تذكرتين سفر

by محمد حمودة

كل شخصيات الرواية من وحي خيال المؤلف.. وأي تشابه بين الأحداث أو الأحاسيس وبين الواقع فهو ليس من قبيل الصدفة.. وإنما يعكس حقيقة الواقع.. لذا وجب التنويـــــه..

208 pages, Kindle Edition

First published November 30, 2017

About the author

كاتب أدب رحلات
من مواليد محافظة السويس بجمهورية مصر العربية ، يعشق القراءة ويهوى السفر والترحال والكتابة والسينما
خريج كلية الألسن جامعة عين شمس
يعمل أخصائى موارد بشرية بإحدى الشركات

Reviews

[zahraa esmaile · Rating 4 out of 5]

الريفيو نفس بوست سطور
سكان كوكب #سطور_الكرام
حان الان موعدنا المتجديد وكتاب جديد فى #كل_يوم_كتاب_مع_زهرة
حلة جديدة وكتاب ادب رحلات جديد لكاتب شاب
ازعم انه هيكون ذو شأن فى النوع ددة من الادب
تذكرتين سفر ل محمد حمودة
الكاتب بدأ بمقدمة لطيفة وعرف عن نفسه بلغة اهل البلد
الى هوة مبدئيا بيقولك ياريتك تقبلنى صديق وتيجى تقعد معايا شوية
هحكيلك حكايتى ورحلتى...بس مش رحلة واحدة
لا دول اتنين...ودة سر اسم الكتاب
ولان المقدم مغرى....والاهداء مميز(وهتعرف ليه لما تشترى الكتاب وتقرأه)
مبتملكش غير لبتسليم...والموافقة
الكاتب بيحكيلك الموضوع من اوله(ودة عجبنى لانه بسط الامور وقرب وجهة النظر)
بنكشتف ان قبل رحلة روسيا بالتحديد(ودى كانت الرحلة الاولى)
بدات التعقيدات من كل نحية الى وصلت لاصابة ف قدم الكاتب
وهوب...همشى ب عكاز
وهنا كان التحدى...اكمل الرحلة ولا الغى كل حاجة
وهنا برضة ظهرت جدعنة الصحاب(الاخوين فوزى) الى شجعو الكاتب على الرحلة
وقد كان
توكلنا على الله...هنروح روسيا وهنقضى عيد الاضحى هناك
بنشوف صعوبات الرحلة فى مطار القاهرة حتى الوصول بالسلامة ل روسيا
ف اليوم الاول بنشو انبهار الكاتب ب موسكو....وبالتحديد فى الساحة الحمراء
بنشوف بعيون الكاتب اغلب المزارات الى ف الساحة
وبننزل معاه المترو الى كان اشبه بقصر تاريخى
بنكمل معاه الرحلة...وبنحضر معاه عرض بحيرة البجع فى مسرح بالساحة الحمراء (مش البولشوى ولكنه مبهر جدا)
بنكمل معاه وبتروح سان بطرسبرج
وبنشوف مغامرة الوصول الى جسر القصر...ومحاولة رؤية مشهد فصله الى جزئين
بنزور معاه متحف الارميتاج(من اكبر متاحف العالم)
وبنرجع معاه موسكو ونعيش اجواء اخر ليلة...وعرض بمسرح البولشوى
بنشوف ف رحلة روسيا ان عدد الكنائس كبير جدا
وبفضل الكاتب اتنقل لنا صورة كاملة عن تاريخ كل كنيسة بالاضافة الى ملخص سريع عن روسيا اجمالا فى نهاية الفصل
عدنا بسلامة الله الى ارض الوطن
ولكن لسة فيه رحلة تانية الى جورجيا
والمرة دى الكاتب قرر انه يسافر لوحده...على ان يقضى جزء من الرحلة بصحبة الكاتبة الجميلة شيرين عادل
وقد كان
بيوصف لنا الكاتب الرحلة من السويس حتى مطار الغردقة
وصولا الى اللقاء بمجموعة من الشباب كانت وجهتم الاولى جورجيا...وكل واحد لوحده
بنشوف بعيون الكاتب الهوستيل الى حجز فيه
وبنعرف الفرق بينه وبين هوستيل الشباب الى قابلهم فى مطار الغردقة
بنعيش اليوم الاول فى (جورى) ومتحف ستالين
ورحلة الى كهوف اوبلستيخى
بنشوف الصعوبات الى واجهت الكاتب فى رحلة الصعود والهبوط...وجدعنة شيرين
بنشوف حيرة اكل اول يوم...وبنتعرف على المطبخ الى كان من حسن حظ الكاتب جميل
تانى يوم كان الترحال الى كازبيجى الى كان الوصول ليها ف اول ايام العيد
بنشوف بعيون الكاتب البلد الجيلية الجميلة:.وبنعيش مغامرة جديدة على الجبل الى لايخلو من كنيسة
بنرجع مع الكاتب الى تبليسى وبنشوف معاه مسجد مختلط للسنة والشيعة
بنحضر معاه صلاة العيد الاعجب لان مفيش اطمئنان فى ركوع او سجود
وبنحضر مع الكاتب والشباب عرض فى دار الاوبرا الجورجية(الى قريب من البولشوى)
وبنعيش مع الكاتب مغامرة فى نهر اراجفى
حتى اليوم الاخير ورحلة العودة
الكتاب جميل
الكاتب قدر بكثرة التفاصيل انه يعيشنا الحكاية كاملة
يمكن التفاصيل تزهقك شوية...ولكن مع الوقت هتتعود وتحب انك بتقرا كتاب لكاتب مصمم يتعامل معاك على انه صديقك مش كاتب
عجبنى وصف الكاتب الدقيق لالاماكن الى زارها
ووصفه لمشاعره الانسانية بكل امانة
كتاب كان رفيق لطيف لفترة طويلة
الكتاب غير متوفر الكترونيا
ولكنه يستحق كل جنيه...وكل دقيقة قراءة
بكدة انتهى كلامى عن كتاب النهاردة
والى ان يكتب الله لنا لقاء جديد
اتمنى لكم ايام جميلة...وقراءة ممتعة
دمتم بود
دمتم قراء
اربعة نجوم مستحقة لكاتب يستحق التشجيع والمتابعة
انتهى الريفيو
#الكتاب_رقم_26_لسنة_2019
#ادب_رحلات

