جارلند

by نوره جمال

في هذه الرواية، تسافر مع الكاتبة في رحلة ملهمة، تعيش تفاصيل طازجة، و تتعلق بذكريات عذبة..من روعة و عذوبة الوصف و الحكاية ستصبح أحد أفراد الرحلة و ستزور مدن و أماكن لم تصلها من قبل..انها رواية موحية، ملهمة، ممتلئة بالبهجة و الأمل و الشجن معاً

143 pages, Paperback

First published January 1, 2017

Reviews

[إيمان · Rating 5 out of 5]

مبدئيا غلاف معبر جدااااااا عن احداث الرواية يستحق نجمة اولى...
سطور رومانسية جدا تخليك مشتاق تكون في حالة حب، وصف رائع ودقيق للهند يسفرك لحد هنا و يعيشك الاجواء والاهم يخليك تتمني لو تسافر فعلا لهناك...
رواية اتكتبت بأحساس عالي و لغة قوية جدااااا و سلسة .. اسلوب سرد ممتع مافيهوش لحظة ملل واحدة.. رواية تستحق فوق الخمس نجوم عن جدارة و استحقاق و كانت اروع ماختمت بيه 2017

[Soha Elfeqy · Rating 5 out of 5]

رقيقة.. بسيطة.. وحقيقية.

[Mariam Desouky · Rating 5 out of 5]

رواية جميلة جدا .. الاسلوب بسيط و هادى

عاجبنى ان مش ندى بس اللى بتحكى بالعكس كل الشخصيات بيتكلموا فحسيت انى بعيش مع كل شخصية حكايتها .. مع انى كنت متوقعة العكس

وصف الهند كبلد جميل غنى بالالوان و الثقافات و اللغات و غيره خلانى احب الهند بكل كل ما فيها اكتر ما انا معجبة بيها

انا فعلا حسيت انى روحت الهند و جيت ^^

تستحق القراءة

[Hamza El-Kady · Rating 4 out of 5]

الروايه ممتازه بحق
خفيفه في روحها و في كلماتها بروعه في رسم المشاهد و المناظر الطبيعيه
حقيقه الروايه كتبت بإحساس يفوق الخيال
في اللغه و الفكره و الأسلوب السردي و الحواري
ينقصها نجمه واحده فقط في التقييم بسبب أن فكره الروايه الرئيسيه (حكايه الأب ) لم يتم ذكرها الا في اخر 10 صفحات فقط
الفكره الرئيسيه لم تأخذ حقها اطلاقا في الروايه
ماعدا ذلك الروايه فعليا ممتازه جدا جدا

[Farid Almasry · Rating 3 out of 5]

هذه الرواية من نوعية الروايات بطيئة الإيقاع
أسلوب السرد جيد إلى حد ما .. النهاية مفتوحة
جارلند كلمة هندية تعنى طوق من الأزهار
بطلة الرواية طالبة مصرية تدعى ندى .. تذهب إلى الهند لتدرس الفنون بجامعة نيودلهى فتلتقى بشاب مصرى يدعى يحيى يعمل مصوراً .. فتنشأ بينهما قصة حب
ألقت الكاتبة من خلال هذه الرواية الضوء على الهند والهنود وعادادتهم وتقاليدهم ومعتقداتهم

[Raneem · Rating 3 out of 5]

القصة لطيفة جدا و مفيهاش التعقيدات بتاعت العنف و الاسرار و الاشياء المبتزلة اللي ملت الروايات العربية الحديثة... بس انا اظن انها قصيرة شوية و اخر حتة في القصة كانت عجيبة بالنسبة لي

[Menna Maher · Rating 5 out of 5]

من اجمل الروايات اللي قرأتها
اولا هتحس انك سافرت الهند وانت قاعد في مكانك وهتعرف عنهم حاجات كتير وهتعرف انهم ناس جميلة جدا بجد
ثانياً هتلاقي نفسك في الشخصيات الموجوده في الرواية بمعني انك هتحس ان كل واحد فيهم قال حاجة انت عايز تقولها او عمل حاجة انت نفسك تعملها
طريقة السرد جميلة وبسيطة تخليك مش قادر تسيب الرواية الا لما تخلصها
خلصتها في ساعتين ونص تقريبا
برغم جمال النهاية الا اني كنت بعيط اني خلصتها
رواية مُبهجة جدا وانصح بقرأتها.

