နှင်းငွေတစ်ထောင့် မိုးတစ်မှောင့်

by တက္ကသိုလ်ဘုန်းနိုင်

Genres: Drama

126 pages, Paperback

About the author

ရန်ကုန်တိုင်း သန်လျင်မြို့၌ အဖ ဦးထွန်းဖေ၊ အမိ ဒေါ်ကြင်မေ တို့က ၁၆ ဇန်နဝါရီ ၁၉၃ဝ ကြသပတေး နေ့တွင် မွေးဖွား ခဲ့သည်။ မွေးချင်း ငါးယောက်တွင် ဒုတိယမြောက် ဖြစ်သည်။ ငယ်မည် မောင်ဖေသိန်း၊ လက်ရှိ အမည်ရင်းမှာ ဦးခင်မောင်တင့် ဖြစ်သည်။

မက်သဒစ် ကျောင်းများ (သန်လျင်၊ တွံတေး၊ သုံးခွ)၊ အစိုးရ အထက်တန်း ကျောင်းများ (ပြည်၊ ပေါင်းတည်)၊ ဗုဒ္ဓ ဘာသာ စာပေကို ကိုးတောင်တွဲကျောင်း (ထုံးဘို)၊ တက္ကသိုလ်ဝင် စာမေးပွဲ (၁၉၄၈)၊ ရန်ကုန် တက္ကသိုလ် (၁၉၄၈)၊ စိတ်ပညာ ဝိဇ္ဇာ ဂုဏ်ထူးဘွဲ့ (၁၉၅၅)၊ အမေရိကန် ပြည်ထောင်စု နယူးယောက်မြို့ ကိုလံဘီယာ တက္ကသိုလ် ဘွဲ့လွန် မဟာ ဌာနမှ မဟာ ဝိဇ္ဇာဘွဲ့ (၁၉၅၉ - ၆၁) တို့ကို ဆည်းပူး အောင်မြင် ခဲ့သည်။

မန္တလေး ယူနီဗာစီတီ ကောလိပ် စိတ်ပညာ ဌာနမှူး (၁၉၅၅)၊ တောင်ကြီး ကောလိပ် ကျောင်းအုပ်ကြီး (၁၉၆၂ - ရ၂)၊ ပုသိမ် ဒီဂရီ ကောလိပ် ကျောင်းအုပ်ကြီး (၁၉၇၂ - ရ၇)၊ မော်လမြိုင် ဒီဂရီ ကောလိပ် ကျောင်းအုပ်ကြီး (၁၉၇၇ - ၈၅)၊ မော်လမြိုင် တက္ကသိုလ် ဒုတိယ ပါမောက္ခချုပ် (၁၉၈၆ - ၈၈)အဖြစ်တာဝန်ထမ်းဆောင်ခဲ့သည်။ပညာရေး တက္ကသိုလ် ပါမောက္ခချုပ် အဖြစ်တာဝန်ထမ်းဆောင်နေစဉ် ၁၉၈၈အရေးအခင်း၌ စစ်မှန်သောဒီမိုကရေစီကို တောင်းဆိုရာတွင် ပါဝင်ခဲ့မှုကြောင့် စစ်အာဏာပိုင်များက အငြိမ်းစားပေးခြင်းခံခဲ့ရသည်။

မြန်မာ ပညာရေး လေ့လာရေး အဖွဲ့ ခေါင်းဆောင် အဖြစ် ဂျပန် (၁၉၇၇) နှင့် တရုတ် (၁၉၈၃) သို့ လည်းကောင်း၊ မြန် ပညာရေး အထူး လေ့လာရေး အဖွဲ့ ဒုတိယ ခေါင်းဆောင် အဖြစ် ဂျပန် (၁၉၈၁) သို့ လည်းကောင်း၊ အာဆီယံ - ကိုရီးယား ယဉ်ကျေးမှု ခေါင်းဆောင် ဖလှယ်ရေး အစီအစဉ် တွေ့ဆုံ ပွဲများတွင် မြန်မာ ကိုယ်စားလှယ် အဖွဲ့ဝင် အဖြစ် ၁၉၉၉ နှင့် ၂ဝဝဝ ပြည့်နှစ်များ၌ ကိုးရီးယား သမ္မတ နိုင်ငံသို့ သွားရောက် ခဲ့ပြီး စာတမ်းများ ပြုစု ဖတ်ကြား ခဲ့သည်။

