EXPIRED: من أجل علاقات لا تنتهي صلاحيتها

by ريهام حلمي

المتوقع من العلاقات الإنسانية إنها تبقي مريحة وسبب لسعادة الإنسان لكن واقعياً العلاقات المميزة العميقة بقت نادرة. وبقي الغالب علي حياتنا وجود علاقات بتستهلك طاقتنا.. في الكتاب دة هنتكلم عن قواعد إدارة العلاقات في خطوط محددة بتساعد إن علاقتك تبقي صحية, بتديك تنبيه إنك ماتقعش في فخ العلاقات المرهقة... وبتشرح لك طريق السلام عشان تبقي طرف في علاقة صح, تملاك من جوة وتنور حياتك. العلاقات من غير إدارة سليمة ممكن تبقي سامة, تهد فيك وف غيرك أكتر ما تبنى. لما يبقي عندك وعى بإدارة العلاقات هتحقق علاقة تسمح لك بالحياة, مش علاقة تبقي هى "الحياة" .. فتبقي جوة العلاقة مستقل و حر وفاعل مش مفعول به, وتكون علاقتك علاقة تعيش وتزدهر, مش علاقة منتهية الصلاحية!

Genres: Self Help, Relationships

287 pages, Paperback

Published January 1, 2019

Reviews

[Nessrina Hazem · Rating 2 out of 5]

كلام مكرر مكرر في كل فصل في الكتاب
الكتاب بيدور كله في فكرة انت مش محتاج حد و انت لازم تملي نفسك بنفسك قبل ما تدخل اي علاقة
٢٨٣ صفحة كلها في نفس السياق
اللغة العامية مناسبة مش وحشة بالعكس مخلية الكتاب سلس بس التكرار آفته الكبري

[Hala · Rating 3 out of 5]

اول مرة اقرأ حاجة ل ريهام حلمى الكتاب لطيف مستواه متوسط شبه معظم الكتب الي بتتكلم عن العلاقات ناقصة حاجة تشدك عشان تكمله وتبقي مستمتع بيه للاسف مفهوش جديد

[Tasneem · Rating 5 out of 5]

🍧اكسبايرد اسم مش على مسمى! عايزين تعرفو ليه؟تعالو سوا نشوف

🍧كل حد فينا في علاقاته باللي حواليه والمشاعر المترتبه عليها مع نفسه بيجيله كم تساؤلات مش لاقيلها حلول عمليه مريحه للطرفين ياتلاقي نفسك في النهايه تضطر تحمي نفسك وملكش دعوه بيهم او تيجي على نفسك عشانهم...

🍧كتير لما تقرا كتب عن الوعي بالعلاقات (وطبعا كتب مهمه وقيمه بردو)تلاقي نفسك بتسقط الكلام على الطرف الآخر ومن شدة( الوعي)بعيوبه اللي انكشفت يجيلك شعور لاارادي بالقرف منه،بالاستياء،بالغضب والتعالي عليه انه :اوف بجد عمره ماهيفهم ولايوصل للي فهمته وادركته وتلاقي نفسك كتير تقول:شيل ده من ده يرتاح ده عن ده!هو انا ناقص فرهده وتقوم بوم قاطع العلاقه بدل ماتوجع قلبك في مشوار طويل من الصبر وياريت بردو بعدها بترتاح!ماانت محلتش جدر المشكله انت كل ماتتزنق تخلع !لكن اكسبايرد بيبص للموضوع بشكل مختلف ازاي؟

🍧اكسبايرد عباره عن جلسات كوتشينج في العلاقات متقسمه ومترتبه بإحترافيه،بتمسك لك طرف خيط المشكله الملعبكه وطول مابتقرا بتوصل لباقي الخيط بشكل سهل جدا و(الوعي)بيزيد بشكل مريح واسلوب يخليك(تتقبل)الحقيقه الحالية وبس،كأنها حالة انكشاف بدون انكار أو استياء أو تبرير أو حكم على اي طرف منكم بالعكس ذكائك العاطفي في زياده طول رحلتك داخل الجلسات العميقه جدا دي!

🍧اكسبايرد مدعوم بأمثله كتير وقصص وده بيفرق جدا في استيعابك وتثبيت المعلومه وكمان كل مشكله موجود حلها البسيط الجاهز للتطبيق.

