مشروع الدستور الوثيقة الدستورية الجديدة بعد تعديل الدستور المعطل

by لجنة الخمسين

مقارنة جديدة مهمة بين هذه المسودة، وبين دستور 2012
https://archive.org/download/moktarh/...

كتبها القاضي: محمد وفيق زين العابدين

Genres: Nonfiction, Politics

96 pages, Paperback

First published January 1, 2013

Reviews

[هدى يحيى]

مشروع الدستور النسخة النهائية بعد التعديل
:
:
:
:
:
:

[أحمد نفادي · Rating 3 out of 5]

الواحد زهق من كتر الاراء في الدساتير :D

المهم نبدأ مناقشة الدسستور الجديد :D

نبدأ بديباجة الدستور التي لا تعتبر مجرد مقدمة انشائية له بل بها أكثر من مبدأ يعتبروا جزءا لا يتجزأ من مواد الدستور كما نصت مادة تالية على ذلك
أهم ما جاء بتلك الديباجة بعد شوية "الفشخرة" المعتادة يعني :D

1- مصر دولة ديمقراطية " لتاني مرة " وحكومتها مدنية

ولا أعلم سر ذلك الاصرار الغريب على عدم النص صراحة على أن مصر دولة مدنية

2- مبادىء الشريعة هي المصدر الرئيسي للتشريع مع توكيل تفسيرها للمحكمة الدستورية العليا بدلا من الازهر كما في الدستور السابق

دي خطوة ممتازة أولا في الفصل بين ما هو ديني وما هو سياسي قانوني
وثانيا في حصر الأمر على المبادىء نفسها بدلا من الاحكام التي كانت في المادة 219 بالدستور السابق

3- اعتبار الاعلان العالمي لحقوق الانسان المصدر الرئيس للحقوق واتساق الدستور معه

نبدأ بعد كده بالدستور نفسه مادة مادة

مادة 1


جمهورية مصر العربية دولة ذات سيادة، موحدة لا تقبل التجزئة،ولا ينزل على شيء منها، ونظامها جمهوري ديمقراطي يقوم على أساس المواطنة وسيادة القانون.....

بالمقارنة مع نفس المادة بالدستور السابق تعتبر هي هي لم تختلف كثيرا بأنها دولة ديمقراطية ولكن هنا نص على جمهوريتها بينما بالدستور الاخر لم تكن مذكورة والجزء البياني الانشائي الخاص بالاعتزاز والمشاركة الخ الخ..


المادة(3)
مبادئ شرائع المصريين من المسيحيين واليهود المصدر الرئيسى للتشريعات المنظِّمة لأحوالهم الشخصية، وشئونهم الدينية، واختيار قياداتهم الروحية.

هي هي أيضابتحديد الديانات المتاح لها حرية العبادة بالديانات "السماوية" الثلاث فقط أما غير ذلك فلا ذكر لمصدر للتشريع له

مادة 7
مادة الازهر
تكاد تكون هي هي مع اختلاف تحويل تفسير مباديء الشريعة للمحكمة الدستورية بدلا منه مع بقاء المرجعية له في العلوم الدينية وبقاء تعيين شيخ الازهر للقانون


المادة (10)
الأسرة أساس المجتمع، قوامها الدين والأخلاق والوطنية.
وتحرص الدولة على تماسكها واستقرارها وترسيخ قيمها

بقاء تدخل الدولة بالشأن الداخلى بس هم مشكورين شالوا المجتمع وخلوا الدولة بس كده الدسستور الجاي هنلغي المادة كلها :D

مادة 12
لا يجوز الزام أي مواطن بالعمل جبرا الا بمقتضى قانون ولأداء خدمة عامة لمدة محددة وبمقابل عادل ودون اخلال بالحقوق الاساسية للمكلفين بالعمل

أفضل بكثير من النص السابق الذي ترك الامر للقانون فقط دون تلك التحديدات وهي في رأيي لا تكون الا في حالات طواريء فقط مع التأكيد على أنه " خدمة عامة" فقط

مواد التعليم والصحة والتعليم الجامعي والبحث العلمي

مواد جيدة جدا خصوصا إذا تم بالفعل تطبيقها " وهو ما تم ذكره في المواد الانتقالية اللاحقة " مع تحديد نسبة دنيا للانفاق على تلك البنود في الموازنة العامة تعتبر جيدة بما كان يتم صرفه سابقا عليها خصوصا البحث العلمي .. نسب وإن لم تكن كافية الا انها بمقارنتها بسابقة تعد جيدة مع ذكر أنها تتصاعد لتتفق مع النسب العالمية

مادة 19
التعليم الزامي حتى نهاية المرحلة الثانوية أو ما يعادلها وتكفل الدولة مجانيته بمراحله المختلفة في مؤسسات الدولة التعليمية ...

احصائية : عدد أطفال الشوارع في مصر من مليون ل 2 مليون طفل بلا مأوى أو تعليم أو غذاء
ما هي تحديدات كلمة " إلزامي"المذكورة وعلى من تطبق المادة إذا كان المأوى نفسه مفقودا ؟
ومن تجب محاسبته إذا لم يتعلم الطفل
مادة جيدة ولكنها تبقي كلام انشائي حتى ذكر آلية للتطبيق

مادة 25
الخاصة بوضع الدولة خطة للقضاء على الامية

مادة جيدة لكن " يديني ويديك طولة العمر :D

المقومات الاقتصادية

يمكن ملخصتها بالمادة التالية
اقتصاد مصر سمك لبن تمر هندي نهتم بالعدالة الاجتماعية مع فرض الضرائب وتشجيع سوق الاستثمار وضبط آليات السوق :D

مادة 31

أمن الفضاء المعلوماتي جزء اساسي من من منظومة الاقتصاد والامن القومي وتققوم الدولة باتخاذ التدابير اللازمة للحفاظ عليه على النحو الذي ينظمه القانون

هل تلك المادة تكفل للحكومة وضع مراقبة على مواقع التواصل الاجتماعي وشبكة الانترنت ؟
بما انها مسألة أمن قومي إذا فمن الممكن ذلك ومن الممكن أن نتبع ذلك بكلمة نابية

مادة 61
التبرع بالاعضاء ..

