كاموفلاج

by أحمد النجار

كاموفلاچ.. 31 شوت - بدون مونتاچ.. ديوان في صورة سيناريو فيلم سينمائي مكون من 31 مشهد بدون حذف، 10 فواصل للتخفيف من حدة الدراما، مع العلم إن الـ 31 مشهد بيمثِّلوا شهر مُنفصِل مُتصِل من حياة الكاتب.

المكان: كُلنا عارفينه..
الزمان: في الوقت الحالي...
الشخصيات: نُصها واقعي، ونُصها خيالي.. عشان كده.. الشُكر كُل الشُكر للشخصيات الحقيقية اللي خَلَقِت البيئة اللي اتولد فيها تاني أولادي.

"هُمّا أكبر م الكلام... بكتير"

يصدر بمعرض القاهرة الدولي للكتاب 2015

Genres: Poetry

136 pages, Paperback

First published December 31, 2014

About the author

احمد النجار
من مواليد محافظة أسوان عام 1988

حصل على بكالوريوس التجارة من جامعة القاهرة عام 2010 ، و تم قيده بالسنة الأولى بالدراسات العليا شعبة إدارة الأعمال عام 2014

شاعر ..
صدر ديوانه الأول تراتيل بين الشوارع و البيوت عام 2014 عن دار العلوم للنشر و التوزيع

صدر ديوانه الثاني بعنوان
، كاموفلاج .. 31 شوت .. بدون مونتاج عام 2015 عن دار دوّن للنشر و التوزيع ط
و في العام ذاته شارك مع مجموعة من الشعراء إصدار ديوان الصحبجية
الصاجر عن نفس الدار

كتب للعديد من الجرائد و المجلات الورقية و الإليكترونية
مثل مجلة كلمتنا ، دقة جديدة ، المواطن ، اليوم السابع .. الخ

من اهم اعماله الغنائية .. مسارح و سيما مع فرقة gazaga عمدان النور .. بقيادة الفنان .. يحيى نديم

Reviews

[Ahmed Emad · Rating 5 out of 5]

أولا : عن الشاعر ( احمد النجار )
===================================
أحمد النجار شاعر كما ينبغى للشاعر أن يكون.
لكل جيل عظماء يذكرهم التاريخ ... و النجار هو أحد عظماء هذا الجيل – بلا شك –
كل شاعر إما يتبع مدرسة أو ينشئ مدرسته الخاصة ...
النجار – لــوحده – مدرســـة .
( نزار قبانى ) كتب ال #نزاريات .. التى ما أن تقرأها حتى تعلم أنه ( نزار )
( محمود درويش ) كتب ال #درويشيات
و ( أحمد النجار ) كتب و سيكتب – بإذن الله – ال #نجاريات

عن الديوان :
ــــــــــــــ
فكرة الديوان بالنسبة للقراء ... جديدة .. رائعة .. ببساطة هى الإبداع في حد ذاته.
فكرة الديوان بالسنبة للشعراء – و ليس المدعين – هى تحدى – من وجهة نظرى – سيصمد كثيرا ... و سيختفى بسببه الكثيرين !!
كلمات النجار مغلفة بمعانى تحميها من صدأ الأيام و السنين .
( كلمات النجار .. هتعيــــش لسنين و سنييييييييييييين )
التعبيرات و الصور و الرموز الموجودة بالديوان .. أعجبتنى و ابهرتنى و صدمتنى و كفى !!!

فتوى لمن يدعى انه شاعر:
=============================
الصمت فى حرم النجار فــــرض واجب " هذا للشعراء " ...
فما بالكم بمن لا يجيد حتى الكتابة ؟!!!!!!!!!!!!

نصيحة :
=============
قال (غوستاف فلوبير) :
"اقرأ كثيراً ، لا العديد من الكتب "
لذلك فإذا أردت أن تقرأ و تستمتع بالشعر .. فعليك أن تقرأ – فقط – للنجار .

أخيرا :
=========
أنا فخووور جدا إن أنا من جيل ( النجار )
استمتعوا بالبرومو بتاع الديوان من هنا :
https://soundcloud.com/ahmed-el-nagga...
تابعوا النجار هنا :
https://www.facebook.com/NaGGaAaR?fre...
و اسمعوا قصايده و غناويه هنا :
https://soundcloud.com/ahmed-el-naggar-1

شكـــــرا جدا يا #نجار لأنك موجود .. وبتكتب .. وبتغنى كمان :)))))))

[Nehad Kamal · Rating 5 out of 5]

