خانة اليك: حكايات من العيادة النفسية

by مصطفى النحاس

في التواصل المباشر مع الناس من خلال ندوات عامة أو حتى لقاءات تليفزيونية، الجملة الأكثر شيوعًا لما حد يعرف إني طبيب نفسي: "ياه دا احنا كلنا محتاجين نيجي لك العيادة!".

ودا اللي خلاني أفكر آخدكوا معايا في رحلة جوه العيادة النفسية من خلال قصص مختلفة عن لسان أصحابها، كل واحد فيهم حاسس إنه واقف في خانة اليك مش لاقي مخرج، ومع كل قصة تحليل مبسط للمشكلة ونقاط مضيئة تنور سبيل للخروج.

لو ما لقيتش قصتك كاملة في الكتاب أوعدك هتلاقي جمل عن لسانك أو مشاعر حاسس بيها ومش عارف تعبر عنها، وهتلاقي كمان تفسير المشاعر دي وتتعامل معاها ازاي، هتلاقي أفكار تطمنك، وجايز تلاقي أفكار تصدمك، بس الأكيد إنك مش هتفضل في خانة اليك.

Genres: Psychology

133 pages, Paperback

First published January 21, 2020

About the author

د. مصطفى النحاس
استشاري الطب النفسي، مؤلف كتب "خانة اليك" و"أكواد السعادة"، مؤسس وصاحب مدرسة إعداد مُعالج نفسي لإعداد وتدريب المعالجين النفسيين، له وجود واسع على وسائل التواصل الاجتماعي ووسائل الإعلام، شارك في العديد من الفاعليات والندوات للجمهور.

Reviews

[Yasmin Sabry · Rating 4 out of 5]

فكرة الكتاب هايلة و طريقة العرض ممتازة... الدكتور بيعرض شكوى الشخص اللي عنده مشكلة و بيفصصها حتة حتة... بيعرض أسباب المشكلة و جذورها بدون ما يعين نفسه وصي على حد ولا يفرض عليه حلول محددة... ده طبعاً بيخلي القارئ يقدر ياخد اللي يناسبه من أسباب المشاكل و يفهم مشاعره بشكل أفضل
مشكلتي الوحيدة مع الكتاب إنه باللغة العامية، و ده شيء بالنسبة لي بيقلل من متعة القراءة، فبالتالي مش هاقدر أقيمه كعمل أدبي لكنه يظل بيقدم مادة علمية قيمة

[Nourane Khaled · Rating 4 out of 5]

كام مرة قابلت ناس اثروا في حياتك بالسلب ؟ طيب كام مرة شوفت ناس كل اللي كانوا محتاجينه هو الأمان عشان يحسوا أن في أمل يخرجوا من سجن نفسهم ؟ شفت كام مرة شوفت مراهقين محتاجين تفهم اكتر ؟ امهات وزوجات محتاجين دعم ؟ .... كل دي حكايات وفي غيرها اكتر واكتر، بنشوفها كل يوم في ناس حوالينا قريبين وبعاد، اصحاب واغراب وساعات بنشوفها في نفسنا

حكايات حقيقية جدا وحوالينا حكاها الكاتب من واقع تحربته كدكتور نفسي ومن قلب عيادته

هنشوف أثر واضح لكل كلمة، نظرة، رسالة وفعل في تكوين قناعات الناس وافعالها وازاي ممكن رسالة وصلتلك في وقت من حياتك تهد جبل او تبني قصر

اذا كنت من المهتمين بالطب النفسي الكتاب دة ليك، اذا كنت بتحب تبحث في اعماق النفس الانسانية الكتاب دة برضه ليك، اذا كنت بتتعافى من مشكال في حياتك الكتاب دة هيدلك واذا كنت بمنتهى البساطة انسان الكتاب دة هيفهمك حاجات كتير

[Wesam Karam · Rating 3 out of 5]

الكتاب عبارة عن رحلة بداخل العيادة النفسية من خلال قصص مختلفة لأشخاص الكاتب يؤكد إنهم حقيقيين
فإن كنت من محبى اللغة العامية سيترك الكتاب إبتسامة عريضة على وجهك لأنك ستنتهى من قرأته سريعاً
وإن كنت من محبى علم النفس والبحث فى الذات سيكون إضافة قيمة لك.

