عين النمرة

by هبة خليفة

"عند الدكتور، وأنا بفتح بُقي لأول مرة، وأتكلم عن علاقتي بتوأمتي، سمحت لنفسي أزور الطفلة الصغيرة وأسألها: “مالِك؟”

التنمر اللي اتعرضت له من إخواتي أول ما جيت عندهم خلاني أحس إني مليش حق، ولزقت جامد في غادة، أمي قالت لي: “إنتي مسؤولة عن أختك” وعشت سنين مهمتي آخد بالي منها، وبعد ما نرجع من المدرسة هي تطلع البيت وأروح أنا أجيب العيش من الفرن البلدي في آخر الشارع، شعري منكوش بالمريلة البيج، وشنطة العيش البلاستيك المخرمة.

كل يوم أقف في طابور مابينتهيش، لأن الستات الكبار كانوا دايمًا يزقوني، وأنا غرقانة في عرقي وخايفة من الخنافس السودا اللي بتتحرك على أشولة الدقيق البيضا، ببص حواليا برعب مش بلاقي حد خايف غيري!

عمري ما عرفت أعترض، أو حتى أقول إن فرن العيش بيخوف، ولا إن شراء الجبنة من البقال بيخليني أتلفت حواليا من لمسات على جسمي مش عارفة هي جاية منين بتخلي وشي كله بيحمَّر، وأتكسف من نفسي، وأغضب غضب مكتوم، وأروح البيت بالجبنة من غير ما أنطق ولا كلمة.

عمري ما نطقت!"

"عين النمرة" هو مشروع فني يجمع بين الفوتوغرافيا والرسم، عبر فن الكولاج، مع نصوص ذاتية موازية للرسوم ومتقاطعة معها، والعنوان ذو الدلالة المزدوجة في العامية المصرية، وظفته هبة خليفة لتعبر عن التابوهات التي تحيط بالأنثى والجرأة في مواجهتها في الوقت نفسه.

215 pages, Paperback

Published September 1, 2025

About the author

فنانة متعددة الوسائط، تدمج في أعمالها بين الفوتوغرافيا والفن التشكيلي للتعبير عن موضوعات متعددة تتعلق بمشكلات الهوية الجندرية والصراع وغيرها. حلمها بأن تكون من "المغامرون الخمسة" كان مصدر إلهام لمغامراتها الفنية الخاصة. تعتبر كل مشروع فني لها رحلة مليئة بالاكتشافات، وتخوض المغامرة في عالم التصوير والرسم لتوثيق التجارب والمشاعر، بعيدًا عن الطرق التقليدية. لا تعتبر أعمالها مجرد تعبيرات فنية، ولكن مغامرة مستمرة في اكتشاف الذات وتوثيق اللحظات الإنسانية المؤثرة.

Reviews

[Hend Adel · Rating 5 out of 5]

كتاب موجع كتابيا .. جميل ومبهر جدا بصرياً
لوحات هبة خليفة وكتابتها واستخدمها لنفسها كعنصر في اعمالها اللي فيها مزيج طول الوقت بين انواع مختلفة من التصوير والرسم واشكال كتيرة من الفنون… قد ايه صادق وشجاع ودايما بتخيل صعوبته في انها بتشاركنا عالمها الشخصي اللي اكيد ناس كتيرة بتلاقي فيه حتت من عالمها هي كمان وده بيخلينا منحسش اننا لوحدنا

وصفتي للكتاب ده ان بعد كل فصل او اثنين كنت بروح اتفرج على كام لوحة بشكل عشوائي وأقعد مع تفاصلهم شوية وبعدين اروح اقرا فصل او فقرة وهكذا. لقيت ان ده امتع وبيدني نفس شوية بين الفقرات استوعبهم

شكراً يا هبة دايما على كل لوحة وجملة بتفتحي بيه عالمك الخاص علينا اللي بنكتشف معاه عالمنا بطرق غير معتادة علينا 💚

[Osama Mohamed · Rating 4 out of 5]

التركيبة المثالية لكتاب فني ناجح !

دايما في اكتشافي لفكرة الكتب الفنية كنت بلاقي مشكلة في تفاوت الجودة ما بين النصوص المكتوبة والأعمال الفنية المصاحبة، ف ساعات تلاقي أعمال فنية جميلة ولكن كتابة ركيكة وأحياناً تانية العكس.

ولكن تجربتي مع كتاب عين النمرة ل هبة خليفة كانت تجربة مختلفة: الكتابات ذاتية وصادقة جداً، والأعمال الفنية المصاحبة من كولاج و فوتوغرافيا جميلة وممتعة بصرية وكلها قائمة علي لقطات تبدو موجودة في كل بيت مصري.

الكتاب باللغتين العربية والأنجليزية مع تجربة قراءة مختلفة.


تقييمي : 4.5 / 5 🌟