لأضلاع الدنيا التلاتة
للناس الناس وهموم الناس بيكون الشعر
....................
صدقني يا بحر الموج عالي .. اقتلني .. وربي لي عيالي
واديني الطوق انا طالع فوق ... ده الخالق ارحم من المخلوق
..............................................................
انا معرفش ايه اللي كان ف دماغ احمد النجار وهو بيعمل الديوان ده
مش فاهمة هو عاوز يوصل لنا ايه .. بس كل اللي اعرفه ان الديوان ده كتلة وجع غير منتهية... كل اللي هيقراه هيفتكر ذكرياته
فيه ناس هتفتكر ذكري اتنين تلاتة .. بس اللي متأكدة منه ان جيل اواخر التمانينات واوائل التسعينات الديوان ده هيكون بالنسبة لهم فيلم شافوه ولسه عايشين فيه وهيعيشوا فيه سنين قدام
مشهد (2) .. عبارة السلام
مشهد (16 ) .. حلم كل المحبين
الوصايا العشر .... قمة الحزن والوجع والبهجة وكل حاجة
الديوان ده حالة .. هتلاقي نفسك ف كل ورقة
نصيحة لكل الناس .. اللي مقراش الديوان اقروه وحسوا كل كلمة

‏

[Amira · Rating 5 out of 5]

طيب .. أنا اتفاجئت من فكرة الديوان عجبتني "للناس" الكلام اللي مكتوب واقعي بشكل مش معقول .. يعني ربنا يستر عليه :D وميتاخدش لومان
"هي" القسم ده أشبه بإستراحة وترويح للقلب يعني حلو جداً :))
الصاحب .. وختام الديوان استمتعت .. خصوصاً الوصايا العشر حقيقي ختامه مسك ..

الديوان محتاج يبقى معاه CD للشعر كله .. واعتقد محتاج يبقى اسكتشات مسرحية غنائية هيبقى تحفة ..
كتير من الكلمات خصوصاً في الجزء الأول حسيت انها تنفع على كأغاني أفلام ليها علاقة بالحالة طبعاً

طيب .. اللي مقرأش "كلاموفلاج" هيفوته كتير .. تجربة جديدة وحالة مُختلفة ومميزة جدًا :)

[Asma sherb · Rating 4 out of 5]

الديوان كان متقسّم لتلات فصول، أحلاهم بالنسبة لي " للبنت، أول وآخر بنت ".
انا شايفة إن النجار عموماً متميز بالأبيات المزيكا بذاتها، اللي هو طول الوقت وأنا بقرأ كنت بغني الديوان.
من الأبيات اللي حبيتها:

‏" الشمس يوماتي.. بتفارق حضن السما بالدم "

‏" عفريت غلبان، والجوع أرصفة
‏والخوف إدمان، مش حال ولا صفة "
‏
‏‏" الطلقة جزء من الثانية وإحنا الإثبات "

‏" إن كفروا بغنانا راح يؤمنوا بصداه "

القصايد بقى اللي عجبتني كاملةً ومقدرتش آخد منها أبيات بس..:

** متأكدة
** على خطا الحلّاج
** نعناع
** لو
** هزي
** نص ونص

[Noha Ebada · Rating 1 out of 5]

سيئ جدا
وصلت إلي منتصف الديوان
ولن أكمله أبدا ً
الشعر العامي يجيب للواحد الضغط فعلاً
ليتني لم أقرأ منه شيئ
هنا تنتحر التفعيلات والقوافي والمعاني

لا تقرأوا الشعر العامي ، فهو يقتل الشعر ويُفسده
-إلا قليل جدا كمصطفي إبراهيم-

[عبدالرحمن شاكر · Rating 4 out of 5]

كاموفلاچ - الديوان الثاني لأحمد النجار بعد الأول - العبقري - تراتيل.

مبدأيًا أنا مكنتش ناوي أكتب ريفيو أو كنت هكتب جملة بسيطة مجملًا وهي الديوان حلو وعجبني وهو كذلك فعلًا.. بس لاحظت اهتمام الكاتب بكل التقييمات والآراء على الصفحة هنا على عكس ما توقعت بسبب ما أراه من غيره من المشاهير في الكتابة عامةً.. لذلك قررت أكتب رأيي ونقدي فيما لم يعجبني في الديوان..

أولًا فكرة التقسيمة وإخراج الديوان حلوة جدًا بس يمكن محبتش أوي الوصف اللي في أول كل قصيدة.. كنت بقول في نفسي فعلًا "أنا مش عايز وصف أنا عايز شعر".. وأعتقد إنه كان غير مؤثر أوي بالنسبة لي شخصيًا..

ثانيًا محتوى الديوان نفسه ميختلفش عليه إتنين نظرًا للموهبة القوية اللي بيمتلكها "النجار" واللي ظاهره في كل قصايدُه.. وده اللي بيفرق الموهوب عن غيره.. الغير موهوب وسط كل 10 نصوص بيكتبهم واحدة بس اللي بتعلّم وبتبقى والباقي كأنه لم يكن أصلًا.. فهنا الديوان كله قوي من أول جملة فيه.. الشوتات كلها بالفواصل لحد التعقيب كمان..

ثالثًا: أنا عامةً بعشق الشِعر السياسي.. وقلما أقرأ أي شِعر عارف إنه مش سياسي.. بس في كاموفلاچ بعيدًا عن القصايد السياسية أو اللي فيها اسقاطات.. وصلني كل القصايد اللي اتكتبت سواء اجتماعية أو رومانسية..

