المريد

by شريف إبراهيم

وضع الكاتب زجاجة الخمر على المكتب, اخرج كتاب من الدرج, فتحه من المنتصف, وضعه مفتوحا على المكتب, جلس على الكرسي و قال و هو ينظر للكتاب:
- هيا, أخرجوا, حان وقت الحساب
ظل جالسا مكانه, لم يحدث شيىء, فضرب بقبضته على سطح المكتب و قال:
- قلت لكم أخرجوا, لن تفلتوا مني, اخرجوا و الا حرقت ذلك الكتاب و أنتم فيه
"من قصة "الإله

154 pages, Paperback

First published November 1, 2014

Reviews

[شريف يوسف · Rating 3 out of 5]

المريد .. ابني الأول
بعض الناس شايفين ان مينفعش حد يقيم شغله الشخصي .. في حين اني شايف ان لازم كل واحد يقيم عمله الأول قبل ما يستنى الناس تقيمه و يكون صريح مع نفسه علشان يقدر يجدد و يطور

الكتاب دا انا تعبت فيه جدا .. لأن فعلا اخدت مجهود بشع اني اترجم الأفكار لكلمات مقروءة..
اصعب حاجة في الكتابة انك بتكون شايف المشهد قدامك و عايش فيه .. و محتاج انك توصف ادق تفصيلة في المشهد دا حتى لو في واحد مش من ضمن الأبطال اساسا عطس لازم تحسس اللي بيقرا ان في واحد قاعد ورا عطس.. ولازم بلغة لا هي معقدة فتظهر انك شخص عامل نفسك فتك ولاهي بسيطة لدرجة انك تظهر تافه و سطحي\

المعاناة مش بتنتهي بعد ما بتسلم كتابك و يتوافق عليه و تمضي العقد.. خالص.. ابسليوتلي..دي بتبتدي
لما تلاقي كتابك اتوزع و وصل المكتبات الكبيرة و رغم ذلك مش معروض و الناس مش شايفاه ..
لما تروح بنفسك مكتبة كبيرة جدا تعتبر تاني مكتبة على مستوى الجمهورية و تسأل عالكتاب و يقولك "هو موجود في الستوك بس انا مش لاقيه عندي و دورت عليه فكل حتة في الأرفف مش لاقيه"
لما تلاقي ناس بتكلمك و تقولك احنا دورنا عالكتاب في المكتبات اللي قولت عليها و قعدوا يدوروا و ملقوش حاجة .. طبعا مأساه .. انت عصير دماغك موصلش للناس .. و دي مش غلطة دار نشر ولا توزيع .. دي غلطة المكتبات نفسها اللي فعلا ممكن تضيع مجهودك كله لمجرد انك جديد في المجال

الكتبا دا عبارة عن مجموعة قصصية .. حاطط فيها رؤية بصنفها "فانتازيا واقعية" ..

عشرة قصص بأفكار و أساليب مختلفة اجتهدت في اني اظهرهم بشكل مناسب.. بعترف بتقصيري اللغوي في اخر قصتين بالأخص .. و بعترف بقسوتي في احدى القصص رغبة مني في اني اظهر بشكل الأديب المعاكس للتوقعات..
لكني برضه بأُقر ان في قصص قريبة جدا من قلبي و بعتبر نفسي فعلا إجتهدت فيهم و خرجت فيهم طاقة مهولة .. و حسب آراء الناس ان فعلا القصص القريبة من قلبي دي -بدون علمهم- هي القصص اللي أثرت فيهم فعلا و خلتهم يفكروا

القصص القريبة مني هما : قصة "الإله" - قصة "إنتهينا" - قصة "قطر اسكندرية" - قصة "حدث في مثل هذا القلب" - و اهم اهم اهم قصة فيهم بالنسبالي هي قصة "القرار" لأن فعلا تعبت فيها جدا

لكن لا يمنع ان باقي القصص برضه قريبة مني "حتى نهاية الوقت" و "استنجلينا" و "اسطيطس" و "حق ضائع" و "المريد" -القصة اللي جابتلي اتهامات غريبة- و فعلا تعبت فيهم جدا .. لكن سبحان مقلب القلوب بقى

المقدمة في بداية الكتاب بتفسر كتير جدا انا كاتب الكتاب دا ليه .. لكن ممكن تتقرا كأنها مقال منفصل

