سيرة عباد الشمس

by أسامة الشاذلى

شكري ابو عياد مصور فوتوغرافي بهائي الديانة من مواليد نهاية الأربعينات، يعاصر التحول الاجتماعي في مصر خاصة ما بين السبعينات والثمانينات، يتزوج من نورسين الشابة الإيرانية التي شاركت في ثورة إيران وتم اعتقالها وتعذيبها على يد أتباع الخوميني قبل أن تفر إلى لبنان وتلتقي بحبيبها ثم يتزوجا في القاهرة، وينجبا ولدا تدور حول علاقتهما به كل أحداث الرواية ...

140 pages, Unknown Binding

First published August 18, 2014

About the author

كاتب وروائى مصرى , من مواليد 12 ديسمبر 1973 , تخرج من الكلية الحربية المصرية عام 94 ضابطا بسلاح المدرعات , ثم ترك الخدمة عام 2005 ليصدر أول مجموعاته القصصية تحت اسم "نديم العدم" , ويتبعها 2006 بمجموعة "جمهورية الغابة العربية" , و رواية " سيد الاحلام" 2009 والتى حققت نجاحا كبيرا، صدر له عام 2010 رواية "قهوة الحرية"، اشترك عام 2008 فى تأسيس اذاعة اون لاين (تيت راديو ) وله الكثير من التسجيلات المعبره عن الحال السياسى والاجتماعى فى ذاك الوقت وحقق نجاحا ملحوظا ببعض المقالات الساخرة المقروءة
له العديد من الاشعار الفصحى والعامية السياسية والعاطفية والساخرة لم تجمع فى كتاب و اشتهر بتقديمه لنوعية من الادب تسمى " المنمنمات" بحيث يتم التعبير باقل عدد من الكلمات عن موضوع ذو أهمية .

Reviews

[Dina Adel · Rating 5 out of 5]

بسم الله..
دايما بادور على رواية اقراها تمسنى، ساعات اقرا وتبقى حلوة بس يبقى فى حاجة ناقصة، بس الرواية لمستنى ودة فرحنى قوى
التفصيل.. انا مبسوطة انك مقلقتش تكتب عن التجربة الانسانية دى للناس دى - مين يفكر يكتب عن أقليات - انت طبعا كالعادة مختلف - مبسوطة بكل حاجة اتكتب واتحكت فى السياق دة بشكل رهيب
الرواية كلها ماشية فى سياق تشويقى تخليك عاوز تعرف اية اللى حصل وازاى حصل اللى حصل وازاى الناس دى عاشت وعانيت قد اية ووصلت لفين بعد كدة
عباد الشمس - الكاميرا - التصوير - الصور قد اية استخدام المقومات دى كان مظبوط قوى وفى مكانه وبيخدم الرواية
قصة الحب اللى فى الرواية احلى من قصص حب كتير مشهورة اليومين دول، دة كفاية مشهد النهاية الرائع المبدع السينمائى جدا اللى متشاف ومحسوس كأنه مش مقرى كأنه حاصل قدامنا.. كان جميل وعذب وطريقة كلامه معاها وتفاعلها معاه
"وكتب الله لنا أنفاسا فى صدور من نحب.. تأتينا بها القُبلة"
مش عارفة بس مستنية اشوفها فيلم.. تستاهل تبقى فيلم.. علشان كل حاجة، من أول موضوعها للحبكة للتصوير البديع لمشاهد الرواية
انا حبيتها وشكرا جزيلا انك عملتلنا حاجة حلوة كدة وبجد الوقت اللى قضيته فيها كان ممتع وشيق وتعبك باين في كل تفصيلة..
"عشقت كونى مصوراً، كونى أداة تمنح البشر تخليداً لحظاتهم، تخليداً صورهم، كم هو من الرائع أن تكون يد الله المانحة" شكرى أبو عياد

[Laila El-mansy · Rating 5 out of 5]

طيب انا قريت الرواية دى و حبيتها جدا و كتبت عنها "ريفيو " ونشرته من فترة..هو طويل شوية بس أنا حبيت احطه هنا كمان على جود ريدز..

