راجعين يا هوى

by تامر عبده أمين

"فيروز" لما غنت "راجعين يا هوى" قدمت خدمة عظيمة للناس اللي وصفت حالهم بأقل عدد من الكلمات، وأصدقها.. كلنا بتشغلنا فكرة "الرجوع".. رجوع لـ ذكرى، شخص، مكان، حب، أو حالة.. رجوع لحاجات غابت معظمها خارج عن الإرادة، وغاب معاها الأمان.. رغم ضبابية بكره، ولا منطقية الأمل بيفضل عندنا ثقة إننا "راجعين يا هوى".

Genres: Romance, Novels

294 pages, Paperback

First published February 1, 2020

Reviews

[Nahla Elhawashi · Rating 3 out of 5]

٣ نجوم لكونها مسلية وبتخلص في قعده
بس مش قادرة أقتنع انها عن قصة حقيقية ✋️

[Hebatullah Mahmoud · Rating 5 out of 5]

الحقيقه اني مش بقرا روايات كتير بس اسم الرواية وصورة الغلاف وجملة قصة حقيقه شدوني ولما جبت الروايه وبدات أقرأ اول صفحة وتيجي إلي بعدها لقتني لا عارفه اشتغل ولا اعمل اي حاجه غير اني اقرا وعاوزه اخلص الروايه حبيت شخصية هوسة جدا جدا ياريت تعمل منها جزء تاني وبالمناسبة انا استكفيت بالرواية بتاعتك بكتب المعرض
كله انا مكنتش متبعاك اوي بس خلاص كتباتك دخلت قلبي ❤❤

[Sherehan Mohmed · Rating 5 out of 5]

#راجعين_ياهوى
الكاتب : Tamer Abdo Amin

"أنا مقتنعه باللي عملته وماعنديش ذرة تأنيب ضمير دوري في الحياة خلص وراضيه عن كل حاجه وقابله ادفع التمن حتي لو إعدام"

- انا مش قادرة مبدئيا اصدق انها قصه حقيقه .. كمية قهرة وظلم ووجع قلب مش محتملين انا خلصتها وقلبي واجعني ومش قادره اخد نفسي من الغضب !
مبدئيا انا كنت متخيله بنسبه كبيرة مشهد النهاية وان لؤي ليه لقطه تانيه وان نهايته مش هتخلص بالرساله الي بعتها علي "موبيل دينا" كنت متأكدة من ده .. بس طول الأحداث وانا بفر الورق مستنيه ظهور تاني لهشام ومتاكده أنه راجع .. ازاي مرجعتوش تاني ؟؟ ازاي طلع بالحقاره دي
ده حتي لما دينا كانت بتدفع فلوس موبيلها فالمستشفي توقعت أن هشام مش هوسه الي دفع ! مافيش اب بالوساخه دي مش هقول زوج أو حبيب اب يا جدعان اب !! ريم مكنتش تستاهل كل الوجع ده حلمها اتسرق وبنتها مريضه وجوزها خاين واختها خذلتها .. بس الأحداث كانت مترتبه بالمليء مع كل خذلان بيجي عوض من ربنا مع كل وجع طبطبه بتجي مع حزن في فرحه غريبه جايه بدون توقع .. توقعت أن راجعين ياهوي هتجي برجوع الفرحه لريم .. كلهم متهنين وفرحنين ومتعوضين الا ريم .. حتي النهايه جت قضت علي مستقبلها .. غالبا انا هستني جزء تاني تفرح فيه ريم ع الأقل تديها شويه فرحه قاصد تضحياتها واستهلاك قلبها ومشاعرها ويتيم قلبها :(
(( راجعين يا هوى راجعين .. يا زهرة المساكين .. راجعين يا هوى علي نار الهوى علي نار الهوى .. راجعين ))

[Amany Elsherbiny · Rating 1 out of 5]

