شبيك لبيك 2

شبيك لبيك #2

by Deena Mohamed, دينا محمد يحيى

في الجزء الأول من شبيك لبيك، إكتشفنا عالم حيث يمكنك بيع وشراء الأمنيات المعلبة. في الجزء الثاني، نلتقي بـشخصية جديدة تشتري أمنية من كشك شكري. ولكن لـ”نور”، إستخدامها ليس بهذه السهولة. كيف تتمنى السعادة؟ هذه هي قصة “شبيك لبيك: الجزء الثاني.

Genres: Graphic Novels, Comics, Fantasy, Fiction, Comic Book, Graphic Novels Comics, Comics Manga

178 pages, Paperback

First published January 1, 2019

About the author

Deena Mohamed (Arabic: دينا محمد, born ca. 1995) is an Egyptian graphic designer, graphic novelist, and illustrator, who was born and raised in Egypt.

She made her debut at the age of 18 with her webcomic Qahera, combining both Islamic and feminist values. Mohamed has collaborated with various advocacy groups, such as Harassmap and Centre for Applied Human Rights, to create informational comics.

In a cartoon for the online literary magazine ArabLit.org, she described her experience of creating her work in English, addressing international readers, as opposed to using Arabic for an Egyptian and Arab public. Even though she considers both of these forms of expression as part of her personality, she sometimes uses different issues, like feminism in Arabic and Islamophobia in English.

Reviews

[Pakinam Mahmoud · Rating 3 out of 5]

شبيك لبيك ٢ هو الجزء الثاني من رواية مصورة عن الأمنيات بقلم الكاتبة الموهوبة دينا محمد يحيي...

في الجزء الأول إتكلمت الكاتبة إن لو ينفع نشتري أمنية لتحقيق حلم ما حيكون العائق الفلوس أو قوانين البلد.. أما في هذا الجزء دينا ركزت أكتر علي الجانب النفسي وإتكلمت عن شريحة معينة من الناس اللي عندهم الإمكانيات والفلوس و يقدروا يشتروا بيها أغلي الأمنيات بس مش عارفين يتمنوا إيه أو بمعني تاني مش عارفين هم محتاجين إيه من الأساس أو اللي ناقصهم عشان يكونوا سعداء..

بطل الرواية إسمه نور مش واضح ولد ولا بنت وأعتقد إن ده مقصود و مشاعره فعلاً ممكن يحس بيها أي حد سواء كان ولد أو بنت..

الجزء هنا مش مبهر أوي زي الجزء الأول..ممل شوية..و لكن الطباعة أحسن كتير والخط أكبر و الرسومات جميلة..وأفكار الكاتبة عميقة ومعبرة عن كتير من الشباب في كل مجتمعاتنا العربية...

كتاب جميل ..ينصح به للتعرف علي قلم ورسومات كاتبة مصرية واعدة و مختلفة..
وإلي لقاء قريب في الجزء الثالث والأخير علي ما أظن:)

[Fatma Al Zahraa Yehia · Rating 4 out of 5]

في الجزء الثاني من الثلاثية اللي خطفت قلبي بدون توقع، تخرج دينا محمد يحيى من عالم الطبقة الفقيرة الذي دخلناه في الجزء الأول، وتدخل بنا محيط الطبقة الغنية المرفهة.

تختار من تلك الطبقة أو هذا العالم شخصية "نور" كنموذج لكيان إنساني ذو "نفس لوامة" يرى أن عبء حل مشاكله يقع على عاتقه وحده. فهو لديه حس قوي بالإعتماد على الذات التي يسعى لانتزاع أقوى ما فيها وما بداخلها في أحلك الظروف التي يمر بها.

ولذلك أحببت تلك الشخصية وتعلقت بها، احترمت شجاعتها ووعيها وضميرها اليقظ الذي قربّها من قلبي.



لا أعرف سبب اختيار المؤلفة لشخصية لا نعرف نوعها، والأصعب أن الشخصية نفسها ترفض تعريف نوعها، والأكثر صعوبة على فِهمي وإدراكي هو رفض تلك الشخصية خلال مرحلة العلاج النفسي الاعتراف بوجود أي علاقة بتلك "السمة الشخصية" وبين ما تعانيه من مشاكل نفسية أخرى.

