الضفدع

لاشين #13

by شيرين هنائي

يجلس أسامة الصاوي إلى منضدة جوار الواجهة الزجاجية لمطعم «المثلث الطائر»، المختص في صنع كل أنواع «الكريب» عدا النوع الطبيعي الذي أراده الفرنسيون لهذه الأكلة. ينظر أسامة إلى السور العالي الذي يحجب عن الجميع منظر البحر، ثم ينتقل تركيز بصره لا إراديًّا إلى انعكاس وجهه على الزجاج.

خمسة أشهر مرَّتْ على رحيل حفيده عمر، وطلاقه من حبيبة عمره؛ سهير. أذابت الأيام الطوال دهون وجهه وجسده، ففقد نحو عشرين كيلوجرامًا، وتهدَّل الجلد أسفل ذقنه، وغارت عيناه في محجريهما، فبدا أكبر من عمره بعشرة أعوام.

112 pages, Paperback

Published January 1, 2024

About the author

شيرين أحمد هنائي،مصرية،خريجة كلية الفنون الجميلة قسم الجرافيك و الرسوم المتحركة.
تعمل مخرجة رسوم متحركة،مترجمة،كاتبة سيناريو و روائية
صدر لها:
-سلسلة حكايات الظلام المحظورة:
1-عجين القمر
2-الموت يوما آخر
-رواية نيكروفيليا 2011-
-رواية صندوق الدمى 2011
-رواية طغراء 2014
-رواية ذئاب يلوستون 2015
-المشاركة في كتاب الكوميكس خارج السيطرة

تكتب شيرين هنائي في مجال الرعب الفلسفي

Reviews

[Mohamed Metwally · Rating 2 out of 5]

للأسف أول كتاب في السلسلة اعطيه تقييم نجمتين، بس السبب مش انه معجبنيش لكن لسببين آخرين. الأول هو غياب نجمين السلسلة لاشين وسهير، القصة كلها عن أسامة، وهو بالنسبة لي من الطاقم الثانوي للعمل اللي دوره يسند خلف لاشين وسهير، لكن انه يكون ليه عدد كامل لوحده هو وعيلته؟ مش احسن حاجة بالنسبة لي. السبب الثاني (وهو نتيجة مباشرة للسبب الأول) ان العمل بعيد تماما عن عالم لاشين وشياطينه، وأيضا لم أحس بأنه ينتمي لروح و تيمة السلسلة.
أرجو أن يكون العدد القادم يحتوي على عودة قوية للب القصة، وأن يعود لاشين وشياطينه للظهور مرة أخرى

محمد متولي

[حبيبة · Rating 3 out of 5]

"يهز أسامة رأسه للمرة الألف اليوم؛ كل ما يقال غريب، لا ينفذ إلى عقله، ولا مزاج له للتفكير والتحليل. هو فقط يريد أن يتناول لقمة ثم يختفي من العالم."
كلنا يا عمو أسامة والله كلنا

[إيمان ⚘️ · Rating 4 out of 5]

العدد ده خلاني اتعاطف سيكا 🤏🏻 مع أسامة وماشوفوش سمج أوي زي الأول.
برغم غياب لاشين ومهاب وسهير إلا إنه كان عدد حلو مش وحش زي ما كنت متوقعة.

[سارة سمير · Rating 3 out of 5]

الجزء دا خيب املي بشكل كبير رغم اني بحب شخصية اسامة ووجوده ضروري بس انه يكون بطل القصة بشكل كلي وهو ما عندهوش امكانية التصرف في الازمات والمواقف الماورائية
فغاب عننا في الجزء دا حبايبنا لاشين وسهير تماما وروحنا دسوق نعيش العدد مع عائلة اسامة وحياته في بيت العيلة مع اولاد عمه وزوجاتهم واولادهم