စာပေနယ်သို့ ရှုမဝ မဂ္ဂဇင်း ပါ "ဒွိဟ" ကဗျာဖြင့် ၁၉၄၉ ခုနှစ်တွင် စတင် ဝင်ရောက် ခဲ့သည်။ ထင်ရှားသည့် လုံးချင်း ဝတ္ထုရှည် (novel) အချို့မှာ ညီမလေးရယ် စိုးရိမ်မိတယ် (၁၉၅၈)၊ သူ့ကျွန်မခံပြီ (၁၉၅၉)၊ လွမ်း (၁၉၆၂)၊ မိုးည အိပ်မက်မြူ (၁၉၆၂)၊ ဤမြေမှသည် (၁၉၆၃)၊ စိမ်းနေဦးမည့် ကျွန်တော့်မြေ (၁၉၆၃)၊ မောင့်ဘဝ ညအလားကွယ် (၁၉၆၃)၊ သူငယ်ချင်းလို့ပဲ ဆက်၍ခေါ်မည် ခိုင် (၁၉၆၄)၊ ချစ်သော ဤကမ္ဘာ (၁၉၆၄)၊ လွမ်းတေး မဆုံးစေနှင့် စောသခင် (၁၉၆၅)၊ ကမ္ဘာကုန် ကျယ်သရွေ့ဝယ် (၁၉၆၆)၊ နွေကန္တာဦး (၁၉၆၈)၊ ဝသန် လေချိန်မှန်ကူး (၁၉၆၉)၊ တပြည်သူ မရွှေထား (၁၉၇၁)၊ နှင်းငွေ့တထောင့် မိုးတမှောင့် (၁၉၇၂)၊ ကိုယ့်အလှ ဘဝငွေလမင်း (၁၉၇၆)၊ စွန့်ခွာရသည့် နွေညများ (၁၉၈ဝ)၊ မိုးတွေ ရွာမှဖြင့် လျှင်ကွယ် (၁၉၈၄)၊ တိမ်ညိုအလွင့် လအမြင့် (၁၉၉ဝ)၊ ချစ်သူအိမ်အမိုး နောက်ဝယ် လ ပျောက်ခဲ့ခြင်း (၁၉၉၁)၊ မျက်ရည် လောကများ၏ ဟိုမှာဘက် (၁၉၉၂)၊ လေရူးသည် စာမတတ်ပါ (၁၉၉၅) စသည်တို့ ဖြစ်ကြသည်။ ထင်ရှားသည့် မဂ္ဂဇင်း ဝတ္ထုရှည် (novelette) များမှာ နှင်းရွက်ကြွေစော (၁၉၅၈)၊ မုန်းရစ်လေဦး (၁၉၅၈)၊ ရေပင်လယ်နှင် ငွေစင်ကြယ် (၁၉၅၈)၊ တန်ခူးလေနှင့် လျောတော့သည် (၁၉၆၁)၊ ပိတောက်နှင့် ကြိုပါမည် မာရီယာ (၁၉၆၃)၊ ကရုဏာ မိခင် (၁၉၆၃) တို့ ဖြစ်ကြသည်။ ဝတ္ထုတို အများ ကိုလည်း ရေးသားခဲ့ရာ ယင်းတို့ကို ပြန်လည် တင်ပြသည် (၁၉၆၅)၊ ဝတ္ထုတို ပေါင်းချုပ် အမှတ် ၁၊ ၂၊ ၃ (၁၉၆၉)၊ ဝိညာဉ်မှာ ဖူးသည့် ကြည်နူးမှု အလှပန်း (၁၉၉၃)၊ ကျွန်တော့် ဘဝ ပိတောက်ကမ္ဘာ (၁၉၉၃) စသည်ဖြင့် စုစည်း ခဲ့သည်။ စာပေ အနုပညာ ဆိုင်ရာ ကျမ်းများမှာ ဘုန်းနိုင့် အတွေး ဘုန်းနိုင့် အမြင် (၁၉၇၇)၊ ခမ်သိမ်းကလျာ ရှုဖွယ်သာတည်း ပထမတွဲ၊ ဒုတိယတွဲ (၁၉၉၄) တို့ ဖြစ်ကြသည်။ အင်္ဂလိပ် - မြန်မာ နှစ်ဘာသာ ဘာသာပြန် ကဗျာ စာအုပ် များမှာ ရှားလော့ဒေဝီ (၁၉၉၆)၊ တမ်းတမိခြင်း (၁၉၉၇) တို့ ဖြစ်ကြသည်။

