يوم الصفر

جنايات #18

by رحاب فكري

Audiobook

Published December 1, 2025

About the author

رحاب فكري طبيبة وروائية وكاتبة مصرية غلب على مؤلفاتها الطابع البوليسي.

تُصدر للكاتبة رحاب فكري سلسلة روايات بوليسية بعنوان «جنايات» عن دار سما للنشر والتوزيع

وقد تحويلهم الي دراما صوتية علي موقع أوديوهات

Reviews

[Ahmed Halawa]

القراءة الاولي لعام 2026 جت السنة دي في شكل صوتي و حلة جديدة من سلسلة جنايات
الحلقة مقسومة علي جزئين علي تطبيق أوديوهات
جريمة قتل غامضة بتحصل في اسانسير عمارة و بيتم اكتشافها وقت صلاة الفجر من ساكن و ابنه و بيحصل تحقيق مع سكان العمارة كلهم
و التحقيق بيكشف مفاجات عن المجني عليه
الي جانب مفاجاة بتحصل في حياة شربيني و طلاقه من منار و انا بصراحة مبسوط بده و اعتقد انه اي علاقة الخطاء فيها بيبقي علي الطرفين و لو شربيني غلط فهي كانت هتتسب في حبسه و ضياع شغله .
قضية بنت اخوه خالد كنت اتمني تكون موجود ليها نهاية معانا و تمشي بالتوازي مع قضية الاسانسير
ملاحظات صغيرة علي الحلقة تيمة الهزارعلي الاكل من خالد كانت اوفر شوية المرة دي
كمان حل القضية بعد التعقيد و الغموض اللي كان موجود عليها و علي المجني عليه و اللي تم الكشف عنه كان الافضل يكون الحل بشكل مختلف عن اللي تم تنفيذه

[Sara]

أخر حلقة نزلت والحقيقة تطور مستوى الكتابة واختيار الأفكار كان واضح جدًا في الفرق بين أول حلقات وأخر حلقات.

في البداية كانت الأفكار ضعيفة لحد ما، الحوار مش قوي، وإن كان مسلي بسبب الأداء، ولكن مع كل حلقة في تطور نتاج الممارسة، القصص أفضل والشخصيات أوضح وبتتربط وبتكون خيوط درامية وسمات خاصة بها، والجرائم أقوى، صحيح في نبرة وعظ مباشرة في أخر الحلقات مش بفضل استخدامها ولكنها كانت محدودة ومحولتش الدراما لدراما وعظية خالية الواقعية.

الحلقة كانت جيدة جدًا، الفكرة كمان حقيقية وواقعية، ومتكررة في الوقت الحالي بشكل مخيف حتى للي معندهمش خبرات في البرمج، اختيارها ذكي وتتابع انكشفها كمان ذكي، من شخصية عادية كل الناس بتشكر فيها ومعندهاش مشاكل لشخصية مختلفة تمامًا، مربوط بيها أسرار وفضائح.

تطور حياة الشخصيات التلاتة العاطفية كمان جيد، وفي تفاصيل جديدة دايمًا موجودة، واستخدام الحلقة بتقديم بريف للحلقة اللي بعدها كمان بيدل ع تطور وتماسك السلسة، فمستنه الحلقة الجديدة لأني حاسه أني فقدت صديق كان بيسليني في أوقات كتير وبقى مألوف بالنسبة ليا واتعلقت بوجوده.

[Sondos Alhalawany]

