سمراء تسُرُّ الناظرين

by نرمين على

من يومين..
كنت لسّا باقول لروحي
عن طموحي إني أكبر
كنت اجيب كشكول واسطّر
واكتب الأيام قصادى سِنّة سِنّة
كانوا لسّا بينادوني بإسم "منة"
كنت لسّا طفلة هادية
صحيفتي خالية من الذنوب
يغزلوا لي الحضن توب
يلعبوا لي في شعرى انام
كنت باعشق إني اقلِّد
شكل أختي في الكلام
كنت شايفة الناس جميلة
كل شيء ماشي في سلام
كنت لسّا باعرف اضحك
أعرف اتمسِّك برأيي
وكل شيء قلبي يعوزه
مرة واحدة
لقيت لي عُمري لاوي بوزه
لأ وقال لي: لا مفر..
كلها كام يوم يا طفلة
وتبقي فوق الربع قرن!
ربع قرن يا قلبي واحنا
لسّا برضو صغيرين
ليه بتتفك الضفاير
غصب في العمر الحزين؟
مين يصدَّق بس مين؟
إننا كبرنا بسرعة
الدقايق زي جرعة من مُخدِّر
نمنا... فُقْنا
لقينا فوقنا عمر تالف
والطفولة ذكر سالف
يعني ﭼيبتي الوردي صغرت
خدي أصبح لونه شاحب
بتداريه حبة زخارف!

154 pages, Unknown Binding

Published January 1, 2019

About the author

مترجمة
خريجة كلية اعلام جامعة القاهرة
فازت بجائزة أخبار الأدب بالتعاون مع وزارتي الثقافة والشباب لشعر العامية
فازت بجائزة المجلس الأعلى للثقافة لشعر العامية
فازت بجائزة مركز طلعت حرب الثقافي لشعر العامية
وصلت إلى القائمة القصيرة لجائزة عبد الحميد شومان في مجال أدب الأطفال

Reviews

[نرمين على · Rating 5 out of 5]

لازم أديله خمس نجوم، علشان أنا اللي كاتباه وكده يعني :D

[Saja · Rating 3 out of 5]

📝الكتاب: سمراء تسر الناظرين.
🕵️الكاتب:نيرمين علي.
👀عدد الصفحات:152
🎬النوع:شعر.
🚦التقييم:🌟🌟🌟
"انا مش صورة في البرواز
عشان مابحبش أتصور
ولوحصلت....
هكسرها وهاخرج م الازاز
لكن اكيد قلبك هيتعور...."💡
بين السطور تتراقص فتاة فكت ضفيرتها ...وارتدت فستانها الوردي وتطايرت ك فراشة مشاكسة..بلغتها العاميه البسيطه..بين حبها لابن الجيران ول ذاتها العنيده الخجولة المزاجية ...وحب الأم والاخت .....
مناجاتها لله ودعواتها... سطور مراهقة تتغزل حبا ...وتغدوا دلالا هنا وهناك...بين الصفحات الرشيقة كلمات لطيفة شكلت لوحه شعرية حالمة ..
"في حاجات كده من حسنها كل الجمل حتحسها
حيرانه مش لاقيه كلام
حتى حروف أهل اللغة اتحيروا..."💡
احساس جميل كانها مقطوعه موسيقيه عذبه احس بأصابع نيرمين تعزفها بقلمها أكاد اسمعها وانا اقلب الصفحات... رغم قلة ميلي للرومنسيه التي جعلتني امر سريعا على بعضها ....
احببت جدا تلك السطور الحالمه وعنوانها"ربنا موجود"
وشكراً سجى محمود 🦋

[Shaimaa Zakaria · Rating 5 out of 5]

مقدرش اقول غير انه من يوم مانقطع الحبل السري اهلا نيرمين نورت الكون ان جيت للحق تتحبي بكلامك وجمال نظمه وبشعرك اللي دخل قلبي في الحقيقه حبيت كلامك اد فرحة ابويا لما يبقى رايق حسيت في كلامك ان الفرحه حتيجي حتيجي والحزن حيتشال تدريجي. كان نفسي يبقى عندي حصالة للاسرار بس ربنا عوضني بقمرات بحضنهم واحكيلهم انا عن الساحرات.
جميل الديوان جميله المعاني حتى لو شايله آلام وجميله المعاني اللي فيها براءة الحب وطهارته.
الحقيقه استمعت جدا بقرائته  وحسيت اني في حاجات كأنها بتحكي عني اتمنى لك مزيد من النجاح ❤️❤️❤️