رابعًا: مش عارف ليه كنت بحس إني عايز أجري في المشاهد بسرعة عشان أوصل الفاصل أستمتع بيه شوية.. والإحساس ده وصلني بعد أول فاصل "بارانويا" اللي من وجهة نظري من أعظم نصوص الديوان.. وعامةً الفواصل أغلبها كانت عظيمة خاصةً " بارانويا - يا جنايني - كاليميرا ياسو" .. وأعظم المشاهد كان "نيجاتيف"

خامسًا: وده شئ ملوش علاقة بالمتحوى أو التقييم أو الشاعر ولكنه أحزنني جدًا.. الغلاف لكريم آدم حلو جدًا كغلاف وصورة ع النت بس أما مسكت الديوان في إيدي وبصيت على الألوان والطباعة اتضايقت جدًا إن الغلاف العظيم ده حلاوته تروح بسبب سوء الطباعة لأن الألوان باهتة تمامًا فيه.. أتمنى يكون إتعدل فيما بعد لأن اللي معايا الطبعة الأولى..

في النهاية.. الديوان عظيم جدًا واستمتعت بيه وأتمنى فعلًا مزيد من النجاح للموهوب "أحمد النجار" ومستني التالت..

[الشّيماء أشرف · Rating 3 out of 5]

برغم إني مابفهمش في الشعر لكن عندي قناعة حاليًا من اللي بقرأه على الفيسبوك إن الشعر العامي حاليًا ميت ومافهوش روح إلا اللهم مصطفى إبراهيم بتعجبني كتاباته ..
فهاتبقى ده أول بداية مع ديوان عاميّة ونوعًا ما مشجعة لتكرار التجربة ، فكرة إخراج الديوان بالشكل ده عجبتني حيث إنه قسّمه لـ مشاهد سينمائية بينهم فواصل سريعة كانوا جُمال جدًا وفيهم اختلاف عن أي شيء اعتيادي:))

[Wafaa · Rating 5 out of 5]

مش عارفة اكتب ريڤيو اعبر بيه عن كل حاجة:D بس تلخيصاً لحالة شعر اسمها أحمد النجار، إيليا أبو ماضي قال:
عندما أبدع هذا الكون رب العالمينا
خلق الشاعر كي يخلق للناس عيونا
لو في اكتر من ٥ نجوم تاخدهم و ربنا :D

[Ahmed Ibrahim · Rating 3 out of 5]

محاولات جيدة لكتابة شعر عامى
بخلاف العك اللى الواحد شايفه اليومين دول .. الديوان ده حاجة نضيفة

الفكرة جيدة وإن كانت مش مترابطة ..
الكلام بسيط وبيوصلك لهدفه بسهولة
مع بعض المشاهد اللى عجبتنى جداً

ديوان جيد

[Dalia · Rating 4 out of 5]

" للناس الناس و هموم الناس بيكون الشعر "
كتاب اكثر من رائع
واضح و غير مباشر
فكرة المشاهد رسمت الصورة بشكل رائع
الكلام متنغم كأنه قطع موسيقية قصيرة
فن راقى بمعنى الكلمة

[نسمة · Rating 4 out of 5]

ديوان مايتقريش بالعين، لأ، يتقري بالقلب، زي كل حاجة بيكتبها النجار تتحس و ما تتشافش، رائع جدا

[Moaaz Yousef · Rating 4 out of 5]

- الكاتب : أحمد النجار ابن الصعيد هو واحد من أفضل شعراء العامية – في وجهة نظري – بعتبر إنه في المركز التاني بعد مصطفى إبراهيم ، عامةً بحس إنه مش بيتعب إنه يلاقي اللفظ المناسب فـ أنا بعتبره أحسن واحد بيختار اللفظ ، تعبيرات في الجون دايماً و بيعرف يعيشك الحالة اللي بيتكلم عنها ، شعره صادق جداً و دي نقطة مهمة ، و متأثر جداً ببلده و دة بيظهر في بعض الكلام اللي مش أي حد هيقدر يفهمه :D

- تراتيل و كيفية التحول إلى كاموفلاج : أنا قريت تراتيل و أنا بقرأ كاموفلاج عشان أقدر أقارن التحول اللي حصل ما بين الكتابين و كان تقييمي لـ تراتيل هو 3 من 5 لـ أسباب كتير منها إني حسيت إنه النجار كان ممكن يقلل من عدد القصايد في مقابل إنه المضمون يكون أكتر شوية و الواحد يعيش جو القصيدة أو الحالة ، كمان توزيع القصيدة نفسها مكانش عاجبني ، الجزء الخاص بالشوارع عجبني أكتر من البيوت صراحةً ، لكن إجمالاً كنت منتظر إنه هيبقى في نقلة في كتاب كاموفلاج ، و دة اللي حصل بالفعل..
قبل ما أتكلم عن كاموفلاج في حد ذاته عايز أقول إنه التحول اللي حصل كان مميز جداً و النجار عالج كل السلبيات اللي كانت موجودة في تراتيل ، المواضيع كلها قدرت أعيش جوة منها ، و عشان كدة أنا هقيم كاموفلاج و أنا ضميري مستريح بـ 4 من 5.. وممكن تبقى 5 :D

