مدرسة ميلر

فريق العو #1

by رحمة نبيل

حيث أن داخل كل منا محقق ينتظر ذلك السر الذي يستفز عقله لحله، ها أنا عزيزي المحقق المخضرم أعطيك فرصتك للانطلاق معي في رحلة البحث عن حل لذلك اللغز، لكن قبل البدء وجب علي إخبارك أنه خلال رحلة البحث عن الحل سترافقك فرقة تساعدك في ذلك، فرقة غريبة بأعضاء أغرب، لكنني أضمن لك أنه وحتى إن تسببوا في فشل مهمتك -وهذا الاحتمال الأكبر- فسوف يجعلون رحلتك أفضل، فهم أغبياء بعض الشيء، لكنهم وللحق مرحون، أوليس هذا كافيًا لرحلة ممتعة داخل جدران مدرسة ميلر!؟

158 pages, Paperback

Published January 1, 2024

Reviews

[Mohammed Arabey · Rating 2 out of 5]

لشهور راودني شراء تلك الرواية بسبب أسمها، أحب روايات المدارس...ولكن عدم وجود صفحة لها في الجودريدز جعلني مترددا
وعندما جازفت من يومين واستعرتها مع وعد أن انشئ صفحتها بنفسي فوجئت بأن أحدهم سبقني.. ولكن فات الأوان وكنت بالفعل قد "دخلت مدرسة العو برجليا...دخلت ولا سمّوا عليا" -كما الأغنية الشهيرة ايام ما كنا تلاميذ


yet it's a Guilty Pleasure somehow
لقد شعرت وكأنني أشاهد جزء اخر من فيلم اكرم حسني العميل صفر، بأستظرافه وبلاهته المبالغ فيهم
لقد أخذت المؤلفة فكرة كوميديا الفارس لبُعد أخر تماما...بُعد موازي

"وهذا العالم الذي أنت علي وشك العيش به، هو عالم موازي، خُلق في رأسي يوم وها أنتم علي وشك الدخول إليه، إلي عالم جديد "حيث لا مكان للأذكياء، ولا مجال للتفكير"

علي الأقل يجب أن أحيي المؤلفة الشابة حقا لشجاعتها ولصراحتها لكتابة هذا في المقدمة... حيث لم يكن هناك حقا مكان للأذكياء ولا التفكير

فقط نصيحة كي تستمتع بالقصة، تخيل أكثر الشخصيات السخيفة والمضحكة بنفس الوقت وضعهم سويا في فريق "العو"... فريق من المحققين -والمحققات عشان هند، الشخصية النسوية بالقصة، ماتزعلش- الذين يقودهم أسامة العو...أو كما تطلق عليهم المؤلفة وقائدهم ايضا، سرب البط البلدي



هل شاهدت مثلا فيلم العميل صفر لأكرم حسني، -إن لم تشاهده فلا تفعل بناء علي هذا انا لا أرشحه بالطبع كي لا أتحمل ذنبك- ولكن إن أعجبك الاستظراف والبلاهة التي امتلئ بها الفيلم منه وفريقه العجيب واللغز المسلوق الذي يحله بالنهاية ببلوت تويست يطلع من دماغك...فمرحبا بك في مدرسة ميلر ... الامر يتبع نفس فكرة الفيلم تقريبا

******* القـــــصـــة *******
---------------------


في دار أيتام للفتيات/مدرسة داخلية تزداد حالات أنتحار الفتيات بشكل غامض بل وأيضا حالان أختفاء ومقتل بعضهن
وهنا يأتي دور فريق تحقيق لدي منظمة خاصة، بقيادة أسامة العو والذين يتخفون للعمل بالمدرسة لمعرفة سر تلك الحالات المرعبة، حاجة كدة زي الباشا تلميذ ولكنهم هنا في مجال التدريس
ليكتشفوا الحقيقة وراء كل هذا ب"بلوت تويست" علي غرار فيلم "العميل رقم 13" إذا كنت تفهم قصدي - لا داعي لحرق القصة طبعا فقط ستفهم بعد قراءتها

لا أنكر أن الفكرة ليست سيئة، بالعكس ظريفة نوعا ما، طفولية في بعض أجزاءها ولكنه -كما قالت المؤلفة- عالم موازي لا مجال فيه للتفكير.. ولكن دعني أقول لك ما جعل القصة ممتعة بالنسبة لي حقا