لقد هرمنا من أجل تلك اللحظة التاريخية :D
الموجود بالقطاع الطبي ومستشفيات القطاع العام ليلاحظ نسب الفشل الكلوي والفشل الكبدي الرهيبة سيعلم مدى أهمية تلك المادة .

مادة 63

يحظر التهجير القسري التعسفي للمواطنين بجميع أشكاله ومخالفة ذلك جريمة لا تسقط بالتقادم

إذا فمن حق أي أسرة مسيحية تم ترحيلها من موطنها بسبب فتنة طائفية أن ترفع دعوى قضائية على الحكومة بسبب ذلك
ومن حق أهل النوبة ذلك أيضا :D

المادة جيدة ولكنها إذا طبقت لكن أسهلما بالأمر إذا وقعت فتنة طائفية يكون الحل الأمني هو الأولوية ويتم تهجير أهل تلك المنطقة لمنطقة أخرى

مادة 70
الصحف تصدر بالاخطار والقنوات الفضائية بالقانون

نفس المادة بالدستور السابق ولا جديد تحت الشمس

مادة 80

يحظر تشغيل الطفل قبل تجاوزه سن التعليم الاساسي كما يحظر تشغيله في الاعمال التي تعرضه للخطر

نفس الأمر بالنسبة للمادة السابقة مع القول بانك طفل لحد ما تبقي عندك 18 سنة وشنبك خط :D
لكن عمالة الطفل موجودة لكن متبقاش خطر يعني سبي قهوة ماشي ميكانيكي ماشي نفس اشتغالة الدستور السابق

مادة 92

الحقوق والحريات اللصيقة بشخص المواطن لا تقبل تعطيلا او انتقاصا
ولا يجوز لأي قانون ينظم ممارسة الحقوق والحريات أن يقيدها بما يمس أًلها وجوهرها

مادة مكسب في حد ذاتها وتضمن عدم مساس الحريات بأي قانون تالي


مادة 146

اختصارا رئيس الجمهورية ليه حق تكليف رئاسة الحكومة لأي شخص شايفه ومجلس الشعب يصدق على الحكومة لو معجبتوش رئيس حزب الاغلبية يشكل الحكومة مع مراعاة ان وزارات ( الدفاع والداخلية والخارجية والعدل ) يعينهم رئيس الجمهورية لو معجبش التشكيل مجلس الشعب يتم حل مجلس الشعب !!!!!!!!!!!!!!!!

مادة مصيبة ، من البداية الحكومة لرئيس حزب الاغلبية وليه مطلق الحرية ف الوزراء ويشيل الشيلة كلها أو يتم تشكيل حكومة ائتلافية لو مفيش نسبة اغلبية انما ايه النظام ده ؟ مش عارف ؟

مادة 154

اعلان حالة الطواريء لمدة 3 شهور والتجديد يكون بعد موافقة البرلمان او مجلس الوزراء لو مفيش برلمان ومفيش استفتاء زي الاول ويكون ده ل 3 شهور تانيين
طب السؤال بعد مرور ال 6 شهور دول ايه بعد كده؟
هنعرض الامر تاني على البرلمان او مجلس الوزراء تاني ؟
وليه اتلغي موضوع الاستفتاء ؟

مادة 161

البرلمان يقدر يطرح الثقة من الرئاسة بعد موافقة اغلبية البرلمان واكتر من تلتينه ويعرض الامر في استفتاء لو الشعب قال يتشال يتشال ويتم انتخاب رئيس جديد
لو الشعب قال لا البرلمان يتحل :D

كان فيه مادة في الدستور اللي فات زي كده بس كانت العكس الرئيس هو اللي يقدر يحل المجلس ونفس الموضوع كده :D

مادة 189

النائب العام يعين من مجلس القضاء ولمدة 4 سنين بس

مادة حلوة جدا

مادة 204
المحاكمات العسكرية
تختلف المادة دي عن المادة في الدستور الاول بان دي ممكن نقول انها "شبه محددة" لكن مع تواجد الجيش في االعملية السياسية فنيجي لاخر نقطة في المادة " الجرائم التي تمثل اعتداء مباشرا على ضباطها وأفرادها بسبب تأدية عملهم " دي كده هتحصل بالتأكيد وزي ما قال رئيس هيئة القضاء العسكري لو واحد اتخانق مع واحد من عمال بنزينة الوطنية هيتحاكم عسكريا

http://www.youtube.com/watch?v=PQGp00...

مادة 216
يعين رئيس الجمهورية رؤساء الهيئات الرقابية بعد موافقة البرلمان ولمدة 4 سنين فقط

كنت أفضل توكيل تلك المهمة للبرلمان بصفته مراقبا على الحكومة كما هي وظيفة الهيئات الرقابية أيضا

مادة 223
بتاعة العلم :D
الوان العلم وكده يعني علشان الدعاوى اللي كانت منتشرة في فترة حكم مرسي لتغيير العلم مع النص على إهانة العلم جريمة يعاقب عليها القانون وهو ما تلاه لاحقا فتوى ياسر برهامي بأن الوقوف أثناء تحية العلم مباح إذا كان باكراه :D :D
دا فيها سجن يا عم :D

مادة 226

لا يجوز تعديل النصوص المتعلقة باعادة انتخاب رئيس الجمهورية ومباديء الحرية والمسواة ما لم يكن التعديل متعلقا بالمزيد من الضمانات

مادة ممتازة جدا خصوصا بعد تعديلات 71 بتاعة السادات
بس لو عدلنا المادة دي وشيلنا النص ده مش ساعتها اقدر اعدل باقي المواد دي بعد الغاء النص الي بيمنعني :D :d

مادة 234

يكون تعيين وزير الدفاع بعد موافقة المجلس الاعلى للقوات المسلحة وتسري أحكام هذه المادة لدورتين رئاسيتين كاملتين ..