بعد ما خلصت السلسلة كلها هكتب الريفيو هنا بقى 😎
مساء الخير
ولو إن في العادي مبقاش ليا خُلق أكتب ريفيوهات بصراحة
بس دي يعني مينفعش تعدي كدا من غير ما أوثقها
وهو سؤال واحد بس
اي العظمة دي يجدعان بجد؟! 😭❤❤❤❤❤❤❤❤✨
يعني الواحد مش عارف يتكلم عن ايه ولا ايه ولا ايه؟!
بدأتها قبل بداية السنة بحاجة بسيطة وخلصتها النهاردة وحاليًا قاعدة مكتئبة علشان مش عارفة ازاي هصحى الصبح مش هسمعهم يعني بجد؟! 😭
لدرجة ليا ساعتين شغالة بقرأ كل الريفيوهات والكومنتات اللي اكتبت عن الرواية من يوم ما بدأ نشرها لغاية النهاردة ( اتجننت خلاص باين)
حقيقي من أحلى وأمتع وأجمل روايات الجريمة بشكل خاص والروايات بشكل عام ❤❤❤❤❤❤❤❤✨
كل اللي أقدر أقوله إنها حاجة متقنة لدرجة شديدة ومتعوب عليها ❤✨
بداية خلينا نبدأ بالكتابة والحقيقة د. رحاب فكري عاملة عظمة يعني.. 18 رواية كل واحدة فيهم أجمد من اللي قبلها.. بكون عادة متخوفة من السلاسل.. لأنه في العادي إنه الأجزاء الأولى بتبدأ حلوة جدًا وبعدين المستوى بيقل.. ولكن هنا المستوى كل مرة بيزيد.. بيزيد جدًا لغاية ما بنصل لآخر جزء حاجة قمة في العظمة.. بتبدأ السلسلة كل حلقة جريمة منفصلة وبعدين بدأت الحلقات تشد فتبقى كل حلقة فيها أكتر من جريمة وأكتر من لاين ماشين فيه.. في توازي وتناغم خطير الحقيقة.. من غير ما تحس للحظة إنك توهت أو الأحداث دخلت في بعض مثلًا.. حبكة متقنة ومتماسكة جدًاااا.. حقيقي يعني مش بكون قادرة أطلع غلطة 😂.. كل حدث بيسلم لحدث.. وكأنها حلقات في سلسلة مرتبة ومنظمة.. بستمتع جدًااا لأقصى درجة بطريقة تفكير الأبطال وتسلسل تفكيرهم نفسه لغاية ما يوصلوا للنهاية.. حاجة قمة في المتعة الذهنية يعني. معلومات بقى.. معلومات كتير طول ما أنت ماشي.. يعني بنستمتع وبنفكر ونستفيد تلاتة في واحد.
ومش بس مستوى الحبكة وقوتها وتماسكها بيزيد.. لكن كمان الشخصيات نفسها بتتطور معانا كل حلقة.. بينكشف كل مرة جانب جديد من حياتهم الاجتماعية.. ودا لاين ضاف للسلسلة كتير وخلي فيه جزء اجتماعي رومانسي لذيذ 🥰 يلطف جو الجرائم المشدود المشحون..ويحسسك إنه ال 3 ضباط دول مش ناس آلية مهمتها تحل الجريمة ونطلع من السلسلة وخلاص ولكن هما ناس طبيعية ليهم حياتهم الاجتماعية العادية ومشاكلهم وهمومهم.. دا ضاف واقعية للسلسلة بشكل كبير وخلانا نقرب من الأبطال أكتر ونتعلق بيهم ونحبهم كأنهم أصدقائنا بجد 🥰
طبعًا الجانب الكوميدي حدث ولا حرج.. أنا حقيقي كنت بضحك من قلبي معاهم.. كانت بتغير مودي بشكل رهيب.. وفي نفس الوقت كوميديا موقف لطيفة مفيهاش استظراف ولا تخل بالجو العام للرواية وحقيقي كان التوازن بين ال 3 عوامل دول ( الجو البوليسي والكوميديا والجانب الاجتماعي الرومانسي) أكثر من رائع 🥰

بوينت بسيطة بس لفتت انتباهي بشكل كبير إنه الحلقات اللي كانت الجرائم بتخص أحد الأبطال الرئيسيين كان الجو العام بتاعها بيكون كئيب شوية على عكس بقية الحلقات ودا برضو خلاني أندمج معاهم جدًا.. لدرجة لما مشاكلهم بتتحل ويرجعوا يهزروا تاني بحس إني كنت معاهم.. كان عندي مشكلة كبيرة زيهم ومليش نفس للضحك والهزار بس الحمد لله ربنا فك الضيقة 😂❤✨
عمومًا كل الشكر د. رحاب على العظمة الفنية الأدبية دي وفي انتظار جزء جديد بفارغ الصبر

نيجي بقى لأديوهات وعظمة أوديوهات.. اي الأبداع والتميز دا.. أنا حبيتهم بجد والله خلاص وبقوا كأنهم جزء من عيلتي 😭❤
أبداع في الوصف بصراحة تيم متميز وموهوب ومبدع بشكل لا يُوصف.. تمثيلهم الصوتي رهيب.. كنت بحس كأني شايفاهم قدام عيني وهم بيمثلوا.. طريقة تأدية الدور وتوصيلهم للمشاعر رهيبة بجد 🥹❤✨
حقيقي كلهم بلا استثناء متميزين ولكن هتكلم عن الثلاثي الخطير جمال حداد وعمرو يسري وباسم أمين مع حفظ الألقاب طبعًا ابداع وتميز غير عادي ❤✨

بداية م. جمال حداد (أحمد الشربيني).. صوته مميز بشكل غير عادي مليان طاقة وحيوية وخفة دم وكاريزما.. كله دا وصلني من صوته بس 😂 حقيقي يعني أنا حاليًا بدور على كل الروايات والأعمال اللي شارك فيها من يوم ما بدأ في المجال دا 😂❤ شخصية حظابط شربيني تحفة جدًا.. حبيته جدًا وفي الآخر كرهناه كلنا جدًا ( ومحدش بينجرح اوي غير لما بيحب اوي 😔) واتمنى يرجع للأم مارشا قصدي لمنار في القريب العاجل علشان أعرف احبه تاني😔.. ودي أكتر شخصية حبيتها في الثلاثي حقيقي ❤✨

م. عمرو يسري (عمرو).. صوت بياخدك عالم تاني حقيقي.. هادي ورزين وعميق ويعني شخصية حضابط عمرو أعقل وأرسى حد فيهم أتمنى محدش من الثنائي يأثر عليه ويسيبوا الضابط العاقل اللي حيلتنا في حاله