🍧اكسبايرد عباره عن ٣أبواب كل باب حكايه في حلاوته بينزل يطري على القلب زي ال🍦في عز الحر...
هتكلم عنهم بإختصار شديد

🍦الباب الأول🍦
💣احذر إشارات الخطر
(اختطاف،غموض،عد الجمايل،الغيره،سوء الظن،العقاب الصامت،الاستغلال،الاهمال،الانتقام)
يانهار ابيض دي قنابل ولاحقل ألغام؟
أنا الفاعل ولا المفعول به؟مقصود تفجيرها ولا شوية ملفات وحيل؟طب افككها ازاي بدون انفجار و خسائر في الارواح؟ولامتصرفش واتحمل العواقب؟ايه العواقب طيب؟

🍧الباب الثاني🍧
العلاقه الأهم:ياترى انت شايف نفسك صح؟مشاعرك؟تعرف تديرها؟هل فيه أصوات متكونه جواك معطلاك تشوف كل ده ؟هل عندك صوت من السته دول؟ركز كدا وشوف👀

🍨الباب الثالث🍨
(العلاقه الصح)هي إيه؟
هو أنا ليه ممكن مهما الآخر اداني احس اني(فاضي من جوه)؟ ليه حاسس اني مقدرش اعيش لوحدي؟هو انا ممكن استغنى من غير ماانعزل؟طب أمتـَّن نفسي إزاي وأعرف ايه القِيَم والاحتياجات وترتيبها؟
هو حبي ليهم "تقارب ولاانصهار"؟ازاي أشوف العلاقه بشكل"ثلاثي الأبعاد"؟يعني ايه ايكواليزر شعوري؟ايه هو التحدي الكبير؟تعرف تحدد كل واحد في الدايره الصح؟تصفر ملفاتك القديمه ليه وازاي؟العلاقه رايح ولا جاي؟

🙆لاا كفايه اسئله ووعي لحد كدا ،انا شكلي خربت الدنيا في علاقاتي هو فيه حل؟
آه طبعا تعالى وهشرحلك ببساطه:تعرف الأربع تاءات؟لو عرفتهم كويس هتقدر تبني العلاقه وتكون صالحه مدى الحياه...
اقولك؟ اقراهم بنفسك في اكسبايرد👀
🍦نيجي بعد ما قرينا الكتاب نعرف ان الاسم كان مجرد تورية للتشويق ؛عشن يقوللك تصورك للمحتوى كان غلط،مفيش علاقه اكسبايرد لكن فيه حاجه تانيه اكسبايرد عارف هي إيه؟

1.طريقة تفكيرك ورؤيتك الواحده للأمور من وجهة نظرك لوحدك ولسه موهوم انها في يوم هتجيب نتيجه ايجابيه هي الليexpired.

2.دور الضحيه اللي عايش فيه دايما ومنتظر الحل من الآخرين وانت ملك متوج👑 وبس، ده دور expired.
3.تصورك ان مفيش بين الحبايب عتاب وكل حاجه بتضايقك مبتقولهاش expired.

♡اسمح لنفسك وليهم تغلطو وتوضحو وتتفهمو وتواجهو وتوصلو لمساحه مشتركه،خليك في حالة تصالح متجدده مع نفسك ومعاهم واتعلم دايما عنهم وعنك بفضول،ركز في مسؤوليتك وحدودك النفسيه وادارة نفسك في العلاقه ،خلي دايما لسانك يوافق قلبك وعبر بصدق♡
والنتيجه هتكون:رؤيه واسعه مرنه وقلب يسع من الحبايب ألف وكل واحد في الدايره الصح من غير مايسيحو على بعض، والعلاقات هتدوم وتدوم وتدوم وهتنورك وتنورهم وكل علاقاتك هتستمر و مش هتكون اكسبايرد👏

[Marwa Magdy · Rating 5 out of 5]

بجد فعلا انا عايزة اقرا الكتاب ده تاني من كتر ما لمس حالات كتير بعشها في حياتي ... الضمير الحي باين جدا في شرح ريهام للعلاقات بين الناس.. في بعض الغلطات الاملائية وبعض الضعف اللغوي البسيط ... بس في المجمل ممتاز .. دخل عقلي وقلبي وغير معتقدات خاطئة كتير في طريقة تفكيري .. انتي ساعدتيني يا ريهام فعلا ابتدي اصفر فواتيري القديمة ... اشكرك

[رَانْ · Rating 4 out of 5]

من عنوان الكتاب ده كتاب عن العلاقات.. الكتاب مكتوب بالعاميه و متقسم فصول كل فصل بيتكلم عن مشكله بتواجهنا في علاقاتنا.