دا كان اول مولود .. و تاني مولود هو كتاب "دنيا" لكنه منزلش ورقي و نزل اونلاين فقط على موقع كتبنا.. و ان شاء الله المولود التالت في الطريق بس هيكون طبعا في اختلاف كبير في اللغة و طريقة السرد و الحوار .. لأني اتعلمت كتير من الناس اللي قالولي رأيهم

[Abdalla Reda · Rating 5 out of 5]

الكتاب فوق المتوقع

"حتي نهاية الوقت"
اكتر قصة استمتعت بيها لو هاوصفها بكلمة "خرافية"

"قطر اسكندرية"
الواقع V.S الحالة النفسية
وصف الحالة النفسية للبطل بصورة كويسة جدا لدرجة اني كنت بكمل النص علشان اعرف ده حقيقة وله تهيئات

"انتهينا"
ما هي الا دنيا نتكالب عليها
الشغر كويس جدا جدا جدا

"الاله"
في مشاكل فكرية اتفتحت كان لازم يتعرض حلها او توضيحها
زي " تعطي نفسك الحق في محاسبتنا علي ما اجبرتنا علي فعله " الانسان مسير ومجبر وله مخير بغض النظر انها قصة من الخيال بس فيها اسقاط كبير او ده الي فهمته كمتلقي بس كقصة بدون اسقاط فهي رهيبة وتتعمل فيلم

"حدث في مثل هذا القلب "
مبالغ فيها جدا
كانت عايزة شغل اكتر من كده او ممكن تتعمل رواية هتبقي افضل بكتير

"المريد "
فيها اخطاء دينية كبيرة جدا
كنت اتمني ان الجدال يبقي بين طرفين اقوي من بعض ومبني علي معلومات قوية
يعني مثلا "لا هم مكانوش مسلمين لكن ربنا صنفهم مسلمين لانهم امنو بيه وملائكته وكتبه ورسله " مبدئيا الاسلام هو ان تسلم وجهك لله بالتوحيد والبعد عن الشرك ومصطلح كلمة الاسلام اول واحد استخدمها هو سيدنا ابراهيم (وَجَاهِدُوا فِي اللَّهِ حَقَّ جِهَادِهِ هُوَ اجْتَبَاكُمْ وَمَا جَعَلَ عَلَيْكُمْ فِي الدِّينِ مِنْ حَرَجٍ مِلَّةَ أَبِيكُمْ إِبْرَاهِيمَ هُوَ سَمَّاكُمُ الْمُسْلِمينَ مِنْ قَبْلُ ) مش علشان ربنا صنفه مسلم


"سطيطس "
هو احنا صحيح كنا بنتكلم في ايه قبل الثورة :D



نسبة الموت والقتل عالية اوي في الكتاب بس مقبوله بالنسبة للاحداث الي احنا فيها
ربط الواقع بالخيال بصورة كويسة جدا لدرجة ان في قصص كتير كنت مقتنع تمام بالخيال

[Amr Mohamed · Rating 5 out of 5]

الكتاب أكثر من رائع و فعلا اسلوب سهل و جميل احسن من كتاب كتييير دلوقتي و الكتاب شدني من أول المقدمة الجميلة و أول قصة ( حتي نهاية الوقت) و من بعد شوية قراية و انبساط رجع تاني احساس جميل و انا بقرأ قصة ( القرار ) الي انا شايفها أفضل قصة في الرواية و من افضل القصص الي قريتها
بس المود فصل شوية من قصة ( في مثل هذا القلب ) معجبتنيش اوى لانها بالنسبالي مبالغ فيها شوية و بعدها رجع المود تاني بالقصة الي بعدها علطول و هي ( المريد ) و كملت بالمود دة للاخر و لكن النهاية لم تعجبني بقصة ( استنجلينة ) .ب
في الاخر احب اقولك كتاب رائع جدااااا و اسلوب مختلف و جديد و في كذا قصة في الكتاب حسيت انهم محتاجين مساحة فى الكتابة اكتر و ممكن تبدع فيهم و يبقو رواية مستقلة
ليك مستقبل كبير و قوي و اتمني اني اقرا رواية كاملة ليك بالاسلوب الفني الجميل دة و أكيد هتكسر الدنيا

[Mohammad Helmy · Rating 5 out of 5]

أسلوب أكثر من رائع.
أفضل بكثير من روائيين مشاهير.
يجب أن يأخذ فرصته في الظهور.
بالتوفيق إن شاء الله.