تلك المادة ليست تحصين للفريق السيسي بقدر ما هي تأكيد على مؤسسية القوات المسلحة من يتعامل مع السيسي باعتباره شخص قام بفعل ما فهو مخطيء فالفعل يكون للمؤسسة بالكامل .
بامكان الرئيس عزل السيسي ولكن تعيين بديل له يكون بموافقة مجلس الاعلي للقوات المسلحة " أي المنظومة بأكملها "وهو ما كان يتم في السابق بالمناسبة
موضوع التحصين هو مجرد دعاية فقط ولكن التحصين قائم بحد ذاته فمن وراء السيسي منظمة كاملة هي المحرك الرئيس للاحداث وليس مجرد فعل شخص باختفائه تنتهي كل الامور

كختاما
الدستور بالنسبة لسابقه يعد افضل بكثير خصوصا في مواد الحريات والضمانات السياسية مع تحجيم دور الرئيس
ولكن المشكلة انه كسابقة قلص من درو الرئيس ولكن دور المؤسسة العسكرية موجود بنفس قوته بقضائه العسكري بمجلس الامن القومي ومجلس الدفاع الوطني
هو خطوة جيدة ولكني اعول على القادم أفضل
ربما تلك ليست كل المواد السيئة وربما هناك مواد لم أفهمها بالشكل المطلوب ففهمي هو اولا وأخيرا من شخص عادي غير متخصص في الأمور القانونية والدستورية تلك
لعل أبرز أيجابيات هذا الدستور هي الغاء مجلس الشورى :D
مع بعض النصوص القطعية في الدستور وهو شيء جيد بخلاف الدستور السابق الذي كان يحيل كل شيء للقانون بدون امر قاطع واحد

[عمرو عزازي]

قبل كل كلام نحب نصلي على النبي العدنان ،، و نقول إنه في بلاد الجنون و الواقع اللي سحل الخيال ( كان اسمها مصر قبل كدا ) عمل أهل البلاد دستورين بعد ثورة و انقلاب .. الأول فيهم هباب أما الثاني فزفت و قطران و سواد فوق الهباب

نحب نقول يا سادة يا كرام إن العيب في النظام ... النظام اللي كابس على أنفاس البلاد و العباد بيسرق و يقتل أبناء البلد و يعتقلهم .. مستولى على الدار و أهل الدار و بعد كدا جاي يأخذ الرأي في لون الدهان!

البلد منهوبة و مسروقة و معسكرة في كل حتة ، و جاي يكلمنا عن مشروع الدهان ( قصدي دستور بلاد الواقع سحل الخيال :) )


------ الشعب يريد إسقاط النظام .. الشعب يريد إسقاط النظام -------

[M. Ashraf · Rating 2 out of 5]

كنظرة عامة و من قبل الدخول في التفاصيل هو احسن شوية!!!! يعني حبة صغيرين!!! من 2012 لكن دا ميمنعش انه مش تمام!!! -_- و مظنش انه هيكمل :) مصيرة زي اخواته :)
و زي كل حاجة الكلام حلو :) بس فين التطبيق أو القدرة عليه! يعني بسم الله ما شاء الله كدا الدولة حاطة نفسها في كل حاجة :) ليها فيه و ملهاش بتحمي و تكفل و توفر!!! هي اصلا معندهاش قدرة انها تنفذ ربع الكلام دا -_-

نيجي لباب باب كدا واحدة واحدة نقول اللينا و اللي علينا من وجهة نظري طبعا! :)
- الديباجة
كلام انشا كتيييييييييييير و يضحك من بتاع هبة النيل و مهد الاديان و منبع الحضارات و الثورات العظيمة و رأس إفريقيا -_- و هبة الانسانية!!! لييييييه كل دا!!! ليييييييييييه بجد!

- مقومات الدولة
مقومات اجتماعية
1- الازهر مرجعية الاسلام! يمكن عشان اللي مرينا بيه سبتوها كدا بس انتا اللي هتتحمل العواقب و بالرغم ان قال يعني الشريعة تروح المحكمة و هي حددتها خلاص!!! الاسلام ك دين و للسنة ملهوش كبير أو حد نرجعة مفيش امام، مفيش ولاية ، مذاهب كتير وآراء أكتر ... لكن ماشي.
2- الدولة هتمسك الاسرة -_- عايزها تعمل ايه يعني!
3- رغم انه قال مفيش تميز و مساواة و كل حاجة رجع و قال المرأة هنحمها و هنكفلها و هنظبط مواعيدها عشان توافق بين الاسرة و العمل! و محدش يمد ايه عليها! طب ما الانسان الطبيعي راجل ولا ست عايز الحاجات دي بردوا!
4- في مواد العمال شايف انها تطور عن سابقه ... الاضراب حق :) و منزوع بالقانون
5- شهداء الوطن مادة حلوة
6- الضمان الاجتماعي مادة حلوة بس تطبق
7- الصحة مادة حلوة بس تطبق
8- التعليم حلوة بس تطبق
الكلام ببلاش :)
- مقومات الاقتصادية
و بصراحة الواحد مش عارف هو ايه النظام بالضبط هو كل حاجة على كل حاجة يعني في سوق حر و في تحديد اسعار في منافسة و في دولة هو اي حاجة تيجي بس الدولة تمشي ... الضرائب التصاعدية و بشارائح شكلها حلو يمكن في حاجة في التفاصيل!
- الحقوق و الحريات
-_- حرية الاعتقاد مطلقة!!! بس في بيتك :) و الشعائر للاديان ال3 اعتبرهم 2 يعني!
التميز و الكراهية مجرمين!! و احنا شعب عنصري اساسا هنفضل نقول قردة و خنازير!!! و دول سود و دول هنود!!! هي مادة عشان نخزي العين يعني :)
حق التظاهر! بالاخطار و ادينا شفنا القانون
منع الاحزاب على اساس ديني! حزب النور مش منهم طبعا :)
النقابات المهنية واحدة بس!!!! مع ان ممكن تطلع نقابات مستقلة في كل منهم و يبقى في حركة نشيطة و حلوة!
- مادة التبرع بالاعضاء حلوة :) بس لو اتعملت صح و مبقتش تجارة :)

