بابليو

by بهاء الدين سليمان

في نظرية الفوضى، إدوارد لورنز عرف مصطلح سماه "تأثير الفراشة - The butterfly effect" بإن رفرفة جناح فراشة صغيرة في مكان بعيد وكمان من فترة بيكون لها تأثير في إعصار بيحصل هنا ودلوقتي، تأثير في حجمه وإتجاهه، طبعا بحجم النسبية اللي يربط بين الفراشة والإعصار.
اللي لورنز موضحهوش، هو حجم التعب والمثابرة اللي بياخدها الإعصار عشان يتكون ...
من يوم رفضي في أول مقابلة وأول رفرفة طلعت مني في الإتجاه اللي كنت شايفه إيجابي، وأنا الطريق بياخدني من بلد لبلد ومن عالم لآخر عشان تطلع رفرفات من كل الإتجاهات وبكل الألوان في إتجاه الإعصار اللي بيتشكل ليا.
أنا كنت متخيل إن الواحد ممكن يختار شكل ولون الإعصار اللي بيشكله لنفسه من وهو صغير، إلا إني إكتشفت إن الأحداث والشخصيات اللي في قصتي هم اللي بيشكلوا شكل ولون الإعصار ده، ومع إني المحرك الرئيسي للأحداث، إلا إني برضه مكنتش ف يوم الأيام إني ممكن أتخيل إن إعصاري يطلع بالشكل ده.
"بابليو"

268 pages, Paperback

Published January 22, 2020

Reviews

[نسمة · Rating 4 out of 5]

***ملاحظة أو مقدمة كيفما شئت***
قد لا تجد أن هذه المراجعة مفيدة أو مهمة
وربما تستشعر أنها همهمات نفس لنفسها
لأنها كذلك بالفعل, هي مراجعة مني إليَّ كتبتها لأذكر نفسي فيما بعد
برحلة الأيام وكيف أنني في هذه المحطة تحديداً قابلت رفيقاً كبابليو
كل كتاب يكون رفيق يترك شيئاً ويرحل، لكن بابليو لم تترك ولم ترحل
كيف يمكن للنفس أن تترك أثراً في النفس, أو للروح أن ترحل عن الروح
رفرفات صفحات بابليو أثارت في نفسي إعصار ذكريات كنت أحاول أواريها
تحت ثرى أيام تمر لا تسر ولا تضر، ننتظر فيها أشياء لا تحدث ولكننا لا نترك يد الأمل
مع كل انتصار ونجاح كانت ترتسم ابتسامة انتصاراتي الماضية علي محياي
ومع كل تراجع وخيبة كانت تملء مقلتاي دمعات خيباتي وأحلامي الغير محققة
مع كل حمداً لله وشكراً كان يهفو القلب شوقاً لسجدة على كل نعمة
مع كل رفرفة من رفرفاتها عشت الماضي والحاضر الخاص بي
لذلك هذه ليست مراجعة ولا وصف هذه رحلة لمست قلبي وأعادتني سنوات للوراء


*********

لو اشتريت بابليو ومعتقد أنك هتلاقي رواية لطيفة أو سيرة ذاتية, أو حدوتة مسلية
فأنا آسفة اقول أنها لا تندرج تحت أي مسمي من المسميات دي
ومحاولة تصنيفها أو قولبتها لتناسب أسم أدبي معين
محاولة غير مقبولة لأنها ببساطة أبعد عن كل الأسماء دي
هي ليها اسم واحد فقط نوع جديد ابتكره بهاء نوع اسمه
"بابليو "
هي فراشة في عالم الكتب
لأول مرة فحياتي أقراء كتاب بالعامية لأخر صفحة من غير ذرة ملل واحدة واكتب مراجعته بالعامية كمان
ولأول مرة من مدة ادي تقيم 4 نجمات مش عارفة لأني اصبحت انتقائية جداً ولا عشان ماوقعش تحت ايدي حاجة تستاهل فعلاً التقييم ده

نبدء الحدوتة من الأول ليه اشتريت بابليو؟
من كام سنة لما بدأت أتابع بهاء على السوشيال ميديا
أكونت فيس بوك مبهج ذو مبدأ واراء تعجبني وبس كده
منشوراته من النوع اللي يشد نوع مميز لأنه بيعبر عني وعن ناس كتير من جيلي
وفجأة بهاء منزل كتاب في معرض الكتب
من مدة طويلة مش بشتري غير كتب واثقة منها ومن كتابها
وانتقي بشدة الكتب اللي هدفع فيها والمحتوي اللي هقرأه
وفي الغالب في النهاية بيقع اختياري على كتاب من الزمن الجميل
أو كتاب أجنبي , أو الألطف كتب دينية
قولت في نفسي من غير المعقول أن يكون كتاب تافه واشتريته وكنت متشوقة جداً لقرأته
لحد ما قرأت مراجعة مشيرها بهاء بنفسه لواحده بتقول أنه كتاب بالعامية وأنها ملت في منتصفه
فنشاء بيني وبينه حاجز طفيف، ماتوقعتش انه يكون بالعامية
وبدء خيالي يتخيل المحتوى بناءا على معرفتي البسيطة بالكاتب من منشوراته وبناءا على حبي للتفاصيل وخلفيتي الهندسية
وجمعت صورة مبسطة في خيالي عن الكتاب، بس انا مقتنعة ان كل شئ بقدر حتى الكلمة ليها وقتها، فجاء الوقت اللي قرأت فيه بابليو
وكما قال الكاتب في صفحة من صفحات الكتاب
"عقلي كان بيكتشف قد ايه خيالي ضعيف"
مع كل صفحة كنت بوطد علاقتي بالكلمات مع كل قلبه كان في رفرفة فراشات للحروف قدام عينيا
الكتاب ده لا يمكن تصنيفة إلا انه رسالة جميلة جيالك من صديق في ساعة فضفضة
أو مكالمة هاتفية من حد عزيز عليك جدا فتستهلك ساعتين تلاتة في معرفة ادق التفاصيل قبل ماتقوله سلام يا صديق خد بالك من نفسك
كل المواقف المذكورة في الصفحات دي مرت بينا بشكل أو بأخر وكل حد فينا اتصرف فيها بشكل أو بأخر
لكن اللي بيحدد طريقة التصرف ده مش احنا ولا ترتيبنا للاحداث ولا رغبتنا في اللي عايزينه يحصل
اللي بيحدد ده رفرفة جناحين كبار اسمهم اب وام ربوا واسسوا مبادئ عاشت معانا وفينا وكونتنا وشكلتنا
ورا باهي في ام زرعت وأب أسس ورفرفات كتير من مواقف الحياة خلقوا راجل بمعني الكلمة
كان ممكن باهي يكون واحد من الأربعة في شقة ايطاليا ويتصرف زيهم أو كان ممكن يكون الصلاة والدين عنده على الهامش، لكنه كان باهي
هي دي الرفرفة الحقيقية اللي تستحق الشكر
شكراً لكل أب وأم زرعوا فينا المبادئ اللي خلتنا على ما نحن عليه
شكرا بهاء الدين أنك اديتنا هذه الجرعة من الأمل
أمل اننا مش لوحدنا في الكوكب اللي بناخد قرارات نراعى فيها الله ونتقيه في كل خطوة
أمل أن في زينا كتير ممكن يختاروا الطريق الصعب في سبيل الحفاظ على الشعره اللي بتربطهم بالإنسانية
وأن الطريق الصعب مع تدبير الله سهل معبد...
" إِن يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِّمَّا أُخِذَ مِنكُمْ"
بابليو ليست عبرة ولا نصيحة ولا كتالوج للنجاح
بابليو فراشة هتحط على روحك دقايق وترحل

[Nouurrr · Rating 5 out of 5]

بابليو وجبة دَسِمة وخفيفة في آنٍ واحد ، دَسِمة كـ قيمة و خفيفة كـ سرد استرسال..
في الكتاب دا انا شوفت مواقف حياتي اللي كنت بظن اني عيشتها لوحدي و محدش غيري مر بيها! لقيت وصف لمشاعر خطرت عليا و كنت متأكدة انها مخطرتش على حد غيري..

