طريق أصلان

by محمود وهبة

"ستار أسود عملاق, يفصل ما بين الحقيقة والزيف, الكواليس أصبحت مزدحمة عمَّا كانت عليه من قبل, الكثير دخلوا إلى تلك المسرحية والكل يؤدي دوره باقتدار, والغريب في الأمر أن ما زال هناك من يجلس ويشاهد مصدقًا لكل ذلك العبث, هؤلاء هم الضحايا دائمًا".

240 pages, Hardcover

First published January 22, 2020

About the author

كاتب روائي وسيناريست
ولد فى القاهرة عام 1989
تخصص فى كتابة أدب الرعب والجريمة
صنف من افضل 10 روائيين فى مجال ادب الجريمة فى مصر والوطن العربي
كتب العديد من السيناريوهات المختصة بأفلام الجريمة و الرعب.
Novelist and screenwriter
Born in Cairo in 1989
Specialized in writing horror and crime literature
Ranked among the top 10 novelists in the field of crime literature in Egypt and the Arab world
He wrote many scripts for crime and horror films.

Reviews

[Ahmed Eldoshny · Rating 5 out of 5]

ريفيو #طريق_اصلان
للمبدع دايما... محمود وهبه
((خلقنا لسبب واحد وأقدار مختلفه خلقنا مكملين لأقدار بعضنا البعض القدر ماهر في صناعه الحكايات والقصص.............))
والله ياصديقي مش عارف ابدأ ازاي مش لاقي كلام اقدر اوصف بيه الروايه.. لاني عارف ومتأكد انها هتبقي رائعه وانت معودنا علي كده..
الروايه انا بدأتها النهارده وخلصتها النهارده.. من أحداثها المشوقه واللي تخليك تجيب الروايه لاخرها
موضوع الروايه صعب ومؤثر بطريقه ولا أروع وقدرت تخليني اتأثر بالاحداث كلها وكمان اتخيلت نفسي مكان أصلان.. غير كده طبعا ان الاسمين اللي بيدور حوليها الروايه ع اسامي اولادي ودا مأثر فيا اكتر..
قدرت توصل ازاي ممكن الضغوط والاحداث الصعبه اللي بيمر بيها أي شخص ممكن توصله اللي يكون قدام اختيارات صعبه عشان يهرب من الضغوط دي
وقدرت تظهر روح القانون وما يقابلها بتطبيق القانون بغض النظر عن روح القانون
بحد قضيت وقت ممتع وانا بقراها برغم تأثري بفكرة الروايه بس رائعه جدا جدا
موفق دايما كالعاده
ودايما تبهرنا بروياتك
ومن نجاح لنجاح
😍😍♥♥
Mhmoud Wahba

[Ahmed Charisma · Rating 4 out of 5]

روعة .. روعة بجد .. لحد موضوع ربط الرواية بالرواية الأجمل على الإطلاق سفر القتل ..
سفر القتل هي روايتى المفضلة والمشكلة مش فى الربط كمبدأ .. المشكلة إن الربط كان السبب إن الرواية دى نهايات كل أشخصاها بقت مفتوحة ومش هتعرفها غير لو قريت سفر القتل ..
يعني بعد كل المتعة والإثارة إللى عشناها في طريق أصلان فى الأخر تحس إنك قريت رواية ومتعرفش إيه إللى حصل لكل إللى فيها ..
المشكلة الأكبر كمان إن هشام فى الأخر معملش أى حاجة ومأخدش حق أصلان إللى نهايته كانت مأساوية بعد كل الكفاح ده ..
الرواية كمجمل رائعة بغض النظر عن الجزئية دى .. تشويق وإثارة ومتعة ومؤثرة فى أحداث كتير كعادة المبدع محمود وهبة .. يعيبها بس الأخطاء الإملائية الكتيييير جدا والملحوظة للكل .. يا ريت يكون فى مراجعة أدق فى الروايات القادمة ..
كانت قريبة جدا من الخمس نجوم لولا السلبيتين دول

[Fady Mohamed Refaat · Rating 5 out of 5]

رواية رائعة ومشوّقة ، يعيبها الكثير والكثير من الأخطاء اللغوية تفتقد إلى التدقيق اللغوي ، كما أني كنت أنتظر نهاية أفضل من ذلك ، أشعر وأنه قد تم (كروتة) النهاية ؛ إلا إذا كان سيُلحق بها جزء ثانٍ.
لكنها على العموم رواية رائعة حزينة سريعة جداً ومتتالية الأحداث.

