‫البسكوتة والدحلاب: لما الحب يوجعِك وما تعرفيش ليه!‬

by شيماء الجمال

«بيقدم صورة عامة للعلاقة المؤذية اللي بتتميز باعتمادية متواطئة بين طرفين ابتداء من جذورها، ولطبيعة العلاقة وتفاعلاتها والخطوط الرئيسية للتعافي، بشكل مركز ومباشر ودون توهان» - د. ماهر عبد الحميد، طبيب نفسي
«أتمنى بانتهائك من قراءة هذا الكتاب أن يتحول ما تمرين به إلى علاقة متزنة تساعدك على التقدم خطوة للأمام، أو أن يصير جزءًا منتهيًا من تاريخك» - د. أحمد أبو الوفا، أخصائي الطب النفسي
«الكتاب مكتوب بعد بحث علمي مطول وعميق. المعلومات اللي فيه جاية من مصادر حقيقية مش مجرد وجهة نظر. اللي مخليه مميز بالنسبة لي إنه مكتوب بصدق» - د. ريهام الصباغ، أخصائي الطب النفسي
«غير إنه مكتوب بلغة سلسة، وتقسيم المحتوى منظم ويساعد على ترتيب الدماغ، كمان هو في الحقيقة كتاب علمي دسم جدًّا...

Genres: Audiobook, Nonfiction

334 pages, Kindle Edition

First published January 1, 2019

About the author

شيماء رضا الجمال -تخرجت عام2006 في كلية الآداب قسم الإرشاد السياحي، جامعة عين شمس. -عملت لمدة عامين في أنشطة تتعلق بالأطفال ( تدريس، علاقات عامة، مديرة مسرح أطفال، مدربة قراءة، قاصة، كاتبة قصص أطفال). -حاصلة على دبلومة في إدارة الموارد البشرية من الجامعة الأمريكية بالإضافة لدورات في التسويق وإدارة الأعمال. -عملت كمحررة قسم الشباب (أصحاب) بجريدة عين لمدة علم ونصف. -صحفية حرة تكتب لعدة مؤسسات. كتبت مقالاً ثابتاً لدى كل من مجلة كلمتنا وجريدة عين وموقع جيلنا وحريتنا. -تعمل أيضاً كمستشارة إعلامية لبعض الشخصيات وعدة مشروعات صغيرة تتعلق بالأطفال والتنمية. -الإهتمامات الصحفية: الفنون البصرية والأدائية، التصميم (أزياء- حلي – أثاث وعمارة داخلية)، الفنون ثقافية، التجارب الجديدة، التنمية البشرية والمجتمعية. الإهتمامات الشخصية: القراءة، الموسيقى، التصوير، حضور المعارض والأمسيات، الكتابة، الفنون بأنواعها.

Reviews

[Rowan Elkasas · Rating 1 out of 5]

للأسف الكتاب سيء جدا بالنسبة لى هو مش بيبين قوة المرأة بالعكس حسيت أن المرأة ضعيفة فالكتاب و هى محتاجة تتعالج من شر الرجل. و ده مش حاجة كويسة فى حق المرأة خالص ليه تتعالج من الرجل أو الدحلاب ليه تبان ضحية الموضوع مش مستاهل ده كله أى إمرأة ممكن تنجرح و أى رجل ممكن يتجرح مش محتاج اقول المرأة البسكوتة هى ضحية رجل دحلاب ليه؟ و للأسف ده الحسيت به فى الكتاب .
الكتاب ميترشحش لأى إمرأة أو حتى مراهقة فى نظرى لأنه بيدى انطباع مش كويس عن المرأة البسكوتة .تقييمى ليه 1 star كان ممكن ميخدش stars اساسا بس الstar دى علشان خلص بسرعة .

[Sara El · Rating 5 out of 5]

انتهيت من قراءة كتاب البسكوتة والدحلاب ولكني لم أنته منه و أحب أشكر شيماء علي هذا الكتاب بالغ التأثير و الأثر .

