بعد ساعات العمل الرسمية

by عبدالرحمن حجاج

سجى تحاول أن تبدأ من جديد بعد علاقة سامة مع رجل يدعى موسى ترك فيها ندوبًا نفسية عميقة. عبر صديقيها فارس وخديجة، تحصل على عرض عمل غامض كـ"جليسة" لرجل مسن وثري في أسيوط يُدعى شعيب باشا رضوان — شخصية غامضة يُشاع عنها أنها تمتلك قصرًا مملوءًا باللوحات النادرة.
تقبل سجى العمل هربًا من ماضيها، لتبدأ رحلتها داخل قصر شعيب باشا، المكان الذي يبدو ككائن حي يراقبها. القصر مليء بلوحات لنساء فقط — وجوههن حزينة، ملامحهن مشوهة، وأعينهن تلاحق سجى أينما ذهبت. مع الوقت تبدأ تسمع أصواتًا غريبة وتعيش لحظات تداخل بين الواقع والخيال، حتى تبدأ اللوحات بالاختفاء واحدة تلو الأخرى، وتكتشف أن كل لوحة تخفي روح امرأة حقيقية.

228 pages, Paperback

First published January 15, 2026

About the author

عبدالرحمن حجاج
كاتب وروائي مصري، تخرج من كلية الاعلام قسم اذاعة وتلفزيون، تصدرت رواياته قائمة الأكثر مبيعاً في مصر والدول العربية، صدر له العديد من الروايات أهمها السكان الأصليين للقلب، حاوي وثلاثية كوابيس قبل النوم.

Reviews

[Retal Hesham · Rating 3 out of 5]

3/5 ⭐⭐⭐
تمام..
الرواية حلوة مش هنكر
بس هي اتكتبت لفئة معينة من الناس وأنا مش من الفئة دي
النهاية معجبتنيش يعني الأحداث كانت تستحق إنها تتقفل قفلة تانية خالص.. والسرد كان حلو ، بس كان مريب.. حد فاهم قصدي؟

[Omarekoooo · Rating 4 out of 5]

الروايه حلوه عامه بس كنت منتظر منها حاجه احسن من كده بس الروايه بشكل عام فهي حلو جدا بس اخر صفحتين في الروايه حرفيا بوظوا كل حاجه و خلوني اقلل التقييم بجد مكنش ليهم لازمه خالص و اتضايقت جدا

[Moheb M. Moheb · Rating 2 out of 5]

رواية بعد ساعات العمل الرسمية.. 🖼️🖌️
تأليف عبد الرحمن حجاج..
عدد الصفحات 222..
صادرة عن دار الرسم بالكلمات..

🖌️ بدأت هذه الرواية بحماس كبير، مدفوعًا بكم الترويج والدعايا الذي سبق طرح الرواية.. وبمجرد ما انخرطت أكثر في الأحداث أخذت حماستي في التناقص تدريجيًا حتى تحولت إلى خيبة أمل كبيرة.. سأتولى عرضها تباعًا خلال المراجعة..

🖌️ قصة الرواية تقليدية، بها تيمات معتادة لذلك النوع من أدب الرعب.. لعنة قديمة، قصر عملاق مسكون يحمل بين جدرانه العديد من الأسرار، شخص له كاريزما الشيطان هو شعيب رضوان صاحب اللوحات المخيفة ومالك القصر، وفتاة ضعيفة لكن تكمن بداخلها قدرات تفوق الخيال ألا وهي سجى راوية الأحداث وبطلتها..

🖌️ طريقة سرد الرواية تحمل الكثير من الملل والتمهيد الغير موفق، مجرد استهلاك للصفحات، دون أن نرى أثر ذلك على أحداث الرواية إلا بعد تجاوز النصف الثاني منها.. فالأحداث هنا تجري على لسان بطلة، مما أدى لحدوث بعض التداخل بين المشاهد وبعضها لم يحسن الكاتب صايغة أحداثهم..

🔴 تنويه: قد يحمل كلامي القادم بعضًا من الحرق لمن لم يقرأ الرواية..

