Кругови

by Тина Иванова

Она што го одликува кусиот роман „Кругови“ е што на мал број страници се прикажува еден свет на секојдневјето скопско, современо, денешно, што не е само одраз на сегашниот живот на главната јунакиња, туку и средба со некои вечни дилеми, што веројатно го мачат посензитивниот и поумен човек, секогаш. Притоа, би истакнал една специфична карактеристика на Иванова што мене многу ми се допадна. Тоа е користењето на јазикот. Имено, таа не спаѓа во оние писатели кои би копале во некои архаизми и дијалектизми, но нејзиниот јазик е многу сочен. Тоа е едноставно затоа што има внатрешна поткрепа, дејствува многу индивидуално и лично, од една страна, и препознатливо, од друга страна. Некој поупорен критичар би нашол во прозата на Иванова елементи на филмско сценарио, визуелни елементи во секој случај, затоа што она што доаѓа како плод на визуелното искуство, а тоа е монтажата, дијалозите, атмосферата, има многу визуелни наслојки. Но, токму тоа му дава на „Кругови“ една современа постмодерна структура, што сигурно ја вклучува Иванова во редот на најљубопитните истражувачи во новата македонска проза.

- Александар Прокопиев

Paperback

First published January 1, 2013

About the author

Тина Иванова е родена во 1976 година во Скопје. Дипломирала на Факултетот за музичка уметност во Скопје, на отсекот за музикологија. Од основањето до денес, работи како новинарка и музичка критичарка во дневниот весник „Утрински весник“, каде што четири години беше и уредничка на Културна рубрика. Работела како водителка во музичкото радио Канал 103, но и како музичка критичарка на Првата програма на Македонско радио - Радио Скопје, а нејзини осврти, интервјуа, рецензии се објавувани во повече списанија за музика и за култура. Член е на Сојузот на композиторите на Македонија. Пишува музиколошки есеи за единственото специјализирано музичко издание „Музика“. Автор е на книгата „Документ 103“, за која ја доби државната награда за публицистика „Мито Хаџивасилев-Јасмин“.

Романот „Кругови“ е нејзина прва литературна објава.