يوميات رحالة 2

by Ahmed Hosni

قبل ما تبدأ في قراءة الكتاب ده.. جاوب بينك وبين نفسك على الأسئلة دى..
- مستعد لتقبل عادات واراء مختلفه تماماً عما تعودنا عليه؟
- مستعد لتقبل فكرة خطأ معلومات اتربينا عليها؟
- مستعد للتغيير وفعل أشياء جديده قد تكون أنكرتها قبل كده؟
إذا كانت اجاباتك ب "نعم".. يبقى أنصحك بشده إنك متضيعش وقتك في المقدمة وتبدأ قراءة الكتاب فورا.. فهذا الكتاب يناسب شخصيتك وعقلك تماما.
اما إذا كانت اجابتك ب "لأ".. اذن تقبل تحياتي.. هذا الكتاب لا يناسبك.. انصحك بشده إنك متضيعش وقتك حتى في تصفحه.. من فضلك تواصل معايا علشان تسترد فلوسك.
في هذا الكتاب "والكتاب السابق" بحاول انى انقل بأمانه كل ما رأيت في الخارج بعين مقارنه وناقده للداخل.. قد يكون النقد قاسى وربما خرجت السخرية لاذعه.. ربما غصب عنى حركت دموع في عينيك..
اسف جدا.. مش قصدى إنك تحزن او تكتئب.
بس هو مين قال ان وضعنا الحالي لا يستحق البكاء؟
دى وجهة نظرى في أدب السفر والترحال.. ان كنت عاوز تتفسح وانت في مكانك وتتفرج على صور حلوه.. يبقى افتح اى قناة من بتوع السياحه على الريسيفر وعيش واستمتع.
اما إذا كان عندك اهتمام تعرف "فين" و"ليه" و "علشان ايه" و"ازاى" و"امتى"..
يبقى ادينى ودنك.

216 pages, Paperback

First published January 23, 2018

Reviews

[Nihal Mustafa · Rating 5 out of 5]

كل سفر له مزاياه
فإن ذهب المسافر إلى أجمل من بلده سيتعلم كيف يطورها
و إن قاده الحظ إلى أسوأ منها فربما يتعلم كيف يحبها........ صمويل جونسون

يوميات رحالة ٢ الهند ، اسبانيا

في بداية الكلام عن كل دوله كان الكاتب بيوصف خطوات السفر وده في حد ذاته بدايه مميزه لان الكاتب بشكل ده عايز يقول للقارئ خليك معايا ايه رايك تشركني في الرحلة وتشوف بعينك اللي انا هشوفه ونخوض التجربة سوي...انا مش بحكيلك حكاية شخص سافر بلد وبيقولك ده فيها الاثر الفلاني ولا النادي العلاني ولا بيحكي عن تراث وحضارة دول وخلاص لان ده في كتير من الكتب بتتكلم وبتحكي عنه لكن الاختلاف في التجربة في حد ذاتها الفكره انك تسافر بعين الكاتب وتفكر بعقلك انت... تمشي مع الكاتب خطوه بخطوه اه بس كمان من بين سطور الرحلة حاول تدور علي سلم تبدأ من خلاله مشوارك او رحلتك انت...

#الهند ...بلد غاندي وجواهر لال نهرو السياسي القديم .. بلد غريبة بيجمع فيها كل حاجة وعكسها اكتر من مليار انسان واكتر من ٣٠٠ ديانه والاف اللغات واللهجات..ثقافات وعادات مختلفه ومع ذلك عايشين مع بعض من غير اي مشاكل وقدرت كمان تصهر كل التنوع ده في حياه واحده وتحت علم واحد...علم الهند