قرأت مؤخرا رواية "سيرة عباد الشمس" لكاتبها الروائى أسامة الشاذلى...و حبيت أكتب عن الرواية دى لانها اثرت فيا جدا و لانها كمان بتمس بطريق غير مباشر قضية احنا كلنا عايشينها و معاصرينها بشكل أو بأخر...احترام الاختلاف...تقبل الاخر..فكرة ان الانسان هو الانسان مهما اختلف توجهه فكره أو عقيدته...و كل دة فى سياق شيق جدا بعيد كل البعد عن المباشرة...

الرواية دى لفتت نظرى بطريق غير مباشر ان فيه زوايا مختلفة ممكن نشوف منها كل حاجة و ان الواحد عشان يحكم لازم يكون شايف من كل الزوايا و دة مبيبقاش فى الغالب متاح ..فبالتالى فكرة اصدار الاحكام مرفوضة و مش منطقية أصلا..

على سبيل المثال بطل الرواية هنا "شكرى أبو عياد" بهائى الديانة...أنا عن نفسى مكنش عندى اى فكرة عن الديانة البهائية غير ان معتنقيها من الاقليات فى مصر و يادوب شفت حلقة فى التلفزيون لوائل الابراشى عنهم و عن طقوسهم المختلفة!.. منكرش ان هى دى الزاوية بس اللى بصيت عليهم منها.. انهم ناس مختلفين...و الحقيقة انى أغفلت بدون قصد انهم "بنى ادمين" ليهم حياة و اسر و مشاعر ...اعتقد اختيار الكاتب لموضوع الديانة البهائية دة كان موفق جدا لابراز الفكرة...بالرغم من انه اكيد هيبقى مثير للجدل جدا عن البعض من عاشقى التنظير و مدمنى اصدار الاحكام المسبقة...

أنا مش ناقدة أدبية و لا أدعى اطلاقا امتلاك المقومات لدة..بس حبيت اقلب صفحات الرواية معاكو هنا و اقولكوا انا شفتها ازاى بعين قارئة ليها.. حبيت انكم تشاركونى احساسى بيها ..لانى على اد ما استمتعت بيها جدا فعلا أثرت فيا و غيرت وجهة نظرى و نظرتى اجمالا لحاجات كتير..

تعالوا ناخد سوا لفة سريعة مع الرواية و نبتدى بالعنوان اللى شدنى فى الاول و حسيت بعبقريته اكتر ونا بقرا الاحداث...الرواية صغيرة فى الحجم ..عبارة عن وجبة خفيفة لكن مشبعة.... لفت نظرى تنقل الكاتب فيها عبر المكان و الزمان بسلاسة شديدة و الربط بين الاشخاص و الاحداث...حبيت الحبكة و عشتها بدون مجهود و دا حلو جدا..

الرواية بأختصار أولها ضحك ووسطها وجع و دموع و مشاعر و اخرها ابهار...و يغلب عليك و انت بتقراها احساس مشاهدتك لفيلم ..بتبقى متخيل المكان و الزمان و شايف شخوصها و يمكن سامع صوتهم كمان و دا عجبنى جدااا فعلا.. فيها حس كوميدى خفيف بيظهر فى سياق السرد أحيانا و مش مفتعل ..تتوالى الاحداث اللى هتقدر بتفاصيلها المكتوبة بعناية تحس باحساس ابطال الرواية فى الكتير من المواقف اللى اصعبهم من وجهة نظرى اللى مرت بيهم بطلة الرواية " نورسين"...اللى انا حبتها جدا و حسيت معاها بالوجع فى مواقف كتير من حياتها المتخمة بالاحداث الجلل و مع ذلك تلاقى نفسك يمكن فى اخر الرواية بتحسدها على حياة جميلة عاشتها بالرغم من كل الوجع دة..

