20 жилийн дараа

by Болор-Эрдэнэ Халтар

264 pages, Unknown Binding

About the author

Х.Болор-Эрдэнэ 1975 онд Улаанбаатар хотод төрсөн бөгөөд арван жилийн 56-р дунд сургууль, Утга зохиолын дээд сургуулийг /2000/ тус тус төгссөн. “Ням гариг” сонины ерөнхий эрхлэгчээр ажиллаж байгаад чөлөөт уран бүтээлч болсон. Тэрээр утга зохиолын оны шилдэг бүтээл шалгаруулах “Алтан Өд” наадамд 2002, 2004, 2007, 2009 онуудад оролцсон байна.

Х.Болор-Эрдэнэ нь өөрийн ажил хөдөлмөр, уран бүтээлээрээ 2004 онд Орхон аймгийн оны шилдэг сэтгүүлч, 2005 онд МСНЭ-ийн “Ган үзэгтэн” шагнал, 2009 онд “Алтан Өд” наадмын тэргүүн шагнал, 2010 онд МЗЭ-ийн шагналыг тус тус хүртжээ. Түүний хэвлүүлсэн бүтээлээс дурьдвал “Нүцгэн шөнө” /2002/, “Зүрхэнд үйлдвэрлэв” /2004/, “Диваажингийн хоригдлууд” /2007/ (тус ном нь дэлхийг тойрон аялаад ирсэн), “Би бид хоёр” /2009/, “Эротик өгүүллэгүүд” /2006, 2007, 2008/, зэрэг өгүүллэгийн ном, “Монгол ардын шилмэл өгүүллэгүүд” (10 цуврал) /2008/, “Би чамд хайртай-2” /2009/, “Муу залуу” /2010/, “Хорин жилийн дараа” /2010/ зэрэг тууж, “Би чамд хайртай-2” УСК /2009/, “Ми-15” УСК-ны зохиол тус тус бичжээ. Дууны шүлгүүдээс нь “Охин минь битгий уйл” /Т.Ариунаа/, “Ээждээ би хайртай” /Т.Ариунаа/, “Би эр хүнд хайртай” /Хувьсал продакшн/, “Үл таних эмэгтэй” /Т.Ариунаа/, “Чи надаас яваагүй” /Д.Туул/, “Би хувилсан” /Гала хамтлаг/, “Ми-15” /П.Идэржавхлан/, “Анжел” /Ц.Байдраг/, “Доргицгооё” /Зулаа/, “Дурласан цас” /Баярцэцэг/, “Уулзвар дээр” /Баярцэцэг/, “Хайрлах л байсан хайр” /Б.Сарантуяа/, “Дурласан” /Өөдөө, Ундрал/, “Манай гэрт шинэ жил ирлээ” /Ж.Алтанцэцэг/ зэргийг нэрлэж болохоор байна.
Тэнгэрт тал сарны хэлтэрхий
Ёлтойж үзэгдэнэ
Тэнэмэл үүлс аальгүйтэх мэт
Түүний наагуур нүүгэлтэнэ
Гурван зуун жилийн настай өвгөн хэрээ
Модны оройд сууж
Гуагалж, өнгөрснийг хүүрнэх боловч
Хэн ч түүнийг сонсохгүй
Зөнөг удган мод өөрийгөө
Тэнгэрийн цэцэг гэж санана
Зөөлөн шиврэх бухдын нулимсыг
Хүмүүс
Бороо гэж эндүүрнэ
Хүсэл хулгайлсан шалиг эмсийн
Хуурамч аяглал мэт
Хүйтэн салхи
Гунигийн гудамжаар тэнүүчилнэ
Дахиад мянган жил өнгөрөхөд
Амьдрал ямар байх тухай
Далд болоод этгээд бодол
Намайг эзэмдэж зовооно
Дарсны амт шиг
Гашуун үнэнээс хүмүүс зугтаж
Тэнгисийн захад хэн нэгэн
Эзгүй цөл мөрөөснө
Тэнгисгүй газарт хэн нэгэн
Их далайг зүүдлэнэ
Тэнгэрт тал сарны хэлтэрхий
Ёлтойж үзэгдэнэ
Зөөлө