و تقريبا كدا خلاص ... نيجي بقى للعك كله اللي في الدستور دا
ان كله يشيل كله -_- و خلينا كدا قاعدين لغاية ما يتصافوا -_-
1- مجلس النواب
شهادة تعليم اساسي، و فترتهم 5 سنين و الانتخابات باي قانون قايمة او فردي
المجلس مش عاجبة رئيس الوزرا بتاع الرئيس يجيب رئيس من الحزب الكبير اترفض يتحل المجلس
المجلس مش عاجبة الرئيس يقول يجب تلتين يقولوا مش عايزينة و يعملوا استفتاء يبقى طار الرئيس
الرئيس مش عاجبة المجلس و معاه سبب حلو ينزل هو كمان باستفتاء و يحل المجلس :)
لو اتفقوا و جابوا رئيس وزرا من الحزب الكبير يبقى تمام بس الرئيس يختار وزير الدفاع و الداخلية و الخارجية و العدل
وزير الدفاع بقى لازم يبقى ضابط في القوات المسلحة و متوافق عليه منهم و ال8 سنين اللي جاين محدش يجي جنبه -_-
2- رئيس الجمهورية
صلاحياته مش زي ما كانت في 2012 غلبان هنا شوية :)
هو القائد الاعلى للقوات المسلحة اه بس ولا بيعلن حرب و لا يرسل قوات الا لما ياخد موافقات مجلس الدفاع و النواب ... يعمل حالة طورائ بعد موافقات بردواو تقعد 3 شهور بس اي معاهدة كبيرة و اتفاقية دولة بيرجع فيها للشعب يقولة :) رئيس كيوت يعني :)
ونلاحظ ان بردوا مفيش نائب للرئيس الكيوت :)
3- الباقي
المحافظين ممكن يتعينة و ممكن يبقى في انتخابات روح للقانون
النائب العام بيختارة مجلس القضاء الاعلى
رئيس المحكمة الدستورية بتختارة الجمعية بتاعتها
الهيئة الوطنية الانتخابات بتعمل الانتخابات و في المستقبل بعد 10 سنين كدا لو كمل الدستو ممكن ميبقاش فيه اشراف قضائي :)
----------
القضاء العسكري -_- لايجوز محاكمة المدنين اما القضاء العسكري. المفروض كدا و نقطة و خلصت!
لكن ليه اي حاجة بقى بيمشي من جنبها عسكري :/ يتحاكم المدني عسكري! يعني في 2012 كان مفتوحة قالك 2014 هيحددها حطوا فيها كل حاجة
لغاية ما لقينا اللواء بيقلك لو حتة محطة بنزين وطنية هنحاكمك عسكري
مواد انقالية ان وزير الدفاع قاعد معانا 8 سنين محدش يجي جنبه :/ مجلس الدفاع الوطني و القومي لسة موجودين
-----------
و بس كدا المواد الانتقالية فيها حاجات كتير كأولويات للي جاي جديد قانون اية و تصليح ايه و تعمل ايه
بردوا كله كلام

المرة اللي فاتت الواحد نزل وقال لأ... لأ ... لأ
المرة دي الواحد زهق منهم الصراحة، مبقتش فرقة لأ من نعم!
دستور كله كلام! مواد كتير حشو! ديباجة موضوع تعبير! ناس واخدة راحتها و بتتكتب! دا مش دستور دولة مستقرة! يدوب دا دستور موقف! و مظنش انه مكمل! و لو كمل يبقى مش هتفرق كتير عشان كله كلام مفيش افعال
يبقى ايه يوم 15 و 14 مش هيتزور! احنا شعب بتاع النعم!! و هيعدي زي اخواته و هيروح نفس المكان بردوا زي اخواته :) يبقى ليه انزل في السقعة :) و الامتحانات شغالة :)

و في الاخر نهديكم اغنية الدستور المدني
للمشاركة في العملية الاستفتائية :)
مقدمة لكم
من إدارة الشئون المعنوية!
وزارة الدفاع
-_-
http://youtu.be/iIdNa94s0Zo
في منها أكتر من نسخة رجالي، نسائي ، أطفالي -_-

[Abd]

الخلاصة تتلخص في كلمتين .. انهم يشتغلوننا ^_^

[محمد الحويف · Rating 1 out of 5]

مبدئياً . . خلونا نتفق انه أحسن من دستور 2012 او فيما يطلق عليه " دستور الاخوان " اللي كان مهزلة تاريخية مالقتلوش تصنيف احطه فيه هنا غير " أدب ساخر "

وخلونا نتفق ان المعيار للحُكم عليه لازم لازم مايكونش المقارنة مع دستور 2012 لان مش معني انه احلي منه انه يصلح

