أقسى من الموت

by محمد عصمت

لكل شيء ثمن، وثمن أستدعاء نفر من الجن لتحقيق مشيئة بشرية.. باهظ جدًا!
وشديد القسوة!

188 pages, Paperback

First published January 24, 2022

Reviews

[طارق سيد · Rating 4 out of 5]

تطور ملحوظ في لغة و شخصيات الكاتب ،صفحات كاملة خالية من الحوار.
رواية فيها جرعات ممتازة من الرعب و التشويق ،في حبكة مميزة.
الرعب الشرقي منطقة جديدة علي محمد عصمت و الحقيقة برع فيها.
سيدة مطلقة تنتقل للحياة في محافظة بورسعيد ابنها بيختفي في ظروف غامضة و تصحبنا معاها في رحلة البحث عنه، لتكتشف كيف كان شيطانها رحيما.
للمزيد من التفاصيل مراجعة مرئية للعمل بدون حرق للاحداث
#كوكب_الكتب
#العراف


https://youtu.be/iFsjd4sYq4E

[Ahmed Gohary · Rating 3 out of 5]

تقييمي للرواية نجمتين ونص

الرواية عكس التوقعات كانت تميل للتشويق والاثارة وليس الرعب ،توجد العديد من الثغرات الواضحة التي لا يجب ان يغفلها كاتب مخضرم كمحمد عصمت

بعض التساؤلات التي بلا إجابة

لماذا طلب الأمين جلال من ريم الذهاب الحاج يوسف لمساعدتها، وهو اصلا الذي يحتاج للمساعدة

ما هي الصدفة الغريبة ان يكون الشيطان الذي تعاملت ريم معة من قبل موجود في نفس المحافظة الجديدة التي ذهبت اليها مفيش شياطين غيرة ولا اية
هل يوجد مبرر لأي ام ان تقوم بتحضير تعويذة سحرية وابنها نائم في نفس البيت حتي ولو بمنوم
توجد حلفة مفقودة لم افهمها في الاحداث هل اتباع الشيطان كانو يأتون بالأطفال ويذبحونها كقاربين وما هو هدف تلك الأفعال
ما المغزي من العنوان الفرعي تحت العنوان الرئيسي "عندما يكون شيطانك رحيما" لم أفهم ما الأفعال الرحيم التي فعلها الشيطان في الرواية


اخيرا الغلاف يشبة بشدة غلاف رواية كاري لستيفن كينج وبالصدفة بقراهم دلوقتي مع بعض ترجمة دار المحروسة

[Mohammed Tharwat · Rating 5 out of 5]

طيب خلينا نتفق ان في رواية حلوه وفي رواية عظيمه الروايه ده عظيمه انا مبسوط اني قعدت وقت من حياتي عايش بين سطور الابداع ده
الفكره ينطبق عليها السهل الممتنع يعني تحس انك عارفها انك شفتها قبل كده بس لا .
حبكه ايه وسرد احداث ايه ممتع وبالضبط لا بالزياده ولا بالتقليل وكل حاجه وكل مشهد بيحصل عشان يضيف حاجه للابداع ده
النهايه من اروع النهايات اللي قرأتها في حياتي انا ما كنتش عاوز الروايه تخلص ..في حوار في الاخر في مشهد في الاخر يدرس في كتابه روايات الرعب
الاهتمام بالتفاصيل ومش كاتب مشاهد لمجرد الرعب كل مشهد وتفصيله بتكمل بعض وبتفيد الخط الرئيسي للقصه والنتيجه في الاخر ان كل مشهد لوحده مرعب والفكره في المجمل تشبع شغفك للرعب .

[Maha Mustafa · Rating 3 out of 5]

"لماذا لا يتوقَّف الكون عن الدوران بعد وفاة أحد أحبائنا؟ كيف يضحَك البشر؟ كيف تُشرق الشمس؟ كيف تدور الأرض حول محورها من الأساس؟ لماذا لا يموت البشر كمدًا؟ لماذا لا تغرَق الأرض في حُزنٍ مُعتِمٍ؟ لماذا لا يشعُر الآخرون بوجعنا وآلامنا؟"
* هناك أحداث ليست مكتمله غير مفهومه كنت اتمني تفاصيل أكثر من ذلك، مثيرة ومشوقة أكثر من أنها رعب و الإيقاع بها سريع.. الغلاف 😑

[ضحى صلاح · Rating 5 out of 5]

عاوزة أعرف بيجيب الأفكار دي منين بجد
وليه كده!
أنا مش هحرق يعني.. بس ليه؟

[معتز حجازي · Rating 4 out of 5]

تصنيف الكاتب و الرواية: رعب

ريم مطلقة والدها متوفي و خارجة من تجربة زواج و ابنها عادل، دي الشخصيات الرئيسية في الرواية.. ريم غيرت مدرسة ابنها عادل و بعد أول يوم في المدرسة الجديدة ابنها يطلب منها تغيير المدرسة و لكنها ترفض طلبه، هل استمرار عادل في المدرسة الجديدة هيعدي بسهولة و لا لأ.

(باب اللعنات) آخر حاجة قرأتها للكاتب، يعني ده آخر انطباع و رأي كونته عن محمد عصمت.. الفرق بين الروايتين كتير و فعلا لقيت اختلاف كبير من الكاتب، و فكرة ان كاتب كبير و قديم في السوق زي محمد عصمت لسة بيطور نفسه دي حاجة تحسبله جداا.. السرد كتير و الحوار اقل.. الاسلوب مختلف حلو جدا بلاغي جدا أدبي جدا تشبيهات في محلها جدا.

