الحزن البعيد الهادي

by محمد إبراهيم

الديوان الثاني للشاعر بالعامية المصرية.

Genres: Poetry, Nonfiction

203 pages, Paperback

First published January 28, 2015

About the author

Official Page: www.facebook.com/Page.Mohammed.Ibrahim

Reviews

[Osama Elhady · Rating 4 out of 5]

كنت من الأقلاء المحظوظين وقرأت ديوان " الحزن البعيد الهادي" قبل طبعة وبمجرد أن علمت بوجود صفحه ال
Good reads
للديوان، قررت ان اشارك معكم هنا تجربتي ورحلتي مع الديوان
___
أنا شايف ان كفايه كده لغه عربيه بما انه ديوان عامي يعني ولإني كمان هختصر كلامي علي قد ما اقدر
الشاعر محمد إبراهيم في الديوان ده عارف بالظبط هو بيكلم مين والغريب ان كمان المتلقي بيحس فعلاً ان محمد بيكلمه.. اتحداك لو ملقتش نفسك في قصيده او اتنين او حتي عشرة
كل حرف في الديوان حقيقي جداً ... ويتقري من الجلده للجلده في وقت قليل انا متأكد

لا ينصح به للناس اللي بتطلع القطط الفطسانه في كل حاجه
عشان هيضيع وقتك ومش هتطلع حاجه في الآخر

( 4/5 عشان محدش يقول انه عشان صاحبي اديته الفول مارك)

أسامة الهادي

[Ahmed Oraby · Rating 1 out of 5]

الحقيقة مش قادر أفهم مين هي يسرا وإسراء ومي وسارة اللي محيرين نص شعراء مصر دول!
نص الديوان سهوكة عن الحب وكده
ونصه عن السهوكة الدينية
حرام كده بجد
أنا جالي شلل
وبعدين مالك ومال الزمالك
هو إحنا ناقصين؟
زمالك زمالك زمالك يا أخي
وموتوا بغيظكم
معجبنيش في الديوان كله غير قصيدة وحيدة
عن الحاكم الحالي للبلاد
وعلى الرغم من إنها هبلة، لكنها ضحكتني :D

نور عينك قاعد فـ الضلمه
بيولع شمعه ويدعيلك
يباركلك ربنا فـ الكرسى
يديك على قد ما تدينا
يا حامينا ويخرب بيت مرسى
هو اللى خربها و جيت انت
بتصلح مصر و ترفعها
ومفيش أحمال زايده ده عامل
خد رشوه وهو اللى قطعها

[Amr Mohamed · Rating 1 out of 5]

وانا ماشي بجزمة فلات...شفت في الاشارة شحات
لكن شكله فكرني بزمن فات...رجعت بالكرسي وبتفكيري ساعات
وافتكرت حزن وشوية حاجات....اهمها الواد محسن لما مات

قصيدة حلوة انا سميتها قصيدة ماتش الكورة من تأليف العبد لله الشاعر الجهبز عمرو دريدا ... مهو الشعر سهل اهو يا جماعة فين المشكلة مش عايز بقي حد يسأل أسئلة وجودية ملهاش لازمة ايه علاقة ماتش الكورة بالشحات ومين محسن اصلا ..هو الشعر كدا فن وعمق

ايه يا جماعة الشعر ده . ديوان شعر عامي سئ الصراحة ....ومش اي عامي لا ده كاتب كلام عامي بتاع القهاوي..يعني مثلا يقولك ساعة لما هيا كات معانا ..فاكر لما كات بتعيش....كات بتعيش... مش كانت يعني .... ده اختصار ولا زهق ولا ايه ....وشوية يقولك وتعوري وش اللي كان بينا ...ايه ده خناقة قوم ارزعها بالشيشة في وشها احسن. .وشوية انجليزي مكتوب بالعربي زي ميموري

وفيه جزء من قصيدة اسمعوا يا جماعة..
تقولي هسيب اقول لأ
اقول حمشي تقولي بلاش
تكوني في جرحي بكرة شاش

يعني ينفع الكلام ده شعر ولا قائمة اسعار مستشفي اليوم الواحد وازاي ينسي البيتادين وكيناكومب