مبدئيا الروايه فيها مشكلتين طريقه السرد الغريبه ولا تصدر من كاتب كبير علي الاطلاق والاحداث غير المنطقيه من المفترض انها قصه حقيقه زي ما هو مكتوب علي الغلاف بدايه من شخصيه البطله الي من الاخر مش راكبه علي بعضها لاهمالها لامها عشان مش فاضيه ترد على التليفون لطلاقها ومن غير اي حقوق وهي عارفه ان بنتها مريضه مرورا بالست الي راحت تسرقها في مشهد عبثي راحت عازامها علي ورق عنب والاخ الي راجع يفضح اختها بعد ما رفضها وجوز اختها الي عارف انه اتضخك عليه عادي لوكيل النيابه الي بيلفق لواحده دليل براءة مع ان القتيل كان متجوز اختها عرفي وفي محامي وشهود وليله طويله واضح ان دار النشر اعتمدت علي شهرة الكاتب ونشرت وهي ضامنه المبيعات الحسنه الوحيده في العمل ده انه مؤثر ممكن تعيطوا فيه جامد

[نشوى · Rating 3 out of 5]

لو أن ماهو مكتوب علي الغلاف صحيح وهو أنها قصة حقيقية فأنا مندهشة كنت أظن أن الحياة كفت منذ وقت طويل عن ابهارى وإثارة تعجبى وأندهاشى ولكن يبدو أنه لا...مازالت الحياة تحوى فى جعبتها الكثير
تدهشك الشخصيات المتناقضة مابين قمة الندالة والخسة واستغلال احتياج الآخرين والكذب والإحتيال ومابين الطيبة والشهامة وحب الخير ومساعدة الناس
لو أنها رواية فهي جيدة بأحداثها وثراء وتنوع شخصياتها وقدرة الكاتب علي ادهاشك ولو انها قصة واقعية فهى مدهشة أكثر
لغتها عامية دون ابتذال انهيتها في جلسة واحدة
الغلاف رائع
مازال يتردد فى أذنى صوت فيروز وهى تغنى بصوتها الشجى" راجعين ياهوى راجعين"

[Donia Darwish · Rating 2 out of 5]

ما لفت نظرى لقراءة الرواية ما ذكر على غلافها من أنها ( قصة حقيقية ) مع شكِ فى حقيقة وواقعية بعض الأحداث التى ذكرت...

هتضطر أحرق بعض الأحداث فى الريڤيو للاسف لأنى هتكلم عن الحاجات اللى مقتنعتش بها فى الرواية...

القصة ببساطة لفتاة تدعى ريم بتبدأ الرواية بالتحقيق مع ريم فى النيابة حول قضية ما ( مش هنعرفها غير اخر ٥ صفحات فى الرواية ) وبتبدأ ريم تحكى لوكيل النيابة قصة حياتها على اعتبار أنه صديق زى ما هو طلب منها مش أنه وكيل نيابة وبيحقق معاها ...
وديه أول نقطة غير منطقية (١)
.
.
.
.
.

هتسرد ريم لوكيل النيابة من أول قصة حبها لهشام وازاى اتعرفوا على بعض وزواجهم اللى تم بعدم رضا أمها ووقوفها جنب حبيبها وزوجها وأمه و.........لحد ما اخدت نصيبها من القهر والظلم فى سبيل كسب رضاهم وكان سبب فى بعدها عن أمها وإهمالها غصب عنها فى أشد أوقات احتياجها لها...

طبعا كالعادة البطلة هتفوق متأخر بعد فوات الآوان ...

ندالة الزوج هتظهر وقسوة الحماة هتبان وفى الآخر البطلة هتخرج من بيت الزوجية ايد ورا وايد قدام وهى على وشك الولادة ... وراح الحب يا ولدى .....😏

سلسلة من سرد مراحل تعرضها للظلم من ( الزوج / أم زوجها / شغلها وطموحها وطبعا ضيق الحال ومفيش ماديات ولقيت ريم نفسها مسؤلة عن أختها الصغيرة بعد وفاة أمها ونفسها وبنتها ...
.
.
.
هننتقل لمشاكل من نوع تانى ( مشكلة مرض بنتها ومشكلة زواج أختها العرفى ) وهتواجهم ازاى ..

