ليلة زفاف أخرى

by كريم مشرف

قترب منها مرَّة أخرى قائلاً:
-نادين، أنا مش عاوز حاجة أنا بس عاوز أعرف ليه انتي سايبة ألمانيا وراجعة مصر؟
تبدّلتْ ملامحها، وتحولت نظرتها من سعادة إلى نظرة استعطاف:
-أرجوك ياعماد بلاش تلح عليَّ.
-أنا مش همشي من هنا غير لما أعرف. انتي وراكي سر مخبياه عنّي؟!
اقتربت منه قائلة:
-عماد إنت واثق إنى بحبك ولا لا؟
ضمها في رقة قائلاً:
-واثق ياحبيبتي، بس أنا مش عارف سر الغموض اللي بشوفه في عينيكي دايمًا. كأنك مجروحة.. كأنك مذهولة .. كأنك مصدومة.. مش عارف .. ولازم أعرف !!

( I would only be in your way )صاحت ويتني

ران صمت طويل . صاحت خلاله "ويتني هيوستن" بصوتها الرائع وكأنها تصنع لهما عالمًا أخر خاص لهما وحدهما.
تطلعتْ في عينيه بحُبٍّ شديد. تصاعدت دقات قلبيهما في عنفٍ. شعرا بدفء يعتري كل أطرافهما، وسخونة تنسحب بهدوء تجاه رأسيهما. ارتفعت حِدة الهواء في الحجرة ليغلق عليهما الباب. أغمضت عيناها كأنها تقاوم شيئًا أقوى منها.
تطلع لشفتيها المكتنزتين، واقترب أكثر، يريد رشفهما بشفتيه.
And I will always love you.
I will always love you.

صدحتْ ويتني أكثر، واقترب منها أكثر..
وعندما تلامست أنسجة شفتيهما الناعمة. فجأة شعر بشيءٍ يبعد ذراعيه عنها بقوة. فتح عينيه المغمضتين ليرى نادين تنظر له بهلعٍ شديد قبل أن يدفعه شيءٌ بقوة لثلاثة أمتار، فيرتطم رأسه بمقعد وهي تصرخ:
-عماد.. إلحقــنـ

160 pages, Paperback

First published January 22, 2014

Reviews

[منار وجدى · Rating 4 out of 5]

24 ساعة هى عمر صحبتى للكتاب رغم صعوبة اليوم ده جدا :)
أولا : هى جرعة مكثفة من كل الأحاسيس اللى ممكن تمر بيها فى كتاب
هاتضحك وتبكى وتخاف وتحس بالحب والرومانسيةوكل حاجة تقريبا موجودة جوا الكتاب ده :D
ثانيا : قدرت تعبر عن إحساس المرأة بشكل مميز جدا فى بعض النصوص اللى كانت أقرب للخواطر منها للقصص
ثالثا : قدرت تثبت تميزك فى أكتر من لون أدبى ( رومانسى - ساخر - رعب )
لكن أكتر حاجة عجبتنى بشكل خاص وقولتلك عليها من قبل ما اقرأ الكتاب هى الساخر

الكتاب بشكل عام ممتع جدا وانت كاتب شاطر ..
لكن نصيحتى ليك فى اللى جاى حاول تفصل الألوان دى عن بعضها ، لأكتر من سبب
علشان يكون كل لون فى عمل متكامل خاص به هو ويكون واخد حقه فى كل حاجة فيكون مميز أكتر
وثاني حاجة علشان ده هايخليك تقف على أرض ثابتة أكتر

أكتر حاجة عجبتنى هى دى :
هى .. تتأنى ، وتلمح وهو .. يتعجل، ويبوح .. العين تفصح"
واللامبالاة تجرح، ووحده الحب يعلم ..
أن لذة التلميح قد تكون خير من
ألف تصريح .. ! "

شكرا على انك كنت سبب عدل مزاجى :)
دمت مبدعا ..