انا اصلا بداية حبي للشعر كان العامي بس مش العامي ده ..الكتاب اغلبه رومانسيات وسهوكه وفيه قصايد معناها حلو لكن مكتوبة وحشة جدا ..وعن اسامي ناس مش عارفينها ...لكن الصراحة فيه تلات قصائد حلوين منهم عبد المأمور

فيديو لاحمد أمين كيف تكون شاعر بالعامية فى 30 ثانية

[Maria · Rating 2 out of 5]

مفيش مشكلة ان اشعار تتكتب بالعامية بالعكس يقال انها تناسب المواطن البسيط وانها أقرب للقلب
و أشعار صلاح جاهين و الأبنودى و نجم خير مثال
بس المفروض ان المحتوى فى الحالة ديه يعوض النقص اللى سابه الكتابة بالفصحى
ديوان الحزن البعيد الهادى وقع فى المشكلة ديه
المحتوى ملوش قيمة و استخدامه للتعبيرات ركيك

لو كنت أنا بطلت اتدارى
كان ممكن مشربش سجاير
لو مايكل مدخلش تجارة
كان ممكن لو مفتحتش فيس
معرفش أساسا مين سارة
-----
فيه قصايد عجبتنى زى المصرى اليوم و كما تدين

[DỘn Mando · Rating 2 out of 5]

ساعة ما نزل ديوان فلوماستر ابيض كان نازل معاه ناس كافيه
و ساعتها فضلت عليه ناس كافيه و ناس كتير اصحابي قالولى فلوماستر مش قد كدة خالص
بس ساعتها دافعت عن محمد ابراهيم و قولت الديوان كتجربة اولى حلو جدا و الجاي احسن
لكن ظني خاب بصراحة .. محمد ابراهيم ماشي في سكة واحدة مبيغيرهاش
مفيش خلاف على موهبته و انه شاعر محبوب و ربنا مديله اهم ميزة و هي حب الناس
لكن الحزن البعيد الهادي هو ممكن يتسمى فلوماستر ابيض الجزء التاني .. كان هيبقى افضل
انا مقرتش اي شئ جديد يخليني احس ان محمد اتطور مثلا او عمل ديوان انضج من الديوان الاول
نفس الكلام تقريبا .. قصايد شبه بعضها بشكل غريب .. حزن و كاَبة و حبيبتك اللى سابتك
و البنت اللى جرحتك و الواد اللى فشخ البنت و العياط و الدموع !
- اظن ان اهم ميزة بتميز الشاعر هي التنوع و مناقشة مواضيع كتير و الكلام يكون قوي مش سطحي
- الديوان انا شوفته ضعيف اللهم الا بعض القصايد بالتحديد هي " رسايل من السما السابعة , المصري اليوم , غير متاح , عياط شتوي , مشهد غبي , و شوية القصاقيص اللى في الاخر اللى اسمهم انا وهو وهي "
- جزء السياسة في الديوان مش قوي .. محمد ابراهيم لازم يقتنع انه مبيعرفش يطلع من عباءة الحب و الحزن
و صحيح انا نفسي يطلع منها و يكون في تنوع .. لكن لو هيطلع منها بشوية قصايد سياسية ضعيفة فشخ زي اللى في الديوان دة يبقى بلاش احسن .. على العكس مثلا مصطفى ابراهيم مبدع بشكل رهيب في اللون دة و يكفي مثلا قصيدة " البنكنوت او قصيدة اني رأيت اليوم " .
- و اخيرا بأكد اني بحب محمد ابراهيم جدا و بحب اقراله لكن الديوان دة بالنسبالي مجابش اي شئ جديد او اي اضافة و اللى قرأوا فلوماستر ابيض هيعرفو انه تقريبا مفيش اي اختلاف .

[Rogius · Rating 1 out of 5]

أنا أسفة لنفسي إني قريته والله، كان عندي أمل يوما ما أن محمد إبراهيم يكون شاعر كويس عشان لونه الحزايني و عشان كنت حبيتله كام قصيدة و حبيت "هحكي عنك" اللي غناها هاني عادل، كنت مأجلة قراءة الكتاب دا من فترة للأسف. ممكن اقول أن في قصيدتين تلاتة ممكن يتغنوا يطلعوا حلوين غير كدا دا عك عك عك بس الشغل دا هياكل أوي أوي مع الشباب، زباين المحن كتير .

