باط مان

by محمود حسيب

كتاب بــــــــــاط مــــــــــان (حين تنتهى الاسطورة .. ويبدأ التبول الإرادي)

برومو الكتاب : http://www.youtube.com/watch?v=qtPTwx...


باط مان : ما هذا المطعم يا سوكا؟
سوكا : ده "بحه هت"..
باط مان : اه.. لا.. بالتأكيد تقصد بيتزا هت ! مجموعة منتقاه من المعجنات ومعها مجموعة مختلفة من الإضافات؟
سوكا : بتاع الفطير! لا يا برنس ده ممبار وكوارع وجوهارة ولسان 100
سنة خبرة في بيع اكسسوارات البهايم هو ده الاصل الباقي تقليد
باط مان : خبرة وعراقة .. اشياء لا تجدها إلا هنا في مصر فعلا اشكرك مقدما يا سوكا على التجربة التي سوف اخوضها كلي حماسة
سوكا : ولسه لما تجرب.. هاتدعيلي.. ثم التفت وصرخ : ابو رحمة حات النبي ارفع لنا اتنين ممبار ضاني وشوية حناديق وكوارع على مياه بيضاء..

Genres: Novels, Fiction, Humor, Ebooks, Literature, Audiobook, Comedy

181 pages, Paperback

First published March 1, 2012

About the author

كاتب و مطور برمجيات و مصمم جرافيك.
من مواليد القاهرة عام 1983.
درس علوم الحاسبات و نظم المعلومات.
كما حاصل على عدة شهادات دولية فى مجال تطوير البرمجيات.
صدر له اول كتاب (باط مان) فى مارس 2012.


.Writer and software developer and graphic designer
.Born in Cairo in 1983
.He studied Computer Science and Information Systems
.He received several international certificates in the field of software development
. Released his first book (Baat Man) in March 2012

Reviews

[Mohammed Arabey · Rating 4 out of 5]

If you like Batman..You will LOVE his journey to Egypt :)

انا قلت اكتب الريفيو انجليزي لان الروايه بقت مشهوره عالميا اوي ..شفتوا الخواجات في الصوره دي ,لأ ومش اي خواجات دول المهمين اووي مؤلفين و زعما وعلما وهما فرحانين بالطبعه التالته..اصل باط مان ده مشهور اوووي

والنعمه حتي لو متعرفش بات مان ده بيشتغل ايه حيعجبك رحله الخواجه بروس وين لمصر

ايه الضحك والمسخره دي..ايه الواقع المرير ده ..ايه بلاعه المجاري اللي طفحت بلطجيه وصيع وفساد صار علنيا وفجا و معديا كمان احيانا..ايه صراع القيم ده حتي بين الشخص الشريف ونفسه
ايه صراع الحضارات ده..بين امريكا و مصر..مين غلط ومين صح

حتي لو حاولت تصلح احوالنا تلاقي نفسك "غرست"في الفساد..ياكده, يا حتخرب بيوت ناس كتير اوي

في النهايه
قال الفريد بحرج: لم اعرف ان سيدي يدخن
بروس بهدوء: لا ده مش دخان دي اصطباحه
ألفريد: أري ان سيدي قد تأثر بعادات المعيشه في مصر جدا
بروس : من يذهب لمصر ويرجع ,دائما ما تترك هذه البلاد ندباً تبقي في وجدانه الي الابد
ألفريد مبتسما : أتمني أن يكون سيدي قد ترك الانطباع نفسه لدي شعب مصر
بروس وهو يشعل السيجارة : صلي عل اللي هايشفع فيك يا حج

الاحداث
******
تنساب الاحداث بسلاسه وكوميديا صاااارخه

حد فاكر اول فيلم عادل امام بخيت وعديله هالو امريكا؟
لما يصدم المصري اول مايروح امريكا بانهم "بيبوسوا بعض في الشارع عادي" والسرقه عادي وعلنا وكأن محدش واخد باله..تعنت الجمرك معاه حتي في علبه المش لضمان الامن
[image error]
هنا في الروايه العكس..الامريكي جه هنا ليفاجأ بالسرقه ,بل والقتل, عادي وعلنا وبرضه كأن محدش واخد باله..تعنت الجمرك عشان يطلع مصلحه "رشوه"وبرضه علنا..اما البوس...فمفيش..فيه تحرش بس..اغتصاب..او لو مشفش ده حيشوف اللحم اللي بقي رخيص جدا

ده لقي بلاوي يمكن اكتر من عادل امام كمان
بس المهم لقي حاجه ملقهاش عادل امام في هاللو امريكا..الجدعنه وشيئا من الشهامه

لكنه ليس مكانه..ليس مكان الباحث عن العداله المطلقه...لـلاســــــف
***الجزء القادم مهم جدا ولكني اخفيته لانه يحرق نهايه الروايه***
الا ان النهايه كانت صعبه شويتين..لانها الواقع الصعب تغييره او اعطاءه نهايه غير منطقيه بالاخص بعد الثوره التي اجهضت فور انتهاء المطلب الاقل اهميه فيها وهو اسقاط الرئيس..

