روبابيكيا

by محمود حسين

لتحميل الكتاب : http://www.4shared.com/office/RfENj-V...

http://www.mediafire.com/view/?eo8n8i...


حتى لا يبقي كالعادة الخير هو المنتصر في أي أسطورة والسلام ،، لازم نخرج من واقعنا وننزل من ما بين السما والأرض .. أو نطلع مش مهم .
بس المهم نبطل سيرة السبع الاف سنه حضارة عشان قدمت ونبطل نتوه ونصدق أى شئ

ونواجه ولو لمرة في حياتنا كدبة ابريل السخيفة ، ونتمسك بمبادئنا وقيمنا اللي عمرها ما تنتهي بحالنا زي سي السيد الشاب السيس اللي اهتماماته أنه يبقي "روميو" في الفالينتاينز داى . ونفكر
ونحسب هل فعلاً فيه بين الدين والدولة عامل مشترك ؟! يمكن فيه .. ويمكن ننجح لو عايزين !

ممكن نفوق علي أنه حلم من احلام الفانتازيا بالفارغة ، وتنتهى لحاجات كتير وهموم أكتر ، وأهو
هم بيضحك وهم يبكى !

الهموم دى بتموَت جوانا حاجات كتير وتسيب مكان للإحساس اليتيم .. وساعتها يا عالم نقدر
نبيع احلامنا وآمالنا وذكرياتنا لبتاع الروبابيكيا ولا لأ !

......

دي اول تجربه ليا فالكتابه .. حاولت بيه اتكلم واعبر عن شئ جوايا واعتقد جوا عقول وقلوب كتير من الشباب فى سني عن حالنا وعن حال بلدنا.

حاولت اوضح المشاكل اللى بنواجهها وليه المشاكل دي موجوده .. حاولت انه يكون الكتاب إلي حد كبير كويس ومفيد .. واتمني انه يكون كده فعلا.

حاولت ف نفس الوقت انه يكون مختصر ويكون بلغه بسيطه ممكن كلنا محتاجينها بدل التعقيدات والاساليب السوفسطائيه فالحوار.

اكيد كان فيه احسن من كده .. بس ده اللى قدرت عليه وحاولت اظهره فى اول تجربه.

اتمني الكتاب يعجبكم .. واتمني اشوف ارائكم.
شكرا

67 pages, ebook

First published May 16, 2013

About the author

كاتب مصري شاب

Reviews

[We'am Nady · Rating 4 out of 5]

هختصر رأيي في الكتاب بجملة واحدة: "أجمل الأفكار: البسيطة رغم عمقها،، العميقة رغم بساطتها".. ده اللي لاقيته في مقالاتك.
جيت ع الجرح أوي في "حتى لا يبقى الخير مجرد أسطورة"،، كنت بتتكلم عن ناس بتخاف تشوف أبو رجل مسلوخة: أنا منهم.. خد عندك دول كمان: بخاف أنام ووشي مكشوف عشان دراكولا مايجيش يمص دمي،، بخاف أغمض عيني في الحمام لحسن أمنا الغولة تستغل الفرصة..
العميق في الموضوع ده زي ما انت قلت فعلاً إن أساطيرهم عملت جوانا (خلل معنوي جزئي).. مثال أوضَح: من كتر ما كانت ماما بتخوفني من إني أعمل أي حاجة غلط عشان ربنا مايودنيش النار انتشر بين عيلتي وصحابي حوار رعبي من ربنا ده.. النتيجة كانت إيه؟ -أنزل ألعب في الشارع مع صحابي،، حد ظريف منهم يقولي: وئااااام! الحقي! حاسبي ربنا وراكي! .. أروح أنا واخداها جَري طيارة،، أقف لما صوت ضحكهم يعلى.. في اللحظة دي كنت ببقى متخيلة فعلا إن ربنا واقف ورايا وهيأذيني (أستغفر الله).. ومع إني كل مرة كان بيتعمل فيا الحركة مش بلاقي حاجة بس كنت بردو بخاف.. أهالينا بيبقوا فاكرينها مجرد كلمة وهتعدي،، بيستخدموها عشان تحل مشكلة مؤقتة من غير ما ياخدوا بالهم إن كل كلمة ممكن تكون سبب في خلل بيكبر معانا من صغرنا.. الكلام شكله عبيط وممكن حد يشوفه مبالغ فيه بس دي الحقيقة..
من المقالات المتميزة: "فاصل قصير"،، "ما بين الدين والدولة"،، "أحلام فانتازيا"،، "روبابيكيا"..
من العيوب اللي وقعت فيها: - (الاسهاب)،، صعب ان حد يطلعلك مقولة لانك بتوصل الفكرة بكلام كتير،، وده عيبه..
-الكتاب محتاج مراجعة لغوية،، هو أي نعم مكتوب بالعامية بس بردو محتاج.. مثلاً: تقصد كلمة "بعد" بس هي مكتوبة "بعض"،، ألف لينة (ى) مكانها ياء (ي) أو العكس،، (ة) مكانها (ه) والعكس،، همزة فوق همزة تحت،، وما شابه ذلك..
أخيراً أحب أقولك: بداية موفقة،، كمّل،، متأكدة إنك هتوصل في يوم لو صدقت حلمك أوي..
سلامات :)