الغلاف بسيط ويعبر عن الصورة النمطية للدكتور النفسى والعنوان معبر عن فقدان الأمل للحالات.
الكاتب فى المقدمة قال إنه أستخدم اللغة العامية البسيطة ليصل لشريحة أكبر وأكد أن كل واحد من المرضى حاسس إنه واقف في خانة اليك مش لاقي مخرج، ومع كل قصة تحليل مبسط للمشكلة.

فى البداية ينبهك الكاتب
إحتمال تلاقى قصتك في الكتاب
إحتمال تلاقي جمل عن لسانك أو مشاعر حاسس بيها ومش عارف تعبر عنها
هتلاقي كمان تفسير المشاعر دي وتتعامل معاها إزاي، هتلاقي أفكار تطمنك، وجايز تلاقي أفكار تصدمك.

محتوى الكتاب وقصصه المتعددة إن كلنا بنعاني بدرجات مختلفة، كل واحد فينا عنده صراع يومي يعيش فيه وبيحاول يكمل، وكل مابنزيد وعي وخبرة مستوى الصراع بيختلف والبدائل بتزيد.

أوقات بنحتاج حد يساعدنا، ينور لنا الطريق، يطمنا إن الدنيا بخير وحتبقى أحسن، يعلمنا طرق جديدة للتفكير، يعرفنا عن نفسنا حاجات محتاجين نكتشفها.

هذا ما فعله الدكتور فى هذا الكتاب تسليط الضوء على أشكال مختلفة للصراعات والمعاناة للمرضى.

من الأجزاء الممتعة فى القصص :

" مشاعر الحقد والغل والحسد هي جزء من مشاعرنا الطبيعية ومنتهى القوة إنك تعترف لنفسك بيها، أنت مش بتحقد عشان أنت شخص سئ،
أنت بتحقد عشان بتقارن، مش عيب إنك تغير العيب الحقيقي إنك تتحرك ورا المشاعر دی وتتصرف بشكل مرضي أو تمنى السوء لغيرك.
حياتك حتكون أحلى وأريح كتير لما تتوقف من المقارنة وتعرف وتتأكد إن جميع المقارنات مرضية،
والمقارنة الصحية الوحيدة هي مقارنة نفسك بنفسك كنت فين وبقيت فين أو أنت فين وعايز تكون فين."

" قضم الأظافر أو مص الإبهام أو هز الرجل بشكل مستمر كلها خصال عصابيه، يعني حركات بنطلع فيها توترنا اللي مش واعين بيه ولا بنتعامل معاه وغالبا بتكون من بقايا الطفولة، وبتزيد كل ما التوتر بیزید."

" الخوف الطبيعي بيحمينا ويحركنا زي ما بيكون عندنا امتحان، خوفك بيخليك تسهر تذاكر، تراجع أسرع تبقى يقظ ، بس الخوف المرضى بيعطلنا وبيمنعنا من الوصول خوف بيخليك ترفض تدخل الامتحان. "

[Nada Noureldin · Rating 5 out of 5]

كتاب سلس جدا و مشوق في أسلوبه عن تجارب ناس شبهنا و مواقف كتير ممكن نكون بتعرض لها. احلي حاجه في الكتاب هو تعليق الكاتب اللي تناول المواضيع من جانب نفسي بحت و حلل شخصية كل راوي و كتب له نصيحه او توجيه مفيد جدا و مشوق لاي حد أنه يقراه و يستفيد منه. حقيقي كتاب جميل و ان شاء الله يكون في كتب تانيه مشابهه للكاتب

[Basma Omar · Rating 4 out of 5]

كتاب خفيف ومهم بيتضمن جلسات محورها مختلف. وتعقيب الدكتور على كل حالة منهم. كان فيه حجات عايزة اعرف ليها حل مش كلام انشاء ! يعني هااا تعمل ايه؟؟؟ 🤔. تحليل الدكتور جميل جدا ومنطقي لكن بيعيد ويزيد ف نفس النقطة.
اكتر حاجة كان نفسي الاقيها فالكتاب حالة شبهي كنت عايزة اعرف تحليل الدكتور ☹️

[Ramy · Rating 3 out of 5]

كانت تجربة ظريفة الاستماع لهذا الكتاب ....