[Dr.Walaa Gamal · Rating 5 out of 5]

#جارلند
في البداية استوقفني الاسم جداً نظراً لاني لم اعرف معناه من قبل فقررت شراء الرواية لأعرف معناه وكانت المفاجأة مع اول صفحاتها بدأت انسي #جارلند وتحولت مع الكاتبة إلي عالم اخر احسست وكأنني #ندي ❤
سافرت معها إلي #الهند وانا في مكاني
قدرة الكاتبة علي وصف الشخصيات والأماكن وصفاً دقيقاً تجعلك تشعر وكأنك احد ابطال الرواية
طوال عمري احب أدب الرحلات ولكن الجميل ان تجتمع الرحلة وجمالها مع قصة جميلة رقيقة تملئ القلب والعقل ❤
روايةُ جميلة ورقيقة لاصحاب الذوق الرفيع ✋
ولا تنسوا أن تبحثوا في الرواية عن #جارلند

[Maha · Rating 2 out of 5]

مبقيتش قادرة أقتنع بأي كتابات للجيل الجديد ممن يطلق عليهم كتاب
بداية من اول 3 صفحات وقعت في 3 أخطاء إملائية فنفسي اتسدت اني اكمل وفضلت فترة طويلة جدا راكنة الرواية قبل ما أرجع أكملها.. أكن احترام عالي جدا للغة العربية وبشعر ان اي حد بيكتب بالفصحى لازم يكون قد المسؤلية دي .. والحقيقة ان الرواية أساسا بالرغم من انها مكتوبة بالفصحى لكن حسيتها مقحمة وكان من الأفضل لو اتكتبت بالعامية
المهم رجعت كملتها لأني مبحبش اسيب كتاب معلق الا لسبب قوي واللي غالبا بيكون سبب أخلاقي
القصة للأسف خفيفة أكتر من اللازم ينقصها الكثير من العمق و الجزء اللي مرتكز عليه حبكة القصة مش راكب ولا يبرر احداثها بأي شكل من الأشكال من وجهة نظري
الكتاب ممكن يعجب بنات اليومين دول اللي مش بيدوروا على قيمة لكن مجرد كتاب قزقزة في طريق سفر وهيرضي الجيل اللي بيكسل يستخدم الانترنت اللي في ايده ليل نهار للحصول على معلومة عن الهند وبيستغل هوس البنات مؤخرا بالدراما الهندية مش أكتر
النقلات لكتيرة بين الشخصيات و عنونتها في كل مرة كانت مرهقة بشكل ما نفسيا بالنسبالي .. كل صفحتين تلاتة بالكتير ننتقل لشخصية .. حسيتها مبالغة في استخدام الاسلوب ده
في النهاية أوضح مرة تانية إن دي وجهة نظر شخصية
النجمتين واحدة لأن الكتاب تجربة أولى لكاتبته ده غير اني مقدرش ادي اقل من كده و التانية لأن المعلومات اللي فيها حقيقية بدون تأليف

[hanan Tharwat · Rating 4 out of 5]

من الرويات اللي قريتها وحسيت انها برغم انها صغيرة مينفعش تخلص بسرعة كنت في حاجات بعيدها جايز لانها اتكلمت عن البلد اللي نفسي اشوفها اسلوب الكاتبة اخذتني في رحلة حسيت فعلا اني انتقلت هناك وخصوصا حاجات كتير بتقولها كنت عارفها فحسيت بصدق قوي في كلامها اسلوبها بسيط جميل
رحلة البحث عن النفس وانهاء الصراع الداخلي شخصية ندي بتمثل الصراع الداخلي للنفس واثرة علي الحياة
شخصية رشا ان الواحد ممكن ينبهر بحاجة لكن لما بيشوفها في الواقع وتبقي ملموسة قدامة بيعرف قد اية هو شاف سراب
رانبير شخصية فريدة حالة من الرومانسية بطبع حبي للهندي شفت زيها في مسلسلاتهم لكن ان تقرا شي اخر
بس كان نفسي الرواية نهايتها متنتهيش بالسرعة دي كان نفسي تطول شوية
#Garland رواية بسيطة لكن تاخدك لعالم اخر لعقول اخري

[Mαяσ · Rating 5 out of 5]

رواية بسيطة ممتعة مبهجة ومريحة للنفس.. حقيقي مكنتش عايزاها تخلص وكنت كل ليلة اقرأ جزء صغير منها يديني positive energy وينقلني للهند بعاداتها وتقاليدها وشوارعها واكلاتها وملابس اهلها ولاني بعشقها فعلا استمتعت بكل كلمة قرأتها .. بعتبرها من نوع ادب الرحلات بس ببساطة وسلاسة امتعتني وسحرتني وحبتها جدا جدا وكنت اتمنى ان الكتاب يكون اكبر بكتير... 😍😍😍😍

[Sermeen Abdallah · Rating 4 out of 5]

رواية رقيقة لطيفة جدا فيها شوية وصف لجمال الهند يخلي الواحد يبقي عايز يروح يشوف جمال الاماكن اللي اتقالت
مش عارفة الحقيقة الكاتب الشاطر هو اللي ياخد فى حتة تانية ويخليك تعيش حياة تانية عمرك ما عشتها ولا الكاتب الشاطر هو اللي يلمس وجع في قلبك ويقولك انت مش لوحد انا حاسس بيك؟؟ مش عارفة الحقيقة بس اللي اعرفه ان الرواية خطفت قلبي بشكل لطيف جدا وحبيتها جدا جدا رغم بساطتها في كل حاجة

