شادو وبرسونا

by Yasser Youssef

جلس على الأرض وقد رأى الحقيقة التاليه ، حقيقة أنه في بروفة ليوم القيامة أو ما شابه ، نظر لجسده العاري بدهشه ولم يصدق فأغمض عينيه وفتحهما من الهول ولكنه وجد الشئ نفسه ، أنه عار مصاب تائه خائف
بدأ عقله باسترجاع الأحداث ، اجتماع فانصراف فركوب فماذا ؟
ماذا حدث أيضا ً؟ أها تلك الصدمه التي جاءت من الخلف ثم ماذا ؟ تساءل هل هذا ما حدث فحسب ؟ أي سرقة تلك ؟ لو أنه واجه لصوصا ً من الصومال لتركوا له ما يستر عورته على الأقل ، هؤلاء ليسوا لصوصا ً
تذكر أيها العقل اللعين ، سب في غضب ونهض واقفا ً يستطلع المكان الموحش فلم يسمع إلا أصوات الحشرات فجال ببصره فلم يرى إلا الحشائش التي استطالت وأخذت تتراقص يمينا ً ويساراً على أنغام فرس النبي وصرير الصراصير ونقيق الضفادع
كان متعباً مصاباً يتضور جوعا ً يتجمد بردا ً يموت تفكيرا ً،من ولماذا ؟
أبسط الأسئلة وأعقدها في نفس الوقت

415 pages, Paperback

First published January 28, 2015

About the author

DY

Reviews

[Yasser Youssef · Rating 5 out of 5]

في أول رواية ليا حاولت اتكلم عن أسئله بقالي فترة طويله بسألها وحاجات مهتم اني اكتب عنها زي :-
1.لو شفت قدامي خطأ بيحصل أي كان درجة ضرره ( كسر إشارة مرور أو جريمة قتل مثلا) مفروض اعمل ايه .اتدخل ازاي ؟هل مطلوب مني اني اقدم حلول ولا ده دور السلطه والأجهزة الرقابيه والأمنيه
2.حبيت اتكلم عن ردود الأفعال المختلفه قصاد نفس الحدث يعني واحد كتب بوست مثلا فيه ال بيعمل اعجاب في ال بيعمل كومنت شتيمه ونقد وفي ال بيقول جميل وفي ال بينافق ويقول دي احسن حاجه قريتها ..الخ
3. حبيت اكتب بأسلوب سينمائي قائم على المعلومات البسيطه ال اتعلمتها في فن السيناريو والكتابة وأكبر مثال على ده عنوان الرواية نفسه *شادو وبرسونا * سينمائيا تعني نظرية الوجه والوجه الآخر وحاولت ع قد ما اقدر العبها بطريقة مختلفه يعني مش لازم خير محض أو شر محض في معاني تانيه تحتمل الجانبين ،حاولت استخدم القطع في المشاهد لإثارة القاريء ،فلاش باك بسيط ميضرش :D
SUB TEXT استخدمته في بعض الحوارات ويقصد بيه الكلام ال له معنى ظاهر ومعنى خفي
رغم ان الرواية فن أدبي قائم على الكلام مش الصورة لكن فكرة ال VISUAL SCENE مبهره بالنسبه لي بالإضافه للرمزيه ، انك توصل المعنى بالصورة مش بالصوت والحوار ، ان لوحة مرسومه على الحيطه تعبر عن مشاعر شخصيه بدلا من المونولوج السردي الرتيب
INTERCUT اكتر من مشهد بيحصلوا ف نفس الوقت ف اكتر من مكان وحاجات تانيه استخدمتها ع قد ما اتعملت
4. اتكلمت عن بورسعيد - بلدي- بس بشكل خفيف محبتش اغرق في وصفها أو الكلام عنها لأن الكتابه عن ما هو ليس بالقاهره أو الاسكندريه مغامرة بعض الشيء ،زائد ان الأحداث ونوعية الروايه لا تحتمل وصف الطباع والأماكن والعادات بشكل مسترسل ، بالإضافه لتجنب لحساسية البعض
5.الفساد والسلبيه ال احنا فيها وتسفيه المصايب ال بتحصل وكأنها أمور عادية وكأننا لازم نضرب بقنبله ذرية عشان نفوق
6.اتكلمت شوية عن السرسجيه لأنهم فئه مثيرة للانتباه ع الأقل بالنسبه لي :D ، التحرش برضه موضوع شائك بالنسبه لي
الرواية دي بدأت كتابتها في 3/2012 وانهيتها في أواخر 2013 وهتصدر 2015 حاجات كتير اتغيرت طبعا وبعض توقعاتي في الأحداث حصلت في الواقع المصري نوستراداموس العرب :D
الريت مش سببه جودة العمل بقدر ما هو تشجيع ذاتي .