[سارة محمد سيف · Rating 4 out of 5]

حلو :)
مرة اضحك وما اقدرش امسك نفسي من الضحك ومرة اتأثر واقول هو فيه حب كدا دلوقتي؟ :\
ومرة اعيييييييييط على النهايه
بس ليه كل النهايات حزينه كدا :\
مافيش ولا قصه انتهت نهايه سعيده
حتى القصص المضحكه نهايتها كانت حزينه بس الفرق انه الطريقه الفكاهيه و عرضها بهزار هو اللي خفف من حزن نهايتها :\
نفسي في رومانسيه وقصص من غير حزن :\

[أحمد سعيد بخيت · Rating 5 out of 5]

أستاذ كريم .. كتابك دة عمللي مشكلة :D

بداية القارىء لليلة زفاف أخرى لا يستطيع التخمين مطلقًا بأن الكتاب أولى أعمال الكاتب / كريم مشرف و دة طبعا لجمال الأسلوب وسلاسة الكلمات وجمالها

كتاب رومانسي بحس فكاهي رائع واعتمد على تأثير الصدمة بشكل كبير جدًا للقارىء ودة ميزة في حد ذاتها " النهايات الصادمة "
أعتقد ناقش مشكلات موجودة في مجتمعنا
زى كوك الضعيف ,ومصيف بطعم الثورة ,سارة وعصومتي ,لا تبحثو عني
بخاخة طبية
وطبعا دول من اهم القصص من وجهة نظري وخصوصًا بخاخة طبية وهى الواقع الأليم في مجتمعنا.

طبعًا ناقشتهم بحرفية شديدة وبأسلوب وحس فكاهي رائع أضاف للكتاب رونقًا خاصًا

وطبعا جمال قصة الغلاف نفسها لا يحكى عنه

و كله كوم بقا ولعنة ساكسونيا كوم تاني خالص

القصة دي بجد عملتلي مشكلة
اروع قصة في الكتاب بجد وتأثير الصدمة فيها عالي جدًا
بالراحة علينا شوية موووش كدة


نهاية
كاتب متمكن جدا من كلماته و أدواته واسلوب مميز جدا يخلو من اي نوع من انواع الرتابة والملل و
كتاب رائع جدًا جدًا ما شاء الله عليك وفي انتظار جديدك
ولا فرغ مداد قلمك :)

[Samar Elbaz · Rating 5 out of 5]

مجموعه.قصصيه رائعه بس قبل ما نبدأفيها لازم يبقي.في وقفه مع الاهداء
ليه مش عاوز تقتنع يا كريم لحد دلوقتي مفيش اسلحه استخدمت ضدك...فصلني ضحك الاهداء..
كان في قصص حسيت انها قصيره كان نفسي تطول اكتر ..
كوكو الضعيف.ولي لي سمايل فصلتني ضحك في اخرها....لعنه ساكسونيا اكثر من رائعه...ليلة زفاف اخري خلت دموعي تنزل بالمختصر المفيد...
مجظوعه رائعه من كاتب مبدع ذو مشاعر واحاسيس فياضه وحس كوميدي ملوش حل
تستاهل 5 نجوم عن جداره... المهم انك تقتنع عشان نلاقي ليك روايات مستقبليه :-D

[Lai La · Rating 5 out of 5]

احم احم ... بسم الله :)
بداية بالاهداء حاجة جميلة كده ومختلقة اوى .. نقطة لصالحك ^_^
المجمل العام للمجموعة .. جميلة اوى وحلوة جدا على الرغم من ان حد قالى بيقولوا انها مش حلوة .. بس انا شيفاها حلوة اوى ودا كمان لثقتى فى كتابة كريم .. أنا كان نفسى اكتب ريفيو على كل قصى منفصلة بس هاكتفى بمقنطقات ..
* كيوبيد يبحث عن سنجل جديد ، تلميح
" افتح قلبك ما تقفلش. ادى فرصة لقلبك يحب جديد. يحب بجد ...." ياريتك سبته يكمل كﻻمه :)
-اعتقد ان العين هى سهم كيوبيد الذى قلما يخطئ.
*تبا لغرورك .. مراية الحب عامية :p
* رابع المستحيﻻت .. رابع المستحيﻻت
شكرا اوى ع الكﻻم الجميل واﻻحساس الاجمل .. عجبتنى اوى طبعا ودى مش اول مرة اقول رأيى فيها ..
*عشق جديد ..
عشق من نوع خاص ... عشق ﻻ تؤثر فيه الحياة بمشاكلها بل تزده صﻻبة -اﻻ قلة قليلة- .. اللهم أدموجود اباء ما زالوا على قيد الحياة .. وارحم اباء سبقونا إلى أجمل حياة بإذن الله ..