بدانا من بنجالور او(بنجالورو بالهندي) ودي من المدن المرتفعة في مستواها المعيشي بالمقارنة مع باقي مدن الهند ..وده لانها تعتبر القرية الذكية بتاعة الهند فيها كل الشركات العاملة في نظم المعلومات كمان تعتبر تالت اكبر مدينة هندية من حيث السكان ..زار فيها الكاتب شركة (ويبرو) واكتشف انها مش بس شركة كبيرة حجما ..لا.. وكبيرة قيمة مادية ومعنوية ...الشركة بتتفاعل مع المجتمع الهندي بتتاثر بيه ويتاثر بيها بتقدمله مساعده والمجتمع بيساعدها..الاتنين بيكبروا ببعض ومع بعض...الاتنين ليهم هدف واحد اسمه الوطن .. متقدش تفصل الشركة عن المجتمع او العكس.. الشركة تعتبر من مقومات الحضارة الهندية الحديثة واللي اكتر من كده الشركة مجهزة بالكامل انها تقدم كل الخدمات الحياتية اليومية للعاملين فيها (اسرح بخيالك علي قد ما تقدر برضو عقلك مش هيجيب التصور الحقيقي)

ودلوقتي تعالوا نروح لمعبد هانومان وده تاني مكان يزوره الكاتب ..المعبد مش كبير جوه منه في تماثيل كتير ألوانها زاهية ..تماثيل عادية جدا معمولة من الجبس ..لاحظ الكاتب ان من باب المعبد لغاية محراب الصلاه الناس بتزحف علي ايديها ورجيلها وبطنها وبعد ما سال وبحت وقرا طلع الموضوع معقد لكن الكاتب حكي السبب ببسطه ممتعة..كمان كان في ملاحظة تانيه ملفته للنظر لما اذن اذان العصر الموسيقي اللي كانت شغاله داخل المعبد اتقفلت ورجعت تاني بعد ما الاذان خلص..طيب ليه ... احتراما لقدسيته عند المسلمين ...

الزيارة اللي بعد كده كانت من نصيب لال باغ ودي عباره عن ٢٥٠ فدان من الاخضر والاحمر والاصفر والبنفسجي حديقة مفتوحة ممهدة وجاهزة للمشي ...الحيوان الاشهر في الهند وماليزيا هو القرد ..قرود ظريفه عايشة علي مشاكسة البشر ..وفي كمان الفيل الهندي وبغبغانات وطيور شكلها غريب وتماسيح شكلها ضعيفه بالمقارنة بالتماسيح الافريقية..

وبعد كده اخدنا الكاتب راح بينا علي طريق اجرا ...واجرا بلد محدوده جدا في شمال الهند مفيهاش غير اربع حاجات(تاج محل ، قلعة اجرا ، ورش الرخام وفندق ويندهام جراند)....

يااااااااا خبر علي وصف الفندق زي ما قال الكاتب الفخامة في ابهي صورها (اسرح بخيالك واستلف كمان خيال الناس وبرضو مش هتعرف توصل للوصف الحقيقي) كنت بقرا الوصف وافتكر دنيا سمير غانم لما قالت تبزير اوفر صراحة ...

ومن الفندق علي قلعة آجرا او القلعة الحمراء ودي تعتبر من ضمن اثار حضارة المغول الاسلامية..مبنية بالطوب الاحمر الرملي مساحتها في حدود ٤٠٠ الف متر مربع علي شكل هلالي نصف دائري بناها الامبراطور المغولي جلال الدين أكبر...القلعة زيها زي كل القلاع التاريخية بتحكي تاريخ سلاطين عظام ..حروب وثورات ودماء من اجل الحرية...في الجزء ده الكاتب كان بيحكي وفي نفس الوقت بيضفر معلومات في النص لدرجه يشعر معاها القارئ انه عايز يجيب كراسة ويقعد يسجل الكلام المكتوب وبعدين يبحث ويقرا زياده عن الشخصيات والاماكن دي....

وفي زيارة سريعة روحنا مع الكاتب لسوق الرخام ...سوق يشبة سوق النحاسين اوسوق الارابيسك في مصر..بيتعمل في المكان ده كل رسومات الرخام والصدف في العالم كله ...لا حظ الكاتب بعد زيارة السوق انها شغلانه صعبه اوي ..لوحة صغيرة عليها سورة الفاتحة ممكن تاخد ٣ شهور شغل...

