نسوانجي

by أحمد متاريك

نَص هذا الكتاب يحتوي على بعض الألفاظ اقتضتها الضرورة والتي لن تستقيم فكرة الكتاب أبدًا من دونها، قد يعتبرها البعض خادشة للحياء والذي منّه..ياريت أي حد من أعزائي سكّان الكوكب الداجن إياهم ميطلعش يتّهمني بإثارة الفُحش العام والموت الزؤام والحاجات الجامدة دي..آدينا بنقول من الأول أهو..اللي بيتكسف ميقراش:D

51 pages, Unknown Binding

First published October 16, 2013

About the author

كاتب مصري، وُلِد في محافظة دمياط، عمل سكرتيرًا لتحرير جريدة "اليوم الجديد"، ويشغل الآن منصب رئيس قسم معرفة في موقع "إضاءات".

صدر له حتّى الآن:
1- جوزني شكرًا.. الطبعة الأولى صادرة عن دار مير
2- أنا وأبويا والميدان.. إلكتروني
3-عزازول.. إلكتروني
4- هاني بوتر.. الطبعة الأولى والثانية صادرتان عن دار المصري
5- نسوانجي.. كتاب إلكتروني
6- التاريخ الحرام.. كتاب ورقي صادر عن دار الوطن

فى الصبح طفل برئ و مساه يبان تجاعيد ...و فوق طريق الأيام تجرى الحياة مشاوير...
و... نشوف ملامح الزمن متعاده فى المواليد ...و احنا البشر كلنا أعمار ورق
بيطير... دايره تدور بالبشر وياّ الزمان بتفوت ...دمعه على اللى مضى
دمعة فرح بالجاى ....يا حىّ طول ما انت حىّ مسيره يجى الدور ....دى حكايه متكرّره
من يوم ولادة الضىّ..!

Reviews

[أحمد متاريك · Rating 5 out of 5]

ليه لازم تقرى الكتاب ده من وجهة نظر تقليدية جدا ؟

1-ده أول كتاب في التاريخ يتكتب على متن ميكروباص
2-ده أول كتاب في التاريخ صاحبه لما يبدأ يكتبه ميكونش عارف هوا إيه ولا لما خلصه عرف
3-لأن الكتاب مبيتكلمش عن السياسة أو بمعنى أصح..بيتجاهلها تمامًا
4- الكتاب صغير جدا وبالتالي مش هناخد كتير من وقت سيادتَك الثمين
5- إن أنا اللي كاتبه :D

[Mohamed Abdellatef · Rating 1 out of 5]

تريد أن تشتهر ... إكتب عن الجنس
تريد أن تشتهر أكثر .... إكتب عن الجنس بتفاصيل دقيقة
تريد أن تشتهر أكثر و أكثر ... إملأ كتاباتك بتفاصيل بذيئة و ألفاظ سوقية

مقدمه سيئة للغاية ... دائما ما يشعرني الكاتب الذي يكتب مقدمة عن نفسه بأن لديه عقدة نقص يحاول أن يملأه بهذه المقدمة

السخرية في بداية الكتاب مفتعله و تذكرني أحيانا بحركات محمد سعد الهابطة المبتذلة لاستدرار ضحك المشاهدين

تعبيرات ركيكة في أحيان كثيرة و مقززة في أحيان أخري و ألفاظ سوقية مثل ( تنظرب ) و (يزلط) و(يتمرقعن) و (مطرطأة) و (المتظرظر)و (المتنطط)و(الفاكسات)و(العرر)و(بظت)و(هيفشخونا)

سبة بذيئة لم أعتقد أن يجرؤ أحد أن يذكرها في عمل ما أو ما ما يمكن أن يطلق عليه كتاب

أعتقد أني سأعيد التفكير في القراءة لأشخاص مبتدئين يعتبرون أنفسهم كتابا بعد 4 أو 5 تجارب لأعمال نشرت علي شبكة الإنترنت كلها باءت بالفشل الذريع

النجمه الوحيدة التي يستحقها هذا العمل عن تصميم الغلاف فقط لأنه راق لي فعلا

بشكل عام أعتقد أن هذا العمل يعبر فعلا عن ثقافة الميكروباص و التوك توك و العشوائيات المنتشرة التي أصبحت هي اللغة السائدة و الرائجة حاليا في الأغاني و السينما و التلفزيون و وواضح جليا أنها ستنتنقل قريبا إلي الإعلام المقروء

