زي الأفلام

by محمد إبراهيم

"يا وطن بطبعه غريب . . من إمتى أنا بفهمك ؟

كان السمك رزقنا . . وبقينا رزق السمك"

كتابٌ مُقسم إلى خمسة أجزاء "عارف يا رب-السنة 11 شهر- العيال كبرت- شاهد شاف كل حاجة- من هنا لآخر ديسمبر"

يلقي محمد إبراهيم بصوته ديوانه الذي يناقش فيه ما يشغل بال الشباب في الوقت الحالي،

مثل ما يواجهونها من مشكلات مع المجتمع، وما يخبؤونه من أفكار .

فاستمع الآن

Please This audiobook is in Arabic.

Genres: Poetry

192 pages, Paperback

First published January 1, 2016

About the author

Official Page: www.facebook.com/Page.Mohammed.Ibrahim

Reviews

[محمد الحويف · Rating 2 out of 5]

طيب ، كعادة دواوين العامية الريفيو بيكون بالعامية ، وعلي غير العادة في دواوين الشِعر عامًة مش هكتفي بشعر من الديوان.

حد يختلف إن محمد إبراهيم عنده الموهبة ؟ لا . . حد يختلف إذا كان بيستغلها صح ولا غلط ؟ أه


يا وطن بطبعه غريب . . من إمتي أنا بفهمك ؟
كان السمك رزقنا . . وبقينا رزق السمك

الجملة دي من الديوان دا ، والجملة دي مايكتبهاش غير واحد عنده الموهبة . . طيب المُشكلة فين ؟ المُشكلة لما تكتب للناس . . مش للشِعر.

الديوان متقسم أجزاء ، أضعفهم - شعريًا - الأول ، أضعفهم - فكريًا - التاني ، أحسنهم الجزء الأخير ، يمكن هو سبب النجمة التانية.


الناس فانية يا محمد . . الشعر هو اللي بيعيش . . لو كتبت للناس شِعرك هيفني معاهم ، ومحدش هيفتكرك بحاجة بعد كدا.

[Osama Elhady · Rating 5 out of 5]

أنا زي كل مرة كنت عايز اعمل التقييم 4/5 عشان محدش يقولي بتدي لصاحبك 5.. المره دي معرفتش لان الديوان يستاهل 5 بصراحة محمد بيعرف كل مرة يجدد وعاجبني ف انه عارف هو مين هيقرا ولسه محتفظ بكينونه محمد ابراهيم الشاعر وماتهش وسط الارقام الكبيره في الدواوين
دمت فخرا لنا.. ارشحلك الديوان ده لو حابب تتبسط وتحب وتزعل وتستغرب ف نفس الوقت

[Eslam Sami · Rating 2 out of 5]

احنا نستاهل عقابنا
والظروف طلعت بريئة
احنا بعنا لبعض بعض
ماكانش م اللازم نبيع
ف الطبيعي ان احنا لما
نفترق نبدأ نضيع
الغريبة أنا لسه واقف
والحياة وقفت عليكي
وانتي عايشة الدنيا عادي
جنب واحد مش أنا
وانهارده بدأت أصدق
اني سايبك من سنة

[إسلام خالد]

ولا نجمة
صــــــــــــــفـــــــر

[Shahd Mabrouk · Rating 4 out of 5]

الأشعار اللى فيه أثرت فيا جدا ..وعيط كتير اوي
برغم ان دي اول تجربة شعرية ليا لكن كانت تجربة ممتعة ، حبيتها جدا وفيها قصائد معينه برجع اقرأها تاني لوحدها ، حلوه فعلا 🌹
،،،
انا احيي محمد ابراهيم دي اول تجربة معاه ولن تكون الاخيرة طبعا💜
______________