******* الشخصيـات *******
---------------------
أعتقد أن هذا ما سيجعلني ربما أقرأ جزء ثاني للرواية... رغم بلاهتهم "سرب بط بلدي كما تقول المؤلفة" إلا أنها نجحت في كتابة حوار يجعلك تضحك حقا، نعم ملئ بكلاشيهات افلام الاجنبي المندرجة تحت بند كوميديا الفارس
Farce
والتي يكون بها مبالغة في الشخصيات والأحداث غير المتوقعة والمصادفات لخلق جو فكاهي ، دون اي عمق نفسي للشخصيات ، فقط كوميديا الموقف كسلسلة
The Naked Gun مثلا
الشهيرة في الثمانينات -والتي اعيدت مؤخرا مع ليام نيسون-
او حتي مستر بين وبالطبع المثال السابق الذكر للفيلم العربي الذي لا يجب ذكر اسمه

لدي المؤلفة بعض التشبيهات الظريفة واللغة التي ستجعلك تضحك حتي وان لم تعجبك القصة..بل حتي ربما بعض تراكيب الكلمات عندما تحاول السرد باللغة العربية جعلني اضحك

"أغمض أسامة عينيه بغضب شديد فهذه ليست المرة الأولي التي يتعرض فيها لهكذا موقف"

بالطبع ال"هكذا موقف" السابق الذكر هو اشهر مواقف افلام كوميديا الفارس ، السقوط المدوي أثناء مشية الثقة


حسنا .. حتي ان تكرر هذا المشهد مرتان، ثلاثة، أربعة، ثمانية عشر مرة تقريبا في احداث الرواية ، أعتقد أني سأود قراءة الجزء الثاني لبعض الضحك مع تلك الشخصيات الظريفة والتي لا أنكر انها اعجبتني

تحياتي للمؤلفة الشابة، عذرا للتقييم المنخفض ربما لكنت اقيمها اكثر إن لم أكن اشعر اثناء القراءة انني
Too old for this ..... (Danny Glover, Lethal Weapon)

ربما لم تكن مدرسة ميلر هوجوارتس كما توقعت، أو رواية مترجمة كما ظننت للوهلة الأولي...ربما لم تكن رواية محقق جادة كما ظننت من دعاية البعض اذا اعجبك روايات نوح الألفي فعليك بتجربة هذه السلسلة


ولكن بالتأكيد هي قصة تستحق القراءة ، وربما هذا سبب النجاح الذي جعلها منتشرة بهذا الشكل..ولهذا كتبت هذه المراجعة

محمد العربي
من 27 سبتمبر 2025
الي 28 سبتمبر 2025

[Noor|نُـورꨄ︎ · Rating 4 out of 5]

‎ "سرب البط البلدي"اسم على مسمى
‎رواية خفيفه و لكن تحمل عمق في نفس الوقت
‎كل الشخصيات كان فيها حاجات ناقصه بس بيكملوا بعض عكس الاجنده المعروفه ل ابطال الروايات ، المثاليين ، بيحبو بعض لكونهم الشخصيات الغير كامله دي
‎كوميديا تلاقي غموض تلاقي رومانسيه تلاقي
‎عمل متكامل🫶🏻

[Farida · Rating 3 out of 5]

( فريق العو _ سرب البط البلدي )

من كتر ما كل الناس بتتكلم عنها زادت توقعاتي ليها اوي منكرش ان فكرة الرواية حلوه عادي و الأبطال عسل و حبيتهم كمان ال comedy الفي الرواية حلو كنت بضحك اوي فالنص
.

الكنت بتضايق منو فالنص هو اني معرفش حاجات كافيه عن القضية بجد مافيش حتى ناس اشك فيهم و اقعد افكر لا بالعكس الابطال كانو مخبيين عليا باين بجد اعتقد دا يمكن يكون ضمن الروايه بسبب فشلهم هما كانو بحاولو يكشفوا اللغز برده مش الفاعل فا اتضايقت لأن الفاعل فالاخر مكنتش قرأت اسمو غير مره ولا مرتين فالاخر و مكانوش مركزين علي أي شخصيه غير الابطال الطبعا دمهم شربات و بيهزرو طول و اي وقت الهو خلاص دا انتو مضحكين جدا ( هما فعلا بيضحكوا جدا بس انا كنت عاوزاهممم يركزوووو على القضيهههه )
..