من بدابة الإعلان عن الرواية و شوفت اسمها، الحقيقة معجبنيش و حسيته عادي جدا.. لكن في نهاية الرواية و بالتحديد صفحة 178 لقيت ان لا يناسب الرواية اسم غير (أقسى من الموت) أنا قلت لنفسي: فعلا اللي حصل ده أقسى من الموت.

محمد عصمت مشهور بالمشهد الافتتاحي بتاع الرواية.. لكن أنا مجذبش انتباهي قد مشهد ريم في الجهة الحكومية و هي بتخلص أوراق.. مشاهد ريم مع أبوها في العموم كلها جميلة جدا.. لو حسيت في النص بلغبطة كمل كل حاجة مقصودة.

المآخذ بقة: كان نفسي الرواية تكون أطول من كده، أنا اتفاجئت و عشت التفاصيل و اتصدمت لكن فعلا كنت اتمنى انها تكون أطول.. عارف ان الكومنت ده بيضايق أي كاتب بس ده تمني في تطويل المتعة و التشويق و اللإثارة و ثقة في قلم الكاتب أكتر.

[لانستر العظيم · Rating 5 out of 5]

رواية عظمه
أجمل ما فيها هو وصف المشاهد المرعبة

[Ahmed Yasser · Rating 3 out of 5]

اول قراءات المعرض المبشرة..

رواية عن الفقد، و عدم قبوله او التصالح معه، عن التعلق. التعلق المرضي، عندما لا نستطيع الحياة بدون شخص معين و نعتمد عليه كاملا في الحياة، عندما نفقده ينكشف لنا ضعف أنفسنا و وحدتنا فلا نستطيع الاستمرار بدونه و نمشي في طريق نهايته أقسى من الموت.. بكثير.

الرواية حلوة، بس انا زعلان بصراحة، أنا شايف إن فيها فرص كتير جداً مهدرة للأسف، لازلت رواية جيدة و لكن بشوية حاجات زيادة كان ممكن تبقي رواية عظيمة.

الشخصية الأساسية ريم مكتوبة باحترافية شديدة جدا، علاقتها ب أبوها مرسومة حلو بطريقة توصل للقارئ بس في رأيي كانت محتاجة فصلين كمان مثلا، نشوف منها أبعاد مختلفة
مثال:
يطلعها في الحلم مثلا بعد وفاته ، و بعد حدث معين في الرواية، نشوف مشكلة او خناقة بينهم و نشوف بيصلحها ازاي، نشوف موقف تاني ليها غير مشكلة مع زوجها او مصيبة حصلتلها و نشوف تعلقها بأبوها و هو عايش زي ما شفنا تعلقها بيه و هو ميت، كانت هتفرق بصراحة في التجربة و تخلينا نشعر بالتعلق و الفقد مع الشخصية مش نشوفهم بس.
كان ممكن برده نعيش مع الشخصية موقف من طفولتها متعلق مثلا بالخوف بشئ من الحاجات الحصلت في القصر كان وقعهها هيبقي أقوي.


الشخصية الثانية و هي شخصية يوسف للأسف كل شئ متعلق بيها معجبنيش، أفعاله محتاجة بعض التبرير،كنا محتاجين نشوف حاجات من الماضي بتاعه بدل ما شوفنا نتيجة الحصله بس، لأ نشوفه و نعيش معاه و ساعتها هنتفاعل مع وجوده في القصة أكتر.. أو كانت تبقي شخصة تانية بقصة تانية كان ممكن تبقي أفضل.

الحبكة بسيطة و ده مش عيب بالعكس الحبكة حلوة و مكنتش محتاجة تتعقد أكتر، مشاهد الرعب و الأكشن مكتوبة حلو بس كانت هتبقي أحلي لو كنا عارفين حاجات اكتر عن الشخصيات، عن ماضي القصر، لو زودنا عنصر قلق زيادة .


نيجي بقي لأهم حاجة و هي النهاية و عنصر المفاجأة فيها و ده اقوي جزء بالتأكيد، و لكن.
، للأسف أنا توقعت نصف الحصل و أعتقد إن أي حد بيقرأ هيتوقع نصف الحصل، و لكن النصف الأخر كان مفاجأة حلوة جدا. كانت هتبقي أحلي لو كان الشئ المتوقع منها موجود في الأول و المفاجأة فضلت مستخبية للأخر لوحدها، كنت هبقي متشوق أكتر بكتير بصراحة و أنا بقرأ!

و النهاية عمتا درامية و عجبتني بس كانت هتعجبني أكتر لو النقط الذكرتها كانت مختلفة.


و السرد و الأسلوب كويسين و سهلين و لغة محمد عصمت دايما حلوة وبتدخلك في الأحداث بسهولة بس بعض التشبيهات بحسها مش مناسبة لجو الرواية بس كانت قليلة، كان في أخطاء املائية اتمني الدار تصلحها في الطبعات الجاية.



في المجمل الرواية حلوة بس كانت هتبقي رواية عظيمة لو كان فيها شوية حاجات مختلفة و الحاجات دي كانت هتخليها رواية اطول أكيد و يمكن الكاتب مكنش عايز كده، بس من وجهة نظري القصة كانت تستحق ده.

في النهاية كانت قراءة ممتعة، تخللها بعض الملل لإني مش بستمتع بمشاهد الرعب اوي و لكن عاجبني انها مش رواية رعب و خلاص بل ناقشت موضوع مهم بطريقة حلوة جدا!

