കാടിനെ ഇഷ്ടപ്പെടുന്ന ആരെയും മോഹിപ്പിക്കുന്ന ഈ പാതയിലൂടെ കാൽനടയായി നടത്തിയ യാത്രകളെ നമുക്ക് ഈ പുസ്തകത്തിലൂടെ തൊട്ടറിയാൻ കഴിയും; കൂടെ നിത്യജീവിതത്തിന്റെ ആവർത്തനവിരസതയിൽനിന്ന് ഒരു താത്കാലികമോചനവും. -ജെർളി
രണ്ടാം ലോകമഹായുദ്ധകാലത്ത് യുദ്ധാവശ്യങ്ങൾക്കുവേണ്ടി ബ്രിട്ടീഷുകാർ കൊടൈക്കനാലിൽനിന്ന് മൂന്നാർ ടോപ്പ് സ്റ്റേഷനിലേക്ക് ഒരു ജീപ്പുപാത തുറന്നു. എസ്കേപ്പ് റോഡ് എന്ന് അറിയപ്പെട്ടിരുന്ന ഈ പാതയ്ക്ക് 81 കിലോമീറ്ററായിരുന്നു ദൈർഘ്യം. ആ പാതയിലൂടെ കാൽനടയായി നടത്തിയ യാത്രകളുടെ കുളിർമയാണ് ഈ പുസ്തകം.
പരിസ്ഥിതിപ്രവർത്തകനും വന്യജീവി ഫോട്ടോഗ്രാഫറുമായ എൻ.എ. നസീറിന്റെ പുതിയ പുസ്തകം
ടോപ്സ്റ്റേഷനിൽ നിന്ന് കോടയ്ക്കനാലിലെയ്ക്ക് അപൂർവ സസ്യ-ജന്തു ജാലകങ്ങൾ നിറഞ്ഞ, മഞ്ഞുമൂടിയ നിഗൂഢ വനഭൂമിയിലൂടെ ഒരു കാട്ടുവഴി ഉണ്ടായിരുന്നു, അധികമാരും സഞ്ചരിക്കാതെ ആ വഴിയങ്ങനെ മഞ്ഞുമൂടികിടന്നു. ഇതായിരുന്നു എസ്കേപ് റൂട്ടിന്റെ ആദ്യ പാത. രണ്ടാം ലോകമഹായുദ്ധസമയത്ത് കോടയ്ക്കാനാലിന്റെ ഉൾപ്രദേശത്തുള്ള പാമ്പാർ നദിക്കടുത്തെ താഴ്വാരകളിൽ ബ്രിട്ടീഷ് സൈന്യത്തിനായി ബരക്കുകൾ നിർമ്മിച്ചിരുന്നു. മദ്രാസിൽ ജപ്പാൻ സൈന്യം ബോംബിങ് തുടങ്ങിയപ്പോൾ അവിടെയുണ്ടായിരുന്ന ബ്രിട്ടീഷുകാർ, കോടയ്ക്കാനാൽ പർവ്വത നിരകളിൽ അഭയം പ്രാപിച്ചു.
കോടയ്ക്കാനാലിൽ നിന്നും പുൽമേടുകളും ഗോൾഫ് ക്ലബ്ബും ഷോലക്കാടുകളും ബെരിജം തടാകവും കടന്ന് വന്തരവ് മലകളെ ചുറ്റി ടോപ്സ്റ്റേഷനിലേക്ക് എത്തുന്ന പഴയ SH18 പാത ദ്രുതഗതിയിൽ, കുതിരകൾക്കും വാഹനങ്ങൾക്കും സഞ്ചരിക്കാവുന്ന തരത്തിലാക്കി. ജപ്പാൻ അധിനിവേശം ശക്തിപ്പെടുത്തിയാൽ, വാഹന ഗതാഗതത്തിന് യോഗ്യമാക്കിയ വഴിയിലൂടെ വേഗത്തിൽ മൂന്നാർ എത്തി, അവിടെ നിന്ന് കൊച്ചിവഴി രാജ്യം വിടുക എന്ന ഉദ്ദേശത്തിലാണ് ബ്രിട്ടീഷ്കാർ ഈ പാത വിപുലീകരിച്ചത്. ആയതുകൊണ്ടാണ് ഈ പാതയ്ക്ക് എസ്കേപ്പ് റോഡ് എന്ന വിളിപ്പേര് ഉണ്ടായത്.
മൂന്നാറിനെ ഇഷ്ടപ്പെടുന്ന ഓരോ സഞ്ചരിയുടെയും സ്വപ്ന സഞ്ചാര റൂട്ടാണ്, കോടയ് - കൊച്ചി എസ്കേപ് റൂട്ടിലെ, ടോപ്സ്റ്റേഷൻ മുതൽ കോടയ്ക്കാനാൽ വരെയുള്ള വഴിയിലൂടെയുള്ള ഒരു യാത്ര. നിർഭാഗ്യവശാൽ ഇക്കലത്ത് ഈ വഴിയുള്ള യാത്ര വെറും സ്വപ്നമായി അവശേഷിക്കുന്നു. എസ്കേപ് റൂട്ട് വഴിയുള്ള സഞ്ചാരം ഇരു സംസ്ഥാനങ്ങളും വിലക്കുന്നതിന് മുന്നേ ആ വഴിയെ ലേഖകൻ പലവട്ടം യാത്രചെയ്തതിന്റെ ഓർമ്മകൾ മനോഹരമായി പുസ്തകത്തിലേക്ക് ആവാഹിച്ചിരിക്കുന്നു.
വന്തറവ് മുടിയിലെ നനുത്ത മഞ്ഞിന്റെ കുളിരും പുതച്ച്, പലവട്ടം, പല വഴികളിലൂടെ കോടയ്ക്കനാൽ താഴ്വാരങ്ങളിലേക്ക്, പൂണ്ടിയിലേക്ക് ബരിജാമിലേക്ക് ലേഖനൊപ്പം കാടിറങ്ങി പോകാം. യാത്രക്കിടയിൽ മലയിറങ്ങി വരുന്ന വമ്പൻ കാട്ടുപോത്തുകളെയും മധുരഗാനം പൊഴിക്കുന്ന പക്ഷികളും ചിലപ്പോൾ കടുവയും പുലിയുമൊക്കെ കൂട്ടിനെത്തും...
കാത്തിരിക്കാം... വരുംകാലമെന്നെങ്കിലും ഒരിക്കൽ കോടയ് - കൊച്ചി എസ്കേപ് റൂട്ടിലെ, ടോപ്പ് സ്റ്റേഷനിൽ നിന്ന് ബെരിജം താഴ്വാരം കടന്ന് കോടയ്ക്കാനാലിൽ എത്തുന്നയൊരു സഞ്ചാരം, സ്വപ്നം കാണാം.