الرواية فيها جزء تاريخى بتدور احداثه فى السبعينيات لمحبى التاريخ لكن بدون اسهاب أو مط و تطويل و اعتقد ده كان ضرورى لاظهار خلفية بعض ابطال الرواية..

أحد ابطال الرواية كان يعمل فى ملقن فى المسرح و استغل الكاتب دة فى انه ذكر تفاصيل و احداث فى كواليس المسرح يمكن كتير منا ميعرفهاش و أظهرت المامه بفن المسرح عموما.. و فيه تكريم ضمنى لاحد أهم الفنانين اللى كلنا بنحبهم –الفنان عبد المنعم مدبولى- و اللطيف انك هتحب ده جدا و انت بتقرا ومش هتحس انه مقحم فى السياق..

نيجى بقى لجزئى المفضل فى الرواية..قصة الحب العظيمة اللى بين بطل الرواية "شكرى" و بطلة الرواية "نورسين"...اللى بالرغم من غرابة تفاصيلها لكن فعلا اتكتبت بشكل يخليك تحسها و تتفاعل معاها.. بطلها راجل عنده قدرة عجيبة على الاحتواء و دا يخليه فعلا ياخد لقب "راجل" بجدارة و بطلتها ست بالرغم من اللى قاسته فى حياتها لكن عندها قدرة مبهرة على الحب والعطاء و الغفران..

الرواية كمان بتمر سريعا على ملمح الصداقة الصداقة الحقيقية اللى بتربط شخصين برباط مقدس و اد ايه ان اهميتها يمكن احيانا بتكون اقوى من رباط الدم و الاخوة و بنشوف دة فى علاقة البطل شكرى بصديقه...

الرواية بتشهد تحول فى المشاعر من الكره للحب فى علاقة البطل بابنه التحول دة زى ما كان بيحصل فى الرواية كان بيحصل بالتوازى عند القارىء اللى شوية بشوية هيبدأ يفهم و يكتشف برضه انه بيحكم غلط لما يبص على الامور من زاوية واحدة و دة كان عظيم بالنسبالى و أكد الفكرة اكتر..

و بكدة أكون بالرواية دى سافرت عبر المكان و الزمان لان احداثها بتدور بين ايران و مصر و بيروت.. حضرت فرح و عزا..دخلت المسرح بتفاصيله..دخلت السينما كمان و حسيت بمشاعر مختلفه اثناء القراية ضحك و بكا و وجع و احيانا خضة...دا غير انها وسعت دايرة تقبل الاخر عندى لان فعلا اختلافنا مهما ان كان مينفيش انتماءنا لبنى الانسان..

زهرة عباد الشمس اللى بتتبع قرص الشمس اينما وجد.. رغم شكلها المميز عن باقى الزهور و رغم حركة دورانها دى الا ان دا ممنعهاش تكون زهرة.. و لم يتم لفظها بعيدا عن مجتمع الزهور...و ستظل رغم اختلافها و ندرتها زهرة.. فى حين ان بعض البشر بيشوفوا ان مجرد تسميتها عباد الشمس كفر.. و بيفضلوا تسميتها بدوار الشمس مع ان اسمها دة مجرد كناية مش أكتر!..أنا عن نفسى قررت اتعلم من النباتات الرقيقة دى..الزهور..لأن فعلا كلنا مختلفين بشكل او باخر ..

من احلى الاقوال اللى وردت فى الرواية:
*"وكتب الله لنا أنفاسا فى صدور من نحب.. تأتينا بها القُبلة"
*"الخوف يفسد تكوين الأشياء الجميلة، يفسد إحساسها وطعمها وكل ما يتعلق بها"
*"عشقت كونى مصوراً، كونى أداة تمنح البشر تخليداً للحظاتهم ، كم هو من الرائع أن تكون يد الله المانحة"
*"كل واحد بيحب نفسه..بس لو بذل مجهود يحب حد تاني نص ما بيحب نفسه، الأرض كانت حتبقى جنة"
*"أنا زهرة عباد الشمس التى تريدونها دوارا"
*"عودت نفسي ألا أنطق كلمة لم تخرج من قلبي، لا داعي للكلام، جعلت لساني حضنا للأخرين"
شكرى أبو عياد ...

http://www.dama-eg.com/2014/10/23/%D9...