مش هحكى عن ازاى هتحاول تجيب فلوس علشان تعالج بنتها وكانت سبب فى أنها تقابل ماما ثريا ( وديه النقطة الثانية اللامنطقية ) ٢ أصل مش معقول الأستاذة اللى المفروض بتحضر للدكتوراه تقرر تسرق علشان تعالج بنتها وحتة كده غير واقعية تنط من بلكونة وتلبس شراب على وشها (مش مقنعة تماما ) واللى تحاول تسرقها كمان تتعاطف معاها وتعزمها على محشى وتحبها وتقرر تعاملها على أنها بنتها 🤔

جواز اختها العرفى وتم ازاى وليه وانتهى على ايه وزواجها للمرة الثانية ( ديه النقطة الثالثة اللامنطقية ) ٣

كل الأحداث ديه ☝🏼 ذكرت باستفاضة ومفيش مشاكل فى طريقة السرد وكانت طريقة الحكى توحى أنك بتتفرج على فيلم عربى ... ممكن تتأثر فى بعض الأحداث لأن هيجى كل شوية فى بالك جملة ( قصة حقيقية) ...
.
.
.
فى آخر ١٠ صفحات هنرجع للقضية اللى كانت سبب فى التحقيق مع ريم واللى هتلاقيها برضه ( النقطة الرابعة اللامنطقية ) ما هو مش بعد ده كله يظهر جوز اختها اللى اتجوزها عرفى وتقررى تطلعى فيه كل الظلم اللى اتعرضتى له.... ظهوره ومطالبته بمراته بعد ده كله غير منطقية بالمرة ...

أما بقى تعاطف وكيل النيابة مع البطلة ومحاولة أنه يغششها ازاى تطلع من القضية فده شىء غريب ومريب حلو التعاطف مفيش مشكلة بس (مش واقعى ولا بيحصل ) ...

الرواية بالنسبة ليا كان ممكن نستسيغها و تعجبنى لو كانت مجرد رواية فقط وليست قصة حقيقية ...

[Ahmed Adel · Rating 5 out of 5]

أولا عايز اقول إن الغلاف ده وهمي ويمكن سبب رئيسي ليا ولناس كتير تقرا الرواية... مش عارف مين اللي في الصورة بس كريم آدم العبقري عامل غلاف ما حصلش فعلا وبيخلي الواحد عايز يشتري الرواية بأي شكل!
ثاني حاجة شدتني هي "قصة حقيقية" اللي مكتوبة مكان "رواية"... مش عارف ليه أستاذ تامر اختار يكتب إنها قصة حقيقية مش رواية.. بس لو دي حقيقية يبقى يا ريت يكون فيه ناس كده في الدنيا!
أنا أصلا جبت الرواية عشان تلات أسباب: الأول إن احمد مدحت رشحها عنده على بروفايله، والتاني طبعا الغلاف الوهمي ده، والتالت اني باحب كتابات أستاذ تامر عبده أمين ع الفيسبوك فتوقعت حاجة حلوة منه..
أول ما مسكت الرواية اقرا فيها استغربت إنها مكتوبة من أولها لآخرها بالعامية! في البداية ما كنتش مستسيغ الطريقة دي خالص الصراحة خصوصا وصف الأحداث بالمضارع كأنه كاميرا "بيبص لها ويقول... بتمسك إيديها وتقول..." بس مع الوقت لقيتها مش حاجة وحشة قوي الصراحة..
الرواية وأحداثها شدوني وما قدرتش اسيبها وأثرت على شغلي 🤣 بس مبسوط... وحرفيا ما كنتش عايزها تخلص..
الأحداث والحبكة والمفاجآت روعة بجد.. تستاهل فوق الخمس نجوم أكيد.. ♥️

[تَـسْـنِـيم · Rating 5 out of 5]

رواية راجعين يا هوى من الروايات البسيطة جدًا بس على قدر بساطتها تتحب، وتتحب جدًا كمان"

اشتريت الرواية بسبب الغلاف الجذاب جدًا وبسبب إسمها خصوصًا إني من مُحبين فيروز بالذات أغنية "راجعين يا هوى" D:

الرواية عامية، وده الشيء اللي مكنتش أعرفه قبل ما أبدأ فيها، أنا من الناس اللي مابتحبش الروايات اللي بتكون عامية أبدًا، وعلى عكس عادتي استغربت إني حبيت الرواية وجذبتني جدًا وبرضو كانت السبب إني أسيب مذاكرتي ودروسي عشانها! بدأتها امبارح بالليل على أساس أقرأ أول فصل وأنام بس استغربت لما لقيت نفسي مشدودة أوي لدرجة إني وصلت للصفحة 130 في لحضات صغيرة محستش بيها وغصب عني سيبتها ونمت مضطرة وخلصتها تاني يوم ^_^