كمان الشخصيات وصفها مكنتش عارفها لانو متقلش ولا فالأول ولا فالاخر فبالتالي مكنتش عارفه اتخيل غير خفة دمهم الكانت حاجه كافيه اني احبهم كلهم واحد واحد بشخصيته و عالمه و تفكيره الخاص

...

ال love story اكتشفتها متأخر شويه و مكنتش اعرف ان هيكون في اصلا بسبب اختلاف الشخصيات و صعوبة جمعهم اصلا كا صحاب عشان يبقو حبايب بس عجبني جدا ال couple دا و اعتقد ان دا الهيخليني أقرأ الأجزاء البعديه

....

فالاخر الروايه مش وحشه خالص بالعكس لطيفه لو حد عندو reading block هتطلعو منها و هتطلعو عن شعوره الحقيقه بس انبسط و ضحكت فا دا كفايه اني مقولش عليها وحشه رغم عيوبها الكثيره و فكرتها المش عميقه
3.25 / 5

[Shahd · Rating 1 out of 5]

الرواية كانت محبطة جدا بالنسبالي لاني سمعت عنها كتير حاجات حلوة، غير اني قرأت حاجات تانية للكاتبة لكن دي كانت دون المستوى .
اولا الشخصيات كانت مبالغ فيها جدا يعني جلال و عفاف كانوا اغبياء بسبب و من غير سبب بطريقة مستفزة ، يعني حتى اوقات الجد بنلافي هرج و مرج . شخصية هند النسوية زيادة عن اللزوم و اللي اي كلمة من اي راجل بيقولها بتترجمها على انها حاجة تهين البنات . ده غير ان كل ما الكاتبة تتزنق تخلي جلال يقع و هو ماشي اللي هو خلاص عرفنا انه اهبل و ضحكنا عليها اول مرة لكن ليه تكرريها كل شوية

ثانيا ال plot twist كانت متوقعة. من ساعة ما شخصية ابراهيم ظهرت و انا حاسة انه ليه يد في اللي بيحصل و مريم لانها الطالبة الوحيدة اللي كانت بتتكلم عنها فبرضو توقعت ان هي المخلصة .

اخر حاجة هي للاسف الاخطاء النحوية الكتير الموجودة في الكلام ( بتكلم عن اللغة العربية الفصحى اللي كان بيتم السرد بيها) اي جمع مذكر سالم في الرواية بيتعمل بالياء حتى لو كان هو مرفوع . مش المفروض بيكون فيه تدقيق لغوي؟
الكاتبة ليها اعمال تانية اعتقد ان قصتهم احسن من حيث جودة النص اللغوية و فكرة القصة و طريقة للتقديم لكنها للاسف لم توفق في هذا العمل

[Asmaa Esam · Rating 3 out of 5]

فريق البط ...

فرقة تحقيقات غير عادية مكونة من اربع افراد بقائدهم

عفاف اكبر مثال لسيدات المصالح الحكومية فهي تأخذ نفس تصرفاتهم
جلال الرجل الذي لا يقهر ولا تصمد أمامه سيدة أو هكذا هو يري نفسه
وهند اكبر مدافعة عن حقوق المرأة في كل وقت وكل مكان
وأخيرا أسامة القائد الذي يحسب له تحمله لكل هذا الغباء الصادر منهم

كل خطوة يقوموا بها تجلب لهم المصائب والكوارث و تقع بهم ف مأزق جديد ولكنهم رغم ذلك لديهم خفة دم و حب وتصالح مع النفس كبير فهم أسرة صغيرة رغم كل الاختلافات

ومهمتهم هنا كانت في مدرسة فتيات يحدث بها حالات ق..تل وانتح..ار كثيرة غامضة فهل سينجح فريق العو في كشف المستور و الوصول للجنأة قبل أن يصبحوا هم أيضاً ضحاياه


اسم الرواية : مدرسة ميلر
اسم الكاتب :رحمة نبيل
عدد الصفحات : 158
التقييم :5/3

#ريفيو
#ريفيوهات_سيمو

[Haneen tharwat · Rating 4 out of 5]

اخيرا الكتاب بقى موجود على goodreads ماكنتش فاهمه ليه كل ما ادور مش بلاقيه.
رواية مدرسة ميلر هي الجزء الاول من سلسله اسمها "فريق العو"
.
هي الروايه تصنيفها جريمه - كوميديا وبتتكلم عن فريق محققين اسمه العو
- على اسم قائد الفريق أسامه العو- مكون من ٤ اشخاص بيتم الاستعانه بيهم في بعض المهمات.

