الست تحية

by ماهر زهدي

من الظلم اختزال تاريخ الفنانة تحية كاريوكا في كونها مجرد راقصة أو ممثلة ناجحة فحسب، فهي واحدة من أبرز رموز الفن المصري التي تجاوز دورها حدود الشاشة و المسرح إلى فضاء أوسع من النضال الوطني و الإنساني. فقد جسّدت تحية نموذج الفنانة الواعية بدورها تجاه وطنها، مؤمنة بقيمة الفن كقوة ناعمة مؤثرة، و ممارسة لهذا الدور دون انتظار شهرة أو مقابل. نشأت تحية كاريوكا في زمن كانت فيه مصر تعيش مخاض الثورة، فكان التمرد و البحث عن الحرية جزءاً أصيلاً من تكوينها الشخصي و الفني. برعن في الرقص و التمثيل، وقدّمت مئات الأعمال السينمائية و المسرحية المتنوعة، كما ارتبط اسمها بالمسرح السياسي و الاجتماعي الجاد. و إلى جانب عطائها الفني، كان لها حضور وطني وإنساني بارز؛ دعمت قضايا التحرر، و وقفت إلى جانب زملائها الفنانين، وشاركت في العمل العام و النشاط السياسي، حتى دفعت ثمن مواقفها سجناً و نضالاً. لذلك تبقى تحية كاريوكا فنانة إستثنائية، و تاريخاً حياً يجمع ين الإبداع و الشجاعو و الانتماء للوطن.

334 pages, Paperback

First published January 1, 2026

Reviews

[Mina Habib · Rating 3 out of 5]

** في البداية خلينا نتكلم عن التصنيف بتاع العمل ده، واللي هو، زي ما مكتوب على غلافه، سيرة درامية.بمعنى أنها مش سيرة ذاتية بيكتبها شخص عن نفسه، ولا هي سيرة بيكتبها شخص عن آخر، ولكن هي سيرة مكتوبة في شكل درامي، بمعنى أدق ممكن نقول إن الأحداث اللي فيها حقيقية، والمفروض يكون ليها مراجع بتؤكد على ذلك، ولكن الحوار اللي بيدور بين الشخصيات، بعضه أو كله، هو من خيال الكاتب و تصوره عن الشخصيات دي و اللي ممكن يدور ما بينهم في لحظة زي دي علشان نخرج في الآخير بالنتيجة اللي المفرةض إن إحنا عارفينها و هعارفين إن الشخصيات وصلوا ليها.

** في ضوء اللي إحما كنا بنقوله ده، أقدر أقول إن الكاتب نجح في إنه يوصل لي صوت بعض الشخصيات، و أنا هنا أقصد المعنى بشكل شبه حرفي، في اكتر من شخصية في العمل ده كنت بقرأ الجمل الحوارية المكتوبة ليهم و كأني سامعهم بيقولوها بصوتهم وأدائهم، وعلى رأسهم طبعاً الشخصية الرئيسية في العمل تحية كاريوكا، ولكن كمان حسيت بنفس الإحساس مع جمل سليمان نجيب و جمل نجيب الريحاني. و بالرغم من كده في بعض الشخصيا ت بالرغم من شهرتها وتميز طريقتها في الكلام إلا إن الحوار المكتوب ماوصليش صوتهم، زي مثلاً شخصية رشدي أباظة اللي ماوصلنيش منه أي شيء يحسسني بإن جمله دي مايقولهاش غير رشدي أباظة. و كمان شخصية إسماعيل ياسين اللي ما فيش شك إنه مميز و الكاتب كمان حاول يستخدم بعض من طريقة كوميديا إسماعيل ياسين و لكنه في الآخر لم ينجح في إنه يوصل إحساس إسماعيل ياسين، وللآسف ماحسيتش في حواراته زي بعض الشخصيات الأخرى إني قادر اسمع الجمل الحوارية دي بصوته و طريقته.

** واحدة من أهم مميزات كتب السيرة و بالذات السيرة الذاتية هي تعبير صاحب السيرة دي عن مشاعره و أفكاره زي ما كان حاسسهم بالضبط، أو زي ما هو كان متخيل إنه حساسهم في وقتها. طبعاً في كتب السيرة اللي بيكتبها شخص عن شخص آخر، بمعنى إن اللي بيكتب بيكون مش أكتر من كاتب محترف الغرض من وجوده هو الصياغة، بيقدر صاحب السيرة إنه يراجع اللي اتكتب ويقول رأيه في إذا كان شايف ده بيعبر عنه كفاية أو لاء. في الكتاب اللي احنا بنقرأه ده ظهرت بقى مشكلة أخرى و هي إن الشخصية الرئيسية تقريباً ما بتتكلمش عن مشاعرها على الإطلاق، ماكنش فيه المساحة قدام الشخصية دي إننا نسمع ونفهم منها هي ما تشعر به، لا بكلماتها ولا بكلمات محترف صايغها عنا، و في هذا العمل و بالرغم من محاولة الكاتب إنه يصف مشاعر الشخصية الرئيسية إلا إني مع إنتهائي من قراءة العمل حسيت إني مش وصلاني مشاعر كافية من هذه الشخصية، أو على الأقل حسيت إن وصف المشاعر لم يكن كافي علشان يخليني أوصل لنفس إحساس الشخصية.

