Хүүхэд ба гэр бүл

by Т.Навчаа, М.Түмэннасан

"ХҮҮХЭД ба ГЭР БҮЛ" 100 хуудастай номоо эцэг эхчүүдийн эрүүл мэндийн боловсролыг дээшлүүхэд зориулан туурвилаа.
Эцэг эхүүдийн эрүүл мэндийн боловсролоос гэр бүлийн эрхэм гишүүн - хүүхдийн эрүүл мэнд, өсөлт хөгжил хамаардаг.
"Яасан нь мэдэгдэхгүй" уйлж халуурч, өвдөж шаналсан хүүхдийн учрыг олох амаргүй ч аливаа өвчин эмгэгийг нотолгоонд суурилсан орчин үеийн ангаах ухааны нэгдсэн нэг зарчмаар оношлон эмчлэх стандарт, удирдамж даярчлагдаж буйг баярламаар ололт гэлтэй. Үсрэнгүй хурдацтай хөгжиж буй салбарын нэг нь анагаах ухаан, түүнтэй хөл нийлүүлэн алхах нь түмэн олныхоо өмнө хүлээсэн эмч бидний үүрэг юм.
Манай эцэг эхчүүд хүүхдийнхээ өсөлт хөгжил, өвчин эмгэгийн талаар ямар шинж, зовиураар эмчид ханддаг, ямар асуудалд илүү дэлгэрэнгүй тайлбар авахыг хүсдэг, ямар буруу ойлголт, хандлага, цуу яриаг засаж залруулах ёстой, өнөө цагт хүүхдийн анагаахын ямар ойлголт, зарчим (оношилгоо, эмчилгээ) өөрчлөгдсөн, эцэг эхчүүд заавал мэдэж байх ёстой зүйлс зэргийг тунгаан анхны хэвлэлээ туурвив.
Олон эцэг эхчүүдийн хүсэлтээр туурвисан энэхүү ном тун удахгүй хэвлэгдэн гарч таны гар дээр очих гэж байна.
Энэхүү ном нь хүүхдийнхээ төлөө бүхнээ зориулдаг аав, ээж, өвөө, эмээ төдийгүй хүүхдийн эрүүл мэндэд санаа тавих хэн боловч уншиж судлахад зориулагдсан болно.
Зөвөлгөө, мэдээллийг илүү ойлгомжтой хүргэх үүднээс номыг "Асуулт - Хариулт" хэлбэрээр бичиж холбогдох зургаар баяжуулан гол нэршлийг англи хэллэгээр хадаж өгсөн.
Танай гэр бүлд болон үр хүүхдэд тань эрүүл энхийн нэгэн жаргаланг хүсэн ерөөе.
Хүндэтгэсэн,
Хүүхдийн эмч Т. НАВЧАА /АУ-ны доктор, Клиникийн профессор/
Хүүхдийн мэс заслын эмч М. ТҮМЭННАСАН /МУ-ын Төрийн шагналт, АУ-ны доктор, Клиникийн профессор/

100 pages, Hardcover

First published March 7, 2015

Reviews

[Undrakh · Rating 4 out of 5]

Асуулт хариулт хэлбэрээр бичигдсэн болохоор товчоор яг хэрэгтэй байгаа мэдээллээ уншчих боломжтой гоё ном байна. Хүүхдийн эрүүл мэндээр хязгаарлагдахгүй, шинэ аав ээжүүдэд тус болох өөр зөвлөгөөнүүдийг бас багтаасан. Манайхан ер нь эрүүл мэндийн боловсрол муутай, тэгснээ бие биедээ зөвлөгөө өгөх дуртай юм шиг. Диатез гэж зөвхөн Монгол, Орост л тавигддаг онош болох, хүүхдийн толгой хөлрөх нь тархины даралттай гэсэн үг биш, салхин цэцэг тусахад метилин түрхэх нь шинжлэх ухааны үндэслэлгүй гэх мэтээр ам дамжсан мэдлэгийг няцаасан хэд хэдэн тохиолдолтой таарлаа. Эм, эрүүл мэндийн салбар маань Оросоос их хамааралтай байсан, одоо ч гэсэн хэрэглээнд байдаг эмийн бүтээгдэхүүнүүд дунд зөвхөн Орос болон хуучин ЗХУ-д хамааралтай байсан улсуудад хэрэглэгддэг эм их байдаг юм байна. M+ аппликешн дээр уншсан, kindle-ых шиг амар биш ч утсан дээр бол богино номыг уншчихаар л апп байна лээ.

[Enjgaa · Rating 5 out of 5]

Ээж болохоор төлөвлөж анхны хүүхдээ өлгийдэн авах гэж байгаа хүн бүр уншвал зүгээр ном санагдав. Дөнгөж төрсний дараа нярай орчиндоо дасах үйл явц, нийтлэг өвчин, түүний илрэх байдал, эмчилгээ, яаралтай авах арга хэмжээ, хүмүүсийн нийтлэг асуудаг 100 асуултуудад хариулжээ.

[П. Батцэцэг · Rating 5 out of 5]

Баярлалаа