شكرًا للكاتب على الوقت الممتع اللي قضيته مع الرواية اللطيفة جدًا جدًا، وبإذن الله مش هتك��ن أخر مرة أقرأله :)

[Marwa Elomda · Rating 5 out of 5]

إنَّ النِّساء يا ولدي يعشن بالكلمة، ويمُتن مِن كلمة، وكلُّ عاقلةٍ مِنهنَّ في الأصلِ حمقاء، والحمقاءُ مِنهنَّ أعقلُ مِنكَ يا ولدي
ابن حزم الأندلسي
بالجملة دى أستهل الكاتب بداية قصتة والجميل فيها أنه كتب بدل روايه كلمة قصه حقيقيه كالمعتاد تامر عبده أمين مميز في كتاباته وطرحه لقصصه بعد كتابه
أخرأيام نوفمبر يغوص في شخصيات الافراد والطباع البشريه المتناقضه بمنتهى الواقعية وأد اى في شخصيات جميله وطيبه وذات أصل ومقابلهم اشخاص على النقيض وبالرغم من انتشار السئ الا ان في قلوب خيره
بعد أنتهائها جذبنى فكره الغلاف بيمثل الأختين أو البطلتين والانطلاقه بشغف مع العنوان المصاحب لاغنيه فيروز وقصه الاغنيه وان كل اغنيه لفيروز بيبقي وراها دايما حوار بيلهم كتاب اغانيها

[Basma Omar · Rating 3 out of 5]

رواية لايت تشد تخليك عايز تكمل عشان تعرف هيحصل ايه. لا الغلاف شديني ولا العنوان.. اسم تامر عبده أمين فقط

. مبحبش الكتابات باللغة العامية ابدا سيئة جدا جدا.
. كان نفسي اعرف نهاية كل اللي ظلموها.
. معجبنيش انها ردت على احسان الست ثريا ليها بانها تكذب على ابنها ف موضوع اختها وتخبي عليه حاجة كبيرة زي دي!

[Rawan Mohammad · Rating 5 out of 5]

والله قلبي وجعني جدا وبكيت في الرواية دي ودا نادرا ما يحصل ... رواية حلوه أوي أوي أوي ♥️♥️ والنهاية معقولة وعكس ما ناس كتير شايفه انها مش ممكن تكون حقيقية فللأسف في قصص كتير زيها بتحصل وأكتر كمان .. وبالرغم اني مش بحب الروايات العامية بس في الرواية دي محستنيش متضايقه خالص من دا وحسيته سلس جدا 👏🏻👏🏻 برافو بجد

[Ahmad Shuhait · Rating 2 out of 5]

3.5/10

[Eslam Oraby · Rating 3 out of 5]

رواية خفيفة .. أول مرة أشوف الشخصيات بعينى وانا بقراها رغم ان تامر عبدة أمين - المؤلف - مش موضح ملامحهم الشخصية من بره عامله ازاى الا انى قدرت احط لكل شخصية ممثل وممثلة معروف من اللى حولينا واركبه على الشخصية دى !

الرواية تصلح لتحويلها لعمل سينمائي بشكل سريع .. ف تامر عبده أمين كتبها وكأنها سيناريو جاهز للتصوير .. مجرد تعديلات وجمل حوارية أطول ف السيناريو ويبقى لديك سيناريو جاهز .. ف طريقة السرد والكتابة تخدم تدفق الاحداث وتبعيتها بشكل ملحوظ مما يسهل على المشاهد - فى كالة تحويلها ل فيلم سينمائي - الربط بين المشاهد والأحداث بشكل سلس وسريع ..

تأثرت كثيراً بالفصل السادس وبخاصة تصرف الحاجة "ثريا" مع "ريم" وما حدث بالمستشفى ومع طفلتها "لمى" ..