[Mohammed Alshaer · Rating 4 out of 5]

قصص قصيرة كل واحده منهم فى اتجاة مهتلف تمامًا
اسلوب الكاتب كويس جدًا
بيوصّل فكرته كويس
كنت حابب إنى اكملها للأخر

[Amr Saleh · Rating 4 out of 5]

الصراحه الكتبا في المجمل عجبني جدا جدا و اسمحلي اكتبلك رائي في قصه قصه من المجموعه القصصيه بتاعتك و اعذرني انا ممكن مكنش ناقد ادبي بس انا بكتب اللي بحسه و اللي حبيته و ارجو منك تقبل كلامي بصدر رحب سواء كان مدح او انتقاد
اولا: ابدء بالمقدمه اللي هي متنفعش تتسمي مقدمه من حلاوتها بجد جميله جدا لانها عبرت عن كل حاجه جوايا خصوصا جمله " صار الكبار يطلبون منا ان ندعهم يعيشون ما تبقي من عمر لهم في سلام " و ردك عليهم في الجزء ده .
نيجي بقي للقصه الاولي "حتي نهايه الوقت " قمه الرومانسيه و المشاعر فعلا و استطاع شريف ان ينقل الصوره بالكلام لينا زي ما نكون شايفنها لا مش شايفنها كمان لا انا حسيت فعلا اني خالد و اني بعشق مريم و كان نفسي القصه تطول اكتر من كده و تبقي روايه كامله علشان مخسرش الاحساس اللي انا حاسه
اما عن القصه الثانيه "قطر اسكندريه" فرغم ان الفكره سبق طرحها قبل كده في اكثر من روايه و مجموعه قصصيه الا ان انا حسيت بمدي تمكن شريف من الكلام و كأن اللغه سخرت ليه و يتحكم فيها كما يشاء
و بالنسبه للقصه الثالثه "انتهينا" فاكتر حاجه عجبتني فيها جمال الاشعار المستخدمه فيها واللي هطالبك بسببها انك تنزل كتابك الجديد ان شاء الله خواطر شعريه . تاني حاجه عجبتني انك نقلت شعور المتسابق بان كل الناس ضده و عليه و بينت و وضحت عقده الاضهاد اللي هو حاسس بيها . لكن اعيب عليك انك موضحتش كيف استطاع منافسه ان يأتي بابيات في مثل هذه القوه و هذا الاداء الرائع و هو لم يقدم اي شئ يذكر خلال المسابقه.
يأتي دور القصه الرابعه "الاله" تحيه كبيره علي وضع الايه القرائنيه المستخدمه كنبذه عن القصه رحمت الكاتب من كثير من الاعتراض الطبيعي علي اسم هذه القصه . و اني اراها هي اقل قصص هذه المجموعه القصصيه و لا تستحق ان يوضع مقدمتها في نبذه هذه المجموعه .
نيجي بقي للقصه الخامسه "حق ضائع " مش فاهم ليه الصراحه شريف استخدم اللغه العاميه و الفصحي و خلطهم مع بعض حسيت بحاجه غريبه في اول الروايه و الام بتتكلم عاميه و شريف بيتكل عاميه و بيوصف احساسه بالفصحي . يمكن ليه وجهه نظر مفهمتهاش . نيجي بقي لمحور القصه اللي هو عند الحلاق انا مش عايز اقول اد ايه جمله " و انت عايش علشان تقتله في تربته" سيبك من اي حاجه انا و الله عيني دمعت لوحدها لما سمعت الكلمه دي فعلا في منهي الروعه و الجمال و القصه دي رجعتني لاحساس الاستمتاع و اللذه اللي ابتديت بيه الكتاب من مقدمه و اول قصه
