مربعات ابن عروس

by ابن عروس, مسعود شوبان (اعداد), محسن هاشم (تقديم)

لينك القراءة المباشرة
http://mrrekaz.blogspot.com/2012/02/b...

Genres: Poetry

135 pages, Unknown Binding

First published January 1, 2000

Reviews

[Huda Aweys · Rating 3 out of 5]

فيه خلق كتير القوا المربعات و غنوها .. كاملة كمان .. و رغم ان سيد الضو مابيغنيهاش كامله هنا الا ان غناه لها هو احلى ارتجال للمربعات ممكن تسمعوه لأنه من القدام العتاة في الفن دا و من اللى خابرين اسراره و محافظين على اصوله
https://www.youtube.com/watch?v=v9WjD...
*****
اقتباسات من المربعات

ولابد من يـوم معلـوم
ترتــد فيـه المظـالم
أبيض على كل مظلـوم
واسـود على كل ظـالم

اللى على الخير هنيه
وبشره بالغنيمة
واللى على الشر عزيه
بكره يلاقى الهزيمه

*****
و برغم انف الأبنودي (تحديث : رغم أنف الأبنودي رحمه الله !و لا دائم غير وجه الله)، و برغم انف كل حاقد و غاير ابن عروس هيظل امير الشعر العامي الصعيدي :) .. ماتقولوش ابن عروس اسطورة ابن عروس شاعر شعبي و كان موجود و عايش فعلا و هو اللى ألف المربعات دي ماهياش فولكلور شعبي مجهول المصدر .. و الدليل الوحدة اللى فى نسيجها .. الأشعار دي طالعة من شخص واحد .. و احتمال كون ابن عروس اسطورة دا لو بنتكلم على شاعر من ايام منقرع و لا اخناتون ! انما ابن عروس كان عايش في عصر حديث و قريب .. صعب يحصل فيه تلفيق زي دا ، و ابن عروس بتاع المغرب اللي الابنودى بيحكي و يدلل بيه تشابه اسماء ليس الا .. ابن عروس بتاع المغرب كان متصوف و عالم دين .. انما دا شاعر شعبي صعيدي و مصري صميم .. ايه جاب دا لدا اصلا ، و ليه احتمال تشابه الأسماء ماوردش على ذهن الابنودي !!؟
*****
اقتباسات من المربعات

إوعى تقول للنـدل يا عـم
وان كان على السرج راكب
ولا حد خالى من الهم
حتى قلوع المـراكب

اترك من الناس من كان
فـي باطنه لك سوادي
صـده وخليك منصان
عـنـه ولو كان يعادي

حرامى وعاصى وكداب
عاجز هزيل المطايا
وتبــت ورجــعت للــبـاب
هيا جــــزيل العطايا

(يعني هيا اقبل توبتي ياجزيل العطايا)

سحبت سيف المحبه
لجل ما أرميه
رمش بعينه رماني
قبل انا ما أرميه

صلاة النبي بتزيدني شوق
وتمنع البلا والمراضي
قال له الإله: اندفن فوق
قال: أمِّتي في الأراضي

طبيب الجرايح قوم اِلحق
(قوم الحق يعني جوم الحج بالصعيدي ، قم بسرعة مثلا)
وهات لي الدوا اللي يوافق
فيه ناس كتير بتعرف الحق
ولاجل الضرورة توافق

فَرَطت قِلعِي ما جانيش ريح
وعاودت ع البَر ناوي
ياما ناس زيِّنا مجاريح
لكين صابرة ع البلاوي

كسرة من الزاد تكفيك
وتبقى نفســــك عــفيفه
والقــــبر بكره يطــويك
وتنام فى جار الخليفه

كيف العمل في رفاقة
الـود فـيهم نميمة
والقرب منهم حماقة
والـبعد عنهم غنيمة

لا تسلك الطرق وحدك
بـحـر المحبة غوارق
وامـشي مع اللي يودك
واترك هوى اللي يفارق

مـا حـد سـالم من الهم
ولا الحصى في الأراضي
لا لـه مـصارين ولا دم
ولا هـو من الهم فاضي

من حبنا حبناه
وصار متاعنا متاعه
و من كرهنا كرهناه
ويحرم علينا اجتماعه

نصحتك ما اتنصحت
والطبع فيك غالب
وديل الكلب لم يتعدل
لو حطوا فيه قالب

ولا حد خالى من الهـم
حــتى قـــلـــــــوع المـــراكب
ماتقـــولشى للندل عــم
وإن كان على الســرج راكـب

ومبين الدق لاخضر
قلت له غطيه
قال لا انت ابن عمي
ولا ابن خالي ولا شريكي فيه

يا قلبي إوعى تعاشر الدُون
ولا تكلِّمُه بالاشتراحة
تكلمه الكلامِ موزون
تلقاه يرد بقباحة