تاج محل (رهان قديم ورهان جديد)هو عباره عن ضريح معجز البناء تحفة هندسية بناه الامبراطور المغولي شاه جهان علشان يكون قبر لزوجته ممتاز محل ويخلد فكرة وفاء الزوج للزوجتة الاثيرة ...الضريح يعتبر رمز من رموز التفوق الشديد للحضارة المغولية الاسلامية في فن العمارة وهو عبارة عن مستطيل كبير كل حاجة في النص اليمين متكرره بالملي في النص الشمال ..كأن النص الشمال هو انعكاس للنص اليمين في المراية ..لكن في تفصيلة واحده بس موجوده بشكل فردي علشان تبوظ التطابق المزهل ده ..يا تري ايه؟؟ ...واخيرا اشترك في البناء اكتر من ٢٠ الف عامل وتم البناء في حدود ٢٠ سنة وده غير الرخام والاحجار الكريمة والكريستال والفيروز المستخدم في البناء والنقوش ونضيف الخطاطتين الموهوبين علشان تكمل الروعة بس لاحظ الكاتب حاجتين في القبر اولهم ان لون الرخام المستخدم اللي المفروض يكون ابيض اتحول تدريجيا للاصفرار او الرمادي والسبب كان مفاجاة ...اما الملاحظه التانية ان تاج محل في وسط منطقة تقريبا شبه فاضية يعني في مربع مساحتة حوالي ١٠٠ كيلو مفيش غير الضريح بس طيب ليه ؟؟
وطبعا مازال الكاتب في وسط الحكاية بيقول معلومات وبيعمل مقارنات تحس انك بتستمتع وتستفيد وتتغاظ في نفس الوقت...

وقبل ما تخلص رحلة الهند كان في بعض الزيارات الخاطفة منها معبد هندوسي اسمه اكشردام قبلة حجاج الهندوس في كل مكان ...اسمه يعني معبد السلام (استفوجئت لما الكاتب حب يصلي الظهر راح صلي في المعبد!!!)...ومن المعبد علي مسجد السلطان عبد الغفور (هنعلن اسلامنا بقي) الطراز المغولي واضح اوي في بناء المسجد ..الطوب الاحمر الرملي والقبة البصلية والسقف العالي والعمدان الطويلة المليانه بزخارف والنقوش الفخمه بس المسجد حالته صعبه اوي مهمل تماما والسجاجيد قذرة جدا والمسجد بدون صحن ولا منبر مجرد ممرات طويلة والناس وقفه تصلي وخلاص ... بعد كده راح الكاتب علي باليكا بازار وده عبارة عن ميدان واسع (بزياده حبيتين كده) بيصب فيه ٢٤ شارع طويل وشوارع تانيه فرعية وكل ده عباره عن محلات ده غير البياعين اللي علي الارصفة وغير اللي تحت الارض لان ده ليلة تانية خاااااالص...(السوق ده ضروري الواحد يزوره زيارة من باب المعرفة بالشئ)....واخيرا مطار انديرا عاندي وقلق كبير اوي بسبب شنط الكاتب مع يافطة مكتوب عليها Danger ....

خلصت الرحلة لكن هنلاقي ان في الوقت اللي الكاتب بيحكي رحلته في الهند بتفاصلها لحظه بالحظة ويوم بيوم بيضيف ملاحظات تحس في وسط الكلام انها عمله زي الكشاف الكبير بيضرب نور جامد في عينك زي

((البلد المستقرة هو اللي بس يقدر يجيب فلوس ..الهند قدرت تشد فلوس المستثمرين))...

((النجاح ما هو إلا إدارة))

(( الهنود قدروا يصدروا نفسهم وصناعتهم الي خارج الهند ..مش عملوا نسخ من بره ليهم ....العالمية انك تصدر ثقافتك او شغلك او عاداتك بره بلدك ..العالمية ان بره مصر يعرفوا عن جو مصر عن طريق لغتي وشغلي ويشتروا مني بعملة بلدي منتج انا صنعته او زرعته مش اني اطلع بره اشوف من عمل ايه واقلده )) ...

((كونوا شياطين متعلمين ..وهيخرج من نسلكوا ملائكة ...افضل من كونكم ملائكة جهلاء يخرج من اصلابكم شياطين))...