الكتاب على لسان طبيب نفسي ..لماذا اختار تلك المهنة .... و الكتاب هو مجموعة من الحالات اللى مرت عليه طبعا بعد تغيير اسم الحالة ل اسم وهمي للخصوصية ... بيشرح كل حالة على لسان و بكلمات صاحبها / صاحبتها
ثم تعقيب من الطبيب و تفسيره للحالة من كلمات و مفردات صاحبها ....
الكتاب انا مشوفتش فيه ايوتها امراض نفسية "عصابية" - على راى و بكلمات ومصطلحات د عادل صادق -
انما الكتاب و الحالات اللى فيه فى الاغلب بتتكلم عن سمات شخصية و انواع شخصيات ( الهيسترية - السيكوباتية - ....الخ)

اغلب حالات الكتاب ل انسات و سيدات ما بين ال 18 و ال 48
غلابة و ضحايا
و 3 حالات بس ل رجال
و ال 3 كانو مفتريين ...اللى مدمن ... و اللى بيلعب دور الضحية على كل اللى حواليه ... و اللى واقع فى حيرة الاختيار ما بين واحدة بيحبها

اخر حالة فى الكتاب ...عن حالة وثقت فى كلام شخص على النت انه معالج نفسي ... و حكت له اسرارها و اعطته صور و فيديوهات لها ....
و هنا الطبيب مؤلف الكتاب بيشرح الفرق ما بين

الطبيب النفسي
..دا خريج طب ....و دا يقدر يكتب وصفات علاجية "ادوية - كيمياء "و خطة علاج نفسي " جلسات العلاج النفسي ب المكاشفة و الفضفضة و تبصير المريض بمشكلته "
و هناك
المعالج النفسي
- و دا خريج اداب علم نفس ....ميقدرش يكتب وصفات علاجية " لانه مش طبيب بشري" بس بيكون مجاز ب عمل الجلسات النفسية..و بيمشي فيها على الخطة العلاجية
و اللى كتبها الطبيب النفسي اللى فوق
و تالت واحد و دا المنتشر للاسف حاليا .... ال


life coach
و دا واحد بتاع تنمية بشرية حضر كورس و لا حاجة و تجرأ على العلاج النفسي .... الفردي او الجماعي ....
و هنا الطبيب المؤلف بيقول انه للاسف مبيكونش واعي بقدرات مريضه ...و فاكر ان العلاج اللى نفع مع واحد ممكن ينفع هو هو مع التاني
و دا للاسف مش صح ....ف مثلا عالج واحد من الخوف من الاماكن العالية ...بيحاول يستخدم نفس الخطةا لعلاجية مع واحد تاني ممكن قلبه بتوقف لو استعملت معاه نفس الطريقة .....و هنا يجب الحذر ....

الكتاب القادم : الطب النفسي - د عادل صادق

[ولاء شكري · Rating 4 out of 5]

"التعاطف مشاعر إنسانية راقية ونبيلة لكنها سلاح ذو حدين، لما ببالغ في التعاطف غصب عني بعيش بمشاعر المصاب وأدخل تجربته على إنها تجربتي واتوجع على رؤيتي وأفضل مكتوف الأيدي مش قادر حتى أساعده أو أقدم له طوق نجاة ..
عشان كده محتاج دايماً أحافظ على مشاعري من الإرهاق والتعب واعتني بيها .. منتهى النُبل إني اتواجد بمشاعري مع الشخص الموجوع من غير ما اتوجع معاه، اسمع بعقل، واستوعب وأحس بيه وأفكر معاه بس وأنا فاكر حدودي ومحافظ عليها"

》حكايات من العيادة النفسية تُعبر عن معاناة أصحابها، ومع كل قصة تحليل نفسي مبسط يوضح مفاهيم قد تغيب عنا.