الكتاب خلاني اكتشف ان خيالي قادر يرسم لوحة كاملة بكل تفصيلة فيها كأني شيفاها قدامي بل عايشة فيها كمان!
حواسي كلها اشتغلت وانا بقرأ.. مواقف شميت فيها ريحة البحر وحسيت ببرودة الجو وسمعت صوت الشارع! و مواقف تانية استطعمت فيها القهوة و ومليت نَفَسي بريحتها..
في مواقف بكّتني و مواقف فرحت فيها من قلبي.. بعض المواقف كنت بنفعل فيها لدرجة اني كنت بتعدل في قعدتي و بستعد للمواجهة معاه! او مثلاً اني الاقيني بقول "الحمدلله" وقت ماتتحل مشكلة معينه.. و اتفهّم جدا بعض المشاعر اللي موصفهاش عشان مكانش فعلاً في كلام يوصفها.. خلّاني شوفت كل شعور مرّيت بيه متجسّد على هَيئة اشخاص، الخوف، الضعف، الفرحة، الامل، الانتظار، الترقُّب..إلخ منهم اللي المفروض تصاحبة و منهم اللي تحاربه ، و منهم اللي تكسره!

واللي فعلا مميز في بابليو انه مش عمل تحفيزي اثره بيروح بعد ماتخلصه.. وبرضو مش بيقدملك حلول عبقرية للمشاكل، ولا هو مُجرد جرعة طاقة ايجابية والسلام.. لكن بابليو بيعيّشك الصورة كاملة! بيخلّيك تشوف ابعادها و زواياها كلها ؛ فتقدر توصل بنفسك لأفضل سيناريو..
مش بس بيخليك تشوف الميزة الواحدة رغم كل عيوب الصورة، لأ دا كمان بيوريك دا بيكون اثره ايه بعد كدا لما الصورة كلها بتتحول لميزة جميلة..

انا بشوف ان الفكرة القوية هي اللي بتحقق نفسها ، و دا اللي بابليو عمله معايا بالظبط.. بابليو بالنسبالي فراشة رفرفت من سنة بالظبط، لما شخص بثق فيه رشحلي بهاء عشان اتابعه ، وبعد ما تابعته بسنة الفراشة رفرفت تاني بالكتاب دا ، و اثناء ما كنت بقرأه كان ف كل فصل فراشة بترفرف و كنت بآمن بالإعصار اكتر..

وكل الكلام دا يكاد لا يُذكر جمب القدر الحقيقي للكتاب..
من كل قلبي شكرا 🦋⁦❤️⁩

#بابليو
#اثر_الفراشة

[علياء · Rating 5 out of 5]

"بابليو"
من نوعية الكُتب اللي تحضنها بعد ما تخلص وتقول في سرك "يا ريتها ما خلصت" :'D
كان بقالي فترة مبقرأش، وجت هي رجعتني لمسكة الكتاب اللي يشدني مينزلش غير وهو خلصان..
أرشحها وبشدة لأي حد حابب يقرأ زي سيرة ذاتية ⁦❤️⁩

[Bahaa El Dien · Rating 5 out of 5]

"المطلوب" فأتبع سببا""
اسم الرواية : بابليو
اسم الكاتب : بهاء الدين سليمان
عدد الصفحات:265
عدد الفصول :21
التقييم:⭐⭐⭐⭐⭐
..
-الرواية هي سبرة ذاتية للكاتب ولكن من قرائتها تنسي انها سيرة ذاتية وتشعر انها رواية ممتعه جدا من كم الأحداث والتفاصيل المذكورة بها.
-تبدا الروابه بالكاتب الذي تخرج من كلية الهندسة والبحث عن العمل ويسعي ف المقابلات ويتقبل في شركة ايطالية بعد حوار مثير وشيق جدا في المقابلة " الانترفيو" ويذهب الي ايطاليا ويصطدم بالواقع هناك يتعامل معه..
-تستكمل الروايه بعودة الكاتب الي مصر وثم احداث اخري في عمله ك"مندوب مبيعات" والمغامرات الشيقة والمفيدة له في هذة الوظيفه
-وتاتي فرصه اخري له اخري في العمل بالسعودية ثم المانيا الي انتهاء الروايه باخر فصل للخلاصه من الروايه وذكر سيرته
...
-ممكن تحس انها سيرة ذاتيه وخلاص مش مهمه وانا مالي بالشخص جا بس بجد هتغير رايك بعد ما تبدا ف اول فصل
- اسلوب الكاتب ممتع جدا بالعاميه ومليان فكاهه وبيقدر يوصلك احساسه في اللحظة اللي بيحكي فيها كل جزء
-الروايه بتديك طاقه فعلا للسعي في الشغل في اي مشروع وبتعلمك حجات كتير في إدارة المواقف.
- الروايه تعتبر فاصل بسيط كان ليا بين الكتب وتعتبر فاصل حلو جدا للناس اللي بتعاني من ال بلوك!
...
كل واحد ليه نظرته بس انا استمتعت بيها جدا واستفدت منها اكتر.. وهقراها تاني ❤️

[Yara Roushdy · Rating 5 out of 5]

من أمتع الكتب اللي قرأتها❤❤❤
الغريب واللي شدني ان بالرغم ع انها باللغه العاميه الا ان لغتها العاميه فصيحه .. مزيج كده ملقتهوش ف حته تانيه💛💛💛🦋🦋
تفاصيلها بتشدك وبتخليك متسيبش الكتاب غير لما توصل للنهايه اللي انت لما توصلها تقول هو ليه خلص?
كمية المشاعر المكنونه ف السطور واصله ليك كقارئ ف القلب ع طول .. بتمر بين المواقف كانك انت البطل كانك انت اللي عاصرت ده ومتاثر بيه لما بتقراه❤❤
بابليو هيفضل من الحاجات العزيزة ع قلبي 💛💛💛🦋🦋

[Amr Seddawy · Rating 3 out of 5]

الكتاب يوضح رحلة مميزة لبهاء الدين، كسيرة ذاتية
و هي رحلة مميزة فعلا، لكنها مثالية جدا. يمكن القول بأنها مناسبة للشباب في سن المراهقة، فهي تميل لتدوين كتب التنمية البشرية، التي غالبا تركز على نقاط مضيئة و تنتقل بينها دون ان توضح مشوار المعاناه المبذول و الاخفاقات المبذولة
الكاتب ذكر انه اضطر لترك وظيفته اكثر من مرة، لكن كانت الصبغة الايجابية تكسو طريقة السرد، فقد ترك وظيفته لان شركته غير اخلاقية مثلا، او لأن الشركة الإيطالي�� حاولت استغلاله و هكذا
رأيت انه هناك سرد طويل.. اقرب للحشو
-------
إلا إنه جميل، لسببين
الاول: و هو تلك الحالة الدينية التي طغت على الكاتب مثل التوكل على الله و هو أمر لمسني كثيرا
الثاني: ان هذا الكتاب أعاره لي احدهم و كان يخطط فيه الجمل التي لمسته، كان يزيل بعض السطور بقلم أصفر، و احيانا يكتب كلمة (هام)
فكان هذا لطيف جدا
اعتقد ان تلك الكتب التي بها حواشي تكون وسيلة تواصل مختلفة
فبدل من استخدام وسائل التعبير عن النفس بطرق مباشرة مثلا الكلام و المحادثات
يمكنك ان تستعير كتابا اعجب صاحبه، فيخبرك ما لم يخبرك به صديقك عن نفسه... هو نافذة لروح صديقك
الثلاث نجوم لهذا الصديق :))
و بالمناسبة بهاء - الكاتب - شخص يستحق كل الخير و تجربته فريدة جدا ف الحقيقة