البسكوتة والدحلاب غير إنه مكتوب بلغة سلسة جدًا ومرتب وشكل وألوان الصفحات وتقسيم المحتوي منظم ويساعد علي ترتيب الدماغ.. لكن كمان هو في الحقيقة كتاب علمي دسم جدًا.. شيماء استعانت فيه بمصادر علمية والمكتوب فيه بيقول أنها ذاكرت وبحثت كويس قوي مصطلحات زي: gaslighting وgrey rock, co-dependency
أنا قضيت سنين بحاول أفهمها، شيماء شرحتها بطريقة سهل جدًا أي حد يفهمها و يتمكن من رصد وجودها في حياته.

اللي عجبني في الكتاب مش بس الرحلة اللي شيماء بتمشيها مع البسكوتة لحد ماتحاول تحط ايديها علي أصل المشكلة وتساعدها تتصرف ازاي، لكن كمان المعلومات اللي بتقدمها للدحلاب في شكل غير متحيز ولا فيه اصدار أحكام.

شيماء كأنها دخلت الأوضة الضلمة اللي كلها تلويش وصدام اللي عايش فيها البسكوتة والدحلاب وفي ايديها كشاف نور ومراية، وابتدت تنور النور وشوية بشوية تزود الاضاءة فكل واحد فيهم يشوف التاني صح وفي نفس الوقت حاطة المراية قدامهم عشان كل واحد يتعرف علي نفسه فيها صح ويفهم ايه اللي بيحصل معاه.
الكتاب كمان دمه خفيف ووضع أجزاء من أغنيات كبرنا واتربينا علي انها تجسيد للحب الحقيقي وهي ابعد مايكون عن العلاقات الصحية هي محاولات رقيقة من شيماء لتخفيف من حدة الارتباك والألم المصاحبين لتجلي الحقيقة.

لو الحب بيوجعك ومش عارفة ليه.. اقري البسكوتة والدحلاب.

[نورهان البسيوني · Rating 5 out of 5]

...كتاب يحكى بشكل مبسط بالعامية عن أسباب خضوع الفتاة للرجل النرجسى بسبب النشئة والتربية و أسباب أخرى
،و يشمل نقاط أسباب تكوين الشخصية النرجسية و تكوينها
.مفيد لزيادة التوعية و تصدى أى حفر أو بؤر من تلك الأشخاص المؤذيين عن عمد

[آية عامر · Rating 5 out of 5]

كتاب جميل جدا و ساعدني علي المستوي الشخصي من التعلق بعلاقات سيئة

[Nour Amin · Rating 3 out of 5]

الكتاب جميل ومهم وفتح عيني علي حاجات كتير مكنتش فاهماها

كتاب حقيقي وجميل جدا واسلوبه مميز بنسبالي هو كتاب تطوير ذات مش كتاب يعبر عن ضعف المرأه وقوه الرجل زي ما الكل شايف ..

[Fatma Ismail · Rating 5 out of 5]

الكتاب حلو اووووي لأي حد ف أول خطوة ف سلم التعافي
بيبدأ يفتح عينيك ع مشاكل الطفولة وسوء التربية مرورًا بكل العلاقات ف مراحل العمر المختلفة، ك علاقتك ب "الأب، الأم، الأخ، الأخت، الاصحاب، الزمايل، المدرسين"
هيبدأ يفتح عينيك، وتبدأ انت تدور ع كتب تاني تعالج سوء التربية عندك وتبدأ تصحح مفاهيم حياتك.
الكتاب ارشحه بقوة لأي حد لسه بيبدأ سلم التعافي ومش عارف يبدأ ازاي ومنين، وفيه صفحة ف الكتاب بترشحلك الناس اللي تتابعهم ع السوشيال وبتقدم محتوى يفيدك.

لكن الناس اللي قاطعة شووط كبير ف التعافي، الكتاب مهيفدهاش كتير.

بس ف كل الأحوال، الكتاب لطيف وخفيف لأنه بلغة عامية سهلة غير مبتذلة المعاني والألفاظ.