[Amira Ragap · Rating 2 out of 5]

من المفترض ان الرواية تصنف ضمن روايات الرعب، ولكن الرواية بها كثير من التفاصيل والاحداث العادية مما يخرجها من هذا التصنيف من وجهة نظري.
مشاهد ومشاعر الرعب الحقيقية قليلة جدا داخل الرواية ومركزه خاصه في الجزء الختامي من الرواية.
اضافة الي وجود كثير من الثغرات في الحبكة نفسها، مما يدعو الي كثير من التساؤلات ووجود نقاط مبهمة كثيره لم تتضح حتي مع نهاية الرواية.
افتتاحية الرواية هي افضل ما في الرواية كلها في رأي.
بالطبع محمد عصمت كاتب رعب كبير وغني عن التعريف ولكن شعرت بان هذا العمل تجربة جديدة بالنسبة له ولم تأخذ الوقت الكافي والجهد المطلوب لتقارن بباقي اعمال الكاتب.

[Rania Essam · Rating 3 out of 5]

" لماذا لا يتوقف الكون عن الدوران بعد وفاة أحد أحبائنا؟
كيف يضحك البشر؟ كيف تُشرق الشمس؟ كيف تدور الأرض حول محورها من الأساس؟ لماذا لا يموت البشر كمداََ؟ لماذا لا تغرق الأرض في حُزن مُعتم؟ لماذا لا يشعر الآخرون بوجعنا وآلامنا؟ "
١٧ / ٢ / ٢٠٢٣

[Aida · Rating 2 out of 5]

بحب أقرأ للكاتب محمد عصمت اوى بس الرواية دى عصبتنى شوية يمكن علشان كان فى expectations شوية علشان كان كله بيشكر فيها ، بس بالنسبالي هى نجمتين و النجمتين علشان طريقه كتابه الكاتب شايفه فيها تحسن قوى و ان بدايتها شدتى بس كده.
الكتاب كان ماشى كويس لغاية ما ريم راحت القسم علشان تقول ان ابنها اختفى بعد كده بقى فى عك كتير و حاجات كتير اوى مش واضحة خالص، فهقولهم بإيجاز
-الظابط قلها يوسف هيسعدك و هو اصلن نفسه مش فاهم حاجه و فى نفس الموقف اللى هى فيه ف الشخصية دى محطوطه بس علشان تقولها تاريخ الاحداث و ده باين اوى.
جوزها عارف ان ابنهم مات... طب ايه ؟ مادام ما ابنهم مات عن طريق التضحية و كده ف مفيش اى تحقيق ف ان ابنها مات؟. يعنى جوزها ايه اللى واصله ان الولد مات ازاى ؟ و لو عارف اللى حصل اكيد مش هيسامحها يعنى و يكلمها يطمن عليها كمان ، فى احداث كتيره اوى مش مقنعة بجد و مفيش تفسيرات كتير لاى حاجه

[Hanaa Hany · Rating 5 out of 5]

كعادة الكاتب محمد عصمت يبهرني أسلوبه زي ما حصل قبل كدة في ال4 أجزاء بتوع حدث بالفعل
شخصية ريم قدرت تخدعني من التعاطف معها لدرجة البكاء في بعض الأحيان إلى هي سبب كل ده في الأخر
رواية ذكية تقدر تشدك لأخر صفحة من كتر الأحداث والتفاصيل وروعة الإلقاء ومبسوطة إنها من قائمة الكتب اللي جبتها من معرض الكتاب

[Kareem Wahba · Rating 4 out of 5]

أحذر في البداية ان المراجعة سوف تحتوي علي حرق للأحداث.. لذلك إذا لم تكن متعارض مع هذا التنويه فتابع القراءه.
تحكي القصة بكل بساطة :
ان سيدة قرأت في إحدي كتب السحر التي كانت تخص والدها الراحل، وكانت قرأتها وتنفيذها للطقوس السحرية - والتي شملت بالمناسبة استدعاء أحد أفراد الجن - لأعادة والدها مرة أخري إلي الحياة، لانها أحالت علي نفسها ان تعيش بدونه، ولكنها خسرت حياة أبنها الصغير أثناء تلك المحاولة التي بائت بالفشل، ثم تدمرت علاقتها مع زوجها وتطلقا، وأصيبت (بالوُهَام).
بدأ الكاتب محمد عصمت نسج أحداث روايته بعد هذا التخطيط، وللأحقاق الحق، فأنه برع بأسلوبه السردي في توصيل كامل المشاهد، وكانما كان يرسمها أمامه أولا، ثم يبدأ بوصفها.
وقد أخذنا معها الي تلك المغامرة التي بصراحة كانت خارج نطاق التفكير الاعتيادي، فلم أتصور ولو لحظة قبل أن يعود بتقنية "الفلاش باك" انها المسبب في تلك الأحداث.
ولكنني لم أبتلع فكرة الربط بين (أسطورة المدرسة المسكونة) و (ممارسة ريم للسحر) و (حكاية الدرويش و أم قويق).
رغم ان هناك رابط بينهم لا أخفيه، الا وهو التضحية بنفس في سبيل نفس أخري، بالإضافة الي السبب الاقوي ان الشرير هو نفسة بتلك التفرعات الثلاث.
وقد أعتمد الكاتب في تكوين شخصيات الرواية علي مبدأ التكثيف ، فنحن لم نري علي مدار الحكاية سوي: ريم و الجن، ووالدها وأبنها ويوسف.
ولا ادري اين اصنف زوج ريم هل يكون مع الشخصيات او الشخوص وهم: الضابط، أمين الشرطة، العسكري، موظفين الشركة، الدرويش وزوجته.
ثم المجاميع (سواء من سيدات الزار او الاطفال او الكائنات، المدرسة، وغيرهم).
وأعترف ان للكاتب اسلوب مميز في مونتاج روايته.. ولكن أعتمادة الكامل علي الوُهَام فقط، أشعرني انه قد استخف بي كقارىء وقد كنت انتظر اسباب أخري أكثر أقناعًا.
ولكن هذا لم يقلل أبدأ من قدر مجمل الرواية، فهي مميزة جدا وليست أقل قدرًا مما تعودنا عليه من محمد عصمت.
...
هذه المراجعة قائمة بالكامل علي المنهج الانطباعي، ولا يأخذ بها كنقد للرواية حيث اني اتبعت خلال مراجعتي لها علي اهوائي الشخصية.

