Sjáandi

by Ester Hilmarsdóttir

Þegar dularfull spákona úr austri birtist í friðsælum dal í íslenskri sveit fara ævintýralegir hlutir að gerast og allt sem áður var fer úr skorðum. Saman við komu spákonunnar fléttast barátta kotbænda við auðvaldið úr nærliggjandi kaupstað, hrifnæmni fjósastráks, forboðnar ástir heimasætu og förukona sem enginn veit hvort er að koma eða fara.

Ester Hilmarsdóttir er bóndadóttir úr Aðaldal. Hún hlaut tilnefningu til Fjöruverðlaunanna fyrir ljóðabók sína Fegurðin í flæðinu en Sjáandi er fyrsta skáldsaga hennar. Hún segir frá uppvexti, ást sem er alheimsfasti, vaxtarverkjum nýrra tíma, samstöðu og baráttu fyrir afkomu og verndun náttúrunnar. Harmur og húmor liðast um söguna líkt og áin sem rennur um dalinn stundum gjöful en stundum brigðul, þar sem auðvelt er að festast í slýinu og missa fótanna.

288 pages, Hardcover

Published January 1, 2025

About the author

Ester Hilmarsdóttir er ljóðskáld, rithöfundur og bóndadóttir úr Aðaldal. Hún er með B.A.-gráðu í stjórnmálafræði frá Háskóla Íslands og San Diego State University með séráherslu á umhverfispólitík, auk M.Sc.-gráðu í útgáfu frá Edinburgh Napier University í Skotlandi. Í meistararitgerð sinni, Separate Shelves: Sexism and Gendered Marketing Trends in Children’s Publishing, rannsakaði hún kynbundna markaðssetningu barnabóka.
Ester hefur unnið víða um heim við ritstjórn og skrif — sem pistlahöfundur, ritstjóri hjá útgáfufyrirtækjunum Letts í Edinborg og Vagabond Voices í Glasgow, aðstoðarritstjóri hjá Home Journal í Hong Kong og sjálfstætt starfandi textasmiður og prófarkalesari í Zürich. Hún hefur gefið út tvær ljóðabækur og var tilnefnd til Fjöruverðlaunanna fyrir ljóðabók sína Fegurðin í flæðinu. Fyrsta skáldsaga hennar, Sjáandi, segir frá uppvexti, ást sem er alheimsfasti, vaxtarverkjum nýrra tíma, samstöðu og baráttu fyrir afkomu og verndun náttúrunnar.
Ester býr nú í Þingeyjarsveit ásamt börnum sínum, þar sem hún vinnur að ritstörfum.

Reviews

[Sesselia · Rating 5 out of 5]

Ég bæði hló og grét yfir þessari bók! Persónugalleríið er stórkostlegt, fullt af bæði yndislegum persónum og svo hinum sem maður elskar að hata en eru samt svo mannlegar í brestum sínum. Ég elskaði lýsingarnar á sveitalífinu og málfarið og ég hló upphátt yfir yfirgengilegum lýsingunum á sumum atriðum. Fléttan er fagmannlega ofin á milli allra þessara litlu sagna í kringum einn stórviðburð og það eru frábærar vendingar í söguþræðinum sem komu mér á óvart, en þó var fyllilega búið að vinna inn fyrir þeim. Ég viðurkenni að ég hafði skammarlega aldrei heyrt um Laxárdeiluna fram að þessu, en vá, hvað þetta er mikilvæg og mögnuð og hnyttin og hispurslaus saga sem ég er ótrúlega glöð að hafa lesið! Nándin við og samstaðan með náttúrunni og fólkinu á næstu bæjum er svo falleg og þetta er einmitt Íslandið sem ég er svo hrædd um að við glötum. Ester má hafa alla þökk fyrir að festa það á blað❤️🥰

[Fanney Snjólaugardóttir · Rating 5 out of 5]

Besta bók sem ég hef lesið lengi, frábær persónusköpun, fallega skrifuð, fyndin og frumleg

Lestu þessa bók!

[Nína Ólafsdóttir · Rating 5 out of 5]

Yndislega skemmtileg bók, margir staðir þar sem ég hló og brosti að, fallega skrifuð og mér þykir svo vænt um karakterana, sakna þeirra núna þegar lestrinum er lokið. Fróðleg innsýn inn í sveitalífið, langar að sitja þarna sjálf í eldhúskróknum með Gyðu og félögum. Ég var spennt að læra meira um Laxárdeiluna og höfundur kemur því vel til skila en það eru ekki síður allar litlu og fjölbreyttu flétturnar í lífi fólksins sem gera bókina heillandi.