[Dee · Rating 2 out of 5]

كتاب عباره عن مشكلات بتتعرض بلغة بسيطه جدا وعاميه مافيهاش اي تعقيد
مشكلات كتير منا شافها حواليه او حتي مر بيها
والإجابات مختصره جدا وفي معظم الحالات محستش إنها عملت فرق بل هي كلام مرسل غير مرتب
وفي بعض الحلول مؤثره وفعاله
المجمل أنا شوفت كذا فيديو للكاتب وعجبتني طريقة تحليله للمشكلات الي كانت بتتعرض عليه في الفيديوهات
وقولت ولم لا أقراله كتاب
ومكنتش موفقه في إختيار الكتاب ده تحديدا لربما الكتاب الثاني يكون اقوي واعم شويه واشمل
نجمتين فقط لبعض الحلول الي قدمها الكاتب

[ياسمين وليد · Rating 4 out of 5]

أحببته 💞

[Hagar Ashraf · Rating 5 out of 5]

أول ما تمسك الكتاب تقلب فيه تحس إنه كتاب عادى بس هى دى الخدعة أول ما تبدأ تقرأ فيه ما بتسيبهوش غير وأنت مخلصه
الواحد طول عمره بيسمع عن السهل الممتنع بس أول مرة يشوفه
حقيقى الكتاب بيوصف مشاعر كتير فى حياة الإنسان والقصص فيها تنوع وتعليق الدكتور عن كل حكاية أكتر من رائع
تقريبا كل القصص لمست جزء فيا وأعتقد حتى لو ماحدش مر بحاجة من اللى موجودة فى الكتاب هتنور بصيرته عن حاجات كتير فى الحياة وهيفهم ردود أفعال الاخرين فى المواقف
شايفة إنه كتاب مهم واستفدت جدا لما قريته
براڤو بجد👏👏👏👏👏

[Nouru-éddine · Rating 2 out of 5]

::انطباع عام وكفى::
===========
صراحة الكتاب فاجئني، إنه ع الرغم من أسلوبه البسيط جدًا وقصصه اللي ممكن تكون شبه قصص كتيرة أوي ف مجتمعنا، إلا أن تحليل الدكتور كان أكتر من رائع ورزين وعلمي جدًا. الكتاب فعلاً فيه مجهود رغم بساطة عرضه ولغته. وأكتر حاجة بتميز الدكتور مصطفى النحاس هو إخلاصه لمهنته وتفانيه في أداء رسالته.
بقى عندي رغبة أخلص كل كتبه إن شاء الله!
*.*.*.*.*

[Fatma Mansour · Rating 4 out of 5]

سلس لطيف غير تقليدي

[Samar القلب · Rating 5 out of 5]

قصص جميلة تلفت الانتباه لبعض المشاكل وتسلط الضوء علي بعض الاضطرابات

[شيماء محمد مصطفي · Rating 3 out of 5]

تجربة لقلم جديد استمتعت بها، أسلوب السرد جميل ومبسط ويتناول قضايا نفسية مهمة، لكن ينقصها بعض أو مزيد من التفاصيل لحل هذه المشاكل التي تقبع في كل مكان، والجميل بالذكر والذي يجعل الكتاب مميزا هو الواقعية وأن جميعنا يمر بهذه الاشياء، الخوف، القلق المستمر، الهروب من أية مسؤوليات.
فلكل منا قصة تمثله في هذا الكتاب، وحينما تجد مشكلتك يأتي دورك بالبحث أملًا في حلها.
• أعجبتني قصة شريف ومها ونادين.

أعتقد أني سأقرأه مرة أخرى لأهميته بالنسبة لي.

[Omar Al-Mukhtar · Rating 4 out of 5]

بكلمات بسيطة يفصل لك العقد التي يعيشها الكثير من أفراد المجتمعات الشرقية.

