Diarios d'una panderetera

by Leticia Baselgas

Tradición, identidá y autenticidá son conceptos alredor de los que Leticia Baselgas—metá del dúu L-R y una de les panderetes más importantes del panorama musical n’Asturies— lleva reflexonando de magar yera una neña y que, agora, aborda en forma d’ensayu nestos trepidantes diarios personales escritos per más de dos décades.

Con ritmu cinematográficu y la guía d’una documentada brúxula teórica, Baselgas rellata les sos primeres esperiencies nun grupu de baille marcaes pola disciplina y l’imaxinariu folclóricu posfranquista; el so posterior desencantu cola música tradicional y el rigorismu etnográfico; y, pa cabu, la so llegada al conceptu de post-folk-asturianu como un espaciu de llibertá creativa.

156 pages, Paperback

Published December 5, 2024

Reviews

[Claudia González · Rating 4 out of 5]

Leti consiguió escribir un ensayu cuasi perfectu ente lo emocional, lo personal, lo político y lo identitario.
Estos diarios falen de cómo una muyer panderetera, por muyer y panderetera, nunca nun pudo ocupar el so propio espaciu de la so propia manera. De descubrise na representación y del viaxe hasta entamar a topar la voz propia.
Imprescindible pa toles músiques -pandereteres o non- y bailladores -de tradi o non-; y pa tola xente que sienta esi caldín del que fala ella, la pulsión y la querencia por esti país que ye Asturies y la so cultura.

[Sonsoles Garcia · Rating 5 out of 5]

De lo meyor que lleí n’esti añu, y tamién el mio segundu llibru n’asturianu!!

Quédome con munches reflexiones, pero déxovos esta última de la autora: “atrevése a garrar partíu por to propiu rellatu folclórico ye daqué, a la fin, val pa que te tresformes en daquién llibre; llibre pa tener el valor de contar la to propia historia cola to propia voz.”