[Bundok Hs · Rating 4 out of 5]

طيب بص يا سيدي بقى :)
الكتاب بيتناول مواضيع انا شايفها مهمة جداً و كان المفروض يتكتب عنها من زمان بس للأسف الكتّاب معظمهم مشغولين بهري ملوش اي 30 لزمة .. الكتاب في مجمله رائع جداً و طرح افكار جوة دماغ كتير من الشباب اللي زيي و زيك بس متعرفش ليه محدش كان بيتكلم فيها مكسوفين تقريباً ! المواضيع كلها شيقة و لما كنت ابدأ موضوع مش بعرف اقفل الا اما اخلصه كله .. وانا مش ناقد ولا روائي عشان اعرف ايه الاخطاء اللي في الكتاب بس من وجهة نظري البسيطة جداً اللي بتماثل وجهة نظر اي قاريء عادي ان طريقة الكتابة بتاعتك دي في اول عمل ليك اعتقد انها حاجة كبيرة اوي اوي وانا عن نفسي واحد من الناس اللي فخورين بالعمل ده بإعتباري صديق مقرب ليك يعني
ربنا يوفقك يا صاحبي و تبدع اكتر و اكتر :)

[Mostafa Mahmoud ahmed · Rating 5 out of 5]

مهما كان تعليقي على الكتاب انه كويس او مفيد او اي شئ .. شهادتي فيه مجروحه

انا باعتبر الكتاب ده بجد ابني

اشتغلت عليه وشفته وساهمت فيه بجزء بسيييييييييييط جدا لا يذكر

مبروك يا لوكااااااااااا يا اجدع اصحابي وواحد من اخواتي وجزء مني

ان شاء الله يكون الكتاب .. ممتع .. لكل اللى يقراه ويكون مفيد

[Abdallh Ahmed · Rating 4 out of 5]