[Abdelrahman Maher · Rating 1 out of 5]

ولأن المؤلف كتب "ريفيو" فيه خمسة أسباب لأهمية قراءة الكتاب فـ إسمحولى أكتب خمسة أسباب لعدم جدوى قراءته

1. مفيش أى إستفادة منه
2. الاسلوب الأدبى .. اسلوب ادبي ايه !! مفيش اسلوب اصلا
3. صحيح الكتاب 51 صفحة منهم الغلاف و صفحتين فاضيين بس كتاب ممل
4. الخيال مريض و مبالغ فيه
5. المؤلف منح نفسه خمس نجوم بسبب الكتاب ده .. متأثراً بالمثل الشعبى القرد فى عين أمه

قيمت الكتاب بنجمة واحدة بسبب تصميم الغلاف اللى لفت إنتباهي وإن في حد بيبقى معاه ورقة وقلم وعنده إستعداد يكتب فى ميكروباص .

[Basma Maged · Rating 1 out of 5]

اية القرف دا !!!
rating مافيش
بالسالب طيب
البتاع دا(حرام أقول كتاب ) نقلنا لمستوى جديد
في الاسفاف في الكتابة
مقدرتش أضيع وقتي و أكمله

[Remon Abu Elezz · Rating 4 out of 5]

الكتاب كويس جدا
مقدمة نارية ، طريقة السرد بجد فظيعة ،لدرجة انك ممكن تخلص كتاب مكتوب من ٦٠٠صفحة في يوم واحد
الكاتب بيتميز بخفة دم ، بأمانة انا مابطلتش ضحك O:-)
عنده كمان خلفية الكترونية ،
سابلنا في اخر الكتاب لغز بياع الكتب
ع العموم الكاتب اتكلم عن نجيب محفوظ و نوال السعداوي ،،، ماتخفش قريب هاتكون تالتهم :)
مشكلة الكتاب قلة عدد الصفحات ، و الإباحية المفرطة "اللي الكاتب برر وجودها وقال م البداية ما تقراش الرواية "
مستني م الكاتب "رواية " -مش كتاب- غير الكترونية ،، وانا متأكد انها هاتكسر الدنيا

[Sara · Rating 3 out of 5]

الكاتب قال من الأول عن الالفاظ فيه و قال أنه هدفه التوثيق
التوثيق عن واقع أسود كاحل لمعظم شباب مصر
رغم أني مستوعبة الحال بين الشباب لقدر كبير لكني ذهلت لما قرأته
مش قادرة أستوعب فعلا أن في ناس بـ تفكر كده و تكلم كده
حاجة صعبة جداً
هو وثق اللي بـ يحصل و نقده بين السطور و مقدمش حل و ده يتعبر خطوة إيجابية
مش لازم كل فيلم أو كتاب يقول المشكلة ويقدم حلها مينفعش يكون الحل من وجهة نظر واحدة
بـ يتهألي هو كتب الصور اللي الوضع عليها و الكورة بقي في ملعب كل واحد بـ يقرأ أنه يفكر في حل لو هو كده أو حد من أصحابه كده!
الحل مبيجيش من نبع واحد بس ، ده غير إن مشاكلنا اللي بـ تتحل في الأفلام والروايات دي بقيت أوفر
أحنا مش محتاجين حلول أد ما محتاجين حط يحط _ يوثق_ المشكلة قدامنا عشان نأخد بالنا منها نواجها ونحطها قدامنا و الحل هـ يطلع مننا
و ده عجبني جداً
لغة السرد جيدة جداً جداً
الأسلوب حلو و لذيذ و خفة الظل اللي فيه باينة يعني :D
التقديمة بقي كانت عبقرية
المقدمة و الأهداء يعني بجد ذهلوني فعلاً خصوصاً إن الأفكار اللي بـ تطلع كتبتها ملهش وقت
بس فكرة الكتاب اللي أتكتب في ميكروباص عجبتني و تصرف السواق مذهل :D
و بيتهألي نقدر نصف الكتاب بأنه قصة و محتاجه تـ تعمل فيلم قصير أكيد هـ تفيد
عشان اللي اللي مش بـ يقرا يشوفها قدامه يمكن الحال يـ تصلح
الكتاب في المجمل جيد جداً

[Zahrat · Rating 1 out of 5]