باسم أمين (خالد) ورحلته مع الكبدة والسدق التي لا تنتهي بسمع صوته بحس عايزة أقوم آكل حالًا 😂 وصوته الحقيقى مبهج بالنسبالي جدًا وبيضحكني جدًا 😂❤✨

يعني حقيقي طيب مش هصحى اسمعهم تاني ازاي طيب 😭

اتنين معلقين معايا صوتهم مش راضي يفارقني لغاية دلوقتي
أسماء فوزي ( شخصية حنين في كسر تعادل) مبهررررة.. حقيقي مبهرة بكل معنى الكلمة ❤❤❤❤❤✨
مش فاهمة ازاي قدرت تعمل دور زي دا بالبراعة دي.. حسيت إني مش طايقها بس صعبانة عليا بس بعيط.. دخلني في حالة من المشاعر غريبة.. حقيقي شابو ❤✨
وجاسر الأنور ( شخصية باسم في يوم الصفر) برضو حقيقي تأثرت بيه جدًا يعني وعيطت في النهاية
ونهايةً شابو لكل القائمين على هذا العمل الرائع من البداية للنهاية وأتمنى المزيد والمزيد من هذه السلسلة ومن التقدم والابداع 🥰❤❤❤❤❤✨

[Maha]

سمعت حلقة جديده من سلسلة جنايات مكوّنة من جزئين واستمتعت بيها جدًا
بحب كتابات د. رحاب الجديدة أفكارها مختلفة وبتشد وأداء التمثيل في اأوديوهات كان إبداع بجد 👏
حلقة حلوة قوي وممتعة من أولها لآخرها
أبغي اقول مستنيه الجديده بس استحي 😂😂😂🙈🙈

[Mennatullah Diab]

هو ازاي الإنسان ممكن تجتمع فيه صفة الشيطنة والابتزاز وما إلى ذلك مع إنه يكون كريم وبار بوالده ووالدته واخواته؟
يعني حاسة شخصية إياد ليها بُعد فلسفي وبدأت أفهم لما حد بيقول إنه الشخصية مسطحة بيكون يقصد إيه ولما يقول إنه ليها أبعاد بيكون يقصد إيه..
عمومًا شخصية إياد شخصية ليها أبعاد غير مسطحة، رغم اني مش قادرة استوعب التضاد اللي بين كونه مُبتز وكونه كريم؟
كل إنسان فيه شوية ابيض وشوية اسود، كلنا رمادي بس هل التضاد بيكون بالتطرف ده؟
يعني والله أعلم أي شخص مُبتز أو عنده تطرف اخلاقي سيء ومؤذي إلى هذه الدرجة بالإضافة للذكاء الحاد اللي هم بيقولوا عليه حاساه غصب عنه هيكون عنده صفة الجشع والله أعلم.
وكان موفق فإنه فيه حد من الشخصيات وصفه تقريبًا أخوه بإنه حياته الشخصية خط احمر، حاسة كبناء شخصية فهو نوعًا ما مُقنِع ومتماسك..

بس أنا عمومًا مش عارفة احدد إيه اللي ممكن يوصله للشر الشديد ده؟
يعني هو منشأش في أسرة غنية بس مكنوش أسرة فقيرة بردو، متوضحش إنه كان بيعاني من نقص ما سواء معنوي أو مادي ساهم في تكوين الشخصية ده، معندهوش - والله أعلم- غضب مكبوت تجاه العالم ومعظم اللي عاوزه كان بيوصله وبينجح فيه سواء صح ولا غلط وسواء الطريقة صحولا غلط..
فمش عارفة هل فيه إنسان بيتولد سيء لهذه الدرجة كده؟

الشخصية اللي أنا حاساها مسطحة فعلًا للأسف هي شخصية خالد، مش عارفة أتخيل إنه فيه شخصية محور تفكيرها هو الاكل بس حرفيًا، حتى لو كان بيتاخد فإطار كوميدي لذيذ بس حاسة كان ممكن يتحطله قصة أعمق من قصة نور او ممكن الحلقات تكون اطول سيكا ونتاخد في تفاصيل شخصيته هو والباقي، يعني ممكن شربيني اتاخدنا شوية وبدأنا نحب فيه صفات ونكره فيه صفات، وعمرو يعني سيكا بس كنت هحب لو تعمقنا اكتر، وخالد كمان..

بس عمومًا كمسلسل إذاعي فهو ممتع ولطيف حاسة اني عمومًا تعلقت بالجو والاجواء وما إلى ذلك..

[Ahmed Gohary]

هل يستطيع شخص واحد ان يخدع كل من حولة

حلقة ممتعة كالعادة مقسمة علي حلقتين مجموع وقت الحلقتين يقترب من ٣ ساعات بلا اي ملل

قصة مناسبة لأجواء الهجمات الاليكترونية المنتشرة تلك الايام

[Alaa]

حلقة جديدة مع اوديوهات
مقتل مهندس شاب فى الاسانسير و تم اكتشاف الجثة فى الفجر و تبدأ التحقيقات و جريمة جديدة تكتشفها بنت اخت خالد
حلقة لذيذة