كانت مخيبة للأمل بشكل كبير والنهاية وكشف سبب الاحداث برضو كان متوقع اوي وانتظرت ظهور لاشين بأي شكل لكن للأسف اختفى تماما ودا خلى الاحداث بطيئة ومملة بشكل كبير نوعا ما وفي انتظار قراءة العدد اللي بعده واعتقد هنرجع فيه لعالم الشياطين وصديقنا اللطيف جداااا لاشين

[إسلام عماد · Rating 4 out of 5]

عدد جديد من سلسلة لاشين لا يخلو من الإثارة والتشويق، حتى وإن اختلفت ساحة الأحداث والشخصيات وبطل القصة مؤقتًا.
عدد خاص بأسامة الصاوي مع أفراد عائلته، في منزل يحوي بداخله من الأسرار والمشاكل ما يكفي سلسلة أخرى بأكملها أو مسلسل ٣٠ حلقة يليق بموسم شهر رمضان.
عدد عن خطايا الآباء التي يتحملها الأبناء فيعيدون تكرارها، وعن دوافع البشر التي تجلب الخراب على رؤوس الجميع، وعن شقاوة الأطفال القادرين على كشف المستور وفضح المخبوء مهما طال الوقت، وعن علاقات معقدة بين شخصيات عديدة أعترف أنني ارتبكت وامتزجت أسمائهم مع هوياتهم بعقلي في مواقف مختلفة، لكني سرعان ما كنت أستعيد السيطرة وفقًا لسياق الحديث والأحداث.
عدد قابل لوصفه قصة بوليسية على غرار "من فعلها"، ليؤكد تفوق الكاتبة شيرين هنائي بالفطرة في كتابة الحبكات البوليسية حتى وإن لم تبد القصة كذلك، ورغم توقعي لفكرة السلم السري قبل الكشف عنها بصفحات كثيرة، إلا أن تفسير واستغلال الفكرة في الأحداث كان مميزًا وقادرًا على إدهاشي.
عدد أعجبني، فلم يخب ظني في السلسلة حتى الآن، وجعلني أستمر بوضع الآمال العليا عليها وعلى الكاتبة، ليمتد وجود مشروعها الجميل بمزيد من الأعداد.

[شيماء هشام سعد · Rating 5 out of 5]

هذا الجزء أحب الأجزاء إلى قلبي لأسباب كثيرة، منها:
-أنه يدور بالكامل في مكانٍ واحد يرتبط به كل من يقيمون فيه، مع تسليط الضوء على روح ذلك المكان ومشاكله.

-أنه يتناول تيمة مهمة وهي بيت العائلة وما فيه من صراعات.

-أنه حتى الآن أفضل الأعداد تشريحا لنفسيات الشخصيات واقترابا من حيواتهم الخاصة.

-التشويق هنا ذو نكهة مختلفة، لعل هذا بسبب كون بيت العائلة هو مصدر الرعب هذه المرة.

-التطور الجميل في شخصية أسامة الصاوي واقترابنا منه أكثر واطلاعنا على حالته النفسية وتشتته بين غيرته وحبه لسهير.

في انتظار العدد القادم.

[Salma Khaled · Rating 4 out of 5]

❞ للخرافات ألف تفسير و للحقيقة تفسير واحد مدفون في نهاية درب مظلم ❝
على عكس المتوقع و برغم أن هذا العدد بطولة أسامة ، و غاب عن العدد تمامًا الأبطال الرئيسين مثل سهير و لاشين إلا أنى أحببته ، أنا لست من كارهي أسامة ، أنا أشفق عليه في أغلب الأحيان .
و في هذا العدد نقترب من عالم أسامة كما لم نقترب من قبل و نتعرف على عائلته ، و نعيش معه مغامرة فى بيت العائلة " بيت الزواحف 😂 " ، و ندرك كم كان على حق أن يتمسك بقراره فى البعد بأسرته عن هذه العائلة المريضة .
نهاية مميزة لسنة 2025 بعدد من أعداد لاشين ❤️
31/12/2025