((الحيوانات عالم برئ عايش ومتعايش في هدوء ...احنا اللي بنزعجها ..احنا اللي بنصورها ...بنقرب منها ونشدها من ديولها ...ونحسس عليها علشان نقول ياي...احنا اللي بنحبسها علشان نتفرج عليها))....

((الوطن هو الارض..احترم الشعب اللي يحط خلافاته واهوائه الشخصية علي جمب ويشتغل لهدف واحد قومي كبير ..هدف اسمه الوطن ))...

((الحروب ..الاختراع الانساني اللي بيحرق الاخضر واليابس))....((ملك اسبرطة ..اجاممنون..التاريخ بيفتكر الملوك بس..لكن الضحايا الحقيقيين من الغلابة والفقرا بيبقوا مجرد احصائيات في الكتب))....


#اسبانيا ...الاندلس سابقا (الكنز المفقود) بناها المسلمين ..القصور والقلاع والمساجد العظيمة والعلوم والثقافة والفنون والجيوش ...كل شبر في اسبانيا يحمل الطابع الاسلامي الاندلسي ...

وصلنا مع الكاتب لمدريد واللي بالمناسبة تعتبر اكبر مركز لتجارة لحوم ومنتجات الخنزير في اسبانيا كلها..الخنايز هناك عايشة في مزرعة نضيفه ومكيفه وفيها ميه وكهرباء (في ناس حلمها في الدنيا سقف يغطوا بيه نفسهم لنا الله)...

بدانا الرحلة من عند نادي ريال مدريد.. النادي الملكي ..اكبر نادي من حيث القاعدة الجماهيرية وحاليا أغني نادي في العالم ...٢٠ يورو هي تكلفة الجولة داخل الملعب ...علي باب النادي محل كبير ٣ ادوار كامله تذكارات ريال مدريد يعتبر احد الوسائل للدعايه للنادي ومصدر دخل ممتاز بشكل فوق الرهيب ووسيلة ذكية لاستثمار اسم النادي وشهرته...من داخل المحل في ممر للملعب ..الممرات المؤدية عبارة عن معرض لتاريخ النادي في اليمين والشمال جوائر لا حصر لها فاز بيها النادي ده غير شاشات عرض ضخمه بتعرض لقطات ماتشات قديمة وتاريخية ...والكئوس المختلفه في الحجم والالوان والاشكال بتوضح عظمة وتاريخ النادي.. اسبانيا قدرت تصنع من كرة القدم سلعة مهمه جدا كانها بيزنس كبير له اصول وقواعد وعلم بيدرس في الجامعات ودورات تدريبية ومراجع ...بمعني ادق علم كامل اسمه كرة القدم (رغم اني مش من محبي كرة القدم الا علي خفيف كده الا اني استمتعت بقراءة حكاية النادي وكنت غيرانه علي النوادي عندنا هو احنا ليه مش كده ..١٢ صفحة الكاتب بيحكي عن النادي وانا بستمتع وبتغاظ)...

ومستخدما المترو اللي شغال بكفاءة من سنة ١٩١٩ ومازال لسه جديد ..اتنقل الكاتب لشارع (جران فيا) نقدر نقول عليه الشارع الذي لا ينام ..شارع كل حاجة واي شئ فنادق ومطاعم ومسارح وسينمات وعروض اكروبات ..كل ما تتخيله موجود في الشارع ..كان في يوم من الايام مسرح للحرب الاهلية الاسبانية علشان كده اطلق عليه الشارع العظيم ...هو مش طويل لكنه قلب مدريد ...كل مبني من مباني شارع جران فيا له قصه...

في اخر الشارع كان في بوابه اثرية كبيرة جدا مليانه بزخارف والنقوش والتماثيل اسمها (بورتو دي الاكالا) او بمعني ادق بوابة القلعة مما يعني ان المنطقة كان فيها قلعة من ايام الاندلس...