[islam Sabry · Rating 3 out of 5]

تماماً كزهرة عباد الشمس لم يلتفتوا الى جمالها وطبيعاتها ، فقط ازعجهم اختلافها ،فكفروها
لكل كتاب جملة تعبر عنه وهذة الجملة تعبر عن الكتاب ولكن قبل التعليق على الكتاب فليكن التعليق على الكاتب الذى اقرء له لازل مرة
اسامة الشاذلى بحكم المرحلة ولغته يمكن ان يصنف من كتاب الجيل الجديد للرواية ولكن فى تناوله للموضوع واسلوبه يميل اكثر للجيل القديم الذى يكتب من اجل هدف ورسالة من الرواية وليس من اجل التشويق والمتعة وفقط
وهنا يظل السؤال الابدى الذى لا اجابة له هل الهدف من الرواية المتعة ام الفائدة؟؟
سيرة عباد الشمس سابدء بعيبها الوحيد وهو حبكة الرواية الهدف الذى يحرك الكاتب طوال الوقت وفاة الاب وكره الابن له ثم محاولة اكتشاف تاريخ والده وسبب معاملته له فكرة مستهلكة قليلا على الرغم من استغلال الكاتب لها جيدا
شكرى ابو عياد هو زهرة عباد شمس بحق يملك من النبل والتفاصيل والجمال ما لا يملكه غيره خلال تاريخه واصدقائه وزوجته تدور فى تفاصيل كثيرة مثل الثورة الايرانية وما حدث للشباب الذى لا يمثل الفكر الاسلامى فيها وان لم يكن بالتفصيل ،وهنا استرجع الكاتب ذكرة الثورة الايرانية لما لها من شبه فى الاتجاه الذى كانت تتجه اليه مصر منذ سنوات وراى والد نورسين الذى قرر المغادرة فور مجئ الخمينى فاحيانا يمكن تقبل الديكتاتورية السياسية مقابل الحرية الاجتماعية والعيش وتقبل الاخر اما الديكتاتورية الاجتماعية والعنصرية فلا يمكن تحملها ولا تأتى بالخير ابدا
شكرى ابو عياد الديانة بهائى ليس من اجل الترويج للبهائية كما ذهب البعض بتخلفهم الى ذلك ولكن ليمثل المنعزلين فى هذة الدولة الاقليات سواء دينية او سياسية او اى شئ الاقلية التى اصبحت تخاف ان تجهر برأيها حتى لا يتم الفتك بها
سيرة عباد الشمس تصور ما كنا ذاهبين اليه وما وصل اليه المجتمع من عدم تقبل الاخر ومدى الخوف الذى اصبح داخل كل مختلف من المجتمع
لقد انهيت الرواية وانا اخاف من شئ وحيد هو الخوف لانه يظهر اسوء ما بداخلنا
ملحوظة الرواي�� يوجد بها بعض الاخطاء اللغوية والترقيم اتمنى ان يتم تداركها فى الطباعات التالية

[Yousef Ezzat · Rating 4 out of 5]

