولا قبلوا مني معذرة، ولا بذلوا لي من نصر.. ورأيتُ الشغل بهم تَضييعًا للحياة، وتجرُّعًا للغيظ مع الساعات» وفي مقدمة الجزء التامن ذكر بنفسه بعض من النقد اللي اتوجه لكتابه والصراحة يعني ياعم أبوحيان من غير زعل هما كانوا محقين جدا في نقدهم نوعا ما يعني.

لكن بشكل عام لو علمتم الغيب لاخترتم الواقع وبيبقي مطلوب منك تجتهد ومش عليك تحصيل النتيجة ، يمكن بعد ألف سنة ييجي حد فاضي يقرأ الكتاب - زيي كده 😁 - ويفتكرك بدعوة صادقة وكلمة طيبة مشفتهاش في زمنك ، الحد ده ممكن يشطح ويفكر يقلدك بس طبعا محاولة جمع أي حاجة شبيهة باللي عمله التوحيدي في الزمن ده ضرب من الجنون وهيحتاج أعمار ومبالغ طائلة ومش هيكفي كل حاجة ومش هيذكر كل حاجة ومش هيعجب حد بس يعني ممكن نجرب يوما ما ليه لأ ؟؟

10. سيرة التوحيدي عجيبة بين اللي رماه بالإلحاد والزندقة وبين اللي قال انه مجرد شيخ متصوف ، وبرضه حادثة حرقه لكتبه بين ما روي عنه إنه خاف يلقي الله بما كتب وبين إنه يقال انه ضنّ بما جمع وكتب علي من لا يعرف قدر الكتب وبين اللي قال انها منفعتوش في حياته في حاجة ومعرفش يوصل بيها لأي مجد ، والآراء دي في النهاية كلها احالات علي كتب وموسوعات واشخاص بيقولوا كلهم إنه الواحد مقصر في حق نفسه والعمر بيعدي وهو مطّلعش علي الحاجات دي رغم انها متاحة الكتروني

وفي النهاية انا مع ما كتبه هو بنفسه إنه الكتاب في إيدك وعقلك في رأسك ، اقرأ واحكم بنفسك ودع ما لاتري فيه فائدة ، وخذ منه ماتفيد به نفسه لآخرتك وبس



نقلت منه جمل كتير عجبتني هنشرها لاحقا ان شاء الله ، وهو مما لا أظن إني هحتاج ارجعله يوما ما بسبب كم الروايات والكتب والمشاريع اللي تراكمت السنين اللي فاتت ، ده غير إنه طلع أغلب المكتوب منقول من موسوعات تانية أظن هبقي مهتم أطلع عليها ومفيش في العمر ما يكفي كل ده أصلا ، وان كان برضه للامانة النوع ده من الكتب لو هتركز معاه وتقرأه من باب إنك بتقرأ أدب/رواية بدون تعمق كبير يعني ، أظنه مش هياخد وقت طويل وهيبقي مسلي بشكل كبير جدااا.

[Moayed Hassan · Rating 5 out of 5]

من أروع كتب الأدب والحديث عنه سيكون طويل.

التوحيدي كتابه في الأصل عبارة عن مختارات جمعها من مؤلفات من سبقه ومع هذا فكانت اختياراته منتقاه فلم يذكر كل ماقرأه وكان أيضا يعلق ويتكلم عن بعض مايذكر فقد ذكر امورا لايتفق معها وبنرظه كانت هزليه وهو من أتى بهذا الاسلوب وغلب عليه أيضا الغلو في سيدنا علي رضي الله وذريته فيذكرهم ثم يقول عليه/م السلام. وأبرز ما أتى في كتابه كان نقل صورة المجتمع والثقافة بوقته بطريقة رائعه فقد ذكر أمورا من علماء عصره في كتابه نقلا منه هو بنفسه. ومن السلبيات كان التفاوت فيما ذكر فتجده يطول في ذكر بعض الاخبار وأخرى تكون عابرة فوجدت مشكلة في تعامله مع بعض المواد.

من المآخذ أن ليس للكتاب تبويبا واضحا فنجد الاخبار مذكورة بالأرقام دون وضع تقسيمات مثل اغلب الكتب كفصل عن الحكم والحكماء وغيره رغم انه كان يذكر بعض الأمور من نفس الشخص أو الموضوع ولكن من غير تبويب واضح.

في رأيي، الكتاب من أفضل الكتب في بابه رغم ما يؤخذ عليه من مآخذ. فقد جمع التوحيدي في كتابه مادة واسعة ومتنوعة من أقوال وحكم وأخبار وأشعار، حتى غدا الكتاب في ذاته مرجعًا جامعًا لما قبله وبعده،وأصبح الرجوع إليه يكفي القارئ عن تتبع كثير من المصادر المتفرقة. وتبقى قيمة الكتاب الكبرى في حسن انتقاء التوحيدي لما جمعه، وفي حفظه لمادة أدبية وفكرية واسعة كان من الممكن أن تضيع أو تبقى متفرقة في بطون الكتب.