എന്റെ അരുമയായ പക്ഷിക്ക് [Ente arumayaya pakshikku]

by Jisma Faiz

കാതോർത്താൽ ഹൃദയമിടിപ്പ് കേൾക്കാവുന്ന ചില ജീവിതങ്ങൾ ഇവിടെയുണ്ട്; നിശ്ശബ്ദമായ പ്രണയത്താൽ ആത്മാവ് ബന്ധിക്കപ്പെട്ട ജീവിതങ്ങൾ. വായനയുടെ ഏതെങ്കിലുമൊരു ഘട്ടത്തിൽ, ഏതെങ്കിലുമൊരു താളിൽ, ഏതെങ്കിലുമൊരു വരിയിൽ, ഒരു വാക്കിൽ ഒരുപക്ഷേ, നിങ്ങൾക്ക് നിങ്ങളെ മുഖാമുഖം കാണാം... ഉത്തരങ്ങളില്ലാത്ത ചോദ്യങ്ങളെ നേരിടേണ്ടിവന്നേക്കാം... ഒടുവിൽ മരണമില്ലാത്ത പ്രണയത്തിനും നീതി നൽകേണ്ട ജീവിതബന്ധങ്ങൾക്കും മുന്നിൽ ആ ചോദ്യങ്ങൾ മൂകമാകും. കാരണം, പച്ചയായ ജീവിതസത്യങ്ങൾക്കു മുന്നിൽ പരുവപ്പെടുന്ന സാധാരണ മനുഷ്യജന്മങ്ങളാണ് നാം..!

144 pages, Paperback

Published May 21, 2024

Reviews

[Dr. Charu Panicker · Rating 2 out of 5]

പ്രണയം വിജയിക്കണമെങ്കിൽ വിവാഹം കഴിച്ച് ഒന്നിച്ച് ജീവിക്കണമെന്നില്ല. ഉപാധികൾ ഇല്ലാത്ത ഒന്നാണ് പ്രണയം. പ്രണയം ഒരേസമയം മധുരിക്കുകയും വേദനിപ്പിക്കുകയും ചെയ്യും. നന്ദന്റെയും ആയിഷയുടെയും പ്രണയമാണ് ഈ നോവലും പ്രതിപാദിക്കുന്നത്. ഇത്തരം പ്രണയങ്ങൾ ഇന്നത്തെ കാലത്ത് നമുക്ക് ചുറ്റും ഒരുപാട് കാണുന്നതാണ്.

[Deepthi Terenz · Rating 1 out of 5]

പ്രണയം വിജയിക്കണമെങ്കിൽ ഒരുമിച്ച്‌ ജീവിക്കുകയൊന്നും വേണ്ട. അതിനു ഞാൻ എഴുത്തുകാരിയോട്‌ യോജിക്കുന്നു. ‘One side love’ ഒക്കെയായി ജീവിക്കുന്ന കുറേ പേരെ അറിയാം . അതായത്‌ സ്റ്റോറി പ്ലോട്‌ കൊള്ളാം . പക്ഷെ അതൊന്ന് സമർത്ഥികാനായി എന്തുമാത്രം വർണ്ണനകളും വാക്കുകളും ഉപയോഗിച്ച്‌ വെറുതെ വായനക്കാരനെ ബോറടിപ്പിച്ചു .ഒരു നോവൽ വായിക്കുമ്പോൾ പ്രണയനോവലാണെങ്കിൽ പോലും , എന്തെങ്കിലുമൊക്കെ ട്വിസ്റ്റ്‌ ഒക്കെ വേണ്ടേ? നമ്മുടെയൊക്കെ സാധാരണജീവിതത്തിൽ ഇന്നത്തെ ദിവസം പോലെയല്ലലോ നാളത്തെ ദിവസം. അതുപോലെ എന്തെങ്കിലുമൊക്കെ ഈ നോവലിൽ പ്രതീക്ഷിച്ചു. ഒന്നുമില്ലാത്തൊരു നോവൽ.

[Lijozzz Bookzz · Rating 4 out of 5]