[Khaled Mohamed · Rating 4 out of 5]

مختلفة عن كل اللي فات
درامية وانسانية اكتر من انها اكشن
مميز اوي محمود وهبه فالجزء ده وبيعرف يعمل حبكة حلوة جدا بعيدا عن تحفظي فحتة من الجزء الاخير من الرواية اللي حسيت فيها انه متأثر بفيلم الهروب للراحل احمد ذكي
اكتر حاجة مستفزة دار النشر
مش طبيعيين بجد انتم والمدققين اللغويين كمية اخطاء املائية ابني اللي فاولى ابتدائي ميغلطهاش
ودي مش اول رواية فدار النشر دي يحصل فيها الكوارث دي
عيب ياجماعة اوي انتم بقالكم ٤ سنين عندكم المشكلة دي بجد عيب

[Karim Kassim · Rating 4 out of 5]

رواية اجتماعية جميلة جدا وممتعة

[Atef Younis · Rating 4 out of 5]

📙🔍🔍ريڤيو روايه طريق أصلان✔️
للكاتب محمود وهبه 👌📙
عندما يجتمع الشيطان مع الإنسان في ارتكاب جريمه سيكون من المجهد حل معادلتها 👇👇
✔️لعلي لن أجد أفضل من ذلك الاقتباس لكاتب الروايه المبدع " محمود وهبه لأبدء به الريڤيو الخاص بالروايه "
روايه طريق أصلان هي روايه من النوع الذي يجبرك ان تستابق الصفحات لكي تصل الي نهاية الحبكه الدرامية المشوقة والمثيرة ..
🔹فهي تدور في إطار من الدراما والمفأجات والحقائق المرعبه للأسف التي نحاول ان نتجاهلها او نهرب منها ولكنها واقع اليم نعيشه ويكتوي بناره الجميع دون استناء
ببراعه معتادة يستطيع الكاتب ان يدخل أبواب أصبحت تمثل كارثه في المجتمع المصري وخاصه في الفترة الاخيره وهي ظاهره عن خطف واختفاء الأطفال التي تحولت إلى ظاهرة مأساوية، بعدما مات الضمير لدى الكثير من الناس وتعددت أغراضهم للخطف منها التسول وتسخير هؤلاء الصغار من أجل جمع الأموال، والآخرين كانت مخططاتهم في خطف الأطفال لتجارة الأعضاء البشرية وأيضا هناك من يتم استخدام دمائه الطاهرة كقربان للشياطين والمرده في عمليات التنقيب عن الآثار
⬅️ وهنا يظهر دور بطل الراويه أصلان الذي شاء حظه العاثر ان يدخل رغمًا عنه في تلك الدائرة الدمويه التي لا ترحم وهو أصلا من كان يعاني ويلات الحياه وصعوبتها ولكنه مازال يحتفظ بأصله كما مازال يحتفظ باسمه ..
وتتوالي الأحداث سريعا وبصوره كثيره وتنكشف الوجوه تباعًا وتزيد الخيانة من الجميع فالكل يخون الكل وتزداد دائرة السوء
ولكن أصلان يواصل طريقه الذي بدءه للوصول لغايته علي امل الخروج من تلك الدائره السوداء التي دخل فيها مرغما وهو ما ينجح فيه ولكن القدر كان يجهز له مفاجآه اخري وأيضا الكاتب يفاجئنا بنهايه غير متوقعه إطلاقًا لتزداد الروايه حلاوه واقناع
الروايه جميله ومشوقه من اول صفحه لآخر صفحه مليئة بالمفاجآت بلغه جميله ومنسقه وترتيب احداث ممتع 👌
أنصح بقراءتها لعشاق الادب البوليسي والجريمه ✅👏🙏.

[Eng Mony · Rating 3 out of 5]

لحظة سرحان واحده تقلب حياة البطل رأساً علي عقب وتوصله في النهاية لحبل المشنقه
العداله العمياء والقانون العاجز قصاد ارادة القدر وترتيباته
القصه البوليسيه واضحه وصريحه الحبكه ممتازه والقصه واقعيه بتحصل كل ساعه حوالينا وفي شوارعنا
الصفحه الاخبره ومحاولة ربط الروايه بسابقتها سفر القتل مفهمتوش
الروايه يعيبها حاجتين
اولا الاسهاب في وصف المشاهد الخارجه كان ممكن نفهم الي حصل بدون كل التفاصيل دي
الحاجه التانيه والي قفلتي جدا الاخطاء الاملائية مفيش صفحة مفيهاش خطأ او اتنين بعضها بتكون معاه مضطر انك نقرأ الجمله مره واتنين عشان تفهم الكلمه دي كان مقصود بيها ايه

[Shimaa Mohamed · Rating 5 out of 5]

طريق اصلان😍
روايه مميزه جدا لكاتب مميز وله اسلوبه الخاص..طريق اصلان هي روايه تشويقيه تتميز بحبكه دراميه عاليه قدر الكاتب يخلينا نعيش مع اصلان طريقه ورحلته الصعبه عشنا معاه كإنها قصتنا احنا كل شخصيات الروايه مغزوله بإتقان شديد..نهايه صادمه لكنها واقعيه جدااا...الروايه بتستفز العقل والمشاعر في آن واحد مما زاد من تميزها...طريق اصلان خطوه جديده مميزه في طريق كاتب كبير ومميز استاذ محمود وهبه..امتعتني وابكتني واسعدتني في طريقي مع طريق اصلان...
احييك بشده وفي انتظار المزيد من الابداع...سلم قلمك وسلمت يداك👏👏👏👏😍