♡ جميلة اوى الحاجات الخفيفة اللى بتمس القلب دى
♥ فى حاجات استدعت دموعى مرة تانية : ليلة زفاف اخرى - الرصاصة الأخيرة -رابع المستحيﻻت
♡ بصراحة اول مرة نظرتى تبقى بالصواب دا .. بجد انت متألق فى اللى انت كتبته واللى قولتلك من فترة جرب تكتب فيه
* لعنة سكسونيا .. بصراحة سبتها للأخر بقصد عشان عارفة انك منتظر رأيى فيها 3:)
للمرة الرابعة أقرأ فصة حب + شخصين من نفس البلد + القثة خارج الوطن + اخيرا نهاية مأساوية ..
عجبتنى اوى .. تحس انها بجد اوى بالتفاصيل .. لوهلة حسيت ان كريم الكاتب اللى بيتقن الرومانسية فى كتاباته ممكن يكتب فى غير الرومانسية .. فاجئتنى وحبيت المفاجأة ...
تسلم ايديك ..
دمت ودام ابداعك ^_^

[اميرة يوسف · Rating 5 out of 5]

الاهداء اولا قتلنى ضحك استمرى فى اقناعه يا اميرة :D

كريم بجد بسم الله ما شاء الله اسلوبك جذاب جداااااااااااا انا خلصتها فى 3 ساعات معرفتش اسيبها و الله بيجبر اللى قدامه انه ميسبهاش ويكملها
اسلوب مشوق جدااااااااااااا و لا قصة مملة سواء طويلة ا قصيرة او كوميديا او رومانسية او حزينة .

ليلة زفاف اخرى ، الرصاصة الاخيرة بخاخة طبية موجعين و ابكيتنى :(
كلهم جامدين اووووى بجد اسلوبك هايل يجبر اللى يقرأ ميسبهاش الا لما يخلصها

الهروب اللذيذ - وليتنى ما احببت عجبتنى اوى ..
نسيبت ال ّ شدة " بهرجّ ياعبد الصمد " موت من الضحك لما عرفت انها حقيقية

لعنة ساكسونيا النهاية صادمممممة فكرتنى بنهاية " الفيل الازرق " متوقعتهاش خالص وحلوة اووووووووى النهاية اقوى من النهاية اللى قبلها :) لنة ساكسونيا بجد موال لوحدها

سارة وعصمونتى ههههههههه لاتعليق بجد :D
الحب و جنونه كان ممكن تسميها " مبروك جالك حب " :)

ليك مستقبل حلو اوى ياكريم بجد و اتوقع انك تتطور اكتر و اكتر هو حلو كونها عامية و فصحى بس المرة الجاية افصل ياكلها عامية ياكلها فصحى

بالتوفيق يا اخى الفاضل :)استمرررررررر :)

[Mohammed Ali · Rating 4 out of 5]