بدا لي اختيار المؤلفة لشخصية "غير محددة النوع" هو اختيار شديد التغريب، بصراحة جو صوابية سياسية مكانش في مكانه الصح، أو بمعنى آخر لم يتم تناوله بواقعية أو معالجة ناضجة كانت جديرة برسم صورة أكثر اكتمالاً لتلك الشخصية. نحن في مصر، أصلا ثمانون بالمئة من الشعب المصري إن لم يكن أكثر لا يفهم أو يستوعب معنى "شخصية عابرة الجنس"، بما فيهم المثقفين وقلة غير قليلة-وياللمهزلة-من الأطباء النفسيين، فما بالك بشخصية غير محددة الجنس؟ طب والله ده الأجانب نفسهم لسة بيحاولوا يفهموا الموضوع ده. ومرة أخرى ليس لدي مشكلة في تقديم تلك الشخصية، ولكن كانت المسألة أشبه بتقديم طبق سكالوب بصلصة الرمان والجبنة الماسكربون على طبلية وسط حلة محشي وبطّاية وملوخية.

مسألة مخاطبة جميع شخصيات القصة لنور-بما فيها الشخصيات ذات الخلفية التعليمية العادية أو البسيطة مثل الحاج شكري والحاجة شفيقة-بصيغة الجمع "أنتوا، روحوا، عاوزين" كانت مبالغة غير منطقية على الإطلاق، فكيف لهم أن يعرفوا معلومة غير معروفة غير في نطاق شديد المحدودية-واحنا برضه بنتكلم عن احداث بتدور في مصر-مثل هذه؟ فضلا عن تشويش القارىء الذي استغرق وقتا طويلا لكي يدرك سبب مخاطبة الجميع بصيغة الجمع تلك لنور.

كان يجب خلق "ماضي" لقصة شخصية مثل نور. كيف تركت المؤلفة مادة خصبة لشخصية مثل "نور" ولدت ب سمة شديدة الاختلاف في مجتمع لا يفهم الاختلاف مثل مصر بدون شرح أو توضيح لتاريخها؟ ألم تعاني في طفولتها من أي تمييز؟ ألم تواجه أي نوع من التنمر بحكم اختلافها؟ عادي صحيت من النوم لقت الناس كلها فل معاها "في مصر" وفاهمين يتعاملوا معاها إزاي؟ ده الواحد مابيسلمش م اللي يعرفه واللي مايعرفوش لو حاجة عبيطة اتغيرت في شكله، فيا جماعة تاني احنا في مصر مش في السويد. فالمسألة دي للأسف مكانتش واقعية على الإطلاق.

تلك كانت ملاحظتي الوحيدة على هذا الجزء، وذلك لم يشكل أي عقبة في حبي واندماجي مع الشخصية ومع معاناتها.

[محمد خالد شريف · Rating 3 out of 5]

لا تزال هذه السلسلة قادرة على إبهاري وإمتاعي، وجعلي أقلب الصفحات بسرعة، وفجأة أقف لأتأمل رسمة مُعينة أو جملة مُعينة، تجعلني أتمنى لو طالت هذه الحكاية للأبد.

الجزء الثاني من "شبيك لبيك"، هو التضاد للجزء الأول، من حيث السعي نحو الأمنية، فالعائق في الجزء الاول كان مادي بحت، ولكن مع "نور"، العائق لم يكن مادياً أبداً، بل نفسياً، نور تُريد أن تُصبح سعيدة، ولكن كيف؟ هل السعادة قرار؟ أم يأتي بالأماني؟ هل يُمكن أن يُقرر الشخص فجأة أن يكون سعيد، وينجح في ذلك؟ رغم كُل العوائق، والأوجاع، والحزن المُستشري في بلادنا؟

المعضلة الأساسية في هذا الجزء تتعلق بالمرض النفسي، والاكتئاب، وكيف أن أغلب المجتمع يراه بطريقة خاطئة، لا تكاد تُعبر عن حقيقته من قريب أو بعيد، فإذا كنت لم تكن في حالة نور المادية، فسيُقال لك أرضى بقليلك وأحمد الله على كل شيء، وإذا كنت في نفس حالة نور المادية أو أعلى، فسيُقال لك أرضى بما أعطاك الله وأحمد الله على كل شيء.. إنها معضلة الإتيان برد لا يجعلك مُلحداً مُهرطقاً كافراً.. ألا ترى ذلك؟

ورغم أن هذا الجزء تعامل مع المرض النفسي بذكاء وبدلالة مصطلحاته الحقيقية، ولكن يظل الجزء الأول ومعاناته أجمل بكثير، رُبما لأنه تُشبه العديدين، ورُبما لأنه بداخلي شخص ناقم كبقية المجتمع.. لا تقولوا لأحد أنني أخبرتكم بذلك.