النهايه جاء بها صفعه علي وجهه باط مان الذي حاول ان يصلح ويحمي البلد فبوغت بصفعه بما اقترفته سياسه بلده الحمقاء المتغطرسه

باط مان او بروس وين قد يستحق النصيحه ان ده مش مكانه..هو فعلا مش مكانه
..هو غريب..شاذ فكريا لاننا لسنا في "يوتوبيا"او حتي عشرها
لكن للاسف النصيحه جائت بكلاشيه نهايه"فيلم عسل اسود" لاحمد حلمي الذي يظهر بان "كل"الثقافه الامريكيه شئ سئ ولا يرتقي لطهاره ثقافتنا حتي وان دنستها الايام الحاليه..تلك ال"نعره"الكاذبه التي اتمني ان تخف حدتها قليلا علي الاقل احتراما لما يسبقها من حديث حول ظروفنا الحاليه, حتي لا تكون مثل تلك الخطب متناقضه لنفسها في نفس ذات الجمله

لكن تبقي تلك النهايه المنطقيه الوحيده المقبوله وان كنت فقط اعترض علي طريقه صياغه الخطبه التي تعتبر اهم ما في الروايه


الشخصيات
********
سوكا " تخيلته احمد السقا فلم اجد غيره في بالي بكلامه الكثير اللي ورا بعض"..ابن البلد اللي دايس في كله..الشحصيه مرسومه بطريقه رائعه بجد

بروس وين..باط مان..محمود حسيب..عبقري عبقري عبقري
حد اخد باله انه طول الروايه بيتكلم باللغه العربيه الفصحي وفي اخر 20 ,30 صفحه قلب علي استحياء بالمصري والعاميه؟
زي العسل بجد

من الاخر
******
Parodyروايه غير تقليديه..ليست "بارودي"
لمغامرات بات مان كما يحدث بالخارج وانما "ماذا لو"جاء حامي العدل وقاهر الظلم والفساد مصر

الاجابه..وصفها بدقه وبطريقه ممتعه جدا محمود حسيب..رسمتها حنان الكرارجي "اول مره اشوف كوميكس ليها..فنانه بجد"..وصور غلافها احمد مراد في "احسن غلاف قام به بل قد يكون اجمل غلاف معبر عن الروايه نفسها في الاغلفه المصريه حتي الان"

و نشرتها الرواق"علي فكره الطبعه الثالثه فيها عيوب في بضع الصفحات في طباعتها,فكانت شبيهه للروايات المضروبه..عيب بجد لازم الانتباه لان المفروض ان الفرق الوحيد بالنسبه للقارئ بين نسخه اصليه واخري مضروبه هو فرق جوده الطباعه التي احيانا تكون طفيفه بالنسبه للفرق الكبير"جدا احيانا" في السعر"

روايه تستحق الاقتناء..لانك مش حتقراها مره ولا اتنين..حتقراها كتير جدا
وفي انتظار المزيد ان شاء الله

محمد العربي
من 10 ابريل 2013
الي 12 ابريل 2013

[Manar Keshk · Rating 5 out of 5]

هو أنا شهادتى مجروحة وميتاخدش بيها فى أى محكمة لما يتعلق الأمر بيك يا محمود :)
بس لو القصة دى كاتبها واحد تانى هقولك انها أحلى حاجة اتعملت عن باتمان :)
!!!!!!!!!!

أنا قبل الرواية كنت بأقلب القناة لو فيها فيلم لباتمان ! وبعدها بقيت بأتفرج على الأفلام دى عشان أطمن إنهم طلعوا روايتك صح !