"عارف يا رب..
انا كنت زمان فاكر اني ..
ممكن لما اكبر ابقى احسن !
وبقيت لما اكبر باحزن
مع اني بقيت ويايا فلوس
هتكفي اجيب كيس شبسي كبير
وتفيض واجيب بالباقي عصير
ولوليتا ودولسي وجيلي كولا !
مأساتي مبقتش دروس ..
ولا واجب عربي ف سنة أولى
ولا عجلة مع اصحابي اركبها
ولا لعبة ف اعلان هاكسبها
ولا حاجة اعيط بسببها
او علقة هاخدها اما اتأخر
انا بتعب اوي لما بفكر!!!
......
_____________

البنت أن سكتت ف ده معناه
انها من جوا بتتألم
البنت بتبدأ ف المعاناة
اول ما تبطل تتكلم
البنت بطبيعتها بتسكت
اول ما بتعمل من حاجة
مين فينا ماقلش ف يوم "مالك"
وحبيبته قالت له مفيش حاجه
اول ما تحس انها ساكته
أسأل نفسك قبل سؤلها
وقت ما هتراجع حساباتك
ممكن جدا تعرف مالها

______________
كان راجل طيب وقريب من كل الناس
كان راجل طيب بس خلاص
يصعب ع الكافر يا جماعه
من كتر ما يومه ويتكرر
مبقاش بيركز ف الساعة
مقطوع من شجرة
ابنة إللى مسافر برا
او بنته اللي اصلا بيشوفها
ف الشهر أساسا كام مرة
ومراته اللي السرطان خدها
من ايده ف ظرف ٣ ايام
بقى أقصى طموحاته يشوفها
او ما يخش الأوضة ينام
والكرسي الهزاز والقعدة وكباية الشاي
الراجل من كتر الوحدة بقى شبه الناي
حضارتنا خلاص مبقتش تشوف
عكازه كمان مبقاش واحده
قاعد يتفرج ع الدنيا
ويشوف العالم من عنده
ولا حد أساسا بيزوره
وكأن حياته خلاص خلصت
وانتهى بالنسبة لهم دوره
كان راجل طيب لكن كان
فيه حد اتبقى معاه؟!لأه
اهو عاش طول عمره عشان غيره
واهو مات من وحدته ف الشقة...

_____________

انتي المختلفة الشفافة
الانثي الغامضة المتشافه
الطفلة الهادية الخوافة
والشيء الحلو إللى حصلي
انتي المتواضعه المغرورة
الساذجه الواثقة المكسورة
ابليس لو شافلك يوم صورة
يستغفر ربنا ويصلي
،،،،،،،،،،
💜🌹

[عبيرجمال الدين · Rating 3 out of 5]

جميل

[Amany Galada · Rating 3 out of 5]

مخلوقه من ضحك وبُكا ..
جواها زحمه و دربّكه
وهدوء و حيره و نرفزه
جواها طفله معجّزه ..
جواها خوف من كل شئ
جواها شئ حلو إنكسّر
من جرح كان سايب أثر
جواها شك فـ كل حاجه
وكل حد و لخبطه !
تبكى لحد ما ضحكها بيعلى
تضحك فـ وقت
ما تبقى لسه معيطه
بنت على هئية " كرامه"
و ماده خام للكبرياء
بنت نتجت عن تصادم
كوكبين حُزن و فُراق🍃 .

[Hala Salah · Rating 1 out of 5]

قرأت كذا قصيدة و مش هكدب و اقول ان انا اكملته لكن انا حسيت ان محمد ابراهيم لقى نفسه فاضي فقال لما اروح اكتب شوية شعر بقى
#ارحمونا

[M. Ashraf · Rating 2 out of 5]

كشعر عامي
مش بطال
أهو أي كلام على نفس الوزن
في شوية ورق و بقى ديوان
حاجات كتير أوفر على نحنحة
من 190 صفحة
في قول 5 صفحات حلوين

[Sameh Ebrahim · Rating 4 out of 5]