لما تيجى تكتب كتاب اكيد بيبقا فى بالك حجات كتير وجواك كلام كتير عاوز تولفة جوا الكتاب دا واكيد مش عاوز تكتب عنك وبس وعن مشاكلك وبس لاء اكيد بتكتب عن الناس وعن مشاكلهم وعن اللى حواليك وعن تجاربك فى الحياة حسب نوعية الكتاب اللى هتقأدمهولنا .. لما تيجى فى فترة زمنية قصيرة جدا وبالامكانيات المحدودة اللى بتمتلكها وتقأدملنا كتاب زى دا فا انته ليك مستقبل كويس فى الكتابه .
Mahmoud قدملنا كتاب ملىء بالمفاجأت اللى بنشوفها فى حياتنا بس ما بناخدش بالنا منها
الكتاب فى مجملة (بأستثناء الاخطاء البسيطة اللى موجودة فية) شيق وممتع وعلشان تقرأ اول سطر لازم تكملة للاخر بيعبر عننا وعن معظم الناس اللى اتولدت فى فترة الثمانينات والتسعينيات والجيل اللى لسة طالع دلؤقتى.
* (المقدمة).. كانت ممكن تبقا افضل من كدا واسهل من كدا لكن
* (اهلا وسهلا).. الجزء دا شايف ان هو يتكتب تبع المقدمة انما مش جزء منفصل
*(حتى لا يبقي الخير مجرد أسطورة)..الفصل دا من اجمل ما قرأت هتكتشف فية حجات كتير موجودة فى حياتنا مش واخد بالك منها بس بتشوفها يوميا
الكاتب هنا بيستعرضها فى حوالى عشر سطور من نهاية الفصل بكل ابداع وحرفنة منه من طرح المشكلة وحلها بكل سهولة من غير فذلكة.
*(بين السما والأرض)..فصل مهم فى الكتاب بيرصد فية الفن اللى بيوصل للشارع وبيأثر فى المواطن البسيط وان زمان الفن كان هادف انما دلؤقتى الفن بقا عملية تجارة وفن هابط..
*(سبع تلاف سنة حضارة)..فى الفصل دا الكاتب ابهرنى بذكائة الشديد فى ادخال محمد منير واغانية المؤثرة فى الكلام عن مشاكل مصر التاريخية على مر السنين(امجاد يا عرب امجاد) هكذا وصف الجزء دا من الكتاب..
*(كدبة ابريل)..هنا الكاتب الرائع فى الجزء الاول بيفكرنا بطفولتنا البائسة وان ازى المدرس زمان كان بيعلمنا حجات حلوة كتير .دلؤقتى المدرس هو اللى بيتعلم من الطالب حجات كتيرة الطفل بيسأل الأسئلة الفطرية السليمة ... أسئلة تساعد علي تشكيل الإيمان الصحيح .. مفيش مسلمات عندهم .. لو أجبتهم الإجابة هيسألك بكل ثقة "ليه؟؟" .. لازم تجيب سبب مقنع و إلا مش هيصدقك ..
وفى الجزء الاخير وصف لينا الفتنة الطائفة بين المسلمين والمسيحين ازى بتتم وازى بتدور وازى ان الشعب هو اللى بيتحمل كل شىء فى النهاية وان المشكلة فينا احنا كمسلمين او مسحيين وان كل واحد خطر على دينة..