ولكن حين يتحول (الدوكش) ل(باين) وسوكا ل(روبن) وانجنير زرجينا ل(مورجان فريمان اللى مش فاكرة اسمه،يتعجب المرء كيف تفسد هوليوود درر أدب الأكشن مثل الخالدة (باطمان)من أجل بضع حفنات من الدولارات !
عالم بجحة والله

[شيرين هنائي · Rating 4 out of 5]

روايه باط مان للرائع محمود حسيب..مكنتش اعرف انها بالجوده و الاتقان و العمق ده!خفه دم ما خصلتش،فكرة جيده جدا و هدف رائع للقصة ككل..
الي مقراهاش خسر كتير جدا..هي صحيح افسدت مشاهدتي لاي من افلام بات مان و بقيت بشوفه بطريق او غراب..و بشوف بدلته بنقشه جلد الرنجه:)انما انا سعيده جدا ان قريت باط مان:(رسوم حنان الكرارجي تهلك من الضحك و خصوصا بالتفاصيل الخبيثة الي حاطاها في الرسم:)تحيه لكل الي اشتغلوا فيه:)غلاف رائع كالعاده لاحمد مراد..مختلف جدا جدا جدا:) — with Ahmed

[مصطفي سليمان · Rating 2 out of 5]

ليه نجمتين؟
دا معناه الكتاب سخيف؟
او سئ
لا
معناه اني كنت متوقع حاجات كتيره قوي بس ملقاتهش
يعني بالنسبة ليا الفكرة حلوة
وكانت هتبقي اعظم
لو كانت اتعملت ك
كوميك بشكل كامل
الموضوع كان هيختلف

لو كان مفيش اكلاشيه ف العموم
البداية والوسط والنهاية المكررين
اللي يغيظ بجد فكرة
ان فيه فكرة
وان فيه شغل
شوية صبر والموضوع كان هيطلع احلي من كدا بكتير

لكن مش عارف حسيت ان الموضوع ماخدش حقه بالوقت
والتظبيط

اخر جزء دا اللي خالني بجد اتضايقت بشدة
المونولوج للشيخ العجوز
اللي مفهمتش منطقه
ولا التلميح ع فكرة الغريب والتدخل
ولا المبرر بتاع تحول البلطجي لما هو عليه
وان البلد مالينه ابطال

حسيتها مالهاش اي مكان
غير تكملة الكلاشيه

بكرر الفكرة حلوة وكانت ممكن تتنفذ احسن من كدا بكتير
ودا اللي مضايقيني

[ياسمين Thabet · Rating 5 out of 5]

بسم الله الرحمن الرحيم
صلوا على اللي يشفع فيكم
بعد الاصطباحة حأبدا الريفيو بتاعي
محمود حسيب : ايه يا مان الرواية الجامدة دي؟
الى احمد مراد: معلم في الاغلفة طول عمرك
الى صاحب الكوميكس جوة الكتاب : برنس والنعمة برنس
ههههههههههههههههههه



مفعول الاصطباحة راح نرجع مرجوعنا
الكوميدية لها مقالات لها اشعار...لكنها المرة الأولى التي اراها في ثوب الرواية
180 صفحة من الضحك المتواصل والالفاظ الغريبة والتشبيهات المذهلة والنكت والسخرية تطلعك من المود مهما كنت مكتئب
اول مرة اسمع عن الكاتب محمود حسيب لكن بجد حبيته جدا ومنتظره كتابه القادم بفارغ الصبر
فكرة الرواية نفسها مش عارفة جاتله ازاي وكتبها ازاي بالحرفية دي باسلوب يخلي اي حد يقدر يستمتع بيها
والرسالة في نهاية الرواية كانت قوية فنية جميلة
الشخصيات مرسومة بعناية والاحداث مترابطة وسلسة
فعلا كتاب يستحق الاقتناء والاحتفاظ به والرجوع له
اول كتاب اقرأه واضحك من قلبي بالشكل ده
شكرا لسوكا الاسطورة والحج برص البطريق :))))

[محمود سعد · Rating 2 out of 5]

الكتاب جميل وفيه تشويق والكوميكس اللي فيه رائعة لكن لي ملحوظة بخصوص النهاية .. هي كان فيها توجيه مباشر شوية ومكانتش لايقة علي الجو العام بتاع القصة أظن إن ممكن يكون السبب هو تباعد فترات الكتابة أو تغير الظروف ونفسية الكاتب أثناء كتابته الجزء الأخير

الكتاب فيه تفاصيل جيدة مايعرفهاش غير واحد عارف مكان زي السيدة زينب , بعضها كان فيه مناقشة حالة خاصة كأنها عامة فممكن اللي مش عايش في أماكن زي دي ياخد فكرة غلط