ليلة زفاف أخرى ... خلينى أبدأ من البداية، من الإهداء اللى فصلنى ضحك، وربنا يكون فى عون زوجتك و تقنعها او تقنعك :D
ثم إهداء لجروب حروف اللى كان له فضل على ناس كتير، و بجد فرحت جدا لما شفت الإهداء الخاص بالجروب الجميل ده
ثم يبدأ التحذير المرعب و المهدد الخاص بلعنة ساكسونيا، بس الحمدلله محصلش حاجة
كتاب رائع خفيف، مجموعة متميزة من القصص و الخواطر التى تجبرك على انهاء الكتاب بجلسة واحدة وانت لا تشعر بذلك فكل ما تفعله انك تنتقل بين صفحات ذلك الكتاب بخفة وسلاسة يتحكم بها الكاتب
بين صفحات ذلك الكتاب حزنت و بكيت، ابتسمت و ضخكت حتى البكاء، أما عن لعنة ساكسونيا فهى من القصص المتميزة قد يرجع هذا لطول القصة أو لأنها بها تلك اللمسة من الحب المرعب الذى لم يتناوله الكثير من الكتاب
بداية رائعة لكاتب متميز مثل كريم الذى أفخر أن يكون صديق لى، خطوة واثقة على بداية طريق النجاح إن شاء الله ...
فى انتظار الرواية "العمل الكامل إن شاء الله" ليك

[Shady Behairy · Rating 4 out of 5]

بص يا كريم صلى بينا على النبى انا اتعود اقول ابن عم الحق بس بعد ما قرأت كتابك للأسف هضطر أقول الحق :) بجد تسلم ايدك مجموعة قصصية جيدة جيدا فى تناغم بين الكلمات وخصوصا فى الرومنسيات وفعلا انت ممتاز فى تكثيف الكلمات وتنسيقها والجميل فى القصص بتاعتك انها حكت عن احداث واقعية بتحصل للشباب بشكل عام وليا انا بشكل خاص بص النصيحة انه لسه فى احسن وان ده مش الأخر ولسه الطريق قدامك شوية بس ربنا يوفقك وبجد عمل جميل

أما بالنسبة بقى لقصة لعنة ساكسونية رغم انها تقليدية شوية لكن انت عرفت تحطها فى اطار حلو أقولك..شوية شغل حلوين ربنا يوفقك فيهم

[Safaa Hamdi · Rating 4 out of 5]

في البداية الإهداء ضحكني جداً ،، القصص كلها عجبتني بلا إستثناء
و حسيت في بعضهم إنهم ينفعوا يتعملوا رواية كاملة
ليلة زفاف أخري بعد الضحك بتاع الإهداء كان كفيل يخليني أعيط بعدها
بس مسكت نفسي لأني مش بعيط بسهولة الحمد لله :D
أكتر حاجة عجبتني كوكو الضعيف و سارة و عصمتي و متقوليش يا رورو .. و غيرهم
المجموعة القصصية كعمل أدبي فهي جميلة جداً و عندي ثقة تامة إن الكاتب لو كتب رواية كاملة هتطلع خرافية بلا شك
لأن الحس الأدبي عنده عالي :)
الغلاف عجبني أوي هو و الاسم
تقييمي ٤.٥ لأني حسيت ببعض الملل في بعض القصص

[محمود خواجه · Rating 4 out of 5]

كتاب روعه لصديقى وأخى الكبير وأستاذى كريم مشرف.. وإبن بلدى كمان :D
أولاً.. القصص الأولى روعه والنجمة اللى راحت دى علشان كنت حاسس إن فيه خواطر مش قصص فى الكتاب
ثانياً.. لعنة ساكسونيا.. دى بقى اللى ليها نجمتين لوحدها.. قصه روعه، متوقعتش نهايتها أبداً دا غير إن استاذ كريم دخل ف مسار مختلف تماماً عن المسار بتاع القصص وحولها لقصة رعب.. " رعب+ رومانسية+ ضحك " دول كانوا ف القصة دى بس..