للأمانه أنا مش من مُحبين الكُتب بالعاميه، ممكن الروايات أقبلها بالعاميه أحياناً لكن لما الكتاب ده جالي هدية كنت مُتردده أقراه و لا لأ و بدأت في قرايته عشان ١) كنت متلخبطه في علاقاتي جداً و محتاجه إجابات ٢) شوفت إن كتابته بالعاميه هتسهل عليا قرايته خصوصاً إن كان بقالي كتير مقرتش ف كُنت عايزه حاجه تفتيح كلام كده.

في كام فصل كده أثلجوا صدري بصراحه كُنت حاسه و أنا بقرأهم إن أخيراً في حد قال اللي عايزه أوصله و مش عارفه أصيغه و خدت ملاحظات منه ساعدتني فعلاً في مشاكل كنت بمُر بيها + شايفاه هيفيد ناس كتير فعلاً لإن الكتاب بيقول معلومات قد تبدو بديهيات لكن ناس كتير غايبه عنهم المعاني دي.

الكاتبه واضح إنها عندها ذكاء عاطفي فعلاً و عرفت تغطي حاجات كتير الناس بتشتكي منها في علاقاتها. الكاتبه بردو عندها نزعه دينيه كده ظهرت ف شوية أجزاء بسيطه هو الموضوع مدايقنيش بس أنا بحس إنه ملوش لزمه أو بمعني أصح كتاب عن العلاقات يبقي كتاب عن العلاقات من غير الإشاره لحاجات تانيه و أعتقد إن دي أذواق و يمكن في ناس قرت الكتاب و عجبها الإشارات دي.

بصراحه جيت في الآخر و زهقت لإن بقالي كتير ف الكتاب كنت عايزه أخلصه و بردو موضوع العاميه مقدرتش أستحمله كتير :D

المُلخص إن الكتاب حلو أنصح بيه آه و بالذات للي بيكونوا في مواجهة مُشكله حالية في علاقاتهم لإن وقت المشاكل التفكير بيتشل شويه فـ حاجه كويسه تستعين بالكُتب اللي زي دي و ده اللي حصل معايا.

[الزهراء درويش · Rating 5 out of 5]

تاني مرة اقرأ لريهام حلمي، أسلوبها سلس مفيش رغي، عامي آه بس مش ركيك ومبتذل، الكتاب دة لعب ع الوتر بالضبط، جاي في وقته المناسب، لمسني أوي وكأنها كاتباهولي أنا بس، يمكن لو كنت قرأته قبل 10 أيام ماكانش حيلمسني أوي كدة، بس اللي مريت بيه الفترة دي أكدلي انها مش صدفة اقرأ الكتاب دة في الوقت دة كأنها رسالة معينة ربنا أراد انها توصلي عبر ساعي البريد "ريهام" شكرا ليها والرسالة وصلت اوي💜💚

[أحمد زيدان · Rating 2 out of 5]

التحدث عن العلاقات هنا بصورة بسيطة سطحية
كنت اتمنى أجد دعم مثلا من ابحاث نفسية قرأتها الكاتبة أو مقالات علي مواقع هامة زي فسيولوجى توداي
لكن مستوي الكتاب للقارئ المبتدئ يكون ممتاز

[Nada Osama Fouad · Rating 4 out of 5]

كان كويس بس كان سطحي اوي

[سلمان التميمي 🇧🇭 · Rating 3 out of 5]

وددته بالفصحى ؛ كان ليكون أكثر جدية ورونقاً فاللهجة المحلية المكتوبة وفقاً لي - شهادة وفاة الكاتب وكتابه - العالم العربي منبسط يحوي اثنين وعشرين دولة وما هو ميسر على المشرقي معسّر على المغربي واللغة الفصيحة تستوي بنا على أبجدية صارمة مفهومة ومرغوبة ومضمونة
على الرغم من بعض التوجيهات الركيكة والتي لا أخترع لها حيّزاً معقولاً أو موضوعاً للتطبيق مثل : لا تندفع تمهل / لا تحب سريعاً / تأنى بمشاعرك / ستتفهم أخطاؤهم إن فكرت بعقلهم / املأ نفسك أولاً /أنت كافٍ
جمل معولبة مسلّمة يملك الكل قولها إلا المختص فوظيفته شرحها وتكريسها دون طلبها عنوةً
الكتاب به إلفاتات ممتازة ومفيد بيد أني لست ناصحاً .