مش معني انه احلي من حاجة وحشة انه حلو

هحاول بإختصار اقول الحاجات اللي استوقفتني جامد في الدستور دا

- النسب المخصصة للإنفاق الحكومي

3 % للصحة
4 % للتعليم
2 % للتعليم الجامعي
1 % للبحث العلمي

النسب دي مهزلة بكل المقاييس . . لما يبقي هنصرف 1 % علي البحث العلمي يبقي مانستغربش لما نفضل طول عمرنا دولة متخلفة
واللي هيقولي ان الدستور قال ان دا حد أدني . . خلينا واقعيين دا اللي هيتنفذ

- لرئيس الجمهورية حق إصدار القوانين
- لرئيس الجمهورية حق العفو عن العقوبة او الغائها
- شالوا الجزء اللي كان في دستور 2012 واللي كنت شايف انها من حسناته القليلة . . هحاول اشرحها باختصار
في دستور 2012 لو رئيس الجمهورية طلب حل مجلس الشعب هيحصل استفتاء شعبي . . لو الشعب وافق يتم حل مجلس الشعب لو الشعب ما وافقش يبقي لازم الرئيس يقدم استقالته
في الدستور الجديد بقي شالوا حتة ان الرئيس يقدم استقالته

- المادة الانتقالية بتاعت شرط موافقة المجلس الاعلي للقوات المسلحة علي وزير الدفاع لمدة دورتين رئاسيتين كاملتين
" دي مادة تفصيل "

ونظراً لما سبق ولإني بكره جداً نظرية السم في العسل . . هقول " لا للدستور " وضميري مرتاح . . ودا كان غرض القراءة للدستور اصلاً ان يوم القيامة لما اتسأل قررت علي أساس ايه أعرف أرد . . مش أقول علشان فلان او الاتجاه الفلاني

[احمد الزكى · Rating 3 out of 5]

أولا : النسخة النهائية للدستور هنا
http://bit.ly/dostour_masr_2013

الفروق بين دستور 13 و 12 موجودة هنا
http://www.4shared.com/office/hpAa7fI...
ـــــــــــــــــــــــــــــــــــــــــــــــــــــــ
نيجى بقى للمهم .. بغض النظر عن موقفى من الاستفتاء و انى مش هحضره
هل الدستور ده كمجمل افضل من سابقه و لا لأ ؟!

الدستور ده اشترك مع سابقه فى جريمة هى المحاكمات العسكرية للمدنيين ..و زارد عليه بتحصين وزير الدفاع لمدة 8 سنوات !

بس دى مش مشكلتى .. لحد هنا كان ممكن انزل و اصوت ب لأ ..

مشكلتى الكبيرة اللى تمنعنى من الصتويت .. هى ماذا عن المحاكمات المدنية للمدنيين :D

بمعنى اخر ان كل الضجة الهلامية دى معمولة عشان كلمتين ع ورق مش اكتر و لا اقل !

دستور 71 كان مكتوب فيه مصر دولة ديمقراطية و النتيجة ايه ؟؟!!

بمعنى اخر ان نظام السلطة الحالى و طبيعة البشر المؤيدين ليها لا تضكمن ان المواد الجيدة اللى فى الدستور دجه تتحقق !!
ــــــــــــــــــــــــــــــــــــــــــــــــــــــــــــ

(الاضراب السلمى حق لكل مواطن)

هل حد يتوقع ان بعد اقرار الدستور ده ممكن ندخل فى اضراب عام دون اى تهديد أمنى ؟؟!!


(البيوت لها حرمة و يحذر اقتحامها )

هل بعد اقرار الدستور مش هيتم اقتحام المنازل و القبض ع كل من فيها باسم حماية الوطن و البلد ؟؟!!!!

ــــــــــــــــــــــــــــــــــــــــــــــــــــــــــ

الدستور يستحق 3 من 5 .. حقيقة

بس هو مجرد كلام ع ورق .. لا اكثر و لا اقل !!!

[Mohamed Ateaa · Rating 1 out of 5]

اعتقده الدستور االسابع او الثامن لمصر
وده طبعا بيدل ع الخيبة اللي بالويبة لان في دول دستورها ثابت من كام 100 سنة و اللي بيحصل تعديل او اضافة لبعض المواد
لكن انك تنزل دستورين ورا بعض في سنتيت ديه في حد ذاتها سابقة دستورية
وطبعا الاختلافات طفيفة يعني لو مقرتش بتاع 2012 و قريت ده كانك قريت الاتنين و العكس صحيح
ولا العرب ظاهرة كلامية متعلقة بالصوت و الفم و اللسان
فالانشاء واخدة حقها كانك بتكتب مقدمة للمجمع اللغوي مش لدستور دولة

الطنطة في الدستور ده و اللي قبله و اللي قبله
هو اللي مودينا في داهية

دستور اخر في مزبلة التاريخ

م ع
ديسمبر 2013

هارجع اكرر الكلام ده تاني ع دستور 2015
حاجة تغم

[محمد ذهني]

لا أريد الوقوع في فخ التقييم . ولو أنني قيمت دستور 2012 لا لشيء إلا لأعلن أنني لا يعجبني هذا الشيء. لكن هنا سأتعامل مع الدستور كما ينبغي لأي دستور.
- الدستور مقارنة بدستور 2012 أفضل بكثير. تشعر أن اللجنة هنا أكثر حرفية بمراحل وأكثر تنظيماً وكأنها تعرف كيف تكتب دستوراً حتى في الديباجة أو المقدمة كان من يكتبها يعرف كيف يضع لمسته رغم أنها لم تكن أفضل كثيراً. معظم المواد الخلافية تم تعديلها و كثير من المواد التي كان يبدو جلياً أنها موضوعة لغرض ما أزيلت. وبعض المواد تم تفصيلها. هناك كثير من المواد الجديدة أعجبتني بينما شعرت بالقهر وأنا أقرأ مثيلتها في 2012. شعرت رغما عني أن هذا يمكن أن يسمى دستوراً.