- كاموفلاج .. تجربة شعرية مميزة جداً و مختلفة ، فكرة المشاهد المصورة جديدة بالشكل اللي عرضه بيها النجار ، يعني فكرة وصف المشهد اللي بتكون قبل كل قصيدة دة في حد ذاته موهبة ، في أوصاف كانت بتعيشني جو القصيدة لوحدها من قبل ما اقرأ القصيدة! زي قصايد " #نيجاتيف ، #بدلة_الإعدام ، #هيستيريا ، #مجاهد ، #أمل ، #هي ، #هزي ، #نص_ونص ، #عريس_الغفلة ، #الطاولة ، #التخشيبة ، #Last_Scene "
كمان فكرة الفواصل في النص ، و صدق لما قال عنها النجار إنها موجودة للتخفيف من حدة الدراما ، الصراحة كنت بحس إنها مريحة جداً في النص ، بتخرجك من الحالة اللي بتعيشها في القصيدة اللي قبلها قبل ما تدخل على قصيدة جديدة

- الجزء الأول: للناس .. الناس ، و هموم الناس .. بيكون الشعر
عرض عجبني جداً لأحوال الناس بمختلف حالاتهم ، صدقت لما قولت في أول الكتاب الشخصيات " نصها واقعي ، نصها خيالي " و أنا تقريباً لمسني أكتر حاجة الشخصيات اللي حسيت إنها واقعية أكتر زي المعتقل و عرض أحواله ، و إختيار عشوائي لهموم الناس بشكل مختلف من مناطق مختلفة زي " من فوق القاهرة ، من قلب القاهرة ، من الجبل " و أماكن زي " السينما ، عزاء ، حلقة ذكر ، المحكمة ، الزنزانة "

* في مشاهد عجبتني بالكامل و هي أغلبها اللي تخص فكرة الثورة أكتر و اللي إيماني بيها خلاني تلقائي أعيش جوة الحالة المكتوبة في القصايد:
مشهد 4 | 31 – سابع مرة #المعتقل
مشهد 5 | 31 – مشهد مكرر #المحاكمة
مشهد 6 | 31 – آخر مرة #بدلة_الإعدام
مشهد 14 | 31 – كولاج #أمل

* أما كـ جمل عجبتني من القصايد ككل:
" يامه الإفراج من فوق " من قصيدة #المعتقل ، بجد الجملة دي عبقرية جداً و لما قريتها أكتر من مرة حسيت براحة و عدل ربنا في الحساب يوم القيامة ضد اللي ظلموا
" من إمتى بيضة يا بدلة الإعدام؟ " من قصيدة #بدلة_الإعدام
" صدق أو لا تصدق ، كتب التاريخ برهان.. كل اللي حفر النيل ، مات بعدها – عطشان " من قصيدة #تراب
" الواحد – واقف مصلوب.. الإتنين – تحديف الطوب.. والتلاتة – رصاصة تفوت.. والأربعة – الناس بتموت.. والخمسة – تجار الدين.. والستة – كلاب السلاطينزز والسبعة – أطياف النور.. والتمانية – النار ، والسور.. والتسعة – صوت الحرافيش.. والعشرة – يا نموت – يا نعيش.. " من قصيدة #الهارب
" يا اللي دفنتوا البدر أول ما اكتمل .. إزاي قدرتوا تزرعوا ، و الأرض محتلة .. أمل! " ، " لا تصالح.. وإياك تسلّم ع العدو بالإيد.. فاتت جنازة من هنا؟ ودعها بالزغاريد " من قصيدة #أمل

- الجزء التاني: للبنت.. أول وآخر بنت
بصراحة قبل ما أبدء كنت متوقع إنه الجزء دة هيبقى مختلف بس مع ذلك مكونتش قادر أتخيل إنه هيبقى في تنويع خاصةً و إنهم 10 مشاهد فـ كنت مستني أشوف الجزء دة هيبقى عامل إزاي ، بصراحة خلصوا المشاهد و كنت حاسس إنه لسة في أكتر من التنوع ، النقطة الوحيدة بس إنه في 4 مشاهد فيهم دراويش الطرق الصوفية مع إختلاف الحالة يعني حتى وصف المشاهد كان مختلف اللهم إلا من النقطة دي و اللي أكيد النجار إستخدمها لغرض معين في دماغه مش لإنه مفيش أوصاف مختلفة
عجبني عرض المواقف المختلفة زي " قبل الجواز و مطالب الأهل الكتير ، إتنين عواجيز ، إتنين شباب بمختلف الأشكال ، وقت الخصام ، وقت الإعتذار "