*سي السيد الشاب السيس
بمجرد ان قريت العنوان فهمت انته هتتكلم عن اية بس خاب ظنى
فى بداية الفصل لائقيت مقدمة من اروع ما يكون. بتبدأ بايات القراءن كل شئ خلقه وصورة ف "أحسن صوره" انك تبدأ بموضوع وتنهى بموضوع دى حاجة جميلة اوى وصفة مميزة فى اى كاتب ذكى واستحالة اكيد تكون جيت معاك صدفة
فى الفصل دا بيتكلم الكاتب عن ازى ان شخصية الرجل زمان كانت شخصية مستبدة ع المرأة يعنى ديكتاتور ..واتحولت علاقة الرجل بالمرأة مع تغير الزمان
(إذا كانت الحياة متوقفة عليك فلابد من انقراض الاحتكار للجنس الأخر لان احتكارك الرأي
مش دليل أبداً علي النخوة ولكنه من قلة الرجولة والكرامة ))جزء من الكتاب
*الفالينتاينز داي
جزء مش مهم اوى فى الكتاب لان معظمنا عارف اية اللى بيحصل فى الليلة دى لكن هو بيحكى بطريقتة عن المواقف اللى بيشوفها فى اليوم دا وقليل جدا ان كل اتنين بيحبوا بعض يكملوا لنهاية المشوار بسبب كلمة اتقألت واخطأ واحد من الطرفين فتكون عندها النهاية ولا يعمل حساب الحب الذى يجمعهم فى تلك اللحظة
*فاصل قصير
بيقدملنا الكاتب فى الجزء دا عن حاجة مهمه جدا فى حياتنا الا وهو التليفزيون وان ازى الاعلانات اللى فية تحولت من تجارة لاعلانات رخيصة جنسية مهينة للرجل والست وان التليفزيون تحول الى انحطاط وتحول التليفزيون الى سلعة رخيصة فى كل بيت مصرى
*ما بين الدين والدولة
اطول جزء فى الكتاب وبعتبرة جزء مهم جدا بيحكى الكاتب عن اللى بين الدين والدولة المواطن وازى تربط بين الاتنين فى الواقع
*أحلام فانتازيا
جزء فلسفى فى الكتاب بيحكى عن الواقع والخوف من الموت وان كل واحد له حلم بيحققة لحساب نفسة لا لحساب غيرة وان كل انسان اكيد بيخاف من الموت علشان عاوز يأدى دورة فى الحياة ع اكمل وجه فى رضا ربنا واكتمال احلامة وتحقيق اهدافة
*هم يضحك وهم يبكي
Mahmoud بيعبر هنا عن ازى التقلبات والمواقف اللى بتحصل فى مجتماعنا اوقات بتبقا مضحكة وفى نفس الوقت مبكية
*إحساسي اليتيم
الجزء قبل الاخير فى الكتاب بيحكى عن نفسة ومواقفة فى الحياة وان اكيد فى شخصيات هو كان بيحبها واتعامل معاها وخذلتة فى النهاية وان ازى هو عاوز ينجح ويحقق حلمة
*روبابيكيا
وهنا الختام ((وان كنت دورت في حياتك ف دور كمان ع الروبابيكيا جواك .. إن لقيت نفسك مش بعيد عن
انك تكون روبابيكيا .. صدقنى .. حاول تتقمص دور الراجل اللى قاعد على عربيه ماسك لجام
وحاول تقدر حياتك بتمن وتشتريها .. وتشتري نفسك ومستقبلك معاها)) سطر من اروع ما يكون
*النهاية
حتى لا يبقي كالعادة الخير هو المنتصر في أي أسطورة والسلام ،،الجملة دى من اروع مايكون
الكتاب فى جمل وكلمات هادفة وصحيحة ورائعة
فى مجمل الكتاب يعتبر كتاب جيد والكاتب بذل فية مجهود كبير من حقى ومن حق اى واحد قراء الكتاب يشكرة ع الكتاب الجميل دا والتوليفة الرائعة دا ..

وهذا كان مجرد رايىء المتواضع الذى لايقدم ولا يأخر

[منى الشربيني · Rating 4 out of 5]

روبابيكيا ...
في الاول كنت بسأل نفسي ليه الاسم ده ؟!
بس بعدين لقيت ان ده انسب اسم للكتاب بعد ما قرأت كذا موضوع مش الأخير بس :) لما لقيت الكاتب بيتكلم عن أخلاق بقت روبابيكيا و قدمت و ضاعت أو بمعنى أصح بعناها

بالنسبة للمواضيع فـ الاسلوب و الطريقة بيتطوروا من موضوع للي وراه .. من ناحية الاسلوب و التشويق و عمق الفكرة و صدقها و لمسها للواقع اللي عايشينه ... من مجرد فكرة "كويسة" لفكرة و كلام راااائعين

من اكتر الحاجات اللي عجبتني اني شفت ان ممكن يكون لسه فيه شباب بيفكروا كويس .. شباب بيفكروا أصلا و بيتأملوا حالهم و حال بلدهم .. بيحاولوا ينقدوا و يوصلوا لاساس المشكلة على امل اننا نقدر نوصل ان شاء الله ... كمان الاسلوب الفلسفي البسيط التلقائي للمواضيع ... و الخلفية اللي عند الكاتب ثقافيا و تاريخيا و اجتماعيا عن المواضيع اللي بيتكلم عنها و دي حاجة مهمة من وجهة نظري لتناول اي موضوع و حاجة تتحسب للكاتب المتمكن من اللي بيقوله :)

نقد صغير هو ان في الاول كده كان الكاتب بيطلع من الموضوع الاساسي و يدخل في حاجة تانية و كنت بتوه منه شوية و تحديدا كدبة ابريل كانت محتاجة شوية ترتيب للافكار ... بس كده :)


كمل و ربنا معاك :)))))

[Karim]

قريت الكتاب ..
- نبدأ بالإيجابي : عاجبني جدا جزئية الدين و الدولة من وجهة نظرك في النقط الي عملت لكل واحدة فيهم مقابل ، زي الذكاة و العدل ، أضافتلي جديد و حسيتها عميقة جدا ..
- تسجل ( كتجرية ) للكتابة و خطوة مهمة لازم يتنبي عليها لو ناوي الإحتراف ..
- خرجت بإحساس إنك عندك إحساس دائم إن الماضي أفضل ..