وانا ف طريقي أقرأ كتاب "سنة اولى نفسية" وادور ع باقي الكتب.
ومستنية كتاب جديد منها بعد ما درست "علم النفس الإيجابي" مع د.نهى زهرة ❤

[عفاف الشاذلي · Rating 5 out of 5]

الحقيقة في البداية كنت خايفة أن الكتاب يكون من واحدة اتلسعت من الشوربة فقررت تنفخ في الزبادي، بس الحقيقة الكتاب طلع محترم أوي و practical بعيدًا عن أي تحيزات شخصية من الكاتبة ضد صنف الرجالة
والكتاب نتيجة قراءة وبحث كتير مش مجرد تجربة من الكاتبة بس
وغرضها أنها تفتح عيون البسكوتات عشان ميقعوش مع الدحاليب
الكتاب بيحكي شكل واحد من العلاقات وهو علاقة البسكوتة والدحلاب
طيب مين هي البسكوتة؟ ومين هو الدحلاب؟
🚺 البسكوتة:
هي كائن اتربى وكبر على أن مفيش لها دور ولا معنى غير أنها شمعة تحترق من أجل الآخرين
وأن الناس مش هيحبوها غير لما تفني نفسها عشانهم
هي ثقتها بنفسها مضروبة بالنار، ومقتنعة بأن مفيش حد هيحبها لذاتها وحدها بدون ما تبقى بتتشقلب حرفيًا عشان ترضيهم
اتربت أن الست عادي تتهان وتشيل الليلة (الطين) في سبيل أن يكون معاها راجل لأنها اترتبت أن ده النصر الحقيقي للست: أنها تبقى مع راجل حتى لو في علاقة مرضية ومشوهة المهم متبقاش وحيدة ولا سينجل (وفي أقوال أخرى عانس)
🚹 الدحلاب:
وإذا كانت البسكوتة شمعة تحترق من أجل الآخرين فالدحلاب حرفيًا ثقب أسود يبتلع كل ما تقدمه البسكوتة والبسكوتات الأخريات
هو اتربى أن الست كائن مهمش وكئيب وملوش لازمة في الحياة
والدحلاب شخص مبيحبش غير نفسه بس أو مش عارف يحب نفسه وحاسس أنه فاضي من جوه وعمر ما حب البسكوتة له أو حب أي حد هيملا الفضا اللي جواه لأنه مقتنع أن الستات ملهاش أمان فهو عاوز واحدة تفني نفسها عشانه، تعزل نفسها عن الكون وتتعبد في محرابه وبرده بعد ما تعمل ده مش هيديلها الأمان وهيبقى مقتنع أنها هتسيبه برده ومش هتفضل معاه فبيفضل يكسر فيها ويهدهمها ومبيديش الأمان لأي حد
الحقيقة شخصية البسكوتة والدحلاب أوسع من كده بس مش هعرف أكتب أكتر عشان الكتاب مش معايا حاليًا فبكتب من ذاكرتي، وعشان برده البوست ميطولش أكتر من كده
بس زي ما أنتو شايفين الشخصيتين زي قطعتين بازل بيكملوا بعض
بس دي مش هتبقى علاقة صحية
البسكوتة للنقص اللي جواها مش عاوزة واحد سوي نفسيًا وعلاقة مستقرة لأن ده هيحسسها بالملل وبأن مفيش حاجة بتقدمها للعلاقة وأن العلاقة دي مش محتاجة منها مجهود وأنها تفني نفسها فهتدور دايمًا ع الدحلاب اللي هيعيشها في مرجيحة يوم في السما ويوم في سابع أرض وجو أكشن ودراما بس ده مش صحي
والحل أن البسكوتة تبدأ تتغير وتكتسب ثقة بنفسها
والدحلاب صعب أنه يتغير أو يتعالج إلا لو كان دحلاب مبتدأ وعنده بقايا من تمييز للصح والغلط
فالأمل في البسكوتة أنها تتغير ومتسمحش للدحاليب يستنزفوها
وأخيرًا تقول الكاتبة (بتصرف): يا بسكوتة يا طيبة مش كل الرجالة دحاليب ومصطفى أبو حجر وأن في ناس كويسين (بس مقالتش هما في أنهي ركن بالظبط في المجرة 😂😅)

[Menna Lotfy · Rating 4 out of 5]

الكتاب مكتوب بالعامية عشان كده هكتب الريفيو بالعامية، حاسة لو كتبته بالفصحى هيكون دمه تقيل

البسكوتة والدحلاب كتاب لشيماء الجمال بتشرح فيه نوع من أنواع العلاقات الاعتمادية بين الراجل والست واللي غالبا بتكون علاقة مؤذية لطرف فيهم واللي شيماء بتقول عليه البسكوتة.