اللى كتب الحكاية دى بيقول ان لازم لكل كتاب من هدف وهو هدفه الوحيد هنا التوثيق... لو التوثيق هيكون بالشكل دا يبقى فى مشكله كبيرة جدا
الحكايه اعادة لفكرة فيلم ثقافي بس طبعا هيهات فالفرق فى المستوى والمحتوى كبير
نفسي اى واحد من الشباب بيحاول يكتب حاجه يشوف فعلا هو بيعمل حاجه ليها قيمة وتقدر تعيش ولا هو بيحفر قبرة من اللحظة دى

يا شباب فكروا قبل ما تكتبوا .. وفى ملحوظة اخيرة الجنس والكتابة عن الجنس بدأت منذ بداية الكتابة ولن تنتهى الا بانتهائها ولكن هل تعتقد انها فكره جيدة للتسويق الان ؟ وحتى لو كانت المكاسب مغرية فلن يطول بك الطريق ولربما انك قطعته على نفسك من بدايته

طبعا مفيش نقد لمحتوى العمل .. لانه حكاية شديدة التقليدية لا ترقى لكونها اكثر من ذلك

[Asma Sa'ed · Rating 3 out of 5]

لغة أحمد متاريك تطوّرت وده باسطني :)
لأني اول حاجة بتخطف إنتباهي هي اللغة

-----------------------------------
ثانيًا تقديمة القصة وحبكة الاحداث حلوة
وممتعة وماتحسش بملل بجانب خفة الظل اللي
متعوده عليها من متاريك مهما كان الموضوع
صعب متاريك بسخريته بيخليه سهل، يعني انا
ماحستش إن الكتاب آبيح خالص !
-----------------------------------
ثالثًا النهاية : منطقية جدًا وواقعية
ماحدش يقولي كان متوقع حاجة تحصل تخليهم
يتوبوا ويرجعوا لرشدهم، كان هيبقى منتهى
الإبتذال، ماحدش بيتوب.
إحنا اتعودنا إن المدمن بيخف
والمجرم ضميره بيأنبه في الآخر
إتعودنا إن مشاكلنا تتحل في الروايات
والنهاية تبقى حلوة ومرضية لينا
فمانحسش إن فيه مشكلة اصلًا وإن كل حاجة
هتتحل، ومسير الضال يهتدي!

لكن ده مش الواقع، فيه مشكلة ومش بتتحل
ومش هتتحل طول ماحنا عاملين نفسنا مش
واخدين بالنا منها.
------------------------------------
آولًا لاني نسيتها:
مستنية اكتر من كدا من متاريك :)
واوصي بقراءتها الكاتب يستحق التشجيع اوالنقد.

[ياسمين طارق · Rating 1 out of 5]

يعني مبدئيا كدة اسم الكتاب ملوش علاقة بالمحتوى..المفروض انها التجربة الجنان في القضاء على النسوان,هو فيه تجربة أه لكن تجربة حياتية ل3 شباب أستعرض المؤلف طول الكتاب حياتهم الفاضية..كان ممكن ينقل كل التفاصيل اللي كتبها ديه للي بيقرأ بدون إفراط في استخدام مصطلحات أقل ما توصف به إنها "حوارتية" جاية من الحواري يعني..
كنت ممكن أفهم استخدامه بعض الألفاظ بس الموضوع مكانش بعض خالص.بالعكس الكتاب مجموعة من الألفاظ تتخله القصة على استحياء..تيمة الراجل الملتحي المتدين الفاسق مهروسة مليون مرة في قصص وأفلام ومسلسلات مكانش حاجة جديدة يعني..وكله كوم وقفلة الكتاب,النهاية الخيالية والكتاب بيحكي حاجة بتحصل,ماهو فعلا الكتاب بيحكي واقع لكن مش لدرجة ان حازم يشوف الاشخاص لا ويكلمهم ويقعد شوية :D
حاجةأخيرة,النوع ده من الكتابات اللي بتحتوي على أوصاف وتفاصيل معينة وألفاظ متلحفة بكلمة الواقع وعشان ننقل الواقع ننزل لمستوى متدني في الكتابة,النوع ده له معجبيه لكنه مش هو القاعدة..
مستفتدش حاجة ولا أضافلي حاجة بالعكس من كتر ضيقي بالكتاب قريته في يومين مع إنه مش كبير..
بالنسبة لي أتمنى لك اللي جاي يكون أحسن وأبعد عن اللي قرأته ده يا متاريك :)

