إعلان بداية الحرب - ديوان بالعامية المصرية

by Muhamed Essam

تم تأليف محتوى الكتاب خلال 3 أعوام ( 2015، 2016، 2017 ) يحتوي على أفكار مختلفة من القصايد عددها 39 قصيدة.
من الكتاب :-
يارب انا ماكُنتِش كدة
رجلي الشمال تِقلِت - أوي -
وبقيت بَزُك من التَعَوُد .. مش عَرَج
وبقيت بكشَّر من مفيش وقت الهَرَج
معرفش انا اللي بقيت رِخِم
ولا التعب هو المُسَيطر ع المَزاج
على كل حال
" الصبر مفتاح .. " - لأ بلاش
الجُملَة دي مبحبهاش
بتزيدني صبر!
وفـ قلبي نَغزَة باحِسَّها تأنيب ضمير
او دعوَة على شخصي الضعيف
من شخص ما
وفي راسي زلزال لما بيقوم بَرتِجِف
وبخاف انام
أصحى على القبر وحساب
وذنوبي كسبانة ومفيش حل وهروب
لأ معتقِدش ..
فيه أكيد إتاحِة فُرصَة أتعادِل واتوب
وبقيت كئيب
بسكُت من اليوم مُعظَمُه
واضحَك اذا صادِف وملِّيت م السكوت
طول عمري فقري
زيي زي لمبَة في فرع زينِة عيد
.. جديد
مبتشتغلش
وتاريخ لـ شخص عظيم مُؤَثِّر
متنقلش
كلمِة " بحبِّك " من طرف واحِد
مقالش
أول مُرتَّب .. شَهر شُغل ومرمطة
فيه احتمال انُّه اتنَشَل
بزعل عليه
يارب انا ماكُنتِش كدة
من بعد ما اتعوِّدت ع الوضع الجديد
مابَقِتش فاكر كنت إيه!

160 pages, Paperback

First published January 27, 2018

About the author

*كاتب مصري مواليد 19 فبراير 1995
*صدر له ديوان " إعلان بداية الحرب" عام 2018
*وديوان "سالب ميم" عام 2019
*وديوان "مستعمل" عام 2020

Reviews

[Yasmin Hamid · Rating 5 out of 5]

" إعلان بداية الحرب " !
ايه العظمه دي والله !
انا عامله حسابي ع انه هيبقى شئ عظيم وش طبعاً بس إني أنبهر بيه كده ماكنتش اتوقع والله !
بالظبط جه قدامي وصف الجنه بنقول عنها حلوه بس عمرما ما هنتوقع قد ايه هي حلوه بجد غير لما ربنا يأذنلنا بدخولها .
انا خلصته حوالي 3 مرات عشان أكون مُلمة بكل جزئية فيه
سافرت مرتين بالديوان معايا و مقرأتش منه وقتها بس اما بقرأ فيه حقيقي ببقى ف عالم تاني من الأحداث و الأشياء العظيمه داخل جو اللعبه !
بالظبط زي " عمرو واكد " ف دور "النقشبندي" ف مسلسل "حديث الصباح والمساء" لإحدى روائع الراحل " نجيب محفوظ " ، بتجول بين أحداث و قصص و تشييهات و كواكب و خيالات و حقايق فظييعه و عظيمه جدااا جداا .
طلعت مدكن قصايد عالميه يا شاعر الأجيال الجايه 🔝
و قصايد تفوق جمال قصايدك المعروفه بيك و اللي انت معروف بيها .
كمية تشبيهات تستحق عليها جوايز مش جايزه واحده
كل قصيده بل كل صفحه بل كل سطر و كل كلمه تستحق أنها تُدرس بجد .
شويّه حقايق و قصايد حرّاقه بالمعنى الحرفي و الأحوال القائمه حوالينا تستاهل عليها كتييير والله
كنت بقرأه ما بين إني عاوزه اعرف نهاية العظمه دي اييه و بين اني لا مش عايزه اخلصه بسرعه اوي كده
و افتكر قصايد و احداث ارجعلها و تفاصيل كتير جدا لمستها جدا و لمستني ، و الحاجات القصيره بين القصايد دي بتعبر عن لونك و بتنم عن شخصيتك ، و اسلوبك هيتعرف بيهم جدا
اتمنى الديوان ياخد حقه ولو شويه بس و حقيقي هيكسر الدنيا ..
خطوه جميله جدا مبروك عليها و استمر ف طريق انت اديته كتير جدااا و ضفتله و هتضيفله اكيد