وبصفة عامة الكتاب جميل والقصة رائعة في تخيلها وأسلوب الكتابة ممتع

[Roro · Rating 5 out of 5]

انا من اول مره قريت فيها الكتاب لحد دلوقتى مش ببطل ضحك ولكن الموضوع مش مجرد ضحك وهزار وخلاص
بالعكس الموضوع فعلا فيه قصه فيه حاجه كلنا بتعيشها كل يوم انا حسيت فلكتاب ده بمصر بجد بلناس الي فعلا عاييشبن في مصر
وحواريها بالفتوه الي زى ما بيقولوا عليه حاميها حراميها بالبنوته الي بتتعلق بكل ما هو اجنبي مع انها لو بصت جنبها حتلاقي ابن ابلدها اجدع مليون مره
بسوكا الي تقريبا كلنا عندنا فلشارع بتاعنا واحد شبهه دار الفتاء المصريه المتنقله الجدع الشهم الي يحب يخدم ويرقسطك في نفس الوقت الي لما يحس انه جه عليك ولو للحظه ممكن يودى نفسه في داهيه عشان خاطرك وممكن بعد تجربه كبيره اوى ينساك ويقلب رزقه في حته تانيه
في عم رزه الي فاهم وعارف كل حاجه وساكت لكن وقت ما بيتكلم بيطلع منه درر لغه الكاتب كانت رائعه الكتاب لو مسكه طفل لسه بيتعلم الكتابه حيفهمه و لو مسكه راجل كبير عنده 60 سنه حيستمتع بيه بجد بشكرك يا محمود حسيب علي انك امتعتنا

[Mai M Ibrahim · Rating 4 out of 5]

مضحك جدا
تحس انك بتقرأ فيلم عربي هندي 🤣
التعليق ع ستوريتل ممتاز جدا جدا 😍

[Mohamed · Rating 2 out of 5]

الكتاب من اوله لحد تقريبا اخر ربع فيه مكنتش عارف اشيل الابتسامة من علي وشي. الكتاب مضحك و شيق و يشدك خصوصا ان معظم الاحداث اللي فيه بنشوفها او عارفينها كل يوم. حتي بعض الجمل في الكتاب اللي بتقولها الشخصيات مرتبطة بشخصيات احنا عارفينها من افلام, مسلسلات, او حتي الحقيقة و ده بيساعد اوي انك تتخيل الشخصية و تتخيل الموقف.

نهاية الكتاب هي اللي معجبتنيش. بترمي الاخطاء كلها في الواقع المصري علي الظروف و علي نظرية المؤامرة الكبري -او الصغري- و بتبرر اننا شعب تايه او علي الاقل من وجهة نظر الكاتب اننا مش غلطنيين اننا غلط.. و ده حاجة معجبتنيش شخصيا.

الكتاب بتدور احداثه في السيدة زينب. اماكن حقيقية باشخاص او خلفيات شبه حقيقية ان لم تكن موجودة فعلا.

[Ismael Elhalaby · Rating 5 out of 5]

من احسن الكتب الساخره اللى ممكن تقراها ، بجد تحفه و الكاتب عبقرئ و شكله أتيهذل و لف كتير عشان يوصف الصوره دى

و الكوفر جامد جدى على فكره :)

[لينا النابلسي · Rating 5 out of 5]

عبقرية الأبداع و هرتلة الفكرة ...مسخرة واقعية حقيقية...مبهر حد الفزع...لازم يتوصف لمرضى الأحباط و اليأس و الأكتئاب و يتم تداوله في العيادات النفسية

[SĦorouk Nasr · Rating 1 out of 5]

حسن ..
لو كان عندي أي مشاكل مع هذا الكتاب فهي تتلخص في شقّين ..

أولاً : هذا الـ"باط مان" .. ليس أكثر من مجرد مســــخ .. لسبب بسيط أن تكوينه يتناقض كليًا مع الخلفية التي أحملها في ذهني عن "بات مات" .. بعد كل ما قرأت وشاهدت من كوميكس وكارتون وأفلام .. فإن "بات مان" في خيالي هو تلك الشخصية الكئيبة الصموتة التي تحمل ما تحمل من الضعف البشري ومن القوى الخارقة لهذا النوع من الأبطال .. و"بات مان" بالمناسبة شخصية قريبة جدًا لقلبي .. أما الأخ "باط مان" فبدى مجرد خواجة خِــرع لا أكثر ولا أقل .. شيء مشوّه بلا معنى