[Omneya · Rating 4 out of 5]

إيماننا بأن لكل رحلة نهاية قادرا بأن يشفى كل الجراح.. جراح الفقد ، جراح رحيل الاحباب المقربين.. لكل قصة نهاية ولكل إنسان فى حياتنا كذلك قصة يكتب سطورها ويكتب نهايتها ولا نملك إلا الايمان بأن تلك النهاية لآبد و أن تكون الأفضل ، بل هى الخير كله.. وإن سعينا لتغييرها ، قد نلقى مالا يحمد عقباه..

ريم امرأة شابة لأب افرط فى تدليلها وكان هو السند الوحيد الحقيقي بحياتها.. فما أن فارقها حتى اختل توازنها.. وعقلها وصارت تسعى بكل ما أوتيت من جهد لاحباط ما كتبه القدر عليها.. فما كان منها إلا أن دفعت الثمن غاليا..
وهكذا هى نظرتنا للأمور.. سطحية دائما.. نظل نفكر ونتعلق بمن رحلوا على حساب من هم معنا بكل جوارحهم.. فنخسر الطرفان.. ونبقى وحدنا فى هذا العالم نعانى آلآم الفقد.. والتى هى أقسي من الموت..

......

فى روايته أقسي من الموت والتى ادرجها تحت كتابات الرعب وبكل ثقة، قدم لنا الكاتب محمد عصمت تجربة إنسانية مغلفة بأجواء الاثارة والرعب.. والحزن أيضا كلما اقتربت من النهاية واتضحت لك الصورة..

والحق أقول أنا لست من هواة قراءة الرعب لا لشئ إلا لخوفى الشديد 😄، ولكنى تجرأت واستمريت بالقراءة لأحي الكاتب هنا على وصفه الدقيق لكل ما حدث بالقصر القديم وبعض المشاهد التى ازعجتنى (كقارئة غير معتادة على قراءة الرعب) من فرط صدقها وتفاصيلها كمشهد تقديم القرابين أسفل القصر ومشاهد مواجهه يوسف وريم لذلك الشيطان بالغرفة المظلمة..

أستخدم الكاتب اللغة العربية الفصحى سردا وحوارا، لغة بسيطة سلسة تليق بعمل يخطف أنفاسك وتظل تطارد أحداثه إلى أن تنتهى منها..

الأمر الوحيد الذى أعاتب عليه الكاتب هو تباطئ الاحداث فى بداية العمل مما جعل نصفه الأول ممل بعض الشئ ، لكن فيما بعد ومع احتدام المواقف و المشاهد صارت الاحداث متواترة فى صورة رائعة تحبس الأنفاس حتى نهايتها..

كل التوفيق ل ا. محمد عصمت كاتب روايات الرعب الشهير ومن نجاح لنجاح بإذن الله ❤️

[Joe · Rating 5 out of 5]

روايه أقسى من الموت
للكاتب محمد عصمت "ريم المطلقه ، نتعرف على قصه ريم وانها فقدت والدها ساندها فى الدنيا و زوجها الذى تطلقت منه وتعيش وحيده مع ابنها ياسين نتعرف ونعيش مع الكاتبه اول يوم عمل لها والموافق أيضا اول يوم مدرسه لابنها ياسين تذهب ريم لتوصل ابنها إلى مدرسته الجديده مدرسته التى كانت قديمه قصر لاحد اغنياء بور فواد ،كانت ريم ترى دائما رده فعل غريبه من ابنها ياسين على أنه دائما يقول لأمه انه لا يريد الذهاب إلى المدرسه لأنها مدرسه مخيفه للغايه وتتجاهل ريم كلام ابنها ، إلى أن جاء اليوم الموعود ورائت بوست على الفيس بوك للكاتب يسمى بى عمرو المنوفى ( المقال موجود داخل الروايه ) تتحدث على مدرسه مسكونه فى بور فواد دخلت ريم لتتفحص الخبر على جوجل لأنها رائت انها قريب كل القرب من المدرسه الجديده لابنها فكيف ستحل ريم الموقف بعد أن عرفت ان مدرسه ابنها اغلقت منذ زمن بعيد وانها مسكونه؟!"
الروايه ارعبتنى جدا جدا مع انى مش بخاف بس ده نوعى المفضل من الرعب
تقييم الروايه 5/5

[Akira San · Rating 5 out of 5]

فكرتها هايلة ومبكتره

[فاطمة رمضان · Rating 5 out of 5]

قصة جميلة ووصف أجمل

[Jasmin Abd Elghany · Rating 5 out of 5]