- كان عندي شعور وأنا أقرأ دستور 2012 أنه دستور للإسلاميين. لضمان دستورية البطش والسيطرة وتطبيقهم لما يسمونه بالشريعة. زال عني هذا الشعور . لكنني شعرت بالخجل عندما وجدت أن بعض المواد التي سخرت منها في دستور 2012 موجودة كما هي " مجلس الدفاع الوطني- مجلس الأمن القومي- مادة الأديان السماوية- مادة شرائع المسيحيين- التظاهر- المحاكمات العسكرية". وبعض المواد التي لم توضع في دستور الإخوان لم توضع هنا"نائب الرئيس"

- أغلب الظن أن كثير من أسباب رفضنا لدستور الإخوان كان بسبب الإخوان أنفسهم. وربما نقبل نفس تلك المواد لا لأننا مطمئنين ولكن لأننا لا نستطيع استشفاف من وراءها هذه المرة.

- الدستور شيء هام ولكن هل ينفذ حقاً؟ يعني هل مواد حقوق الإنسان وضمان الخضوع لقضاء عادل تنفذ الآن مثلاً؟ هل كرامة الإنسان وعدم جواز القبض عليه إلا بإجراء قضائي والحفاظ على آدميته ينفذ؟ هل تكفل الدولة بالصحة والتعليم والعدالة والمجتمع والحقوق ووووووو . الكلام جميل. ولكن المؤسسات التي المفترض أنها مستقلة وتؤمن بهذا الكلام وتنفذه معيبة. فما معناه إذن؟

- هل نتفاءل؟ لا أدري حقاً. بل إنني لا أدري هل سأقول نعم أم لا أم لن أذهب. فنحن شعب نعم وسيقول الشعب نعم. ولكن أخشى أن يكون تحضيراً لجريمة جديدة فأعيش عمري أدين نفسي على "نعم" أو يكون فاتحة خير فألوم نفسي انني قلت "لا" أو حتى أقاطع فألوم نفسي بأنني لم أشارك ولو يائساً في ميلاد دستور أو منع جريمة. الثورة جعلتنا نشعر فعلاً بأن صوتنا أمانة وله معنى . ولكن تلك الأمانة في ظل ظروف الوطن أثقل من أن تحمل.

- مع كل سطر كنت أقرأه وأقارنه بدستور 2012 كنت ألعن مرسي ولجنة المائة والإخوان والسلفيين وحزب الوسط وكل من ساهم في تلك المهزلة وجعلنا نعود بعد سنة واحدة فقط لنعيد الكرة وفي تلك السنة حدث ما حدث من انهيار لكل شيء وسالت دماء كثيرة و عشنا ثانية ذكريات الخوف والأمل والكراهية .

[Dalia · Rating 2 out of 5]

قرأته لأعرف ما علي فعله غدًا،والآن بعد الانتهاء منه وخاصة بعد المرور على الأحكام الانتقالية لا أعرف أي شئ..

ودولة تنفق 3% على صحة المواطنين، و4% على التعليم، و1% على البحث العلمي لايمكن أن تترقى إلى مصاف الدول حتى مع عبارة"تتصاعد تدريجيا حتى تتفق مع المعدلات العالمية"، وحتى اذا كان ذلك لن يتم قبل 2017!

ثم ماذا عن بنود إنفاق ال 92% المتبقية، واظن هذا سيحدده مجلس النواب يومًا ما!

مادة 32:
"موارد الدولة الطبيعية ملك الشعب"
حين قرأتها تذكرت الفيلم الشهير "عايز حقي"



وهنالك مواد عن سحب الثقة من رئيس الجمهورية عن طريق البرلمان، ترى لن نحتاج لثورات شعبية فيما بعد إذا فعلت هذه المواد؟
وأليس هذا متوقفًا في الأساس على ان يكون مجلس النواب فعالًا وممثلًا للجميع؟

والملاحظ ان الصياغة كان ممكن تكون أفضل خاصة مع ذكر ذوي الاحتياجات الخاصة بذوي الاعاقة في كل المواد التي أشير إليهم فيها، وكذا ترتيب المواد في أماكن كثيرة كان يحتاج تعديل، فنجد أن ذكر قناة السويس كان سابقًا لذكر نهر النيل مثلًا!

وأرجع وأقول"من حقنا نحلم ولو كده وكده، ونشوف الدنيا حلوة ولوإنها مش كده!"

[Sara · Rating 2 out of 5]

أول كتاب لعام 2014 يخلص :D

قرأته واستفتيت عليه كمان

:D



الملحوظات فيما بعد..وربنا يقدم اللي فيه الخير

------------------
تحديث 6 يوليو 2014
-------------

في ناس خيبتها السبت وناس خيبتها الحد وأنا خيبتي طول أيام الأسبوع

كنت قد كتبت بعض الملحوظات على الدستور ولكنني لا أدري أين هنا الآن فسأكتفي بالقول بإن هناك مواد جيدة تكفل الحريات وتؤكد مدنية الدولة بينما هناك بعض المواد التي أعترض عليها مثل مادة المحاكمات العسكرية

الأزمة ليست في النص ولكن الأزمة في التنفيذ.