رواية خفيفة وأحداثها تميل للواقعية بشكل كبير .. أستطعت قرأتها فى يوم ونصف مع اخذ راحات ليست بكثيرة لنفسى والعودة للقرأة مرة أخرى.

يعيب على هذا العمل الفنى هو اللغة المستخدمة فى الكتابة .. انا لا احبذ الكتابة بالعامية ف شرح الأحداث أو التعليق عليها .. لا مانع أكيد ف إستخدام العاميه ف الحوار.. فهذا وارد وطبيعى ولكن ان تشرح المشاعر والأحداث والتنقل بين المشاهد وبعضها البعض والفصول بالعامية المصرية !؟ .. ف هذا لم اجده شئ جيد فى فعله! ولكن .. لعل قدرة المؤلف على الكتابة باللغة العربية الفحصى ليست بالقدرة التى تستوجبها كتابة الروايات الغنية بالإبداع اللغوى والآدبى.

[Mary Gamel · Rating 5 out of 5]

راوية هتشدك بطريقة جذابة ،ولن تمل منها فالاحداث مرتبطة ببعض وتسير بسلاسة وسهولة ، البطلة أنا كنت مضايقة ومتغاظة منها فى أول احداث الراوية لأنها ما سمعتش كلام امها فى أن خطيبها يجيب لها شقة بعيد عن حماتة. واتزوجتة وعانت من معاملة حماتة ،شفت القسوة والظلم اللى حصل لها من اللى حواليها ومن مجتمع لا يرحم انسانة لوحدها ،اما قبل نهاية الأحداث تعاطفت معها لأنها دافعت عن اختها حتى لو بالقتل ...
،#راجعين يا هوى...🧡🧡🧡

[Hala · Rating 5 out of 5]

مش عارفة اقول ايه عالإبداع دة؟؟
وانا بفرح وازعل واضحك وادمع واتقهر واحس بالعجز والخوف والخذلان وكل المشاعر الي مرت بيها ريم
من خذلان زوجها و حماتها ل وفاة مامتها وتعب بنتها و مشكلة اختها وظلم الدكتور في الجامعة
قصة حقيقة تحس انك عايشها مع ابطالها وعارفهم ومتعاطف معاهم ومضايق من الي أذوهم وفرحت جدااا ان النهاية مش تعيسة مكنتش هقدر اشوفها لسه هتتظلم
شكرا ا/ تامر دُمت مبدع

[Sherif Elhamawy · Rating 1 out of 5]

راجعين يا هوي
تامر عبده امين
ليست زوايه و لكنها سيناريو او سكريبت فيلم او مسلسل درامي حاول من خلاله المؤلف ان نتعاطف مع بطلته " ريم " و لكن مع استكمال اوراق الروايه او الحدوته نجد ان ريم ظلت شهور بعد زواجها منقطعه الصله بامها المريضه بل تجاهلت الرد علي اتصالاتها خشيه غضب حماتها !!!
باعت اوراق الدكتوراه من اجل الفلوس !!!
و اشترت مسدس و تسلقت المواسير علشان تسرق سيده مسنه !!!
رافقت اختها في عمليه اجهاض و عمليه ترقيع لتخدع عريس قادم للزواج منها دون ان تبلغه بانها تزوجت من قبل عزفي !!!
قتلت الزوج السابق لاختها حتي لا يفضح سرها بالزواج العرفي منها و اجهاضها لابنه !!!
هذه الشخصيه كيف رسمها المؤلف و كيف رسم باقي الشخصيات المليئه بالتناقضات خاصه وكيل النيابه الذي يبحث عن مخرج لها من القضيه و كأنه يري انها ظلمت !!!
فضلا عن استخدامه لغه عاميه ركيكه و هو يعلم ان اللغه العاميه بسيطه في التحدث و شاقه في القراءه و لا تساعد في ابراز المعاني بشكل ادبي روائي …

[Maha Eshraa · Rating 4 out of 5]

أحداث كتير
و فى منها إلى صعب يتصدق
بس من كتر ما الرواية شبهنا حبيتها.
بنت بسيطة بتكافح فى الدنيا عشان تعيش.
فى أجواء الحسين الجميلة و أهلها الطيبين.
مش عارفة اوصفها اوى بس الرواية فيها حاجات حلوة كتير فى زمن ناسه قليلين انك تلقى زيهم دلوقتى .
استمتعت جدا بها.