بكل تأكيد يُنصح بها.

[Hazem Walid · Rating 5 out of 5]

القراءة التانية
نخليها خمس نجوم، في تطور ملحوظ جدًا في الكتابة و القصة والشخصية الرئيسية و ده مخلني متفائل جدًا للجزء الجديد.
أظن ده هيكون اقرب جزء ليا عشان الشخصية الرئيسية قادر أرتبط معها في اشياء كتير.
هيفضل الرسم و التعبير عن المشاعر و الافكار في الروايات ديه من أعظم الحاجات فيها.
بس كده مع الجزء الجديد ..نبدأ
=======================================
القراءة الأولى
الجزء التاني من شبيك لبيك
مع الأمنية التانية...
بنسبالي أحله من الجزء الأول في نضج واضح من الكاتبة في بناء القصة و الشخصية الرئيسية .
و الرسم الرسم في الجزء ده معبر جدًا بجد و افكاره مختلفة و الكاتبة عارفة توصل بيه كل حاجة (الرسم بجد بجد حلو جدًا)
أظن كل جزء من الاجزاء ممكن يتقري لوحدة لحد دلوقتي كل قصة شبة منفصلة الرابط ما بين التاني و الأول شيء بسيط فمش لازم تقرا جزء عشان تقرا التاني.
القصة في الجزء ده جميلة و كنت قادر أرتبط بيها أكتر من قصة الجزء الأول.
توضيح الكاتبة لمشاعر الشخصية الرئيسية و أفكاره اكتر من رائع(الرسم يا جماعة بجد تحفة)
النهاية جد فاجأة و مكنتش كويسية بنسبالي و كان نفسي يكون في بني أكتر للعالم زي الجزء الأول..
..في الاخير تقرأ تقرأ
استمري...

[Dana Al-Basha | دانة الباشا · Rating 2 out of 5]

وصلت الى هذا الجزء متحمسة للغاية ثم بالتدريج أحبطت. أولاً مللت من نور وكأبتها. ثم مللت من الجو "الامريكي". نور بنت وتلبس كالذكور... تتدهورت حالتها أكثر خلال القصة. بالنسبة لي سبب كأبتها أنها لا تعيش كباقي صديقاتها وجنسها من البنات. إن أقتنعنا أنه لا يوجد غير جنسان وأن الله لا يخطئ انحلت الكثير من المشاكل النفسية.

https://www.youtube.com/watch?v=AsFJD...

[Basma Elbialy · Rating 5 out of 5]

جميلة وقرأتها بالصدفة في وقت كنت محتاجاها فيه.. ♥️

[Abeer]

الرسومات جميلة جدا.
الفكرة مبتكرة.
حلو تناول موضوع الاكتئاب.

لكن
- الكتابة بخط اليد بتدي جو لطيف مع الرسومات شرط يكون الخط واضح لكن الخط كان صعب قراءته أحيانا.

- أخطاء إملائية.

- معرفش إيه ضرورة نشر صفحات مترجمة وتكرار الصفحات بالإنجليزية في النهاية؟!!
كمان الترجمة معرفش ليه بتسقط حاجات أساسية أنا تفهمت إنه محاولة للكتابة بلغة شباب بس ده سهل يتعمل من غير كل الإسقاط والإضافة دول.

- هل الدكاترة بيتكلموا بضمير مخاطَب جمع "أنتم" لتجنب التأنيث والتذكير؟ والا سبب تاني؟ لأن حتى لو الفكرة جيدة، تنفيذها خلى الكلام غريب ويحسس الشخص الموجه له إنه detached وده عكس المطلوب في العلاج النفسي.