#ريفيو
#أقسى_من_الموت

من منَّا لم يفقد عزيزًا ذهب إلى السماء، مَن منّا لم يذُق مرارة أن يُوارَى جسدًا غاليًا عليه تحت التراب.
إنه الشعور الأقسى على الإطلاق، الشعور الذي يجعلك تكره كل شيء حتى ذاتك، تتمنى لو تهرب بعيدًا، أن تختفي عن أنظار الجميع وتذهب إليه في تلك اللحظة سيتملكك الحزن، سيخطر ببالك أبشع الأشياء، ستحاول أن تعثر عليه بكل الطرق ولكنك تدرك أنه لن يعود، لن يعود لأنه أبعد مما يكون، ستشعر بالحنين يسيطر عليك، ستبكي مرارًا على فقده، ستخبر نفسك أنك بداخل حلم لا حقيقة، وأنك حينما تستيقظ ستجده أمامك يخبرك أن لا تفزع، وحينها سيبدأ الناس بالشفقة عليك، سيخبرونك أنه أمر الله، وأنه عليك تقبّل الأمر، وأنه غدًا سوف تنسى، وسيأتي من يعوّض غيابه.
ولكنك لن تتقبل غيابه، لن يمر الأمر بسلام، تعلم أنك فقدت جزءًا من روحك في ذلك اليوم، وأنه مهما عرفت أشخاصًا لن تجد مَن يملأ فراغه، أو يعوضه.
يمكن استبدال الأحياء جربت ذلك يومًا، لكن لن يحل أحد مكان ميت؛ لأنه ببساطة أعطاك من الحب ما يكفي حتى لا تنساه، حتى لا تستبدله.
يومًا ما ذه�� أحدهم عني وما زلت أعاني مرارة الفقد، حتى بعد مرور العديد من السنوات، أعلم حقيقة ما تشعر به، فقد سبق وتعايشت معه، أعلم أنه شعور "أقسى من الموت".

#أقسى_من_الموت
تلك الرواية من الروايات القلائل التي لا أعرف حقيقة نوعها، فهي محيرة، إنه الدمج بين جميع الفئات، فبها من البؤس ما يكفي، ومن الحب القليل، أما عن الرعب والفانتازيا فكانا العنصرين المسيطرَين.
لا أعلم عدد الروايات التي قد قرأتها للكاتب، ولكن "أقسى من الموت" أقرأها بعد عدد كافي من الروايات التي تجعلني على يقين أنني أمام كاتب قوي، لن يعبث معي ويخرج كتاب أقل من المتوقع، بل إنه قادر على صنع عمل يبهرك بكل تفصيلة بداخله، في رواية "أقسى من الموت" شعرت بالحنين لشخصٍ فقدته، شعرت بالخوف والفزع وأنا أبحث عن مَهرب من ذلك العذاب الذي يحيط بي، أحسست بمزيج من المشاعر المختلطة، ما بين الخوف والحزن والحنين كنت أنا ال��حية.
قلّة من الكتّاب الذين يستطيعون إرعابي وإدخالي في مرحلة الخوف غير المنتهي، ولكن نادرًا ما استطاع كاتب أن يجعلني أتأثر وأن تتساقط دموعي وأنا أقرأ، وأنه لغريبٍ عليَّ أن يفعل بي كاتب رعبٍ هذا، ولكن هذا ما حدث.
فكيف له أن يصبح متمكنًا من كتابته إلى هذا الحد؟.
كيف له أن يكتب عن إحساسي بتلك الجودة؟.
رواية "أقسى من الموت" هي فعلًا أقسى من الموت بكل ما تحمله الجملة من معنى، سواءً كان معنى مخيفًا أم عاطفيًّا.

#الفكرة
لأول مرة أجد عملًا مرعبًا بطلته فتاة، وهذا أحد الأشياء التي أبهرني بها الكاتب، فجميع الكتّاب استخدموا الرجال ليوضحوا أن لحظات الخوف لا يستطيع تحملها إلا الرجال، ولكن في لحظات الوجع لن تميز بين فتاة ورجل، فتجد أن الرعب يتملكك في جميع الأحوال.
فتاة يلقي بها الحظ لتُدخل ابنها أسوأ مدرسة على الإطلاق، ولكن تكتشف ذلك بعد فوات الأوان.
بعد جُرعة من الرعب تكفي لإيقاف قلبك.

#اللغة
يذكر أنني أول عمل قرأته للكاتب انبهرت من إتقانه للغة، لم أكن أعلم أنه يمكن لكاتبٍ امتاز بكتابة الرعب، أن تكون لغته قوية إلى هذا الحد.
ولكن بعد قراءتي لأكثر من عمل لم يعد الأمر مختلفًا، فقد تيقّنت أنني أمام كاتب له لغة قوية، مرادفات مختلفة، وقدرة رهيبة على أسرك باستخدام تشبيهات بلاغية قد تفوق قدرتك على تخيّلها.
وكل مرة أقرأ عملًا جديدًا أشعر بالأسف أنني وقعت في ذلك الفخ يومًا.

#السرد
في عدد قليل من الصفحات ستجد نفسك أمام حالة مكثّفة من المشاعر المختلطة، ستجد نفسك مبحرًا مع الكاتب في عالمه، وستجد أن هناك الكثير من الأحداث التي مررت بها، ويرجع ذلك إلى قدرة الكاتب على صنع حالة تفوق الوصف على جعلك تعيش بعالم لم تكن به يومًا على أنه حقيقة.
لن تمل لحظة، ولن تجد نفسك في حالة من الضَّجر، سوف تستمتع بكل لحظة وبكل سطر يكتبه كاتبنا العزيز.
وصف شامل ووافي للأحداث يجعل عينيك لا تغمض للحظة، وهذا ليس أيضًا بجديدٍ على الكاتب.

