Krabbaveislan

by Hlynur Níels Grímsson

Sjúkur læknir í sjúku samfélagi. Er hann rétti maðurinn til að fást við hinn allra erfiðasta sjúkdóm? Hvað hefur hann að gefa sjúklingum sínum? Og hvað sér hann þegar horfir sjálfur í spegil? Hlynur Níels Grímsson ætlaði að verða rithöfundur þegar hann var ungur maður en ákvað svo að vera praktískur og fara í læknisfræði. Nú stenst hann ekki mátið lengur og sendir frá sér skáldsögu þar sem reynsla hans sem læknir er í forgrunni. Enginn mun líta heilbrigðiskerfið sama auga eftir að hafa lesið Krabbaveisluna. Langt er síðan nýr höfundur hefur kvatt sér hljóðs með jafn hárbeittri og nístandi rannsókn á samfélagi sínu og Hlynur Níels gerir í þessari bók. Um leið er Krabbaveislan hrífandi skáldverk þar sem húmor og jafnvel fegurð bregður einnig fyrir í smásjá höfundar.

227 pages, Paperback

First published March 1, 2015

Reviews

[Ómar Sigurvin · Rating 5 out of 5]

Framúrskarandi ádeila á sjúkt heilbrigðiskerfi. Ætti í raun að vera skyldulesning fyrir alla sem starfa innan þess og einkum og sér í lagi stjórnendurna þar. Ljóðrænn, skemmtilegur frásagnarstíll. Á köflum minnir ádeilan á House of God eftir Samuel Shem og er alls ekki leiðum að líkjast.
Hlakka mikið til að lesa meira eftir höfundinn!

[Jóhannes Kári · Rating 4 out of 5]

Hlynur Níels Grímsson kemur hér fram með sína fyrstu bók. Hlynur skrifar af miklum þrótti og sýnir mikla ritsnilli, ekki síst í ljósi þess að hér er um fyrsta verk höfundar að ræða. Það er greinilegt að reynsla höfundar sem krabbameinslæknis leiðir mann inn í heim sem fáir þekkja, veröld læknisins í stórum og oft á tíðum ómanneskjulegum spítala. Inn í þetta fléttast sjúkt þjóðfélag fyrir kreppu, framagirni, svik og launráð, einelti og framhjáhald. Hlynur skrifar oft óræðan texta og mjög ljóðrænan á köflum. Hann er oft harðneskjulegur, dómur um læknastéttina í Þjóðarsjúkrahúsinu er harður og óvæginn. Söguhetjan fetar ekki þann veg sem ætlast er til af ungum og metnaðargjörnum lækni og endar því á skjön við læknasamfélagið þegar miðjum aldri hefur verið náð. Augljóslega er oft fært í stílinn í bókinni en Hlynur hefur kunnáttu til að ganga ekki of langt og heldur sig oftast innan markanna. Eina ástæðan fyrir fjórum stjörnum í stað fimm er einfaldlega fjöldi stafsetningavillna í bókinni, sem lýtir góða bók. Þetta verður að skrifast á forlagið, þar sem einfalt villuleitarforrit hefði náð flestum villunum.