يا قلب لاكويك عاشق بالنار
وان كنت عاشق لازيدك
يا قلب حملتني العار
وتريد من لا يريدك

الجود ماهواش بمـــــال
ولا بلبس القماشــــي
دا طبع في الشخص سلسال
لاهو بماله ولاشي

[Hsn Adl · Rating 4 out of 5]

استمتعت كتير بيه .. عجبني فيه فرده لوجهات النظر والآراء المختلفة حول شخصية ابن عروس .. هل ابن عروس شحصية اسطورية أم حقيقية ؟ .. لماذا سمي بهذا الاسم ؟ .. وما اسمه الحقيقي ؟ .. وهل هو صعلوك مناضل أم صعلوك حرامي ؟ .. ونشأة فن الواو وفن المربعات ؟ مع طرح كل الإجابات علي الأسئلة دي .. كمان ال 77 مربع اللي في الكتاب .. استمتعت حقاً .. لدرجة - ومع محاولة حفظ بعض تلك المربعات - بقيت عامل زي ستي اللاتاته :)

[اشرف الجزار]

مايرقد الليل مفتون ولا يقرب النار دافى
ولايطعمك شهد مكنون إلا الحبيب الموافي

حرامى وعاصى وكداب عاجز هزيل المطايا
وتبــت ورجــعت للــبـاب هيا جــــزيل العطايا

كسرة من الزاد تكفيك وتبقى نفســــك عــفيفه
والقــــبر بكره يطــويك وتنام فى جار الخليفة

الليل ما هـــواش قصير إلا عـلى اللى ينامه
والشــخص لو كان فقير ما حد يسمع كلامه

اللى يداديك داديه واجـــعل عــيالك عـبيده
واللى يعاديك عـاديه روحك ماهياش فى إيده

يا قلبى لاكويك بالنار وان كنت عاشق لا أزيدك
يا قلبى حملتنى العار وتـــريد مـــــن لا يريــــــدك

كيد النسا يشـــبه الكى من مكرهم عدت هارب
يتحزموا بالحنش حى ويتعصــــبوا بالعقــــــــارب

ما ينجــــدك غـــير دمك ولا ينفعــــــك غــــير مالك
واحلف يمين بعد أمك حبيب من النسا ما بقالك

فيهــــم كمــــا هـــمة البين والبعل مســــــــكين قناها
وفيهـــم الدابـــة والتــــنين ورطه على اللى اشتراها

كل عيش بملحك وفجلك وعيش عيشـــــة جدودك
واتمـــد عــلى قد رجـــــلك بلاش تزيد عن حدودك

الندل له طعم مالح وله خصايل ذميمة
القرب منه فضـــايح والبعد عنه غـــنيمة

والله ما هى بسعيك ولا بكتر الخطـــــــاوى
إلا إذا كان ســــعدك فى كل خطوة مساوى

ولابد من يـوم معلـوم
ترتــد فيـه المظـالم
ابيض على كل مظلـوم
واسـود على كل ظـالم

أنا باوَحِّد اللي خلق الناس
خلق مسلمين ونصارى
وناس نامت على فَرش وِكْناس
وناس ع المعايش حيارى

مسكين من يطبخ الفـاس
ويريد مـرق من حـديده
مسكين من يعاشر النـاس
ويـريـد من لا يـريـده

الندل ميت وهو حي
ما حد حاسب حسابه
وهو كالترمس الني
حضوره يشبه غيابه

قلّل كلامك وخليـــــــك في كل محفل مـــوقــر
واحسن لمن كان يأذيك بالسـوء في كل محضر

اللي علي الخير هنيــه وبشره بالغنيمـــــــــه
واللي علي الشر عزيه بكره يلاقي الهزيمـــه

ماأشقاك ياشاهد الزور في الحشر حالك يحزّن
ذنبك لدي الناس مشهور في يوم يبان المخــــزّن

من يبغضك لم يحبــــــك ولو طعمتو الحلاوه
السن للسن ضاحــــــــك والقلب كله عـــداوه

نصحتك ما اتنصحــــت والطبع فيك غالــب
وديل الكلب لم يتعــــــدل لو حطوا فيه قالــب

صابونة العدو ماترغيــــــــش وإن رغت ياللا السلامـــه
إن قعدت في مطرح ماترغيش حتي تقوم بالسلامــــــــــه

لاأنام علي الشوك عريان واصبر علي ماجرالي
واصبر عليك يازمــــــان حتي ينعدل حـــالـــــي

خشب المراكب من السنط
في البحر ياخد مهاجه
واجب ع الحر يلزم الصمت
لَمَا الهِلف ياخد مهاجه

فى البحر لم فتكم
فى البر فتونى
وبالتبر لم بعتكم
بالتبن بعتونى
انا كنت وردة البستان
انتوا لية قطفتونى


فَرَطت قِلعِي ما جانيش ريح
وعاودت ع البَر ناوي
ياما ناس زيِّنا مجاريح
لكين صابرة ع البلاوي