انا شخصيا حبيت الرواية وقررتْ اجيب باقي الاجزاء ، طبعا مش هتكلم عن الجريمة نفسها عشان هي بسيطه ومافيش فيها فكرة اوي.

لكن السلسله دي فكرتها في انها حاجه لطيفه جدا وخفيفه وبتضحك وممكن تقراها عشان تفصل شويه او لو عندك reading slump/ ركود قراءه عايز تطلع منه وحقيقي هي هتنجح في دا، لكن ما تستناش منها اكتر من كذا عشان مش هتلاقيه.

الرواية بيتقال عنها انها بديل او حاجه شبه سلسلة تحقيقات نوح الالفي.
بس لا يا جماعه ال ٢ مش زي بعض ابدا - كل واحده مميزة و حلوة بطريقتها- هي بس فكرة ان في جريمه وبيتحقق فيها، لكن مختلفين في كل حاجه تانيه، تحقيقات نوح الألفي فيها فكره وبلوت توسيت وشويه دراما والحبكه فيها قويه.

انما هنا مش هتلاقي الكلام دا و تاني لان دا اصلا مش المطلوب/ الهدف منها، هي سلسله هزليه معموله عشان تبقى خفيفه ولطيفه على القلب وتقراها و تخلصها وانت على وشك ابتسامه بسببها، و دا اللي حصل معايا فعلا و خلاها بقى ليها مكان في قلبي💖

[SHERINE · Rating 3 out of 5]

"فريق العو" أو بالنسبة لأسامة هو " سرب البط البلدي " الحقيقة ده اسم على مسمى!
رواية خفيفة تخلص في جلسة واحدة، الشخصيات لطيفة جدا ، بعد ما خلصتها قرأت الجزء التاني و التالت.
الحقيقة مش هقول القضية صعبة اوي و محتاجة تفكير عميق،ولكن إللي لاحظته إن كل ما "فريق العو" ينجح في مهمة مستواه بيزيد فالمهمة إللي بعدها بتبقى أصعب.
أعتقد أي حد عنده "فتور قراءة " يقرأ الرواية دي.
النقطة إللي عندي إن الكاتبة موضحتش ملامح الشخصيات يعني مفيش صفات ده طويل ، أسمر، دي بشعرها، دي لابسة نضارة ، يعني أنا أكتشفت إن عفاف محجبة من آخر الرواية في الجزء الأول أو في أول الجزء التاني، فالشخصيات بالنسبالى كانت مبهمة شوية، أخدت وقت على ما كونت صورة ذهنية ليهم، لكن في المجمل الرواية لطيفة، و أعتقد لو نزل جزء رابع مش هتردد في قراءته.

[Farida Ali · Rating 2 out of 5]

صراحه حاسه اني كارمها 2,5/5
السرد كان ضعيف جدا والابعاد بتاعت الشخصيات مفيش
واللي قال إنها شبه تحقيقات نوح الألفي نفسي اعرف فين الشبه
والكوميديا مضاحكش خالص
هقراء الجزء التاني ولو لقيت في تطور هكمل

[Nina’s reads · Rating 4 out of 5]

كتاب لذيذ خفيف يخلص بسرعة. حسيت بملل بسيط في النص بس عجبني في العموم💗 متحمسة اقرا الاجزاء الباقية

[Jowireya · Rating 4 out of 5]

بجد الرواية دي تحفة كنت بادأاها من فترة كبيرة بس بسبب الدراسة والامتحانات مكنتش عارفة أكملها والنهاردة قررت أدي لنفسي بريك وقعدت عليها 3 ساعات بالظبط في قاعدة واحدة وخلصتها من كتر ما هي خطيرة ومبتتسابش
الرواية بجد تموت من الضحك وفيها روح حلوة أوي وطبعاً أي حد يعرفني عارف إن تحقيقات نوح الألفي ليها معزة خاصة في قلبي ومفيش حاجة هتيجي زيها بس الرواية دي بجد فكرتني بيها جداً وبالذات شخصية جلال اللي كان بيفكرني بـ صلاح جداً في كل تصرفاته وكيميته
متشوقه اكمل بقيت اجزاءها