[ضحى سعيد · Rating 5 out of 5]

بابليو ❤
الكتاب ابتديت فيه من الساعة 3 قبل الفجر خلصته 6 ونص بعد الفجر من حلاوتة مقدرتش أنام واسيبه، بشمهندس بهاء بالله اي الجمال والروعة دي أنا فعلا منبهرة بقصة كفاح زي قصة حضرتك، بل منبهرة أكتر من المعاني القيمة الموجودة فيه، كتاب حضرتك كان بمثابة رسالة من ربنا ليا فى وقت فعلا كنت محتاجة توجيه فيه، تسلم ايد حضرتك وقلمك بجد الله ينفع بالشباب الل زيك ، اتعلمت إن مش كل الكسور بتموت في كسور كتيرة تقوي وتقوم الانسان من تاني، اتعلمت إن الضعف دائما لا يجوز، و اتعلمت من أستاذ عمرو صاحبك إني بردو مكنتش فاهمة ربنا شكرا ليه جدا الله يجازيه الخير كل الخير، معاني كتير تعلمتها من خلال تجربتك في العمل في مصر وايطاليا والمانيا والسعودية ، وصفك الدقيق لفيرونا خلاني أتخيلها واتشوق إني ازورها وازور بيت جوليت ومطاعمها واكلها وكل حاجة فيها، وصفك خلاني كأني شايفة الاحداث امامي مباشرة، حضرتك إحنا محتاجين نعرف ربنا و محتاجين ناس في حياتنا تعرف ربنا فعلا ،فكرة اللجوء لله عزوجل وكيفية شرحها في الكتاب بالمواقف الل حضرتك عديت بيها مبهجة فعلا،تحببنا في الله زيادة ❤
أخيرا حضرتك زودت حبي لمصر بشوارعها بهمها بمشاكلها بكل حاجه وحشة قبل الحلوة فيها وكتير اووووي عاجبني المقارنة الاخيرة بينها وبين إيطاليا وألمانيا حسيت بنوع من الإنصاف 🌸
وحقيقي أثر الفراشة لا يزول 💙
أتمنى السنة القادمة أكون واقفة بمضي توقيع حضرتك على كتابك الثاني في المَعرِض بالتوفيق✌

[Jihad Ahmed · Rating 4 out of 5]

لسه مخلصة بابليو وحقيقي مش عارفه أوصف حاجات كتير حاسة بيها، غالبا اختياراتي من المعرض السنادي خلتي عيوطة بعد أما كنت استرونج اندبيندنت :")!

مش عارفه أوصف احساس محدد لشعوري وقت أما خلصت الكتاب بس أنا حسيت إن مواقف من حياتي مكتوبة في سطور قدامي، ومش أي مواقف بل أقساها، مواقف كنت فاكرة مفيش غيري عدى بيها بس لقيتني بقرأها بعيش لحظات الحزن والفرح والترقب والأمل بتفاعل معاها بحواسي ومشاعري مش مجرد قراءة لأ كنت بتخيل التفاصيل وبحاكيها والخيال طلع قوة جبارة فعلا..!
شعور الغربة وسط ناس مش شبهك في وسط غربة أنت أصلا فيها - حتى لو كانت في حالتي مش بلد وسبتها - كان واصلني جدا، حسيت بخنقة وأنا بقرأه ودمعت... طريقة معالجة لحظات الضعف والحوار مع النفس كانت من الحاجات اللي عجبتني جدا.. ساعات كنت بسمع الكلام بصوت البشمهندس نفسه في بعض التفاصيل زي ما حكاها قبل كده في إيڤنت حضرته استحضرت شعوري ساعتها وحسيت أني بغوص في تفاصيل الموضوع و الفاصل الزمني مبقاش موجود..

السعي كلمة مرتبطة في دماغي بشخصيتين مستر محمد عبدالمعبود -مدرس الفيزياء بتاعي- وبشمهندس بهاء..
بستحضر كلامهم وقت أما بيأس، فيديوهاتهم بتبقى أوقات كتير حافز ليا وقت الضغط، ساعات الواحد بيسمع كلام كتير بس الكلام المؤثر حقيقة -اللي بينتج عنه عمل حقيقي- بيبقى قليل، كلامهم بقى بيفكرني بربنا بإن الأسباب مش بتاعتي وإن الرزق عمره ماكان حِسبه ورقة وقلم ولكنه فتح منه سبحانه، أنا كتير بنسى النقطة دي و دوامة المادية البحتة بستحبني وكنت الفترة دي لسه في الدوامة خصوصا مع مخاوف إن الواحد على وش تخرج -بإذن الله ودعواتكم معانا يعني- فأنا ممتنة للكتاب إنه فكرني بالأصل بتاعي وفكرني بأن أثر الفراشة لا يُرى،"المطلوب 'فأتبع سببًا' وشوية فراشات" :')
شكرا يا بشمهندس بهاء .
بابليو ❤

[Rahma Zaky · Rating 5 out of 5]

من اول ما مسكت بابليو وانا بجبر نفسي اني اسيبه كمية المتعة تخليك مش عايز تسيبه وفعلا خلصته في نفس اليوم ال مسكته فيه بابليو هي فراشة بترفرف وتاخدك معاها اربع بلاد وتحببك في التفاصيل وتوصلك احساس كل لحظه وكل كلمة انت بتقراها حاجه كده ال هوه
انا محستش بنفسي غير وانا في اخر صفحة فيها مبقتش عارفه افرح اني خلصت كتاب عظيم زي دا كتاب اضاف لي كتير ولا ازعل انو خلص بجد محتاجين الجزء التاني من القصه محتاجه احس بالشعور دا تاني محتاجه اشوف النموذج ال متمسك بمبادئه وتجارب عمليه مش كلام من شرق الارض لغربها

[Ziad Shoeib · Rating 5 out of 5]

قصة من اروع قصص الكفاح و من اجمل المشاعر التي تدخل اليك بسهولة ، اسلوب رائع في الكتابة و السرد و الاحداث يجعلك تقرأ هذا الكتاب بكمية سهولة و هدوء شديدين.
ابدعت فعلا يا بهاء

[أمل داهش · Rating 4 out of 5]