كعادة أسامه الشاذلي في روايته السابقه يقتحم مجال جديد و تابوه لم يجروء الكثيريين نكشه،في رواية سيرة عباد الشمس أظنه أول كاتب مصري يكتب روايه عن البهائيين ،كثيرين يظنون أن البهائيين ليسوا أكثر من خيال و لكن أسامه جعلهم بشرا من لحم و دم يحبون و يكرهون يشاهدون الأفلام في السينما يغنون أغاني عبدالحليم و عبد الوهاب كملايين المصريين،خصوصا إننا في أيام الكتابة عن أي إختلاف شبه مستحيل فمابالك الحديث عن دين غير الأديان السماويه الثلاثه و كمان يتحدث عن قبولهم و التعايش معهم،هذه النقطه مبدئيا تجعل الروايه تستحق تقييم عالي.
و أيضا تنقله ما بين الخمسينيات و التمانينات و الزمن الحالي كان سلس وو أظهر كيف تغير المجتمع المصري الي التطرّف و عدم قبول الاخر بداية من التمانينات
و لكني كنت أتمني أن يتعمق الكاتب أكثر في مباديء و طقوس الديانة البهائيه و لا أعرف لماذا عزف عن هذا هل خوفا من فتح أبواب وجع الدماغ عليه أم لرغبته في توصيل فكرته عن التعايش بدون تشتيت ؟؟
الروايه لا تعتبر طويله و لكن الكاتب نجح في إيصال فكرته كامله لي و لكن أنتظر منه روايه أطول لكي يأخذ مساحه أكبر ..أفتقدت بعض العمق في شخصيات الروايه و لكن لا أظنه ضعف في أدوات الكاتب و في رأي أنه أراد إيصال فكرته بطريقه بسيطه لكل قراءه،،
في النهاية هي روايه جميله رشيقة الأسلوب عميقة الرسالة في زمن قلت فيهاالروايات التي تخرج منها بقيمه أو فكرة.

[Mennatullah · Rating 2 out of 5]

شوف لما يبقى الكاتب عنده فكرة حلوة جدَا، بس لما ييجي يكتبها تطلع رواية وحشة جدًا!
بالنسبالي الأخطاء الإملائية في طبعة أصلية لرواية تعتبر فضيحة
إيه فكرة إن أبطال الرواية بهائيين وايرانيين؟ نعم يعني عايز إيه؟ وفي نفس الوقت تلاقي جمل عن الإسلام والحجاب مكتوبة بشكل سخيف ومستفز
حاجة كمان: الكاتب اللي يحط شتيمة وألفاظ مش لطيفة في روايتة أنا مابحترمهوش
الشخصيات تحس إن ناقصها حاجة كده
ماحستش إن الأحداث شدتني وإني عايشاها، بالعكس خااالص
الوصف والتطويل كانوا كتير بطريقة مش طبيعية، إيه لازمة كل أسامي الشوارع والمحلات دي
قرأت الروايتين التاننين لأسامة الشاذلي، وأعتقد إن دي أسوأهم

[ÐøȜa · Rating 4 out of 5]

فى كل رواية اقراها بدور ع الشخصية اللى شبهى فى محاولة عابثة لقراءة طالعى .. ف سيرة عباد الشمس اقرب حد ليه شكرى فى حبه للكاميرا والتصوير بس انا مش عارف اذا كنت هاكون زيه ف الحب والتضحية والمسئولية هوا اﻻكيد انى بشاركه الخوف وانى لما اموت هحاول اتابع اللى بحبهم !

[Alaa Abd-allatif · Rating 5 out of 5]

ً الكل يدعي معرفته بالله، الكل يهتف الله محبة، الكل يبغض خلق الله ، إنهم يكرهون كل مختلف ً
- تمامًا كزهرة عباد الشمس.. لم يلتفتوا إلى جمالها وطبيعتها، فقط أزعجهم اختلافها، فكفروها ً
هذه الاقتباسات تكاد تنبئنا عن مغزى رواية ممتعة رغم كونها لم تمتد لأكثر من مائة وبضع وثلاثين صفحة إلا أنها تنقلك بين الأماكن والأزمنة وتجعلك تعيشها ثم تفاجأ بنهايتها وتحزن لفراقها
أبدع الكاتب في رسم شخصياته ونجح في تحليلها نفسيا لدرجة تجعلك تتواءم مع كل شخصية وتعرفها عز المعرفة
نجح الأستاذ أسامة أيضاً في رسم الخلاف الأيدولوجي بين بطل الرواية شكري أبو عياد والعالم الذي يحيط به وما عكسه هذا الاختلاف على تركيبته النفسية والتي انعكست على أسلوب تربيته لابنه
كيف يسيطر الخوف علينا ويشعرنا بالضعف لمجرد اختلافنا عمن حولنا
الرواية رغم أنها ليست طويلة جمعت بين الواقعية والرومانسية بشكل رائع كما تميز تقطيع المشاهد انهاء وابتداء بحس سينمائي بديع لا يدع مجالاً للملل ولا يعطي فرصة للتحول عن الرواية للحظة
الرواية مبذول فيها جهد بحثي حيث ألقت بالضوء على عقيدة البهائيين كما تعرضت لأحداث تاريخية كالثورة الإيرانية والحرب الأهلية اللبنانية بشكل سريع
أعطتني الرواية ببراعة الشعور بفترة الستينيات والسبعينيات حتى وقتنا هذا فغذت نوستالجيتي بشكل كبير
من المرات القليلة التي اقرأ فيها عملا كاملاً في جلسة واحدة لروعة السرد والتشويق في الأحداث
تعتبر هذه الرواية هي التجربة الثالثة لي مع الكاتب بعد كفر العبيط ونوستالجيا وكلها تجارب تشجع على المضي قدما لقراءة بقية الأعمال الخاصة به بإذن الله