🖌️ مشكلة الرواية الأساسية - من وجهة نظري - في حبكتها.. والتي يمكن وصفها بالمائعة، أو الغير محددة.. فعلى سبيل المثال الهدف الأساسي المحرك لشخصية شعيب كان أضغف من يرهن مستقبله وحياته كلها من أجله.. بل نشأة اللعنة ذاتها من البداية تحمل قدرًا كبيرًا من التفكك واللامنطقية..

🖌️ أساس اللعنة أن يحصل شعيب على الخلود بعد ما يقوم بأسر ضحاياه من النساء الأحياء داخل اللوحات.. مقابل أن يعيش بلا مشاعر متحجر القلب، إلى هنا صفقة جيدة.. ولكن، كيف يمكن أن تنكسر اللعنة إذا تحرك قلب شعيب وأحب أحد ضحاياه؟!
ألا يوجد تناقض؟!
كيف لقلب ميت بالفعل أن يحب؟!

🖌️ شخصية سجى بطلة الرواية شخصية غاية في السطحية بلا أي عمق، أو صراع حقيقي، حتى هويتها المفقودة ومرضها لم يستطع الكاتب التعبير عنه وتجسيده طوال أحداث الرواية بصورة يجعلك تتحد معها أو تتعاطف معها.. فتحولت إلى شخصية ثرثارة لا تتوقف عن التعجب والتساؤل..

🖌️ هناك كذلك حدثين محوريين في حياة سجى لم استطع هضمهما، أولاً الحادثة (البسيطة)التي دبرها شعيب من أجل أن تفقد الذاكرة.. وكأنه كان يعرف نتيجتها مسبقًا!! والأغرب أنها أكملت حياتها وتعليمها وعملها في بلد مثل مصر دون أوراق هوية!!!

🖌️ نهاية الرواية تحمل الكثير من الاستعراض كأي فيلم هندي.. ولكنها وقعت في فخ التناقض المعتاد المكرر طوال أحداث العمل..

🖌️ تقييمي الشخصي للرواية 2/5
#serial_reader

[Books With Sagda · Rating 5 out of 5]

ماذا يحدث بعد ساعات العمل الرسمية؟


هل الفن يمكن أن يصبح لعنة؟
_____________________________

رواية بتدور احداثها عن قصر شعيب باشا الغريب،والي بيحصل فيه حاجات اغرب..! تخيل يجيلك وظيفة انك تشتغل ف قصر كبير وفخم جداً بس تكتشف ان القصر ده وراه سر كبير،ومفيش فرصة إنك تهرب منه فتبقى مضطر انك تعرف حقيقة القصر ده... وده بظبط الي بيحصل مع سجى بطلة الرواية..
____________________________

اسلوب السرد : اسلوب السرد ف الرواية عجبني جدا،ومتطور كتير عن باقي اعمال الكاتب عبدالرحمن حجاج، اسلوب السرد يشدك انك تكمل الرواية وتبقى عايز تعرف ايه اللي هيحصل بعد كده،اسلوب مميز ومختلف فعلاً
____________________________

احداث الرواية: احداث الرواية كانت ماشية برتم كويس جداً مش سريعة ومتكروته وفنفس الوقت مش بطيئه لدرجة انك تحس بملل وانت بتقرأ، و الاحداث نفسها مشوقة ومرعبة.
___________________________

الحبكة: حبيت الحبكه ومتوقعتهاش بصراحة، وكانت قوية ومُبهره!
___________________________

رأيي في نهاية الرواية ( بدون حرق): النهاية معرفتش اني اتوقعها، قعدت اعمل تحليلات وافكر ممكن تبقى ايه بس اتصدمت ب حاجة تانية خالص😅
___________________________

لو عايز رواية غموض/فنتازيا يبقى اكيد رواية بعد ساعات العمل الرسمية هتكون اختيار كويس ليك❤️

مكان الرواية في معرض الكتاب: دار الرسم بالكلمات صالة ٢ جناح B13

[Mo Fathy · Rating 5 out of 5]

من غير ما اقرأ هتبقى تحفة ❤️❤️❤️❤️

[Yahia · Rating 3 out of 5]

الصراحة الرواية حلو مش هنكر ده بس النهاية هي اللي قليلة التقيم عموما استاذ عبدالرحمن حجاج دايما بيبهرني
بي العالم بتاع الرواية بس بصراحه الرواية دي متعلقتش بي وله شخصيه من الشخصيات اتمني الرواية القادمه تكون احسن انشاء الله💗

[Habiba · Rating 3 out of 5]

رواية فانتازيا خفيفة ولطيفة تنفع فاصل بين الكتب الكبيرة ،،
النهاية ممتازة بصراحه والحبكة حلوه جداً والسرد والاسلوب كان مختلف كأن حجاج بيفرد عضلاته وبيثبت مهارته ف الكتابة في الرواية دي بالذات 💕

طيب ليه 3 نجوم بس !!