[Tarek Abady · Rating 1 out of 5]

يافاشل يافاشل يافاشل

[مصطفي سليمان · Rating 1 out of 5]

انا معنديش اي مشاكل مع الكتابة الجديدة
ولا عندي هو الادب
ولا انا من نوعية الناس اللي بتقول الادب ليه كتالوج
مشكلتي الاساسية هنا
هو الاستسهال
ودا سببه المباشر بالنسبة ليا
قوة الفيس بوك و سحر الفولو
دا معناه ان مفيش صفحة كويسة؟

لا فيه

بس بنسبة كام لكام؟

كام حاجة ممكن تحس ان محمد ابراهيم قعد واخد وقت علشان تطلع

كام مرة مثلا اهتم ولو قليلا بالوزن ؟ او بالصور ؟

بعيدا علي سحر اللايك وكم الشير وتعليقات الاصدقاء
بالنسبة لي قليلة للغاية
ممكن اكون غلطان
و وسط الطبعات الكثيرة والفولو والشير سيتوه كلامي
او سيظهر كاني منفسن
او عندي مشاكل نفسية للاني معقد كما يحب الاخرين القول
بس قشطة
ف الامكان احسن ما كان

[Ahmed Ibrahim · Rating 2 out of 5]

يعنى نجمتين وابقى كارمك

مفيش غير حوالى 9 قصايد معقولين شويه
و5 بس منهم عجبونى

المصرى اليوم - ونورعنيك - عبد المأمور - دكتور نفين - الرغوب ممنوع
وممكن القصيده اللى مكتوبه على ضهر الغلاف

باقى الديوان معجبنيش خالص

يعنى هو ديوان للبات فقط

[Mohamed talaat · Rating 3 out of 5]

والديوان ده بيأكد وجهة نظري في محمد ابراهيم اللي مش هتتغير "الحب, الحزن ,الفراق, البنات " محمد ابراهيم شاطر جدا في المنطقة دي
"الوطن ,الناس, الشارع " محمد ابراهيم ساذج وسطحي جدا في المنطقة دي وبلاش يكتب فيها أحسن

الديوان متقسم ل6 أجزاء "عيش وملح , دمع مؤنث سالم , المصري اليوم, الحزن البعيد الهادي , أنا وهو وهي , مننا لله " أحلاهم وأجملهم كان دمع مؤنث سالم محمد ابراهيم أكتر شاعر في مصر بيعرف يكتب عن البنات وأكتر حد فاهم سيكولوجية البنت , أسوأهم المصري اليوم الجزء ده بصراحة واقع مجرد رص كلام محمد ابراهيم لما بيكتب عن الوطن بيبقي شبه شاعر مبتدئ بيحاول يجيب القافية مجرد كلمات علي نفس الوزن وخلاص
الجزء بتاع الحزن البعيد الهادي حسيته بيحاول يقلد مصطفي ابراهيم بالذات في قصيدة دكتور نفين اللي واخد الفكرة كوبي من "تفرانيل " مصطفى ابراهيم.. مجرد وضع محمد ابراهيم في مقارنة مع مصطفي ظلم ليه لكن عامة الجزء ده كويس لانه في المنطقة اللي محمد ابراهيم متفوق فيها جدا "الحزن "

عامة لولا الجزء الخاص بالمصري اليوم كان هيبقي تقييمي للديوان 4 نجوم لكن صعب أقيمة علي نفس مستوى فلوماستر أبيض 3 نجوم علي سهولته واحساسه وحزنه :)

[ياسمين Thabet · Rating 2 out of 5]

الحزن البعيد الهادي اسم جذاب يتناسب مع الحالة العامة للجيل

لكنه مع الاسف لم يكن العمل الاول لمحمد ابراهيم ذلك الشاعر الشاب الذي يكتب الشعر الحديث والذي قد لا يراه البعض شعرا من الاساس

فلوماستر ابيض كان ديوان جميل لم يكن رائع او عبقري لكنه كان جيد بالفعل لينزل الشاعر في هذا الديوان عن مستوى الجيد للمستوى الضعيف وهذا ما احزنني في قراءه هذا الديوان