[zahraa esmaile · Rating 5 out of 5]

#مراجعات_2020
#راجعين_ياهوا
مع أول تجارب الكاتب الروائية
الى اختار الكاتب انه يلقي الضوء على قصة حقيقية...حكاية ليها ابطال عايشين وسطنا
ويمكن يكون اى حد فينا سمع او حتى عاش جزء شبيه
حكاية"ريم"
ريم...البنت يتيمية الأب ولكن ربنا رزقها بأم مكافحة
قدرت توصلها لبر الأمان لحد م دخلت الجامعة
وبدأت قصة حب مع زميل ليها وبيقررو يتجوزو
بنشوف رحلة ريم من بداية تعرفها ب هشام...التنازالات الكتير جدا الى بتبتدي بالسكن مع مامته وبتكون لالاسف بدون نهاية
تحولات درامية كتير
وأزمة بتقع فيها اختها الصغيرة"دينا" بتكون سبب ف تحول شخصية ريم 180 درجة بدون مبالغة
خاصة مع تعرض بنتها لأزمة بتهدد حياتها
بنشوف ريم بتواجه دة كله ازاي...بتصمد قصاد الاعاصير المتتالية الى بتهز كيانها قد ايه
خاصة مع وفاة الأم وبعد الجميع عنها
بنشوف عوض ربنا...والنهاية الى عجبتني جدا
الرواية مكتوبة بالعامية بشكل كامل
ولكن دة بالنسبة لي عمره م كان مشكلة طالما بدون ابتذال
الشخصيات اترسمت صح...بدون رغي ممل او اختصار مخل
ف كانت النتيجة اني شفت كل شخصية من جوة صح جدا
وصف المشاهد كان جميل
عجبني جدا وصف شارع الحسين...مشاهد بعينها ل ريم
مشهد النهاية...رائع
شخصيات كتير حبيتها
يمكن اغربها واجدعها...هوسة
الولد الي يبان طايش...ولكن معدنه بيظهر ف الشدة
عجبني تطور شخصية ريم جدا
وحبيت ماما فاتن وماما ثريا لأبعد مدى
وصعبت عليا دينا رغم كل شئ
ولما...قطعة السكر الي ف الرواية دي فعلا
الرواية مكتوبة بطريقة تامر الى بحبها...الونس
حتة دفا كدة تامر بيتميز قوي بيها
وظهرت جدا ف الرواية دي
تصاعد الاحداث جميل...والفلاش باك ولو انه كتير ولكن متعرفش تتوه
رواية تجبرك انك تخلصها ف قعدة رغم ان حجمها مش صغير
300 صفحة تقريبا ولكن تشدك تكملها
كلمة اخيرة:
يمكن دة من الريفيوهات الصعبة شوية...وشهادتي مجروحة
لان ببساطة الرواية اتولدت على ايدي
كان ليا الشرف بقراءة المسودة الأولى...ومتابعة رحلة الكتابة كاملة
حاولت أكون حيادية قدر الإمكان
علامة كاملة لرواية حبيتها
انتهى الريفيو
من الرواية:
*مين اللي قال ان اللي ف القلب مش بيطلع ع الوش؟دا مش بيودي الإنسان في داهية غير عيون قلبه اللي ب��شوف بيها اللي في قلوب غيره، ولسان قلبه بيتكلم عن اللي شايله
*مش هتعرف تعمل لحد شايف انه لوحده غير انه يلاقيك جنبه
*ان الغريب يخذلك عاجي...لكن اصعب شعور ان الواحد يحس انه عبء على اقرب الناس ليه...رغم انك بتستنى السند منهم هما، لكن مابيجيش! ايه قيمة الحياة نفسها وقتها، وبالذات لما تكون محتاوط قبلها بظروف مقيداك، وبتزقك ناحية اتجاه مش عايزه...لكن مجبر عليه
*اتنين مش بيحسبوها...اللي بيحب واللي بيحس انه عاجز
*القانون عادل...البشر هما اللي ظالمين
#الكتاب_رقم_69_لسنة_2020
#كتب_العيد

