لوغاريتم

by Amir Atef

لم يعرف أن تفاصيل الحكاية ستتغير كل مرة بشكل يجعله خارج عن السيطرة. كاتب مرموق، زوجة مُحِبة، علاقات متعددة وكاتبة مشهورة.. تتداخل التفاصيل فتصنع مصائر متعددة متشابكة خارج حدود العقل. وجريمة حدثت ولم يتم الكشف عن الجاني الحقيقي، رغم أن هناك بالفعل جناة معاقبون في سجنٍ ليس له أسوار، غير أنه منيع تمامًا ضد الهروب. ومحاكمة، القاضي فيها لم يحكم من قبل...!
تفاصيل مثيرة مرهقة، وحكايات شائكة... كيف اختلط الحب بالدمار والسقوط؟ وما الذي جعل ذلك الكاتب يتحول فجأة إلى متهم لا يعرف مصيره؟! هل من الممكن أن يكون هذا الكاتب ضحية لرواياته؟ أو أن تتحول شخوص رواياته إلى أشخاص حقيقيين يلاحقوه في حياته ويدفعوه للجنون؟ وأخيرًا، بعد كل ذلك. ماذا قد يصنع بنا القدر؟

272 pages, Paperback

First published February 1, 2017

About the author

الكاتب أمير عاطف، عضو اتحاد كتاب مصر، من مواليد القاهرة ـ مصر ، 10 أكتوبر عام 1984 ، ليسانس آداب جامعة عين شمس ـ قسم حضارة أوروبية ، درس الأدب اليوناني واللاتيني وله عدة مقالات نقدية عن أعمال الكُتَّاب الإغريق القديمة... وهو الآن بصدد عمل مشروع أدبي يتناول فيه العلاقة بين آداب الشعوب في القرون الأولى...
** صدر له:
* رواية "طارىء" حالياً عن دار دوِّن للنشر والتوزيع صدرت في شهر سبتمبر 2014... ....
* رواية أخرى بعنوان "لا شيء مما سبق " صدرت في يناير2016 عن دار دوِّن للنشر والتوزيع...
* رواية "لوغاريتم" عن دار دوِّن للنشر والتوزيع في يناير 2017
* رواية "لا تبدأ القتل" عن دار دوِّن للنشر والتوزيع في يناير 2018
* رواية "دوائر الانتقام" عن دار دوِّن للنشر والتوزيع في يناير 2020
* رواية "جزيرة جريشة" عن دار دوِّن للنشر والتوزيع في يناير 2022
* رواية "لم يحن وقتك بعد" عن دار دوِّن للنشر والتوزيع في يناير 2025
========================================
The writer Amir Atef, Member of the Federation of Egypt Writers. was born in Cairo, Egypt, October 10, 1984, Bachelor of Arts, studied Greek and Latin literature and has several critical articles on the work of ancient Greek writers ...
** issued to him:
1 - The novel "Emergency - Tare' "in September 2014.
2 - "None of the above - la shai' mema sabaq", in January 2016.
3 - "Logarithm - Logharitm" in January 2017
4 - "Don't start the Kill - la tabda' al katl" in January 2018
5 - "Revenge Circles - dawaer al entekam" in January 2020
6 - Greisha Island - Gezeret Greisha - in January 2022
7 - "Your Time Has Not Come Yet – lam yahan waktok baad" in January 2025
all published by by Dawn Publishing and Distribution...

* Source: Wikipedia

Reviews

[Sarah (SoU) Yehia · Rating 1 out of 5]

التنوية المعتاد: لا يحتوي هذا الريفيو علي اي حرق لأحداث الرواية
اوكي احقاقاً للحق انا كنت متحمسة للكتاب ده بدون اي سبب.. جايز عشان الغلاف كان عجبني جايز عشان الملخص كان شادد انتباهي لكن مع الاسف الواقع كان مخالف لتوقعاتي.. خلونا نتكلم بالتفصيل..

اولا:- عدد صفحات الرواية هو 270 صفحة اول 120 صفحة منهم تقريباً هو فاصل من اليــع، العديد والعديد من العلاقات الجنسية والخيانات الزوجية الاوفر جدا يعني مش عشان انا بتكسف لكن لأني محستش انها لازم تتفرش كل ده لدرجة انها تاكل نص الكتاب لدرجة اني كنت فعلاً علي وشك اني اقفل الكتاب وابطل قرياية لكني لأني مريضة بداء عدم قدرتي علي ترك كتاب في نصه مع الاسف قررت الاستكمال.. انا فاهمة ان الكاتب كان بيحاول يوري مدي حقارة الشخصية الرئيسية في الكتاب لكن كان ممكن فعل ده بدون فاصل الابتذال والعلاقات الي الواحد قراه.. انا حسيت الموضوع ممطوط زيادة وفعلا زهقني..

ثانياً:- من حوالي صفحة 130 وانت طالع ابتديت الرواية تشد حيلها قلت يا مسهل في امل وابتديت الاحداث تندع ويكون ليها معني نوعاً ما وفي هدف ابتدا يظهر.. عشان يفاجئني الكاتب بالقفلة الي مأقنعتنيش ببصلة..
منكرش هي قفلة فيها عدالة شعرية ولطيفة بعد كمية البؤس والحقارة الي بلانا بيهم الكاتب طول الكتاب لكن انا حقيقي مقتنعتش ولا بمنطقية امكانية حدوث ذلك ولا واقعيته..

ثالثاً:- الشخصيات:- شخصية ريهام احد الشخصيات الرئيسية قمة في اللاواقع بالنسبة لي.. مفيش حد طيب، مثالي، شرير، عادل، وحنين في نفس ذات الوقت ايون كلنا فينا كل حاجة انما محدش ينفع يبقي كل ده في نفس ذات الوقت..