- افتقدت الجو المصري ال حببني في الجزء الأول، طبعا اختلاف القصة وجوها كان يستدعي التغيير بس كان ممكن تتعمل بلمسات تضيف روح مصرية وخصوصية أكتر.
.
الكتاب في المجمل تجربة جميلة وجديدة، خطوة حلوة إن يكون فيه روايات مصورة مصرية.
ودينا موهوبة أتمنى تكمل بنفس المستوى وأحسن.

#أبريل_2021

[رضوى منصور · Rating 5 out of 5]

اولًا، كل الشكر لصاحب فكرة ان يتحط trigger warning في بداية الرواية، أول مرة أشوف كتاب/دار نشر عاملين كدا (حتى لو خط صغير) فبرافو بجد.

معظم آراء الناس كانت إن الجزء دا أقل من الجزء اللي فات بس الحقيقة بالنسبالي كان أحسن بكتير.
الplot بتاعت الجزء الأول الخاصة بالحكومة والدولة كانت متوقعة تمامًا وخاصة انه واضح من الأول ان هيكون فيه عالم ديستوبيا وعالم يوتوبيا.
هنا، حسيت ان الكاتبة وصفت بدقة الups and downs اللي بيمر بها مريض الإكتئاب، ومحاولات عقلنة مشاعرك في سبيل إنك تفهم ايه المشكلة أو تقنع نفسك انه لا مافيش مشكلة أصلًا. حتى ردود أفعال أصدقائه كانت متنوعة.

فيه كام صفحة عجبوني جدًا لدرجة إني عاوزة أصورهم وأوريهم للناس. الرسومات جميلة جدًا، والفونت اتحسن جدًا عن أول جزء.

العيوب بالنسبالي كانت ان أمنيته ماكنتش مفهومة وما وضحتش بالظبط ازاي ساعدته في رحلته تجاه التعافي.أعتقد في الآخر أمنيته معناها انه يكون عنده الطاقة والtools انه يساعد نفسه وبالتالي بدأ يشوف الحياة بلون محايد غير الأبيض والأسود، بس still كنا محتاجين توضيح أحسن من كدا.

موضوع الضمير اللي الدكاترة كلموا شخصية نور به لخبطني خاصة اني حسيت اصحابه بيوجهوله الكلام انه مذكر، بس أعتقد ان الكاتبة كانت عاوزة تخلي الشخصية non binary ويمكن الدكاترة somehow figured that the person has identity problems، ولكن برضه دا ماكنش واضح خالص.

متحمسة للجزء الأخيرة، وزعلانة انه الأخير.

[Esraa · Rating 4 out of 5]

حبيت فكرة الجزء ده جدا و مناقشة الاكتئاب بطريقة حلوة اوي
بس ضايقني جدا حوار انهم بيكلموا نور على اساس انه جمع؟ الكاتبة تقصد ايه بالحتة دي طول الرواية حاولت اتجاهلها و معرفتش

[الزهراء الصلاحي · Rating 4 out of 5]

في نفس اللحظة اللي أنهيت فيها الجزء الأول، بدأت الجزء الثاني🔥

حبيت أعرف مين اللي هياخد الأمنية التانية، ويا ترى هيعمل بيها إيه؟!

"نور" فتاة جامعية، في جامعة علوم الأمنيات🙄 فجأة بتلاقي حياتها بتتدهور ومش عارفه ايه اللي بيحصلها، بتكتشف كشك عم شكري بالصدفة وبتقرر تشتري أمنية!

نور بتلاقي إن حياتها كل حد بيتمناها، كانت عبقرية، أهلها أغنياء، متوفرلها كل اللي محتاجاه، فإيه يا ترى اللي خلاها تشتري الأمنية دي، وهتستخدمها في ايه؟!

حسيت الجزء التاني أقوى من الجزء الأول _وده طبيعي_ لكن الحقيقة استمتعت بالاتنين وكنت في كامل حماسي إني أكمل السلسلة🔥

*وتاني مش محتاجة أنوه إني قرأت السلسلة كلها في نفس الجلسة وفي نفس اليوم اللي وصلت فيه 😁🤞🏻*

تمت
١٧ يوليو ٢٠٢٣

[Asser Mattar · Rating 4 out of 5]