[Rania Zeithar · Rating 5 out of 5]

النوع: نفسي
الصفحات:١٣٧
رأيي: كتاب أكثر من رائع.. اسلوب الكاتب بسيط جدا.. الكتاب كله بالعامية.. فكرني شوية بأسلوب محمد طه.. فكرة الكتاب انه جمع قصص من العيادة النفسية وسمى كل قصة بإسم شخصية وهمية وبعد عرض القصة بيكتب تعليقه عليها كطبيب نفسي.. آراء الكاتب فكرتني جدا بعبد الوهاب مطاوع الله يرحمه وانا من محبيه.. عجبني جدا تشكيلة المشاكل اللي عرضها الكاتب في الكتاب.. وانا بقرأ حسيت انه جمع اغلب المشاكل النفسية او الأعراض اللى ممكن جدا تكون مريت بيها أو في حد تعرفه أو قريب منك مر بيها.. آراءه كلها موزونة ومهمة جدا لنا ولاولادنا.. استمتعت واستفدت من الكتاب جدا...

[Heba · Rating 3 out of 5]

كتاب جيد

[Basmalah Hani · Rating 5 out of 5]

خانة اليك
-كتاب خانة اليك للكاتب "مصطفى النحاس"
——————————————————
•ساعات المواقف المؤلمة بتورينا الثقوب والشروخ في علاقتنا اللي بنفضل سنين نداري فيها ونفضل نعافر عشان تمشي.
كل واحد فينا عنده قدرة على التحمل، القدرة دي بتزيد ومساحتها بتكبر حسب رغبتنا، يعني لما بنقرر نتحمل حاجه بندي لنفسنا مبررات وأعذار لا تنتهي عشان نتحمل أكتر، بس التحمل ده بياخد من طاقتنا وبيستهلك حتى صحتنا الجسدية اللي بتتأثر بالكبت وده اللي بيتطور وبيوصلني للأعراض النفسجسمانية وبيوصلنا للاكتئاب.
•رغم بشاعة الجاني إلا إن المسئولية الكبرى تقع على الضحية، محدش ممكن يركب على ضهرك غير لو انحنيت وسمحت له بده.
•مفيش ضحية مغيبه بس في ضحية بتختار تغمي عينيها وتتغافل عن الأذى، وفي ضحية بتتعلق بالأذى وبتستعذب دور الضحية وتستمر فيه لسنوات.
•محدش السبب في تدمير حياة حد، كل واحد فينا بيختار، وعندنا حرية الإختيار مع كل يوم جديد، وينفع نختفي وننسحب في أي وقت لو حسينا اننا موجوعين أو متضررين.
•أنا مش مضطر أدي كل شخص بقابله عشان يقبلني ويحبني، مش مضطر اجي على نفسي عشان حد يحبني، مش مضطر أتسول المشاعر وأعيش في حاله من الانتظار والتوسل والترجي.
——————————————————
-النوع: كتاب
-المحتوى: علم نفس
-التقييم: ٥/٥ كتاب خانة اليك قيم جدًا و في معلومات عن الطب النفسي أو علم النفس بشكل عام مبسطة جدًا و مشروحه بشكل بسيط عشان تكون واضحة و ده جدير بالذكر، و الفايدة من الكتاب كبيرة خصوصًا لو بتقرأ الكتاب بتركيز للوصول إلى المغزى.📍
-دار النشر: دار تشكيل للنشر والتوزيع
-عدد الصفحات: ١٣٣ صفحة
-قراءة ممتعه أصدقائي القراء 📚

[Renad Sherif · Rating 3 out of 5]

كتاب بيحكي نماذج لمعاناة بعض الأشخاص في العيادة النفسية ومن بعدها بيبدأ الكاتب -وهو دكتور نفسي بالفعل- يوضّح المشكلة ويناقشها بأسلوب سلس وبسيط.

بالنسبة للغة: فهي عامية مصرية بسيطة جدًا ولكنها مش مُزعجة.

المحتوى نفسه -من وجهة نظري- بسيط أوي، مش بسيط كـ سهولة إيصال المعلومة، لأ.. بسيط من ناحية جودة الأفكار وتعمّقها، الحقيقة إني توقعت أقرأ حاجة أقوى من كده بكتير خصوصًا إن محتوى الكتاب من أوله لآخره في مجال عمل الكاتب؛ فمن المفترض تكون دي نقطة تُتيح للكاتب أنه يتكلم ويتعمق في المشاكل أكتر! أو على الأقل يذكر مشاكل متنوعة..