[Hadil Salamah · Rating 5 out of 5]

تركتها ولَم أكملها .. خشيت تشابه أحرفها مع روحي المرتعشة .. ولكنّي لم أحد جمال تلك "الندى" لأجد يحيى كحصن أمان .. وما إن استجمعت شجاعتي حتى أكملت القراءة وانا ادرك تمامًا أنني سأجد لقصتي بداية جديدة 🌸

شكرًا نوره جمال

[Aliaa Ali · Rating 5 out of 5]

من اجمل الروايات التي قرأتها كنت اشعر اني في الهند و اري كل تفاصيلها التي اعشقها و اتمني زيارتها من كل قلبي رواية جميلة و سلسة و اسلوبها رائع. احيي الكاتبة بشدة لانها اسعدتني بهذه الرواية الفريدة

[Doaa · Rating 4 out of 5]

3 نجوم ونصف

نوره من الناس اللي بتنشر البهجه علي الفيس بوك في وقت النيجف انيجري فيه منتشره وده شجعني اني اجيب روايتها
الروايه اشبه بقصه قصيره .. اللي يميزها المعلومات عن دوله الهند

[Samaa Mohamed · Rating 5 out of 5]

هي رواية خفيفة مفعمة بالبهجة رغم ما يتخللها من أحزان، لقد أبدعت الكاتبة في جعلي أسافر إلى الهند من مكاني! لقد زرت تاج محل وأماكن أخرى بالهند بمجرد قراءتي لكلماتها السلسة التي كانت تسحبني لعمق الرواية شيئا فشيئا. حتى وجدتني أتخيل كل شيء وكأنني معهم!
لغة سهلة وميسرة لتنقلني بين الأحداث بسلاسة. أنتظر الرواية القادمة بفارغ الصبر! 😍

[Mawada Yousry · Rating 5 out of 5]

اول مره احس اني فرحانه اني كملت قصه لاخرها ديمن بقرأ حجات كتير بس مش بكملها لاخرها لاني بزهق يسرعه بس الموضوع مختلف المرادي الي شدني اني اشتري القصه دي اسمها الي مكنش مفهوم، لما تقرأ القصه هتحس انك معاهم في القصه بتروح الاماكن الي بيروحوها زعلت اوي لما خلصت ،لما وصلت لاخر صفحه كنت بتأكد انها فعلن اخر صفحه لاني مش عيزاها تخلص ،روعه فعلن

[هدى · Rating 3 out of 5]

الاسلوب شدنى جدا ..وصف الهند و كانك داخل الروايه كانك بالهند جعلنى فعلا اتمنى زياره الهند ..احببت جدا الجزء الاول الى ان قابلت يحيى الفارس على حصانه الأبيض اللى غمرها بحبه وتقبلها بتقلباتاها..تصدير صوره الفارس اللى هيجى يسعدنا لم تعجبنى ..كان بامكان للروايه ان تاخذ منحى اخر ..ان تقابل المزيد من الناس تعيش المزيد من المغامرات وترينا اكثر عن الهند بدل من حشر قصه الحب حشرا فى الروايه.

[Baheya Zeitoun · Rating 4 out of 5]

Noura Gamal takes the reader on an amusing adventure across the Indian subcontinent through the eyes and experiences of her characters. With authentic dialogue and relatable characters, this story truly embodies the desires and heartaches of today's youth.

[Farah · Rating 5 out of 5]

من احلى الكتب اللي قريتها و اللي شديتني جدا
حسييت اني في الهند و حسيت بالمغامره و التشويق و الفضول و الرغبه اني اعرف كل حدث هيحصل ايه بعده
جميله جدا فكرة ان الحكايه بتتحكي من كذا وجهة نظر
عجبتني جدا بسيطه و جميله اوي

[Marie · Rating 5 out of 5]

جميلة اوى وخليتنى احب الهند واحلم انى ازورها ف يوم واتصور مع تاج محل بالسارى الهندى ...
حبيت كل الشخصيات ولقيت نفسى كتير ف شخصية ندى ...
اللى خايفة من اى تجربة جديدة تتسبب لها ف الم جديد .. شكرا نوره :)

[Lobna · Rating 4 out of 5]

جميلة و رقيقة و بسيطة و صغيرة. رحلة ممتعة في بلد ملونه 😍 الهند أم العجايب.