[Weam Qattan · Rating 5 out of 5]

كتاب مميز ولطيف... اتعلمت منه الكثير ... أهمها قيمتي وقيمتك ثابته ماتتغير ... العلاقات تنبع من علاقة أساسيه وهي علاقة النفس بذاتها ... علاقتنا مع نفسنا ... صفاء افكارنا ومشاعرنا ...
وحقيقي الكتاب حط النقط على الحروف ... مريت بمواقف ماكنت عارفه تفسير ليها لسبب مشاعري الي طلعت وقتها ... مرت عليه تصرفات ناس وأصدقاء ماكنت عارفه هم ليه بيتعاملوا كده .... هذا الكتاب جا بعد ماقدرت أتخطى مرحله في حياتي بس جا وكاانه بيفسرلي ويوضحلي الأشياء القديمة الي مافهمتها في حياتي

الكتاب معجم ومفسر لحالات النفس وعلاقاتها
شكرا

[عبيرجمال الدين · Rating 3 out of 5]

الكتاب جميل واستفدت منه بس في اجزاء متكررة
القارئة متكلفة جدا
كانت بتفصلني

[Aya Elkhawaga (Uka) · Rating 3 out of 5]

العلاقات كنز للي قادر يستثمره..

[Amany Farag · Rating 3 out of 5]

كتاب لطيف عن العلاقات ..
بس في النص في كلام كتير تنمية بشرية ملوش علاقة قوي بالموضوع تحديداً ومتكرر فى كتب تانيه كتير ( بالنسبالي )..
بس فى المجمل الكتاب حلو

الريڤيو كامل هنا

https://www.instagram.com/tv/CbSXYVZI...
وهنا

https://youtu.be/kiTqsjJ-tx8

[عفاف الشاذلي · Rating 5 out of 5]

الكتاب مقسم لـ 3 أقسام
الجزء الأول بيتكلم عن إشارات الخطر في العلاقات
زي اللي بيحملك جمايل ع الفاضي في حاجات أنت مطلبتهاش ولا عاوزها
والغموض والغيرة وسوء الظن والعقاب بالصمت واللي يقلل منك والاستغلال والإهمال والانتقام
وأمتى حاجات من دي ممكن تكون طبيعية وأمتى اعرف أنها خطر
الجزء التاني عن العلاقة الأهم وهي علاقتك بنفسك وثقتك بنفسك وإحساسك بالاستحقاق وشوية حاجات تانية
الجزء التالت عن شكل العلاقة الصح وإزاي تتعامل فيها ودورك أيه
تقييمي للكتاب 5 نجوم بدون تردد
وزعلت لما خلصت ومستنية بفارغ الصبر ألاقي كتابها سكن عشان أقرأه هو كمان
شكرًا ريهام حلمي 💕

[أحمد إبراهيم]

في البداية شدني تصميم غلاف الكتاب ف نوجه تحية للمصمم الجامد جدا .. وبعدين بدأت اقرأ وبالفعل في كلام كتير لمس معايا وحسيت اني محتاجه لكن اسلوب الكاتبة محتاج شوية تطوير وتبسيط اكتر فيه اوقات كنت بحتاج اني ارجع اعيد الجملة من تاني عشان افهم المقصود برغم ان الكتاب مكتوب بالعامية
بس هو في المجمل كتاب لطيف ولو مكنتش قرات قبله كتب من هذه النوعية كان هيترك فيا اثر اكبر من كده

[Emad Mores · Rating 1 out of 5]

الكتاب للاسف ضعيف
يمكن محتوي كويس لكنه مكرر و لغه عامية بس مش كويسة قرأت عامية غي نفس المجال بس افضل من كده بكتير و بالمقارنة الكتاب مش قد كده

[Mona Mohamed · Rating 5 out of 5]

#ونس_الكتب| منى محمد
#شهر_يونيو| الكتاب الأول
اسم الكتاب | EXPIRED
الكاتبة | ريهام حلمي
عدد صفحات الكتاب | ٢٨٧ صفحه
نوع الكتاب | تنمية بشرية
لغة الكتاب | عامية مصرية
تقييمي للكتاب | ⭐⭐⭐⭐⭐

⭐عن الكاتبة⭐
الكاتبة ريهام حلمي باحثة وكاتبة متخصصة في مجال الذكاء العاطفي وتطوير العلاقات الأسرية .