للأسف أغلب المشاكل -تجارب المرضى- اللي قرأتها كانت متقاربة لدرجةٍ كبيرة باختلاف تفاصيل بسيطة ودي حاجة قللّت جدًا من عنصر التنوع وبالتالي قللّت من الإفادة، ده غير تعليقات الكاتب واللي كانت سطحية إلى حدٍ ما وتُعتبر ردود أو تعليقات متداولة بين أغلب الناس مش محتاجة دكتور/ أخصائي نفسي!


بعض المواضيع اللي تم مناقشتها كانت مختلفة ومهمة فعلاً وقرأت فيها معلومات جديدة حقيقي وأثرت فيّا جدًا، والكاتب تعمّق فيها لدرجة مناسبة من غير كروتة ولا تطويل ممل، وحقيقي استمتعت بقرائتها.

في النهاية الكتاب لطيف لشخص في بداية انضمامه لمجال علم النفس، أو شخص بيمُر بمشاكل حياتية مُنتشرة عايز حد يواسيه أو يتكلم معاه بشكل غير مباشر، أو شخص حابب يفصل من الكُتب الدسمة بكتاب بسيط ومفيد في نفس الوقت..

بالنسبة لي الكتاب حلو ولكني توقعت يكون أفضل من كده.

[Waad Elbakry · Rating 1 out of 5]

متوقعتش كم الناس ال عجبها الكتاب ، فيمكن انا مفهمتش فكرته كويس؟ أو حتي غرضه ؟ بس ال انا متاكده منه اني مستفدتش حرف حقيقي وكان الكلام والحلول بالنسبالي مجرد رغي ، المشكله حاجه انا بقرأها وحتي مش شيقه يعني لأنها مشاكل عاديه محيطه والخل كلام بيريح وخلاص زي بتاع التنميه البشريه شويه والكلام العميق أو الي المفروض انو عميق في كل بوستس الفيس بوك ، بصراحه ضيعلي وقت كبير ومعجبنيش خالص

[Mennah Sherif · Rating 4 out of 5]

I think about this book a lot
( I bought me a copy today can’t wait to reread)

[Aya Elkhawaga (Uka) · Rating 3 out of 5]

كتاب رقم ١

[Raneem Alaa ddin · Rating 4 out of 5]

انا من زمان اوي شغوفه جدا بمجال علم النفس و بحب اقرأ الكتب النفسية حتى في ثانوية عامة كنت بعشق حاجة اسمها علم نفس ، احلى حاجة في الكتاب ده انه حسسني بجد اني قاعدة في العيادة مكان الدكتور و عمالة اسمع مشاكل الناس و احللها بنفسي و بعدين بتحول لمنصته لما دكتور مصطفى يبدأ يتكلم و يرد على الحالة بكلام علمي موزون ، هما ١٧ حالة كل حالة بتحكي مشكلتها بعدين الدكتور بيحللها و بيشرحها و يرد عليها بطريقة حلوة يحاول يقدم حل و لو مبدئي ..
اي حد هيقرأ الكتاب و يشوف ال١٧ مشكلة دول لازم هيحمد ربنا اوي لو مالقاش نفسه واحد فيهم ،،، و الحمد لله و الله بجد اللي يشوف مشاكل الناس تهون عليه مشاكله ، انا بس تحفظي الوحيد على الكتاب هو ان اغلب المشاكل فيه حستها اكبر من سني شوية😂😂 يعني لو هدي تصنيف للكتاب ممكن اديله ( +٢٥) مش عارفة ليه الكتاب مش متصنف . بس بعض المشاكل حستها اكبر من سني انا ٢١ و لسة باديه ال٢٢ .
اغلب مشاكله و معظمها بيعاني منها المتزوجين او المخطوبين (المرتبطين يعني ) ، فشعرت انه نوعا ما اهمل مشاكل الشباب غير المتزوجين ..
التصنيف ده رأيي الشخصي لكن الكتاب مش متصنف طبعا، لكن كل ده مايمنعش ان كلام كتير فيه كان مفيد و يصلح للاقتباسات ، يمكن لقيت ناس اعرفهم جوا الكتاب ده او شوفت فيهم شخصيات في حياتي ..
اجمالا كان مفيد و بيوصل علم و تحليل نفسي دقيق لبعض المشاكل النفسية ، شكرا دكتور مصطفى النحاس ، و اسفة للإطالة ✨✨

[Hany Elhamedy · Rating 4 out of 5]

كتاب جيد ومختلف عبارة عن قصص لصعوبات بيواجها أشخاص في حياتهم ( مرضي نفسيين) وبيتم التعليق من الكاتب(الكاتب طبيب نفسب د. مصطفي النحاس اكبد مش شخص بيقول اي كلام والمميز كمان إنه مش بيقول ألفاظ معقدة) .