ثانيا: فيما يخص الأبطال الشخصيات المصرية .. قاع الابتذال! .. الجدعان الذين لا يبدون كذلك إلا في النهاية .. مع كل ما يلزم من الاستظراف وما إلى ذلك .. والعجوز الحكيم -الذي يبدو مخبولاً في بداية الأمر- ثم يظهر فجأة ليعالج البطل ويوضّح له كل ما خفي عنه .. هكذا! وكأن الحياة بهذه البساطة! .. لا أحتاج للقول أن هذه الحبكة قد تكررت تريليونات المرات حتى "فُشخت" تكراراً .. وأنا أعني هذا التعبير العامي البذيء بشدة!

-_-

..

[مهـــا جمـــال · Rating 5 out of 5]

الحلوة من جوثام سيتي :)))))))
الكتاب ده لازم يتعمل فيلم!

[Nina Kamel · Rating 3 out of 5]

بحب الأدب الساخر جدا ,كتاب لطيف وخفيف ,بيضحك جدا الفكرة حلوة أوى ,كنت فعلا محتاجة جرعة فرفشة

[Zekret · Rating 2 out of 5]

هو كتاب كارتونى, و أنا عجِزت بصراحة.. بس الفكرة كويسة و الكوميديا مقبولة, و الأفورة ملهاش حدود... عامة يا ريتنى ما إشتريته.

[Asya · Rating 4 out of 5]

ذات مومنت لما تلاقى مستر واين بيسمع عبد الباسط همودة, وبيضرب اصطباحة, وبيقولك "صلى على اللى هايشفع فيك يا حج!"
مبدئيا خلينا نتفق انى مش باكتب عربى وان بقية الريفيو هيبقى عامية, عشان جو الكتاب كمان.. انا فعلا كان نفسى ان الكتاب يكون كله Comic لأن الرسومات حلوة جدا جدا!!! الغلاف كمان, لوحده هلكنى من الضحك اول مرة شوفته فيها.
"شخص يرتدى حلة تنكرية رخيصة على هيئة باتمان, وهو يأكل من على عربة فول فى الشارع..." و مش عارفة ليه فكرنى بحزلقوم! هاها.. ماعلينا.

انا اصلا قلبت الكتاب من صديقتى العزيزة رنا, وقريت نصه قبل ما اروح البيت :)
وكنت باضحك زى المجانين من اول كام صفحة, صعب عليا قوى مستر واين, وعلى رأى الثل, اللى يخرج من داره, يتقل مقداره...
ال parody عالية قوى والحس الفكاهى والسخرية حاضرة جدا, ومن غير استظراف, وده اللى فرق معايا عشان فى ناس كتير بتخلط بين السخرية والاستظراف وبيبقى دمهم سم, بس الحمد لله الكتاب مكانش كده, وكمان كان واضح ان الكاتب عنده خلفية كبيرة عن باتمان ومش بس من افلام كلونى والراجل الرخم ده اللى عمل باتمان مرة, بس كان الموضوع واقعى فى الاول جدا وعشان كده فى المشاهد اللى فى مصر الموضوع بقى مسخرة.
وكمان الكتاب فكرنى بحاجة comic بردو ل د. احمد خالد توفيق, عن رحلة دراكيولا لمصر والحاجات اللى حصلت له, اعتقد انها كانت فى سلسلة بلية او فلاش... مش فاكرة بالضبط, وطبعا مولتوف و مجانين. وطبعا سلاسل الافلام اللى زى Epic Movie, Scary Movie, SuperHero Movie ...مش بشبه غلاسة بس عشان ال genre واللى هو ال parody.
وطبعا مع كل ده تم الاستعانة باحداث واقعية فعلا من اللى حصل ولسه بيحصل فى المناطق الشعبية وحرب العصابات اللى عاملة زى كاونتر سترايك كده, انا مش ساكنة فى السيدة بس ساكنة فى الجيزة, وبعيد عنكم دوقنا المر بسبب القرف ده.. فالبعد السياسى والاجتماعى للقصة بردو يخليك بتضحك وقلبك بيوجعك, خاصة دلوقتى وبعد مرور سنتين إلا على الثورة, واعتقد ان الكتاب ده لو اتكتب فى الفترة الحالية كان هايبقى مختلف تماما! بس التهييس حلو مافيش كلام, عشان كده الكتاب ده عجبنى وبردو كان نفسى الرسومات تبقى اكتر :(

مشكلتى بقى الوحيدة مع الكتاب ان فى اخطاء خلتنى :S فى بعض الاوقات, انا مافهمتش هى طباعة ولا مقصودة على اساس السخرية ورؤية ما بعد حداثية وكده؟؟؟ بس كل اللى اعرفه ان كان فى مشاكل فى ال punctuation وده بقى الصراحة ماكنش مريح فى القراءة خالص.