انا كسارة معجبتنيش الرواية ومحستهاش لكني مديها نجمة عشان في بعض الوصف للمشاعر والافكار الي عجبتني غير كده بلح..

[Shaimaa Zaher · Rating 5 out of 5]

للمره التالته امير عاطف لم يخيب ظنى وتوقعاتى وثقتى
متابعاه من روايه طارئ ومستواه بيزيد كل روايه ، وكل مره ببقى متشوقه للروايه اللى بعدها ، واصبحت من قراءو المستنيين رواياتو بفارغ الصبر
يدهشنا امير فالروايه دى بحبكه غريبه وقصه مشوقه وكلعاده مع رواياتو مبقدرش اسيبها غير لما اخلصها ، وللمره التانيه زى ما عمل فى لا شئ مما سبق انه جاب شخصيه من طارىء وعملت مشهد عابر
نفس الشئ هنا برضو فى لوغارتم لقيت شخصيه من لاشيئ مما سبق فيها عملت مشهد عابر
احيى الكاتب وفخوره انى من قراءو والروايه دى اثبتت مهارتو فرسم الشخصيات وبالذات الكاتب مروان جبر
بالتوفيق وبرشح الروايه دى لكل محبى الاثاره والتشويق

[Doaa Gamil · Rating 5 out of 5]

ما هذا بحق ستيفن كينج وغيوم ميسو؟
كانت رحلة شاقة وممتعة وغامضة ومثيره ولم أشعر فيها بملل ولو لثانية واحدة
بدأ التشويق معى حين قرات الاهداء الغامض والذى اثار فضولى
التطوير واضح جدا فى اسلوب الكاتب من روايه لاخرى ، ورسم الشخصيات جاء بدقة بالغه ،
اثبت امير عاطف انه رائد فى الاثارة والتشويق في مصر ولو تم ترجمت هذذه الروايه لاى لغة ستلقة استحسان كل من يقراها
واتمنى ايضا ان تتحول لفيلم سينمائى بدلا من الهراء الذى نراه
ابدعت يا امير واتمنا لك التوفيق دوما
خمسة نجوم وارشحها لكل الاصدقاء

[Wissal H · Rating 4 out of 5]

قراءتي الثانية للكاتب أمير عاطف رواية استمتعت جدا بقراءتها كانت صادمة و متشعبة و حافظت على غموضها الى آخر أجزاءها ..

كاتب مشهور زير نساء بالمعنى الحرفي للكلمة ظلم زوجته كثيرا و كسر قلبها مرارا و تكرارا و آخر انجازاته الكارثية هي خيانته لها مع أختها و على سريرها .. بعد معاناة دامت سنين قررت الانتقام بذكاء ودهاء أنثى مجروحة الكرامة و منكسرة الكبرياء

أحداث الرواية كانت مشوقة ومتزايدة الغموض مع تقدم أجزاءها و اقتراب النهاية ، اجزاء منها كانت مطولة بشكل مبالغ فيه دون داعي لذالك ! رغم صعوبة تصديق الحبكة لكنني وجدتها ذكية و بارعة و رغم عدد المصادفات بالرواية لا يستهان به لكنها كانت مشوقة وأحببتها إجمالا ..

[Saif Al Dabbagh · Rating 3 out of 5]

في البدايه كنت اريد ان اترك الروايه ولا اعود لها مره اخرى...
عانيت و انا اقرئ النصف الاول منها ، لم اجد فيه إلا روايه جنسيه و علاقات محرمه و اساءة الى حياة الكُتّاب... و مع ذلك هنالك اسلوب سرد ملفت للانتباه...
ولكن بعد ما تعدّيت النصف الاول بدأت الاحداث باتّخاذ مسرب اخر و بدل الصفحات الجنسيه حلّ مكانها صفحات الاثاره و الانتقام بأسلوب رائع و مُجذِب للانتباه ممّا جعلني اكمل النصف الاخر بجلسه واحده...
تدور احداث الروايه حول حياة كاتب لا اخلاق ولا مبادئ له ولكن عنده ميّزة الكتابه التّي استغلّها بالاسلوب الخاطئ و جذب القارئات له و اغوائهم للعلاقات المحرمّه ، لا يهمّه ما نوع المرأه التي تقف امامه المهم انها وسيله لافراغ شهوته الجنسيه ، حتى زوجته كان يأخذ حاجته الجنسيه منها و يرميها كباقي النساء الذين يزني معهم ...
الا ان جاء اليوم الذي جنى على نفسه به و جاء دور الانتقام...

الكاتب أمير عاطف هذه اول تجربه لي معه و على ما اعتقد لن تكون الاخيره و ارجو ان اجد في الروايات القادمه مواضيع اكثر اثاره.

[الزهراء الصلاحي · Rating 3 out of 5]

حبيت الرواية
وحبيت الحبكة
لكن عندي سؤال،
ايه الفكرة اللي الكاتب أخدها من بنته الصغيرة بالظبط والرواية كلها +18 🙄😂

تمت
٣٠ يناير ٢٠٢٢

[Saher El-Shall. · Rating 2 out of 5]

رواية عبثية مليانه جنس عبثى و رغم إنى كملتها إلا إن نجمة حلو أوى. بس ماكنتش متفاجئ.