نرجع للتعليق بيكون نقلة من حكاية الشخص لتلخيص للمشكلة وتوسيعها بحيث إنك تقدر تخرج من التفاصيل اللي بيحكيها صاحب المشكلة لإنه يكون عندك توصيف واضح للمشكلة وبيكون في حل او حلول بين سطور التعليق.

اعتقد الهدف من الكتاب وتعليقات الكاتب ع كل مشكلة مش إنك تبقي طبيب نفسك وتحل مشاكلك وإلا مكنش حد غلب ولكن إنك يبقي عندك توصيف واضح لمشكلتك و كمان تشوف نماذج لناس حولك عندهم نفس المشاكل وبيحكوها فده يساعدك تعرف مشاكل وتعرف إنها قابلة للحل وكمان إنك مش نموذج منفرد والوحيد اااي عنده المشكلة دي.

لوفي شىء سلبي ممكن يكون ان التعليق اوقات بيكون فتح أسئلة اكتر من إنه اعطي إجابات واوقات بحس إن كان غي كلام ناقص المفروض يكمل.

[Hessah · Rating 2 out of 5]

‎في كتابه *خانة اليك*، يستعرض الدكتور مصطفى النحاس مجموعة من الحالات الواقعية لمراجعين توافدوا إلى عيادته النفسية. على الرغم من اختلاف تفاصيل هذه الحالات وتشعب خلفياتها، إلا أنّ القاسم المشترك بينها هو غياب لغة الحوار داخل الأسرة المصرية.

‎بيّن المؤلف من خلال جلساته أنّ مجموعة لا يُستهان بها من الأزمات ما هي إلا تراكمات التجاهل ، حيث يفضل أفراد العائلة الهروب من المواجهة، أو إنكار وجود المشكلة، بدلًا من التعامل معها بصدق وشفافية. ومع مرور الوقت، تتحول هذه الخلافات الصغيرة المهملة إلى أزمات يصعب إصلاحها.

‎الكتاب يتميز بلغته البسيطة وأسلوبه السلس، ما يجعله قريبًا من القارئ العادي، لكنه لا يقدم بالضرورة معارف جديدة أو تحليلات عميقة في مجال العلاج النفسي. تكمن أهمية هذا النوع من الكُتب على تذكير القارئ بقيمة أساسية غالبًا ما نتجاهلها: الحوار الصريح والهادئ المبني على الاحترام المتبادل هو حجر الأساس في بناء علاقات أسرية متوازنة وصحية.

[TASNIEM SABER · Rating 4 out of 5]

كتاب لطيف بيخلص في قاعدة واحدة لكن في نفس الوقت عميق و محتاج وقفه مع كل صفحة
كوني في المجال خلاني مبسوطه جدا بكل كلمه في الكتاب و ممتنة بالبساطه بتاعته وبعمق مغزاه ، الدكتور وهو بيوصف بعض المشاكل والاضطرابات كان بيضرب امثله في منتهى الروعه لدرجة استوقفتني و افادتني جدا،
بالنسبه للقصص كانت حلوه جدا و موجوده فعلا و بنلاقيها في حياتنا بس اغرب قصه كانت قصه مايسه و قد ايه اكدت انك لست في الدنيا جواها طفله ومراهقه قبل ما تكون امرأة ناضجة
و اكتر قصة صدمتني و استفزتني القصة الاخيرة و بجد لازم كل الناسدي تبلغ عن الشخص ده ايا كان و القانون ياخد مجراه مادام مفيش عنده ميثاق اخلاقي يبقي حد لازم يفوقه و يوقفه عند حده
شكراً يا دكتور جزيلاً علي كل كلمة و اتمني اتشرف بلقاء حضرتكم في ايمنصة علمية او لقاء صحفي و استفاد اكتر من علمكم و خبرتكم و احظي بشرف الامضاء علي نسختي من الكتاب وشكراً