وبعد كده اخدنا الكاتب لريتيرو بارك يعني حديقة الاستجمام الجميل ...مساحتها تقريبا ٣٥٠ فدان تعتبر رئه مدريد ..دايما فيها احتفالات موسيقية وندوات ادبيه ومهرجانات وكل ما هو جاذب لل��ياحه...فيها تماثيل في كل مكان لكل تمثال حدوته كبيره وكمان بتاكد علي الدرجة العاليه من الابداع والجمال اللي وصل ليها فن النحت ....

ومن الحديقة علي ميدان فخم وكله مباني اثرية كبيره.. في وسطه تمثال كبير لسيده جميله راكبه عربيه بيجرها اسدين اسمها (سيبيليش) اله الطبيعية والخصوبة عند الرومان...

خلصنا الميدان ووصلنا لساحة الشمس وده عباره عن ميدان اخر لكنه متوسط الحجم ..كان يعتبر البوابة الشرقية لمدريد زمان في القرن ١٥ لان كان في بوابه كبيره عليها شمس مشرقة ...بيصب من الساحة عشر شوارع رئيسية كبيره بتغطي كل مدريد...

ثم زيارة للمكتبة ..كل كتاب في المكتبة مترجم لاكتر من لغة كل ما عليك انك تختار وفي خلال دقايق تكون عندك نسخة الكترونيه ...الكتب اللي موجوده في المكتبة هي امهات الكتب عملاقة الحجم...

ثم بلاسيو رويال او القصر الملكي هو تاني اكبر قصر في اوروبا مساحته ١٤٠ الف متر مبني علي الطراز الكلاسيكي الاوروبي بيحتوي علي ٣ طوابق فوق الارض و٣ تحته مقسم لعدة اقسام ...كل قسم عبارة عن وحده قائمة بذاتها...القصر محاط بمزارات مختلفه ..بعضها حدائق وبعضها اثري تاريخي والبعض الاخر ديني ...داخل القصر في قاعة السلاح الملكي ملحق بيه متحف للالات وادوات التعذيب اللي كانت بتستخدم في العصور الوسطي..الالات افظع من الفظاعه نفسها...

في جنوب القصر الملكي هنقابل المودينا ودي عبارة عن كنيسة تاريخية بناها الملك فليب التاني في القرن ١٦ ..فيها كمية تماثيل ولوحات غاية في الدقة بشكل مذهل....

واخيرا ساحة اسبانيا ..ودي فيها معلمين مهمين من معالم مدريد اولهم ناطحتين سحاب اتنبوا في الخمسنيات اثناء حكم الجنرال فرانكو ..قيمتهم بسبب كونهم اول ناطحتين سحاب في اوروبا كلها ...المعلم الاخر عبارة عن تمثال كبير وحواليه تماثيل كثير صغيره بتحاكي وتخلد رواية دون كيشوت ومؤلفها وابطالها ..الرواية فلسفية عميقة بتمجد اخلاق الفرسان وقصص البطولات ..لكن تحمل في طياتها معني اخر للصراع بين الخير والشر او ازاي الانسان مممن يكون هدفه نبيل ونيته خير لكن بغبائه وسوء تصرفه يخسر كل شئ حتي حياته ...

طبعا كل اللي ذكرته يعتبر قشور القشور للاحداث والتفاصيل والمعلومات الرهيبة اللي موجوده في الكتاب ..استمتعت بكل جزء فيه...لغة الكاتب سهله بسيطه تحس انك بتلف معاه لدرجة انك عايز تقف تاخد نفسك من المجهود ....الفرق بين رحلة الهند واسبانيا ان في الهند كنت بحس ان في جمل عمله زي الكشاف بتنور فجاة في وشك ..لكن رحلة اسبانيا الكشاف شغال علطول ..كل الجمل ملفته وبتوجع زي((الديكتاتور يخطئ دائما حين يظن نفسه اطول عمرا من المحكومين بالحديد والنار))....((كرة القدم بديل للحروب))...