[ALI OSAMA · Rating 3 out of 5]

الرواية من كتر ما هيا حلوة و سريعة انا حرفيا ملحقتش احطها في currently reading 😂 بدأتها و خلصتها بسرعة جدا و استمتعت بيها جدا جدا
مشكلتي بس أن في الحوار الكلام الي بين الكلمة و الكلمة الي بيوصف شعور المتكلم أو تعبيراته كان طويل بزيادة شوية

[Hana Yousri · Rating 5 out of 5]

حبيتها و بتضحك و تنفع اوي ل المبتدئين عموما

[چُونْير · Rating 5 out of 5]

حقيقي رواية جميلة و حلوة جدا ، مسلية بشكل غير طبيعي ، جبتها و خلصتها في نفس اليوم من كتر ما هي ممتعة ، متحمسة جدا اجيب باقي السلسلة، شخصيات تحفة و عجبني انها في الاخر خلت لكل الشخصيات أهمية مخفية بتظهر وقت المصيبة بس
"حيث لا مكان للأذكياء ولا مجال للتفكير "

[✨حبوبه✨ · Rating 4 out of 5]

✨31/3/2026✨
كل الي اقدر اقوله أنها تحفة لأنها نجحت في اني افصل شوية من اي اسكرول و انهيها في وقت قصير🙂‍↔️💗

[Karma Ashraf · Rating 5 out of 5]

بتفكرني ب مازو من مسلسل اللعبه و فريقه

[Maryam Ahmed · Rating 3 out of 5]

الرواية ك رواية فكرتها مش عميقة و لو بتدور على جريمة قتل غامضة و السعي وراء حلها ف غالبا دي مش هتعجبك خالص المميز فيها ان فكرتها خارج المألوف لأن المعروف عن أي فريق تحقيق انه المفروض يكون حاد الذكاء سريع البديهة بس أسامة و فرقته عكس كدة تماماً هما مفيش أخرق منهم 😂 و بصراحة الحوار بين الشخصيات كوميدي و بيضحك بجد ف هي مناسبة لو عايز حاجة خفيفة تقراها و تضحكك و تخرجك من ال reading block انما ك قضية و حل ف هي مكانتش مدية القضية الاهتمام اللي هو يعني

[Nashwa Abdelkhalek · Rating 1 out of 5]

- أتعلم تلك اللحظة التي تجلس فيها رفقة نفسك وأنت تردد بلهفةٍ هى أقرب للبلاهة " أن الأمر انتهي " انتهي ذلك الشيء الذي ظننت يومًا، أنه لن ينتهي، حتى وإن انتهى، فلن ينتهي كما تمنيت، لكن كالعادة كرم الله اكبر من كل شيء، وها أنت تجلس مع نفسك وأنت تحاول معرفة كيف انتهى ذلك الأمر كما تريد.

- الأسرار وجدت لتُكتشف، والحقائق وجدت لتُعرض؛ لذا عزيزي المسكين إياك والظن يومًا، أنَّ الأسرار ستظل أسرار، أو أن الخفايا، لن تظهر للعيان يومًا، بل هي فقط تنتظر اليوم المُناسب حتى تظهر، أو ربما تنتظر تلك اللحظة التي سيكون تأثيرها فيها مدمرًا حتى تعلن عن وجودها.
*******
يمكن شرف المحاولة تكفي و تنفع فيلم كوميدي

[Ahmed Assem · Rating 4 out of 5]

ملحوظه الروايه 191 صفحه مش 158

الروايه حلوه اوي و تنفع جدا لو حد عندو ريدنج بلوك او لسه قارئ روايه تقيله و عايز يفصل ناس كتير بتقول ان هي شبه تحقيقات نوح الالفي بس هي مختلفه جدا لان نوح الالفي فيها بلوت تويست و حبكه انما دي يعتبر المجرم كان معروف من بدري و عموما الشخصيات ولا غلطه ب الذات جلال و عفاف

[Markosaaa · Rating 3 out of 5]

حلووووو

[هند أحمد السيد · Rating 2 out of 5]