[Omar AbdulRahman · Rating 2 out of 5]

كتاب خفيف، أنهيته في جلسة واحدة (حوالي ساعتين أو أقل)
يعيبه إنه مكتوب بالعامية المصرية، وأنا لا أفضّل قراءة أي كتاب مكتوب بالعامية ولكني اتفاجئت بده بعد ماشتريته فاقولت أديله فرصة
.
الكتاب سطحي بعض الشيء، فيه كلام كتير مكرر ومستهلك، ولكن ده لا ينفي إنه فيه قيمة وكلام مهم.
أعتقد الفئة الموجه ليها الكتاب ده مش الناس المهتمة بعلم النفس والتعمق فيه، على قد ماهي موجهة للشخص اللي حاسس إن عنده مشاكل وتعبان وعايز حاجة تشجعه يطلب المساعدة أو يعرف إن في ناس غيره بتحس باللي هو بيحس بيه، أو يلاقي حد بيحكي تجربته أو بيقول كلام شبه اللي هو حاسس بيه. وغالبا لو حد من الفئة دي قرأ الكتاب هيعجب بيه جدا.
.
العنوان: خانة اليك، حكايات من العايدة النفسية
الكاتب: د. مصطفى النحاس
دار النشر: تشكيل للنشر والتوزيع
عدد الصفحات: 137 صفحة

[Hager Hamdy · Rating 5 out of 5]

دايما اما بلاقي مكتوب ع كتاب "هتلاقي مشكلتك ف الكتاب ده ولو مش لاقيتها يبقا هتلاقي جمل ع لسانك" بقول يبقا كتاب عادي او اقل من العادي ومش بيكون فيه حاجة اصلا لغاية ما قرأت الكتاب ده وحقيقي انا اول مرة اعيط وانا بقرا كتاب بسبب اني فعلا لقيت مشاكل شبه مشاكلي وجمل ع لساني وشرح لشخصيات مرت عليا وف حياتي كتاب جامد وكويس جدا بكل ما تحمله الكلمة ومكنتش عاوزاه يخلص بالعكس انا زعلت اني خلصته وخصوصا ان من جماله انا خلصته ف وقت قليل اوي يمكن ساعات بس.
انا مش من محبي الكتب والروايات اللي باللغة العامية بس ده غيرهم كلهم حقيقي اللغة العامية اللي فيه كويسة مش سطحية او أي كلام وخلاص ومضمون الكتاب نفسه كويس جدا.
حقيقي الكتاب ياخد 5/5 ونجمة وبوسه حقيقي 😂♥️

[Esraa L deeb · Rating 3 out of 5]

الكتاب فعلاً سلس وزى ما كتب المؤلف إنها حكايات لمرضى وبعد كده بيحللها ..
بالنسبة لى كان خفيف زيادة شوية عشان قريت من قبله كانت أعمق من كده بس هو بداية كويسة لو حد مهتم يقرأ عن علم النفس و الطب النفسى ..
اعيب عليه بس عدم وجود فهرس لانه كان مسمى الحكايات باسامى اشخاص كان ممكن فى نفس الوقت يسمى الفصل مثلاً ..الفقد ، القلق ، .. وهكذا وإنه كان فى الحكاية الواحدة مبيركزش على موضوع واحد أو مشكلة واحدة ..
بس فى النهاية نوعاً ما كتاب جيد .

[Gihan Sabry · Rating 5 out of 5]

كتاب رائع من أول اختيار شكل الغلاف إلي عبر بشكل كبير عن محتوى الكتاب للأسلوب السلس الي بسهولة يوصل لكل الناس . وزي ما الكاتب ذكر في مقدمة الكتاب كل قصة حتلاقيها بتلمس حاجة جواك أو بتعبر عنك بشكل ما و الأجمل تعليق الكاتب على كل قصة إلي بينورلك حاجة انت ممكن تكون مش شايفها...حقيقي كتاب هايل و يستحق القراءة.