[أحمد عبادة · Rating 3 out of 5]

على غرار خطاب مبارك العاطفي.. فأنا لم أكن انتوي قراءة هذا العمل من الاساس بداية من اسمه و انتهاءا بتحذير الكاتب و لكن تعليق بعض من اصدقائي اغراني بقراءته و بدافع الفضول قرأت العمل
الرجل لم يخدعكم , بل على العك�� حذركم قبل البداية و لم اراه تخطى استخدام بعض ممن يطلق عليهم رواة عالميون امثال علاء الاسواني لتناول الجنس في اعمالهم
طبعا العمل لا يرقى لان يكون رواية و لكنه كما جاء بكلمات الكاتب لا يصف شيئا حدث و لكنه شيئا يحدث
الكاتب يتمتع بحس فكاهي ساخر لا بأس به
ما يطرحه الكاتب مشكلة جيل كامل و ربما اجيال لا تمتلك سوى اوقات فراغها و طاقتها فقط و لم يستثمرهم احد
العمل في مجمله متأثر تماما بفيلم "اوقات فراغ" و ان عرض احداث يوما واحدا فقط من حياة ابطال الفيلم
اتوقع للكاتب نضوجا أكثر مع اعملاه المستقبلية

[Ibrahim Awad · Rating 3 out of 5]

الكتاب يتفق شكلا و مضمونا مع فيلم أوقات فراغ ... و ان كان الاصح انه يتحط تحت تصنيف قصص قصيرة للكبار جدا جدا مش للكبار بس و ده اللي الكاتب ذكرة في الاول . جميع الالفاظ و الاحداث الخارجة داخل القصة موجودة 100% في مجتمعنا و الكاتب لم يبالغ في الوصف و انما اكتفى بالذكر .... في النهاية الكتاب مزودش اي حاجة جديدة غير انه قلب عليك المواجع في شكل كوميدي

[Safa Magdy · Rating 3 out of 5]

في البدايه المقدمه وتعريف الكاتب والاهداء عبقري :D
الكتاب دمه خفيف جدا
وزى مالكاتب كتبه ف المواصلات انا كمان كنت بقراه في المواصلات وكنت بضحك طول الوقت :D
الحوار حلو جدا (فكر في موضوع انك تبقي سيناريست )
الكتاب لو كان مغزاه افضل من كده اعتقد انه كان يستحق ال5 نجوم ..

[Samah Hosny · Rating 1 out of 5]

النجمه دي هعتبرها اهداء لسائق الميكروباص المتفهم
للاسف اضعت وقتي بكتاب يستخف بعقليه القارئ
..
من اسوأ ما قرأت للاسف

[Reham Helmy · Rating 1 out of 5]

! ما تقولش عليه كتاب بس

[Muhammad Galal · Rating 2 out of 5]