[Ahmed Halawa · Rating 3 out of 5]

مش ريفيو ده دردشة مع نفسي عن العمل و فيها حرق للأحداث ⚠️

بالرغم من اني كان عندي انطباع عن العدد قبل القراءة من مراجعات الاصدقاء و اتكلمت مع الأستاذة شيرين عن السلسلة و عن اني عاوزين مغامرة و عاوزين لاشين يكون فعال في الأحداث

جيه العدد رقم ١٣ و طلع مختلف عن توقعي هو له و عليه

-مشهد خناقة أسامة و محمد طليق رانيا كان حلو اوي.

-رفاعة المنجد عسليه.

-لغة أو سيم المنجد و الصبي اللي معاه حكاية و اول مرة اسمعها

ندخل بقي علي السلبيات

-انا تهت اكتر من مرة في فكرة تصميم البيت من جوه.

-الشخصيات توهتني شوية لأنها كتير و في مكان واحد .

-كفاية الحديث عن روايات لاشين جوه أعداد لاشين يا استاذة شيرين .

-مع التقدم في قراءة العمل كان باين جدا السر هيبقي ازاي .

-مش عارف ده غلطه ولا سوء فهم مني لتصميم البيت ازاي شقة محمد حصل فيها حريق و هي علي الشمال مش اليمين يعني مفيش فيها سلم خشبي!!

في انتظار المغامرة القادمة نعرف في ايه مع شريف

[Fatma Desoky · Rating 2 out of 5]

انا هعمل ( رابطة كارهي الاستاذ أسامة الصاوي )
حقيقى راجل رخم حقيقى
ومش فاهمة سهير بتحب فيه ايه؟
النجمتين دول مش عشان الرواية وحشة ابسلوتلى
انا نفسي اديها خمس نجوم عشان خاطر بيت الزواحف (العيلة) لكن النجمتين دول عشان خاطر عيون أسامة، حقيقى راجل ضفدع فعلا 🤬

[Zainab Hassan · Rating 5 out of 5]

أول ريفيو 🤌😅
بسم الله كدا بادئ ذي بدأ العدد خلص قبل ماابدأه نطالب بعدد كبير شوية حني علينا بقا😂 (بس أهم حاجة إنك مش سيبانا حتى لو العدد صغير اهم حاجة متحريمناش)