** ننتقل بعد كده لفكرة أخرى، والفكرة دي ظهرت من الفصول الأولى للكتاب و أتكررت أكتر من مرة في أكتر من موقف على مدار الكتاب. و الفكرة دي هي الشعور بالانفصال ما بين الواقع كما يتخيله الكاتب و بين الواقع اللي تقريباً كلنا عارفينه في الفترة الزمنية اللي بيغطيها الكاتب واللي بتمثل حياة الشخصية الرئيسية في العمل. أعتقد في النقطة دي الأمثلة هتبقى أوضح و هتساعد أكتر في توصيل الفكرة اللي بقصدها.

** المثال الأول و بيتمثل في محاولة الكاتب إقناع القارئ إن في هذا الوقت من التاريخ المصري والمجتمع المحافظ كان بيتم تقدير الرقص والراقصات. والحقيقة أعتقد إن ده لم يكن يمت للحقيقة بصلة، بداية مما رواه الكاتب بنفسه في العمل عن قطيعة أهلها ليها، مروراً ببقى باللي احنا كلنا نعرفه عن احترام مهنة الراقصة وعدم النظر ليها بشكل سيء أو اعتبار الرقص فن، واللي بتعتبر مفاهيم جديدة و مستحدثة و يمكن ماظهرتش غير في وقت متأخر في مصر، وما أعتقدش إن بالوقت ده إحنا بنقصد عهد الملكية وما قبل ثورة 52.

** المثال الثاني و هو إزاي ما كنش فيه أي رد فعل أو أي تاثير على شكل علاقات تحية كاريوكا بمحيطيها بالرغم من كثرة الزواج و الطلاق في حياتها. أنا أعتقد إن في وقت بدايات تحية كاريوكا كان الرجالة بيتحاسبوا على فكرة كثرة الزواج و الطلاق – حتى لو كان المجتمع ذكوري متعفن – فما بالك بقى بواحدة ست تتزوج و تتطلق أكتر من 10 مرات. هل ده مظهر عادي و المجتمع والناس و المحيطين بالشخص ما يعلقوش عليه و لا يظهر منهو او عليهم أي رد فعل. الحقيقة شيء غريب، خاصة إن لغاية من وقت مش بعيد نسبياً و إحنا بنتكلم عن تسعينيات القرن العشرين و يمكن بعدها كمان، وفي بعض الأماكن والمناطق و المستويات المجتمعية، الطلاق في حد ذاته قرار مش سهل و لا يحبذ اللجوء إليه. و في مثل هذا الزمن، زمن أحداث العمل، أكيد الطلاق ماكنش شيء مستساغ أو مقبول إجتماعياً بالأخص مع تكراره هذا العدد من المرات. و أعتقد بردو إن المفاهيم الأقرب طانت الحفاظ على البيت والأسرة، وخوف الناس من لقب المطلقة اللي ممكن يلحق بالست.

** المثال الثالث و هو متعلق بردو بنقطة احترام مهنة الرقص، والمرة دي اللي هيرد على هذه النقطة وينفيها هو أحد أعمال تحية كاريوكا نفسها. و أنا هنا بتكلم عن فيلم خاي بالك من زوز، اللي بتظهر فيه تحية كاريوكا كراقصة معتزلة، و بتؤدي دور بنتها سعاد حسني الفتاة الجامعية، واللي أخفت عن الجميع إن والدتها راقصة، وخاصة عن الشاب اللي بتحبه اللي بيلعب دوره حسين فهمي، ولكن بتضطر في موقف ما إنها تكشف عن هذه الحقيقة قدامه وقدام كل زمالها في الجامعة و تواجه عدم تقبلهم ايها ونظرتهم اللي اختلفت ليها. أعتقد إن قصة الفيلم نفسه بترد على الفكرة اللي الكاتب كان بيطرحها ضمنياً في الكتاب عن احترام الراقصة و مهنة الراقصة، وإلا ماكنتش تحية كاريوكا بنفسها وافقت على الفيلم و شاركت فيه علشان تطرح مشكلة مش بس كانت في العشرينيات والأربعينيات ولكنها كملت لغاية السبعينيات وقت صدور الفيلم.

** بالنسبة لي أنا كانت معلومة جديدة علاقة القرابة ما بين الفنانة رجاء الجداوي و بين تحية كاريوكا، ولكن أكتشفت إن دي حاجة كانت معروفة و مشهورة لدرجة إن والدتي عارفة معلومة زي دي.

** أما بقى بخصوص الدور الوطني لتحية كاريوكا فأنا ماكنتش أعرف عنه أي تفاصيل ولكن من خلال العمل ده عرفت عنه كمية معلومات جيدة.