ماعلينا...
الفكرة جامدة تنين #my style واحب اقول للكاتب, مستر محمود, انت فنان يا ابنى #محمود بكر ستايل, واتنمى يكون فى حاجة تانية ليك قريب, ساخرة او لأ, انا اكيد هابص بصة بردو, عشان خيالك واسع واعتقد انك تقدر تكتب حاجات تانية بس والنبى حوار العلامات والطباعة ده, هه! :)

يالا, كفاية كده, سامو عليكو..
أسيا خليل,
الجيزة, مصر... 1.46 صباحا.

Sorry about the bad format, the Arabic format on that site is so bad... no my fault :( still, sorry...

THE WHOLE REVIEW --> http://reviewingalltime.blogspot.com/...

[Radwa · Rating 3 out of 5]

الكتاب فكرته رائعة .. بتدي مساحة لحاجات كتيرة جداً
لك أن تتخيل باتمان في مصر! و لكن محصلش غير تقريباً نص الحاجات اللي تخيلتها بس

أول حاجة معجبتنيش حصر باتمان في الحارة الصغيرة دي, اللي كلها أمثلة سيئة أصلا
بغض النظر أن النهاية عجيبة نوعاً ما و فجأة أهل الحارة طلعوا كلهم ملايكة بطريقة ما
لم أقتنع بالمبرات اللي بتبين أن الحارة دي كده حالها كويس

عجبتني الكوميدي اللي فيها, رغم أن بعض الإفيهات حسيتها مبالغة
لكن حوارات سوكا و باتمان كانت مضحكة فعلاً
و عجبتني المواقف اللي اتعرضلها باتمان في مصر .. كانت واقعية جداً
مها موقف الجمارك و هو بيحاول يجيب عربيته

البداية كانت ماسية حلو جداً, لكن النهاية بالنسبة لي معجبتنيش
مقتنعتش بكل مبررات عم رزة ده!

بس في المجمل كان كتاب ممتع، رغم أني توقعت أكتر من باتمان في مصر.

[Baraa · Rating 5 out of 5]

داخل كل انسان تعرفه سوكا صغير :)

[Saud Altamimi · Rating 3 out of 5]

سمعته على تطبيق اقرأ لي، الإلقاء كان رهيب و مضحك جدا!

[Lobna · Rating 2 out of 5]

I really hopped to give this book a better rating, and to be honest I loved its idea at the begining.
As a fan of Batman, I loved the idea of him coming to aid the Egyptian revolution, and this plot could have had a huge potential for a much, much better story.
another thing that attracted me to the book was the difference in the conversation style between Batman and Soka (his Egyptian guardian throughout the book). Batman mostly used traditional arabic while Soka used the slang. and this was entertaining and hilarious till the point when the slang degraded to the point of being disgusting and dirty. and that is my first take against book
the second criticism has to do with the ending. it seems the author wanned to send a message that we don't need the help of the west (America) to advance and they should just leave us alone and we'd become a developed country then. however sending this message to Batman and asking him to go back where he came from because we don't need the aid of Americans and we are better able to advance on our own is wrong. Batman is a symbol of justice and fighting criminals. He is not a president or a government that wants to influence people and change it in the way it wants, he is the opposite of that and projecting this message on him was completely wrong. Honestly, I hated the ending by all means.
almost all of the Egyptian characters presented were either, thugs, conmen, aggressive or simply stupid! there wasn't a single Egyptian hero or even just a simple good Egyptian man (or woman, for that matter). Even Soka, was a stupid conmen; who just out of no where decided to help Batman. This is an extremely negative portray of the Egyptian people that I strongly refuse, and I still can't realize how did Batman say in the last chapter that Egypt has heros that would protect it! where are those heros? I haven't seen a single one of them in the novel! when I read that line, I honestly started to think that Batman has gone stupid
the final criticism is how the author tried to give an excuse for the bad behavior of thugs. He claimed that all of them are bad for a reason, they were forced to become who they are now and they had no other choice but killing and terrorizing people to live, and it is the west that should be blamed for turning those people bad and thus they should leave us alone now. I again refuse this notion! not all of the thugs are thugs because they had no other choice, and we can never blame the west for turning them bad! and even if they became thugs because of whatever tragedy happened in their past, that doesn't mean that we as a society shouldn't punish them for their bad behavior!. And speaking of how past experience can turn you into an evil person, Batman himself had a trauma in his past yet he got over it! Batman's own history proves that past traumas are not an excuse and defeats the excuses the author gave to thugs.
the book had a great potential to be a nice combination of fun and seriousness, portraying the revolution and the Egyptian society, but the author didn't do a good job. he actually gave a bad impression of the Egyptian society The book was somehow funny, the ending was terrible, and it really was disappointing