السيد بهاء الدين ..... السلام علينا و على عباد الله الصالحين و بعد ؛
معذرة جاء رأيي متأخرًا ، امتلكت الكتاب منذ أول يوم للمعرض ، و تشرفت بمقابلتك حينها ، أنت كنت تنتظر رأيي و أنا يلعب بي الفضول لقراءة الكتاب ، رضَى الله فضولي اليوم و أتمتت بابليو الذي استغرق حوالي أربع ساعات مشاعر صافية ، و الآن سينتهي انتظارك و ترقبك ( يحكي كتابك أن الترقب عندك مذموم ) .
لحسن حظي جاءت كلماتك على مقاس مخاوفي ، أو بالأحرى مشاعرك ....
بدأت السرد منذ اللحظة التي ستقع عليك المسئولية دفعة واحدة ، إنسان حديث التخرج ليس له أي حجة كي لا يصير مسئولًا ، هذا الوقت الذي يصبح ثقيلًا عليك طلب المال من والديك حتى ، يا لها من مأساة !!
لطف الله الذي سار معك و سيَّر لك أمورك و سيَّرك أنت شخصيًا كان جميلًا منك أن تنسب له كل الفضل ، فإن قاسَى قاريء كتابك ؛ فيما بعد سيتذكر أن الله دبر لك كل شيء فيطمئن قلبه إذ أن من حل مشاكلك هو الله ، و الله لا يتخلى عن عبد مضطر إذا دعاه ، فيحدث القاريء نفسه : الله رب بهاء قد فرج همه ، و رب بهاء هو ربي ، فالفرج قادم يا نفسي و تيقني برحمته و زيدي رجاءك ألا تُطردي منها .
عرقَلَتُك حداثة التخرج مع الخبرة ، و غيرك ستعرقلهم الواسطة !!
مجرد مصطلحات في سوق العمل ، لكنها مصقلة للطامحين ، يا فوز من نجوا منها .
هم ثقيل حين تتكتف مساعيك و يضيفون في طريق أحلامك اتجاهات غير التي رسمتها ، ليتهم قبل أن يضيفوا أزالوا لكنهم لم يُعيروا لاختياراتك اهتمامًا ، فتزدد أنت تشتتًا بين وجهتهم و وجهتك ، لكن لا بأس ..... فلطف الله معنا .
عشر سنوات كفاح من نظري كان قليل عليهم هذا الكتاب ، شعرت أن هناك ليالي سهرتها بأحاسيس مختلفة كان القاريء أولى بها ، و من حدسي أشعر أن آلام روحك حكيت لنا عن ظاهرها و ما خفي كان أعظم ( رُغم أنها كانت دقيقة جدًا و كأنك تتحدث عنَّا )، ربما الكلمات التي حذفتها حينما راجعت كتابك تستنجد بي لأُسنادها كي تظهر لنا ، و شعورك بالسعادة و الفرح ظُلِمَ فلم توَّفِّه حقه باسترسالٍ أوفر ، حرارة الجو و برودته كان متشوقًا لها محيطي أكثر ، باختصار ..... اختصار العمر بين رفضك في أول وظيفة و نعمة الله عليك بنجاحك في شركتك يليق به مزيدًا من الاستفاضة في وجهة نظري المتواضعة .
لكن في النهاية ..... وُضِعَت قصتك نُصب الأعين ، و اعتبرتها من الملهمات لروحي حين التعثر ، و سألت نفسي هل مستقبلًا ستكون حكايتي مماثلة ، لكن أعود مهدئةُ لدواخلي أن المهم ليس وجود قصة و لكن الأهم هو استحقاق القصة أن تُحكى و تُرى بعين الإفتخار .
حدثتنا عن حكايتك يا سيد فأَطَلنا عليك و قلنا نحدثك عن أثرها فنستمحيك عذرًا إن مللت .
قمم و قيعان الرواية تتجلى و كأنها مخطط لطبيعة حياة كل منا ، فبدت واقعية ملموسة ، تُشعِرُك بأنك بطلها أو أن بطولتك لم تَحِن فاستعدِّ و تزود بالله ، و رَبِّ نفسك لتنعم بمعية الله فلا تهلك .
خرجت لي من أسطرك صفات الله جميعها ، تلامَسَتها روحي بكل أمانٍ و سكينة ، أوضحت لنا معنى الله العظيم ، الرحيم ، القابض ، الباسط ، المعطي ، المانع ، المالك ، الرحمن ، الجبار ، المنتقم ، الرزاق ، و غيرها من أسمائه العلا التي علمنا إياها أو أحصاها في علم الغيب عنده .
آريانا قد ورثت ملامح أمها ، و أورثك باولو هدوء التعامل مع الآخرين ، كنت مترددة أن أطلب توقيعك ، قد تكون مشغولًا بشيء آخر ، أو لا يجوز طلبي هذا في يوم غير حفل توقيعك ، لكن ظني اختلف ، و رُبِطَ هذا الموقف ببابلو .
أنا أصغر من أن أقول رأيي ، لكنك أول كاتب أقابله في حياتي ، و أول توقيع على كتاب كان من خط يدك ، فلن تُنسى طيلة العمر كعلمٍ أحمر في حصون الذكريات ، رُغم أني كنت أعلم أني سأُقابلك يوم العرض على الله ليُجازيك الله عنَّا تذكريك بالأٌقصى .
سلام الله لفاروق كان ملفتًا جدًا دوره ، أحسست و كأنه على استعداد أن يسعى بدلًا عنك ، لم يكتف بمعرفة الوظائف ، بل يرتب كل شيء عنك و يخبرك بالميعاد ، و لم يتوقف عند هذا ، فيقوم بالتوصية عليك واثقًا أنك أهل لهذا ، و لو سمحوا له أن يقابلهم نيابةً عنك لفعل ، بل لزاد مديحك أمامهم ، بالتأكيد كان سندًا لا يوصف ( بارك الله فيه )
سلام الله لوالدتك الجميلة و لدعواتها التي تحيطك إلى الأبد ، و لوالدك الرجل الحق الذي حقق الإحسان في التربية ، و لزوجتك الصبورة الكريمة بنت الكرام و الأصيلة أيضًا ، و لأبنائك الرائعين .
يا سيد بهاء الدين ..... صارت الفراشات لا تطير إلا فوق رؤسنا نحن قارئي كتابك ، من يدرِ ؟؟ فلربما تصير فراشاتك حمامات سلام تُطَيِّرُنا معَا إلى الأقصى مُحررًا ؟!

[عائشة حيدر · Rating 5 out of 5]

#بابليو 🦋
لأول مرة اقرأ كتاب بدافع الفضوول بس ..كنت عايزة اعرف ازاي الكتاب هيأثر عليا بشكل مختلف عن الكل؟!
الأول حابة اقول للبشمهندس بهاء إن زي ما كنت حضرتك بتقول إن دايما الواقع كان بيفوق تخيلاتك بمراحل فأنا متأكدة إن أكيد واقع تأثير الكتاب علينا فاق تخيلاتك بمراحل لإن مهما أوصف قد الكتاب ده استثنائي مش هعرف اوصلك الصورة كامله ⁦👌🏻⁩
مش هفكر وهسيب تلقائيتي هي الي تكتب لإن زي ما قلتلنا التلقائية مبتخيبش ظننا ابدا .
حقيقي الكتاب ده سلس وبسيط وواقعي بشكل عجيب الكتاب مش للقراءة لأ الكتاب للسفر ..لو عايزين تسافروا فعلا اقرأوه ..هتسافروا كل الأزمنة ..انا عشت مع الكتاب مواقف عدت عليا ومواقف بعدي بيها ومواقف ممكن تقابلني بعدين..بهاء مكنش البطل وانا بقرأ لأ كنت انا صاحبة القصة وعشتها ..شوفتني وأنا شايلة الشنطة وبضمها وباخد تنهيدة ..وانا بمسح دموعي السخنه علي ايدي وبداري انكساري ..شفتني وانا منعزلة وانا بضحك وانا بعيط من الفرحة عشت كل مشاعر الضعف والقوة والانكسار والصدمة والمواجهة حقيقي بدأت رحلتي مع أول صفحة ووصولا لآخر صفحة الكتاب بيخلص فيها بس أنا عقلي مكمل رحلته ..لأول مرة اقرر اني اقرأ الكتاب كام مرة كمان علشان اتعلم من اللي بين السطور ووقع مني ومش ظاهر ..الكتاب مينفعش يتحكي لأ ..ولا حد يقدر يحرق فكرته ..كل الي عليك تاخد ركن هادي بعيد وتعزل نفسك وتعيش رحلتك بنفسك ..الكتاب رغم انه مليان ودسم بمعني الكلمة إلا إن صعب تبدأه من غير ما تخلصه مرة واحدة 💙
حقيقي شكرااا جدا لحضرتك وشكرا لرفرفتك الي رغم بعدها عننا إلا إن تأثير إعصارها علينا كان قوي جدااا..
#أثر_الفراشة
#بابليو🦋