“ഓരോ മനുഷ്യനും, അവന്റെ ജീവിതവും വായിക്കപ്പെടേണ്ടതാണ്! എന്നാൽ ഒരിക്കലും വായിക്കപ്പെടാത്ത, വായിച്ചുതീർക്കുവാൻ കഴിയാത്ത ചില ജീവിത പുസ്തകങ്ങളുണ്ട്. വ്യക്തമായി അടയാളപ്പെടുത്തിയിട്ടും തിരിച്ചറിയാത്ത ചില പുസ്‌തകങ്ങൾ! നിഗൂഢതകൾക്കപ്പുറം സ്വയം വെളിപ്പെടുത്താൻ കഴിയാത്ത, വെളിവാക്കപ്പെടാൻ കഴിവില്ലാത്ത മറ്റു ചില പുസ്‌തകങ്ങൾ! ഒരുപക്ഷേ, ആ ലിപി അറിയുന്ന മറ്റൊരാൾക്ക് മാത്രം അനായാസം ആ പുസ്‌തകങ്ങൾ വായിക്കുവാൻ കഴിയുമായിരിക്കാം! പുറംചട്ടകൾ കീറിയാലും താളുകൾ കൊഴിഞ്ഞാലും അക്ഷരങ്ങൾ മങ്ങിയാലും ഹൃദയംകൊണ്ട് അവർക്ക് ആ പുസ്തകങ്ങളെ അനായാസം വായിക്കുവാൻ കഴിയുന്നു.” ജിസ്മ ഫൈസ് എഴുതിയ ഡിസി ബുക്സ് പ്രസിദ്ധീകരിച്ച “എന്റെ അരുമയായ പക്ഷിക്ക്” എന്ന നോവലിലെ അക്ഷരങ്ങളാണിവ. നന്ദന്റെയും ഐഷയുടെയും കഥപറയുന്ന ഈ നോവൽ കലർപ്പില്ലാത്ത പ്രണയത്തിന്റെ കഥപറയുന്നതിനോടൊപ്പം ബന്ധങ്ങളുടെ കപടതയും അടയാളപ്പെടുത്തുന്നുണ്ട്. അക്ഷരങ്ങളുടെ ലോകത്തിൽ കണ്ടുമുട്ടുന്ന രണ്ട് ജീവിതങ്ങൾ മരണം വരെയും അവരുടെ ജീവിതം സമാന്തരമായി നീളുകയാണ്, ഈ സമാന്തരരേഖകൾ കൂട്ടിമുട്ടുവാൻ അവർ ആഗ്രഹിക്കുന്നുണ്ടെങ്കിൽ അവരുടെ ആഗ്രഹങ്ങൾക്കപ്പുറമായി ജീവിതസാഹചര്യങ്ങൾ ഒരിക്കലും ഈ രേഖകളെ കൂട്ടിമുട്ടുവാൻ അനുവദിക്കുന്നില്ല. ചിലപ്പോഴെങ്കിലും ഈ രേഖകൾ കൂട്ടിമുട്ടും എന്ന് നമുക്ക് തോന്നാമെങ്കിലും വീണ്ടും അത് സമാന്തരമായിതന്നെ തുടരുന്നു. മരണത്തിന് പോലും ആ ജീവിതങ്ങളെ കൂട്ടിമുട്ടിക്കുവാൻ ആകുന്നില്ല. നേടുന്നത് മാത്രമല്ല വിട്ടുകൊടുക്കുന്നതും പ്രണയമാണ് എന്ന് ഈ നോവൽ സമർത്ഥിക്കുന്നു. ഈ എഴുത്തുകൾ അക്ഷരങ്ങൾ കൊണ്ട് ജിസ്മ ഫൈസ് തീർത്ത ഒരു മാസ്മരികതയാണ്. അല്പംപോലും അരോചകത്വം ഉണ്ടാക്കാതെ നമുക്കീ നോവൽ വായിച്ചുതീർക്കാം. എഴുത്തുകാരിയുടെ വീക്ഷണങ്ങളും വിലയിരുത്തലുകളും ഈ നോവലിലെ കഥാപാത്രങ്ങളോടൊപ്പം നീങ്ങുന്നുണ്ട് എന്നത് ഈ എഴുത്തിന്റെ ഒരു മനോഹാരിതയാണ്. ജിസ്മ ഫൈസിന് ആശംസകൾ.

[Vysakh · Rating 1 out of 5]

ആവശ്യം ഇല്ലാതെ വർണ്ണനകൾ മാത്രം കുത്തിനിറച്ച ഒരു പുസ്തകം പോലെ തോന്നി. ആവശ്യത്തിനും അനാവശ്യത്തിനും ഒക്കെ വർണ്ണന. ഒന്നോ രണ്ടോ ചാപ്ടറിൽ തീർക്കാമായിരുന്ന കേട്ടു മടുത്ത , വായിച്ച് മടുത്ത ഒരു കഥ. തീർത്തും ഇഷ്ടപ്പെട്ടില്ല. അഭിപ്രായം തികച്ചും വ്യക്തി പരം.

[Veena Alex · Rating 5 out of 5]

"പ്രണയം മരിക്കുന്നില്ല .പ്രണയത്തിനു മരണമില്ല ."
മനസ്സിന്റെ ഉള്ളറകളിലേക്ക് ആഴത്തിൽ ഇറങ്ങുന്ന ഒരു നോവൽ .

[Amal Thomas · Rating 1 out of 5]

അരോചകം.