#الحوار
كُتب الحوار باللغة الفصحى وهو شيء رائع حقيقةً، لم يظهر الحوار كثيرًا في العمل، ولكنه كان كافيًا ليضع أمام الحالة التي كتبها الكاتب قوة لا مثيل لها في استخدام الفصحى لبثّ لحظاتٍ من الرعب التي لا تتوقف أبدًا.
توقعت أنه سوف يستخدم العامية، ولكن لغته القوية جعلته قادرًا على فعل أي شيء يمكن أن يتخيله المرء.

#الحبكة
من أفضل الأعمال التي قرأتها للكاتب من حيث الحبكة، ففي بعض اللحظات ستدخل إلى حالة من الحزن والحياة الإنسانية، حتى تنسى أنك أمام عمل مرعب، وفي لحظة أخرى ستجد نفسك أمام حالة من الرعب، وسوف تنسى الكون الذي مرَّ بك سابقًا، لا تعرف شيئًا غير أن الخوف يملؤك.

#الشخصيات
-ريم:
أحببت تلك الشخصية وشعرت بالأسى تجاهها، فهي جربت مرار الفقد، فعلت الكثير من الأخطاء وإن كانت أعظمهم، ولكنها كانت بدافع الحب، بدافع أن لا تخسر الأغلى على الإطلاق.

- يوسف:
الحزن قادر على تدمير كل شيء، هو أيضًا حصل على نصيبه من الحزن والأسى وفقد الشيء الأغلى الذي لم يستطع بدونه أن يستمر بالحياة.

- محمود:
رغم أنه يعتبر من الأشخاص الذين ظلموا؛ إلا أنه ترك شخصًا عزيزًا في وقت يحتاجه، لا أستطبع لومه، ولكنني أشعر بالشفقة على آخر مشهد رآه.

العمل حقيقةً مبهر
بالتوفيق للكاتب.

[LEEEDAA · Rating 5 out of 5]

#REVIEW
#روايه_اقسى_من_الموت #لبتاع_الرعب المبدع الجميل #محمد_عصمت 
📌 الغلاف : شكله حلو ومختلف جدا ككل أعمال المبدع #محمد_عصمت وليه علاقه قويه جدا بفكره الروايه لا حاجه روعه بجد 😍👍❤️👌
📌 اللغه : بالفصحى وسلسه جدا وخاليه من التعقيد ❤️👊👌 
 ❤️واحلى توقيع من صديقى الكبير  الرائع #محمد_عصمت "" ❤️❤️❤️
📌 النهايه :: حزينه جدا ومقنعه فكل من سلك طريق السحر والكفر هالك لا محاله ... الربط بين الأحداث رهيب ونهايه روعه وفكره الروايه والمتاهه اللى ف اول الأحداث زادت من عنصر التشويق والاثاره .. شابوووو بجد يا مبدع ع التحفه الإبداعية دى .. حاجه عظمه كعادتك يا #بتاع_الرعب يا جامد ❤️😍😍👌👍

📌 "انا القادم من #سقر لإحيل حياتك جحيما .. وهل ظننت أنك ندا لى ايها الفانى الضعيف .. باسم كل من خلق من #نار اقسم أن احول حياتك لكابوس مرعب وان تواجه  #مصيرا_اقسى_من_الموت "" .. ""

📌📌 هل واجهت من قبل يا صديقى أسوأ مخاوفك باكثر الطرق رعبا وفزعا  بسبب فرصه للحياه أعطيت لك من قبل شيطانك لتحيا بها !!! .. وصارت حياتك جحيما  لا يطاق و تلتقى بشخص ملعون مشوه الوجه يقال عنه أنه #ابن_نفر_من_الجن  .. وهل تظن بامكانك الفرار من كل هذا العبث بعد أن أصبحت  حياتك الهادئه كابوس مرعب يلازمك حتى وانت يقظ وانك ستواجه مصيرا مظلما ومرعبا وأشد #قسوه_من_الموت ""
📌📌 ظلام مرعب ومجهول يطاردك  وانفاسك تتسارع وقلبك ينبض بالخوف  و كائن من الجحيم يتربص بك ويتوعدك ؛ هنا لا يوجد مهرب ولا منفذ عن ما ستواجهه .. حينما تبدأ طقوس الاستدعاء فاعلم ان القادم ه‍و بدايه لهلاكك وفزعك وانك ستعيش  #حياه_اقسى_من_الموت ""...
هل تعى مقوله  "" الهدوء الذى يسبق العاصفه " هذا ما ستعلمه  أثناء قرائتك للروايه وستشهد أحداثا غامضه ومرعبه واكثر فزعا .. اين اختفى ذالك الطفل ؟؟! هل ذالك القصر العتيق الملعون الذى تحول الى مدرسه له علاقه بحوادث اختفاء كل هؤلاء الأطفال ام هناك شيئا شطيانيا اخر يقوم بتنفيذ خطته  ؟!! مجموعه من الحيوانات والطيور وأطفال رضع تقدم قربانا  لكائن سفلى وطقوس شيطانيه تقام .. نسوه تقوم بأداء الزار بشكل مرعب بل يوقف قلبك من الخوف؛ وامراه شيطانه تقوم بابتلاع رماد جثث تم حرقها بنهم مخيف !!  دماء متناثرة وصرخات تتعالى وضحكات تفزعك ورموز شيطانيه !!! ما كل هذا الجحيم وما علاقه كل ذالك ببطله الروايه  ... ستجد نفسك ف متاهه يا صديقى لا تعلم من اين بدأت واين ستنتهى ..  احداث مرعبه متتاليه وكابوس  جحيمى لا ينتهى فلا تخف فكل هذا العبث سينتهى عند وصولك للنهايه ....