[Nihal Mustafa · Rating 4 out of 5]

#ريفيو... آخر كتاب السنة دي في تحدي ال good reads.. وكان بالفعل ختام جميل جدا...

** لما بدأت قراءة الكتاب استغربت جدااا اللي وصلني من اسلوب سرد الكتاب.. وده لأن الكاتب اعتمد في أسلوب السرد على مشاركة القارئ بكل الأحداث لحظه بلحظه سواء حلوه أو صعبه و قدر كمان يوصل للقارئ المشاعر الإنسانية من فرح وحزن وألم وخوف وتوتر...وبالفعل الكاتب أوضح النقطه دي على غلاف الكتاب في شكل تنوية أن محتوى الكتاب (عبارة عن تجربة إنسانية بكل ما تحمل من قوة وضعف صحة ومرض وصحبه حلوة وأصحاب جدعان)... الملفت كمان في أسلوب السرد هو استخدم لغة عربية منمقة وبسيطة ولا هي فصحى حاده ولا هي عامية وان كان استخدام بعض التعليقات بالعامية أضاف روح مرحة للمحتوي... ( وده اللي جعلني متخيلة أن لو في نسخة صوتي من الكتاب هيبقى حلو جدا)..

ودلوقتي نشوف الكتاب نظامه ايه... الكتاب مقسم لتذكرتين.. تذكره منهم راح بيها الكاتب على روسيا ( وده اطوووول فصل) والتذكره التانيه راح بيها لجورجيا( وده فصل صغنون)...

#روسيا

زار الكاتب الساحة الحمراء ودي تعتبر الساحة الأكثر شهرة في موسكو...بالاضافة لمتحف الدولة التاريخي والكرملين ولاحظ الكاتب كثرة عدد الكنائس والكاتدرائيات واللي بياكد على الإيمان العميق بالمسيحية وشدة التدين اللي أصبحت علامة واضحة عند الروس..

ولأن الساحة الحمراء تقع بجوار المترو ولأن كتير بيقال عنه أنه اية فى الفن والروعة والجمال.. وانك خاسر بالقطع إذا ما زرت موسكو ولم تستخدم المترو.. فبطبع الكاتب خاض التجربة.. ولفت انتباه عمق المترو تحت الأرض بالإضافة لوجود النجف المعلق في السقف والممرات اللي بيعطي احساس انه قصر تاريخي ومش بس محطة مترو....