ديوان ل محمد إبراهيم سمعت عنه كثيرا واول ماوجدته قرأته وعجبني اسلوبه جدا وهو بارع جدا في طريقته واسلوبه وتشبيهاته واختياراته
الديوان مقسم على بعض الاقسام
اولا قسم بيكلم فيه ربنا بعنوان عارف
ثانيا قسم اسمه رسايل م السما السابعة ويتحدث فيه باكتر من قصيدة عن ناس ماتت في حياتهويصفهم ويصف شعوره بدونهم وهذا القسم ابكاني
ثالثا قسم رومانسي ويضم بعض القصائد مثل علاقة فريدة& 3 جوابات & مطلوب حبيب & العيال كبرت &غمض عينك &مجرد حضن لدقيقتين &على قد الحضن
رابعا قسم يتحدث فيه عن البنات وصفاتهم ومشاعرهم وطريقتهم واسلوبهم بعنوان (( الم روج )) وهو يضم 12 قصيدة وكذلك هناك قصائد خلال الديوان بعد ذلك كذلك تتحدث عن نفس الموضوع مثل بتحلوي & بنت من ثلاث حروف
خامسا قسم يتحدث عن فراق ومشاعر نهاية قصة حب مقل ( اسكندرية ليه & محاولة انتحار فاشلة & 14 فبراير &قصيدسايد ايفيك
side effect
وهناك بعض القصائد تتحدث عن العلاقات مثل مجرد صاحبتك & طرف ثالث & مش لعبة
سادسا قسم يتحدث عن مواضيع سياسية بالاحرى عن مصر وهي ( أول ليالي المعتقل & هي & الغول ) وجزء اخر عن سوريا ( بعنوان صندوق اسود )

في النهاية بعض الاقتباسات من الديوان
**1**رسايل من السما السابعة ( 7 قصائد عجبوني جدا
**2** 3 جوابا

**3**

عيون البنت كتالوجها
فحاول بالحنان تقراه
مفيش انسانة في الدنيا
هتديك حب بالإكراه
سهولة الامرة وصعوبته
في إن ازاي تريحها
هتكسرها هتخسرها
هتجرح لما تجرحها
لإن الفكرة في التقدير
وفي الحضن الي ليه تأثير
لان البنت لغز كبير
أمان البنت مفتاحها

**4**
كأنك حرف (ح ) تايه
لقى نفسه بيحضن (ب
وجات (ب ) تانية قبليها
تزيد طعم الجنون فيها
فـ ننسى نخاف
عشان اللمة دي تكمل
كسرت الـ (ب ) باحساسي
وشديتها وحطيت كاف

**5**
بتحبك واحدة مابتقولكش
بتحب ف واحدة ومش بتقول
وعشان خايفين ننطق نخسر
بنحب ونسكت كدا على طول
الدنيا عشان ملهاش قاعدة
بتغير دايما تفكيرك
فيه حاجات لو اتكسرت
عمر الايام ماتصلحها
قلبك مفتاحه فـ إيد واحدة
مقتاح قلبها في ايدين غيرك
غيرك مفتاح قلبه اساسا
مع واحدة سابت لك مفتاحها

**6**
مش عايز حد يقول احكي
عشان فعلا مش لاقي كلام
ولاعايز حد يقول مالك
علشان هكدب وهرد تمام
كلنا من جوا اتعورنا
وكبرنا وتهنا وكشرنا
مع ذلك بنبان في صورنا
اننا عايشين اسعد ايام

**7**
بتحلوي وطول الوقت بتزيدي
جمال وهدوء
كأنك شيء نزل من فوق
كأنك جاية من الجنة
ياما الجنة هي انتي
في حضنك ببقى انا ابنك
في حضني بقلبي بنتي