[مهند بني هاني · Rating 3 out of 5]

رواية اهداني اياها أحد احب الاطفال إلى قلبي ( غيث )
الرواية لطيفة لكنها تبدو لي غير مكتملة ورغم جمالية الفكرة التي بنت عليها الرواية أالا ن الأفكار فيها ليس ناضجة بما فيه الكفاية ..
تنتقل الرواية من مصر السبعينات إلى ثورة الخميني والانقلاب على بقية الشركاء بالثورة ( أثارت بداخلي مخاوف اكبر بخصوص سوريا ومستقبلها لتشابه الظروف ) إلى تغير المجتمع المصري وتحوله نحو التطرف الوهابي ..
لكن البهائي بطل الرواية العاشق المتيم بزوجته الفارسية الثائرة الصديق المخلص الاخ المسؤول .. يربى ابنه يدافع الخوف بصورة مخالفة لشخصيته ولا أجد تفسيرا لذلك من خلال الرواية ..
كما لم تشر الرواية بصورة خاصة إلى الطائفة البهائية التي ينتمي لها بطل الرواية إذ أن الكراهية والتحول كان موجها للجميع وليس بصورة خاصة لطائفة وربما الموقف الوحيد الذي أشار إلى موقف خاص رفض خطيبة صديقه تناول الطعام لأنهم كذلك فحسب ..
رغم سهولة اللغة وسهولة التنقل مع الكاتب إلا أنها تتضمن أفكارا غير مكتملة النضوج ..
ملخص الرواية عنوانها وما أريد بها ما جاء على لسان الكاتب أن شعوره كزهرة عباد الشمس لم يلتفتوا إلى جمالها وطبيعتها فقط ازعجهم اختلافها فكفروها ....

[شيرين رضا · Rating 2 out of 5]

منكرش انطباعي الاول عنها انها رواية معاصرة اي كلام ، و ان كاتبها من الكتاب الجدد اللي بيلموا their Facebook posts و يعملوا منها كتاب.
بس لما قريتها مكانتش بالسوء البالغ اللي كنت متوقعاه
يحسبلها اني كنت عايزة اكملها و مزهقتش اوي منها ، و دي نقطة مهمة بنسبالي في اي حاجة بقراها، يعني انا مش من الناس اللي بيهتموا باي حاجة في الرواية قدر اهتمامهم بالقصة و التشويق
لكن للاسف هي فقيرة ، رواية فقيرة من حيث التعبير و الحبكة
يعني هي القصة لذيذة و يجي منها بصراحة بس كانت محتاجة تستوي اكتر من كدة

[Osama Mohamed · Rating 3 out of 5]

ولد يعيد أكتشاف قصة حياة والدة بعد وفاتة ، ف الأب شكري عياد المصري الذي يتزوج من نورسين الفتاة الإيرانية التي يقابلها في لبنان بعد أن هربت من التعذيب في إيران .
رواية بها تفاصيل لطيفة ومختلفة