كنت أفضل ليه عنوان تاني ليه ( دردشة )
- مجموعة أحاسيس صيغت من خلال قصص .. كتير ما كنتش بطلع بشئ يضيفلي كقارئ بحبث ديما في كتاب بقتنيه عن معلومة جديدة أي وجهة نظر جديدة لشئ ما ..
المواضيع غالب عليها التكرار ..

ألف مبروك يا صديقي و إن شاء الله تبقي بداية خير كتير ليك يا صديقي و حبيبي :* ♥

[sheriin · Rating 4 out of 5]

" كُل شيء حواليّا أتحوّل لِـ روبابيكيا .. حتّى إحنا مِن شدة الوجع ، وزحمة المدينه اللي إحنا فيها ، ومواويلها ، وجبال همومنا اللى حواللين رقابنا ، وأيادى احلـامنا اللي خنقانا ومفيش مفر منها ،، بنتمنى نبيع روحنا مُقابل لحظة سـلـام واحده ..
أسلوبه مُمتع ،، كتاب يُمنع لـ مرضى النوستالجيا ..مقالات كتيره عن صفات الرجوله اللى ع وشك الإنقراض ، لتفاهات إبريل وساجة الآلش ، لـ للهموم ، والروح واللمه اللى إنعدمت ،، لـ معنى الـ روبابيكيا وانها مش بتقتصر بس على الجماد ولكن .. الإنسان أيضاً يأتى عليه فتره ويُصبح روبابيكيا لـا أكثر .. دُمت مُبدع ..

[Layla · Rating 5 out of 5]

كتاب صعب تصنيفة .. ماينفعش يبقى أدب ساخر ولا كوميديا سوداء .. تقريباً يعتبر ستيتس طويلة شويتين تلاتة .. :)
أنا لمّا بقرى كتاب دايماَ بحب آخد زى سكرين شوتس من الصفحات اللى بتعجبنى .. فى الكتاب دة ما أخدتش سكرين شوت من أى حاجة لأن الكتاب كلة لازم يتقرى ..

الخلاصة ..
5 out of 5 :)

[Ghada Gamal · Rating 4 out of 5]

الكتاب حلووو جدااااا..احلى مافيه انه واقعى كل موضوع فيه بيلمس شيئ من ماضينا حاضرنا او مستقبلنامن اكتر الموضوعات اللى علقت معايا (احساسى اليتيم)كان جميل تصوير صراع الواحد مع نفسه....بداية موفقة واتمنالك التوفيق

[Yasmin Mohamed · Rating 3 out of 5]

أجمل ما فى الكتاب بساطته وعمق الأفكار فى نفس الوقت
بداية موفقة ..استمررررررر

[لطيفة القارئة · Rating 2 out of 5]

أحسنت ماشاء الله

[Shimolo · Rating 1 out of 5]

اممممممم .. دردشة وكلام مع النفس .. الاسم يشد قوي لكن المحتوى لأ!!

أتمنى للكاتب الجي يبقى أحسن!

[Draziza Ali · Rating 1 out of 5]

رجاااااااااء... لم تكن تستحق النشر ومضيعة الوفت :(

[Ăńă MøĦąmêd · Rating 5 out of 5]

كتابك جميل اوى يا محمود بسم الله ما شاء الله تنوعت واختلفت المقالات الجميلة الهادفة لإحداث تغييرات كثيرة بداخلنا وما شاء الله من نظري مسيبتش حاجة الا ولما اتكلمت فيها او حاولت تعبر عنها بأسلوب مختلف ونقي بعيد عن أي ضغوط حياتية، فأتكلمت بصراحة من قلبك وذكرت مواقف حصلت ليك في حياتك ومن الواضح أنها مأثرة عليك حبتين لكن اللي فرحني اوى وخلانى اشعر بسعادة بالغة بإنك قدرت تسيطر على الحزن اللى جواك وتنتصر عليه في النهاية وتدرك ما هي أخطاؤه وعواقبه عليك فيما بعد..