عشان بداية الرواية كانت هادية اوي بشكل مبالغ فيه وده محبتوش اوي بصراحه ..

[چُونْير · Rating 3 out of 5]

توقعت افضل من كدة

[ALI OSAMA · Rating 4 out of 5]

الرواية تحفة، والنهاية مرضية جدًا وبتقفل الأحداث بشكل كويس، وفي نفس الوقت تسيب احتمال جزء تاني من غير ما تبقى ناقصة. السبب الوحيد اللي خلاني أديها 4/5 هو إن في تفاصيل كانت زيادة عن اللزوم، سواء عن حياة البطلة أو عن القصر نفسه، وكنت شايف إن الإيقاع كان هيبقى أقوى لو اتشد شوية. غير كده، تجربة ممتعة جدًا، ومش هتكون آخر مرة أقرأ للكاتب ❤️‍🔥

[Haneen tharwat · Rating 2 out of 5]

للاسف كنت جايبه الرواية و عندي ليها توقعات كبيرة لكن خيبت ظني

[Yasmin Ali · Rating 3 out of 5]

📚رواية بعد ساعات العمل الرسمية

🖋️للكاتب :- عبدالرحمن حجاج

تدور أحداث الرواية حول فتاة تدعى سجى تعد من وجهة نظرها أنها ربما الأسوأ حظًا بالحياة ، فهى مصابة بمرض جعلها رفيقة الظل بينما رحبت بها الحياة من خلال حادث أفقدها ماضيها و قد نالت ما تبقى من رحب الحياة و السعى حينما أوقعها القدر بمملكة شعيب باشا رضوان مؤنسة له بوحده ..

أدركتها الوحدة بهدوئها المرعب إلى أن أصبحت تذهب كل يوم إلى مكتبة القصر لتكمل جزءًا جديد من حكاية غامضة بعد ساعات عملها الرسمية

🖋️الحبكة

الحبكة من نوع بطيء الأشتعال slow burn و على الرغم من أنها حبكة مناسبة مع أحداث الرواية إلا أن بها بعض الخلال بسبب أنني أدركت الوقت الذي بدأ به تصاعد الأحداث مما يدل على إخفاق الحبكة بشكل متباين

🖇️السرد
السرد كان مزيج بين أسلوب الراوي العليم و الراوي المتكلم
حقيقةً أسلوب سرد الرواي العليم كان أسلوب أكثر من رائع و هو أسلوب يتميز به الكاتب بشكل رائع

،أما عن أسلوب الراوي المتكلم للأسف شعري فيه بالإطالة المتباينة بالوصف.. متفاهمة أن الكاتب أراد أن نغوص بنفسية البطلة لنرى الأحداث من خلالها و لكن الأمر ببعض الأحيان كان مبالغًا فيه

🖋️اللغة

في الحقيقة يوجد تطور ملحوظ في لغويات الكاتب مما يدل على نضج الكاتب من الناحية الأدبية لأستخدام ��فردات اللغة بشكل واضح و مميز مما يجعلني أشكره على تلك النقطة

🖇️ملخص

الفكرة مختلفة و مميزة و لكن يوجد بعد الإخفاقات الأدبية من ناحية الحبكة و السرد ، في النهايةلقد أستمتعت بتلك الرحلة الغريبة الممتلئة بالمشاعر كعادة الكاتب عبدالرحمن حجاج

🖋️ غلاف الرواية من أقوى مميزات الرواية أحب أن أشيد بجمال تلك اللوحة الرائعة..