* برضو في مشاهد كاملة عجبتني من الجزء دة لإنها بتوصف حالة كاملة في الحب و أحواله:
مشهد 16 | 31 – أول مرة #هيّ
مشهد 18 | 31 – عبارة #على_خطا_الحلّاج
مشهد 20 | 31 – رمز #نعناع
مشهد 22 | 31 – حالة #هزي
مشهد 23 | 31 – غنوة #نص_ونص
مشهد 25 | 31 – مونولوج #عريس_الغفلة

* أما كـ جمل عجبتني من القصايد ككل:
" بنت ، وولد – صدفة.. واتقابلوا صدفة زينا.. الصدفة رزق ، وأنا وأنتي نمل – والجحر آخر رزقنا! " من قصيدة #على_خطا_الحلّاج
" يا اللي أنتي نعمة ربنا – إنتي البريئة الفاتنة، والمستحيلة الممكنة – من نسل آدم زيّنا ، ولا أنتي مين؟ " من قصيدة #الشيخ_والبحر
" عشت راضي ، ومت راضي.. إمتى سجلتي اعتراضي؟! هو لو عصفوري زقزق.. يعدموه في ميدان يا قاضي؟! " من قصيدة #هزي
" نص الصحاب وقفة – نص الفرح " سقفة " – نص الغرام حواديت – نص الحياة انتي! " ، " كل الكلام سيرتك – كل الحاجات صورتك، وان كنت أقدر اكون – أنا من زمان كنتك! " ، " العشق حرية – والبنت ثورية – والحضن صوته هتاف – ولكل صوت غية! " من قصيدة #نص_ونص

- الجزء التالت: للصاحب .. الصاحب اللي يشبه الملكوت
على الرغم إنه الجزء دة مش طويل من ناحية القصايد بس في كمية صدق رهيبة للي يركز فيها أو زي ما النجار بيقول في آخر حاجة في الكتاب التعقيب " يؤخذ على الشاعر ولعه بالتفاصيل ، و الذكريات العبيطة " لإني حسيت الجزئية دي هنا فعلاً ، و تقريباً في قصيدة فكرتني لما النجار في مرة كان منزل بوست بيقول إنه هيلعب مع #أحمد_الطحان دور طاولة لو كسب النجار فـ الطحان هيرجع الفيس تاني ، لكن الطحان كسب و استمر في غيابه ، حسيت إنه القصيدة دي اتكتبت في الوقت دة و بتشرح الحالة اللي حصلت وقتها " التفاصيل ، الذكريات العبيطة " و قد يكون مجرد إحساس مني ، و عجبني مشاركة الطحان نفسه في كتابة إحدى القصايد مع النجار " التخشيبة "

* المشاهد الكاملة اللي عجبتني في الجزء دة:
مشهد 26 | 31 – الزهرة #الطاولة
مشهد 28 | 31 – صورة #الشاهد
مشهد 29 | 31 – موال #الكلمة
مشهد 30 | 31 – آية #التخشيبة
مشهد 31 | 31 – Last Scene #الوصايا_العشر

* الجمل اللي عجبتني من القصايد ككل:
" ملعون أبوه الشعر – ع الزيطة – ع السقفة.. أنت اللي لو تتوزن – هتميل الكفة. " من قصيدة #الطاولة
" ملعون أبو الفن – لو مشى ناس بطال " من قصيدة #الكلمة
" متقولوش لامي – إني مع الأموات.. أمي دي لو تبكي – هتزلزل السماوات – خلي الملايكة يبلغوها بلين.. وبدال ما تبكي دموع – تضحك فتحيي الطين.. " ، " كلنا في الأساس فاسدين – رغم إختلاف النسب.. " ، " الوصية الأخيرة.. ليها وللناس.. أنا أضعف من ورق التوت.. فبلاش تظنوا في الفراق السوء.. كل الحكاية إني.. إني تعبت هنا.. فطلعت أجرب في الحياة – من فوق.. " من قصيدة #الوصايا_العشر

- الختام : النجار كتب " تعقيب " خلص بيه كلام كتير ، و أنا مش هطول في ختامي لرأيي في " كاموفلاج " بس هكتفي إني أقول إنه الكتاب دة بالنسبة ليا تاني أفضل كتاب شعر عامي قريته في حياتي بعد ديوان " المانيفستو " لـ مصطفى إبراهيم ، و دة مش مجاملة للنجار ولا حاجة ، دة مسؤولية عليه إنه شاعر و صوته واصل للناس و بيقدم قضية و لازم يفضل يقدم حاجة مختلفة للناس ، أنا فخور جداً إني واحد من اللي بيتابعوك يا فنان ، و منتظر منك دايماً حاجات عبقرية زي كاموفلاج <3

[Sarah · Rating 3 out of 5]

يؤخذ علي الشاعر
ولعه..
بالتفاصيل ، والذكريات العبيطة
وإهماله..
للبنت الملهمة ، والحقيقة اللقيطة !!
احمد النجار

[Abd El-Rahman Ibn Omar · Rating 2 out of 5]