كتاب جميل ومهم خصوصًا لمرضى الاكتئاب. شعرت شخصيًا بالصلة بيني وبين بطل القصة أو الشخصية الرئيسية حتى أن بعض الجمل على لسانه قلتها من قبل لنفسي أو لمن حولي. ما لم يعجبني هو نهاية القصة فلم تكن مفهومة بالنسبة لي كيف تغلب على الاكتئاب. الشيء الآخر هو الحديث مع الشخصية المحورية في القصة كانت كل الشخصيات الأخرى توجه له الحديث بصيغة الجمع (أنتم) كان هذا سببًا في تشتيت أفكاري أثناء القراءة ولم أفهم الغرض منه هل لأن القصة موجهة لجميع مرضى الاكتئاب أم لجعل البطل شخصية محايدة النوع
(gender neutral)
أو مثلًا لأن القصة مكتوبة بلغة أخرى ومترجمة إلى العربية؟

[afnan · Rating 5 out of 5]

غالبا قصة نور هي قصة جزء كبير مننا كشباب
وبجد دينا عرفت توصل مشاعر نور ومشاعرنا كلنا
5/5 اكيد

وبجد محتاجين نقف شوية عند جملة
لو محتاجين مساعدة، ليه منطلبهاش؟
الجملة بديهية وكلنا بنقولها لصحابنا لكن محدش فينا بيقولها لنفسه بجدية غير عدد قليل
حتى اللي بيقولها لنفسه مش بيعمل بيها

انا كمان زي نور مش عارفه ايه المشكلة وأوقات كتير مش بيكون عندي سبب أو مبرر لشعوري بالحزن والاكتئاب

هل تعافيت من وفاة والدي؟ ولا بمشي الدُنيا وخلاص؟
معنديش فكرة ومعرفش انا معرفنيش.. بس اللي اعرفه ان انا مش تمام، بس هبقي تمام..

لاني زي نور وفى رحلة تعافي بس معرفش هطلب مساعدة من حد ولا هكمل لوحدي

[Yara · Rating 5 out of 5]

الجزء ده عجبني أكتر يمكن عشان قدرت افهم مشاعر نور و أ relate ليه أكتر، أنا حبيته جدًا بجد.
القصة تحفة و المشاعر و طريقة توضيح و رسم المشاعر اللي بيحس بيها البني آدم جميلة جدًا و خلتني اعيط.
I am an emotional wreck so, I had to cry anyways

[Asser elnokaly · Rating 5 out of 5]

رواية مصورة لذيذة تخلص في ثواني...

[Noha Badawi · Rating 4 out of 5]

Wow, that was incredible.

[Rahma Elabasy · Rating 5 out of 5]

الجزء الاول حسيته اوفريتيد بس بجد الجزء ده صالحنى على السلسله معبر و جميل و واقعى جدا و المشاعر عميقه و الرسم جميل

[Nouru-éddine · Rating 3 out of 5]

الجزء دا من حيث العالم بتاع شبيك لبيك وتفاصيله محافظ ع نفس جودة وإبداع الجزء الأول. بس الشخصية الرئيسية كانت غريبة ومربكة لأبعد الحدود. أنا متفهم رغبة بعض الكتّاب ف إنهم يحطوا كاميرا تركيز ع الشخصيات المختلفة، عشان نتفهم اختلافاتهم ونستوعبها جوه مجتمعنا. ف الجزء الأول كان عالم العشوائيات، والجزء دا عالم الأغنياء. ودا تمام من حيث المجتمع ككل وكنظرة فوقية للعالم بتاعهم كانت ممتازة.