⭐خاطرتي⭐

المره دي حبيت أغير في أسلوب الطرح وهي إني أشارك خاطرتي عن الكتاب وليس نبذه عنه طبعاً الخاطره مستوحاه من موضوع الكتاب وهو
"من أجل علاقات لا تنتهي صلاحيتها"

فن البحث عن العلاقات الصحية <3

إزاي أعرف إني في علاقة صحية هتضيف لي أو إني في علاقة غير صحية هتهدم فيا؟

في ظل الفترة اللي كلنا بنمر بيها، بقى في شد وجذب بشكل كبير بينا كأفراد في المجتمع، الأسرة، الشغل، حتى الأحبة..
الخصومات بتزيد، العلاقات بقت مرهقة وبشكل غير صحي وده اللي وجهني إني اقرأ كتاب اليوم وأول سؤال سألته لنفسي هل في فرق بين التطبع أو التشكيل والتعديل أو الإصلاح؟

هل صح إني أشكل غيري على طباعي وهويتي ؟

هل صح إن غيري يشكلني على طباعه وهويته ؟

بنقابل أصحاب عاوزينا نبقى على شاكلتهم، الأهل، المدراء في العمل، الصحاب، كل واحد عاوز يفرض هويته عليك، عاوزك شكله، مش متقبل إن من سنة الكون إن يكون في إختلاف وإن أي علاقة صحية غير مرهقة مش هطالبك بإنك تتغير وتتشكل على مزاجه، لأنه ببساطه متقبلك زي ما أنت كده وإلا هتكون علاقات مرهقه جدا، إنك بتحاول تيجي على نفسك لإرضاء اللي حواليك وبتشكل نفسك في الشغل زي ما المدير حابب، في المجتمع زي مالناس حابه، في البيت زي ما أهلك حابين، ومع الوقت هتلاقي نفسك ضايع مش عارف أنت مين، ويدخل الإكتئاب وجلد الذات وتدخل في دوامة من العلاقات المؤذيه كإنك بتعاقب نفسك بذنب أنت مش مسؤول عنه ولكن شاركت فيه.. ايوه شاركت لما حسيت بالخطر في العلاقات المرهقة دي وموقفتش وعدت حساباتك وسلمت نفسك لإنك تتشكل على حسب اللي قدامك،، شاركت لما مستوعبتش إن أي علاقة صحية لازم يكون أساسها تقبل الآخر تتقبله ويتقبلك زي ما إنت بدون تشكيل بس ده ميمنعش إنك تتقبل الآراء البناءه ، والنقد البناء للتعديل من شخصيتك ، وتقوية مواطن ضعفك.

إتقبل النصيحه اللي بتتقال بحب ومحبه وعارف إنها جيالك من شخص قلبه عليك، ودي علاقات صحية بتطور وبتبني وبتعزز ثقتك في نفسك، علاقات بتزقك لقدام مش بترجعك لورا علاقات بتحسسك بالأمل مش بتحبط فيك علاقات بتحبك زي ما أنت من غير ماتكون نسخه منهم.

لما تلاقي نفسك في علاقة بتستنزف طاقتك ومحتاج طول الوقت تبرر وتيجي على نفسك وعرفت تهرب.. اهرب.

لما تلاقي غموض في العلاقة واللي قدامك شويه يقرب منك وشويه يبعد مفيش وسطيه في العلاقه ومن غير أي أسباب غير لانه بيشبع غروره أو بيتلذذ بإحتياجك ليه..اهرب .

لما تلاقي اللي قدامك بيحسسك بجمايله عليك.. اهرب.
لما تحس بالإهمال وإنك بتتعاقب بصمت بتتعاقب بإنهم يتجاهلوك وهما مدركين كل الإدراك إنهم مسيطرين عليك وعلى تفكيرك بتجاهلهم ليك..اهرب.