شيماء نوهت في الكتاب ان البسكوتة ممكن يكون الراجل والدحلاب ممكن يكون الست وده عادي جدا، هي اه اختصت بالكلام الست عن الراجل بس عجبني انها نوهت لحاجة مهمة ذي دي.

الكتاب مبزول فيه جهد كبير لتجميع مصطلحات نفسية وشرحها وجواه مراجع كمان لطيفة جدا للرجوع ليها ودراستها، كمان شيماء مكتفتش بده لكنها كمان اضافت مقاطع اغاني الناس بتغنيها على اساس هي الحب وهي ابعد ما يكون عن الحب وده ادى الكتاب طابع دمه خفيف جدا.

انا قيمت الكتاب باربع نجوم بس لان معجبنيش اسم البسكوتة والدحلاب

[Noha Aziz-Eldien · Rating 4 out of 5]

الكتاب عجبنى جدا بياخد البسكوته فى رحله كدا و يعرفك نفسك و بتتفاجئى لو كنتى بسكوته فعلا من حقايق كتير بيقولها عنك.. عجبنى جدا شجاعة شيماء و إنها تكتب كتاب زى دا و متتحرجش تعرض تجربتها و تعترف انها كانت بسكوته.. كنت فاكره أن اللى مريت بيه كنت فيه لوحدى.. أيقنت بعد الكتاب دا ان فيه كدا كتير و دا شئ بيساعد الواحد لما يلاقى حد بيحكى عنه.. اتأكدت و عرفت انى.. قابلت الدحلاب فعلا.. إن ليه كنت بحس ان الحب متعب و مرهق و بيوجع كدا.. برغم ان بعض أجزاء الكتاب كانت مؤلمه ليا جدا و أنا بقرأ لدرجه أبكتنى إلا إنه إن شاء الله هيكون خطوه فى طريق التعافى و تحديد و ترسيم حدودى و قيمى و الحياة بوعى و نضج أكبر

[Alaa Shalaby · Rating 5 out of 5]

الكتاب عن العلاقات المؤذية و يمكن اسمه و تصميم الغلاف ظلمه علشان يحسسك انه بيكلم الست فقط مع ان الكتاب غير كدة انا انصح بيه اي حد مقبل علي الزواج او مقبل علي علاقة لازم يقراه و طبعا اي حد دخل للاسف اي علاقة مؤذية يقراه علشان الكتاب هيديله قوة و دفعة انه ياخد القرار و يوقف الاذي ده و يطلع من اللي هو فيه. و هيفهم ليه من الاول دخل العلاقة ديه برجليه. الكاتبة طريقتها سهلة جدا و عامية زي ماتكون صديقة ليك عاقلة و حكيمة بتدردش معاك في البلاكونة و انتم بتشربوا كباية شاي بالنعناع

[Yasmine Rashad · Rating 4 out of 5]

الكتاب ده عظيم بشكل كبير جدا وحقيقي مهم جدا لكل بنت إنها تقراه حتي لو لسه مدخلتش في علاقة بس عشان تعرف تتجنب النوع ده وتقوي نفسها وتفهم أوقات التصرفات إللي بتحصل معاها ليه وايه مبررها وتفهم إيه هي الملامح البدائية لعلاقة صحية

[Mennatullah Radwan · Rating 4 out of 5]

الكتاب ده تحفه بشكل مش طبيعي
مليان نصايح نفسية كتير للتغير و لعيش حياة صحية سليمة وسط علاقات مش مريضة
انا محتاجه اقراه تاني و تالت و عاشر علشان استوعب نص محتواه حتى
كتاب ارشحه بشدة من اجل حياة صحية
محتاجة اقراه تاني و انا انضج من كده

[Reem · Rating 5 out of 5]

بصراحة بعد تجربة كتاب سكن وساندريلا سيكرت.. كنت مترددة قبل قراية الكتاب..
وبصراحة فاجأني.. الكتاب حلو.. الأفكار فيه مرتبة.. وفيه ترشيحات لقراءات اكتر..
وعرفني على حاجات في شخصيتي وفهمني سبب تصرفات كتير ليا..
فعلا الكتاب ساعدني جدا..