الحوارات الداخلية بتاعت (نور) كانت حلوة، وحسيت إني متماهي معاها وفاهمها. بس القضية اللي فعلاً كانت مربكة هو إن كل اللي ف القصة بيكلموها بصيغة الجمع: اللي هو إيه دا؟ دا أصلاً مربك ف اللغة الإنجليزية والواحد بياخد وقت لسه ع ما يتعوّد ع فكرة إنه لازم نتكلم عن بعض الشخصيات بصيغة محايدة (هم الجمع غير محدد الجنس) لحد ما هم اللي يحددولنا نناديهم بأنهي صيغة ضمير (ذكر أو أنثى) - ودا مفهوم ف اللغة الإنجليزية اللي طبيعتها تساعدها ع استخدام صيغة الجمع كصيغة محيادة الجنس. لكن ف العربي بتاعنا دا مستحيل يتفهم! هل الكاتبة كان قصدها فعلاً إنها تدخل جوّه اللغة بتاعتنا الأسلوب دا وتخليه يتكوّن فيه؟ وإنه يبقى عادي نستخدم صيغة جمع مع الشخصيات غير محددة الجنس؟ ولا كدا كدا دا عالم (شبيك لبيك) اللي هو عالم موازي فيه دا يعتبر بقى حاجة عادية. بس إزاي وكل حاجة تانية تعتبر نسخ ولصق من عالمنا الواقعي؟ أنا فعلاً مش عارف أخمن الهدف من رسمة شخصية (نور) غير محددة الجنس - دا غير إنه اللي زود الأمر صعوبة هو مفيش أي تناول لتاريخ الشخصية مع أزمة هويته/ها الجنسية أصلاً، ولا حتى إشارة من بعيد تدل ع إن اللخبطة اللي كانت فيها الشخصية ناتجة من الموضوع دا. مفيش غير إشارة تحرش واحدة بس ف الرواية كلها من بعيد بتقول: "يا واد يا بت." ومفيش أي حاجة تانية غير السطر دا بس.

الرتم كان بطيء ف الرواية برضو، ودا خلاها ف نظري أقل بكتير من مستوى الجزء الأول.

[Shaden Shaltoot · Rating 5 out of 5]

ريفيو شخصي غير محايد بالمرة.
قريت كتب عن الاكتئاب بس عمري ما حسيت ان في كتاب نجح في توصيل مشاعر الاكتئاب و معاناة الشخص المكتئب، ف لو الكلمات فشلت، ف الرسومات نجحت..
اتمني كل الناس تقرأ الكتاب دا، بس مش متأكدة انه ممكن كله يفهمه، لان زي ما اتقال في كتاب صعب تخيل احساس انت ممرتش بيه.. و اتمني محدش يمر بيه.
شكرا دينا من كل قلبي.

[Naira Xx · Rating 1 out of 5]

1.5/5

[Shahd Nasr · Rating 5 out of 5]

هو ازاي حلو اوي كده💜

[Youssry Effat · Rating 5 out of 5]

بتكمل الفنانة دينا حكايتها المنسوجة من البداية على هذا الاساس و مظبوط انها تكون معمولة ع اكتر من جزء و يمكن ده اللى ه��بتدي نفهمه فى الجزء ده و ان الحكاية بنسبة 90 % اخرها الجزء الجاي .. بالنسبالي هتبقي حاجه حلوة ووحشة
حلوة ان هنعرف النهاية ام الوحش انى هتفقد عالم الامنيات و شبيك لبيك
فى الجزء ده بنشوف حكاية نور العجيبة و بنتعرف منه ع ناحيه تانيه و جديدة من العالم الموازى او الافتراضي ده
بنلاقي ان نور غالبا بيعانى من نوع من انواع المرض النفسي ممكن يكون الاكتئاب او غيره لكن الامر مش باين و مش واضح
ونور بيحاول يدور ع حل و مخرج للى هو فيه … و طبعا بيقع قدام حل و فكرة الامنيات
و من خلال الحكاية بنشوف ربط بين الجزء ده و الجزء الاول و ظهور شرفي و مهم لعزيزة فى الاحداث بيخلينا نشوف حاجه حصلت ما وراء الكواليس فى الجزء الاول و يمكن دى اللى كنت بقول عليها ثغرة و نقص فى الحبكة
من الواضح ان امر كان مقصود للربط بين الاجزاء و عالم شبيك لبيك و حتى من خلال الربط الزمني للاحداث
من الممتع و الجميل هنا ان بنشوف رسومات اكتر و توضيحات اكتر لحالات نور المزاجية و النفسيه من خلال تعبيراته و ايضا من خلال رسم بيانى بيظهر كل فترة بين الاحداث .. بالاضافة كمان ان هنا كان في اضافة ان جزء من الحكاية مكتوب باللغة الانجليزية بالاضافة للعربية .. بس هنفضل برده قدام نفس السر هو نور اتمنى ايه ؟ و اللى اتمناه ده فرق معاه و فى حياته فعلا ؟
طيب انت لو قدامك تتمنى امنية هتتمنى اية ؟


و استنوا قريب المراجعة الكاملة على اليوتيوب
https://youtube.com/bookaffe
ادخلوا اعملوا سبسكرايب عشان تشوفو المراجعة اما تنزل