بدأت قصتنا في المطعم أسامة ومعاه الحاج مدحت القمر ابن الأصول والواد محمد الرزل طليق رانيا والحاج مدحت أفحمه وأسامة لطشله ..وبعدها سيبناهم وروحنا مع أسامة بيت العيلة اللي هو بيت الزواحف لأ بيت العقارب 💔😂 وبصراحة استغربت أوي من فكرة التنجيد بتاع العريس ده عشان زمان كان التنجيد بيتعمل عند بيت العروسة في قريتنا العزيزة يعني بس قولت يمكن سلو بلدهم كدا ..وبعدين قولت تنجيد إيه اللي في ٢٠٢٣ ده! هو في حد لسة بينجد وبيجيب قماش بطستا بدل الستان وبيرسم رسمة طاووس! الحاجات دي انتهت من ٢٠١٠ بالنسبالي ده آخر تنجيد حضرته وقتها وغنينا يامنجد عليي المرتبة💃😂
المهم مع استغرابي لقيت الناس مش مشغلة أغاني في التنجيد لأ ده بيتخانقوا أحيه😂💔 وبعدين لقيت رفاعة المنجد دوره أهم من لاشين شخصيا فقلت مبدهاش بقا أكمل وأنا ساكتة
نتكلم جد بقا القصة حلوة وجديدة وفي عيال بتتحول قطط وفي أعمال جوة وسحر وبلاوي استغفر الله (منه لله بيت العيلة واللي اخترعه) ...حل اللغز بالنسبالي كان مُقنع أوي الشخصيات الجديدة كانت مرسومة حلو أوي أوي
*علي اللي مغلوب على أمره ياحبيبي في زيه كتير وشوفتهم بعيني
*علاء المراهق اللي اتمارس عليه الاضطهاد والرخامة من أبوه لقى حل في البيت واتفق مع أبوه أخيرا في حاجة كانت غلط أصلا من البداية
*الحاج جمال كبير العيلة المتسلط اللي أكيد وراه كل البلاوي بسبب شدته وإصراره على مبدأه اللي مبيغلطش ومبيقبلش النصح وهو غلط أصلا (وبالمناسبة موجود منه كتير وشوفتهم بعيني)
*محمد الجميل المعتدل في العيلة المنيلة دي شخصيته عجبتني
*أمينة اللي قادتها الأقدار إنها تعنس وتسحر وتفرق وفي النهاية يجيلها ألزهايمر
*منار وسناء وقصة السلايف اللي بيغيروا من بعض
*عم رفاعة ده بقا في حتة تانية..راجل بيفهمها وهي طايرة كدا وعليه مصطلحات تودي في داهية محدش بيفهمها بس في الجون
*أسامة المرة دي بجد مختلف _اللي خس عشرين كيلو عقبالي يارب_ كان مميز رغم اكتئابه ومكانش وحش زي مانا قولت عليه قبل كدا ماهو مش ملاك ولا شيطان هو دكتور كُبارة ميصحش نقل منه ..عجبني تفكيره وكل شوية ياحبيبي أحسبه بيكلم سهير وألاقيه بيتخيل ...حل الموضوع بعقلانية وفي نفس ا��وقت طريقة تفكير سهير مش مفرقاه
(الشخصيات اتطورت أوي أوي المرة دي والأسلوب جميل وسلس كالعادة )
العدد ده مميز وحلو أوي ومُركز أكتر بيناقش قضايا كتير كبيرة زي العنوسة والمراهقة والاكتئاب والزهايمر والسلطة المستبدة وبيت العيلة ماشاء الله لامم كل البلاوي دي وشيرين كتبت العدد ده برواقة في حر أكتوبر بتاعة٢٣😂💔وأشارت للسور اللي اتعمل في اسكندرية اللي بيمنع الناس تشوف البحر ..والله الموضوع ده حازز في نفسيتي زيك ياشيرين
تفاصيل كتير في العدد ده خدت قلبي والله تسلم إيدك ويسلم مخك خودي بوسة ياستي🙈♥️♥️
افتقدت سهير ..وبالمناسبة حد يلحق شريف الواد عسلية مش عايزينه يضيع مننا كفاية رانيا المتنيلة على عينها
بكتبها وأنا مضطرة عايزين نلم شمل العيلة من تاني ياشيرين بعد إذنك

[Yousra · Rating 4 out of 5]

