Álfareiðin

by Gunnar Theodór Eggertsson

Æsispennandi og nýstárleg álfahrollvekja!
Menntskælingurinn Líneik er spennt að búa til hlaðvarpsþátt í valáfanga í fjölmiðlafræði en þykir alveg glatað að hann eigi að vera um álfa. Og ekki nóg með það heldur neyðist hún til að vinna í hóp og situr uppi með bæði skrýtnu stelpuna og mesta slugsann í bekknum.
Perla og Jónki leyna þó á sér og fyrr en varir eru þau búin að grafa upp dularfullt þorp á Suðurlandi sem tengist álfum og virðist eiga sér blóðuga sögu. Þegar þríeykið mætir á staðinn rennur fljótt upp fyrir þeim að þorpsbúarnir hafa margt og miður fallegt að fela – og það getur reynst stórhættulegt að spyrja rangra spurninga.

326 pages, Hardcover

Published January 1, 2025

Reviews

[Atlas · Rating 5 out of 5]

Ef ég hefði ekki verið að lesa þessa í vinnunni hefði ég spænt henni upp á einni kvöldstund. Ég hló upphátt yfir sumum lýsingunum, sérstaklega hvernig Líneik lýsti Jónka. Dýnamíkin sem myndaðist í hópnum var svo skemmtileg, samtölin þeirra voru lifandi og fyndin og hljómuðu actually eins og samtöl á milli unglinga. Enskusletturnar voru nýttar vel til að ýta undir persónusköpunina og ég gjörsamlega elskaði það. Ég kann líka mikið að meta bækur sem eru skrifaðar fyrir eldri unglinga, eins og þessi.
Öll óvissan í kringum Hraunbæ var vel uppbyggð grípandi, mig klæjaði að vita hvað væri í raun og veru í gangi. Þjóðsagnaívafið var rosalega vel gert, öll sagan í kringum Hraunbæ var svo athyglisverð og hljómaði alveg eins og eitthvað sem maður gæti lesið um í þjóðsögum Jóns Árnasonar.
Ég mæli hiklaust með þessari fyrir unglinga frá 14 ára aldri sirka, og í raun bara fyrir öll. Algjör negla.

[Þorbjörg · Rating 3 out of 5]

Alvöru unglinga hrollvekja

[Unnursvana · Rating 3 out of 5]

Sagan var almennt frekar grípandi og stigmagnandi hryllingurinn vel útfærður, þó að undir lokinn virðist sagan skipta of hratt um gír og missa svolítið fótanna. Á köflum fannnst mér hvernig þjóðsögulegur bragur sögunnar fléttast inn í þetta allt saman örlítið of fyrirsjánlegur og stundum á sagan það til að flýta sér of mikið. Enskusletturnar, sem að ég hélt að myndu bögga mig, virkuðu vel inn í sögunni, gæddu samræðurnar lífi og létu persónunnar hljóma eins og unglingar. Mitt vandamál liggur þó aðallega hjá persónunum sem almennt náðu mér ekki. Og það var ákveðin atvik sem kom upp á milli þeirra, sem persónulega stuðaði mig of mikið, og leystist heldur of auðveldlega, sem varð næstum því til þess að ég lagði bókina frá mér og vildi ekki halda áfram.

[Unnur Lárusdóttir · Rating 3 out of 5]

Eflaust fínasta unglingabók. Þjóðsagnaarfurinn færður í óhugnanlegan búning og af einhverri ástæðu flugu mér Orkarnir eða Uruk-hai úr Hringadróttni í hug. Þorpið Hraunbær á eftir að lifa með mér lengi.