وبعد كده بيوصفنا الكاتب تجربة حضور عرض بحيرة البجع الشهيرة على مسرح يعرف اصطلاحا بمسرح الكرملين وقد ايه كان عرض ساحر ومبهر وجميل ومن المسرح على حديقة ألكسندر واللي على قد ما هي مبهره في النهار فهي أكثر ابهارا في الليل....

ومن موسكو ل سانت بطرسبرج...وزار فيها الأرميتاج ويعتبر أقدم واكبر المتاحف في العالم بيتكون من مجموعة من القصور ويحتوي على 3 ملايين تحفة فنية.. واللافت للنظر أن المتحف مش بس متحف للآثار في المقام الأول وإنما هو متحف فني للوحات الفنية للفنانين المشهورين أمثال بيكاسو ودافنشي وفان جوخ.. وغير المشهورين أمثال فان ديك ورامبرانت وبوسان وغيرهم... واكتشف الكاتب أن كتير من المعروضات قادم من إيطاليا أثناء الحرب العالمية التانية.. بالإضافة أن في المتحف قاعات عن حضارات مختلفه المصرية القديمة والبابلية والإسلامية والهندية والصينية... وهماك أيضا قاعة كل محتوياتها من الذهب الخالص وفي منتصف القاعة تمثال بالحجم الحقيقي لطاووس مصنوع من الذهب ذات لمعان أخاذ...استمرت الجولة لخمس ساعات شاف فيها الكاتب ربع المعروضات فقط.. خاصه أن هناك قطع أخرى في المخزن...

ثم جولة نهرية على مدار ساعة كاملة لف فيها المركب أرجاء المدينة ومنها على شارع نوفسكي بروسبكت لؤلؤة سانت بطرسبرج..

بالإضافة لوصف عن أجواء الاحتفال بعيد الأضحى المبارك حيث أن الصلاه كانت عجيبه.. فالامام لا يطمئن في ركوع ولا في سجود.. ويقرأ القرآن مسرعا.. وكانت الخطبة قبل الصلاه وليس بعدها كما الحال في مصر وتكبيرات العيد بعد الصلاه وليس قبلها...

ثم زيارة لقلعة بيتر وبول وهي أول بناء في مدينة بطرسبرج ودفن فيها جميع ملوك روسيا المهمين.. استخدمت القلعة في بعض الحقب كسجن للأسرى السياسين في روسيا(فهي تحتوي على كنستين أحدهما كبيره وأخرى صغيره وسجن القلعة)..

واخيرا عرض مسرحية ترويض النمرة على مسرح البولشوي (المسرح الصغير) الذي يتسع لعدد 1500 من المشاهدين وكان المسرح عبارة عن تحفة فنية وذو طراز رائع... فالشعب الروسي مولع بالفنون..

وبكده تخلص التذكرة الأولى اللي ختمها الكاتب بفصل بعنوان عين على روسيا... ( نقدر نقول انه تعليق الكاتب علي روسيا كبلد كلكل سواء مساحة جغرافيا أو رفاهية أو درجات الحرارة وارتباطها بالملابس..سلوكيات الشعب وكيفية تعامله مع السياح)..

#جورجيا

الملفت في زيارة جورجيا انها جت فجأة كده.. بمعنى أن ممكن تكون بتخطط لسفر لزيارة مكان فتلاقي القدر اخدك على مكان تأني ويرتب كمان الصحبه اللي هتشاركك الزيارة دي...

والبداية بشارع روستافيلي وهو من أجمل وأشهر الشوارع في العاصمة الجورجية.. ويعتبر أكثرها نشاطا على مدار السنة وخصوصا في الموسم السياحي...حيث مكان السكن.. ومنه الي متحف ستالين وكهوف أوبلستيخي...

وبعدين هنزور مع الكاتب كنيسة ميتسخيتا (تقع على منظر خيالي لربوة أنانوري).. وحائط بيرمز للصداقة والعلاقات الروسية الجورجية تم بناءه بعد تفكك الاتحاد السوفيتي (الحائط ياخذ شكل قوي غير مكتمل).. ثم كازبيجي لتجربة صعود الجبل وزيارة كنيسة جرجتي...

وبعدين بيخوض الكاتب تجربة ال water rafting واللي في البداية كانت تجربة مميزه حيث النهر جار عذب وعلى اليسار جبل فائق الخضرة وعلى اليمين ربوة خضراء ده غير مشهد السماء والسحاب الجميل.. لكن فجأه ينقلب القارب بدون مقدمات...