بقالي فترة عايزة أكتب عنها... حاسة إني عايزة أكتب عن السلسلة كاملة بهدوء لأني رغم إدماني لها مبكتبش عن أجزائها بانتظام... حسب المزاج والوقت
.
.
الوقت غريب طبعا بس الكتابة عن حاجات بنحبها بتكون أحيانا حلول لمشاكل القلق وتصريف للذهن عن حاجات تانية مش المفروض تشغلنا
.
.
طيب أكتب فصحى؟ أكتب بالعامية؟... تاني حسب المزاج ومشكلتي الأزلية... نخليها بالعامية
.
.
هواة السلاسل الممتدة هيفهموا يعني إيه تحب السلسلة وتتابعها بشغف ويبقوا أبطالها كأنهم جزء من الأسرة أو العيلة ودة اللي حاصل مع لاشين
.
.
أسرة متعرفش هي موهوبة ولا منكوبة بس أكيد فرد الأسرة العادي في وسط غير العاديين هيكون في مأزق ومحنة
.
.
كنت بحسب نفسي ضمن فريق الدكتور أسامة ومن محبيه لغاية لما وصلت لمرحلة النفور منه في #نوم_العصاري ... من ساعتها بقت مشاعري تجاهه شر.ير.ة اللي هو كل شوية أقول أحسن 😅
.
.
لقيته بطل الجزء دة بس بصراحة رجعت تاني أتعاطف معاه وأديله أعذاره... علشان الحياة والناس مش أبيض أو أسود فقط... في الوسط فيه درجات كتير وفيه وقت الواحد بيختبر مشاعر بكل الألوان!
.
.
قلت يادي الليلة... كمان مع عيلته؟ 😅 وعيلته أرخم وأجن منه 😆😆
.
.
أب متسلط ومختل ورث ولاده وأحفاده مشاكل وأحقاد مالهاش أول من آخر!... بنت مفترية باعت عقلها ونفسها للـ.ـشيـ.ـطا.ن ولا شافت خير ولا عمرها كانت هتشوف الخير بدماغها المؤذية وأفعالها الغريبة بس هي فعلا ضحية... مشاكل الأسرة والمشاكل النفسية اللي شيرين بتعرف تعبر عنها ببراعة كلها هنا... مشاكل الحياة في بيت العيلة 😑 كمان موجودة😕
.
.
عجبني جو الرواية جدا بسبب إني عارفاه وواخدة عليه إلى حد كبير... وفيها قدر كبير من التشويق والتخمينات اللي ماتبقاش عارف هي صح ولا غلط؟ وبما إني قريتها من مدة فحاليا مش فاكرة أي حاجة عن الضفادع في الرواية تخلي الضفدع عالغلاف وفي العنوان😅 الزهايمر معلش 🙈
.
.
معجبنيش الخط أبدا😑... خط صغير جدا كان بيجيب لي صداع وبما إن اشتراك أبجد خلص ومجددتهوش فمكانش قدامي غيرها... يا ريت الحركة دي ماتتكررش😅
.
.
الجزء دة واللي بعده كانوا محتاجين تدقيق لغوي أكتر شوية بصراحة 🥹
.
.
ساعدتني الرواية في موضوع قفلة القراءة وقفلة الكتابة كمان 🤗😁... الوقت دة محتاج نعمل اللي بنحبه ونركز فيه
.
.
مش فاكرة أي حاجة عن الضفادع في الرواية بجد وجيت أقلب فيها موصلتش لحاجة 😅😅
.
.
#شيرين_هنائي #لاشين #الضفدع #كتوبيا

[Rehab shaban · Rating 4 out of 5]

في هذا الجزء من سلسلة لاشين تخرج بنا الكاتبة عن المألوف، إذ تسرد لنا مغامرةً من مغامرات أسامة الصاوي، تدور أحداث هذه القصة في منزل العائلة الذي انتقل أسامة للعيش فيه بعد طلاقه من سهير، لكن يبدو أنَّ اللعنة قد التصقت به والأحداث الغامضة لم تفارقه بمجرد انفصاله عن زوجته، فالأسرار المخبوءة في هذا البيت كبيره وتحتاج إلى من يكشفها، فيلعب أسامه دور المحقق ويحاول حل لغز هذا الصرح العائلي القديم.

[ALLA BASIM · Rating 2 out of 5]

رواية عادية بعيدة عن أجواء لاشين الممتعة ، أن يكون بطل هذا الجزء هو الدكتور أسامة الباهت حضورا و الثقيل ظلا لهو أمر غير مقبول .. لكن يمكن اعتبارها محطة مؤقتة .. ليست سيئة لكنها ليست جيدة هي رواية بين البين ..