[Nouran · Rating 5 out of 5]

احلى كتاب عدى عليا و قريته مرتين تلاتة و قعدت اذاكره كمان و مش كده و بس ده بجد عالجلي مشكلة كبيرة عندي و كمان فهمني حاجات كتير مكنتش فاهماها و لا عرفاها كانت بحصل و مش لاقيالها تفسير بجد كان نقلة كبيرة ليه
شابووو بجد انا انبهرت ♥️♥️

[Samar Haikal · Rating 2 out of 5]

مبدأيا شيماء الجمل أسلوبها لذيذ و عامي يوصل بسهوله.. الكتاب محدد و موجهه فا بمجرد لما بدأت التعمق حسيت الكتاب مش ليا و فقدت الانجذاب له.. مع اني كنت حاببه ابقي ملمه بالموضوع و طبيعه العلاقه بس للاسف بدأت احس بالفتور.

[Noha Gad · Rating 3 out of 5]

علي الرغم إني لا أحب الكتب العامية
إلا أن الكتاب عجبني
يتناول الكتاب العلاقات المؤذية بين الإناث و الذكور النرجسيين أو كما تطلق عليهم شيماء الجمال الدحلاب
أفكار الكتاب مرتبة بلغة بسيطة جدا خفيفة الظل

[Amal · Rating 4 out of 5]

كتاب متعوب فيه بجد ..مبذول فيه مجهود كبير ...تقسيم البسكوتة بصفحات بينك والدحلاب بصفحات رصاصي لفت نظري جدا والتعافي مزيج...كتاب حرشحه لبسكوتات كتير بقابلهم في سكتي خلصته في يوم من حلاوته

[Nancy Haddad · Rating 5 out of 5]

الكتاب تحفه اولا مكتوب بطريقه جديده حتخليك تروح لمعالج نفسى و تتكلم معاه و حيرد عليك و انت بتقرى كتاب ثانيا واقعى جدا و بيتكلم عن المشاكل الحقيقيه اللى بنشوفها مش شرط نكون ناس ارتبطنا بيهم بس ناس حوالينا اغلب الوقت
ثالثا عنوان الكتاب سهل و بسيط لكن مش متناسب مع كم المعلومات اللى فالكتاب فمتحكمش من الاسم الكتاب اعمق من اسمه بكتير

[Huda Abdelaziz · Rating 2 out of 5]

لطيف

[Aya Salah · Rating 4 out of 5]

جميل جدا

[Habiba Hagag · Rating 4 out of 5]

الكتاب جميل جدا وحقيقي كل ما هتتعمق/تتعمقي فيه هيحلو اكتر واكتر. تمثيل لجزء كبير من علاقات اليومين دول وانا كنت بسكوتة منهم للاسف. ابدعتي واحسنتي.

[Rehab Abd El Hamid · Rating 4 out of 5]

الكتاب جميل جدا وانصح بيه اى حد.مر بتجربه التعامل مع شخص نرجسى
وحتى بدون التعامل مع اى شخص مؤذى للتوعيه لتجنب مثل هذه الشخصيات السامه

[Noha · Rating 4 out of 5]

-
الكتاب ده حقيقي أوي. المفروض يبقى كتالوج يومي للغلابه اللي مفكرين احساسهم حقيقة .
" لا يجوز أن نثق بمشاعرنا على طول الخط "
نقطة .

[Hanaa El Naggar · Rating 4 out of 5]

❤❤

[Aya Elkhawaga (Uka) · Rating 5 out of 5]

جميل وممتع وملهم.