الرواية: مدرسة ميلر.
الكاتبة: رحمة نبيل.
دار النشر: مدينة الأدباء.
عدد الصفحات: 158.
التقييم: ⭐⭐/⭐⭐⭐⭐⭐ ( 1.5/ 5)
في قراءة أولى للكاتبة رحمة نبيل، في الجزء الأول من سلسلة فريق العو، تبدأ الأحداث بإخبار أسامة العو قائد فريق مكون من ثلاثة أفراد، عن توليه مهمة الدخول إلى إحدي المدارس الداخلية الخاصة بالأيتام، والتي قام ببنائها الجنرال ميلر منذ الاحتلال الإنجليزي، وتم إغلاقها بعد فترة، ثم قام رجل أعمال كبير بشرائها وافتتحها وجعلها مدرسة داخلية للبنات الأيتام، وكان سبب التسلل لهذه المدرسة هو زيادة حالات الانتحار بين الفتيات بشكل كبير مع وجود حالات القتل، فيجب عليه هو وفريقه معرفة السبب وهل يوجد رأس مدبر لهذا الأمر أم لا.
سمعت كثيراً عن هذه الرواية، ونصحتني صديقة بقرائتها، إلا إنها للأسف مليئة بالكوميديا إلى حد أنه صار سخيفاً منه مضحكاً، بالإضافة إلى عدم التفسير الجيد لكنه المنظمة، وعدم منطقية الفريق في مثل هذه المنظمة الشبيهة بالشرطة، وعدم منطقية الشخصيات ذاتها بالرغم من كونهم أفراد تحقيق، مع مبالغة هند المبالغ فيها اتجاه حقوق النسويات، وغباء جلال المستفز، والمبالغة في مشهد السقوط الذي صار مستهلكاً طوال الرواية، مع طريقة السرد الغريبة والتي أفسدت القصة، وطريقة سير التحقيق التي تنم عن غباء غريب على الرغم من ظهور دلائل واضحة وإمكان إنقاذ أكثر من فتاة كسلمى ورشا دون تركهن يموتن، مع النهاية التي رأيتها مبتذلة للأسف من مشهد الصف الذي وقفه أعضاء المنظمة لتحية الفريق.
على الرغم من كون هذه القصة مبتكرة في الفكرة وجديدة، إلا أن السرد والأخطاء الإملائية الكثيرة دمرتها حرفياً.
قد أحاول إعطاء الجزء الثاني فرصة.

[Mituuuuchi · Rating 5 out of 5]

نبدأ اولا بقصة الرواية:🪩
مدرسة ميلر ليست كباقي المدارس في هذه المدرسة الداخلية الخاصة بالبنات تحدث حالات انتحار على الدوام ولتحقيق في هذا الأمر يتم استدعاء "فريق العو" المكون من اربعة محققين ساذجين في اغلب الاحيان "أسامة" "جلال" "هند" "عفاف" شعارهم " مرحبا بكم في فريق العو حيث لا مكان للاذكياء ولا مجال للتفكير" فماهو السر الذي تخفيه جدران مدرسة ميلر الغامضة؟ وهل سيتمكن فريق العو من حل هذه القضية؟

رأيي الشخصي 🪩🩵
الرواية خفيفة وسهلة اللغة متسلسلة الاحداث حرفيا تجمع بين الكوميديا والتحقيق والغموض عمل رائع كم تمنيت لو كانت اطول بكثير😂😂 وفعلاً هناك صفحات ضحكت فيها كثيرا انصحكم ان تطلعوا عليها اكثر شخصية ضحكتني صراحة هي جلال يفوز بجائزة اكثر واحد يعيش في عالم موازي😂😂😂❤️

ارشحها لكم رواية ممتعة وخفيفة لن تشعروا بسير الاحداث الا وانتم مكملينها 🤍

[Malk Nabil · Rating 2 out of 5]

الحقيقة ان الرواية مخيبة للآمال !!
قررت ابدأ في السلسلة دي بعد مقارنتها بسلسلة تانية مفضلة ليا، بس الحقيقة ان مفيش اي وجه مقارنة
مش بس ف الفكرة لأن طبيعي الافكار تختلف، لكن في السرد والحوار ومضمون القضية والواقعية وكل حاجة

الحبكة كانت ضعيفة
والسرد نفس الكلام
الفكرة نفسها قديمة شوية
والواقعية طبعًا تحت الصفر، لان مفيش فريق زي دا يقدر يشتغل في اي جهة امنية في مصر، دا غير ان الجهة نفسها غير موضح هي ايه، يعني دول ظباط ولا ايه مش واضح خالص