[Mohammed Magdy]

بدايه العمل قوية جداً والفكرة رائعه والرتم سريع

[Abdelrhman Khalifa · Rating 5 out of 5]

معلش بس قبل المراجعة عايز احكي قصة تعرفي علي اكبر كاتب رعب ف مصر حاليا❤️
من خمس سنين-كان عندي ١٣ سنة- قريت رواية الممسوس الي كانت اول او تاني كتاب اقراءه ف حياتي كلها!
و انا كنت عيل صغير فمش كنت بركز بقا ف اسامي الكتاب و طبعا معنديش اي ذائقة أدبية ولا تقييم اعمال، انا كنت بشتري الكتاب عشان غلافه مرعب بس مش اكتر😂😂

بعدها بكام سنة، و بعد ما قراءت اكثر و تعمقت ف أدب الرعب❤️، اكتشفت ان لا الممسوس دي مش احسن حاجة، بالعكس دي كانت ضعيفة، وقمت عامل ايه مقارنها برواية منيجيل، و قلت اهي منيجيل دي اصل الرواية الرعب النفسي بجد
و كانت الصدمة لما عرفت ان الروايتين من كاتب واحد
اتصدمت من تطور اللغة و السرد و الفكرة
و من ساعتها و انا خدت وعد ع نفسي ان اي حاجة هينزلها محمد عصمت دا هجبها (وقد كان)
منيجيل، ذاتوي، الجانب المظلم، باب اللعنات....إلي العروسة (أقسي من الموت)
المراجعة بقا😂❤️
علي عكس البدايات الي عصمت مشهور بيها بتكون مثيرة جدا ف الاول كدا، العمل دا لا البداية هادية بنسبة كبيرة، نسبة التشويق او الرعب تكاد تكون معدومة بس دا ما هو الا الهدوء الذي يسبق العاصفة حرفيا، لان بعد صفحات بسيطة جدا هتبتدي تدخل ف احداث الرواية و مش هتعرف تسبها من أيدك، و دا مش بس بسبب التشويق لا دا كمان عشان سرد عصمت المميز و العظيم حقيقي
السرد من اروع جوانب الرواية، عصمت بيعرف يسرد بطريقة تقلقك حتي لو مفيش حدث مرعب اصلا
الحوار قليل ف العمل، و لكنه كان بالفصحي و قوي جدا
مفيش مط خالص، الرواية للاسف كلها ١٨٣ ص فقط😓 و كل حدث له سبب، يعني مفيش ملل
عجبني جدا الفلاش باك الي كان بين ريم و ابوها، عظيم❤️❤️💗
تصميم مشاهد الرعب كانت جيدة جدا، شخصيات الرواية قليلين.. احسن شخصية تم رسمها بطريقة فوق الممتاز طبعا هي ريم، شخصية يوسف كانت محتاجة شغل اكتر شوية👍
لو ممكن اقول ان كان في نقط سلبية او ضعيفة ف العمل، هتبقي ف تعبيرات التشبيه الي كانت (غير مناسبة مع جو الرواية ) بس دا مع الوقت اختفي

النهاية🔥
صدمة، حسرة، ندم، خوف من الاخر هي فعلا "اقسي من الموت".. النهاية تحفة و الحوار الي فيها من اقوي الحوارات المؤثرة عليك كقارء💖

الخلاصة
الرواية ممتازة، قصيرة تخلص ف قاعدة واحدة، مسلية، جرعة الرعب فيها محترمة.. لو هقيمها من عشرة فهي بكل صدق تستاهل ٩/١٠ 💙
منتظر كل الجديد من كاتب الرعب المفضل ليا #بتاع الرعب ❤️🔥

شكرا يا مبدع....

[Khaled Fouda · Rating 5 out of 5]

•اسم الرواية: أقسى من الموت.
•للكاتب: محمد عصمت.
في البداية بأكد إن اللي هكتبه ده رأي شخصي، وأول حاجة حابب أقولها هي إن الغلاف وطباعته وجودته هو والورق، واهتمام دار ن في اخراج عمل بالجودة دي تستحق شكر كبير عليه، لإنه مجهود يحترم بجد، أنا كنت منبهر بس وأنا ماسك الرواية في ايدي، وخصوصًا تداركهم المشاكل اللي كانت موجودة سابقًا في الطباعة وتكبير الفونت، فشكرًا للدار دي بجد، وندخل في العمل:
•أولًا الأحداث: كان ايقاعها كويس جدًا في البداية، والمشهد الافتتاحي كان موفق جدًا، وخلاني أدخل جوه الأحداث بسرعة، وبعد كده الإيقاع تحول إلى سريع، ودي الحاجة اللي بعدت الملل تمامًا، والرعب كان واخد حقه في الرواية، وكان مريج من الرعب النفسي على شوية دموي، على حبة جن ورعب شرقي عنب.
•الشخصيات: كانت قليلة نظرًا لإن الرواية مش كبيرة أوي، ومتجاوزش عدد صفحاتها ال 200 صفحة، والكاتب أحسن بنائهم، وخصوصًا الشخصية الرئيسية (ريم)، كان بنائها النفسي جيد جدًا، والكاتب لعب عليه بشكل احترافي حرفيًا، بس النقطة الوحيدة اللي أزعجتني في الشخصيات كانت شخصية (الحاج يوسف) ومن وجهة نظري -التي لا قيمة لها- كانت محتاجة وصف أكتر، أو على ال��قل ذكرها في مشهد اضافي، وكنت حاسس إنها مأخدتش حقها شوية من حيث البناء، لإن مع تداخل الأحداث وظهوره تاني أنا مقدرتش أتعرف عليه بسرعة، خصوصًا إنه كان متعرف في الأول بالحاج يوسف، ومكنتش أعرف عنه غير القليل، ولما اتذكر تاني مع زيادة الصراع اتذكر بيوسف، وقولت في نفسي هو مين يوسف ده! وخصوصًا إن كان الحوار بينه وبين ريم فيه تقارب كإنها تعرفه من زمان، لحد ما جمعت إنه هو هو مع تشابك الأحداث واشتراكها بينهم، غير كده بصراحة مفيش أي مشكلة تاني واجهتني، واللي قولته ده ميأثرش على الرواية، ولكل قارئ رؤية مختلفة.
•السرد: كان السارد هو الراوي العليم الكوني، وبصراحة السرد كان جميل وسلسل جدًا.
•الحوار: كان بالفصحى المناسبة جدًا جدًا، وأعتقد بنفس درجة السرد.
•الحبكة: في رأيي كانت متماسكة بشكل محترم.
•الكاتب صاغ الفكرة باحترافية بصراحة، وكان ضاهر جدًا المجهود في التوست الأعظم (الغير متوقع) اللي حقيقي أنا انبهرت بيه.
في المجمل الرواية كانت جميلة جدًا، قصيت معاها وقت لطيف، اتعلمت كالعادة من استاذي محمد عصمت كتير، ومنتظر القادم بشغف بيزيد مبيقلش.