[Hesham Wahdan · Rating 3 out of 5]

نستكمل احداث سلسلة لاشين وهذه المرة نحن مع مغامرة بطلها أسامة الصاوي الذى قرر الانعزال بعيداً بعد كل ما مر به من مواقف قاسية سابقة - طوال أحداث السلسلة - تسببت فى صدمات نفسية كان لها الأثر الكبير على حياته الاجتماعية والشخصية على حد سواء

يرحل أسامة الى منزل عائلته فى دسوق - كفر الشيخ - وهناك كانت تنتظره متاعب جديدة !

ثلاث نجمات لهذا الكتاب كالأتي

- النجمة الأولى كالعادة بسبب الجانب النفسي الذى تحرص الكاتبة على تقديمه طيلة الوقت على مدار أحداث السلسلة مع مختلف شخصياتها. هذه المرة مع تسلط الأباء واصرارهم الشديد على ان يسير ابنائهم طبقاً لما يرونه هم ولو وصل الأمر للاطلاع على اسرار حياة ابنائهم الشخصية. النتيجة بكل تأكيد هى المرض والخلل النفسي المتوارث وما له من آثاره المدمرة ولو بعد حين. باختصار هذا ما جناه أبي

- النجمة الثانية من أجل الخلطة الجيدة والتى تم توظيفها بشكل جيد بين الموروثات الشعبية عن السحر والاعمال السفلية وبين الثقافة الغربية ممثلة فى ظاهرة الضفدع الذى يظل يقفز طيلة الوقت من مكان لمكان بلا اى استقرار ويعيش متطفلاً على الاخرين

- النجمة الثالثة بخصوص حرص الكاتبة على عدم التمسك ببطل واحد طيلة الوقت. كل كتاب له بطل مختلف وهذه المرة مع أسامة زوج سهير التى تورات إلى الخلف مع باقي الشخصيات الرئيسية. هذه نقطة مميزة جداً فى سلسلة لاشين

على مستوى الحبكة شخصياً كنت متوقع بدرجة كبيرة ما ستؤول اليه الاحداث فى نهاية الأمر. وبالنسبة للحوار فكان هو الغالب على الكتاب هذه المرة على حساب السرد كأنك تستمع الى حلقة من مسلسل اذاعي مثلاً

عموماً انا من داعمي سلسلة لاشين بكل تأكيد وفى انتظار الكتاب القادم بدون شك والذى مهدت الكاتبة لأحداثه فى آخر صفحات الكتاب والذى اتمنى ان يكون اكثر اثارة وشغفاً كما عودتنا دائماً

[أبرار صبحي · Rating 4 out of 5]

مغامرة جديدة من مغامرات عالم سلسلة الرعب والإثارة الأكثر شعبية "لاشين" وإن غاب لاشين عن هذا العدد -أتمنى ألا يتكرر ذلك فأنا من محبي هذا الشيطان- بطل هذه المغامرة هو أسامة الصاوي وأخذنا معه إلى بيت العائلة أو بيت الزواحف -كما يقول رفاعي- في دسوق.
بعد انفصال أسامة عن سهير أصابه الاكتئاب والفتور واتسمت أيامه بطابع الرتابة والملل وكسرت هذه الرتابة بمشاكل عائلته التي عاد إلى السكن معها. مشاكل قد تبدو معتادة في المناطق الريفية بين السلائف في بيت العائلة ولكن أضيف إلى هذه المشاكل جانب ما ورائي وهذا ما لا يميل إليه أسامة ويرى أن هناك تفسير منطقي لكل شيء يحدث وبهذا انقلبت الأحداث إلى جانب بوليسي مشوق "من فعلها وكيف فعلها؟!" يتخلل هذه الأحداث جوانب نفسية عميقة للشخصيات وتأثير الآباء على الأبناء، مشهد الصمت بين جمال وابنه علاء والسر الذي جمع بينهما، وقسوة الأب على ابنته أمينة وحبسه لها الذي أدى إلى إصابتها بالخبل.
كانت مغامرة داخل دهاليز الأمراض النفسية الناتجة عن المشاكل العائلية وامتداد تأثير الأذى النفسي عبر الأجيال.
لم أكن أتصور أن افتقد لاشين وجنونه وشياطينه وسخريته بهذا الشكل :""