[Maysa · Rating 4 out of 5]

بسيطه

[Mohamed Fathi · Rating 4 out of 5]

رحلة ممتعه بأدق تفاصيلها من وصف لجمال المكان و جمال الشخصيات و طريقة سرد غاية في البساطة و الوضوح , رواية أشبه بحلم جميل مليء بالألوان و
البهجة و الحب الحقيقي ، يمكن كان نفسي تبقى أطول من كده عشان مرجعش من الهند بسرعه ، عجبني جدا اندماج الجنسيات و الأديان المختلفة بشكل حضاري .. النجمة الأخيرة سيبتها عشان النهايه حسيتها اتخطفت او يمكن الكاتبة قاصده تسيبها مفتوحه لجزء تاني
شكرا نوره

[Maryam Gamal · Rating 3 out of 5]

رواية ناعمة وخفيفة ومليئة بالمشاعر الدافئة

[Mahmoud · Rating 5 out of 5]

مش من المعتاد اني اقرا رواية ادب رحلات وفي نفس الوقت ماتكونش كبيرة او مملة
الرواية فعلا مسلية جدا جدا ومشوقة طول وقت ما كنت بقراها
جارلند
بداية من الاسم تحس انك هتقرا مغامرة مش مكان
رحلة طويلة قوي جوا نفس ندى. رحلة بحث عن الذات وتخلص من الصراع مع النفس ومع الاخرين
علاقات واشخاص مش متعودين اننا نقابلهم في الحياة العادية المملة
اماكن جديدة جدا ودراما بتتطور طول الوقت وطول احداث الرواية
انتصار للحاجات الحقيقية على الوهم والخوف اللي مش مبرر .. وانتصار للأمل اللي ممكن يجي لو مؤمنين بوجوده
فعلا استمتعت بيها جدا واتمنى اني اقرا حاجة تانية للأستاذة نوره جمال

[Basma · Rating 4 out of 5]

رواية جميلة جدا ، فرحتني و حسيت انها في اجزاء بتوصف كلام جوايا :) ، عجبتني القصة اوي و حسيت اني روحت الهند فعلا و دلوقتي نفسي ازورها بس كان نفسي تطول شوية كمان....حسيت ان النهاية جت بسرعة مع ان كان فيه مجال انها تطول بس عامة رواية حلوة كرواية اولي للكاتبة و يا رب الرواية الجاية تبقي احلي كمان

[Nourhan El-Nosairy · Rating 4 out of 5]

I loved the journey I went through and the places I visited through this story. I liked that each character told their own story, it was like visiting different minds in one book. I loved knowing more about india from a foreigner's eyes.
and I fell in love with its name "Garland".

['خُلُودْ' · Rating 4 out of 5]

بتحكي وبتوصفي كل لحظة ومن جوايا بكمل التفاصيل كمان من قبل ما اقرا ..  شميت الروايح وحسيت طعم الاكل من قبل ما توصفي وصفكك عزز الخيال عندي زيادة 😍 بقيت اغمض عيني لحظة واستمتع بالموسيقى واكمل قراية شوية.. الهوا وهو بيخبط فيا ف المواصلات حسسني اني ندى.. السسماعات ف ودني حسستني اني هي.. 
عيشتيني حاجات مبقتش عارفه افصل بين الواقع والخيال مخدتش بالي اني المفروض انزل من العربية اصلا !
وبعيداا عن بركااان المشاعر اللي في الرواية 😍 في بركان تاني اسمه معلومات ❤❤ انا كتبت كمية حاجات في النوت بتاعتي عشان ابحث في توسع فيها من الاماكن للعبادة للشاي 😂❤❤ ولانك، ثقة وعارفه انك مش هتكتبي حاجه مغلوطه كنت بنبهر بكل معلومة مكتوبة ❤❤❤❤❤

[Nahid Ali · Rating 4 out of 5]

رواية ممتعة جدا تخطفك من اول سطر ولا تكف عن اثارة فضولك ورغبتك في ان تعرف ماذا سيحدث بعد. أعجبني كثيرا تعدد الرواة في الرواية بشكل يسمح للقارئ بالولوج لعقل وقلب كل راو بشكل درامي سلس فكل راو ياخذ دوره في السرد لا مُكرَّرا لنفس الحدث بل مكملا له، فلا مجال لاي شعور بالملل منذ البداية وحتى كلمة النهاية. وكذا تفاصيل المكان وبهاؤه وروعته التي برعت الكاتبة في تجسيدها حتى أن القارئ صار مصاحبا للابطال في رحلتهم داخل الهند يشاركهم دهشتهم وانبهارهم بجمال الهند بلد العجائب. لكن ما عاب الرواية في رأيي هو افتقارها لعمق الصراع داخل البطلة، الذي جاء واهيا لا يستند إلى أسباب مقنعة درامية بشكل كاف. لكن في المجمل هي رواية من النوع الذي صار نادرا الان فهي ممتعة وراقية في آن وتستحق القراءة بكل تأكيد.