والزيارة الأخيرة كانت من نصيب تمثال سيدة جورجيا وهو عبارة عن تمثال ضخم فضي اللون لسيدة تحمل في يدها كأس وفي الاخري سيف.. فالكأس يرمز إلى الخمر الذي ترحب به بمن يدخل البلد قاصدا الخير والسلام والسيف يرمز لمن يدخل البلد قاصدا الشر أو الحرب...

اما عن الطعام في جورجيا فهنلاقي اكلات اسمها غريبه جدا أمثال الخاتشبوري (وهو عباره عن عيش شبة القارب مخبوز في فرن حراري بيتحط في وسطه جبنه وفوفيقها بيض وتتحط في الفرن تاخد لسعة سوى وتتقدم)... وفية كمان أكله عباره عن باذنجان بعين الجمل المهروس والرمان.. والبطاطس المطهاه في الفرن ومضاف ليها بهارات وتوابل وخلطه أشبه بالقرنبيط... وطبق غريب اسمه الخينكالي اللي بيعتبر علامة مميزة للمطبخ الجيورجي (وهو عبارة عن عجينة بيحطوا جوه منها لحمة أو مشروم أو أيا ما كان... وبتتلف زي البؤجة وتتسلق.... وليها طريقة معينة في الأكل)

انا عن الصلاة في جورجيا فهناك مسجد وحيد له بابان وداخله محاربين ومنبرين.. ففي البداية كانت صلاة الجمعة تتم مرتين مره للشيعة ومره للسنة.. إلى أن حدث اتفاق أصبحت خطبة الجمعة والصلاة موحده مره تكون للشيعة ومره تكون للسنة...

وبرضو بتنتهي الزيارة بفصل بعنوان عين على جورجيا.. فيه معلومات وملاحظات عن أصل التس��ية والتعليق على المرور ودور المرأه...

الملحوظة الوحيده عندي في زيارة جورجيا اني صراحة مقدرش اتقبل فكره المبيت في هوستل أو في غرف متأجرة في بيوت الناس (استغربتها شوية)... لكن ممكن تكون دي طبيعة بعض الدول أو أسهل أو أفضل أو اخص.. الله اعلم...

تذكرتين سفر :رحلات ابن حموده السرية إلى جورجيا وروسيا الاتحادية / محمد حموده...(تصميم الغلاف ممتاز ومناسب جدا)

[Fatma Arafa · Rating 5 out of 5]

أثناء سفرى بخيالى كتيييير عبر الكتب ..قطعت #تذكرتين_سفر مع الكاتب #محمد_حمودة لدولتين مجهولتين سياحياً لينا كمصريين ..#روسيا و #جورجيا ..

يعنى لو سألت أى حد عن روسيا مثلاً ..هتكون إجابته إن مصر هتروح هناك تلعب فى كاس العالم !!

لكن مش هيقولك عن كمية الكاتدرائيات الموجودة هناك ..ولا الفن الروسى الفخم اللى ماليها طولاً و عرضاً ..
مش هيقولك عن إناقة البلشوى و رُقِيهُ ..ولا هيوصفلك حُب الشعب الروسى للجمال ..

هتتوه فى الكتاب جوه متحف الأرميتاج بجماله و فخامته ..
هتتسوق فى "جوم" و تنبهر بأضواءه ..
هتلف الميدان الأحمر ..و تريح أعصابك فى حديقة ألكسندر ..
و اتمنيت أشوف إنغلاق جسر القصر ..

غصب عنى اتخانقت مع السواق اللى هدد إن الرحلة تتلغى ..لولاه كنت هستمتع بزيارات أكتر ..
كرهت الإهمال المصرى اللى اتسبب فى ضياع يوم كامل من الزيارة ..كان ممكن أزور فيه مكان كمان ..

و فجأة و بدون سابق نية ..لاقيت نفسى فى "جورجيا" ..
يعنى الطبيعة الربانية ..و هواة اللون الأخضر ..
و بما إنى من محبى التاريخ ..حبيت بيت "ستالين" ..

أسماء الأماكن هناك شبيهة باللغة الفارسية ..
"مارجان شفيلى" ، "كوتى أخبازى" ، "ماتش خلة" ..
زعلت من سمعة بلدنا الراااااااااائعة فى العالم !!