كل دي علاقات غير صحيه محتاج تهرب منها بأسرع وقت محتاج تأمن نفسك وتأمن حدودك النفسيه لإنك تستاهل علاقات صحية تساعدك في حياتك تطبطب عليك في أيامك الصعبه بس متكونش هي الأساس ميكونش بس إعتمادك في الأول والأخير على إنك تستمد القوه والحب والأمان من غيرك لازم انت تشبع نفسك من جواك لازم تحب نفسك الاول علشان اللي حواليك يحبوك تقدر نفسك علشان اللي حواليك يقدروك، الناس بتيجي على المهزوز اللي معندوش ثقه في نفسه لانه معززش نفسه فمحدش هيعززه، وإياك إنك تعامل الناس بذنب ناس ثانيه، إدي لكل علاقة حقها بدون أي حكم مسبق.

وأخيرا حب نفسك وحب الآخرين حب غير مشروط، اتعلم العطاء لإن مردوده عطاء متظلمش نفسك في علاقات بتضرك، اقف ودافع عن نفسك أنت مش حق مكتسب لغيرك، كل واحد ليه حياته الخاصه بيه، ووقف إرضاءك للآخرين على حساب نفسك لإنك مهما عملت هيطلبوا اكثر هتعمل أكثر هيطلبوا الأكثر وهتكون حق مكتسب ليهم مش هيرضوا إنك تقلل من إرضاءهم وإلا هيتهموك بالتقصير .

نستحق نقدر نفسنا❤ نستحق ندخل حياتنا ناس تقبلنا زي ما إحنا ❤

⭐عرض الكتاب ⭐
الكتاب يحتوي على ثلاث فصول (إشارات خطر - العلاقات الأهم - العلاقة الصح) عرضت من خلالهم الكاتبة أشكال العلاقات الغير صحية وكيفية التعامل معاها من أجل إصلاحها من أجل علاقات لا تنتهي.❤

⭐رأيي في الكتاب ⭐
الكتاب جميل جدا أول تجربة ليا مع الكاتبة ومش هتكون الأخيرة حبيت أسلوب طرحها للمشاكل والحلول اللي قدمتها والصراحة قرأت كتير في المجال ده بس هتفضل تجربتي مع الكتاب ده وسيندريلا سيكرت لهبة السواح من أعظم التجارب اللي فادتني في حياتي كتب متقدرش تستغنى عنها في مكتبتك بتحكي اللي جواك وتفكر معاك بصوت عالي وتحاول تشوف معاك حلول فعلا خير جليس وصديق❤ أنصح الشباب اللي في مرحلة المراهقة أنهم يطلعوا على الكتاب هيفيدهم في علاقاتهم العمليه والشخصية جداً، أي حد عنده مشكله في علاقاته بالآخرين هتلاقي إجابات وحلول في الكتاب ده، كانت تجربة ممتعة أتمنى تعجبكم.

⭐إقتباسات⭐

⭐ومن حيث لا تدري بتلاقيهم في حياتك منورينها ..❤
⭐أحبني كما أريد ..... ليس كما تريد فقط!
⭐ وإن لم ترَ نفسك بعين راضية ...... فكيف تتصور أن غيرك عنك سيكون أرضى؟!
⭐ذاتك أعز ما تملك .... دون تنتباهك لحمايتها .... ستصبح هشة لدرجة التمزق!
⭐الحُب الغير مشروط ليس خضوعا وإستباحة لذاتك..... فإن ذبت فيهم .... تلاشيت
⭐تحرر من رؤيتك المُحددة لهم ..... لتتذوق جمال انفرادهم.
⭐القبول الغير مشروط لا يعني الموافقة على الإساءة .
⭐من يوجد قربك .... يجب أن يكتسب قربة بدرجة تصرفاته.... وليس فقط بجميل حبك!
⭐واعلم أنك بعطائك للآخرين تملأ نفسك أولا.
⭐بال "التواصل ....التغافل.......التقدير.......التسامح"
تُبنى العلاقات ..... وتصير كنزاً لك مدى الحياة.

أتمنى يكون أختلاف سردي المره دي يكون نال إعجابكم .دمتم ونس❤

#منى_محمد

[Nouran Housni · Rating 4 out of 5]

وجود الناس فالحياه بيخلي ليها طعم تاني وبيضيف ليها سعاده وراحه وسلام ..
معاهم بتلاقي الحب والأمان والاطمئنان
بتلاقي التقدير والاحترام والسند والدعم
بتقضي معاهم اجمل أوقاتك فتحس باستمتاع وشغف و ونس ودفا و وجودهم بيسهل عليك الحياه ...