أنصحك بإنك تستمر في العمل الجميل دا وتحاول تقدم الكثير والكثير لإخراج النور إلي الناس بعد ما الضلمة أثرت علي حياتهم بشكل كبير اوى وملحوظ أعتقد دلوقتي الكل عايش في الضلمة ولازم يحاول على الأقل إنه يطلع للنور ولو شوية يشوف التغييرات الحديثة اللي حصلت في المجتمع وما يحاولش يقف في مكانه محله سر لأنه أكيد هتفوت عليه حاجات كتيرة اوى مش من الصح ابداً إنه يسيبها تعدي عليه مرور الكرام.

أحييك من كل قلبي على كتابك الجميل، وأتمنى ليك التوفيق دايماً في كتابة مثل هذه السطور العملاقة الهادفة التي تهدف في النهاية لأشياء عدة.

[Maha · Rating 3 out of 5]

روبابيكيا
في حاجات كتير معجبتنيش وفي حاجات كنت بعديها مقرأتهاش ومكنتش حابة انه الكاتب بيتكلم عن نفسه في كل حاجة وبيدي دايماً امثلة عليه كان ممكن جداً يطلع نفس الكلام وحايكون احسن لو كان سردها كـ قصة او خواطر من غير ما ينسب الكلام لنفسه وان المواقف دي حصلت معاه .. الشخصيات الخيالية دايماً بتكون احسن في القصص والروايات
اكتر حاجة عجبتني فانتازيا ودا سر الـ 3 نجوم :))
بالتوفيق في العمل القادم

[Magek Luther · Rating 5 out of 5]

روبابيكيا الابداع الفكرى لمحمود حسين
الكتاب عجبنى قوى قوى فى ملاحقته للأحداث
والسلوكيات والطباع المصريه والشرقيه
انا قريته كله امبارح
ماقدرتش اقف فى نصه مع انى كنت جعان قوى
لكنى معرفتش اكل غير لما اخلصه
احسنت أيها الكاتب الكبيير محمود حسين
Mahmoud Kh Hussein
RESPICT LUCC

[Nourhan Rakha · Rating 1 out of 5]

روبابيكيا فعلًا !

[Shimaa · Rating 4 out of 5]

خواطر بسيطة ..

كلام صادق تلقائى من القلب :)

[Mohanad Gamal Ensan · Rating 2 out of 5]

مجموعه من المقالات الالكترونيه الحديثه يروقك بعضها وتنافر بعضها .. مندمجه مع بعضها فى اطار متلاحق .. ولكنها تقليديه وطبيعيه !!

[Nashwa · Rating 2 out of 5]

not bad .. بس قلبت علينا المواجع

[Toqa Medhat · Rating 2 out of 5]

توقعت كتير اوي من الكتاب بسبب المقدمة بتاعته من كتر ما عجبتني، و للأسف خاب ظني ده كل لما قريت اكتر..
في جزئية معينة كان بيتكلم الكاتب عن ازاي ان العنصرية و التصنيف غلط و هو هيحاول يبطل ده، و بعدها على طول تلاقيه بيتحول لشخص عنصري و يقلب بأفكار ستريوتيبيكال عن "الشاب السيس" و ازاي انه اكثر رجوله من "اشباه/انصاف الرجال" دول و حاجات كدة... النقطة دي اثارت استغرابي جدًا..
في تقدير كبير لشخصيات شخصيًا مبحبهاش في الكتاب، بس طبيعي الاختلاف بين الاذواق، الكتاب مكانش... زي ما متوقعاه ممكن خالص بس.

عجبني الكوڤر و الجزئية بتاعت روبابيكيا و حسيت ان المقدمة كويسة جدًا.. غير كدة مفيش اوي.