سكت الهَوى والناموس طار
والسبع طاطا بعينه
خليه دا النومِ أستار *
لما الكلب ياخد يومينه



شوف الزمان انتهت عَدَليه
وادي البُطْل ع الحق راكِب
جه السبع يُطلُب عدليه
لَقَي الهِلف ع التخت راكب


اللي حبنا حبناه
وصار ماتعنا متاعه
واللي كرهنا كرهناه
ويحرم علينا اجتماعه




فَرَطت قِلعِي ما جانيش ريح
وعاودت ع البَر ناوي
ياما ناس زيِّنا مجاريح
لكين صابرة ع البلاوي



يا قلبي إوعى تعاشر الدُون
ولا تكلِّمُه بالاشتراحة
تكلمه الكلامِ موزون
تلقاه يرد بقباحة

جاني طبيبي مع العصر
وف إيده ماسك عصاية
اتاري طبيبي قليل أصل
من خصمي جابلي الوصاية

كلام الغَرَابا حِمِلناه
فات علينا كما ريح هاوي
كلام القرابا إخ منَّاه
وياجي فوق فرش الكلاوي



إوعى تقول للندل يا عم
ولوكان على السرج راكب
ولا حد خالي من الهم
حتى قلوع المراكب

ولابد من يوم محتوم
تترد فيه المظالم
أبيض على كل مظلوم
أسوَد على كل ظالم

غربي بلدنا بلد سيح
وادي الهِلف ماشي ورانا
مش عيب كراسي التماسيح
تقعد عليها "الوِرانا"؟*


خشب المراكب من السنط
في البحر ياخد مهاجه
واجب ع الحر يلزم الصمت
لَمَا الهِلف ياخد مهاجه

[Ahmed Nasr أحمد نصر]

أحسد هؤلاء الفنانين الذين يقدرون على قول أشياء تعلق فى الوجدان الشعبي، فلا تميز بعدها بين ما أنتجه الفنان وما أنتجته ثقافة المجتمع الجمعية. للمرة الأولى اعلم ان المثل الشعبي المصري الاشهر: ديل الكلب عمره ما يتعدل ولو علقوا فيه قالب هو إنتاج أدبي لشخص ما.

المربعات جميلة واجملهم:
اللى حبنا حبناه
ويصبح متاعنا متاعه
واللى كرهنا كرهناه
ويحرم علينا اجتماعه

[Qamar Mohamed · Rating 4 out of 5]

يا بت جملك هبشني
والهبشة جت في العباي��
رمان صدرك دوشني
وخلى فطوري عشايا

اللي حبنا حبناه
وصار ماتعنا متاعه
واللي كرهنا كرهناه
ويحرم علينا اجتماعه

[Hussein Beshr · Rating 3 out of 5]

لا تسلك الطرق وحدك
بـحـر المحبة غوارق
وامـشي مع اللي يودك
واترك هوى اللي يفارق

[Ahmed Saleh · Rating 4 out of 5]

احفظه عن ظهر قلب ..
ابن عروس هو نبض صعيد مصر
رغم الخلافات اللي حصلت علي وجوده لكني مؤمن جدا بوجوده
وشرفت اني عملت دوره في مسرحية " ابن عروس
وكان دور مُرهق جدا وشخصية مش من السهل انها تتعمل
..

[Saber · Rating 4 out of 5]

حوريات حرائر أغازلهن بغرام
لسان فصيح بشكرهن عليه ما ران
نحيل الهاف رقيق الديس شفاه ضم رام
غضوب هيف مشذب صيدهن لي حرام

[Fatma Am · Rating 5 out of 5]

كنت عاملة ادور عليها من أول مرة شوفتها في كافية في اسكندرية.الحقيقة أنا استمتعت جدا بمربعته و خاصة أن في منها كثير كنت أعرفها بس ماعرفش أنها بتاعته زي
من حبنا حبنا وصار متعنا متاعه
أو لاقيتك ما اتلاقيتك و الطبع فيك غالب
في كذه مربعة عظيمة فعلا و فيها حكمة و خبرة و في مربعات مش حسيتها اللي يخليني ما استبعدش نظرية أن في حاجات دخيلة عليه . شكرا للي أهتم و عمل الديوان

[Mahmoud ElSherif]

ديوان شعبى من ريحة الصعيد ..قديم و تاريخى و من مصادر الأدب الشعبى فى أغانى و أمثلة الجنوب
زى
من حبنا حبناه و صار متاعنا متاعه
و من كرهنا كرهناه و يحرم علينا اجتماعه

[Ahmed · Rating 5 out of 5]

ابن عرس

[Moustafa Feto · Rating 5 out of 5]

ما اجمل التراث الشعبى !

[Tahani · Rating 4 out of 5]

غزال الجبل منزله منين عاجبنى محنى كفوفه
بيزل بالليل ف الليل وشمس الضحى لم تشوفه