[Hrafnhildur · Rating 3 out of 5]

Ofboðslega vel skrifuð og falleg íslenska. Langur söguþráður sem er ekki grípandi.

[Inga]

Virkilega vel heppnuð frumraun. Full af lífi og karakter og frásagnargleði höfundar skín af hverri síðu. Minnti um margt á Dalalíf Guðrúnar frá Lundi, en óbeislaðri. Skemmtileg bók sem hélt mér frá fyrsta orði til hins síðasta.

[Una Stefánsdóttir · Rating 4 out of 5]

Ótrúlega vel skrifuð og höfundur hefur einstakt vald á tungumálinu.

Ég komst reyndar að því við þennan lestur að ég er líklega aðeins of mikið borgarbarn fyrir löngu verklýsingarnar um öll handtökin og verkin sem þarf að klára í sveitinni. Fannst þær stundum óþarflega nákvæmar en það skiptir svosem engu máli í stóra samhenginu🙈

Hlakka til að fylgjast með Ester, það er eiginlega ótrúlegt að þetta sé hennar fyrsta skáldsaga. Slík eru gæðin!

[Brynhildur Þórarinsdóttir · Rating 4 out of 5]

Mér þykir svo innilega vænt um þessa bók og hlakka til að lesa meira efter Ester. Fólkið í henni er alveg einstakt og tóninn líka. Það er svo mikil kúnst að skrifa sögu sem að rúmar hversdagsleikann og dagleg samskipti, og á sama tíma gefur sér pláss fyrir allt þetta stórbrotna sem eru tilfinningar, náttúruvernd, og heimspekilegar og oft fallega háfleygar vangaveltur sögupersóna um lífið. Yndisleg.

[Sóldís Rós · Rating 4 out of 5]

Yndisleg bók. Svo skemmtilega skrifuð og höfundur skapar ótrúlega lifandi og skemmtilegar persónur sem manni fer að þykja vænt um. Spólaði í gegnum hana í jólafríinu og hafði unun af. Gott í hjartað að lesa bók sem er skrifuð á svona fallegri íslensku.

[Aslaug · Rating 5 out of 5]

Skotheld ný höfundarrödd. Persónugalleríið er stórkostlegt! Sagan er launfyndin og hæðin en líka sorgleg á köflum. Það er leikur og orðagleði í textanum. En hér fær gullaldarmálfar að njóta sín. Öllu er þessu blandað saman á fínlegan hátt svo úr verður frábær útkoma.

[Anna Birta · Rating 5 out of 5]

Stórkostleg bók, hrífandi og eftirminnilegar sögupersónur. Höfundur er með beittan húmor og sýnir dýpt í mannlegu eðli. Ég hló og fann til í hjartanu, þykir vænt um persónurnar eftir lestur. Vild ég gæti fengið Krúsu og Gyðu í heimsókn til mín 👌

[Kristín Ólafs Önnudóttir · Rating 4 out of 5]

Mjög skemmtilegur stíll og gott flæði í textanum. Persónugallerí fjölbreytt. Yndislestur.

[Eva Engilráð · Rating 4 out of 5]

Virkilega góð bók. Skemmtilegar persónur og hnyttin frásögn. Góður orðaforði.
Mun fylgjast með þessum höfundi.

[Valgerður Magnúsdóttir · Rating 3 out of 5]

Höfundur er greinilega vel pennafær en það truflaði mig hvað persónum var lýst á niðrandi hátt. Ég endaði því á að leggja bókina frá mér hálflesna.

[Þorbjörg · Rating 5 out of 5]

Óður til náttúrunnar og eldhúskróksins.

[Anna Dagbjört · Rating 5 out of 5]

Ég grét, ég reiddist, ég gladdist og ég hló. Takk fyrir mig!

[Hildur Jóhannesdóttir · Rating 5 out of 5]

Mér fannst svo næs að lesa þessa bók, stíllinn lipur og líður áfram eins og lífið í dalnum. Skemmtilegar persònur í smá ýkjustíl, Ég keypti ella kannski síst prestinn.

[Murun Buchstansangur · Rating 1 out of 5]

Loksins fór það svo að mér hefndist fyrir þá þrjóskudellu að þurfa að klára allar bækur sem ég byrja á.