أنا مش عليم بالعربي ، لكني بحب القراءة و بحب أستمتع بالقراءة ، بحب الأفكار و البلاغة و التحدي في أني أفكر في الجمل القوية كتركيب ، بحب مثلًا في شعر الفصحى محمود درويش لأنه بيستفزني أني أجري ورا المعنى من غير ما يكون بيميل لـ"تلحين" كلامه .
عامة أنا مبشتريش كتب من النوع العامي أو كتب أتفق الناس انها رهيبة لأني مبثقش في رأي المجتمع الجميل بتاعنا ده ، لكن السنة دي قلت أشتري من المعرض كتب من اللي مبحبهاش على أساس أني أخد فكرة برضو.
للإنصاف من وجه نظري نجمتين من أصل خمسة قليلين ، لكن برضو تلاته كتير ، فأظن أن نقطتين و نص أفض شئ.
و للإنصاف أيضًا "إخراج الكتاب" فيه شئ مختلف و متقسم بهدف ، في جمل عاجبتني أكيد و في "أبيات " الرتم فيها كان جميل ، و كذلك برضو في مصطلحات في مواضع مختلفة بتدل على تطور الكاتب في اللغة العامية.
في النهاية ده رأيي المتواضع ، بجانب أن أنا شايف أن الأدب الحقيقي بيكون بلغة فصحى

[DỘn Mando · Rating 4 out of 5]

"الناس الناس لهموم الناس بيكون الشِعر "
جزء من الاهداء .. و فعلا الديوان اتكلم عن هموم الناس و عن الناس
كلام احمد النجار قوي جدا رغم بساطته و بيدخل القلب بسهولة
دايما بحسه كلام فيه ريحة مصر .. ريحة الريف و الصعيد و النوبة
حتى في كلامه عن الحبيبة تحسه كأنها وطن .. و عن الصاحب كأنه حياة
و انا مؤمن و مقتنع جدا بالاسلوب دة في حياتي فعشان كدة عجبنى جدا
اسلوب المشاهد و السيناريو كان حلو جدا و يدخلك في مود كانها رواية مش ديوان شعر
و يخليك تحس الكلام اكتر .. فكرة اكتر من ممتازة
الديوان دة فشيخ و اكتر ديوان عجبنى في 2015 حتى الان ..
انصح بقرائته لمحبي شعر العامية و بالاخص اللى عايز يتمزج و يقرا شعر بجد ممتع !
احترت بين ال 4 نجوم او ال 5 .. فاخترت له تقييم 4.5/5

[Menna Ayman · Rating 5 out of 5]

*النور مايبُخِّش حياة فى الناس، وكُتر المَشي فِ الضلمة بيقطَّع الأنفاس.
...
* ع��ى ذِكر الذِكر :..
الذِكر انتى، وانتى التواشيح..
شَعرِك متخصّل-متفصّل.. "شَعرِك تسابيح".
...
*يا مصدقين الضحكة فى الصورة
الضحكة شاهد زور
إزاى تكون جوّة القفص
وتغنى يا عصفور؟
...
أكيد هييجى يوم و الناس تُدرك الفرق بين الاسفاف و الإبداع و يدوا للإبداع حقه، ديوان بالعبقرية دى مكانه محفوظ فى مقدمة الشعر العامى بدون شك.
موضوع إن فى قصايد كتير منه معمولة أغانى و الباقى ممكن تدندنه بكل سهولة وانت قاعد ضاعف الاستمتاع بيه.
-أكتر قصايد عجبتنى؛ مشهد2 ، بارانويا ، متأكدة ، كولاج ، رمز ، حالة ، last scene.

[Beshoy Wagih · Rating 5 out of 5]

"الناس الناس لهموم الناس بيكون الشِعر "
ديوان غير عادي لشاعر غير عادي ..
رفع من شأن الشِعر وجعله ك كاميرة بتلف علي كل حاجة وجعتنا ... ورغم ذلك لم يفقد الشِعر صوره الفنية المشوقة.
لكل نص رائحته الخاصة كل كلمة بتوجع جيل بكامله ..
النجار ليس وليد الحدث فقط لكنه وليد وجع الحدث.
ديوان من رأيي إنه لن يأخذ حقه الأن لكنه سيكون مثل الخمر كلما عَتَّقَ كلما عرف قيمته.
ف الوقت القريب سيكون سند وتوثيق للمرحلة سيعبر عن ما يدور ودار في خلد كل منا ك جيل.