تقييم
3/5⭐️

[Mohamed Shawara · Rating 5 out of 5]

بعد ساعات العمل الرسمية

ليست مرتي الأولى مع الكاتب "عبد الرحمن حجاج" - فقد قرأت له رواياته "حاوي" والتي أعجبتني فأسلوبه ولغته سلسة والقصة كانت جميلة وأفكارها جديدة! وها أنا ذا مع رواية جديدة اشتريتها من معرض الكتاب في القاهرة ٢٠٢٦.

و تتمحور أحداث الرواية حول شخصية “سجى”، وهي امرأة شابة تحاول لملمة شتات نفسها بعد خروجها من علاقة عاطفية سامة ومدمرة مع رجل يدعى “موسى”. هذه العلاقة تركت في نفس سجى ندوباً عميقة جعلتها تشعر بأنها ضحية دائمة للظروف والأشخاص.

في محاولة للهرب من ماضيها وبدء حياة جديدة، تقبل سجى عرض عمل غامضاً كجليسة لرجل مسن وثري يدعى “شعيب باشا رضوان” في مدينة أسيوط. ينتقل العمل بـ"سجى" إلى قصر "شعيب" باشا، وهو مكان مهيب يكتنفه الغموض، مليء باللوحات الفنية النادرة والتحف التي يبدو أن لكل منها قصة خاصة. ومع مرور الوقت، تكتشف "سجى" أن العمل “بعد ساعات العمل الرسمية” يحمل في طياته أسراراً تتجاوز مجرد رعاية رجل مسن، لتدخل في دوامة من الأحداث المشوقة التي تضعها وجهاً لوجه مع مخاوفها وماضيها!

عندي تعليق على أسماء الأبطال ونصيحة للمؤلفين في العموم: حاولوا تختاروا أسماء غير متقاربة لأبطال رواياتكم: شعيب و شفيق اسمان متقاربان وبيلخبطوا القاريء العجوز اللي زي حالاتي !

وعندي تعليق لدور النشر - ارجو وضع الأسماء بين علامات التنصيص "" - الكاتب هنا استخدم اسم "كراوية" فعدم وضعه بين علامات تنصيص يصبح - كراوية - وهو ما جعلني اعتقد في البداية ان هناك خطأ مطبعي وان الكلمة "كرواية" او شيء من هذا القبيل!

قرأتها ورقي وغير موجودة على "أبجد"

#فريديات
#قراءات_معرض_الكتاب_٢٠٢٦

[Basem Mohammed · Rating 5 out of 5]

تفتكر ايه الي بيميز اي رسام عن غيره؟
طب ايه الي يميز شعيب رضوان عن غيره من الرسامين
شعيب رضوان بيرسم الروح مش الجسد ،بيرسم المعانة ،بيرسم روحك عشان يستحوز عليها

تجربة جديده بقلم استاذ عبدالرحمن حجاج
الكاتب ده مهما بكلم عنه بحس اني مدتلوش حقه بالكلام ،كتب رمانسي و كان تحفة ، رعب نفسي و تحفة برضو ،جريمة و برضو كان تحفة ،لما دلوقتي يكتب فانتازيا و يطلعلنا حاجه بمستوي عالي زي ده ،ساعتها يخليني اقراء ليه اي حاجه ينزلها و انا مغمض حتي لو معرفش قصتها ،لان قلم استاذ حجاج اكيد مميز زي فرشة شعيب رضوان كده 💙🖐🏻
الرواية ممتازة جدآ،في تطور ملحوظ في سرد و كتابة استاذ حجاج 💙⭐و بناء الشخصيات واقعي جدآ كانك بتسمع قصه حصلت فعلآ💙و أنه يحكي عن ناس في مدن الصعيد دي كانت لافته حلوه من استاذ حجاج أنهم في قلوبنا ديمآ و مش مهمشين أو منسيين💙⭐
كا خاتمة اقدر اقول ان الروايه دي بقت من اقرب الروايات لقلبي و بقت من السكان الأصليين لقلبي💙⭐

[Youmna · Rating 3 out of 5]