الختام باقتباس للكاتب
((حاجات كتير بتتغير في داخل الانسان مع السفر ...كل سفرية لازم تسيب في نفسك اثر ..موروثات بتتكسر ومعتقدات جديده بتتكون ..اسئلة بتتجاوب واسئلة اكتر بتظهر علي السطح))

[zahraa esmaile · Rating 5 out of 5]

انا من عشاق ادب الرحلات
ولما بقرأ لكاتب بحب اشوف مستواه ف الجديد
هيعلى؟؟؟هيقل؟؟؟
والمرة دى مع كاتب شاب مميز ف مكانه
بعد يوميات رحالة 1
كنت متشوقة للرحلة الجديدة
الكتاب كان رفيق السفر...الى اخترته بعناية ولم اندم الحمد لله
المرة دى الرحلة فى بلدين فقط
الهند...واسبانيا
رحلة اقصر من الجزء الاول
وممتعة اكتر
فى الهند
تقريبا كنت قربت اشم الروائح...واشوف بعين مش بعين الكاتب
وف اسبانيا...المقارنة مرعبة
ومؤذية نفسيا
الجميل ف الكاتب اسلوب المقارنات
مش مجرد حكى...لا حكى بمقارنة وكمية معلومات رهيبة
ودة سر التميز
رحلة قصيرة....ممتعة
وخمسة نجوم لكتاب تمنيت لو لم ينتهى
انتهى الرفيو
#الكتاب_رقم_40_لسنة_2018
#ادب_رحلات

[Fayza Atta · Rating 5 out of 5]