نجمتين علشان القصص اللى عجبتنى..
نجمتين علشان لعنة ساكسونيا
النجمة اللى راحت علشان حسيت إن فيه خواطر ف الكتاب.. لكن طبعاً متأثرش على روعة الكتاب..
من الأخر كدا تسلم إيدك يا استاذنا :))

[إيمان · Rating 4 out of 5]

مجموعة قصصية منوعة للكاتب كريم مشرف مابين الرومانسى و السياسى و الحزين حتى ايضا الرعب لم أشعر بملل اطلاقا من صفحاتها و إن لم تعجبنى بعض القصص ولكن الاغلب كان متميز ..
عجبنى جدا كلا من :
ليلة زفاف أخرى
تلك اللحظة
كوكو الضعيف لى لى سمايل
لحظة اعتراف
مصيف بطعم الثورة
الهروب اللذيذ
بهرج ياعبد الصمد
طرف ثالت
ربع ضارب
لعنة ساكسونيا
* مجموعة اعطتنى أمل فى المجموعات القصصية و فى أنتظار العمل القادم للكاتب كريم مشرف

[Live Goes · Rating 5 out of 5]

الحقيقه ان المجموعه القصصيه دى من احلى المجموعات الى قراتها من اول الاهداء :D لحد الاخر الاسلوب سهل اوى وبسيط اوى ده غير انها قصص دمها خفيف مش مكلكعه تقفلك وتخليك تلف حوالين نفسك والحقيقه ان الكتاب خرجنى من مود اكتئاب لمود ضحك مجموعه المشاعر الكتير سواء رومانسي او ضحك او رعب او سخريه لا تقاوم وفى انتظار الكتاب التانى

[Ammaryosrii · Rating 5 out of 5]

لعنة ساكسونيا دي بالكتاب كله والله
ليتني ما أحببت جميلة وعجبني الكلام اللي ف التلميح

لولا إني نمت في نص الكتاب كنت خلصته في قعدة واحدة ،، إستمتعت جدا

[Marioma · Rating 4 out of 5]

جميل،،وخصوصا:لعنة ساكسونيا..بخاخة طبية..ربع ضارب..سارة وعصومتي :))) تحية للمؤلف لكونها أول مجموعة قصصية له .. :)

[samar samir · Rating 3 out of 5]

مجموعة قصصية لا استطيع ان احددها اذا كانت روانسية او مضحكة او او ..

اعجبنى وخاصة النهايات الصادمة التى توجد فى الكثير من القصص واسماء القصص التى تجذبك لقرائتها .. بداية موفقة

[Ahmed Slim · Rating 4 out of 5]

أخدني كتاب ليلة زفاف أخري الي عالم رومانسى جميل أحينا وحزين أحيانا ..ولكن دائما كنت بتفاجئني بصدمة في نهاية أغلب القصص ..متحكم في أدواتك كويس أوي وعارف تدير الحوار سواء فصحي أو عامية ..دا لأنك موهوب حقيقى .من أكتر القصص اللى شدتنى وعجبتني جدا ليلة زفاف أخرى والهروب اللذيذ بخاخة طبية ..اما عن المرح اللي متعودين عليه في شخصيتك ..كتابك لم يخلو منه ربع ضارب ومصيف بطعم الثورةوكوكو الضعيف وغيرهم كتير ..أما بقي عن لعنة ساكسونيا فحدث ولا حرج فقد تفوقت علي نفسك فعلا في القصة دي يا كريم ..وكنت برجح تكون هي أسم الكتاب أو كتاب مستقل بذاته ليها لوحدها ..أبدعت في ليلة زفاف أخري وفي أنتظار كل ماهو جديد منك

[Fặ Đi Là]

كتاب يدل على مهارة الكاتب كريم مشرف فاستحالة تتوقع ان ليلة زفاف اخرى اولى مؤلفاته لما فيه من ابداع وتميزه بالسهل الممتنع
احاسيس كثيرة تتملكك عند القراءة لكل قصه حاله تعيشها الى ان تصل لقصه لعنه ساكسونيا
قصه رائعه ومفجاة وبها الكتثير من الاحاسيس الفرح الحب والرومانسية الاشتياق المفجاه والتشويق والحزن
يعنى كولكشن مشاعر
القصه دى كانت عايزة تبقى رواية لوحدها بجد رائعه

[Aya Yoya · Rating 5 out of 5]

ابهرتنى
احسن من اللى توقعته كتجربه اولى
مستنيه العمل اللى جايه بشوق
بالتوفيق
>>>>>>>>>>>
بس المره الجايه هشترى بقى مش لازم هديه :D