[Amna Ayad · Rating 1 out of 5]

اشعر بالحزن الشديد على الاشجار التي قطعت لصنع ورق هذا الكتاب , كان الله بالعون يا اشجار نهايتك كانت مأساوية اكثر من المتوقع :-/

[Lames Shams · Rating 1 out of 5]

مش هكتب review انا هسأل سؤالين :)
-ليييييييه مفيش rating ب الnegative ؟
-مييييين اللي اقنعك تكتب اصلاً >.< ؟

[محمد قرط الجزمي · Rating 3 out of 5]

الرواية تستحق نجمتين فقط!

لا أدري إن كان اختيار (باط مان) بدلا من (بات مان) من باب الدعابة والسخرية ، أن من باب الترجمة غير الموفقة من المؤلف .. الغريب أن السيارة اسمها (بات موبيل) وليس (باط موبيل)

ثم في نهاية الرواية ، حينما تكلم بروس عن الأبطال ، ترجم اسم (سبايدر مان) إلى (زبايدر مان)!

السؤال: لماذا اختار المؤلف شخصية بات مان ، ثم لم يعطه حقه من القوة؟ لكن كان بات مان في الرواية ضعيفا جداً بطريقة غير منطقية.

قد نقول أن الرواية ساحرة ، والأمر يحتاج إلى مثل هذه المفارقات ، لكنني لم أجد مواقف مضحكة إلا فيما ندر.

في الربع الأول من الرواية ، لم يكن الحوار بين الشخصيات مرتبا ، ولا توجد علامة قبل الكلام تفيد بدابة كلام الشخص ، أو حتى أقواس تنصيص .. لا يعرف القارئ بسهولة من القائل ومن المستمع .. ثم ترتب تنسيق الحوار فيما بعد.

أيضاً الجمل الاعتراضية تكثر في الرواية ، سواء كانت لها فائدة أم لم تكن.

رغم ذلك لا أنكر قوة الرواية في مواضع مختلفة ، فشخصية سوكا شخصية جميلة ومرحة ، أحببتها .. فهي تمثل المواطن المقري البسيط ، ابن المزح والنكتة والطرافة ، ممزوجة بالطيبة العفوية الجميلة .. قفشاته في حواراته جميلة جدا ، وتحبب القارئ فعلا بها.

أيضاً لقطة في قمة الجمال حينما تعرت ابتسام ، قام الدوكش وغطاها بقميصه ، على ما عُرف من جبروته.

استحقت الرواية عندي نجمتين فقط .. ربما لأنني لست مصريا ، ولم أستوعب ما تضمنته الرواية من تلميحات مصرية ، قد تعجب المصريين أنفسهم.

ولكن النجمتين تحولتا إلى ثلاث نجمات مع قراءتي لحوار بروس مع العم رزة في نهاية الصفحات ، الحوار قلب الموازين ، وجعلني أرى الرواية من منظور مختلف .. فالرواية لم تكن مجرد رواية هزلية ساخرة ، إنما كانت تحمل رسالة في قمة الجمال ، أكدها بروس في النهاية عندما قال: "وجدت أن هذه البلاد مليئة بالأبطال".

لم تنته الرواية ، وإنما هناك زائر آخر قدم إلى مصر في نهاية الرواية .. وقد استقبله الأسطورة سوكا بنفسه.