إعادة قراءة قبل البيع، الرواية واضح إنى كنت متحامل عليها لما إديتها نجمة واحدة زمان، هى الرواية نجمتين كويس، إلا إنى كنت مش كاتب ريفيو عن كم العبثية اللى فى الرواية، طبيعى جدا إن أى شخص يتوقع أحداثها، إلا إن من غير الطبيعى يتم تحقيق الرواية فى الواقع، والأكيد برضو إن حتى لو كانت شبة دولة ومش موجودة على الخريطة أصلا إن يحصل فيها ربع اللى حصل فى الرواية دى من غير ما حد يشك أو يكتشف اللى فيها، ثم كمان مين دونجوان عصره ده اللى كل البنات بتحبه وبتنام معاه من أول مرة ده! ده مابيحصلش فى أكثر الدول تحررا ومع أكثر رجال العالم جاذبية وأرخص بنات العالم فى تيخوانا! إيه هو اللى ندوة الصبح ومكالمة الظهر والسرير بالليل وخلاص كدة إتعشت، لأ وكمان هتديله فلوس!!!

[Eman Hamza · Rating 5 out of 5]

مبدئيا كدا مجرد انى الاقى بطل الرواية كاتب خلانى عندى فضول اجيبها بدون تردد بالاضافه ان امير عاطف من المؤلفين الاقلية اللى كتباتهم بتشد الواحد من اول صفحة لاخر صفحة
وكان منزل بوست على الفيس ان بيحذر اللى يقراها انه يروح الاماكن المذكورة خلانى عندى فضول اكتر
وقد كان ، مندمتش انى جبتها وقرتها وفعليا امير بيطور نفسه من رواية للتانية واصبحت موهبته مفيهاش جدال ، رسم الاشخاص بمهارة ودقة وخلانى مش عارفه اتعاطف مع مين واشتم فى مين :D
المشاهد الحميمية مفيهاش خدش للحياء ومكتوبة بحرفيه بحيث تكون مناسبة وكتبها بدون تفصيل ، وسبب تعرضه للمشاهد دى انه عاوز يوضح للقارئ قذارة الكاتب مروان جبر وعلاقاته المتعددة فحين بيعامل مراته معاملة سيئه وفعلا تعاطفت معاها جدا
اتفاجئت بالنهايه وفعلا مكنتش متوقعاها نهائى واتفاجئت اكتر ان اللى كان بيحكى الرواية مش زى ما كنت متخيلاه ، طبعا مش عاوزه احرق احداث بس الروايه تقيلة واعتقد انها لازم تتعمل فيلم وانسب واحد ليه هو اياد نصار :3
ياريت بقى يكتب روايه كل 3 شهور والله حرام من السنة للسنة :"D

[إنجي فهمي · Rating 3 out of 5]

مش بطالة والبلوت تويست فيها جميل
يعيبها المبالغة في تحويل بطلها إلى شيطان ومراته إلى ملاك

[Hala Attar · Rating 5 out of 5]

عاوزة اعرف اي روح كانت لابسة الكاتب وهو بيكتب الرواية دة!
فالحقيقة انا بشفق علية لان الرواية فعلا مرهقة جدا وفيها كمية فلسفات صعبة تتكتب وشخصيات مختلفة جدا عن الروايات بتاعتة السابقة وكمية مشاعر واطرابات وصراعات اتجمعت فرواية وحدة عشان كدة خرجت بالشكل الراءع دة
كاتب رواءى عندة علاقات كتيرة ويمكن النموذج دة موجود كتير مش بس فالوسط الثقافى لا دة كمان الفنى علفكرة
حبكة الرواية مفيهاش ثغرة واحدة وبعد مخلصتها لقيت الاف الاسالة بتدور فى مخى ودة يدل على كاتب محترف وبالفعل امير اثبت انه يقدر يمسك كل خطوط رواياتة بمهارة فاءقة ، الرواية دة هتعيش كتير وبالفعل انا هكتب مقال ف الجرنال عنها �� مقال مفصل واعتقد انها فعلا تستحق الدراسة لما فيها من خيوط مش متعودين نشوفها وشخصيات غزيرة مليانة اطرابات نفسية قدر امير يرسمها بدقة
مرحلة السجن كانت قاسية قوى وبرغم ان بطلها واحد بس لكن الكاتب قدر انه ميخلنيش اشعر بالملل
الروايه دى هقراها تانى ومجرد الحديث عن نهايتها المرعبة محتاج مقالات
نشكر ربنا والله عشان عندنا كاتب بيعرف يمسك بخيوط كتير ويسحل القارء معاه من غير ما يهرب منه ولا خيط
خمسمائة نجمة

[Dalia Ibrahim · Rating 5 out of 5]

كعادة امير عاطف بيدهشنا وبيحبس انفاسنا طول قراءت الروايه!!
من بعد لا شيء مما سبق وانا بقول ياترى هيكتب ايه لكن فاجانى بروايه من العيار التقيل وهتعيش لفترة كبيرة ـ رواية فيها كل حاجة تخليها ناجحة
عجبني الكروس أوفر اللى عمله بانه جاب شخصية من روايته اللي فاتت وحطها في مشهد عابر ودة عمله قبل كدة في روايته اللى فاتت وجاب فيها شخصية من طارىء برضه في مشهد عابر
حسيت بسوداوية كافكا في جزء السجن وكان الوصف فيه اكتر من راءع
احترمت الكاتب اكتر لما استخدم اللعة الفصحى ف السرد والحوار ودا يدل على انه بيطور فعلا من نفسه
التشويق في الروايه دى عالى جدا واعتقد انها لازم وحتما تتعمل فيلم
النهايه حاولت اتوقعها كذا مرة ومعرفتش عشان فالاخر يفاجاني بحاجة مختلفة تماما عن اللى كنت متوقعاه
الف مبروك ولسة عارفة انها الطبعة الاولى خلصت في اسبوع وعقبال الطبعة المليون وبالتوفيق للكاتب وهستنى حفل توقيع قريب
خمس نجوم بجدارة