[Yasmine Rashad · Rating 5 out of 5]

الكتاب ده أنا اشتريته من معرض الكتاب في شهر يناير ومش عارفة إيه سبب إني كنت عمالة أؤجل قرايته كتير لحد دلوقتي ومش عارفة ليه كان عندي خوف اقراه أو رهبة من محتواه لحد ما قررت افتحته وابتدي في امبارح.. بدأت بالمقدمة لريهام حلمي واللي في الأول بمنتهي الصراحة حسيت إنها مبالغة شوية كتير لكن عرفت كل كلمة كتبتها ريهام في المقدمة تقصد به إيه لما خلصت القراءة...انا يمكن مش بحب الروايات والقصص وطريقتهم اللي بيكون فيها تفاصيل زيادة في وصف كل حاجة... لكن طبعا القصة دي لبهاء مختلفة تماما... آه هي قصة واقعية واه هي محطات اساسية ويمكن مش قصة كاملة بمعني الكلمة بس أنا حبيت القصص من الكتاب ده... بهاء أتكلم عن محطات حياته بسرد القصة السلس الممتع البسيط العميق والقريب من القلب و بيخترق العقل بمنتهي السهولة وده أنا حسيته لسبب معين لمسني وهو (الصدق) انت مش بتحس بصدق حد في كتابه بسهولة لكن بهاء صدق كل كلمة قالها حقيقية جدا ومستني جدا وأثرت فيا جدا... انا شخص مش بيحب التفاصيل في الكتابة بس حبيت كل تفصيلة أتكلم عنها بهاء وازاي كل تفصيلة تعتبر فراشة والفراشة دي أثرت علي حياته بطريقة عجيبة فعلا...تفاصيل كتير أثرت فيا زي لما قال لمديره في إيطاليا ربنا شايفني وزي لما دافع عن زمايله اللي تقريبا بيضروه وزي حزنه علي إن حاجة حرام بتحصل قدامه وزي حرصه ع الصلاة وزي ايمانه القوي في كل خطوة بيخطيها وزي تحليل للفرق بين إيطاليا وألمانيا والسعودية ومصر وزي التفاصيل القليلة إللي أتكلم فيها عن حياته الشخصية علاقته بأمه وأبوه وهبه ❤️ ومعاذ ومالك... وزي تحليل لكل موقف بيحصل وكأنه بيرسم صورة جميلة جدا كل شوية بيحط فيها موقف معين بيحلله بطريقة معينة وبعدين بيحطه في الصورة دي فمع الوقت الصورة بتكون متكالمة وحقيقة جدا واجمل ما يكون ❤️... حبيت كمان غيرته علي بلده لما استفزه مديره الإيطالي... وحبيت سعيه اللانهائي وشيلته للمسؤولية.... وحبيت شخصية عمرو صديقه وكلمته ليه لما فكر يفسخ الخطوبة وحبيت إن بهاء منسيش الدرس اللي اتعلمته من عمرو أبدا وفضل فاكره طول الوقت حبيت كل التفاصيل ولو فضلت احكي عن كل تفصيلة مش هخلص كتابة.... الكتاب عجبني لدرجة إني مكنتش عايزة أقوم غير لما أكمله.... اتأثرت معاه في كل خطوة في مشواره.... ربنا يكتر من فراشات حياتك يا بهاء 😁 ويا رب ده ميكونش آخر كتاب مستنية اقرأ تاني ليك في أقرب فرصة 🌸

[Norhan Abu Bakr · Rating 5 out of 5]

من الكتب الجميلة جدا التخليك مش قادر تسبها و تشدك تكملها كلها فى قاعدة واحدة ، الكتاب بيحكى جزء من كفاح شاب و هو بيدور على شغل و ازاى بيحاول يتميز و يبين مهاراته و يستمر ، ازاى هو مؤمن برفرفة الفراشات الحوليه و ان كل حاجة بيعملها حتى لو كانت صغيرة اكيد ليها تأثير كبير فى المستقبل ، الكتاب مش بالعامية و مش بالفصحة هو بلغة شاب بيوصل معلومة للشباب بلغة يفهموها و يحسوها علشان يستفيدوا بيها فى سعيهم ، فى مواقف هتقف عندها و تقول ( شد حيلك واجمد كده هتتحل ) و مواقف هنقول(الحمد لله كرم ربنا كبير ) ، الكتاب ده مرجع هترجعله كل ما تيأس أو تفتقد الفراشات الحوليك

[Eman Khaled · Rating 4 out of 5]

الكتاب من اجمل الكتب اللي قرأتها ف حياتي وانتا بتقرأ بيجذب الواحد ليه طول ما انا بقرأ وانا متخيله كل ظرف مر بيه القارئ من اول المكالمه ،والتوتر، والفرح ،انا بكيت وانا بقرأ الكتاب كتير اووي ،وفرحت لفرحته،وكنت بتوتر مع المواقف الصعبه اللي بيمر بيها ،الكتاب جميل اووي بدرجه لا توصف بتحس انك ف مغامره وفي كمية طاقه ايجابيه وتحفيز ،كنت اتمنى ان الكتاب مش يخلص والله ،ربنا ينفع بحضرتك يارب

[Samar Khater · Rating 5 out of 5]

الكتاب بجد اللهم بارك اكتر من رائع و عرض الافكار سلس و بسيط ارشحه لاي حد عايز يتعلم حزء من الحياة اللى حواليه لانه بيأثر فى كل حدبيقرأه على الرغم من ان معظمنا مر بالمواقف دي او طبعاً مواقف مشابهة الا انه خلاني احكم على المواقف دي و اشوفها من زوايامختلفة
بكيت و فرحت مع الكاتب و ده بصراحة بسبب سلاسة السرد و كإنك قاعد مع واحد صاحبك بيفضفض معاك و فى نفس الوقت بتتعلم عدم اليأس مع الحكمة مع المعافرة و المثابرة و الصبر و الشغف لدرجة ان لما تفتح اول صفحة فيه مش هتسيبه غير لما تخلصه
والكتاب ببساطة بيلمس قلب كل حد بيقرأه بالمواقف و المشاكل اللي بيعرضها الكاتب سواء كان ليها حل او لا فهيخليك تشوف تدبير ربنا في حياتك و تفكر فيه بطريقة مختلفة
انصح بيه جدااااا
جزاك الله عنا خيراً منتظرين المزيد 🙏

[Shaymaa · Rating 4 out of 5]

كتاب جميل .. بسيط من غير تكلف و في نفس الوقت مليان تفاصيل .. تفاصيل تخليك تعيش حاجات كتير معاه بمنتهى الاستمتاع .. خلصته في يومين بعد محاولات لاني ما اخلصوش في قعدة واحدة ، استمتعت جدا بقراءة تحليله للشخصيات و المواقف اللي قابلته .. بالنسبة ليا شخصيا حقيقي الكتاب جه في وقته جدا و استفدت منه كتير ..