وفيه حاجة لفتت نظري في الديوان (( محمد ابراهيم بيوصف البنت كويس جدا وكانه عارف كل تفاصيلها وتصرفاتها واسلوبها
وطريقة تفكيرها ومفتاحها زي ماهو قال في الديوان والغريب انك تلاقي راجل عارف كل دا عن البنات بادق التفاصيل كدا
ثانيا اسلوبه وطريقة وصفه للتجارب الي مر بيها بديع بيدخلك معاه جوة نفس الحالة وانت بتقرأ القصيدة

برافو محمد ابراهيم وبالتوفيق دائما والى الامام

ومبسوط اوي انك قرأتك الديوان

[Emy Emy]

مش غريبه انى هديلو خمس نجوم ده انا مش بفوت ايفنت فيه محمد ابراهيم يعنى
يمكن الديوان دا مش زى فلوماستر ابيض لكن يبقى محمد ابراهيم هو الشاعر الاول بالنسبالى بعد عمنا احمد فؤاد نجم
شابووووه يا محمد وربنا يوفقك مع ايه ويسعدكو :)

[لطيفة القارئة · Rating 2 out of 5]

جميل..
سبحان الله ..في خضم حديث ثنائي تذكرت خالي الذي غادرنا بطريقة عنيفة
بكيت
ومباشرة بعدها بدقائق قليلة حين عودتي للقراءة وجدتني في فقرته
عن خاله الرائع..الذي مات أيضاً.
وفقرة عن الشريك..الطرف الآخر من التي تحبك فقرة 3 جوابات-
أعجبتني

[Aya Abed · Rating 3 out of 5]

اتاخرت في شرا الديوان ده لانه اتقال انه وحش اشنربته عشان انا بحب محمد وربنا يحبب فيه خلقه
المختصر الديوان فيه حاجه حلوه
ما زال في محمد حاجه حلوه فكبرها عشان اعرف ادافع عنك بكامل قوتي لاني مبقتش بعرف أرد علي حد بينقضك

[Hadr Hossam · Rating 5 out of 5]

كل سنه بقول انك مش هتعمل احسن من كدة وبتخيب ظني وبتعمل حاجه احسن واحسن بس الديوان السنادي فعلا حاجه كدة "زى الافلام" ✌.. مبروك يا صديقي ومن نجاح لنجاح دايماً يارب

[Ahmed Safian · Rating 1 out of 5]

أول مرة أقرا شعر عامي، حاولت أكمله رغماً عن نفسي، وظننت لوهلة أن المشكللة قاطنة بي، ولكن العديد يتفق معي

[Ahmed BenArfa · Rating 2 out of 5]

يا وطن بطبعه غريب . . من إمتي أنا بفهمك ؟
كان السمك رزقنا . . وبقينا رزق السمك

اللي عجبتني في الديوان وشكراً

[Draziza Ali · Rating 2 out of 5]

قلبك مافيهوش حيل يتكلم..
روحك مافيهاش حتة سليمة

اقتباس من النص ... و ان كان النص ضعيف

[سهيلة رمضان · Rating 3 out of 5]

لطيف، حبيت بعض الأجزاء، منها دول:
أعوذ بالله من الغباء في الحب والحب لو كان من طرف فردي"
والحلم لو كان لونه مش وردي"
*******
"عارف يا رب..
أنا كنت زمان فاكر إني ..
ممكن لما أكبر أبقى أحسن
وبقيت لما أكبر بحزن
مع إني بقيت ويايا فلوس
هتكفي أجيب كيس شيبسي كبير
وتفيض وأجيب بالباقي عصير
ولوليتا ودولسي وجيلي كولا
مأساتي مبقتش دروس ..
ولا واجب عربي ف سنة أولى
ولا عجلة مع أصحابي أركبها
ولا لعبة ف إعلان هاكسبها
ولا حاجة أعيط بسببها
أو علقة هاخدها أما اتأخر
أنا بتعب أوي لما بفكر
“عارف يارب ..
انا لسّه مقولتش على كذا سِر
انا لسه مقولتش ولا حاجه
ولإن الطيبه ساعات بتعِر
بطّلت أفكر بسذاجه
بطلت أتعلق الماشيين
أو أحب يحبنى بنى آدمين
بطلت أعوز أصلا حاجه !”
******
محتاج لحد يكون أنا
يقسم معايا الدندنة
يقسم معايا الصبح والنوم و الكسل
ميكونش نقطة ضعف أو سم في عسل
يشراكني في دموع الفرح ضحك العذاب والصمت و اللوم و البكا
والاحتياج و النرفزة...
محتاج لحد يكمل يوم إتنين معاه.
محتاج حبيب لو سبته يقول انا مش هسيب .
مطلوب حبيب
مطلوب حبيب
مش مهم الماضي إيه
محتاج لحد أسند عليه
ويكون له حضن و بيت وإيد
يمكن يكون أملي الوحيد
مطلوب حبيب
********
عن البنت اللي لو مكانتش بنت كانت هتبقى أغنية...