[Nero Hassan · Rating 2 out of 5]

كنت متحمسه جدا لعمل الكاتب امير عاطف الجديد بعد طارئ ولا شئ مما سبق لكني اتصدمت بمعني الكلمه في هذه الروايه نصف الروايه الاول سرد لعلاقات البطل النسائيه والنصف الثاني ملل بطريقه عجيبه بطريقه مش متعوده عليها من امير عاطف وده اللي صدمني الحبكه مكشوفه جدا ومن غير حرق كنت متيقنه وعارفه مين اللي عمل كده في مروان جبر للاسف الروايه غير ما كنت متوقعه خالص عطيتها تجمتين واحده للغلاف والتانيه لان اكيد امير تعب فيها برغم انها مخييبه لأمالي وكنت اتمني انه يغيب علينا في اصدار روايته الجديده علي ان الروايه تكون بهذا الشكل

[نورا ناجي · Rating 4 out of 5]

أولاً أنا لا أفهم نقد رواية بناء على غن فيها مشاهد صادمة..الأدب غير مقنن..نحن لا نكتب لأطفال..أو ضمن مشروع تربوي تعليمي..هذا أدب وفقط كتابة وفقط..خيال وفكرة ومجهود من أديب يريد أن يوصل رسالة ما إلى العالم..أو حتى منح القاريء بعد اللحظات من التفكير..الاستمتاع أو التأمل.
ثانياً..الروايات الجميلة هي ما تجعلك تفكر فيها لفترة طويلة بعد الانتهاء منها..وهذا ما فعلته رواية لوغاريتم معي..ولأول مرة لا أتوقع أبداً النهاية..
أحب ان الشخصيات كلها رمادية..لا وجود للخير المطلق أو الشر المطلق..
السرد..للغة..الحبكة..النهاية..كلها في غاية الروعة والجمال..
شكراً لأمير عاطف

[Malak Sherdy · Rating 5 out of 5]

تختلف الأذواق و الآراء حول الأعمال الأدبية..فما يرضي فلانا لا يعني بالضرورة أن يرضي الآخر.. و ما يتناغم مع هذا لا يتناغم مع ذاك.. ف الناس في ما يعشقون مذاهب كما يقال..
و لكن إذا أراد أحدهم النقد فلابد أن يعلم أن للنقض اصول و آداب ام ان البشر يميلون إلى الإستخفاف بما لا يمكنهم فهمه!!
#لوغاريتم
"فثمة أقدار متشابهة إلى حد كبير تتكرر في حياتنا، تقترب في تشابهها من الدوائر الناتجة عن إلقاء حجر في بحيرة مياه ساكنة، لتكون مركز لدوائر كثيرة تتولد منها.. و انتهاء الدائرة الواحدة هي موت شخص تتشابه حياته و قدره مع حياه و قدر شخص آخر..سيموت حتما بعده.."
رواية مثيرة و مشوقة للكاتب أمير عاطف..
-اللغة: ادين لك بكل الإحترام لإستخدامك اللغة العربية الفصحى في السرد و الحوار و ذلك يدل على تطورك و مجهودك الملاحظ..
-الشخصيات: رسمت بدقة بالغة؛ ففي داخل كل منا توجد جميع المتناقضات و لكن تبقى مبادئنا الراسخة لا تتجزأ..
-الغلاف: رغم اننا يجب ألا نحكم على الكتاب من غلافه أو عنوانه و لكنني انجذبت للغلاف منذ البداية فلم استطع خلال قراءتي ألا أختلس النظر بين الحين و الآخر..
الكاتب الناجح لا ينقل إنها من إبداعات افكاره..
الكاتب الناجح هو من يضع القارئ على كرسيه و يجعله يشعر بنفس مشاعره الشخصية..
الكاتب الناجح من يأسر القارئ و يقتل الملل..
الكاتب الناجح يكون متميز بحس مرهف و ثقافة عامة و توجه إنساني نبيل...
انه الكاتب المتميز امير عاطف❤❤

[محمد سمير · Rating 3 out of 5]

كتاب اليوم من اجل المتعة لا الافادة - للكبار وغير المتحفظين عمومًا
امير عاطف قاص هائل قرأتله قبل رواية " لا شىء مما سبق " وكانت روعة
نقطة تميزه الرئيسة فى الحبكة والسرد .. تحس دايمًا انك بتشوف فيلم سريع مليان تشويق واثارة وبدون لحظة ملل او فصلان وهى نفس مدرسة احمد مراد فى تراب الماس وفيرتيجو مثلًا .. الرواية الاجتماعية قوية وواقعية
الاحداث والالمام بتفاصيل كل شخصية وتحريك الشخصيات ليتقاطعوا مع بعض بأسلوب ساحر وكالعادة تريكات ومفاجآت فى النهاية .. خلطة سرية مش اى حد يقدر يوصلها ..
الرواية دى تحديدًا بتطرح فكرة واحدة وهى " كيفية" الانتقام
وهل تؤمن بانتقام الدولة او القانون ام تفضل انتقامك الشخصى
ويسرد عيوب ومزايا الاتنين بطرق غير مباشرة وان كان يميل لفكرة الانتقام الشخصيى فى هذه الايام مع فساد انتقام القانون
كمان بيعرض بمهارة صراعات النفس البشرية والميل للخير احيانًا وللشر احيانًا وعواقب الافعال السيئة التى لا يلقى لها الانسان بالًا والندم بعد فوات الاوان
الرواية كمان بتشرحلك ازاى الانسان ممكن يتغير للاسوا وللاحسن وفقًا للظروف القهرية العنيفة ..وان دوام الحال من المحال
رواية اجتماعية حقيقية وواقعية تخلصها فى قعدة واحدة لو فاضى ، عيبها ان الكاتب مش بيكتب لهدف انسانى او عايز يوصل رسالة نبيلة لكنه بيكتب من اجل الامتاع الادبى فهتلاقى كتير مشاهد حميمية مش مناسبة حتى وان كانت فى السياق .. لا افضلها
وعشان كده بديه 3 نجمات من خمسة