منذ طفولتى أعشق قراءة الأدب بصفه عامة لكن أدب الرحلات دايما له طعم مختلف ، شئ جميل أن الإنسان يسمع ويشوف تجارب الآخرين ويتعرف على عادات وطبائع الشعوب المختلفة حتى لو عن طريق القراءة ومن المنطلق دا تابعت أدب الرحلات من فترة طويلة و أسعدنى الحظ أنى أقرأ كتاب يوميات رحالة 1 و السنة دى فى معرض الكتاب حصلت على كتاب يوميات رحالة 2 بتوقيع كاتبه الرحالة أحمد حسنى .
انتهيت من كتاب يوميات رحالة 2 يمكن أكون أتعمدت أنى أقراه على مراحل وكانى خايفة يخلص ولأن كل شئ له نهاية للأسف الكتاب خلص ووصلت لنهايته و أنا عندى مشاعر مختلفة من بين السعادة والاستمتاع الشديد بكل الرحلة اللى عيشتها بين صفحات الكتاب للشجن والحزن على حالنا الحالى و ماضى أليم أنتهى من مئات السنين لم يبق منه إلا ذكريات موثقة باعتراف أهل الظلم بظلمهم لأهل الاندلس .
بدأت الرحلة بالهند ، حبيت الهند وهالنى مدى التناقض والطبقية الموجودة فيها ، اتمنيت أشتغل فى يوم فى شركة زى شركة ( ويبرو ) وانبهرت بوصفها و باللى بتقدمه للعاملين فيها ، أتمنيت أعيش فى الفندق اللى فى آجرا ، لكنى حمدت ربنا أنى مش من سكان المدينة الفقيرة أو من الأسر اللى بتعيش على الرصيف جنب مسجد السلطان عبد الغفور فى نيو دلهى ، عجبنى تسامح أهل الهند وحرية العبادة وعيشتهم مع بعض فى تناغم جميل ، كرهت موقف الشرطى من العربجى ، و ضحت على موقف فندق الليمون وحظ الكاتب السئ مع الفندق والأكل ، استمتعت بحدائق الهند و انتقلت لى بهجة أهل الهند فى عيد الألوان (هولى فاجوا ) والفرح الهندى فى آجرا ، حبيت القرود اللى بتاكل وتتنطط وسط الناس فى أمان تام وزاد ايمانى بأن عالم الحيوان أنقى من عالم البشر للأسف.
حزنت على قلعة أجرا وسلب الإنجليز للذهب الموجود بنقوشها ، انبهرت جدا بورش الرخام ، زرت تاج محل التحفة المعمارية اللى بتخلد ذكرى حب و وفاء الإمبراطور شاه جهان لزوجته ممتاز محل لكنى حزنت أن التلوث للأسف أثر على لون رخام فى الضريح .
زرت معبد اكشردام أكبر معبد هندوسى فى العالم وقبله كل هندوس الأرض و هالنى التسامح منهم لدرجة ان الكاتب صلى صلاة المسلمين داخل معبدهم دون أن يتعرض له أحد ( هندوسى بيتعبد ، مسلم بيصلى ... فى أرض الخالق عز وجل مكان لكل الناس وتحت سماؤه متسع لكل من أراد أن يعيش في أمان بشرط خليك فى حالك )
حزنت على حال مسجد السلطان عبد الغفور والإهمال المحيط به ، اندهشت جدا من سوق باليكا بازار وبالطبع أتمنيت أنى أزوره و أن بلدنا يبقى فيها حاجة زيه .
وبعد القراءة تظل بالنسبة لى الهند أرض السحر والجمال ، حبيت التسامح فيها وكرهت الطبقية اللى بتعانى منها ، حبيت أهلها لكنى خوفت من بعض طباعهم ولا أنكرأنى انبهرت بدقتهم فى عملهم .
أتمنى فى يوم أقدر أزورها .
تانى محطة من محطات الكتاب أسبانيا وجع الماضى اندلسنا المفقود
هالنى كم الخمور والإسراف فى استخدام منتجات الخنازير فى كل شئ تقريبا ، وجعتنى المقارنة بين حال الخنزيز ومزرعته وبين حال بعض سكان بلدنا .
زيارة ريال مدريد الفريق الملكى عرفتني ان الكورة مش مجرد لعبة الناس بتتسلى بيها لكنها بيزنس كبير أوى نجهل عنه كل شئ ، محلات التذكارات والهدايا والتصوير وصف الملعب ومدرجاته والامان فيه رغم الأعداد المهولة اللى بتحضر فى وقت المبارايات ، ابهرتنى التكنولوجيا اللى بيستخدموها وان الام ممكن ابنها يتحرك فى أمان تام ولو تاه ممكن هايرجع لها خلال دقائق بسبب الاسورة اللى فى ايديه .
احترمت الصديق فرانشيسكو اللى وقف حياته يوم كامل لمجرد بس انه يساعد صديق اتعرف عليه من يوم علشان يفرجه على بلده اللى هى كانت بلد أجدادنا فى الماضى وكل شوية يقول له خد بالك النهاردة فيه قداس الجمعة لحد لما الكاتب راح صلى فى مسجد قمه فى الجمال وراء أمام اسبانى مثقف وواعى .
طبعا لا أخفى انبهارى بالمترو ووصف كل ما به ، وصلت لشارع جران فيا وسط البلد بتاعهم واستمتعت بالجولة فيه ، روحت ريتيرو بارك وتسألت مع الكاتب أزاى العقول اللى أبدعت الجمال دا هى نفس العقول اللى أنتجت آلات التعذيب المختلفة الموجودة في المتحف الوطني فى مدريد؟
شوفت تمثال سيبيليس إله الطبيعة والخصوبة عند الرومان ، وهناك كانت المظاهرات بتاعتهم ، مظاهرات من نوع تانى خااااالص غير اللى نعرفها عندنا فى مصر فيها أغاني ورقص وتقديم طلباتهم بكل نظام وهدوء ، عجبنى أوى تعامل الشرطة مع المتظاهرين وانبهرت برقى و سلوك الشرطى مع الكاتب رغم مخالفته لقواعد التظاهر فى مدينتهم .
طبعا لا أخفى انبهارى بالمكتبة و أنى تمنيت أنى أزورها زيارة طويلة ، ومش ممكن انسى قصر بالاسيو رويال تانى أكبر قصر فى أروبا بعد اللوفر بحوائطة ونقوشه وقاعاته ، وبعده على طول المودينا الكاتدرائية الجميلة ، وبعدها زيارة المول اللى طبعا حبيتها ، ومنه الى بلازا دي سبانا وتخليد ذكرى رواية دون كيشوت وتقديرهم للأدب والأدباء .
حبيت أسبانيا وكان نفسى الكاتب يسافر طليطلة و أشبيلية و غرناطة و أشوف قصر الحمراء وأزور كل شبر فى ملكنا الزائل ووجعنا الباقي لكن للأسف وقت الكاتب لم يسمح بزيارتهم وقفت كتير قدام الجملة دى
)جدود فرانشيسكو كانو دمويين قتلوا جدودي و امتهنوهم ، دمروا مساجدى واغتصبوا نسائي ... لكن فرانشيسكو نفسه بيعاملنى بتحضر ، فرانشيسكو لم يهتم بهويتى ، فرانشيسكو بيحب اسبانيا وبيهتم أن انطباعى عن اسبانيا يكون كويس ... أنا محتار فرانشيسكو حفيد فرناندو و أنا حفيد عبد الرحمن الداخل ... جد فرانشيسكو قضى بهمجية على حضارة جدى ومع ذلك فرانشيسكو كسب احترامى ....
إزاى الدموية و الهمجية و الوحشية يطلع من نسلها الإنسانية والإحترام ده ؟
و إزاى الشجاعة و الجرأة يطلع منهم الخضوع والذل ده ؟
معاك حق يا أستاذى فى تساؤلك ... تحياتى للكاتب على رحلته المميزة ولغته السلسلة وسرده الشيق وأتمنى نشوف رحلات أكثر بإذن الله .
فايزة عطاالله