عمومـًا،لو لقيت الملاحظات هرجع هنا وأكتبها تاني
أنا كتبت الريفيو دلوقتي بس عشان قلت هكتب :)

[عبدالرحمن حافظ · Rating 2 out of 5]

"لن نكتب دستوراً كل يوم"

وهذا رأيي المتواضع .. إن لم يكن من الدستور بد .. فلماذا لا نكتب الدستور الرائع؟

لماذا نكتفي بالدستور الجيد الذي لا يعطي كل شئ ولا يشمل كل شئ -علي حد زعم المشاركين فيه- وننتظر إلي أن يتم التعديل علي يد المجلس المنتخب ؟

هل تعلم يا سيدي أن الدستور الأمريكي أقدم الدساتير المعمول بها حالياً إجمالي تعديلاته 27 مرة فقط خلال ال200سنة

أما إذا كنت تري أن (احنا فين وأمريكا فين) يبقي (عليه العوض ومنه العوض) نحتاج لمائة عام لكي نفيق من السبات العميق

[Mona · Rating 4 out of 5]

بدأت في قرائته فور إقراره من لجنة الخمسين يعني منذ أكثر من اسبوعين ، وأخذت قراري بالتصويت "بنعم " ، لسبب واحد فقط وهو أن ما يحتويه هذا الدستور يستحق التأييد وإذا تم تنفيذ مواده على أرض الواقع سنرى مصر أخرى بإذن الله .. وطن للجميع وبالجميع ومصر بكل طوائفها ممثلة فيه وفي مواده .. دستور 2013 هو حجر الأساس في دولة مصر الثورة

[Ahmed Oraby · Rating 1 out of 5]

هأو !

[Fatma Mahmoud · Rating 4 out of 5]

سأقول نعم إن شاء الله .

[Rasha Mohamad · Rating 3 out of 5]

مقارنة بالدستور القديم
فهو أحسن بكتير
ولكنه لايرقى الى ماكنت اتمناه
مادة الصحافة لغوا فيها بند اغلاق الصحف ومصادرتها

مادة لحقوق المسنين

مواد بتتكلم عن ذوي الاعاقة بشكل واضح
المادة رقم 7

مادة الازهر الشريف
زودوا عليها
هو المرجع الأساسى فى العلوم الدينية والشئون الإسلامية،
وتلتزم الدولة بتوفير الاعتمادات المالية الكافية لتحقيق أغراضه.

المادة 17 مكنش فيها معاشات للصيادين
أضافوهم في النسخة الحالية

المادة 18 مادة الصحة
مفصلة خاصة في تحديد نسبة للصحة لا تقل عن 3%
اينعم محددوش النسبة كام بالظبط والمفروض كانت تبقى اعلى من كدة
بس أضافوا عليها حقوق العاملين بالصحة
وكذلك المادة 19 و 21 و 22 عن التعليم بس نسبته لا تقل عن 4%
حاطين مادة عن المعلمين
النسخة القديمة من المواد كانت مقتضبة

المادة 23
1% بس للبحث العلمي طب جيتوا على نفسكوا ليه
النسخة القديمة متكلمتش عنه اساسا

المادة 29
مفصلة لحقوق الفلاحين وساكني القرى والارياف وحماية الارض الزراعية

المادة 35
انا فاكراها وكنت معترضة على جملة
(لا يجوز التأميم إلا لاعتبارات الصالح العام، وبقانون، ومقابل تعويض عادل.)
اتحذفت

المقومات الثقافية في الدستور القديم
كانت مادة واحدة بتتكلم عن الاثار على استحياء
في الدستور الحالي 4 مواد عن الاثار وعن اتاحة الدولة للمواد الثقافية لكل مواطن والتزام الدولة بالحفاظ على التراث الحضاري والثقافي وتنميته

المادة 6
النسخة القديمة بتقول : الجنسية المصرية ينظمها القانون
النسخة الحالية : الجنسية المصرية حق لمن يولد لأب مصرى أو لأم مصرية، والاعتراف القانونى به ومنحه أوراقًا رسمية تثبت بياناته الشخصية، حق يكفله القانون وينظمه.

خدوا بالكوا من ام مصرية دي
قديما اي فتاة مصرية تتزوج من واحد غير مصري ابنها ميكونش معاه الجنسية المصرية وبتطلع عينيها في دفع رسوم الاقامة لابنها كل سنة
دي حاجة كويسة جدااااااا

مادة المحاكمات العسكرية بالنسبة لي مفيهاش اي مشكلة
ليس فيها اي اضطهاد للمدنيين ومحاكمتهم الا عند الاعتداء على المؤسسة العسكرية وكل ما يتعلق بها

المادة 234 لا تحصن وزير الدفاع ولا يوجد بها ما يمنع رئيس الجمهورية من عزله حسب فهمي للمادة

انا هروح اقول نعم

[Nehal Elekhtyar · Rating 3 out of 5]

دستور 2013 الاستفتاء عليه بعد ثلاثة ايام من الآن .... لقد قمت بقرأته بالتوازى وبالمقارنة مع دستور 2012 ..... ولم اجد اختلافاً كبيراً او جوهرياً كما كنت احب ان اري فى دستور يليق بدولة عريقة كــ مصر .... الفرق الواضح هى الصيغة المختصرة للدستور الحالى بدون تفاصيل كثيرة كانت فى السابق .... وينم ذلك على ثقافة كاتبيه من لجنة الخمسين الواضحة والتى تتفوق كثيراً على اعضاء الجمعية التأسيسية فى الدستوزر السابق .... الدستور الحالى وضع فى الاعتبار البحث العلمى والمرأه (يهمنى جداً) ووضع فى الاعتبار التعليم والصحة ونسبتهم من الموازنة العامة كبداية قابلة للتزايد تعتبر جيدة

فى نهاية كل مادة يوضع جملة "يحددها القانون" فلماذا لاتوضع هذه القوانين من الآن تحت مواد الدستور حتى يتم التعديل فيما بينها دون المساس بالمواد الاساسية؟! .... هذا رأيى

اعترض على اسلوب وسائل الاعلام فى الضغط على الاراء بالدعوة للتصويت بــ نعم .... فيجب ان يترك الاستفتاء للرغبة الشخصية حسب الرؤية المستقلة لكل شخص دون فرض اى رأى خاص عليه

لايعتبر هذا الدستور عظيماً كما كنت اتمنى ولكنه يعتبر بداية نظر للامور الاساسية فى بناء اى دولة كالتعليم والصحة والبحث العلمى ورعاية البسطاء ومعظم الفئات .... ويمكن الاعتماد عليه لتخطى هذا المستوى حتى لا نظل على نفس الدرج طوال الوقت دون صعود