[Donia Darwish · Rating 2 out of 5]

مبدأيا كده هى الرواية مش منطقية خالص يعنى كاتب مشهور وله قراء ومعجبات كتير ماشى مفيش مشكلة بس مش لدرجة ان كل واحدة من قرائه بتحبه ومستعدة تتنازل عن كل حاجة علشان تقضى حتى لو ليلة معاه ... ايه ده يعنى
طيب ايه كم وصف علاقاته العاطفية والجنسية وكل واحدة تكلمه او تبعتله يروحلها ويشتغلها ايه بجد تانى !!!!!
ماشى الكاتب عايز يبين قد ايه سوء أخلاق البطل بس مش لازم كل الهرى والمط ده
نيجى للزوجة مفيش الكلام ده دلوقتى مفيش زوجة بقيت اصلا تقدر تستحمل ضرب واهانة وخيانة وقرف علشان بتحب .... حب ايه !!!! وبعدين فى الاول مش كان عندهم اطفال فهى مش بتيجى على نفسها علشان ولادها والكلام ده فالطيية والتسامح الزيادة وبالغباء ده مش منطقى خالص
نيجى بقى للهبلة التانية اللى حبته فى يومين وآمنته على فلوسها اللى هى تقدر بملايين وتديله الباسوورد بتاع خزنتها كمان ده بجد فى يومين !!!! ده الواحدة مش بتأمن لجوزها على مرتبها بعد جواز ١٠ سنين مش يومين :-))))
نيجى بقى لجزء الانتقام :
ايه بقى بجد مش عارفة اوصفه مش هنكر انه فيه تشويق بس فكرة الانتقام وتنفيذها مش تتصدق .
التقييم نجمتين بس على جزء الانتقام لتواجد عنصر التشويق .

[Baher Soliman · Rating 3 out of 5]

أنجح الروايات هي تلك التي تجبرك أن تُكمِل صفحاتها حتى النهاية بلا ملل، ربما روايات أكثر شهرة مثل " مائة عام من العزلة" لم تجبرني أن أكمل صفحاتها كما أجبرني أمير عاطف Amir Atef هنا في روايته " لوغاريتم"، هذا النجاح الذي أتكلم عنه هو بالنسبة لي كقاريء قُدِّمت له رواية يمكن أن أقول بأنها " مُسلّية " بدرجة كبيرة، لكن لا يمنع هذا أنها على المستوى الفني بها العديد من الثغرات، أولها أنني لم أشعر هنا بجماليات السرد، طريقة السرد هنا لا تختلف عن سرد أي شخص عادي -وليس أديبًا- لأي حكاية عن يومياته، بل إنه عندما أراد عمل " فلاش باك" لمشهد بين بطل الرواية " مروان" وزوجته " ريهام" ليحكي الجزء المقتطع من المشهد الذي فيه لغز الرواية، قام بإعادة المشهد كاملًا ولم يكتفي بذكر ما اقتطعه في المشهد الأصلي .

على كل حال أهم ما في الرواية والذي يدفعك لتُكمِلها ليس " الوصف" ولا " السرد"، ولكن " حبكة الرواية" أو لوغاريتم الرواية، ومع ذلك هناك في حبكة الرواية تأثر كبير بالخدعة التي في آخر فيلم " كده رضا" لأحمد حلمي، ولولا ذلك لكانت الحبكة رائعة رغم ما بها من لا معقولية لكنها لا معقولية يمكن تمريرها وتقَبُّلِها في عمل أدبي .

أنت هناك أمام " مروان" بطل الرواية مؤلف روايات شهير، ستكتشف سريعًا أنه يخضع للعلاج النفسي بسبب أزمة في ماضيه، هو في نفس الوقت بلا مباديء أو أخلاق ، زير نساء يقيم علاقات غير مشروعة حتى مع أخت زوجته، يعامل زوجته " ريهام" بكل قسوة، في آخر ليلة ضاجعها فيها طلقها ثم هرب مع أختها بعد أن سرق أموال إحدى عشقياته، لكن يتم القبض عليه في المطار بتهمة قتل زوجته "ريهام" ليُودع في السجن لتبدأ لوغاريتم الرواية ..من قتلها؟ ..و��يف؟!.

أعتقد هناك مبالغة حقيقية في رسم حجم شهرة روائي شاب وتأثيرها على القارئات اللاتي كن بكل سهولة يمكن أن يمارسن الجنس معه، صحيح ليس في الرواية ابتذال لكنها لم تترفع عن وصف المؤخرات والنهود، وهو ما يمكن تمريره أيضًا بحكم طبيعة شخصية البطل وتركيبته النفسية.