[Shimo Kassab · Rating 5 out of 5]

مبدأيا بأول الروايه انا حسيت ان ريم شبهي اوي بظروفها وحزنها علي والدها وطريقه تعبيرها وتفكيرها بحزنها انا لو كنت اتكلمت مع الكاتب وشرحت اللي حساه كنت هقول انه غش من مشاعري وعبر عنها 💔♥
ده اول جزء خلاني بكيت كتير لاني حسيت انه حته من مشاعري بجد...
عصمت بيعمل رعب شرقي بجن وعفاريت وكده معقول ده؟! الاكيد انه هيعمله بطريقته اللي تخليه مختلف عن السائد وحقيقي مخذلنيش ابداااا برغم انه يبان القصه شبهه حاجات كتير الا انه فعلا لازم يحصل مفاجأت وتخليني اقول اني غلطانه
ماخلف الابواب دائما اخاف من كل شيء مجهول بالجزء ده بالاخص وبدون مبالغه من درجه خوفي اضأت الضوء وشغلت قرآن وكملت قراءة لاني كنت مرعوبه جدا والله

♡ريم حسيت ان حل الغاز كتير بايديها لكن اتفجأت فعلا بأن كل حاجه أقسي من الموت!!!
يوسف ودوره اللي اعطي للاحداث ترابط ومعني وقيمه
النهايه العظيمه العادله ومابعد النهايه

الرعب الشرقي دلوقتي بقي جزئين
رعب شرقي سائدومكرر ومعروف ورعب شرقي بنكهه عصمت ♥♥
تجربه جميله وياريت تتكرر كتييير اثبتت ان الرعب الشرقي يمكن تفصيله بطرق حلوة ومختلفه ويظل محتفظ بشرقيته الاصيله

[Amir Nader · Rating 5 out of 5]

حذاري من مشاعرك .. فربما تكون اقسى من الموت
رواية اقسى من الموت للمتألق كالعادة محمد عصمت من اجمل و اقوي الروايات اللي نزلت المعرض ٢٠٢٢ فعلاً بناء الشخصيات رائع بالمناسبة هما مش كتير بس فيهم الخلاصة ( ما قل و دل ) و الحابكة رائعة
من الروايات اللي تمسكها مش هتسيبها غير اما تخلصها
Highly recommended ❤️❤️❤️

[Mohamed El Saleh · Rating 4 out of 5]

ماينفعش تنزل لك روايه من غير ما افكر ان لازم أجبها وفعلا حصل
عايز أقول لحضرتك انك أفضل كاتب داخل مصر بتعرف تدمج القصه وتخليها تنفع تتعمل عمل فني ملموس في اي دوله دايما بحس وانا بقرأ ليك انك بترجم عمل خارجي مع العلم انت ماتقلش عن أي كاتب عالمي 👌

[Nada Hegazy · Rating 4 out of 5]

جبتها عشان الغلاف شدني جدا و خلصتها في ٣ ساعات من حلاوتها بجد عظيمة و اسلوب السرد حلو اووووي حسيت كأني عايشة في الرواية و عجبني جدا أجزاء ريم مع باباها فعلا رواية تستحق القراءة

[Nesreen karara · Rating 5 out of 5]

رواية قوية جدا و اول مرة انبهر بسبب طريقة السرد اللي تخليك تتخيل و كأنك شايف فيلم .بجد شابووو لان اول مرة اقرا رواية رعب لكاتب مصري و وانبهر كدة👌👏🏼👏🏼

[Reham Aboul Dahab · Rating 4 out of 5]

عجبتني جدا لكن احداثها قليلة شوية كنت اتمنى تكون الرواية اطول شوية من كدة دي خلصت في ٣ ساعات
و كمان فيها حلقات مفقودة و احداث غير مبررة

[شيماء صلاح · Rating 4 out of 5]

فكرة حلوة وأسلوب سرد جميل ولغة ممتازة

[Salma Elbakoushy · Rating 2 out of 5]

تقييمي لها 1.5 ،لقد خاب املي كثيرا كنت متحمسه لقرأتها لانها من اعمال محمد عصمت احد كتابي المفضلين ولكن اشعر ان الاسلوب لا يشابه اسلوبه ابدا (التقييم للحظات الاثاره القليله التي شعرت بها في بعض الصفحات ) الروايه لا تصنف رعب من الاساس فقط اثاره وغموض