[نرمين على · Rating 5 out of 5]

من الدواوين اللي كنت براهن عليها
فيه قصايد لوحدها والله تعتبر ديوان :))

[محمود عبدالناصر · Rating 4 out of 5]

.
تبدأ الرحله من الارض مجازا وحقيقة . وكأن الشاعر القى بى داخل قاعة عرض سينيمائية لتنهمر على رأسى المشاهد والتساؤلات ..استنكارات وتخبط بدأت ب "يا رب انا مكنتش كده !" واستمرت لتتوالى المشاهد والصور المبهره ..خيبات عظيمه وبعض الانتصارات . كان الشاعر ينتشى بها فرحا كى لا يسقط . انتشيت شعريا بما صنعه الشاعر فى رحلته من الارض صاعدا نحو القمه برؤية مغايرة وتجربة فريدة فى الصدق وصور شعريه غاية فى الجمال والروعه . تراكيب جديده لم اقرأها من قبل وموسيقى متوازنة تتنامى مع تنامى الصعود من الارض الى القمه . وخيال خصب يتجلى فى سطر
"لو يسألونى عن حضنك هقول
مجربتوش....تخيلته.! "
وختاما باصدق قصه . بعث بها محمد عصام لتكون " اخر جواب " من الارض
.
الى المريخ
.
فى هذا الجزء من الرحلة يبدأ الشاعر بالمصارحه والبوح ..تجلت معاناته وباح واشتكى وافصح فى النهاية ان النهاية ليست الاهم
"وبعد ما تخلص الرحله
باحس بوحلة الوحلة لان المخرج اتقفل
كأن العمر كان قاصد يقولى معادش فيه اخر
وان الفايده فى الرحله "
.
اما عن المشترى
.
انتقلنا من الشكوى والبوح الى المحاولة . مجرد المحاولة . محاولة لوجود جمال بين قبح هذا العالم . بحث عن الاكسجين داخل انفجار بركاني . حيرة وتساؤل
"عمرك قريت مانشيت صحفى خطير يفيد
مزيكا قتلت شخص افرط فى التعاطى
لحن ادى الى الوفاه
تركيب مرشح للكمانجا عشان بتعزف لحن بيلوث هوا
عمر الموسيقى ما كات خطر "
استطاع مزج فلسفته المغايرة الفريدة مع ادواته الشعرية ليصنع لوحة جميله معلقة على انقاض روحه على خلفية موسيقية غاية فى الجمال . تماهت كل هذه الاشياء تصنع لحنا اسطوريا يعلو على "حرب الالات" . كنت افضل ان تكون هذه المرحلة نصاً واحدا ولكن على جميع الاحوال انها مرحلة رائعة

زحل
.
بائت المحاولة بالفشل وتقوقع على نفسه ولم تستطع محاولاته ان ترسم عالما اجمل فكانت خلاصه المرحلة