بالنهاية...رأيي في الرواية بأنها ليست من الأعمال التي يمكن أن تحتفظ بها في ذاكرتك طويلًا، ولكنك يمكن أن تقضي في مطالعتها وقت لطيف لن تمل فيه، وهذا موطن نجاحها بالنسبة لي، أما المؤلف " أمير عاطف" أعتقد أنه يمكن أن يطور نفسه نحو الأحسن، لاسيما في جانب اللغة التي وإن كانت فصحى لكنها ركيكة، وبعض تراكيبها منقول من العامية، وإن كانت هذه الرواية حدثية بمعنى أنها تهتم بالحدث أكثر من اهتمامها بالوصف، فنأمل من المؤلف في قادم الأعمال أن يهتم بهذا الجانب ويُظهر فيه تفوقه؛ فبتقديري أن نهوض أي عمل روائي لا يتم إلا بخلطة ثلاثية مكونة من الوصف والسرد والحبكة.

[Rabab Abdulghani · Rating 1 out of 5]

حقيقة لم أصدق أن كاتب هذه الأحداث المهلهلة هو نفسه من كتب رواية ( لا شيء مما سبق ) والتي نالت إعجابي وتقييمي لها قد يصل إلي ٤ نجوم .حاولت جاهدة أن أقرأ الصفحات حتي النهاية و لكن لم استطع سوي التوقف قبل المنتصف .
حبكة سيئة،بناء شخصيات غير مرسوم بطريقة صحيحة وغير مفهوم،أحداث غير واقعية وغير مبررة ولا منطقية .
مثال بسيط( الكاتب المشهور صاحب حفلات التوقيع التي يمتد زحامها خارج دار النشر والذي جني الكثير من المال ،يسرع ليستقل الاوتوبيس العام ويجلس بجانب النافذة ليلحق بزوجته التي تلد طفلهما الأول في المستشفي).

آسفة لقولي أن ما قرأته لا يرقي إلي مستوي الرواية ،بل مجرد هراء.

[alma jannan · Rating 1 out of 5]

رواية لشخص بدائي في الكتابة..
لا يوجد أي أبعاد للشخصيات..
و حتى الشخصيات غير منطقية..
و حبكة الرواية فاشلة..
حتى القصة غير مثيرة للاهتمام.
و الايحائات الجنسية و الألفاظ غير مبررة.. و يوجد بعض المشاهد المستفزة مثال : عندما أخبرت نهال لمروان إنها تريده إن يأتي لبيتها و إنها سوف ترسل ابنها خارج المنزل..
قال لها مروان إنه لا يمانع وجود ابنها في المنزل حيث كان في قرارة نفسه يريد أن يراهم ابنها الصغير..
كما حدث معه في صغره عندما كانت أمه تضاجع غير والده..
نجمة واحد فقط للانتقام الزوجة الفصل الأخير أعجبني قليلا..

[Primerose · Rating 1 out of 5]

نجمه واحده للغه العربيه الفصحى والغلاف
كل انتقاد سلبى كتبه غيرى أوافق عليه واضيف الاتى
اطاله شديده ف السرد حتى عند سرد المشهد م خلال الموقف الاخر يلجأ الكاتب لسرد ماكتبه مسبقا بالنص وكأننا لم نقرأ مافت رغم أنه كان يستطيع أن يستخدم خبايا اللغه التى يمتلك مفاتيحها بجداره ف الاشاره فقد لما سبق وليس السرد المطابق

[Youness NASREDDINE · Rating 4 out of 5]

قراءتي الثالثة لأمير عاطف. مشوقة يكتنفها الغموض في منحى تصاعدي وانت تقرأها, رغم بعض الإسهاب في الفصل الأخير. لكن عموما أحببتها واستمتعت كثيرا أثناء قراءتها التي طبعا كانت في جلسة واحدة.
نصيحتي لك كن لطيفا مع زوجتك؛ حقا إن كيدهن عظيم !

[Nour El Deen · Rating 1 out of 5]

النجمة دي فقط لاسلوب الكتابة غير كدة رواية مبالغ فيها
ريهام مبالغ فيها، وانتقامها مبالغ فيه

[Nouran · Rating 1 out of 5]

القصة غير منطقية، الإنتقام حبكة درامية مبنية علي لا شئ، ببساطة نادمة علي قراءتها.

[DỘn Mando · Rating 3 out of 5]

الرواية الاخيرة لأمير عاطف , اللي لولا حاجتين بالزبط كان ممكن تكون من الروايات الرائعة و اللي اصنفها ضمن افضل ما قرأت
الحاجتين دول هما :
1- ان اول 120 او 130 صفحة فعلا اوفر اوي انهم مجرد ان الكاتب بيعيد و يزيد في وصف حياة مروان جبر و نزواته و علاقاته الجنسية و فحولته و انه جامد فشخ و زير نساء و ان وفاء عندها مؤخرة عظيمة و صدر ناهد و ان نهال جامدة فشخ و ان ياسمين الهة الجمال " فينوس " , الاوفر في الوصف ع الفاضي دة لحياة مروان العبثية ضيع كتير اوي من الرواية و كان جزء ممل .
2- وهو سبب متعلق بالسبب الاول ألا وهو انه علشان خدمة البلوت تويست اللي في اخر الرواية تم اهمال النصف الاول من الرواية في فاصل من العبثية اللي ذكرتها في السبب الأول .
- الرواية كلغة ممتازة جدا , امير بيتطور من رواية للتانية و اللغة بتبقى اقوى و و اجمل و تعبيرات افضل و ادق .
- غلاف الرواية مميز جدا و بعتبره افضل غلاف في معرض كتاب السنة دي بدون مبالغة .
- البلوت تويست اللي في الرواية ممتاز و قلب موازين الرواية لكن زي ما قولت وجوده سبب خلخلة للعمل و انه عشان يخدم حبكته ظلم النصف الاول من الرواية
- على عكس طارئ و لا شئ مما سبق ,,عامل التشويق هنا قليل شوية عن الروايتين السابقتين , لكن الدراما النفسية و الصراع النفسي للبطل مروان جبر و زوجته ريهام كان لهم نصيب الاسد من الرواية .
- اخيرا النهاية و البلوت تويست برغم توقعي ليهم لكن بعتبرهم برضه مفاجأة كويسة للقارئ و هتخلي اللي كان كاره للرواية هيحبها في الاخر و يكون مستمتع الى حد ما .
- الرواية دي كويسة جدا و امير تعب عشان تطلع بالشكل دة , لكن كانت محتاجة تركيز بسيط على نصفها الاول وكانت هتكون - ماستربيس-
3/5