دايما بنشتكي من العلاقات ‼

طيب المشكله فيها ولا فينا ولا إيه بالظبط طيب هل شايفين المشكله فعلا ❗
ولا احنا اصلا مش شايفينها ومن غير قصد بنهملها فبتنتهي صلاحيتها ...
ولا يمكن مش شايفين نفسنا وبالتالي بنتأذي ونأذيهم؟

المتوقع من العلاقات الإنسانية إنها تبقى مريحه وسهله وسبب لسعاده الانسان .

لكن واقعياً العلاقات الحقيقيه الحلوه الجميله العميقة بقت نادره وبقى الغالب على حياتنا وجود علاقات بتستهلك طاقتنا وبتحركنا زي الماريونيت .

فبتهرب من العلاقات دي وتروح تدور على جديد او تفقد شغفك بتكوين علاقات او التواصل وتكتفي بنفسك ...

الكتاب ده بقى بيتكلم عن قواعد إدارة العلاقات فخطوط تأدي بالآخر إنها تبقى صحيه وسليمه بتديك صور الانذارات اللي من خلالها تحاول ماتقعش ف فخ العلاقات الغير صحيه زي
الاختطاف .. الغموض .. عد الجمايل .. الغيره .. سوء الظن .. العقاب الصامت .. بيقل منك .. الاستغلال .. الاهمال .. الانتقام
اللي لو شوفت وحسيت حاجه منهم فعلاقتك تاخد وقفه وتبتدي تتصرف وتعالج لكن مش ممكن تتغافل عنهم ✋

وبتشرح كمان ازاي تبقى طرف سليم فعال فعلاقه صح تملاك من جواك وتنور حياتك بدل ما تتحول لعلاقه سامه ليك او للطرف الآخر تهد فيكوا اكتر ما تبني .

لما تبقى واعي فعلاً ومُدرك إزاي تدير العلاقات
هتحقق علاقات تسمح ليك بالحيااااه مش علاقه تبقى هي الحياه ودي تفرق كتير فتبقى جوا العلاقه مستقل وحر وفاعل مش مفعول به دايماً تكون علاقتك بتعيش وبتذدهر مش علاقه منتهيه الصلاحيه ..

وده ممكن يتلخص ف اربع تاءات من خلالها بتوصل لعلاقه صحيه تبقى كنز مدى حياتك وهما

تواصل .. تغافل .. تقدير .. تسامح 🌸

الكتاب حلو وخفيف وبالعاميه وكلامه مش مكلكع فيه كتير من لا بطعم الفلامنكو نوع آخر من إكتشاف الذات واكتشاف الناس وطباعهم وانواعهم وازاي نتعامل معاهم ازاي تدي وازاي تاخد ...

[تس أحمد · Rating 4 out of 5]

العقاب الصامت نوعين
1-الناس اللى مبتحبش المواجهه .. مبتحبش تعاتب..مبتحبش الصدام .. ممكن يبعدوا عنك لغاية ما الدنيا تهدى جواهم ..هما مش بيحبوا المشكلات..بيعرفوا يتعاملوا مع مشاعرهم اللى اتوجعت..وممكن يكونوا بيرجعوا بحسن ظن..وبيرجعوا مش متضايقين..اخدوا وقتهم لغايه ما الدنيا هديت جزاهم ورجعوا يكملوا عادى معاك الطريق.. فهما ميقصدوش يعاقبوا قد ما بيخدوا هدنه من كتر الضيق..

النوع التانى "بيستعملوا العقاب الصامت عشان يربيك.. اللى هو انصرفت بشكل مش عاجبك طب انا هوريك ..هحرمك من وجودى..مش هيفرقمعايا وجودك .. هحسسك انك مش مهم وانى اقدر اعيش من غيرك .. يبدأ يدور ع بديل...
بيعملوا كده عشان ده بيرجع ليهم إحساسهم الواهم بالسيطره ..والتنميه
النوع ده جواهم مثقوب بيحسوا بالتهديد من حاجات كتير ..فلما بيحسوا ف لحظه ف العلاقه أن مبقتش تحت سيطرتهم ..مش حاسين فيها بأهميتهم بشكل ما فيدوقوك العقاب الصامت .. من وجهه نظرهم انت غلطان وتستهاهل يبعدوا..عشان لما يرجعوا تعرف قيمتهم ..هما مش مدركين أن دى دوافعهم ..مش مدركين لمشاعر الضعف اللى حسوا بيها ..واللى مبترتحش غير بمشاعرالقوه اللى بتملاهم لما بيلاقوا أنهم بيقدروا يعيشوا من غيرك..لما يقدروا يهملوك فتره ..فبترجع المشاعر بالقوه تديهم جرعه تملاهم ع حساب استنزافك انت ..وطبعا كل ما بيلاقوك قلقان..متأثر ..موجوع..ده بيغذيهم اكتر