[Asmaa Masr · Rating 3 out of 5]

ف السجن

[Maha · Rating 5 out of 5]

رواية جميله جداً

[أحمد عبد المنعم رمضان · Rating 2 out of 5]

ليس أسوأ من الرواية الرديئة تماما إلا الرواية التى تعدك بوعود كاذبة
تلك الرواية تعد فى نصفها الأول برواية مختلفة أو جيدة, وتدفعك حتى نصفها, رغما عن بعض المآخذ, ثم تهبط بك إلى أسفل سافلين بنصف ثان فى منتهى السوء
ربما أعيب على نصفها الأول انتقاله المفاجئ من الفكرة الخيالية التى استهل بها الرواية إلى عوالم أخرى واقعية وتاريخية, مهملا تماما الفكرة الأولى إلى حد النسيان... وربما تأخذ عليها مشهد موت الأب الذى يذكرك بمشهد موت الأم فى فيلم الحريف أو ربما يذكرك فى مواضع أخرى برواية الغريب.. إلا أن تفرد وابتكار وأشياء أخرى ستدفعك للقراءة بشغف واستمتاع حتى تصل إلى منتصف الرواية
الصفحة رقم 70 هى الصفحة الفاصلة بين المحاولة الجذابة فى النصف الأول وبين الاستعجال والسربعة والأكليشيهات والركاكة فى النصف الثانى ... ما بعد تلك الصفحة لا يزيد عن فيلم تليفزيونى اجتماعى من بطولة أبو بكر عزت وليلى طاهر فى منتصف الثمانينيات... حوارت طويلة والمشاهد التى أفترض منها أن تكون شاعرية رومانسية كانت باردة وأكليشيهية جدا, كأن يهبط على ركبته ويطلب منها الزواج فى لقائهم الأول, أو الجواب الغرامى الملئ بالتعبيرات المستهلكة والتى تحفظه البطلة عن ظهر قلب, أو سرد الراوى لكلمات الأغانى على صفحات كاملة, أو الحوار الممل بين جين وأيمن الذى تكررت فيه جملة ( يعنى ايه كل اللى بينا أنتهى) أربع أو خمس مرات. مما يدفعك دفعا للقفز فوق الفقرات لتصل إلى فقرة تستحق القراءة بعد الوعود الكبيرة فى النصف الأول للرواية
أنا حزين على الفكرة البراقة التى بدت بعض ملامحها فى بداية الرواية ثم أهال الكاتب عليها التراب فى نصفها الثانى

[Alaa Abdelwahab · Rating 2 out of 5]

الرواية كقصة حلوة أوى و استمتعت بشخصياتها والنقل بين الماضى والحاضر سلس و ممتع و بين الشخصيات ............ إلا أن اكثر ما ضايقنى فيها هو الهجوم الواضح و الصارخ على المتدينين و التيار الإسلامى لم يضايقنى إطلاقا إن الرواية تتحدث عن أسرة بهائية لكن ضايقنى هذا الهجوم على من يذهبون يصلون الجمعة و المحجبات و المنتقبات !!!

أكثر مقطع استفزنى حقا هو فى صفحة 79 ( بعد اغتيال الرئيس أنور السادات فى حادث المنصة الشهير فى أكتوبر عام 81 , أن الإسلاميين المتشددين فى طريقهم لحكم البلاد , إن لم يكن عن طريق كرسى الرئاسة و مقاعد البرلمان , عن طريق فرض العرف الحياتى اليومى , من خلال مظاهر يتم تقديسها رويدا رويدا . )

طبعا واضح جدا إنك بتتكلم عن الحجاب , هو مضايق حضرتك و حرقك أوى انتشار الحجاب فى إيه !!!!!!!!!!!!!!!!! و هو لا عرف و لا مظهر هو فرض على فكرة !!

