قفص عصافير

by نورا خشبة

ديوان بالعامية المصرية
**
الدنيا سجن كبير"
يشبه قفص عصافير
حابسنا إيد بإيد
يا رفاق السجن
إطلقوا أرواحكم بعيد
يا كل عصافير الحياة
ماتخافوش من القفص
وماتهيبوش صوت الحديد
وماتيبنوش عِشش جوّاه
محناش عبيد..
وإن عصفور منكم نقص
وإن دمكم ف يوم رخص
مايهمّكوش..
إثبتوا وماتيأسوش
ده السجّان هو البليد
وورا كل واحد فيكم يموت
"بيتولد أمل جديد

208 pages, Paperback

First published May 23, 2013

About the author

• شاعرة وكاتبة مصرية شابة من مواليد محافظة الدقهلية.
• ظهرت موهبتها في التأليف منذ كان عمرها 9 سنوات.
• بدأت الكتابة في الشعر الغنائي وقامت بتأليف عدد من الأغاني.
• تُجيد العزف على الأورج والأكورديون ولديها موهبة التلحين.
• أنهت دراسة الإقتصاد والمحاسبة في كلية التجارة جامعة المنصورة.
• أنشأت مدونة "نورا خشبة" في 2008 ، ومدونة "كلام موزون" في 2009.
• شاركت ببعض المجلات الأدبية الشابة مثل "ﭼورنالنا" و "خُد".
• قامت بالتعاون مع بعض الفرق الغنائية مثل فريق "فكرة باند".
• أنشيء كتابها "كلام موزون" في ديسمبر 2010.
• أنشيء كتابها "إلى أبي" في نوفمبر 2012 ، سبق أن نُشرت له مُقتطفات من 2011.
• صدر لها ديوان "قفص عصافير" في يناير 2015 - ديوان بالعامية المصرية عن دار أطلس للنشر.
• صدر لها كتاب "مضيء كالقمر حزين كالبيانو" في يناير 2020 - خواطر أدبية عن دار أطلس.
• أصدر لها الديوان الكامل "كلام موزون بزيادة" أشعار عامية - في يناير 2022 عن دار أطلس.

https://www.facebook.com/Noura.Khasha...
◘
◘

Reviews

[نورا خشبة · Rating 4 out of 5]

الإهداء
**
إهداء إلى نفسي اللي تعباها معايا
إهداء إلى أمي اللي كُلّي من خيرها
واللي علطول شايفاني طفلة مهما كبرت
إهداء إلى أبويا آخر الرجال المُحترمين والرجل الذي أُحبُّه
إهداء إلى عصافيري اللي ماما طيّرتهم وسابتلي القفص فاضي
إهداء إلى نُصّي التاني اللي لسه في الجانب التاني
إهداء إلى إخواتي رِفاق البيت والزُهد والتفاصيل وكل حاجة
إهداء إلى أخويا الصغير رفيق الدرب برغم فروق الزمن
إهداء إلى أختي اللي طِلعت صاحبتي ولصاحبتي اللي طِلعت أختي
إهداء إلى صديقة العُمر اللي لقيتها قُريّب
إهداء إلى عمّي اللي مات وعاش وحداني
إهداء إلى أخويا اللي كان قدّي وبقى ملاك في الجنّة
ولكل حلم خذلني بعد ما خلّاني أستنّى
إهداء إلى سيدنا حمزة وسيدنا الحُسين اللي معرفش ليه زمان حلمت بيهم
بس اللي أعرفه إن ولادي اللي في علم الغيب إتسمّوا بأساميهم
لأحلامي مع الملايكة اللي علطول فكراها وعُمري ما بنساها
للسنين العِجاف والسنين الكبيسة
اللي لولاهم مكنتش إكتئبت وطلع منّي أعقد ما كتبت
للحياة اللي مابتحبنيش
للذكرَى اللي مابتتنسيش
للصبر اللي مابينتهيش
للثورة اللي هتعيش
للحلم اللي مابيجيش
للقرآن اللي علّمني الكتابة وعلّمني كل حاجة
للعُزلة اللي بتعرّفني على نفسي
لكتب أخويا الكبير اللي علّمتني القراية
وأولهم كتب دكتور مصطفى محمود والشيخ الشعراوي وسين جيم
لأغاني عمرو دياب القديمة ولصوت عبد الحليم
ولكل فيلم أبيض وإسود عربي قديم
ولصوت أم كلثوم اللي بيفكّرني بالدفا وبضحكة بابا
ولأصوات البيّاعين الجائلين الغلابة
لأطفال الشوارع ولكل عُمر ضايع
لكل شهيد مات للحق وعاش
ولكل ندر ندرته ولسه أوانه مجاش
لأيام المدرسة ولكلية هندسة اللي كنت هدخلها ومدخلتهاش
ولكلية التجارة اللي كنت مُستحيل أدخلها ودخلتها
لتوم وجيري الوحيدين اللي قادرين مايحسِسونيش بإن العُمر جري
لكوبّاية الشاي اللي مقدرش أعيش ولا أكتب من غيرها
للسلاحف رمز الخطوات البطيئة اللي في النهاية بتوصل
للحيوانات الأليفة والبغبغان
للمُرجيحة وبلكونة بيتنا زمان
للتأمُّل والسما ولكل إنسان حُر
للقُعاد فوق سطوح المصيَف ولبحر راس البر
لغزل البنات والفشار وللبقابيق والإكسسوار
للضفاير الطوال والمريلة الكُحلي
لأشيائي كلها ولحياتي بما فيها حلوها ومُرّها
لكل مكان كان ليّا فيه ذكريات
ولكل حاجة إتأمّلت فيها حاجات
لحصة الرسم وحصة الموسيقى
ولكل موهوب سماعي دارج في لعب المزيكا
لجرس الفُسحة والحصص الإحتياطي
لوقت الفجريّة ولسجادة صلاتي.

[Gehad Abo Elhassan · Rating 5 out of 5]

ديوان رائع وبسيط وكلماته غير متكلفة وفيها صدق وسهل دخوله للقلب