[Mohamed Karem · Rating 3 out of 5]

المتوقع من العلاقات الإنسانية إنها تبقى مريحة وسبب لسعادة الإنسان لكن واقعيًا العلاقات المميزة الحقيقية العميقة بقت نادرة،وبقى الغالب على حياتنا وجود علاقات بتستهلك طاقتنا

ذاتك أعز ما تملك .

ومن حيث لا تدرى بتلاقيهم في حياتك منورينها.

أحبنى كما أريد ، ليس كما تريد فقط!

تحرر من رؤيتك المحددة لهم ، لتتذوق جمال انفرادهم.

وإن لم تر نفسك بعين راضية ، فكيف تتصور أن غيرك
عنك سيكون أرضى

الحب الغير مشروط ليس خضوعا وإستباحة لذاتك فإن ذبت فيهم ، تلاشيت

من يوجد قربك بجب أن يكتسب قربة بدرجة تصرفاته ، وليس فقط بجميل حبك!

واعلم أنك بعطائك للآخرين تملا نفسك أولا.

[Noura Nabil · Rating 3 out of 5]

الكتاب كويس إجمالا لكن الي قرأ سكن هيحس أن فيه تكرار لكلام و نقط كتير بين الكتابين
الكتاب نفسه أحيانا باحس بملل و انا باقرأ بسبب التكرار ، كان ممكن الاختصار لكلام كتير

الكتاب مفيد للي اول مرة يقرأ في العلاقات ، لكن الي بقاله فترة بيقرأ هن العلاقات ممكن يحس أن الكتاب مفيهوش جديد

[Ghada shalaby · Rating 4 out of 5]

فعلا كتاب مميز جدا جداا وحقيقي بقي مرجع ليه في حجات كتير في حياتي واتعلمت منه كتير بخصوص العلاقات مع الناس واثر فيه بجد👌واهم حاجه اني اتعلمت اني ازي ادير علاقاتي مع الناس في دوائرها الصح واني اصفر كل دفاتري القديمه من العلاقات السابقه علشان اكون علاقات صحيه مع الناس❤️❤️

[Nadia Diab · Rating 2 out of 5]

الكتاب دة تصفحته اكتر ما قرأته للكاتبة الجميلة ريهام حلمي بيتكلم عن كيفية إدارة العلاقات والتخلص من العلاقات المرهقة وازاي تعمل علاقات ناجحة وصالحة ومستمرة وفيها راحة نفسية كمان بيتكلم عن علاقة الشخص بنفسه وازاي يطورها ويجعلها ع وتيرة ف تحسن مستمر ..

[asmaa Mohamed Ismael · Rating 3 out of 5]

انا بحب ريهام حلمي جدا و من اكثر المتابعين ليها في مجالها
بس الصراحة الكتاب مخيب للآمال كثيرا
حسيت كأن الكلام بتاعه مكرر جدا و اشياء تكاد تكون بديهية
و اتحدث عن شخصي لم استفد منه كثيرا
و ان كان الكتاب لطيفا سلسا و سهل اللغة

[Safa · Rating 5 out of 5]

كتاب رائع يستحق القراءه اكتر من مره

[Ali Moustafa · Rating 5 out of 5]

كتاب جميل جداً ومش هاتكفيه قرايه مره واحدة .

[Ahmad Shoura · Rating 4 out of 5]

الكتاب مفيد جدا ومليان معلومات هامة عن العلاقات محتاج صبر وتأني في قراءته لأن محتواه فعلا فيه زخم وغنى جدا

[Basma]

اكسبايرد

[Yasmine Rashad · Rating 4 out of 5]

الكتاب جميل بس كان ممكن كان يكون أصغر من كده وشوية ولسه عندي مشكلة في أسلوب ريهام حلمي في الكتابة إنه يكون منظم بشكل افضل

[Ahmed Abdelbaset]

أجيب الكتاب اونلاين ازاي ي جماعه؟؟