حتى ان قصائده نفسها هبطت من منزلة القصيدة لمنزلة كلام عادي ممكن تقراه في ضهر باب حمام في مكان عام
وده مستوى ماكنتش اتصور ان محمد ابراهيم ممكن يوصله في الديوان ده

هل تسرع في نشر كتاب للجماهير عشان القانون السائد في سوق الادب المصري عمل كل سنة
ام ان شهرته وحياته حولت اللي بيكتبه لتجارة فرضت عليها الالزام فطلعت مهلهلة بالشكل ده


التلت الاخير من الكتاب كان مقبول فيه روح محمد ابراهيم لكن التلتين الاولانيين من الكتاب ماكنش فيهم لا شعر ولا احساس على الاطلاق

للاسف بالطريقة دي محمد ابراهيم مش حيفضل كتير ومابقاش في الساحة حتى الان غير مصطفى ابراهيم

[Ahmed Emad · Rating 1 out of 5]

ببساطة " ما كُتِب لا علاقة له بالشعر - لا من قريب ولا من بعيد - من وجهة نظري -
لن أقرأ كتاب آخر ل ( محمد ابراهيم )

[Amira Osman]

لكل اللي بقت بتخاف ..علشان متفارقه من فتره...لكل اللي ف عنيها بشوف ...دموع اكتر من المطره ....وطول الليل بتستني وحيرانه وشايله هموم ...بتهرب للحياه بالضحك وتهرب م الزعل بالنوم ...

[Toqa Badran · Rating 3 out of 5]

اكتر قصايد عجبتني ......

انسان سابق--ان كان لك سر--24ساعه--نقطة الصفر--الممنوع مرغوب--مصر ايه--عبد المأمور-- المصري اليوم
بالاضافه لجزء (انا وهي وهو) كلووو :D

مقتبسات اعجبتني....

*بعد بُعدك عني فعلاً
كنتي اقرب مما كنتي
كل حاجه عباره عنك..
كل حاجه بشوفها انتي !

*مصر دولة كل واحد
مهما يحصل برضه هي
لسه حلوه فـ كل عين
مصر فيها حاجه حلوه
هي ناسها الطيبين ♡♥

*والدنيا مشيت عكس ما اتمنيت
"حبيت احب بجد متحبتش .. حبيت محبش حد فـ اتحبيت"

*السما بتمطر.. وانا وانتي عن بعض بعاد
لا اعرفلك عنوان ولا سكه ولا بينا معاد..
انا تايه منك جواكي.. انا تايه مني وملقتنيش
من كتر ما كنت بموت فيكي.. معرفتش اعيش

*والملخص في النهايه
جملتين قالوا الحكايه
الاماكن والروايح والاغاني والشتا
كل دي اشياء تعيّش اي ذكرى ميته ! 3/>

*يا ماشيه فـ دمي على مهلك
بلاش تبقي سبب حيرتي...
وتكشيرتي وسرحاني وتفكيري
مفيش غيرك هينفعني...
ولا راح ينفعك غيري !

[Mohamed Magdy zinhom · Rating 2 out of 5]

اول حاجة اتقالت لما كان فى نقد لديوان فلوماستر ابيض دفاعا عن محمد ابراهيم هو ان الديوان القادم هيكون اختبار حقيقى هيظهر موهبة محمد ابراهيم و هيكتب فيه موضوعات جديدة .. لكن اللى حصل فعليا على ارض الواقع هو تكرار مستفز لموضوعات ابيض فلوماستر و استمر على نفس النهج و المنوال فى اختيار مواضيع قصايد تتكلم عن مى و سارة
-اللى احنا منعرفش هما مين-

الديوان فيه حوالى 3 او 4 قصايد فعلا حلوين لكن باقى القصائد من مطلعها كفر بموضوعات الشعر و فلسفته نظرا لسطحيتها ..

حتى لما محمد ابراهيم حاول يتكلم فى السياسة بالنسبة لى فشل لانه كان بيكتب بقلم مرتعش و بيحاول ميهاجمش حد خوفا من ردود الفعل ..