طبعا دة بعيدا عن الأخطاء اللغوية أو المطبعية ؟! هو طبعا وارد إن يكون فى خطأ لكن 3 أخطاء صارخة فى كتاب 136 صفحة كتير !!! و هم

1- صفحة 35 المفروض تتحدث عن نورسين ( مؤنث) نجد ( و ظلت تلوكه ببطء شديد لمدة تزيد عن ساعة و "هو " تنظر تجاه الشباك )..... مين "هو" مش المفروض "هى" و للا أنا غلطانة !!!!

2- صفحة 60 ( قرأ عيد فى " القنوت " و ردد خلفه شكرى ) ...... الألف و اللام بيعملوا إيه تقريبا المفروض " فى قنوت " !!!

3- صفحة 65 ( إلى الاستوديو الخاص به مع " شورق " الشمس ) مين شورق ! مين شورق ! مش المفروض شروق الشمس !!!

طبعا أنا متأكدة لو حد متخصص لغة عربية قرأ الكتاب حيلاقى فيه بلاوى .

فى النهاية أحب أقول إن بجد خسارة القصة الحلوة دى فى القالب دة .

[عبدالرحمن السيد · Rating 1 out of 5]

ليس هناك أسوأ من عنوان رواية عظيم لرواية ضعيفة وللغاية. لم يكن من السهل إيجاد منفذ يبيع تلك الرواية حتى وجدتها أخيراً واشتريتها بمبلغ لا يناسب حجمها.
جذبني الغلاف. جذبتني ضآلة الرواية، قلت لنفسي ستكون مركزة.. ليس بها حشو وسأنتهي منها بسرعة.
ولكن.. وجدت بين كل حشو وحشو حشو!!.. رواية من 136 صفحة لم أستطع إكمال نصفها!.. يبدو أن الكاتب حاول أن يستعير أسلوب روائي آخر ففقد صوته، وفقد سلاسته في السرد..

سوف أفتح الآن صفحة عشوائية وأكتب هنا أول فقرة تقع عليها عيني للتوضيح لا أكثر:

(وفي خشوع راهب متبتل في أحد المعابد البوذية استلم شكري صندوق كاميرته الكرتوني الأبيض وكأنه يحمل طفله الأول الخارج من غرفة الولادة ليختلي برفيقته الأولى ويطمئن عليها قبل مغادرة المحل)

الايجابية الوحيدة في الرواية هي أنها تتحدث عن البهائية، ولكن، بسطحية غريبة وصادمة!
لم أستمتع، ولم أستفد، ولم أستطع إكمالها.. للأسف..

[wael hamdy · Rating 2 out of 5]

البداية الأكثر من رائعة شديدة التميز والامتاع، تخبو جذوتها وتضيع زهوتها
تدريجياً بتقدم الحبكة حتى نجد انفسنا امام نص ذابل وماسخ

تفرد الموضوع وجاذبية التفاصيل ورشاقة السرد، تتحول بتقدم صفحات الرواية الى اكليشيهات وموضوعات موجهة وحوارات مصنوعة

بالتأكيد تستحق القراءة، حتى لو بغرض ادراك ما وقعت فيه من اخطاء

[Wessam El-Deweny · Rating 1 out of 5]

رواية متواضعة جدا من حيث المحتوى واللغة.. الفكرة كويسة لكن طريقة كتابتها بتفتقر للإبداع ده غير تنميط صورة المتدينين واختزالها في أشخاص متشددين مولعين بالمظاهر.. ماشي مع التيار السائد دلوقتي مع إن أحداث الرواية لو بصينالها هنلاقيها بتدور حول أشخاص متدينين

[معتز بالله مصطفى · Rating 2 out of 5]

عادية جدا.. رغم ان الابطال بهائيين لكنها ما تعمقتش في الموضوع بالشكل الكافي.. الرواية واخدة طابع انساني تقليدي عادي.. رواية عادية.. جدا.

[Nirvana Nosseir · Rating 2 out of 5]

فكرة جديدة لكن ينقصها العمق والطرح ينقصه شىء .. لكن الرواية فى المجمل جميلة فيها الكثير من الصور الجميلة والمهمة لكن مع تسلسل الأحداث أصبحت فاترة.