[Alia Adel · Rating 5 out of 5]

لو كُنت بتقرأ تقييمات الكتاب عشان تعرف هتشتري الكتاب ده ولا لا ، ب كل ثقه أقدر أقول انه من الكُتب القليله اللي بتسيب فيك تأثير و علامه تفضل بعد قرايتك ليه..
فيه ناس لما تحكي حكايتها متطلعش منها بحاجه.. مش عشان حكايتهم سطحيه.. بس ببساطه عشان معرفوش يحكوها صح..
الكتاب ده مش بس فيه حكايه و خلاص .. لا فيه وصف و تفاصيل و حاله كامله بتعيشها في كل صفحه.. ناس كتير كتبت انها
مقدرتش تسيب الكتاب غير لما تخلصه و انا لقيت نفسي منهم ..
قليل جدًا لما تلاقي طريقة حكي و قصه واقعيه غنيه بالتفاصيل تدخلك في الحاله كامله و تسمع الاصوات اللي سمعها الكاتب و تعيش و تتأثر بتأثره و تدمع في لحظات فرحه و تنتصر لانتصاراته و تشوف نفسك فيها و تفتكرها بعد قراية الكتاب في كل موقف يواجهك ..
الكتاب فيه شعور بالدفئ و شعور بإنه حقيقي .. و دي مش حاجه قليله وسط الزيف اللي محاوطنا.. لما تلاقي حاجه حقيقيه بجد بتلمسك علطول بدون حواجز .. بتحسسك انك مش لوحدك .. و ان فيه أمل حقيقي في كل حاجه .. بيخليك تشوف بعين مختلفه ..
كل التوفيق للكاتب و في انتظار الكتاب الثاني.. و حقيقي أتمنى انه يكتب روايه المره الجايه .. اسلوب الحكي مميز جدًا و الخيال و حُب التفاصيل عنده نادر جدًا..

[Aya Ahmed · Rating 5 out of 5]

بابليو من أمتع الكتب اللي قرأتها علي الاطلاق حرفيا عشت معاه بكل كياني وانا بقرأ فيه كنت ببقي منفصلة حرفيا عن كل حاجة حواليا كنت حاسة اني جوا الحدث طريقة سرد بهاء اكثر من رائعة طريقة تفصيلية دقيقة جدا كانك عايش في الحدث بتمر بكل اللي مر بيه وردود أفعاله اتعلمت واستفدت منها جدا انصح بقرائته جدا من الكتب اللي هتغير فيك حرفيا
استفدت واتعلمت من بابليو جدا فكرة السعي باستمرار بتفاؤل وثقة ويقين في الله. انك تعمل اللي عليك لحد اخر نفس من غير ماتنتظر النتيجة. إن تدبير رب الكون أعظم وأفضل مما تتمني فاحسن الظن بالله وسلم أمورك كلها لله ومتشلش هم. اوعي تنسي ان رفرفة جناح فراشة قادر يعمل إعصار فكرة التغير التدريجي ولو بشئ صغير جدا ومستمر عليه قادرة ان تعمل تغير جذري لا تتخيله. بابليو فيها كمية طاقة إيجابية وسعي لا تتخيلها. حرفيا مش عارفة اسيب الكتاب وحاليا في قرائته للمرة الثانية
بجد بهاء جزاك الله عنا جنة الفردوس الاعلى اللهم آمين يارب العالمين. ربي يباركلك في هبة وفي أولادك ويقر عينك وقلبك بيهم.

[Mohamed Elsherbini · Rating 5 out of 5]

مش هتقدر تغمض عنيك.
هذا تقريبا حال كل من بدأ في قراءة بابليو. تبدأ بفضول ويتحول الفضول لمشاعر مختلفة. تارة خوف وتارة أخرى بكاء وفرح. الرواية تدخلك بكل داخلها بكل تفاصيلها. فتتحول من كونك تقرأ لأن تعيش.
وهذا أدهشني لأن هذه أول تجربه كتابيه لبهاء.
السرد ممتع ويجعلك تعيش كل كلمة وترسم تفاصيل الاماكن في عقلك.
جمعت بين متعة السرد وفوائد القصه وهذه من الروايات القلائل التي لا أندم أبدا علي وقتي فيها.
....
الرواية دي أنصح بيها كل حد من بعد فترة ثانوي لحد الي متخرج وبيشتغل او بيدور علي نفسه.
الي عجبني جدا اا في بابليو إنها ليست رواية خياليه.. لا بل واقعيه حدثت بال��عل ودا مصدر قوتها إنها مش كلام إنك تقدر لا دا بيوريك إزاى قدر يعمل دا وتتعامل إزاى في لحظات الضعف والخوف وقلة الحيله.
..
من الاخر كلنا بابليو مع اختلاف اتجاه الرفرفه

[maryam · Rating 4 out of 5]

الكتاب لطيف وبسيط وتأثيره جميل على قارئه مثل أثر الفراشة بمعناها المقصود بقلمك في كتابك أو معناها الواقعي بلطافة لمستها ..
أثناء قراءة الكتاب كان كاتبه كصديق يحكي تجربة طويلة مليئة بالأحداث والأشخاص وتدابير الله، وكأي صديق مُخلص وشاب مُتعلّم في بيته وبيئته قبل مدرسته أو كليته أو حتى بيئة عمله.. وصلت الرسالة ونقول مثل ردّه في معظم الرواية "متشكّر، ربنا يباركلك" في بيتك وعيالك ((:

[Ahmed Yousry · Rating 4 out of 5]

كتاب خفيف، ولذيذ، ولغته العامية واخدة الرواية في مكان مختلف
ومثال بسيط وجميل عن تأثير الفراشة في حياة بهاء الدين، واللي بتخلي الواحد يركز علي الخطوات البسيطة في تحقيق هدفه سواء له نفع عائد علي الشخص نفسه أو نفع عام ، ياخد باله من تفاصيل مهما كانت بسيطة فهي ليها تأثير إيجابي علي المدي البعيد، ولكنه مش ملاحظ.