[Amirasoffar · Rating 4 out of 5]

اسرع ديوان اقرأه ف حياتي و ده لسبب اني مش هحتفظ بيه للأسف ولاني واثقه فيه ههديه لحد تاني فقررت اقرأه الاول
الحاجات اللي كانت اقرب ليا فيه ف الجزء الاخير وطبعا الاجزاء اللي سمعتها في البرومو كانت بتتطلع مني بنفس النغمه بتاعته وياريت اسمعه كله زي البرومو
وتسلم دماغ اللي عمل البرومو بجد فوق الوصف
حاجه اخيره عاوزة اقولها اني اتصدمت في لون الديوان :D اه والله لقيته مش منور زي الصورة الاكترونيه بتاعته وبس خلاص ^ ^

[مؤيد · Rating 5 out of 5]

أكيد فـ رفيو عن ديوان لأحمد النجار .. مش هجود ع أسلوبه أو انتقده ..
انا بحب المصطلحات اللي بتكتب بيها في شعرك .. أسلوبك زي ما قولت .. لا غبار عليه .. حبيت فكرة الدوان و أحب أحييك عليها .. شغل عالي

اغلب الديوان عاجبني .. حتى بالأهداء ..

أتمنى احضرلك حفل توقيع للديوان دا

اتمنى انك تسجل حجات من الديوان بصوتك -زي البرومو كدة- ... الديوان دا من الحجات الحلوة اللي جبتها من المعرض السنة دي

أحمد النجار .. انت من أفشخ شعراء العامية في مصر .. وكفى !!

[Moustafa Mounir · Rating 5 out of 5]

قمة المتعة لما تقرأ حاجة .. وتحس انك بتعرف تدندنها و كمان تفكر في كل كلمة مكتوبة مش مجرد شعر موزون و مكتوب و خلاص ... كاموفلاچ عن الدنيا واللي فيها و عن البنت و جمال حبها و عن الصاحب اللي بجد ... انا اول مرة اقرأ لاحمد النجار ومش اخر مرة ان شاء الله... شكرا يا نجار بجد علي الإبداع ده :-)

[Yasmin_amr · Rating 5 out of 5]

الكتاب بجد تحفه جدا من اول ما اشتريته و انا في المعرض فضلت أقرا فيه خلصته تاني يوم الصبح بجد ما شاء الله عليك و يا رب من نجاح لنجاح و احسن حاجه اني شوفتك و وقعتلي

[Sara Samier · Rating 5 out of 5]

ممتاز
كلمات النجار على اد مهى سهله و بسيطه للفهم على اد مهى صعبه جدا ان حد تانى يكتبها بنفس الطريق
كل جزء فيها مش بيتكتب عشان يتقرا دلوقتى و بس
انا متاكده انه هيعيش لسنين كتير قدام

[Hager Tarek · Rating 5 out of 5]

مفيش وصف للديوان اقوي من الاهداء
الديوان يشمل اضلاع الدنيا التلاته
الناس , البنت , الصاحب
ابدعت حقيقي
استمتعت جدا و مقفلتوش الا لما خلصته
--
الديوان مميز بالنسبالي عموما :)

[فرح الملاح · Rating 5 out of 5]

هل جربت من قبل أن تصادق كتابا؟
أنا حاولت صدقا أن أعامل هذا الديوان كتسلية عابرة ولكنه لزم جواري لبضعة أيام فحادثني وواساني وأغرقني في نوبات من الضحك والبكاء والعشق والنوستالجيا، أجبرني على ضمه إلى دائرة الأصدقاء المقربين الذين يصطفون أبدا جوار فراشي في متناول اليد ويهترئون من فرط التصفح ، لم أزل أفضل "تراتيل" ولكن ذلك لا ينقص ذرة من انبهاري.

القسم الأوسط منه آسر، ينبئ بخيال مشبع بالتفاصيل المصرية لكنه لا يخلو من طابع عصري مختلف، لطالما عشقت غزليات النجار.

أما قصيدة "آية" في القسم الأخير، فإنني على الأرجح سأكتبها بماء الذهب وأعلقها على أستار غرفتي على غرار معلقات الشعر الجاهلي.

لو كان الأمر بيدي لصدر ألبوم غنائي لهذا الديوان من الغلاف إلى الغلاف، أعتقد بشدة أن محتوى كهذا أجدر بالغناء من معظم ما نسمع الآن من تكرار مسف.

[Momen Meshref · Rating 1 out of 5]

سى جدا .. ياريت ماضيعت ساعة من وقتي في قرائته
لو بيعجبك كلام زي
"بسمك اللهم نحيا، والديابة في كل ناحية"
ولا
"لامؤاخذة ف الكلمة يا خلي - حاكم الحشيش اما يعلي -الناس تبان من غير زينه .. ياابن اللذينا يا بلدينا "
في الكتاب ده هيعجبك جدا

[مريم نصر · Rating 1 out of 5]

محتمل أن تكون المشكلة لديّ لكني لم أستطع إكمال هذا الكتاب
لم أستطع أن ألتمس ما به شاعرية ولا من فكرة
الكتابة مفككة ولم أحبها ولم أتمكن من إكمال الكتاب وهذا حدث جلل نادر أن يحدث معي

[Rania Hazem · Rating 4 out of 5]

أحمد النجار شاعر موهوب جدا الحقيقه، و الديوان ممتع

[Rahma Agha · Rating 2 out of 5]