[Lamia Shawky · Rating 5 out of 5]

اول ما جذبنى لقراءة الرواية إنها قصة حقيقية؛و عندما بدأت فى قراءة أحداثها ، ازداد شغفى لمعرفة المزيد
فبطلة الرواية تنتمى لأحد أحياء القاهرة القديمة "الحُسين" مما أضفى عليها من البساطة و الجاذبية الكثير ، و على الرغم من التعقيد الذى آلت إليه الأحداث فإن الإيمان بالعناية الٱلهية و قدرتها على تمهيد الطرق الوعرة لتصبح ميسورة امام من يفقد الأمل فى بريق الحياة كان السمة الأساسية فى الرواية.
و ايا كان المصدر الذى استمد منه الكاتب هذه الأحداث الشيقة ، فقد نجح فى صياغتها ببراعة و نقل مشاعر كل شخصية على حدة و الصراع الذى أجبرته الحياة على خوضه مما يجعل القارئ يتشوق دائما لمعرفة مصير كلا منهم و ما ستؤول إليه الأحداث.
و استطاعت الرواية أن تبرهن على أن الأصل الطيب و الخير هم الاساس فى كل إنسان و ان الفطرة السليمة هى منبع كل عطاء، و حتى لو كان صاحبها لا يملك من مقومات الحياة الكثير، فإن كان قلبه ينبض بالحب السليم ، فهو أغنى مما يتصور و تفوق قدراته الكثير ممن لا يملكون فى الحياة سوى السعى وراء المال و الغرور بملذات الحياة.
رواية جميلة و اذا اتتك الفرصة لقراءتها فلن تشعر بالملل بل ستجد ما يبعث فيك الامل و يحثك دائماً على ألا تفقد بوصلتك مهما طال الطريق و تعددت اتجاهاته الصعبة.

[Reham Al-Bendaary · Rating 5 out of 5]

الحقيقة إن شهادتي مجروحة في كتابات تامر عبده أمين .. أنا متابعاه من 3 سنين تقريبًا و مفيش مقالة و لا بوست معملتش عليها لايك أو كومنت .. مفيش مرة كتب حاجة و ما لمستنيش .. ف هو من الكتّاب اللي ربنا سبحانه و تعالى أعطاهم موهبة دخول قلوب الناس بدون استئذان 😊
كنت طول الوقت حريصة و بسبب مقالاته دي إني أقتني كتبه .. و الحمد لله كلهم عندي .. و مفيش و لا كتاب فيهم قريته على مرتين 😅
هو كدا شوت واحد .. ما ينفعش تبدأ في قراءة كتاب له غير لما تخلصه .. آخر أيام نوفمبر قريته حوالي 11 مرة .. بعشقه الحقيقة و بيغير لي مودي جدًااا ..
بالنسبة لراجعين يا هوى انا عرفت منه إنها قصة حقيقية فعلًا .. بس صياغته ليها و للأحداث بالطريقة المشوقة دي أعطت لها بُعد آخر فعلًا مبهر ..
قصة حقيقية .. صياغة كاتب محترف .. بالعامية .. مشوقة ..مبهرة .. كل سطر فيها بيفتح معاني و آفاق و يعيشك فيها لدرجة إنك بتكون حاسس إنك تعرف هوسة مثلًا و عاشرته و شوفته و عارف ملامح وشه ..
أنا بدأت قراءة الرواية على إضاءة موبايلي في السوبر جيت و أنا راجعة من معرض الكتاب للمنصورة 😊
مقدرتش أستحمل إني أستنى لما أروح .. و كملت قراءتها تاني يوم ..و مش عاوزه أقولكم اني كنت طول الليل بحلم بالجزء اللي قريته و كإني هكملها ف الحلم 😅
غلافها كان شاددني جدًااا كمان .. و أعتقد إنه من ضمن الأسباب اللي نجحت الرواية بالشكل المبهر،دا ..
شابوه لتامر عبده أمين و لكل الناس الحلوة اللي شاركت في إخراج الرواية بالشكل الرائع دا ..و أوصي بقراءتها جدًااااا لأي حد لسه ماجبهاش 😊😊

[Amira " MoRoo " · Rating 1 out of 5]

