ليلة غرق الإسكندرية

by محمد أشرف فؤاد

إن هي إلا سويعات قليلة وتأتي تلك اللحظة المرتقبة والحاسمة التي يتحدث عنها العالم أجمع..
ترى ما الذي سوف يحدث في هذه الليلة؟
هل ستغرق الإسكندرية بالفعل؟
ترى ما هو المصير الذي ينتظر كل هؤلاء؟
هل ستتبدد كل أحلامهم وطموحاتهم وخططهم ؟ هل يستسلمون للموت أم أنهم سيصارعونه حتى اللحظة الأخيرة؟
فلنذهب معًا إلى هناك، إلى شاطئ البحر المتوسط، ونشاهد بأعيننا.

255 pages, Paperback

First published January 25, 2025

Reviews

[Donia Darwish]

🚨 عاجل ‼️
أجزاء من جبال الثلج في القطب الشمالي بدأت في الإنصهار
ارتفاع منسوب المياه في البحار والمحيطات
التأثير بدأ يظهر على بعض المدن الساحلية
واسكتدرية من المدن المهددة بالغرق فى غضون أيام إن لم تكن ساعات
التحرك السريع للإجلاء وضرورة الاستعداد
والبعد بقدر المستطاع عن الشواطىء
وسنوافيكم بأهم الأخبار والمستجدات..

شريط الأخبار فى كل القنوات بيعلن عن استنفار أجهزة الدولة ومحاولاتها لتدارك الكارثة..
وما بين اشاعة ولا حقيقة
بدأ يتعامل سكان المدينة الساحلية على هذا الأساس
فيه اللى اعتصموا أمام الكورنيش
وقالوا ده كلام فاضى وتهريج
مش هنسيب بيوتنا وحياتنا
ده أكيد مقلب من الحكومة وعايزة تقلبنا فى مدينتنا
وفيه اللى صدق ولم حاجاته المهمة واخد عياله فى ايده وقالك بينا على اابديل اهو نلحق حاجة بدل ما نضيع..
وده كان برضه الحال مع الحكومة بين مصدقة كلام هيئة الأرصاد وبين بتشكك وتقول اشاعات
اصل ازاى هنخلى مدينة كاملة فى خلال ساعات ونوفر كمان بديل
طيب والهيئات هنعمل فيها ايه
طيب هنقطع كهرباء ⚡️ ولا ايه
حاجات كتير مطلوبة للتنفيذ
ومش عارفين نبدأ من فين ولا ايه
ولو اتعاملنا مع الخبر باستهتار هتبقى كارثة وهنروح كلنا في الطوفان…
لازم ناخد احتياطتنا فى كل الأحوال

رواية أحداثها بتدور فى يوم الخبر المشئوم اللى ظهر فى التلفزيون
وعمل بلبلة بين سكان المدينة
كل شخصية فى الرواية استقبالها للخبر كان ازاى واستعدادها كمان
فيهم اللى لقى أنها فرصة لبداية جديدة
وفيه اللى شافها فرصة للهروب من الضغوط
واللى هياخده فرصة لترند جديد
حيوات لناس بخلفيات مختلفة وأسرار مدفونة وكلام مكتوم وطبعا بما أنه آخر يوم قبل حلول الموج كل واحد فيهم هيبوح ماهو مابقاش له لازمة السكوت…
المهم بقى تفتكروا الخبر هيبقى حقيقي ولا fake 🤷‍♀️❓
ولو أنت مكان سكان المدينة تفتكر هتعمل ايه
هتسيب المدينة اللى اتربيت فيها وتروح لسكن بديل
ولا هتواجه الأمواج وتسيب بيتك وراك بالذكريات..
هى رواية أحداثها في يوم صحيح لكن اخدتنا لفة فى حيوات شخصيات عدوا بالكتير فيهم اللى كان سعيد وراضى باللى ربنا كتبه له وفيهم اللى لسه بيرسموا فى أحلامهم وبيحطوا خطط لمستقبلهم
واللى الضغط والمسؤوليات قضيت على عمره
واللى الفقر اضطرهم يلغوا كرامتهم وشرفهم
وغيرهم كتير…
الرواية مكتوبة بلغة بسيطة وسلسلة 👌 وده أنا حسيته عمل توازن يخفف من توتر الكارثة.. واده الرواية طابع اجتماعي بدل ما يبقى سوداوي 😊

#ليلة_غرق_الإسكندرية
#محمد_أشرف_فؤاد
#روايات_مصرية_للجيب
#مكتبة_دنيا
#قراءات_٢٠٢٦