وايه الي كل خمس دقايق وحد يقع ايه دا يعني والله بجد الموضوع كرتوني جدًا😂😂

هحاول ادى الجزء التاني فرصة واتمنيى ميخيبش ظني❤️

[Rahma Mohamed · Rating 1 out of 5]

⋆.𐙚 ̊pre-read

مكنتش متوقعه ان السرد يبقي كويس الحقيقة بس مش للدرجادي𖦹
سرد ٢٠١٩ مثلا او اسكريبت مسلسل

𖦹الشخصيات نوعا ما كويسة لكن الكوميديا مستهلكة اووي وطنت عفاف اللي بقت فكرتها مستهلكة كمان


𖦹الفكرة حلوة الحقيقة وحاسه رحمة كانت هتنجح فيها لو كانت تعبت الكوميديا او حتي كانت شلت الكوميديا القصه كانت عجباني اووي 🔫

[Hagar · Rating 5 out of 5]

بجد من احلى السلاسل إلى قرأتها. فيها غموض و تشويق و أحداث تحفه مع انها قصيره جدا، و كمان تعلقت بالابطال جدا و حبيتهم جدا ، السلسله الوحيده الي ضحكت فيها من قلبي بس مشكلتها أن فيها شوية اغلاط املائيه و السرد مش الواو بس انا مواجهنيش مشكله في المشاكل دي و كمان كتابة الكاتبه هيطور اكتر بشكل ملحوظ في باقي الأجزاء ف انصحكم جدا بيها

[Joudy Mahmoud · Rating 3 out of 5]

مستغربه الي بيقارنها ب سلسله روايات تانيه
رأيي لو دخلت قرات الروايه من غير اي توقعات هتستمتع زي ما استمتعت الروايه حلوه ولطيفة جدا خلصت معايا بسرعه مش هعرف أصنّفها كا جريمه اوي لكن طريفه وكوميدي هتضحك فعلا مع شويه متعه وحل الجريمه كان غريب شويه الفاعل شخص منعرفش عنه كتير الجريمه عامةً منعرفش عنها كتير او المشتبهين فيهم بس أنا برضه انبسطت وعشان أنا قرات السلسله احب اقولكم تدوها فرصه وتكملوا

[Rahma · Rating 3 out of 5]

لطيفة وخفيفة، ضحكتني كذا مرة، لكن فيها اخطاء طباعية ونحوية وتركيبية كتير، وكمان كحبكة في الآخر الموضوع ماتشرحش كويس، يعني برضه مالقيتش مبرر للي بيحصل، ده غير إن اساس الفكرة مش لايق على شعبنا وعلى إبراهيم وعم سليمان ومشعارفة أقول اكتر من كده عشان ماحرقش حاجة.
في المجمل قراءة لطيفة وممكن اقرا باقي اجزاءها كمان للتسلية.

[Bebo · Rating 2 out of 5]

أحياناً تدفعك الحياة لفعل ما لا تريده ، من اجل الاحتفاظ بما تمتلكه ، تدفعك لفعل الكثير والكثير ، ثم تأتي بعدها وتراقب انهيارك ، وصدمتك بنفسك، تدفعك لارتكاب ما اقسمت يوما الا تمسه ، ثم تبتسم في خبث وهي تراقب ندمك.

[Malak · Rating 2 out of 5]

كان كتاب اطفال بنسبالي محستش مع الكتاب باي مشاعر ولا اي حماس كنت بقرأ الكتاب علشان اخلصوا
انا معرفش الكاتبة جدا بس من الواضح انها مبتدئة لان طريقة كتابتها حتى لشكل الشخصيات بسيطة جدا لدرجة اني مش عارفة اتخيلهم
هو كتاب ممكن يعجب حد مبتدئ اكتر مني لكن معتقدش اني هكمل باقي السلسلة
⭐️⭐️.5 / 5

[Alaa Kadry · Rating 3 out of 5]

الرواية فعلا اجوائها لذيذة جداً و شدتني فأول ٥٠ صفحة مثلا لكن مكانتش قوية اوي و في بعض النقط محستهاش زي الحبكة و طريقة السرد
هل هكمل السلسلة ؟ معرفش بس حاليا لا
بس عموما فريق العو لذيذ اوي و يمكن ده يبقا دافعي اني اكمل السلسلة

[Maro Micheal · Rating 4 out of 5]

مكنتش اتخيل انها حلوة كدة و بجد تحفة و النهاية احلى وبجد عدت توقعاتي