[Violinista Yanni · Rating 2 out of 5]

قريت سفر القتل ل أ/محمود وهبة ...و بجد كانت اكثر من رائعة قصة و حبكة وكل حاجة فيها كانت ممتازة و قررت ساعتها اقرا كل ما كتب و سوف يكتب محمود وهبة و فعلا قرات معظم رواياته و كانت رائعة

لكن سوف تظل سفر القتل بالنسبة لي اروع ما كتب في هذه السلسلة البوليسية
.
طريق اصلان ...اطالة ...احداث ملهاش لزمة "من وجهه نظري" ...هي رواية ليست لي بالمرة و هذا تقيمي الشخصي لها ليس اكثر و مثلها مثل خروج امن و وينشيستر ٣٠٨ ...

راجيميل..الطوارق.المخطط...المشرحة ..غرفة كانبرا ..العشيرة ..سفر القتل ..جميعهم اعمال رائعة انا عارفة انهم فكرة مختلفة و هذا ما افضله ...اذا كنت تحب الخيال ..ارشح لك ما سبق

[Mona El-gharbawy · Rating 2 out of 5]

الحقيقة الرواية ماعجبتنيش، ليست بقوة رواياته السابقة على الاطلاق. والصدف كتيرة وخيالية جدا.
حشو المشاهد الجنسية وتكرار كلمة الشيطان والشياطين ممل للغاية. كما ان القصة تكررت في العديد من الروايات مافيش جديد... مخدرات تهريب آثار فساد رجال اعمال .....

الطبعة كانت مليئة بكم رهيب من الاخطاء الاملائية، غير تكرار بعض الصفحات.. والمفروض انها طبعة اصلية.

كنت منتظرة الرواية ديه ومتشوقة لها جدا ولكن خابت آمالي للاسف.

[Mohamed Saad · Rating 5 out of 5]

المبدع دائما محمود وهبه رواية في قمه الابداع سينمائية من الدرجه الأولي طريقه سرد ممتعه تجعلك تشتاق لمعرفه باقي احداث الرواية طريقه ربط اكثر من رائعه وفي قمه الإبداع بين شخصيات الروايه والروايات السابقه مازل التفوق علي الذات جاريا مازال الإبداع موجود روايه تستحق القراءه ممتازه من الدرجه الأولي اتمني رؤيتها قريبا فيلم سينمائي هيا وسفر القتل وغيرها من الروايات الخاصه بالمبدع محمود وهبه اتمني لك كل التوفيق ودوام الاستمرار 👏 وفي انتظار القادم إن شاء الله

[Waled N. Salah · Rating 5 out of 5]

روايه غايه في الجمال والروعه احداثها مثيرة ولا تشعر ابدا بالملل وانت تقرأها وفي ربط جميل مش عايز اقول عليه علشان ماحرقش احداث الروايه جعلني اصفق بشده تحيه للمؤلف والعبقرى الاستاذ محمود وهبه اللي دائما بيبهرني في كل روايه تصدر له وبالتوفيق دائما فيما هو قادم وانصح بشده لمن لم يقرأ هذه الروايه ان يسرع في قرائتها

[Ehab Yahia · Rating 5 out of 5]

عمل درامي رائع من الطراز المتميز
جمع العمل بين الدراما الاجتماعية و ادب الجريمة و الفنتازيا في وقت واحد
يحتوي العمل على العديد من التداخلات و التشابكات الدراميه و التي تترابط مع بعضها البعض بشكل قوي و ذكي في نفس الوقت
نهاية العمل صادمة بحق و غير متوقعه على الاطلاق
الغلاف كان يحتاج الى تصميم اكثر تميزا ليعكس قوة العمل
تحياتي استاذ محمود و في انتظار المزيد دائما

[Amr Rabo · Rating 4 out of 5]

زي ما عودنا محمود بقلمة الرشيق طريق اصلان رواية مشوقة وقريبة من الواقع لدرجة عالية جدا مليئة بالإثارة والاحداث واهتمام غير طبيعي ببناء الشخصيات والخلفيات ، بالتوفيق يا محمود ومن نجاح لنجاح باذن الله.

[Saber Said]

مش بعرف أكتب ريڤوو
بس بجد الرواية فوق الوصف أحداثها جميلة وشيقة لمست قلبي بعض أحداثها وكلماتها
ربنا يوفقك للاحسن دائما ي صديق

[Sultan Alshehri · Rating 2 out of 5]

رواية كئيبة،، أسلوب درامي جيد جداً في السرد للقصة والتشويق،، ومستوى لغة عربية كارثي جداً لأي كاتب تجاوز المرحلة الابتدائية!

[محمد الشافعي · Rating 1 out of 5]

رواية تحتوي على كل عناصر الكآبة وليست الجريمة
لم أستطع أن أكملها