اما عن القصه السادسه "القرار " استمرار تام لحاله الاجاده قصه في منتهي الروعه الصراحه لازم اشهد ان شريف ممتاز جدا في وصف المشاعر و عنده قدره كبيره جدا علي تطويع الكلمات تحت ايده علشان تخدم مبتغاه و توصل الاحساس للقارئ
القصه السابعه" حدث في مثل هذا القلب " فهي مجرد حلقه في سلسه تميز شريف في نقل الاحداث و الاحاسيس بمنتهي الروعه و لكن يعيبه استهلاك هذه القصه من قبل كتير جدا يعني اتهرست
القصه الثامنه "المريد" و هي القصه الرئيسيه لهذه المجموعه و التي اخترها شريف كاسم لهذه المجموعه منكرش اني مكنتش اعرف يعني ايه مريد قبل القصه دي بالنسبه للجزء الاول للقصه فا انا مش هعلق عليه هعلق بس علي الجزء من ساعه ما الضيف الشيطاني مسك الاخ المستشيخ و ضربه انا بقي اتفق مع شريف تماما في كل الجزئيه دي . قصه المريد اقترب فيها شريف جدا من الخط الاحمر و تعداه الناس هتهاجمه كتير ارجو انه يكون فاهم و قاري هو كتب كده ليه و هل الكلام ده صحيح و لا لآ لاني متاكد ان اي ندوه للكتاب ده هتدور في فلك هذه القصه
القصه التاسعه "سطيطس" سوري في التعبير منتهي الفصلان الصراحه مش بعد الكلام ده كله تقفلنا بالقصه دي اسوء قصص الكتاب
القصه العاشره و الاخيره "استنجلينه" فمش فاهم ايه لزمتها اصلا و ايه لزمه الايحاءات الجنسيه اللي فيها
نظره سريعه و تقييم بالارقام من وجهه نظري:-
1- المقدمه : 9/10
2- حتي نهايه الوقت : 9/10
3- قطر اسكندريه : 7/10
4- انتهينا 8/10
5-الاله : 5/10
6- حق ضائع : 8/10
7- القرار :9/10
8- حدث في مثل هذا القلب : 7/10
9- المريد :9/10
10- سطيطس : 1/10
11- استنجلينه : 1/10
تقييمي للكتاب : جيد جدا (تم الاخذ في الاعتبار انه اول عمل للكاتب) ارجو الاستمرار علي هذا المستوي
حاجات كانت نفسي تكون موجوده ارجو تداركها في الطبعات القادمه :-
1- الفهرس
2- نبذه عن الكاتب
3- اعاده ترتيب القصص و محاوله نقل اخر قصتين علشان مكانهم فعلا فصلان
طلب من الكاتب : حد بامكانياتك و قدرتك العاليه علي استخدام الالفاظ و تطويع الكلمات محتاج يكتب روايه كبيره و يغلب عليها الطابع الرومانسي الدرامي او يكون بطل الروايه مريض نفسي لانك هتقدر بامكانياتك العاليه توصف كل اللي هو حاسس بيه و صراعاته النفسيه .
ملحوظه : جهز نفسك كويس اول ندوه للمجموعه دي هتتهاجم جدا علي قصه المريد جهز نفسك و حججك للرد