[Esraa Taha · Rating 5 out of 5]

رفيو رواية لوغاريتم :)
مبدئيا كده لو انت بتعرف تتوقع اوى اى حاجه فأراهنك ان مهما توقعت اى احداث هتطلع غلط :D
فى اهداء كده فى اول الرواية غريب جدا جدا وعمرك ما هتفهمه الا لما تخلصه الرواية تماما ودى حاجه جميلها عملها الكاتب امير عاطف انه يخليك متشوق انك تعرف الاحداث
للمرة التالته بيفاجئنا برواية اكثر من رائعه بجد اى حد هيقراها عمره ما هيندم
روايه جميلة كده وفكرتها مختلفة تماما كمان طريقة سردها مش صعبة بحيث برضو لو حد لسه بادىء يقرأ هيحبها
من الاخر كده اعملك فنجان قهوة وعيش رحلتك مع لوغاريتم وهتخلص الرحلة دى وانت مبسوط اوى

[Abeer Mohamed · Rating 5 out of 5]

الرواية ممتازة عجبتنى جداااا حقيقة ومكنتش متوقعة نهايتها خالص ولو فى اكتر من 5 نجوم كنت حطيت 😍

[Nada Gaber · Rating 3 out of 5]

الى حد كبير روايه حلوه بس فيها كميه احداث متداخله جدا و لف و دوران كتير اوووى و ف الاخر كنت عاوزه اعرف النهايه لانى زهقت مش لانى متشوقه 😌😌

[Mohammed Magdy · Rating 4 out of 5]

رواية مذهلة وفكرتها رائعة وعجبتني أوي التويست بلوت في النهاية مع انها كانت متوقعة بصراحة ومن غير حذلقه.
يعيبها إن الزوجة خرجت بصورة مثالية حبتين.
لكن النهاية كانت satisfying

[Antar Jabareen · Rating 3 out of 5]

:وهذا ملخص للعمل كما وجدته وكان شاملاً للرواية

"للوهلة الأولى تبدو رواية “لوغاريتم” للروائي المصري أمير عاطف تقليدية نوعا ما، إذ تلقي الضوء على حياة الروائي الشهير معبود الجماهير العاشق للقراءة
مروان جابر، ويبدو واضحا تماما أن البطل زير نساء مولع بعلاقات متعددة مع الجميلات، رغم أن له زوجة محبة مخلصة، بل إن عشيقته الرئيسية هي شقيقة زوجته.

يسهب الكاتب في وصف حياة مروان جابر المفعمة بالمجون والعبث رغم موهبته ونجاحه المهني الكبير.

وفي قمة نجاح بطل الرواية يفاجَأ بتوجيه الاتهام له ولعشيقته بقتل زوجته رغم إصراره حتى النهاية على براءته، يحاكم مروان جابر ويقضي أعواما خلف أسوار سجن يلقى فيه صنوفا من العذاب ليخرج منه بعد أحداث يناير 2011 لا يكاد يفهم شيئا مما يدور حوله.

لكن الأمر لا يقتصر على ذلك، وإنما تصفعه الحقيقة بقسوتها ليدرك أن ما يكتبه في الروايات يمكن أن يتحول إلى واقع، وأن الشخصيات الروائية يمكن أن تتجسد في عالمه وتحيل حياته جحيما، ويفهم حقيقة أنه تعرض لانتقام محكم ومعد له ببراعة منقطعة النظير.. لكن الفهم يأتيه متأخرا جدا.

تتوالى مفاجآت اللوغاريتم المعقد حتى الصفحات الأخيرة من الرواية، ليجد القارئ نفسه يلهث من متابعة الأحداث المتلاحقة ويكتشف أن الحقيقة قد تكون أبعد بكثير مما تبدو عليه.

ولا تقتصر الرواية على إلقاء الضوء على حياة مروان جابر الماجنة التي تخلو من أي وازع أخلاقي، فلا يتوانى عن الخيانة والسرقة وارتكاب كل ما يكفل له الوصول إلى أهدافه، وإنما تطرح أيضا العلاقة الشائكة بين الزوجة ريهام وشقيقتها وفاء التي كان لها دور كبير في التحول الذي ستشهده شخصية ريهام وتغيرها المفاجئ.

الحبكة التي استخدمها الكاتب في روايته تضع القارئ في حيرة حقيقية، حيث يجد أنه ما إن يصل إلى نقطة ذروة الأحداث حتى يفاجأ بأنه لا يزال هناك المزيد وأن الذروة ليست تلك التي ظن أنه بلغها.

ويلجأ المؤلف إلى الدراما النفسية في العمل، حيث يظهر بشكل غير مباشر أثر مرحلة الطفولة وما يتعرض له المرء خلالها ودور ذلك في تكوين الشخصية لاحقا، إذ أن لطفولة بطل الرواية الرئيسي مروان جابر دورا شديد الأهمية في ما آلت إليه حياته وشخصيته.