[Mohamed Salama · Rating 5 out of 5]

للمرة التانيه وزي الجزء الأول الكتاب بالكامل بيتقري في المواصلات تسليه جميله وزي مقالاته بيقدر افندينا يدخلك تماما جوا الصوره اللي بينقلها بتقدر تسمع وتحس وتشوف وتدوق كل اللي حواليه
بتطير للهند وانت عقلك هيتجنن هي الهند دي الشعب الفقير عاصمه العشوائيات و الزباله و الاهمال ولا الهند التقدم التكنولوچي الكبير اللي بيجبر الناس كله�� علي احترامها ولا الهند دي مصر كبيره فيها حاجات حلوه وفساد دايس ع الناس باوسخ جزمه هو احنا مصيرنا بكره زيهم ولا هنكون اسوأ ولا جايز تحصل المعجزه ونرجع لعقلنا ونلحق المركب اللي بتغرق
وبعدين من النقيض للنقيض اسبانيا عاصمه الدلع في الدنيا معتقدش ان اسبانيا بترتبط ف دماغي باي شيء جد ف الدنيا غير ماضينا الأليم لكن بلد تعني تماما سياحه وكوره طيب محنا كمان عندنا اثار ادهم الف الف مره وبنحب الكوره بس مين فينا يقدر يقابل سايح بالصدفه ف الشارع وياخده يلف بيه القاهره مثلا 3 ايام من غير زهق ولا ملل لمجرد انه ضيف علينا زي الاخ الاسباني الجدع
هنقدر نكون ف بكره اسبانيا اللي نضفت اللي عندها وظهرته وعايشه علي خيره ؟
ولا مصيرنا للهند في حاجه كويسه شايفها جزء من الناس ولكن المعظم بيعاني من الهمجيه و الفساد والاهمال ؟؟

[Ali · Rating 5 out of 5]

اعتقد ان من حق اي حد قرأ الكتاب دا انه ياخد جواز سفره ويروح بيه مصلحة الجوازات ياخد ختم زيارة الهند ومدريد
معتقدش ان اللي راح البلاد دي فعلا شاف اكتر من اللي انا شوفته في الكتاب بالعكس في اماكن مش اي حد هيعرف يوصلها
الوصف اكتر من رائع وفعلا انا حاسس اني لو روحت البلاد دي فعلا مش هشوف اكتر من اللي شوفته وانا بقرأ الكتاب غير المقارنات اللي للاسف مش في صالحنا ابدا والطريقة الساخرة بطريقة مضحكة بعض الاحيان ومبكية في كثير من الاحيان
اعتقد ان الخمس نجوم تعتبر ظلم لكتاب يستحق أكثر من كدة بكتير

[Amr Salah · Rating 5 out of 5]

كتاب لغته سهلة و اسلوبه شيق و في نفس الوقت يعرض وصف دقيق كأنك زرت هذه الاماكن