[Ahmed Eid · Rating 4 out of 5]

توقعت كثيرًا و أنا أقرأ عمل لكاتب شاب في بدايته الأدبية ان يكون العمل مكتظ بالمشاهدة الجنسية ، أو المشاهد الصوفية أو الهتافات السياسية .. لكن خاب توقعي هذه المرة ...
فانتازيا ؟ رعب ؟
كلا يا عزيزي ، بعيدًا تمامًا عن هذا النوع ..
رواية بها لغز ، في مدينة من مدن مصر ، شخصياتها مصرية للغاية .. مثلي و مثلك تمامًا انهيتها في ثلاثة جلسات فقط على غير العادة .. الرواية ممتعة و مشوقة جدًا لم أشعر بالملل للحظة واحدة ،لم أعد ما تبقى لي من صفحات حتى انتهى منها ..

الكاتب نجح في الدخول إلى روح الشخصيات و تركها تتحرك وحدها على الورق بينما ظل يراقب تصرفاتها من بعيد و ينقلها إلينا على الورق ، فتحس ان الشخصيات قريبة جدًا مننا قد تكون على بعد شبر من الشاشة الآن ..
نجح في سرد مجتمعنا المصري بلغة ممتازة و تعبيرات متناسقة و متزنة تماما و نقل الصورة الحادة الشرسة التي يعاني كل منا فى حياته الشرسة ان كان موظفًا ، أو كانت فتاة تخشى أعين الذئاب في الطريق ..

أتمنى له كل التوفيق والنجاح في رحلته الأدبية ..

[Salma Abou-Zaid · Rating 1 out of 5]

الرواية ممكن فكرتها تكون كويسة فكرة ممكن نتصرف إزاي لما بنشوف غلط .. ولكن في مط كبير جدا في الأحداث واللغة محتاجة تحسين طبعا ودة شيء أنا متفهماه لإن كاتب شاب .. ولكن التنقل بين الأحداث ماعجبنيش أبدا وماحستش اني استفادت منها أو طلعت بمغزى منها .. غير اني استنكرت جدا وضع بعض الألفاظ اللي بنتضايق لما نسمعها في الشارع .. في عمل أدبي!!
بتمنى التوفيق للكتاب وأخذ هذه الملاحظات في عين الإعتبار

[أحمد غريب · Rating 3 out of 5]

ياسر يوسف
الكاتب البورسعيدي الشاب ابن بلدي وابن جيلي
تجربة جديدة وفريدة بالنسبالي كبورسعيدي
ياسر بيعافر ضد التيار وبيحاول يقدم ادب انا ادعي انه نواه لأدب محترم بيرصد اوضاع حقيقة تاهت في وسط متاهات الرعب المبتذل والرومانسية المريضة والكتاب الجدد اللي بيكتبوا اكتر ما بيقروا ودخلنا علي رأي اللي قال دخلنا في موسم الكتابة للجميع اللي ختلطت مع موسم القراءة للجميع وبقت ميغة
عشان اكون صادق مع نفسي وامين مع صديقي هقول رأيي بمنتهي الصراحة من اجل كاتب مختلف ومحترم
بداية مع الفكرة
الفكرة تقليدية جدا ...جريمة قتل ..لكن الجريمة هنا في بورسعيد البلد الهادئة جدا الجميلة جدا الرائعة جدا
اللغة
في خلاف بيني وبين ياسر ان اللغة لازم تبقي قوية
وياسر من انصار اللغة البسيطة
في نقطة وسط كده
لغة ياسر سهلة وبسيطة بدون ركاكه ...لكني اظن انها لازم تبقي اقوي من كده شوية
لان في رأيي المتواضع الذي لا قيمة له ان الأديب اهم اهم اهم ادواته لغته ...هي سلاحة في رأيي
بنية الرواية نفسه
بصراحة الرواية معايا من -12-2015
لكنها خلصت اول امبارح ...وده لسبب شخصي مش سبب خالص له علاقة بالرواية الرواية خلصت في ساعات معدوده
رواية شيقة بمعني الكلمة
رسم تفاصيل الاحداث والمشاهد ممتع ولذيذ ومسلي
اغراق في التفاصيل حسب الحاجة
من غير دوشة وتفاصيل ملهاش لازمة
رسمة الشخصيات بالعمق المطلوب لكل شخصية
معظم الشخصيات تحت السطح بشوية
والشخصيات الاهم يارا وعمرو وعبد الله بالعمق المطلوب
الرواية في رأيي رصد لمكان زمان ومجتمع مداسش فيه قبل كده ...رصد صادق معبر من شاب تطلع من المجتمع ده
المجتمع اللي بيعاني الفساد وانهيار القيم الإجتماعية وكل حاجة وحشة صابت مصر
طريقة دخول الثورة في نهاية الأحداث كانت من اروع الروايات اللي دخلت الثورة في احداثها مأقحمتهاش زي روايات غيرها
التحول الدرامي المبرر لشخصية عمرو كان مبرر ومنطقي انما التحول الدرامي لشخصية عبد الله ونهايته والرسالة اللي في الآخر اللي مهضمتوش خالص خالص
النهاية بالنسبالي كانت نهاية للعمل وختامه مسك
ككل الرواية 2/5
لكن لأنها اول تجربة ف3/5
وبمزيد من التعمق في الأدب العربي اعتقد اننا قادرين نحصل علي اديب حقيقي
شكرا يا ياسر