-- هذا الكتاب لا يُنصح به إلّا لمن هم فوق ال87 سنة !
-- مقدّمة ظريفة ، استحضاره لإيفّيهات الأفلام ، و المشاهد سهّل كثيرًا عليّ تخيّل حالة الشخصيّة محلّ الذكر .
-- الكاتب أهدى الرواية إلى سائق الميكروباص ! ،
لتركه يكتب الخطوط العريضة للرواية وهو جالس جانبه ، و توفير الإضاءة المناسبة له ، و طلبه بكلّ جديّة من الركّاب الهدوء حتّى يُهيّأَ له الجو المناسب للكتابة .
-- صراحة هو سائق محترم جدًا ، و التفاصيل الصغيرة فعلًا هي التّي تصنع الأحداث ، و أتذكّر يوم ذهبت لرحلة الأقصر و أسوان ، و ركبنا في ميكروباص من " الزقازيق " إلى " محطّة مصر " ، كنت أقرأ ، و السّائق يراني و أنا أقرأ ، فأغلق النور من فوقي ، طلبت منه إضاءته ، أضاءه عشر دقائق ، و أغلقه من جديد بدعوى توفير البطاريّة !
سوّاق عن سوّاق بيفرق برضو !
-- أنا شايف لو المحاولة دي نجحت ، الكاتب يروح يعزم سوّاق الميكروباص على حاجة حلوة :D
-- الرواية بها الكثير من الألفاظ النابيْة و الخادشة للحياء ، و لكن بما إنّ حيائي مخدوش مُسبقًا ، و بما إنّي أرى و أسمع مثل هذا كلّ يوم فلا ضيرَ عندي من قرائته !
-- لي بعض التحفظّات على الأداء النحويّ للكاتب .
-- لم تخلُ الرواية من طرافة في اللغة و خفّة ظلّ أضحكتني طيلة قرائتي لها .
-- المؤلّف 51 صفحة ، ممكن تعتبروها رواية قصيرة .
-- الرواية لا ترقى لأصحاب الذوق الرفيع ،
هذه رواية لأصحاب الذوق الصفيق !
-- رواية هلس السنين .
-- حتّة إنّهم صحاب و متعوّدين كل حاجة يعملوها مع بعض ، يبوظوا مع بعض ، و يتوبوا مع بعض ،
فيه ناس كتير كده فعلًا !
-- مغامرة مثيرة عاشها الأصدقاء الثلاثة ، تميّز سردها بنَسَق سريع ، و اتسّم جميع أبطالها بسرعة البديهة و حسن التصرّف " جرُوا كتير الصراحة " .
-- فضلت طول الرواية مستغرب ازّاي خلال كل مسابقات الجري و المطاردات دي ، الأخ التخين " أحمد " موقعش منهم ، و لقيته وقع بالفعل في آخر الرواية :D
-- بالتوفيق ل"متاريك " ، و أتمنّى أن أسعد بقراءة أعمال له قادمة بإذن الله .

[Bahaa Dkrory · Rating 3 out of 5]

اول روايه اقرئها لاحمد متاريك و تجبرنى اعملها ريفيو بشكل مفصل
1- الفكره جميله وبسيطه وتحمل خفة دم وفانتازيا قريبه من روح الشباب تشبه لحد كبير اسلوب فيلم اوقات فراغ
2- قصه مش محتاجه تنويه للكبار +18 لان الاحداث مرتبطه بواقع لا يعيشه الكبار بقدر ما يمثل روتين للشباب يعنى بالبلدى المفروض اللى ينكسف من الالفاظ دى ونحزره قبل ما يدخل يقراها هم الكبار مش الصغيرن
3- لغويا اجاد فى التحول من لغة طلبة الثانوى للغة شباب الجامعه بشكل سلس
4- النقد الموجه للمبالغه فى استخدام الفاظ جرئيه اعتقد انه مبالغ فيه لان كلنا يعرف ان دى نقطه فى بحر مما يقال بالفعل بين الشباب وان كان فيه بعض الافاظ مكنش لها مبرر الا رغبة الكاب فى اظهار قدرته على صدم القارء والعبره فى النهايه بتوافقها مع السياق من عدمه وهو ما اجاد فيه فى النهايه
5- الفكره لا يمكن وصفها بروايه ولكنها قصه قصيره كان يمكن استغلالها بشكل افضل لو نحولت من قصه كتبت على عجل فى لحظة الهام الى عمل متكامل اخذ حقه فى الكتابه ليصبح روايه متكامله الفصول والاركان
6- من قرأ الكتب السابقه لاحمد متاريك يدرك التطور الواضح فى اسلوب الكتابه والاستفاده من مزايا واخطاء تجاربه وهو ما يحسب للكاتب

[Nesma Mostafa · Rating 3 out of 5]

_ ولا أروع من كدا ..

انت لخصت كلام كتير عايزه أقوله ف جمله ف الكتاب :
" الكتاب مش بيحكى حاجه حصلت . الكتاب بيحكى حاجه بتحصل "
كله بيرسم الشرف ع كله . كله بينصح وف نفس الوقت مبيعملش بالنصيحه !!

_ أتلخبطت أنا ف الاول لما لقيتك بادئ بسرد حكايه وبعد كدا الغلاف وفضلت فتره أقول هو الكتاب ترتيبه كدا صح ولا أيه

_ الاسلوب حلو وبالرغم من أنك جوا الكتاب بتعيشنا ف واقع مرير .. بس ف نفس الوقت الابتسامه مبتغبش عن وشي ..