[نوري · Rating 4 out of 5]

أول قراءات العام الجديد والجزء الثاني من الكوميك الرائع وفي الجزء ده بتحط دينا إيديها على موضوع الإكتئاب وطبعا موضوع خطير وللأسف بتبتعد شوية عن الأمنيات نفسها على عكس الجزء الأول، الرسم هنا أقوى وأكثر من الأول بس القصة حسيتها بتلف حوالين نفسها شوية وطبعا لم تفقد جمالها أبدا، في إنتظار الجزء الثالث والأخير ان شاء الله بفارغ الصبر عشان نشوف الأمنية الأخيرة.

[Ayman Muhammad · Rating 5 out of 5]

4.5
رائعة وملهمة

[SAMA · Rating 5 out of 5]

جميل جداً جداً الجزأ ده كمان أفضل من الأول. القصة مؤثرة ولمستني أنصح بيها.

[Farida Ali · Rating 5 out of 5]

تحفهههه انا حبيتها اويي وعجبني ان الكاتبه جسدت ظروف الشخصيه علي انها ممكن تحصل لي والد او بينت ومتحمسه اقراء الجزء التلات بسب الreading block كنت خلصتها في قعده

[محمود راضي · Rating 4 out of 5]

بعد طول انتظار، تعود الكاتبة والفنانة دينا يحيى إلى عالم (شبيك لبيك) الفانتازي الذي تصير فيه اﻷمنيات سلعة خاضعة للبيع والشراء، بعد الجزء اﻷول الصادر عن دار المحروسة في العام الماضي، حيث ننتقل للفصل الثاني من الحكاية الكبيرة التي تجمع بينهما رغم انفصالهما الظاهري، والعالم الخيالي اﻷكبر الذي تنضوي تحته هذه القصص.

وتقرر دينا يحيى أن تدخل هذه المرة في تحدي أكثر صعوبة من الجزء اﻷول، ومع شخصية أكثر تركيبًا على الصعيد النفسي، ومع دافع أكثر مراوغة وتجريدًا وعصيًّا على اﻹمساك، فبينما كان دافع بطلة الجزء اﻷول مشكلتها التي هي في اﻷساس مشكلة مادية بحتة، فالمادة ليست بمشكلة من اﻷصل بالنسبة لبطل الجزء الثاني نظرًا لانتمائه الطبقي، وإنما هي مشكلة وجودية متجذِّرة في شخصيته يحاول أن يدرك كافة أبعادها وحدودها.

وما يزيد من تعقيد رسم الشخصية هو أن نور يعيش في مرحلة المراهقة، حيث لا زالت شخصيته في طور التشكل والصقل، وفي وقت عصيب لا زالت ترتسم فيه ملامح الحياة، والبحث عن مسار مستقبلي غير واضح المعالم، واكتشاف هويته الذاتية التي يستطيع أن يتصالح معها بغض النظر عما يراه اﻵخرون، وهو ما تعبر عنه رسوميًّا طوال أحداث الرواية بالاستخدام الساخر للرسوم البيانية التي تحولها لمؤشر حيوي عن حياة نور.

[Radwa · Rating 5 out of 5]

الأمنية التانية من كشك عم شكري، وبنبعد خالص عن عالم عزيزة الفقير وأمنياتها، وبنروح لمستوى اجتماعي تاني وشخصية في سن مختلف بس برضة بمشكلات حقيقية أوي. وسعيدة بالربط اللي حصل بين القصتين.

نور طالب في الجامعة ومشكلته هي الاكتئاب. مشكلة ناس كتير بيمروا بيها ما بين اللي بيعترفوا بده وما بين اللي بيكبتوا مشاعرهم عشان دي "مش مشكلة حقيقية" وده عمل ستيغما عن الاعتراف بالاكتئاب والسعي لمعالجته. بنشوف هنا تغلغل الأمنيات في المجتمع زي وجود جامعات بتدرس الأمنيات وقواعد بيانات متابعة الأمنيات ورخصها واختلاف استخدام الناس للأمنيات باختلاف الطبقات، وطبعا الطبقية في التفكير في الأمنية: أن الوحيد المؤهل أن يمسك أمنية ويتمنى حاجة لازم يكون من مستوى اجتماعي معين ومتعلم بطريقة معينة عشان مثلا ميتمناش حاجة غلط؟ بتفقد فكرة الأماني الخيالية العنصر الخيالي وبتبقى حاجة واقعية جدا.

