Ævisaga Árna prófasts Þórarinssonar (1860-1948) eftir Þórberg Þórðarson er ein helsta og frægasta ævisaga íslenskra bókmennta og meðal höfuðrita Þórbergs. Í þessari bók setur hann sig í spor skrásetjarans og lifir sig inn í viðburðaríka ævi hins aldna prófasts, sem Þórbergur kallaði „síðasta fulltrúa íslenskrar frásagnarsnilli“.
Núna hef ég lokið við lesturinn á æfisögu Árna Þórarinssonar en ég hef lesið hana með hléum frá árinu 2019. Þessar bækur eru einstakar og ekkert sem jafnast á við þær, nema mögulega Játningar Rousseaus. Ætli ég taki ekki allt nýja árið í að melta þessar bækur og sakna elsku Árna og Snæfellsness, þessarar ömurlegu en samt guðdómlegu sveitar.