الفكرة حلوه ومختلفة بس معظم القصائد أو المشاهد زي ما سمّاها ماعجبتني

[Doudi Y. Muhammed · Rating 5 out of 5]

الكلمة أصبحت معتادة .. الديوان أكثر من رائع.
الحقيقة خوفت أضيع فلوسى وأشترى ديوان وأندم إنى أشتريته ف الآخر, بس قسماً بربي ما ندمت إنى دفعت فلوس ف ديوانك يا نجار.
الديوان ده لازم يتكتي ف التاريخ ..
أنا بصراحة مكنتش متخيلة إنه هيبقى بالشكل ده .. " للناس, الناس .. وهموم الناس بيكون الشعر " .. الجزء لمسنى بطريقة غبية, كل مشهد فيه سببلى رعشة ويمكن عيطت جامد ف مشهد 5 ومشهد 2 .. " الدنيا تلاهى, وملاهي, وأنا سري بيطلع يا إلهي, والآمر فينا, والناهي - مشغول بالماتش مع السنغال "
كنت عاوز توصل لإيه بالمشهد ده بالذات ؟!! .. لأن مهما كان اللى عاوز توصله ف هو وصل ..
والمشهد 3 الحزء التالت, عرفت توصل للدرجة دي إزاى ؟! " تركع تلف بلد, نعشق ف كلمة لأ "
والجزء السابع " الدنيا مأساتنا الكُبرى يا نعدى من خرم الإبره, يا نسلم أمرنا للمولى
الفاصل الأول كان من أورع ما يكون, جدير بالذكر إنى لحنت كل الفواصل وغنيتها, وكأنه عامل حسابه إن لاكلام ده لازم يتغنَّى
" في بلاد بتشبه أوى ناسها, وبلاد بتشبه حُراسها, وبلاد حاميها م***صها, وبلاد بتشبهنا يا اخينا "
الجملة دى بالذات أوسكار :D
مشهد 4 " ساومونى بكهربا على شَعري, ف إسود القلب وشاب شَعري " .. كمية الظلم اللى حسيتها ف المشهد ده مع رسالته لأمه خلتنى أكره البلد دى باللى فيها.
مشهد 5 .. " قررت المحكمة حضوريا, الحكم بالإهدام " .. لا تعليق :))
مشهد 9, وف أول جملة كأنك سافرت للمستقبل وكتبتها علشان تعبر عن اللى حاصل " أعزي مين ؟! " بيتهيألى يا نجار إحساسك ف القصيدة دى بالذات عدى الوصف
مشهد 10 و 11 و 12 .. يعجز الكلام عن الوصف
مشهد 14 يا نجاار ؟! .. الله الوكيل بهم وحقهم هيرجع قريب, " إن نصر الله قريب "
مشهد 15 يتلخص في الآتى " مستنى ايه ؟ .. من دولة هجاصة, بتقدّس البلطجى - لو حب رقاصة " وبس .
جزء للبنت آول وآخر بنت
كتبت أرقام المشاهد كلها ومسحتها .. لإن بإختصار مشاهد الجزء ده بالذات حسيت فيها بالحب الأسطوري اللى بيقولوا عليه, وطريقة وصف كل مشهد وتكرار التصوف خلانى عايشة ف دنيا تانية الحقيقة, مكنتش عاوزة ولا مشهد من دول يخلص نهائي .. ومع جمال الفواصل اتمنيت إن الجزء ده مي��لصش من الديوان أساسا مع اعتبار إن فاصل 8 ده خرافي أصلا .. فكرته عجبتنى جدا <3
للصاحب .. لأحمد الطحان اللى وحشنا كلنا, ومشهد 26 اللى حسسنى بالصداقة اللى بجد, " أحمد ياصاحبي, يا صدفة بالصدفة " .. أنا بحسدكوا الحقيقة :D
مشهد 30 .. لا يوجد وصف, لا تعليق
مشهد الوصايا العش ده من أروع ما يكون .. وكل وصية بإحساس مختلف .. وآخر وصية "))
أما التعقيب بقى ف ده مش هعقب عليه :D

ف الحقيقة كنت عاوزة أكتب كل مشهد وأقول كل اللى حسيته بس صعب وانا معنديش صبر الحقيقة..
عاوزة أقول بس إن الديوان ده صدقونى وبدون مجاملة وانا أصلا معرفش الكاتب يستحق يتذكر ف كتب التاريخ وكان يستاهل نجاح أكبر من اللى حققه بكتير
أحمد النجار إنت نجحت تعيشنا ف كوكب تانى ف حالة تانية مع الديوان ده .. وأراهن إن كل حد قرأ الديوان كان نفسه الديوان ده ميخلصش زي ما أنا كان نفسي ف كدة
أول مرة أقرألك ديوان ومش هتكون الأخير, من نجاح لنجاح .. وتستاهل

[hanan yehia · Rating 2 out of 5]

تراتيل كان أقوى بكتير ..
اتمنى الديوان الجاي يبقى زى تراتيل وافضل كمان ..