أدريان

by محمود حسن البنا

118 pages, Unknown Binding

Reviews

[Bassant · Rating 5 out of 5]

دايما بتبقى فى معضلة بتواجه اى كاتب و هى إنه يكتب رواية فيها فكرة جديدة ، و القارئ بيواجه نفس المعضلة انه يقرأ رواية فكرتها جديدة او زى ما بنقول حاجة بره الصندوق ، الكاتب هنا استخدم وصفة الفار الطباخ (Remy) و قرر انه يستخدم الأفكار اللى فى الصندوق و يضيف عليها بهارات من اللى بره الصندوق و من المزيج ده قدر يبتكر و يكتب رواية أدريان.
رواية بطلها كلب و اسمه أدريان و الرواية عبارة عن مذكرات الكلب أدريان ، رواية تبان غريبة و من اول وهلة ممكن تستبعدها لكن بالنسبة ليا كان فى فضول كنت عايزة اعرف أيه اللى عايز يقوله الكاتب من خلال مذكرات الكلب .
الرواية عدد صفاحتها ١١٨ و الكاتب قدر فى الصفاحات القليلة دى يخليك مستمتع و انت بتسمع من أدريان قصة حياته و المواقف اللى مر بيها لوحده و مواقفه مع اخواته و والدته ، و ازاى كان متعلق بمصطفى( الانسان اللى اعتنى بيه)، و إنه يفضل متمسك بكل حاجة اتعلمها منه ، هتشوف نظرة أدريان و طريقة تفكيره و رد فعله و ازاى كان بيتصرف فى مواقف قوية زى حادثة الطفلة و القبطان.
معروف عن الكلب انه صديق وفى ، لكن وفاء أدريان لمصطفى و وفاء والدته للست اللى اعتنت بيها كان وفاء بلا حدود كان الوفاء العظيم .
اسلوب الكاتب كان سلس و ممتع و اللغة كانت فصحى لكن فصحى فيها روح العامية ( على طريقة يوسف وهبى فى فيلم إشاعة حب )😀💛 ، الشخصيات بالرغم انها بسيطة جيدا لكن الكاتب هيخليك تشوفها حية تحس بيها و تصدقها.
القارئ هيلاقى مشاكل اجتماعية و قضايا زى المخدرات و اعمال الشعوذة و السحر و هيعيش مواقف انسانية و مواقف حزينة و مؤلمة و كمان مواقف كوميدية و كل ده هيشوفه من خلال كلب أسود ، كائن لما أنا بشوفه فى الشارع بغير طريقى و ممكن يخلينى اطلع بيتى تانى بدون تفكير او تردد 😂 لكن شخصية أدريان هتخليك تحب الكائن ده و تقدر وفاءه و اخلاصه.
أدريان رواية انصح الجميع بيها ، رواية كلها قيم و مبادئ نبيلة وأهم قيمة فيها هى ان الانسان لازم يبقى وفى لنفسه الاول عشان يقدر يبقى وفى لغيره.
رواية أدريان هى الرواية الاولى للشاعر محمود البنا ،
و اعتقد ان طالما الرواية الاولى اتكتبت بالجمال ده يبقى أستاذ محمود محتاج يضيف لنفسه لقب مبدع لأنه استغل موهبته فإنه يبدع و يبتكر رواية أدريان❤👏👏
شابوه للكاتب و أتمنى ليه التوفيق والنجاح المستمر 💐💙💛

[Zoomaya · Rating 5 out of 5]

آخر مرة قريت فيها رواية كنت ف تالتة إعدادي ، ومن بعدها الروايات معدتش بتشدني ابدا ،، بس فكرة الرواية دي شدتني جدا كمذكرات لكلب، بما اني دارسة علم حيوان ، وكل ما يخص الحيوان بيجذبني، وكمان مش طويلة اوي زي معظم الروايات ، فقررت اقراها ،، الاسلوب شيق جدا لدرجة اني خلصتها ف قاعدة متواصلة ساعتين او ساعتين إلا ،،
دايما وأبدا بفضل الفصحى ،، والعامية كانت واخدة حيزها المناسب ليها تماما لا اكتر ولا اقل، اضاف للرواية جمال فوق جمالها ، فضلت كذا يوم القصة معلقة معايا وعايزة احكيها لكل اللي بحبهم ،، ودة طبعا دليل على نجاحها،،
عايزة اضيف اهم نقطة واهم تغيير حصل لي بعد الرواية .
ان نظرتي للكلاب اختلفت تماما.
متوقعة مستقبل باهر للمؤلف إن شاء الله وف انتظار الجديد ..

[Mohammed · Rating 5 out of 5]

4

[Rokaya Abdullah · Rating 5 out of 5]

دايماً بقول إن ممكن تكون فكرة الرواية عبقرية بس تنفيذها هو إللي سئ لأن إللي كتبها معندوش الموهبة والأدوات الكافية إللي تخليه يوصلها بالشكل اللائق بالقارئ، والعكس صحيح إنها ممكن تكون فكرة عادية ومُكررة بس إسلوب الكاتب يشدك من أول كلمة لآخر كلمة يخليك تستمتع بيها وكأنك مقرأتش زيها..
في رواية أدريان بتتوفر كل حاجة سواء فكرة عبقرية على ما أعتقد لم يتطرق لها كاتب من قبل أو أنا إللي لسه مقرأتش زيها لأنها (مذكرات كلب)، وأسلوب جميل وسلس مع إنها سرد وحوار بالفصحى بس فصحى سهلة..
بتبدأ الرواية إللي بتدور على لسان الكلب الأسود أدريان إللي قرر إنه يحكي مذكراته ويعيشنا معاه في تفاصيل مغامراته من أول ما إتولد، إسلوب الكاتب بيعيشك وسط الأحداث حرفياً بتبقى شايف وحاسس كل حاجة من منظور أدريان بكل لحظات الوجع أو الفرحة وبخفة ظله بيشدك يخليك بتتفاعل مع كل حدث..
لأكثر من مرة عيوني دمعت وكنت على وشك البُكاء وكتير أوي فضلت أضحك زي الهبلة، أنا فعلاً حبيتها أوي ومكنتش عاوزاها تخلص..
في إنتظار روايتك القادمة بإذن الله.