[Farah · Rating 3 out of 5]

كتاب جيد في بداية التغير و التعافي لغته سهله و بسيطة و ساخرة و هذا أسلوب مساعد جداً في تقبل و فهم المشاكل النفسيه بشكل افضل

[Reham ali]

كتاب لطيف شبيه بنصايح عمتي

[Heba books · Rating 5 out of 5]

عن العلاقات السامة وطرفيها المرمز إليهم بالبسكوتة والدحلاب، تتكلم الكاتبة عن كيفية نشأة العلاقة من البداية بكيف أصبجت البسكوتة بسكوتة وكيف أصبح الدحلاب دحلاباً.
وما الذي يجذبهما لبعضهما وما الذي يجعلهما يتمسكا بهذه العلاقة المضطربة!
وطبعا تطرقت للتعافي وكل هذا بأسلوب علمي وبلغة عامية بسيطة وسهلة ومعلومات ناتجة من عصارة العديد من الكتب والدراسات بأسلوب رائع ومشوق ولاسيما طبعة دار الكرمة المبسطة والمرفقة بالمخططات والتعبيرات المميزة.
كتاب مبسط ومجمع أنصح به فسيساعدك على فهم نفسك بصورة كبيرة خاصة إن كنت بسكوتة.

[Mehmet Monsif · Rating 4 out of 5]

الكاتبة بتذكر تجربتها اللي أرادت إنها توثق اللي استفادته منها واتعلمته من خلال معاناتها فيها جوه الكتاب ده، واللي واضح من اسمه انه بيتكلم عن العلاقة الغير ناجحة بين الراجل والست، وازاي العلاقة لما تكون مَرضية ومضرة للمرأة تقدر تتعامل او تتعرف على اسباب وجعها ده وتعالجه وتتعافى منه.
الكتاب بيشير الى ان بعض العلاقات الفاشلة دي بتكون بسبب مشكلات نفسية أو تربوية أو كلاهما، وده بالنسبة للطرفين.
واشارت الكاتبة للراجل هنا بالدحلاب واشارت للست بالبسكوتة، ومش هيكون غريب انها تميل لجنسها في الكتاب نظرا لإن تجربتها في البداية سببت ليها تعب نفسي مش سهل، ومن كلامها انها قدرت تتعافى، وده شيء كويس.
كمان نفت عن نفسها التهم اللي ممكن تتوجه لها زي انها "فيمنست"، وعلقت بإن حتى لو هي كد�� ف دي مش "سُبة".
بالنسبة لي معظم الكتب اللي قرأتها على هذه الشاكلة لا تعتبر الدين مصدر أساسي لحل المشاكل اللي من النوعية دي، وده بسبب ان قليل جدا ممن يمثلون الدين أساؤوا بالفعل له في التطبيق، لكن ده ميمنعش اننا لو بحثنا كويس في ديننا هنلاقي فيه حلول وطرق ووسائل أفضل كتير من دراسات غربية، وأبحاث علمية قد تناسب أو لا تناسب مجتماعتنا وثقافتنا، وقد تكون أيضا غير قابلة للتطبيق على الطرفين، وكمان مبتكونش في الغالب هي الحل الأمثل.
بشعر إن الكتب اللي بتتكلم عن العلاقات المؤذية مش بتقدم حلول واقعية قد ما بتدفع طرف من الطرفين انه يتخذ قرار ما والسلام، والقرار غالبا بيكون ثوري على العلاقة نفسها، وفكرة اننا نفضل حاصرين المرأة في الجانب الضعيف دايما فكرة محبطة للمرأة نفسها في ظني.
شيماء ذكرت كلام مهم جداااا عن دخلات الدحلاب على البسكوتة، في الحقيقة شابوه، بس برضه الدخلات دي مش شرط أول ما تكتشفها البنت تبعد، بس شرط انها تمنع ان يتم الدخول لقلبها من الابواب دي؛ لإنها بتكون في الغالب تمهيد لبدء علاقة غير صحية.
الكتاب ليس أول ما قرأت في الموضوع ده وليس أفضلهم في ظني برضه.

[EmanSayed Moustafa]

الكتاب رائع وصف بدقة دوافع العلاقة المؤذية وكيفية الخلاص منها .....وما هي الأسباب التي علينا ان نتجنبها حتى لا نقع في فخ العلاقات المؤذية
.....من أروع ما قرأت تحليل نفسي دقيق لكل شيء و الوسائل للنجاة ...
اللايف كوتش
ايمان السيد
معتمدة من الاتحاد الدولي الكوتشنج