حبيت ظهور العيادات النفسية اللي لسة فيه تحيز ضدها في المجتمع المصري، حسيت باكتئاب نور لأني متعايشة معاه وكمان كل السخرية من المحيطين أو كلام من نوعية "ايه يعني اللي يخليكي زعلانة؟" كان مألوف أوي. مش دايما بقرأ حاجات عربية كتيرة بتتعامل مع مرض نفسي بشكل كويس أو بتطرحه من غير ما تهاجم الشخص المصاب بالمرض النفسي.

[Marwa Mohamed · Rating 5 out of 5]

"أنا بحاول والله بحاول...
أكثر حاجة بتوجعني إن محدش بيلاحظ كم المجهود اللي بحاول بيه كل يوم.
أنا بنيت وهدّيت نفسي مرة بعد مرة في الشهور اللّي فاتت،
حاولت وحاولت وحاولت، ومحدش حواليا حس بأي حاجة من دى!"

في الجزء الأول من شبيك لبيك، إكتشفنا عالم حيث يمكنك بيع وشراء الأمنيات المعلبة. في الجزء الثاني، نلتقي بـشخصية جديدة تشتري أمنية من كشك شكري. ولكن لـ”نور”، إستخدامها ليس بهذه السهولة. كيف تتمنى السعادة؟ هذه هي قصة “شبيك لبيك: الجزء الثاني.

هذا الجزء كان أفضل من الجزء الأول من حيث القصة والشخصيات والرسومات والاحداث، القصة تتناول فكرة الاكتئاب من منظور رائع، شخصية نور لمستنى بشكل لا يوصف، شعرت أنها جزء منى وأنا جزء منها، صراعها الداخلى وأفكارها ورحلة البحث عن نفسها وعن سعادتها وإيمانها مميزة جداً. رحلة البحث عن السّعادة الأبدية ما بين أهمية مشاعر الحزن والفشل والخطأ وما بين الرضا والإيمان والعزيمة، مشاعر مختلطة فى رحلة هبوط و صعود مثل رسم القلب بتتساوى معانيها بمعني الحياة ككل.

أنا فى الحقيقة سعيدة إن فى كوميكس مصري بالمستوى ده وكالعادة دار المحروسة مش بتخيب ظنى أبداً ♥️♥️.

[Mohamed · Rating 5 out of 5]

Talk about an upgrade! A book that is bigger, bolder and more heartfelt than its predecessor, SL2 is everything you'd want out of the second book in a series. Exploring the crushing ennui of mental illness in a college student who can't muster the strength to get out of bed every morning, and how they felt about the idea of using a wish in order to get rid of that feeling. It's an extremely interesting and at times heartbreaking exploration of the dark depths one reaches in depression, questioning their worth, feeling alone in the world, not even finding themselves worthy of the theoretical happiness they could acquire by using the wish they possess.

The art too gets even better (somehow!) with more detailed backgrounds, more expressive faces and definitely more meta-symbolism...? I'm not sure what the term is, but it reminded me at times of Asterios Polyp for example, which is a favorite of mine.

I truly love this series and cannot wait for more.

[Ahmed Yasser · Rating 4 out of 5]

الرسم كان عظيم في الجزء ده و بيعبر أحسن من أي حاجة مميز جداً و أفضل حاجة توصف مشاعر الشخصية و القصة و فعلا كان أفضل من أول جزء و في تحسن كبير القصة كانت أكبر و دي حاجة جميلة ،القصة واقعية و حلوة و بتناقش موضوع مهم و خلتني أحس بترابط بيني و بين البطل و وصفت مشاعر صعب أوي تتوصف و دي كانت أحلي حاجة و عرفنا أكتر عن العالم الاحنا فيه و عن الأمنيات و شفنا نماذج أكتر ليها و برده كانت حلوة اوي
القصة كان ناقصها تمهيد أكتر للنهاية و تحولات أكتر أو نهاية مختلفة،غير كده كانت أفضل في كل حاجة تانية و ممتعة جداً و مستني الجزء القادم جداً