[Asmaa Ewiese · Rating 4 out of 5]

كان أول ديوانًا أقوم بقرائته لشعرٍ عامي وقد لاامسني ذلك الحزن الدفين والشعور بالوحدة وكيفية تأثير ذلك الانفصال عليه بالسلب مما جعل الفضول يتملكني لمعرفة المزيد عن شخص مُحمد إبراهيم وحقًا لم أندم علي كل حرفٍ قُمت بقرائته له سواء كان ديوانًا او كتب سيرة ذاتية ومع المتابعة له عن كثبٍ بمواقع التواصل عرفت حقيقته لقد مر بالكثييييييير من الأمور السيئة ف حيااته والرفض والتنمر وإنعدام الثقة والنظرة الاحتقارية لشيئًا لم يكن من اختيارااه وتتوالي الايام عليه وتتوالي الصدماات ويُصبح الاكتئاب والحزن رفييق دربه ويظهر ذلك جليًا في كتاباته .
لكن هنااك شيئًا لا جدال فيه تستطيع ان تشعر بالاحساس المُراد إيصاله من كلماته ويُصيبك فعًلا دون الحاجة لإلقاءٍ صوتي لكي تشعر بالكلمات.
لا يجب ان تكون قد مررت بأذمة عاطفية لكي تشعر بالكلمات فعند قرأتك للشعر المُراد منه تمكن تلك الكلمات التي تقرأها أن تجعلك تشعر بنفس شعور الشااعر دون الإلزام بالمرور بنفس الظروف وهُنا تقع العبقرية بإن يؤثر بك الشاعر ببضع كلمات علي وزن وقافية (معظم الاحيان)بطرريقة سلسة تصل إليك.

[BLUE · Rating 4 out of 5]

محمد ابراهيم يعتبر شاعري المفضل بالعامية، قرأتله معظم الدواوين بتاعته واللي كانت لطيفة وجميلة، لكن الديوان ده مميز أوي أوي بالنسبالي، فيه معظم القصائد اللي بحبها، فيه ضحك وبكا وحزن في دربكة مشاعر

الديوان خطفني من القصيدة الأولى:
"التحيات لله
تسمح لي أحاول أتقرب؟
معلش سامحني بقالي كتير
في الدنيا مسافر متغرب..
مابعتتش ليك في السما جوابات
-الصلوات الطيبات-
والطيبات للطيبين
وف روحي نار مع إني طين
وف قلب رغم الضلمة ضي
-السلام عليك أيها النبي-
-ورحمة الله وبركاته-
أهلا بروح المصطفى وذاته
حضنك روشتة لأي قلب حزين
السلام علينا وعلى عباد الله الصالحين
اجعلنا منهم احنا واللي يقول امين"

قصيدة تخطف القلب والروح والله

[Hegazy Mohamed · Rating 3 out of 5]