နိုင်ငံခြား ဘာသာသို့ ပြန်ဆို ထုတ်ဝေ ခဲ့သည့် စာအုပ်များမှာ ရုရှား ဘာသာဖြင့် 'သူ့ကျွန်မခံပြီ' (၁၉၇ဝ)၊ တရုတ် ဘာသာဖြင့် 'စွန့်ခွာရသည့် နွေညများ' (၁၉၈၈)၊ ဟင်ဒီ ဘာသာဖြင့် 'သူငယ်ချင်းလို့ပဲ ဆက်၍ခေါ်မည် ခိုင်' (၁၉၉၄) တို့ ဖြစ်ကြသည်။ 'နှင်းငွေ့ တထောင့် မိုးတမှောင့်' ဖြင့် ၁၉၇၂ ခုနှစ်တွင် အမျိုးသား စာပေဆု ရရှိခဲ့သည်။

Reviews

[Kino · Rating 5 out of 5]

မိဘတွေဆီကနေ ကလေးတွေက trauma တွေ ရတာက စာအုပ်ထဲမှာရော အပြင်လောကမှာရော အဖြစ်များကြတယ်။ Happy Ending လေးမို့ ဖတ်မိတံ့အခါတိုင်း ရင်ထဲ သက်သာရာရပါတယ်။
ဒါလေးကိုတော့ အမှတ်ရနေမိမယ် ထင်တယ်၊ “လောကကြီးက ထင်သလောက်လဲ မဆိုးပါဘူး” ဆရာမြင့်နွယ်။

[Htet Aung · Rating 5 out of 5]

စာအုပ်အမည် : နှင်းငွေတထောင့် မိုးတမှောင့်_တက္ကသိုလ်ဘုန်းနိုင်

'နှင်းငွေတထောင့်မိုးတမှောင့်' ဟာ စိတ်ပညာကို အခြေခံပြီး ရေးထားတဲ့ အချစ်ဝတ္ထုကောင်းလေးတစ်ပုဒ်ပါ။ ဆရာကလေ သူ့ထုံးစံအတိုင်း ဘဝဒဿနတွေကို အတွေးနုနုရွရွ လှလှလေးတွေနဲ့ သဘာဝကျကျလေး ဖန်တီးထားတာ...
တက္ကသိုလ်ဘုန်းနိုင်က ...တက္ကသိုလ်ဘုန်းနိုင်ပါပဲ ။
ဆရာ့ရဲ့ ကဗျာဆန်တဲ့ စကားလုံးအနုအလှလေးတွေကို အရမ်းကြွေခဲ့ရသူပါ🤭🫣

ကိုမြင့်နွယ်၊ စင်သီယာနဲ့ မွန်မွန်...

စင်သီယာ နဲ့ ကိုနေအောင်တို့ရဲ့ အချစ်မပါတဲ့ အိမ်ထောင်ရေးမှာ trauma တွေနဲ့ ဒုက္ခရောက်ခဲ့ရသူ သမီးလေး ...စိတ်ကြောင့်ကြေပီး ဒုက္ခိတဖြစ်သွားရသူလေး မွန်မွန်
...