حسب معرفتي اول حد اتكلم عن لعنة اللوحات كان في قصة صورة دوريان جراي للكاتب اوسكار وايلد وبعدها لافكرافت في قصته نموذج بيكمان
صورة دوريان جراي اقتبسوها في مسلسلات وافلام كتير اشهرهم بالنسبه لي مسلسل penny dreadful
وبالنسبة لقصة نموذج بيكمان فاخر حاجه شفتها تم استخدامها في حلقة من حلقات مسلسل خزنة العجائب غييرمو ديل تورو
فالفكره حلوه وبيتم تطوريها واستخدامها الكاتب هنا عمل ميكس كويس بين الفكرتين ومش عارفه اذا كان قاصد ولا الافكار جت معاه كده
في كل الحالات الروايه كويسه كقرايه اول مره للكاتب.

[Mohamed Saeed · Rating 3 out of 5]

مش قادر أفهم ليه؟

لاحظت تطور أسلوب و سرد حجاج عن ثلاثية كوابيس و حاوي، فعلًا تطور كبير و ملحوظ.

بس اللي معجبنيش التفاصيل الكتيرة، فيه حشو و تفاصيل في مشاهد القصر أو اللوحات أو حتى مشاعر الشخصيات، الرواية 225 صفحة، من غير التفاصيل الكتيرة كان ممكن تخلص على 180 أو 190 صفحة..

نيجي بقا للنهاية!!!

ليه النهاية دي؟!

بجد؟! بعد كل اللي حصل مع سجى و كل اللي شافته و عاشته من معاناة أو خوف و قلق، تقرر تكون مكانه؟ بالسهولة دي؟ مع العِلم إن طول أحداث الرواية ماشوفناش منها أي رغبة و لو حتى بسيطة أنها تكون في مكان النهاية!! نهاية غير موفقة الصراحة...

الرواية ككل حلوة، خفيفة...تستاهل نهائي3/5

[Maryam Amr · Rating 3 out of 5]

لغة الرواية سرد بالفصحى و الحوار بالعامية .
كانت ممتعة لاكن فيها اجزاء كتير ممكن تكون معقدة أو بتوه إلى حد ما ، النهاية كانت غير متوقعة و غير منطقية إلي حد ما ..
الجي حرق
كنت شايفه أن لو هي ماتت كان ده هيكون اكتر واقعيه و منطقية ولو هتكون عايشه زي ما كملت ف هتكون شخصية كويسه لان طالما هي في النهاية قررت تختار الحياه الأبدية و اللعنة ليه قتلت شعيب !!

[Dina hossam · Rating 1 out of 5]

معجبتنيش اوي بصراحة احبطتني كنت متحمسالها اوي اوي بس محستهاش يمكن مش ذوقي، بس النهايه كانت محمسه بصراحة واستمتعت بالنهاية و البلوت تويست، الكتاب جبته من معرض الكتاب بس جالي بصفح ناقصة و حاجة مش لطيفة بصراحة، حبيت حاوي اكتر اتمنى ينزلها جزء تاني قريب

[mickaa · Rating 5 out of 5]

بنسبالي الروايه شيقه جدا بس هي سرديه ف المش بيحب السرد الكتبر و بيحب الحوار اكتر مش هتعجبوا بس انا عجبتني جدا و خلصتها بسرعه لان السرد كان مشوق جدا و الاحداث كانت سريعه و مفيش مط خالص
نهايه حلوه و مخيفه مش متوقعه و عجبتني القافله جدا عيت في ص 162 😭

[Walaa Baz · Rating 3 out of 5]

بصراحة بعد حاوي روايتي المفضلة في 2025 حسيت دي اقل من توقعاتي بكثير طبعًا لا شك في الكاتب المبدع عبدالرحمن حجاج بس الرواية دي ما جات معايا يمكن عشان مو التصنيف اللي بحبه بس يعطيه العافية كانت رواية حلوه بس مو واو🙆‍♀️

[Mohamed Ehab · Rating 4 out of 5]

تقيمي للرواية 4.5/5 بسبب شخصية سجى

[Ämñä Ädël · Rating 4 out of 5]

حلوة بس المشكلة كانت في اخر كام صفحة
يعني ليه سجي بعد ما عملت ده كله و قضت علي اللعنة تتحول لشعيب جديد؟

[Mohammed Hassan · Rating 3 out of 5]

جيدة