الكتاب مش محتاج كتالوج لقراءته ..لأن هو فى حد ذاته كتالوج ؛ صححلى أفكار كتير مغلوطة عن أماكن سمعت عنها ..لكن مشوفتهاش ..و شوفتها بعين الكاتب ..من غير مط و تطويل أو ملل زى ماهو أدعى ..كل تفصيلة كانت مهمة و ليها لازمة و فى مكانها ..

المعلومات كانت كافية و وافية ..الحصول على التأشيرة ..لأفضل أسعار ..عادات أهل البلد ..نظامها ..أفضل المزارات ..حتى الأكل منسيهوش ..مع تحديث المعلومات ...
محبى التفاصيل زى حالاتى هيستمتعوا بالكلام ده ..

فى المُجمل كانت رحلة ممتعة جداً ..استفدت منها كتير و عرفت منها معلومات جديدة ..و ده أكتر شئ مهم ..متعة أى كتاب و أهميته بتحدده مدى استفادتك منه ..و ده اللى حصل معايا ..علشان لما اسافر هناك محدش يضحك عليا ..
بإذن الله تسافر بلاد أكتر و أكتر ..و تكتبلنا عنها ..و بإذن الله نحصلك فى السفر ..

[Fadwa · Rating 5 out of 5]

عادة ما نبتاع التذاكر بكافة أنواعها وربما نهملها ونلقي بها بعد استخدامها ولكن محمد حموده استطاع أن يحثنا على الاحتفاظ ب"تذكرتين سفر" للأبد كمرجع ودليل حي وواقعي لكل من تسمح له الحياة بخوض تجربة السفر للخارج عامة ولروسيا وجورجيا بالأخص ✈ أسعدني القدر بقراءة الكتاب منذ عام تقريبا وهو مازال في المهد لم يخرج لنور دار النشر والآن أشتاق لقرائته مرارا وتكرارا لما يحمل من أسلوب جذاب وسلس وحس خفيف الظل لا يمل منه القارىء ابدا👍📚😊 إنها التجربة الإنسانية بكل ما تحمل من مشاعر مختلفة لمسافر ومغامر ورحالة ننتظر منه الكثير في المقبل من الأيام .. ننتظر مزيد من الرؤى والإشارات التي نهتدي بها في الطريق .. شكرا يا محمد على تذكرتين سفر 🌹

[Nouran · Rating 5 out of 5]

استمتعت بكتاب تذكرتين سفر جدا لانى ما كنتش اعرف حاجة عن روسيا غير انهم بيجوا يستمتعوا بالدفا عندنا وبعد لما قريت الكتاب حسيت ان مع الكاتب فعلا وانى شايفة كل الاماكن اللى زارها وصف الكاتب للكتدرائيات والكنائس خلانى ابحث على جوجل عن شكل المزارات السياحيه
فى تشويق فى اسلوب الكاتب خلانى عايزه ازور روسيا

[Islam · Rating 4 out of 5]

أماكن جديدة وبلدين مختلفين وثقافتين مختلفتين

من الرائع زيارة تلك الأماكن والسفر لها حتى وان كان عن طريق الكتب

شكراً جزيلاً

[Ahmed · Rating 5 out of 5]

عندما رايت الكتاب للوهلة الاولى يحكي عن روسيا وادب الرحلات فقرت بكل تاكيد شراءة وكان بالنسبالى كتاب عجيب بالرغم كل ماحدث قبل السفرية استطاع الكاتب ان يكمل رحلتة ويذهب الى بقعة ارضية مختلفة حكي عنها اشياء لانعرفها من قبل عن روسيا كان اسلوبه كانه يصطحبك معه في كل مكان من الطيارة الى المترو الى الفندق الى التاكسي الى الاوبرا كانت رحلة عظيمة يحكي الكاتب عنها
اما بالنسبة لجورجيا فضلت روسيا عنها في الكتابة لانى شعرت بان جورجيا (مخدتش حقها ) في الوصف

اما بالنسبة للكاتب عبقرى في تطوير نفسه من كتاب سفرنامة الى تذكرتين سفر حدث اختلاف كبير في كل شئ

[Mostafa]

كتاب رائع وكاتب موهوب وتوقيت الكتاب ممتاز لانه نزل فى الوقت اللى كلنا منتظرين كاس العالم التفاصيل اللى بيحكى عنها الكاتب شدتنى انى اقراء كتابات تانية له وياريت لو تكون عن الهند او الصين او اليابان