[Maha · Rating 2 out of 5]

في حاجات كتير حسيت انها متكررة والفكرة تقريباً واحدة
عجبتني بعد الكتابات منها
ضاقت فلما استحكمت..
ضاقت أوي ..
ضاقت بشكل مخلّي
روحي مكشّرة ..
بنزل لتحت .. برجع ورا
واكسب خسارة وبعترة
مقبوض وميت مـ القلق
تفاصيل حياتي مكسّرة
ضاقت فلما استحكمت..
عصرت عينيا دموع وخوف
مطحون ما بين حلم وظروف
عايش بموت .. أعمى وبشوف
والفرحة لحظة قصيرة
ضاقت مليش غيرك سند..
ومكنش ليك كفواً أحد
رحمن بكل اللي اشتكى
جيت بالبكا ..
وكلامي كله نهنهه
رجّع لي كل اللي انتهى
الدنيا قفلت نفسها
مفتاحها فين طب ياترى؟!

[Nada Osama · Rating 5 out of 5]

محمد ابراهيم ..
كالعاده مبدع وفاهم وعارف انت بتعمل ايه وهتقدم ايه
حاسس بالبنت وفاهمها اكتر من نفسها
فاهم الناس بصفه عامه

قادر توصل احساسك ليهم واحساس هما محتاجين حد يشاركهم فيه وانت قدرت تشاركهم فيه عن طريق كتابتك وعن الديوان ..
وكل شخص هيلاقى نفسه فى قصيده او اكتر
زائد انه هيشوف نفسه عالاقل فى سطرين فى كل قصيده
بالتوفيق يا صديقى

ولو فى اكتر من 5 rate كنت عملت
ودا مش نفاق عولا اصطناع دى حقيقه وكل الى عارفنى عارفين كدا
محمد فعلاََ يستاهل كل خير و كل حاجه حلوه فى حياته

[Nouran Gamal · Rating 5 out of 5]

بدأته اول مجبته ومقدرتش اسيبه غير للنوم وفتحت عيني كملته، عجبني من اول المقدمة والاهداء لحد اخر صفحة... جزء دمع مؤنث سالم معتقدش ممكن ميعجبش بنت... والكتاب كله احساسه عالي اوي

من اكتر ما أثر فيا:
- الوضع العام
- الممنوع مرغوب
- أمنية موت (جربتها وحسيتها)
- محتاجة افضفضلك
- مشهد غبي****
- رقم 27 في انا وهو وهي
- الدعاء الاخير

[Mai · Rating 5 out of 5]

الحزن البعيد الهادى :)

اسم الديوان لوحده حكاية اصلا <3
ديوان جميل جدا.. مفيش فيه قصيده واحدة وحشةاصلا :)
فيه كام قصيدة كدة طبعا مش فى مستوى بقيت الديوان من وجهه نظرى بس كمان مينفعش يتقال عليهم وحشين

باختصار الى مش هيقرا الديوان ده هيفوته كتيير جدا جدا اصلا
:D

[Fatma Elsherbiny · Rating 1 out of 5]

يا خسارة وقتي ل ضاع
للكاتب: بجد دا ولا شعر ولا ديوان ولا اي نيلة
لنفسي: انتي بتحبي "مصطفى إبراهيم" مش محمد إبراهيم( مصطفى على اسم ابويا عشان افتكر)
لل بيقرا الكلام دا : متضحكش

في صفحة حبيبته جالها سرطان في الدم و ماتت( صفحة مش قادرة اقول تدوينة أو قصيدة) ، الصفحة دي من اوحش ما قريت

[مَيّ]

من الحاجات اللي زعلانة ع الوقت اللي راح في قرايتها حقيقي

[Amany Galada · Rating 3 out of 5]

البُكا كان لا إرادى ..
و الزعل كان بإنتظام
السكوت كان وضع عادى
و الكلام كان مش كلام
هيا حاله .. واضحه جدا
بإختصار حالة وفاه ..
والغريب ان اللى مات
لسه على قيد الحياه
نبضه عادى .. شكله عادى
عادى جدا .. عادى بحت
روحه طلعت فوق معاهم
بس جسمه لسه تحت !