وتحمل جميع الشخصيات الرئيسية في الرواية تقريبا سمات البطل التراجيدي الكلاسيكي، ومروان جابر رغم نجاحه وشهرته ووسامته، إلاّ أنه زوج خائن بلا ضمير لا يتورع عن فعل أي شيء للوصول إلى هدفه، لكن القارئ لا يملك سوى أن يتعاطف معه في بعض الأحيان، خاصة فترة وجوده في السجن والتغير الهائل الذي طرأ عليه بسبب هذه المحنة.

والزوجة المخلصة المحبة ريهام التي تبدو مثالية الشخصية من جميع الأركان قد ينتقد البعض خنوعها الشديد لزوج خائن لا يكف عن إيذائها، لكنها تمر بنقطة التحول التي تجعل منها إنسانا منتقما شديد القسوة وإن كان ذلك مبررا نوعا ما، حتى وفاء العشيقة يرى فيها القارئ في بعض الأحيان الضعف البشري الذي يظهر مدى هشاشتها الداخلية. ولا يقتصر الأمر على الدراما النفسية وملامح التراجيديا الواضحة في الرواية، بل تحمل الفترة التي قضاها مروان جابر في السجن سمات أجواء كافكا السوداوية، كما أن الرواية في مجملها يغلب عليها طابع الإثارة والغموض والتشويق وهو ما يجعل منها عملا متعدد الأوجه."

[Sara · Rating 1 out of 5]

رواية درامية أنتشرت عام 2017
مش قادرة أحدد تصنيف الرواية بالظبط لكنها بالتأكيد سيناريو فيلم عربي هابط مهروس.

أولًا: أسلوب السرد مُدعي، كأن الكاتب بيحاول يدعي أنه كاتب محصلش يستحق نوبل، فبين كل فقرة جمل بتحاول تبقي فلسفية عميقة لكنها ما بين بديهة وما بين مالهاش معني، مفيش مفردات ولا أسلوب لغوي جيد، كأن واحد عامل يتكلم بس باللغة العربية الفصحى.

ثانيًا: الرواية المفروض قائمة على شخصيات مرضية ورمادية، بس الحقيقة أن مفيش شخصيات أصلًا، كلها أسماء بتقول حوار وتحكي قصصها وتاريخها الدرامي، لو بدلنا اسم ريهام بوفاء مش هتفرق، مروان بإسلام عادي.. مبالغة فقط في داء أو صفة كل شخصية، الشخصيات لا مقعدة ولا بسيطة، هي هلامية، كأتن برضو بيحكي حكاية ناس تانية في قعدة مملة.

ثالثًا: الجزء الأول واللي هو حوالي 140 صفحة عبارة عن وصف علاقات جنسية وهوس قارئات بكاتب جنسيًا لمجرد أنه كاتب، وبالطريقة اللي بيسرد بيها هو كاتب سيء وممل وبالتالي مش مسار جذب قارئات التلاتينيات المطلقات والأرامل الباحثين عن رجل وخلاص!
كل ست جميلة كاملة الأنوثة عندها 36 سنة بتحب الكاتب مروان اللي عنده 30 سنة ومستعدة تديله كل ما تكملك وتخون وتعمل علاقة عادي من أول سلام! يا سلام!!
مفيش رداع أخلاقي أو نفسي أو اجتماعي عند الكل، دون خوان نفسه مكنش كده، وكانت قصة دون خوان مقنعة! دي عبارة عن مبالغة رهيبة!
بالإضافة أن المشاهد بتكرر من غير داعي، فقرات السرد نفسها بتتعاد مرتين خمسة عشان نعمل جزء أول ضخم مملة ومكرر بنعيد في أنجازات مروان الجنسية، مكنش في صراع نفسي ولا أبعاد نفسية، مش عشان في شخصية دكتور نفسي سطحية بالاسم يبقي في صراع نفسي يعني، هو مجرد إدعاء.


رابعًا: البلو تويست اللي من أول مشهد في الجزء التاني معروفة لأنها مهروسة، في أفلام التمانينيات المصرية كانت بيوهم فاروق الفيشاوي أنه قاتل وبعدين البطل تظهر أنها عايشة.. بس الحقيقة الكاتب أخد ده في ليفيل مبالغة عالي برضو.
أحنا لو عايشين في شيكاغو في التلاتينيات المشهورة بفترة المافيا والجرايم محدش هيعمل مصنع قديم سجن 6 سنين، ويدخل دار القضاء العالي بتصريح سينمائي بعربية ترحيلات واتنين شكلهم مبهدل ويخرج بيهم كده من غير ما 300 واحد يسأل ويدقق!
دي رواية مسموح بالفانتازيا والخروج عن الواقع، بس منطق الحدث، أنا صدقت هاري بوتر ومدرسة السحرة بس مصدقتش الهبل ده وده الوصفت الأدق له.
ده غير خطيب ريهام اللي رجع وعمل كل ده وهو مجرد منتج سينمائي، والله لو وزير الداخلية ميقدرش يعمل ده!
وريهام اللي عاشت 6 سنين إهانة وضرب وخيانة بصفة مستمرة، فجأة بقت كده ولسه كويسه!
مفيش شخصية رمادية ملائكية، تفكر وتنفذ الانتقام ده وتندم وتبقي كويسه، نفس الشخصية اللي مش عايزه تطلق عشان شماته والدتها!


الرواية سيئة جدًا، مملة ومموطة وخالية من المنطقة والسرد الجيد، الحبكة وترتيب المشاهد سيئ، الحقيقة لو مكنتش سمعتها صوتي وسرعت الصوت كتير مكنتش قدرت أكمل 3 صفحات فيها.
سيئة جدًا