[Amiraelmahdy · Rating 5 out of 5]

كالعادة عدد مميز اخر من السلسلة المحببة إلي قلبي ، ولكن هذا الجزء أكثر تميزًا لإنه من بطولة دكتور أسامة وهذا شئ مميز لإنه بالنسبة لي صوت العقل في هذه السلسلة ،تأثرت بحالته جدا وتخبطه وافتقاده لسهير ،ولكن استمتعت جدا بالاحداث واسلوب شيرين كالعادة إللي بيبين إنها بتدور في كل تفصيلة بتكتبها ودا باين في مصطلحات المنجد جدا 😊 في انتظار العدد الجديد بفارغ الصبر لأني من محبي شريف جدا وعايزة اطمن عليه ، أتمنى ظهور مهاب وسهير الجزء الجاي عشان افتقدهم جدا.

[Dalia Fayez · Rating 5 out of 5]

العدد ده كل حاجة فيها جميلة فعلا و مبتكرة .. عجبني جدا الغلاف و الاسم و الحبكة و القصة و الجانب الاجتماعي حقيقي كل حاجة شدتني جدا و مقدرتش اسيبه الا لما خلصته و استغربت اوي من كلام المنجد اللي حسسني ان الكاتبة أكيد استعانت بمنجد حقيقي عشان تعرف اللغة بتاعته و بصراحة صعب عليا أسامة جدا و اتمنيت ان كل مشاكله تتحل و قلقت جدا على شريف و منتظرة العدد الجديد بفارغ الصبر و اتمنى التوفيق دايما للكاتبة

[Maha · Rating 5 out of 5]

لاشين
الضفدع
الكتاب الثالث عشر
اعتبره عدد مميز و استمتعت به جدا بالرغم ان اسامه هوه البطل و دي حاجه غريبه عايزه اعرف ازاي عملتيها دي 😂😂😂😂 افتقدت لاشين و سهير و مهاب و هتجنن و اعرف ايه اللي حصل ل شريف في ياريت العدد اللي جاي يكون قريب و كالعاده تقييمي ٥/٥

[Esraa El Shakany · Rating 4 out of 5]

بدأت الأعداد تاخد سياق مختلف عن الأعداد الأولى
العدد اللي فات كانت مغامرة لسهير بمفردها والعدد ده مغامرة لأسامة بمفرده في اكتشاف عيلته وأبناء عمومته علاقتهم ببعضهم وماضيهم والأسرار التي يخفونها في نفوسهم، ومعرفة سر البيت وسر تصميمه الغريب
عدد ممتع جدًا

[Ahmed Gohary · Rating 3 out of 5]

الرواية من بطولة الدكتور اسامة بمفردة دون ظهور أيا من ابطال السلسة الاساسين

العدد متوسط المستوي والنهاية جيدة لكني تهت قليلا في الشخصيات وقرابتهم لبعض

الفكرة الاساسية مقاربة لفيلم اجنبي لن اكتب اسمة حتي لا احرق الاحداث

كان عندي مشكلة مع العدد دة ان الخط صغير بشكل ملاحظ

[Dalia Saad · Rating 4 out of 5]

القصة من بطولة أسامة، بدون سهير أو لاشين. مليء بالاحداث المتلاحقة. جيد ويستحق القراءة.

[Hager Moharram · Rating 3 out of 5]

Lasheen ain’t in the forefront of this one
Still hate Usama

[Abeer Abdelhamid · Rating 3 out of 5]

عدد من بطولة اسامة وتدور احداثه فى بيت العيلة فتمتزج الاحداث الغريبة واسبابها فلا نعرف هل السبب هو الغيرة بين افرادها ام سب ماورائى