[Sara Shible · Rating 4 out of 5]

بنى ادم كئيب بشكل ^_^ ..بس كلامه بيتحس بسرعة ديوانه ده لفيت عليه اسكندرية كلها لحد ما لقيته صدفة كده فى اكئب مكان فالعالم _الميرى العزيزة :) _ ....الى حبيته فيه
اطلع بروحك للسما ومدد
ربك كريم جى بالمدد حالا
فيه حاجات عشان للاحلى تتجدد
لازم كده تتهد اجمالا

انا عايز اهرب من الشارع
م الناس م الدوشة واى زحام
انا عايز اهرب من التفاصيل
م الليل والظلمة وم الاحلام
من كل الحزن المتدارى
من كل الوجع التكرارى
من كل الصمت الاجبارى
والخوف الخام
انا عايز انام يمكن انسى
انا عايز انسى يمكن انام

سبحان الله اصلا مفتاح
او كلمة سر لباب مخلوق
ف السما علشان لوجيت مخنوق
تطلع على فوق
تنسى المعاناة
سبحان الله سبحانه بجد
نحتاجه نبطل نحتاج حد

ولانى بقيت مصدوم فالناس
هكتبهم عالهامش برصاص
مع اول غلطة لاى فلان
همسحه من بكرة باستيكة
مش قلة ثقة فالناس لكن
من كتر ماقلبى من الناس شاف
انا لسه حقيقى بجد بخاف
اتقرب من حد واجرب
واكتب فى حياتى الناس بالجاف

انا نفسى اقول انى بحبك
مع ذلك خايف اقولهالك
مع ان صوابعى بتتكلم
مع كف اديكى وانا بسلم
وعنيا الى كتير بتبلم
وانتى فى غيبوبة ولاف بالك
مع انى بقولك لما بقول
ان مفيش غيرك فرحنى
وان احنا كلامنا مريحنى
وف تعابير وش بيفضحنى
وف قلقى الى فى كلمة مالك
انا نفسى اقول انى بحبك
مع ذلك خايف اقولهالك

صلى على النبى اوقات الضيق
والله مسيرها هاتتعدل
من قال ربنا خد منك شى
ربنا يابيدى يا بيبدل

[دعاء · Rating 1 out of 5]

النجمة دي لقصيدة "اسكندرية" ، وطبعا لأسباب لا علاقة لها بالأدب أو الفن أو الإبداع .. لاء خالص يعني هو مجرد تعصب سكندري لكلام حلو اتقال عن جدعنة ولاد بلدها.

في الواقع ماعنديش تعليق.. ماعرفش ان كان -ما يسمى- الشاعر محمد إبراهيم من متابعي تعليقات قراءه على موقع جودريدز ولا لاء..
لكن أنا عاوزة أتوجه له برسالة ..


السيد /محمد إبراهيم.
انا عاوزة اسأل حضرتك سؤال..
هو انت مصدق في اللي انت بتكتبه دا؟
يعني أنت فعلا مقتنع إن ماتحويه دفتي الكتاب دا يسمى شعر؟ ويندرج تحت خانة الإبداع والفن وكدا؟
بعد 20 سنة .. هتيجي تفتح الكتاب دا وتقول بفخر : أنا كاتب الكلام دا؟
الحقيقة أنا ماعرفش حضرتك شخصيا علشان أحمل لشخصك مشاعر سلبية أو إيجابية.. لكن أنا بحمل لكلامك اللي منزله في كتاب يتعدى الحاجة وعشرين -بحسب آخر مرة وقع الكتاب قدامي- طبعة ف وقت ماكملش سنة .. أحمل له كل المقت والبغض والكراهية.
ببساطة لأن دا مش شعر.
يا أستاذ محمد والله العظيم تلاتة ، وأيمانات المسلمين والكفرة.. مش (كل كلام موزون) يبقى اسمه شعر وينطبع ف دواوين ويقحم على أهل الأدب.