[Ragy Ismail · Rating 3 out of 5]

إسلوب الكاتب يجمع بين السلاسة الإسترسالية أحياناً وبين الرمزية الواقعية أحياناً أخرى, وبين السلاسة والرمزية معاً في أحيان كثيرة, من تقييمي الشخصي للقصص القصيرة المتنوعة و المتتالية لاحظت أن الكاتب قد بدأ بالمتواضع ثم تدرج بالأقوى فالأقوى وهكذا, مما أضر بحكم القارئ المبدئي على الكتاب في أول ثلاث قصص, وما تلبث أن تهيئ نفسك على إنطباع مبدئي متواضع عن الكتاب إلا أن تجد نفسك فضولياً لما هوالقادم; الأفضل!, و لعل الكاتب تعمد هذا, ربما! .. الكتاب في مجمله جيد بالنسبة لتجربة أدبية هي الأولى للكاتب ولكن أظنها تحتاج لكثير من النضج الأدبي في الفترة القادمة, وما أدركته من إستراتيجية الكاتب التدريجية أثناء قراءة الروايات القصيرة المتتالية, يجعلني بلا شك فضولياً أيضاً لما هوالقادم; الأفضل!.

[دينا ممدوح · Rating 4 out of 5]

المجموعة القصصية دي كانت ترشيح قوي وهدية جميلة
لأول مرة أقرأ لشريف إبراهيم
طريقته سلسة جدًا ولغته بسيطة توصل بسهولة للقارئ بدون جهد
افكاره واضحة ومباشرة بدون ملل أو تكرار
من الأستمرار في القراءة كان تقيمي للكتاب بيعلى
عجبتني قصة الآله وقصة القرار.. فكرتهم جديدة ومختلفة
قصة المُريد.. كانت قوية جدًا في مواجهتها لفكر سائد جدًا الفترة دي ونهايتها كفكرة فهي تحفة فعلًا

[Ahmed Hassan · Rating 4 out of 5]

هذا الكتاب جيد جدا, و ان كان لا يرتقي لدرجة الرائع لكنه جيد, تنوع القصص كان في مصلحة الكاتب ليثبت انه قادر على كتابة أنواع مختلفة من القصص, لكن معظم النهايات كانت مستفزة حقا, و اعترض على معظم أفكاره الجدلية, و اظن ان له ميول الحادية بعض الشيىء لكن هذا لا يمنع انه سيجبرني على قراءة مؤلفاته

[Hamza El-Kady · Rating 4 out of 5]

الصراحه المجموعه حلوه جدا
و مقدمه الكتاب من أجمل المقدمات
ممكن نسميها (مصر في 3 ورقات ) الصراحه الكتاب معبر عن كل البلاوي اللي عيشناها
النجمه اللي ناقصه بس عشان اخر قصتين
فكرتهم حلوه بس الأسلوب مبتذل و فيه حاجات ممكن تتحذف ملهاش لازمه خالص الصراحه ممكن اسميها
حشو للمبيعات
لكن هو الكتاب لذيذ

[Khaled Omara · Rating 1 out of 5]

بعد المقدمة النارية اللي قريتها توقعت الكتاب بنفس المستوى ..
للاسف .. القصة الاولى اللي شبه اعلان موبينيل عن البوستات الرومانسية جابتلي دوار بحر .
توقعت ان اللي جاي يعوضني عن الصدمة لكن للاسف لم يخفف عني الا رواية حق ضائع .. دي من وجهة نظري النقطة المضيئة فالموضوع كله ......

[Mostafa El-saddik · Rating 5 out of 5]

الكتاب مكتوب باسلوب سهل جدا بيعبر عن ثقة الكاتب فى مادة القصة بعيد اى نوع من انواع التعقيد البلاغى اللى معظم الكتاب الشباب بيحاولوا انهم يستعملوها

[Amr · Rating 3 out of 5]

أسلوب الكتابة جميل، لكن عندي مشكلة مع النهايات المفتوحة الكتير، بس في المجمل كتاب محترم...الكاتب عنده خيال خصب ممكن يتيح له أنه يكتب أفلام، توصيف الحركة مش سهل، و الكاتب تفوق على نفسه في الوصف

[حلم زمان · Rating 5 out of 5]

كتاب اكتر من رائع بجد الانتقال بين كل قصه وقصه اكتر من رائعه اتمنى انى اقرالوا اعمال تانيه كتير اوووى بجد تحفه

[سيد مصطفى · Rating 4 out of 5]

موش بطال

[Mahmoud Zeyada · Rating 4 out of 5]

الأمتاع فى بعض القصص فوق المتوقع و الممتع و خبايا المعنى بالبعض الاخر له جازبيه خاصه

شكرآ

[شـيـريـن · Rating 4 out of 5]

مجموعة قصصية جميلة جداً ..
والمريد قصة لخصت واقع مؤلم ..
شيخ + قسيس + حاخام = دقون فى وجوه وقحة .. إلا من رحم ربى !

[Saher El-Shall. · Rating 2 out of 5]

انا أصلاً مابحبش القصص القصيرة :D لو كنت بس أخدت بالى و أنا بشترى الكتاب

[Mahmoud Ezzat · Rating 1 out of 5]

عزائي الوحيد اني مدفعتش فيها فلوس وخدتها هدية من دار #كيان ، واجمل حاجه فيه هو الاقتباس الي حطه الكاتب بنفسه من مقولة لعباس العقاد “ ليس هناك كتابا أقرأه و لا أستفيد منه شيئا جديدا ، فحتى الكتاب التافه أستفيد من قراءته ، أني تعلمت شيئا جديدا هو ما هي التفاهة ؟ و كيف يكتب الكتاب التافهون ؟ و فيم يفكرون ؟” بس كده 🤣🤣