[Shereen Wagdy · Rating 5 out of 5]

من المرات النادره اللي انزل فيها رأي في كتاب 📖 😅 بس حرفيا مش قادره اعدي كتاب من غير منزله لعل بجد حد يستفيد...
اي ام عندنا ابن انصحها تخليه يقرأ كتاب ده 👌
في البدايه كنت مستغربه؟ 👀 هل استاذ بهاء هينزل كتاب شكله ايه محتوي مش معروف الاسم غريب 😅
ولو اني اتاخرت اني اشتريه بس هو جه فوقته فعلا بلف في مكتبه الله ده كتاب بابليو بتاع استاذ بهاء هنا؟ 👀 بعد لف كتيير 😌 خلاص انا هجيبه.. حطتيت توقعات للكتاب زي باقي ناس مشهوره شويه علي سوشيال ميديا مكتبو كتب ؟
وقلت اشوف اضافه بهاء
الا ان اي توقع 😅 حطيته الكتاب ده تخطاها بصاروخ.... بدون مبالغه..
انا بقرا لكذا شكل ونوع كتب وكتاب ده صعب تصنفه وصعب تتوقع ان اللي كاتبه اول مره يكتب؟
كتاب عباره عن فضفضه صديق... رحله بتسرح فيها وسايبك اللي تحكم وتستفيد ولا بيوجهك ويقولك كلام علمي ولا هي ماده دسمه 😅 بس مليانه معلومات ودروس من غير متحس
هي خبره عمليه.. هي النصيحه والامل اللي دايما بيحاول ينشره ويوصل... ايوه 😅 لسه في امل....
هتفرح وهتحزن وهتحبط وهتتكسر وهتشاركه كل اللحظات
هيديك كتاب ده دروس من غير متاخد بالك انو بينصحك؟
هو بيدردش معاك وانت تحكم....
في كل مره كنت بنتقل من صفحات كتاب حسيت بكل موقف وصعب جدا ميكنش كلنا مرينا بالمواقف دي حياه حقيقه فعلا في كتاب قدامك بس مش كلنا حد نصحنا وقلنا تفاصيل والحكمه...
هتشوف نصيحه صاحب اللي بجد اللي ممكن تفضل تسيب اثر في حياتك كله...
هتشوف اثر التمسك والتصرف لوحدك عكس التيار والشعور بين غربه الفكر وبين ضميرك وبين الضغط.. هتشوف كرم ربنا
هتشوف حياه إنسان عادي مش حياه سوبر هيرو بتاع المجتمع حالي بيدعو ليه...
او كلام من غير ميديك حلول عمليه.. لا انت هتشوف واقع بجد
هتشوف بعينك ان تربيه فعلا ووضع اسس بيفرق ومش بيروح.. مهما كان الوضع حواليه... لو اتأسس صح وفهم صح
هتشوف امل... هتشوف معني ايه..
"وَأَن لَّيْسَ لِلْإِنسَانِ إِلَّا مَا سَعَىٰ "
هتفهم معني حرفيا.. "إِنَّا مَكَّنَّا لَهُ فِي الْأَرْضِ وَآتَيْنَاهُ مِن كُلِّ شَيْءٍ سَبَبًا،، فَأَتْبَعَ سَبَبًا"
شكرا يا بهاء علي الامل اللي دايما بتديه شكرا علي فراشه اللي رفرفت في حياه ناس كتير... تفكرهم بالاصل والامل وتفوقهم من انشغالات دنيا والاحباط وكلام مهي خربانه وكله كده... لا...
نصيحه استغل طريقتك اللي كتب بيها كتاب دي فكتب او فعلا لفايده الناس اسلوبك سهل ولين جداا وبيوصل معلومه قدره علي وصف تبارك الله مميزه جداا
ربنا ينفع بيك ويستخدمك ويبارك لك في حياتك..
#بابليو
#بهاء_الدين_سليمان

[Hafez Sallam · Rating 4 out of 5]

ودا اللي بيحصل لكل واحد فينا ، الابواب والطرق ، اللي بتاخدنا لحاجة من ثلاثه ، يا طريق مستمر هيودينا المكان المناسب على طول ، يا طريق بعد ما نمشي فيه شويه نكتشف طريق ثاني جانبي اتفتح من خلاله ، و يكون هو ده الطريق المناسب، يا طريق سد ، نمشي فيه و نلاقي نفسنا وصلنا لمرحله ما ينفعش نكمل فيها فنرجع ، ونقفل الباب ونستني باب تاني يفتح ، ولما بيفتح الباب المناسب ، بنكتشف ان الطريق السد اللي احنا فيه مشينا فيه دا كان لازم نمشي فيه ، من غيره ما كناش هنقدر نمشي في الطريق المناسب ، و يمكن كمان من غير مكنش باب الطريق المناسب فتح من الاساس .
المطلوب "فأتبع سبباً" وشويه فرشات.
ده اللي بيخلي الواحد يطمن للطريق ، و يقدر يكمل فيه ، و يبقى مؤمن ان الطريق مشتق من الهدف ، حتى لو كان مختلف عنه ، زي ما اللغه الايطاليه مشتقه من اللغه اللاتينيه ، ومختلفة عنها
...............
كتاب خفيف ولذيذ جدا وبيسحبك فى القراية ، ودا قليل اوي في كتب اللغة العامية .
كتجربة اولي للكاتب كانت جيدة جدا ، ارشحه بشدة للشباب الصغير اكتر اللي لسه محتكوش بالسوق .
ليا بعض الانتقادات و الاستفسارات البسيطة جدا :
فيه بعض الأجزاء اخدت استطراد من الكاتب زي حكايته خلال عمله فى ايطاليا ودا خلاني افهم تفاصيل كتير بس مثلا مش فاهم برضه سبب مقنع في تركك للعمل بالصورة دي واظن فيه تفصيلة ناقصة .
في اجزاء كانت محتاجة استطراد زي الجزء ده ، زي مثلا شغلك في السعودية او المانيا او الاهم وهو رجعوك هنا في مصر كان لازم الموضوع يتفصل شوية عن كده حسيتك بتجري فى اخر الاحداث بسرعة كبيرة .
....... منتظر بشدة عملك القادم

[Drheba M · Rating 5 out of 5]

الباشمهندس بهاء الدين كما يقولون لك في مصر 🇪🇬
او المدرب بهاء الدين كما عرفتك في الايفنت الذي جمعنا كلجنة تحكيم في ايفنت انت المدرب بالاسماعيليه.
او بااء كما اطلقوا عليك بالايطالية 😊😊 😊
حقيقة اشكرك على الرواية...
الاحساس الصادق بها وصل بكل معانيه. التحفيز، لحظات الضعف، لحظات القوة، لحظات الامل، دقة التفاصيل اللي اخذتنا بداخل الحدث وعيشتنا اياه، الإثارة والتشويق ، قوة التمسك بالقيم والمبادئ والاخلاق و تعاليم الدين، اللهم بارك لأبويك على حسن تربيتهم لك. 😊 🌹. ( اللهم انا نحسبه على ذلك ولا نزكي على الله احدا والله حسيبه).
الرواية أثرتني حقيقة.
( وسبحان الله نظرية الفراشة هذه ناقشني فيها معلمي حفظه الله اكثر من مرة وتشغل تفكيري دائما وتفسيري لبعض الاحداث من حولنا 😊😊)
ولولا انشغالي كان زماني انتهيت منها في اقل من يوم. لكنها انتصفت ولم أستطع أن أنتظر حتى الإنتهاء لأشكرك عليها. وأوصي الناس بها. 😊 😊
ننتظر المزيد من هذه الأعمال الهادفة التي تساعدنا على غرس القيم الجميله بداخل الشباب. 😊
من الروايات القلة جدا التي أوصي وسأوصي في الكوتشنج بقرأتها بإذن الله 🧠
اللهم ضع لها قبولا في الارض والسماء..
اللهم اجعلها لك ولأبويك علما ينتفع به بعد الممات 😊
أشكرك ثانية باشمهندس باهي على هذه الدرة الرائعه. والفراشة التي يندمج فيها مزيجا من الالوان القيمية التي نفتقدها في هذا العصر 😊
Bahaa-Eldin Soliman

[ياسمين المليجي · Rating 5 out of 5]

أنا ما قرأتش حاجة قبل كده حمستني وشجعتني وعيشتني فيها وطلعت انفعالاتي، حاجة تلمسك وتشبهك وتمسكها ما تقفلهاش وتقرأ وأنت منغمس تمًامًا، زي بابليو كده صدقًا يعني!
بابليو مش كتاب ومش رواية مش عارفة أصنفها كده.. بابليو ممكن تكون رحلة، رحلة كاملة صادقة واقعية هتعيش فيها جدًا جدًا. أنا عيشت المشاهد كلها وبنفعل في نفس اللحظة الي بقرأ فيها كأني بعيشه فعلًا بنفسي، في انفعال بنفعل، في حزن موجود، في توتر بتوتر جدًا وبهدي نفسي، في فرحة بزقطت وبتنطط وبقول واو للصبح من عظمة خلطة الحماس والتأثير والجمال الي وصلني والي وصل لكل حد قرأها أو لسه هيقرأها أكيد.
تجربة عظيمة لازم لازم لازم تعيشها!