ديوان أخر للشاعر الشاب محمد إبراهيم إبن المحلة الكبرى و جامعة طنطا و كلية تجارة إنجليزي ، الشاعر الشاب الذي يعمل على حراك فكري و ثقافي مصري معاصر في شعر العامية و إن كان أغلب شعره رومانسي لكن مع كامل إحترامي غالب عليه جانب رومانسيه المراهقة من وجهة نظري إلا أن ديوان زي الأفلام رغم غلبة الشعر الرومانسي فيه إلا أن به طرح للمشاعر العائلية و قصيدة خاصة بالثورة و الزوجة و الأب و الخال و الأم ، و موسيقى محمد إبراهيم الشعرية منضبطة إلا أن محمد إبراهيم بداخله ما هو أرقي و أعظم شعرياً إذا زاد إجتهاده و تطويره لذاته.
تحياتي و تمنياتي بقراءة ممتعة
حجازي بدر الدين

[Amira · Rating 2 out of 5]

كمصريين لنا تراث عريق في أغلب المجالات، تحديداً هنا في الشعر. فإذا أحد لديه موهبة الشعر فلابد أنه تأثر بالأبنودي أوأحمد فؤاد نجم أو رباعيات صلاح جاهين وبالتأكيد قرأنا في الإبتدائية بعض من أشعار أحمد شوقي وحافظ إبراهيم وغيرهم من العظماء. كيف ولدينا هذا الإرث من المواهب العملاقة أن يُكتب ديوان شعر بهذه السطحية والضعف إلى حد ما

[zahraa esmaile · Rating 3 out of 5]

#ماوراء_العالم
#قراءات_٢٠٢١
#زي_الأفلام
كتاب صوتي جديد...عودة ل محمد ابراهيم
ديوان لطيف...فيه قصائد لمست معايا جدآ
وقصائد كانت اطول من اللازم
ف المجمل ديوان متوسط...والقاء محمد ابراهيم رفعه معايا بصراحة
٣ نجوم منهم نجمة ل صوت الشاعر نفسه
انتهى الريفيو
#الكتاب_رقم٣١
#كتب_صوتية
#شعر
٣١/١٠٠
٤_مارس

[Sarah Daplat · Rating 4 out of 5]

أحياناً نحن أضعف من أني نحكي عن شي يلي جواتنا لدرجة انو بنخاف نواجهو وهون بهالديوان بتلاقي حالك ببساطة وبقرب كتير
حبيت اسمع الكتاب سمع لأني ما كتير من يلي بيهوي يقرأ الكتابة والأدب باللغة العامية . ديوان لطيف خفيف

[Amal Hamzawi · Rating 1 out of 5]

في اول جزء من كتاب فيه كذا قصيدة حلوة و بعد نص الكتاب بظبط عينيك ما تشوفش النور تكرار محن خالي من المشاعر بيكتب علشان يخلص الكتاب محن تاني

[Toqa · Rating 1 out of 5]

اول تعامل ليا مع ديوان باللغة العامية
وغالبا هيبقي الاخير
مش عارفة المشكلة في محمد ابراهيم ولا كل الدواوين العامية كده
مش هكمل قرايته تقيل عل القلب جدا

[Aya Mekawy · Rating 1 out of 5]

what a load of crap and also a complete waste of paper.

[Mona · Rating 2 out of 5]

يا كريم يا كريم ..
روحي مربوطة فـ سماك
حاسس إني بقيت مكركب
كل شئ جوايا تاه ..
العشم في الناس مذلة
والأمل في الله حياة

[Shady Hussein · Rating 1 out of 5]

ديوان ضعيييييف للغايه
توقعت شئ اكثر قوة من ذلك لكن للاسف خابت توقعاتى لذلك اكتفيت بنجمة واحدة لوجود قلة من بعض القصائد الجيدة .

[pəˈteɪtəʊ · Rating 3 out of 5]

باحبك قبل ما أعرف أحب
ومن قبل الزمان بـ زمان