"နတ်သျှင်နောင်ဆိုတဲ့ ကဗျာဆရာကြီးက
စပ်ဖူးတယ်၊ တုခန့်ဘက်ပြိုင်၊ စံသာတိုင်သား၊
ခြောက်ဆိုင်မြင့်ခန်း၊ လှတဝှန်းဝယ်၊
တောင်စွန်းညာဖျား၊ ထွတ်တင်ထားနှင့်၊
နှစ်ပါးနှိုင်းရှည့်၊ နှုန်းလာလှည့်လည်း၊
ဖြိုးပြည့်လလျှံ၊ ကြယ်နှယ်ရံလိမ့်...တဲ့”

"ယူ့ကဗျာတွေကို စင်သီယာ နားမလည်ဘူး”

"ကိုယ်ရှင်းပြပါ့မယ်၊ နတ်သျှင်နောင်ကဆိုတယ်၊
တလောကလုံးမှာ သူ့ချစ်သူဟာ အလှဆုံးပါတဲ့၊
တခြားဘယ်သူကမှ မမှီပါဘူးတဲ့၊ လူချင်းမပြောနဲ့နတ်ပြည်ခြောက်ထပ်က နတ်မိဖုရားတွေ
လာပြိုင်တာတောင်မှ လမင်းကြီးကိုလာပြိုင်တဲ့
ကြယ်လေးတွေသာ ဖြစ်သွားမယ်တဲ့"

"အဲ့ဒါနဲ့ဘာဆိုင်လို့လဲ"

"ဆိုင်တယ်လေ ကိုယ်ကလည်း လမင်းကြီးကို
မြင်ဖူးတော့ ကြယ်လေးတွေကို လှတယ်လို့
မပြောတော့ဘူး"
....
" ဤကတ်ဖုံးလေးသည်အသုံးဝင်နေပါသေးသည်၊
အသည်းမှာ ဒဏ်ရာလေးနှင့်ဖြစ်သော်လည်း ကိုယ့်ဘဝလမ်းကို လျှောက်နိုင်သော လူငယ်သည် အင်း သည်လောကမှာ အသုံးဝင်ပါသေး၏"
… ကိုယ့်ဘဝမှာလေ လောကတွေကြုံပီး စိတ်ထိခိုက်ရလွန်းလို့ ဘယ်ဘက်လက် လက်ချောင်းလေးတွေသွေးမလျှောက်တော့ဘဲထုံးပီး လေဖျက်သလို လှုပ်မရဖြစ်သွားခဲ့ဖူးတယ် ...ညတွင်းချင်းကြီး ဖြစ်သွားတာဆိုတော့ အရမ်းရှော့ဖြစ်သွားတာ...ဘယ်ဆေးခန်းသွားပြီး ဘာလိုလုပ်ရမလဲ ဘယ်တွေများဆက်ဖြစ်ဦးမလဲ ဆိုပြီး တစ်ပူပေါ်တစ်ပူထပ်ဆင့် ဖြစ်ခဲ့ဖူးတဲ့ အဲ့အချိန်မှာဘဝရဲ့ အဖြေရှာရင်း ဒီစာအုပ်လေးကို ဖတ်မိတာဘဲ ... Thank u, Universe😘
ဒီမှာဟိုမေးဒီမေး ဟိုပြဒီပြ မြန်မာပြည်က ဆေးပြန်မှာ အဲ့လိုတွေ ဖြစ်နေချိန်မှာ ...ဒီစာအုပ်လေးက right medication ဖြစ်ခဲ့တာ ...စိတ်ကြောင့်ဖြစ်တဲ့ ဝေဒနာ စိတ်ကိုကုမှ -ဖြေမှ -လျှော့မှ - Healing လုပ်မှ- released & let it go လုပ်မှ ပျောက်ကင်းချမ်းသာရာ ရမယ် ဆိုတဲ့ message & ဖြေဆေးလေးကို ရခဲ့လို့ ဆရာကြီးကို သိပ်ကျေးဇူးတင်တရ် 😘

#Suu80
#suu80thbirthday
#booksbooksbooks
#reading
#HtetHtetAung
#တက္ကသိုလ်ဘုန်းနိုင်
#နှင်းငွေတထောင့်မိုးတမှောင့်