_ لفت نظري الجمله اللي ع التكت وعجبتنى جدا
" الضافر الوسخ أكبر دليل ع أيد عمرها ما أتوضت "

_ ممتنه ليك ... الكتاب وقع تحت أيدي صدفه .. وكنت هندم لو مش قريته

3 نجوم ونص :)

[Moataz Mohamed · Rating 3 out of 5]

أنا قرأت الكتاب ده قبل ما أنام. قعدت "هنيهة" بفكر تقييمه إيه. الكتاب مش كتاب ، هو تخاريف عادية يعني. طب ليه 3 نجوم؟ ببساطة علشان وصف الحياة اليومية اللي بيعيشها شوباب الجامعة الأيام دي ، وأيوة مرتكز ف أسلوبه علي فيلم "أوقات فراغ" ، وده عيب مش ميزة. ولسبب أكثر وقاحة هو إنه خلاني أضحك كتييييييييير ، خصوصا في مشهد المطاردة ف الآخر. كان كتاب .لطيف. هذا الكتاب +18 ، يعني اللي بينكسف مايقرأهوش

[Mohamed Hesham · Rating 1 out of 5]

كتاب بلا معني او هدف.. وبالنسبة لموضوع السرد و انه بيقرر حقائق احب اقول ان افلام السبكي كمان برده بتقرر حقائق و معظم اللي بيحصل فيها بيحصل في الحقيقة و مع ذلك الرأي مختلف .. ولما الدكتور علاء الاسواني بيكتب في كتبه بالتوضيح دا الناس بتقول لا مش حلو لكن هنا الناس معجبة بالموضوع..عموما دا رأي شخصي و هحاول اقرا باقي كتب الكاتب يمكن الرأي دا يتغير

[Amr Gawish · Rating 1 out of 5]

فى البدايه تقيمى نجمه واحده موش عشان الالفاظ اللى فى الكتاب .. انا موش من مدعى الطهاره وخلينا واقعيين كلنا او نقدر نقول معظمنا بيقول الالفاظ دى .. وبعدين الكاتب حذر فى البدايه من الالفاظ فبلاش كلوا يقعد يشتم فى الكاتب
اما بالنسبه للكتاب ذات نفسه اذا جاز تسميته كتاب هوا مجرد كتيب صغير فهو محاوله ظريفه لكتابه قصه قصيره والخروج بعبره من القصه دى بس للاسف خيوط القصه العريضه موش كانت مظبوطه قوى

[Mohamed Albarqi · Rating 3 out of 5]

و نختتم تحدي ال50 كتاب السنة دي بكتاب متاريك الساخر
اللي قعدني ساعة و نص تقريبا في ضحك متواصل , رغم ان الكتاب مالهوش نسيج عام لكني حبيت اسلوبه جدا و انتظرك - كالعادة - في اعمال اخرى تستخدم فيها قدرتك الساخرة بشكل اكبر
دمت بود

[Amr Raouf · Rating 2 out of 5]

لطيفه فعلا .. النوعيه دى من الكتابات بيبقى مض��ك جدا لانه حر , يكتب شتايم زى ما هو عايز و تلميحات قبيحة براحته
بس يفضل كما هو وسيله لتمضيه نص ساعه فقط ... لن تخرج بشئ يذكر زى مثلا اما تتفرج علي فيم لمحمد سعد .. شويه افيهات تضحكك فى خلال الفيلم و خلاص على كده

[Mohamed · Rating 3 out of 5]

كتاااب لطيف جداااا و مقدمه جميله اللغه حلوه ف الكتاب وان كنت افضل ان ستم توحيد نسق اللغه
المقدمه عاجباني جداااا و تحفه طريقه الانتقال من المقدمه للكتاب للاحداث رائع ومشوق تسلم ايدك

[mohamed nabil · Rating 3 out of 5]

الحقيقة المرة

[Yasmeen Al-husseini · Rating 2 out of 5]

الحبكة والاسلوب حلوين الصراحة

[Ayatollah ahmed · Rating 1 out of 5]

طبعا ده مش كتاب و مايستاهلش النجمة اكيد

[محمد رشوان · Rating 2 out of 5]

الإهداء ظريف .. النجمتين دول لعمو سواق الميكروباص المُهدى إليه الرواية ..

[Yusuf Sweilam · Rating 1 out of 5]

5 pages & that's enough

[Mohammed Ashraf · Rating 1 out of 5]

كلمة واحدة بس: خره
ونجمة واحدة بس عشان في حاجات كانت بتضحكني

[Ahmed Saoud · Rating 2 out of 5]

كتاب خفيف عن الواقع الأسود لحياة الشباب في مصر