[Ibrahimtawfik · Rating 3 out of 5]

الكتاب ده انا خلصته فى ساعتين الكتاب كان حلو جدا شدنى من الاول الكاتب اسلوبه سلس و بيشد الواحد لقيت ضحك كثير مع انى ما كنتش متفائل لان الفكرة ديه اتعملت قبل كده بس كانت سمجه قصص الحى الشعبى و الفقر و صعوبة الحياة فى الحارة اتعملت بطريقة حلوه مش مبالغ فيها. سوكا شخصية وهمية و الصراحة افضل شخصية عجتنى جدا و الواحد حس انه يعرفه و يارت يظهر تانى . لكن اللى قافلنى الصراحة حاجتين قلة الاحداث و النهاية الصراحة مش عارف ليه بس حسيت ان الكاتب كاتبها غصب ما كانش ليها لازمة حتى الفكرة اللى حاول يوصلها و اللى انا فهمتها ما كانتش منطقية بالنسبة لى للى كنت ناوى اكتبه انطلاقة لا باس بها و هتيبقى اقوى لو اتشال منها الجدية و كنت ناوى اكتب مستنين بقية السلسلة مع صوبر مان (و اللى لقيته بالفعل و ياريت يبقى جزء تانى ) و ازبايدر مان
فى انتظار اعمال اخرى بنفس الطريقة و بالتوفيق ان شاء الله

[Mohamed Tarik El fouly · Rating 3 out of 5]

كتاب حلو وخفيف وفيه اقفشات حلوة للغاية

ولكن ده ريفيو وانا مدى الكتاب 3 نجوم فكفاية مدح فيه وتعالى نخش فى النقد:

اولاً باتمان طالع ضعيف جداً فى الرواية رغم ان قدراته قوية جداً...

ثانياً: باتمان لا يعترض فى بعض الاحيان على شخصية البلطجى اللى بيحمى منطقته ولكن فى الاخر بيقبض عليه...

ثالثاً: الصح صح والغلط غلط عند باتمان... مهما حصل مكنش حيعمل حاجات كتيرة من اللى عملها فى الرواية

رابعاً: باتمان كاتوم جداً علشان يكشف عن شخصيته تربنتين مرة فى الرواية... غير انه شخصية صامتة ما بتتكلمش ولا تلك.. وبتعتمد على نفسها بشكل كامل حتى لو فى بيئة عدائية كاملة..

بس رواية خفيفة وحلوة :) وتجربة مضحكة للغاية بالنسبة للناس اللى بتحب كوميكس باتمان

[إسلام عبد الرحمن · Rating 4 out of 5]

الكتاب جيد جداً , لو اتعمل فيلم هيبقى تغيير كبير فى شكل الكوميديا المصرية
الشخصيات مرسومة صح , بس النهاية كانت تقليدية ويمكن بالرغم من الاختلافات الكتير بينهم شبه فيلم عسل اسود
وفى انتظار الكتاب القادم لكاتب موفق جداً :)

[Shirin Abdel Rahman · Rating 5 out of 5]

ههههه كتاب زى العسل دمه خفيف اوى ممكن تقراه فى قعده مقدرتش امسك نفسى من الضحك و انا بقراه اتعاطفت مع سوكا و الدكش اوى و قرايته مرتين لو انت مكتئب و مليت من الكتب اللى عن الثوره و الفساد و السياسيه اقرا الكتاب ده هيبسطك مع انه برضوا فى سياسيه و فساد لكن باسلوب زى العسل

[Hassan Elkbeer · Rating 1 out of 5]

كتاب تافه وسطحي ولفئة الأطفال انا مش عارف الكاتب دا دارس ايه اصلا كتابه ملوش معنى ولا ليه هدف غير بس انه بيلقي الضوء على حبة مشاكل بقت ف مصر بعد الثورة بس برضه كان ممكن يبين المشاكل دي بشكل احسن وارقي من كدا الكتاب دا بجد اقل حاجة تتقال عنه يا خسارة الفلوس

[Moataz Mohamed · Rating 3 out of 5]

ممم ، كتاب خفيف. من نوعية الكتب التافهة اللي تقرأها ف تبتسم أو تضحك وبعدها تركنه علي جنب ومايتقرأش تاني. يمكن أكثر جزء كان يستحق القراءة هو كلام العجوز رزة اللي ف الآخر ، لكن بغض النظر عن أي شيء ، هو كتاب بيوريلك القلب القميء لمجتمعنا المنهار.
طبعا مش ناوي أقرأه تاني ، بس أهي تسلية وقت.

[Nadin Doughem · Rating 2 out of 5]

أضحكتني ربما أول صفحة بالكتاب فقط, لم تعجبي ألفاظ كثيرة, وأشياء كثيرة لم أفهمها! اعطيه نجمتين للبرومو الذي اضحكني ولآخر جملة فى الكتاب:

"هل تعرف ما هي مشكلة أبطال هذة البلد .. إنهم كثيرون ولكنهم لا يعرفون الهدي والنور"