"السطر دا مكسور ..فوصفنى بالملى"
.
اورانوس
.
كما هى العادة ..عندما تشتد الازمه لا يكون الهروب الا شعراً. سرد الذكرايات ومصاحبة الشعر وتقاسم المعاناه . وبعضٌ من كبرياء
"كتذاكر قطر بتحلالى
ف اقطعها برغم انى عاوزها "
علاقة الشاعر مع شعره وكيف يكون مخلصاً ورفيقا وكيف يكون مستنزفاً لكل شئ
"لسه الاوهام ماليه جيوبى
وانا لسه بحوش واصرفنى"
.
نبتون
.
هذه المرحله هى حياة الشاعر ..طموحاته ورجائه . خيباته وانتصاراته. يسطر فيها فلسفة الفرص والندم والرضا برؤية مختلفه واقناع قوى . محاولة رسم ملامح الحياه بقلم الشاعر ..اكتفاؤه بخياله وقلمه ليفعل ما يريد ويعود ليقول
"يا ريتنى نزلت متأخر"
.
بلوتو
.
استكمالا لسرد المعاناه مع الشعر وما يفعله فى حياة الشاعر
"نصين لخريطه بيتقابلوا
عملوا من الواقع فانتازيا"
هذه المرحلة مكملة لما قبلها وآخذة لعبتنا الى مستويات متقدمة وخطيرة
.
الزهرة
.
هنا اوج المعضلة ..بعد التلميح باستحياء فى كل الفصول . هنا لم يستطع التحمل . انفجر معريا جرحه لمفترسات المجاز . انتج صدقا على هيئة سطور . القى خيباته فى جعبتها وسألها الرد
"صبيت قزايز كلامى
فى كاساتك الفارغين
فى صحتك ولا ...مش ناوية تملى الكاس ؟"
ولم يأت رد . خذلته وخذلتهم الحياه ولم يخذله الشعر فرجع خائباً
"بخرج بعد تنازلى
من ردها ل(حلمى) ورجعت .! "
.
عطارد
.
المحاكمه . كل ما استطيع قوله انه يحاكم نفسه ويحاسبها ويهيئها للنهاية .! فقال
"واكتبيلى اسمى بالفونت العريض
زاير الواقع يا دوب عابر سبيل "
.
الشمس
.
لن استطع ان اتخيل نهاية اجل من تلك . انتهت الحرب واعلنت الشاشه "Game Over"
لو اعاد الشاعر كتابة النهاية مائة مره لن يجد افضل من هذا
"الشمس رمز العزله خوفاً منها
والعزله فرض عليها او اسلم قرار
دارت ما بينهم حرب فجأه
وكل كوكب خد قرار شن الهجوم
وبحسن نيه الشمس حبت تلقى حل
سابت مكانها وسببت للكون دمار "
.
اجمالا ..محمد عصام شاعر حقيقى ..صادق لابعد حدود الصدق وهو ما يميزه .. له تجربة واضحة المعالم صاغها بأحكام وجمالية شديدة .وبفلسفة قويه تدعم ما يريد قوله . يمتلك ادواته جيداً ويحسن استخدامها . صوره جديده وتراكيبه عذبة وخالصه . مختومة بأسمه . لا تخطأها عندما تقرأها . ديوان جميل ملئ بخام الشعر. تقسيمته رائعه وغلافه اقول الان بعد القراءة انه عبقرى . يستحق الاقتناء واخيرا اعيب عليه فقدان النشوه تدريجيا من البدايه القوية الى التهاوى والتراخى ولكنى اغفرها لما رأيته فى الختام
تقييمى للديوان 4 من5. والنجمة الخامسه احجبها لان الديوان لم يصل بى الى الانبهار . انشيت واستمتعت وعشت تجربة فريده جدا ومميزه ولكنى لم اصل الى الانبهار ..فى انتظار اعمال قادمة واقول اخيراً
.
"محمد عصام احدى الشرارات التى ستوقد نيراناً شعرية قادمة "

[Wafaa MOsbah · Rating 5 out of 5]

أول عمل أقراه من أعمال المعرض.
انا مبسوطة جدًا الحقيقة باللي قرأته ده..
يعني انا عارفة ان محمد عصام موهوب ومتمكن ومع ذلك اتفاجئت بالمستوى الرهيب وبالدماغ دي!
سواء افكار او اوزان او الفاظ او تشبيهات كلها ممتعة جدًا حقيقي.
انصح أي حد بيحب الشعر يشتري الديوان ده حقيقي.