إبهار وعظمة وحماس وتشجيع وخلطة مشاعر تحفة كده توصلَّك في الآخر إنك ما ينفعش ما تنحتش في الصخر زي ما بيقولوا، تسعى بضمير واجتهاد وصدق كامل، ما ينفعش يبقى ربنا مهيألك الأسباب والطرق الي هتمشي فيها حلوها ومرها وصعبها وما تاخدش بيها. ولطف وتدبير وتوفيق وكرم ربنا ليك في الطرق دي هيقويك أكتر في كل مرة وهيبهرك فوق الوصف، وهيديلك دش بارد يفوقك لما تتوه. والي هيسندك ويوجهك في الرحلة دي هو إنك معاك دينك ومعرفتك بربنا ومبآدئك، ورفرفات من أهلك وأصحابك والناس الطيبة الي ربنا بيرزقك بيهم وسط الطريق عشان أنت إنسان مؤمن صادق ومجتهد، وهو لطيف كريم حكيم. 💙

"المطلوب "فأتبع سببًا" وشوية فراشات. دا اللي بيخلي الواحد يطمن للطريق، ويقدر يكمل فيه، ويبقى مؤمن إن الطريق مشتق من الهدف، حتى لو كان مختلف عنه." ❤
#بابليو 🦋💖

[Rana AlaaEldin · Rating 5 out of 5]

أنا اتبسطت!
اتبسطت بكل تفصيلة في الكتاب دا، حاسة إني كنت حاضرة في كل موقف بيحصل، في كل لحظة إحباط وفي كل لحظة نصر بسبب التوكل.. اتبسطت لما كل مرة كان يتحط في اختبار لمبادئه ومينهزمش، اتبسطت في كل مرة وهو بيقول (أبويا رباني على كدا) و(عشان ربنا شايفني).. واتبسطت بالحوار مع صاحبه لما قاله (انت فاهم ربنا غلط) وأقنعني أنا شخصيا بالهدف الصح من الجو��ز. ") ـ

الكتاب نبّهني لتأثير الفراشة وخلاني أركز فيه مع بداية كل يوم، أنا أصلا شخص بيتفائل جدا لما يركب مشروع الصبح ويلاقي السواق مشغل قرآن بصوت شيخ بحبه، ولما ألاقي ست كبيرة في الشارع تبتسملي بدون سبب وتدعيلي، وهكذا.. فالكتاب خلاني أعيد صياغة التفاؤل دا لـ (أيوة هو دا تأثير الفراشة فعلا!) .. حقيقي فرق معايا..

أنا أول مرة أكمل كتاب مكتوب بالعامية للآخر، لما اشتريت الكتاب اشتريته وأنا واثقة إني هقرا حاجة محترمة لإني متابعة قديمة لأستاذ بهاء وفيديوهاته وكتاباته، الحقيقة إن أجمل حاجة في الكتاب كونه بالعامية، بسيط، سهل، بيعيّشك الأحداث بمنتهى السلاسة.. حقيقي تيقنت من قاعدة (الحكم على الشيء فرع من تصوره) وأنا كنت بحكم على العامية بالرداءة قبل ما أجرب أقرا حاجة محترمة كدا.

شكرا جدا على الجمال دا.. وأتمنى ربنا يوفقني وأقنع أخويا يقراه (مبيحبش القراءة) عشان متأكدة إنه هيفرق معاه.

[Abdalrahman Gamal]

بابيلو
بعتذر لاني مش قادر انزل ردود قويه تبين حقيقه المحتوي ولكن انا مش من هواة القراءة ومع ذلك ..
كنت بقرأ الكتاب وانا متشوق ،حسيت صور جماليه كتير عيشنها مع الاستاذ بهاء في اسكندريه ومنها علي أيطاليا.
خدنا فكرة عن اسلوب العمل في السعوديه وألمانيا وإيطاليا وعرفنا الفرق في التعامل وقدرنا نوصل للحقيقه.
عرفت يعني فراشه قادرة تخلق اعصار ، حسيت باليقين في كل خطوة غير مخطط لها وتغييرات المجال الوظيفي للكاتب .
لقيت الطموح وبدايه مقابلات العمل وشريكه الحياة الوفيه والام المصريه اللي مش بتسيب ابنها من غير ما يكون دعائها محوطه .
عرفنا يعني ايه ايمان وتمسك بالقيم والفرق في الشخصيات لما يقف قدام معاصي وايهما متمسك بمبادئه.
حسيت بالغضب وقت كلام المهندس الايطالي ربنا فين!؟
حسيت بالفرق في اكل الايطالين والالمان واسلوب الاكل ،وتذوقنا الاكل وشمنا ريحته وشربنا قهوة .
حسيت بالفرح والفخر في ايام اسيوط والاسماعليه وكأني انا اللي بعت البضاعه.
شفت التحليل التفاصيل قد ايه مهمه وان الضعف دائما لا يجوز.
عرفت ان اوقات الاندفاعيه بتكون ايجابيه لو استغلت في الطريق الصحيح وبقدر معين .

[Maram Nabil · Rating 5 out of 5]

امتع رواية قرأتها برغم اني ماكنتش متفائلة من كونها عامية
لكن اللي حصل اني فضلت فترة بعد ماخلصت الرواية مش عارفة ابدأ في كتاب بعدها
كنت خايفة اقرأ كتاب بعدها يخرجني من الحالة اللي سببتهالي
كنت متأثرة جدا ب "بابليو" وبأحداثها وبالمعاني اللي طلعت بيها منها وماكنتش عايزة اخرج من الحالة دي ابدا
فخورة بان دي احداث من حياة شخص عايش في العصر دا وعنده مبادئ قوية برغم التحديات اللي قابلها
واتحمست جدا اني احسّن من نفسي واني اراجع مبادئي
شفت نفسي كتييير جدا في كذا مشهد في "بابليو" ومواقف كتير انفعلت معاها كأنها حصلتلي
لدرجة اني احيانا كنت باغلط وانا بتكلم عن "بابليو" واحكي الموقف كأنه حصللي انا
حبيت الرواية جدا ونفسي اشوف روايات وكتب كتير بنفس بساطتها وقوة تأثيرها من شباب لهم قصص نجاح شبيهة تدعو للفخر

[Afnan Nashat · Rating 4 out of 5]

بابليو بدايه ونهايه مكنتش متخيله اني هيعشها كده التفاصيل اللي الكاتب كان محافظ عليها كانت فعلا مهمه وبتخليك تشاركه في كل لحظه في حياته من حزن وفرح وانكسار وقوه وكانك كنت عايش معاه وبتتأثر بكل مرحله بيعدي بيها ....بابليو رحله هتعرف فيها نتيجه السعي وتدابير ربنا الجميله اللي تخليك واثق فيه وفي حسن اختياره .