فى الحقيقة احترت اى تقييم اعطى وكان الخيار امامى من خمس (نجمات).... فكيف اقيم والخيار امامى من اتنين (نعم او لا) .... ازدادت صعوبة ...ولكن يجب ان نتخطى هذه المرحلة .... الله المستعان

[Mannora Elghandour · Rating 1 out of 5]

قد يكون أحسن بعض الشئ من الدستور الذي يسبقه 2012 الذي فرض علينا ...ولكن أجد أن. هذا الدستور هو الأخر فرض علينا...وكما كان يهلل اصحاب الدستور الاول يهلل اصحاب الدستور الثاني...أجده لا بأس به ولكن في بضع نفاط حاسمه وقليله تلغي جمال ما سبقه من كلام ...فاتعجب لماذا كل من يأتي يضع دستوراً يحميه علي مقاسه ...فكما كان يسرق مبارك بالقانون وجعل القانون حصنه إلي أن خرج بريئا وفق لقانونه الذي وبكل غباء حكمناه به ...!أجد أن من سوف يكون بالسلطه وهم معروفون من الآن وجدو لنفسم ثغرات بهذا الدستور كي ينتهكو كل شئ ..اأجد كل من يكون في مكان السللطه يأتيه نفس الغباء أو المرض ...لهذا ...لن اشترك في عمليه التصويت كي لا اندم مثلما ندمت علي مشاركتي في استفتاء الدستور وانتخابات الرئاسه والفشل الزريع الذي تشهده البلد ...علي الأقل لن أشعر بمسؤليه قولي بلا او نعم ولنري الأيام ماذا تخبئ لنا. فإنها لا تبشر بخير ولكن نتمني من الله عكس ذالك ...واتمني أن أسافر منها قريبا فروحي كلها جراحا من بلدي ..فلا أريد أن ارجع لها يوما واعيش بعيد وحبها بداخلي علي ان اعيش بها وكرهها يملأني

[Asmaa Elwany · Rating 2 out of 5]

مفرقش كتير عن دستور 2012 اللى قلت عليه لاء
الماده دى
"ولا يجوز محاكمة مدنى أمام القضاء العسكرى، إلا فى الجرائم التى تمثل إعتداءً مباشراً على
المنشأت العسكرية أو معسكرات القوات المسلحة أو ما فى حكمها، أو المناطق العسكرية أو
الحدودية المقررة كذلك، أو معداتها أو مركباتها أو أسلحتها أو ذخائرها أو وثائقها أو أسرارها
العسكرية أو أموالها العامة أو المصانع الحربية، أو الجرائم المتعلقة بالتجنيد، أو الجرائم التى
تمثل إعتداءً مباشراً على ضباطها أو أفرادها بسبب تأدية أعمال وظائفهم."
تخلينى اقول لاء تانى برضه
......................
مش هنعمل دستور كل يوم هفضل متمسكه بحلم ان يكون فى دستور ممتاز وهتمسك بحقى فى التصويت بلاء

[Noura Rizk · Rating 3 out of 5]

شعب رغاي بطبعه .. :D

فاكرين ف دستور الأخوان قولنا ماده واحده ممكن تنسف الدستور كله .. ماده واحده تخلينا نقول لا حتى لو كان زي الميديا العظيمه بتاعتنا ما بتصورلنا أنه أعظم دستور ف العالم ..

الدستور دا أفضل من الدستور السابق لكن.. كان ممكن يكون أفضل من كدا في مواد كلام انشا ورغي
ومواد مكانها مش الدستور وكل المواد اللي بيحددها القانون دي عليها علامات استفهام كتير .. أنا مش خبيرة دساتير بس عندي خبرة ف ازاي دولتنا بتمشي
وازاي ماده واحده من الدستور ممكن تتفهم بأكتر من معني
وانت ونيتك بقي :\
أنا حاسه اننا بنلف ف حلقة مغلقة وكل شويه نرجع لنقطة الصفر

[محمد · Rating 3 out of 5]

المشروع افضل مما توقعت وافضل بمراحل من المسودات الاولى (لم اقراها بالتفصيل بعدما تعلمت الدرس من مسودات 2012)
مازال به عيوب خطيرة خاصة في نقاط فصل السلطة العسكرية عن السياسية.
من الحسنات الغاء مجلس الشورى المكلف الغير منتج
ومن العيوب مضاعفة عدد اعضاء النواب والغاء الرقابة السابقة
ومن الكوارث تشكيل مجلس الدفاع الوطني

[محمد يوسف · Rating 3 out of 5]

شبه 2012

الا فى المؤسسات العسكريه بس
كله كلااام

[Eslam الغني · Rating 3 out of 5]

المجد للشيطان معبود الرياح من قال لااااااااا فى وجه من قالوا نعم
القداسة للحرية، المجد للشهداء، اﻷمل فى الله والمستقبل
وبس...

[Mohammed Elwahsh]

tyb..

[Ahmad Medhat · Rating 1 out of 5]

يسقط حكم الميري.. حكم البدلة الميري والعقلية الميري والجلباب الميري

دستور العار، عار يكتنف كل من شارك في صياغته

سيسقط كما سقط دستور الإخوان، والأيام بيننا

[Karim Hikal · Rating 3 out of 5]

لا

[Othman Ahmed]

ميتخيّرش عن اللي قبله من وجهة نظري
بس .

[Hagar Shaheen]

مليش نفس اكتب ريفيو .. بعد اﻻمتحان بقى .. او مش فارقة :/

[Mohamed Ali · Rating 4 out of 5]

أراه منـاســب ولكـــن بنسبــة 80% .. 0

[Omaima Shata · Rating 3 out of 5]

نعم ان شاء الله :)