Reviews

[Bolor-Erdene · Rating 5 out of 5]

"Би чамд хайртай" киноны 20 жилийн дараах хувилбарыг бичье гэсэн санаа аль 20-иод жилийн өмнөөс л сэтгэлд яваад байлаа. Олон ч найруулагчтай уулзав. Балжинням гуайн хүү Амараатай ч ярилцав. Нэг их ажил болгох сонирхолтой хүн таараагүй. Тэгсээр яваад Hero-Баатарт энэ санаагаа хэлж, эх бичвэрээ ("Монголчуудын амьдрал" сонин дээр цувралаар нийтлэгдээд хожим ном болгосон тууж) үлдээсэн юм.

Тэр ярианаас хойш 3 жил орчмын дараа нэг үдэш Баатар, Ундрал хоёр Баруун 4 замын хажууд байх ресторандаа урив. "Нэг кино зохиолын ажил байна" л гэсэн. Яваад ортол Баатар надад 8 орчим хуудас бичсэн цаас өгөв. Уншаад үзтэл миний хэдэн жилийн өмнө өгсөн зохиолыг эмэгтэй дүртэй болгоод эхлэл, өрнөл дээр өөр дүр, өөр хүйс оруулсан зохиолын товч анатаци маягийн юм байв. Тэгээд Батрэгзэдмаа гэсэн автор тавьж. Дотор дүрсхийсэн уур оволзож билээ. Тэр дороо уурсаад ухасхийн гараад явтал Баатар араас утас мессэж бичсэн юм. "Юу ч болж байсан Чи бол манай зохиолч шүү. Уурлаж байгааг чинь ойлгож байна" гэх утгатай. Би эргээд очсон. Үнэгүй ч хамаагүй өөрийн идеагаа хамгаалах хэрэгтэй байсан тул тэр 8 хуудас санааг 80 гаруй хуудас болгон дэлгэрүүлэх үүргийг өөртөө хүлээсэн юм. Тэр киноноос миний авсан хөлс үнэхээр инээдэмтэй. Харин бусад нь хэдэн тэрбумыг халаасалсан гэж дуулсан. Гэхдээ тэр бүхэн миний хувьд зүгээр л дурсгал болох ёстой байсан. Тэр ч үүргээ гүйцэтгэсэн.

Ингээд хөхүүл хүүхдээ орхиод Дархан дахь "Модерн номадс"-ын оффист очиж хэд хоног харуул манаа, түгжээ цоожтой сууж байгаад продюсер, найруулагч, жүжигчинтэйгээ ярилцангаа кино зохиолыг гаргасан юм. Тэр үедээ юмыг яаж мэдэх вэ хэмээн санаж киног тууж болгон бичээд хэвлүүлэх саналыг продюсерт тавихад тэрээр уриалгахан хүлээж авснаар "Би чамд хайртай-2" туужийн ном маань дан өөрийн автороороо хэвлэгдсэн. Тэрхүү номонд кинонд гардаг логик алдаанууд байхгүй шүү. Хожим энэ зохиолыг бичихэд хуруугаа ч дүрээгүй хүмүүсийн нэр кино зохиолыг бүтээлцсэн хүмүүсийн жагсаалтад чихэлдээд орчихсон, киноны бүхий л сурталчилгаа 8 хуудас санааг сараачсан хүний нэр дээр явааг үзээд их гомдсон доо. Энэхүү "Хорин жилийн дараа" тууж бол миний анхны томоохон үргэлжилсэн үгийн зохиол бөгөөд туршлагагүй, омголон зоригтой үедээ бичсэн нэлээд тааруухан ном болсон хэдий ч олон түүхийн эхлэл болсон тул би энэ номондоо хайртай.

Зохиолч Х.Болор-Эрдэнэ