أرجوك أرجوك أرجوك.. توقف عن هذا العبث.
بكفاية خرا يعني الله يسترك

[Moustafa Feto]

هاحكيلكوا حكاية.. كنت قاعد علي قهوة ساعة صباحية بقرأ ديوان جدارية للعظيم محمود درويش فإذا بشاب عشريني قاعد جنبي يسألني: لو مش هيضايقك ممكن اعرف بتقرا ايه ؟
فجاوبته، فقالي: انا كمان بقرا شعر ووراني كتاب مكتوب عليه "الحزن البعيد الهادي" طبعاً من متابعتي لحركة السوق كنت سمعت عنه فجالي الفضول اني ارتكب جريمة أني ابص فيه واشوفه بيحكي في ايه واذ فجأة احس اني بشوف مشهد في فيلم مرجان احمد مرجان لما ميرفت امين زنقت عادل إمام وخلته يلقي الشعر اللي بيدعي انه كتبه فقال اي كلام، بالظبط.. اللي في الكتاب ده أي كلام.. وفضلت افر في الكتاب بتاع ربع ساعة اني الاقي كلمتين علي بعض عدلين، مفيش كله هتش ومحن وهذيان وإساءة للشعر لما يتقال علي شخص أجوف كتب كلام زي ده شاعر.. وبعدين رجعت للشاب كتابه ورجعت كملت قراءة في الديوان وكأن شئ لم يكن ومحمود درويش قدر ان ينتشلني من المستنقع اللي كنت فيه من تاني بيت قريته ونسيت واللي حصل وكملت يومي عادي..
طبعاً مش هقيم الكتاب لانه دون مستوي التقييم.

[Nour ♡ · Rating 4 out of 5]

اول حاجة هشتريها من المعرض ان شاء الله
بجد مش قادرة استني الاسبوع ده عشان اغوص فيه ;)

تعديل: 3/2/2015

تحفة تحفة تحفة بجد
حبيته من الغلاف للغلاف
فى قصايد حبيتها اكتر من قصايد تانية
الجزء بتاع دمع مؤنث سالم معتقدش فى بنت ممكن ميعجبهاش
والجزء بتاع انا وهو وهي فيه قصايد رائعة
اكتر حاجات عجبتنى هما رقم
16،20،25 و26

بجد واو محمد ابراهيم ابدع كان نفسي احضر حفلة توقيعة فـ الف يوم ماكنت فالمعرض بس محصلش نصيب ومشيت بدري :(

[احمد محمود · Rating 3 out of 5]

في الحزن البعيد الهادي أثبت إنه يبدع في كلامه عن البنت والفراق والكآبة وضعيف في الكلام عن الوطن والسياسة والشارع والناس ..
محمد ابراهيم بيتكلم عن البنات والفراق كأنه اتفارق بجميع الطرق ويقدر يقنعك ويأثر فيك ..
سلبية محمد ابراهيم انه مقدمش جديد بالديوان فقصائده شبيهة لأعمال محمد ابراهيم السابقة لم يقدم اي جديد الا عن السياسة والناس ولكنه جاء بمستوي ضعيف ..
بشكل عام الديوان جيد .. والكاتب عايز تطوير في الأسلوب اكتر عشان ميتحفظش ويعمل ملل .

[Marwa Mansour · Rating 1 out of 5]

رغم حبي للشعر العامي الا اني قاومت بشدة لإنهاء هذا الديوان .. أفكار القصائد مكرره بشكل ممل .. لا يعلق بروحك من الكلمات الا أقل القليل مما يدلك على ضعف النص .. اعترف انني قرأت الكتاب ظنا مني أنه ديوان مصطفى إبراهيم .. ذلك الخلط هو السبب الرئيسي وراء تلك التجربه البائسة .. بعض القصائد لا بأس بيه ولكن الديوان في المجمل ضعيف جدا .. فقير في النص والخيال .. لا أظن أنني سأمنح شعر محمد إبراهيم فرصه ثانيه في المستقبل ..

[Khaled Ali · Rating 3 out of 5]

كتاب عادي...
فيه حاجات عالية اوي و فيه حاجات مالهاش اي لازمة و فيه حاجات يعني بين البنين...

الالفاظ مكررة و اواقات خانته..و الاوزان نفس الحكاية..

الافكار كان ممكن تتجمع في عدد اقل من كده بكتير.

بس في النهاية ماقدرش انكر اني استمتعت جدا باجزاء كتير من الكتاب زي اول جزء و هو وهي :)

[Ahmed Elsharkawy · Rating 3 out of 5]

لقيت نفسي فيها ف اكتر من قصيده
واتحدي اي حد انه ميلاقيش نفسه فيها
بس نص الكتاب او اكتر من نصه كمان
انا قارئه قبل كدا