ليه يطبع منها ١٢ طبعه ؟! الصراحه مش فاهمه ولا عندى رؤيه ياترى فن الروايه رايح على فين..مسلسل عربي قدبم وحمضان ..مافيهوش اى جديد ولا اى ابداع ولا حتى النهايه صدمتنى ...طب حابه اسال الكاتب هو منبهر بنفسه وشايفه انه جاب الديب من ديله وهو اصلا حاكى حدوته حمضانه ومهروسه في مسلسلات وحواديت زمان ...اه كانت خفيفه وخلصت على قعدتين ...بس فعليا فشنك ...زيروووو كبير خالص ...نجمه واحده علشان الفلوس اللى دفعتها مش اكتر

[Mennatallah Abdel fattah · Rating 1 out of 5]

كان من الممكن أن تكون رواية خفيفة قريبة إلى القلب لكن العمل للأسف يفتقر الحبكة المحكمة وتسلسل الأحداث المنطقي.
لا أعلم ربما أضاف إلى إحباطي أنني لا تستهويني الأعمال التي تكتب كلها بالعامية وليس فقط الحوار.
كان جزء الحاجة ثريا هو الوحيد القريب لقلبي والأصدق رغم غرابته.
لم يغب عن الرواية عامل التشويق رغم ذلك مما يدفعك لقرائتها في فترة وجيزة

[Khaled negm · Rating 2 out of 5]

كتابات تامر عبده امين علي قد ما هي كويسه جدا زي اخر ايام نوفمبر علي قد ما ممكن تكون تجربته الأولي ف كتابه الروايه مش احسن حاجه الروايه كاحداث متوقعه بنسبه كبيره جدا أحداث كتير غير مترابطه لغة سهله بطريقه زايده عن اللزوم بحيث انك تقدر تقراها بسرعه مفيش كلمه ممكن تقف عندها خالص أتمني أن القادم يكون افضل ان شاء الله

[Safinaz Sadek · Rating 5 out of 5]

انتهيت منها في يومين .. كأنني اشاهد فيلم سينمائي بسرد عامي وحوار يدخل القلب من اول جملة .
شخصيات مرسومة بعبقرية اكاد اراها امامي .
شكراً علي متعة رائعة 😍

[Ayatollah ahmed · Rating 3 out of 5]

٣ نجوم عشان الكتاب مسلي وخلصته في قعدة

بس بالنسبة لي طريقة الكتابة غريبة والأحداث مش منطقية رغم ان مكتوب قصة حقيقية.. للاسف كل اللي فيها ماوصلنيش ابدا انه حقيقي

[بسنت يوسف · Rating 2 out of 5]

الايام اللي فاتت كانت فتره ضاغطه عليا بشكل كبير، وكنت في حاجه لأي عامل جذب عشان اخرج من المود العملي الكئيب اللي وقعت فيه، انتهزت اول ساعتين فاضيين في يومي ولاقيت نفسي واقفه امام رفوف المكتبه و عنيا بتجري بين أسماء الكتب لعل وعسى يخطفني كتاب أغرق في تفاصيل قصته ..

عنيا وقعت علي كتاب اسمه #راجعين_يا_هوي الاسم شدني جداً خصوصاً إني اتربيت علي أغاني فيروز واني من أشد محبيها 💖
نظره سريعه علي الغلاف اتشديت اكتر لما لاقيت مكتوب عليه " قصه حقيقيه" أما تعريف الكاتب علي ظهر الغلاف أوحي لي أني هقرأ عمل رائع، و بدون تفكير أخذت الروايه و معاها إصدار سابق لنفس الكاتب .

_ صدمتي الأولي .. لما لاقيت الروايه كلها بالعاميه 🙄 كبرت دهشتي .. عاميه ! ازاي وتعريف الكاتب بيقول انه حاصل علي ليسانس أداب قسم اللغه العربيه يعني من المفترض انه لديه قاموس لغوي ثري بالإبداع اللغوي و الأدبي

لا أعيب العاميه أو محبيها و لكني لا أحبذ العاميه في وصف الأحداث والتفاصيل .. شرح المشاعر .. التنقل بين الأحداث والمشاهد، حيث أنها أربكتني و شتت انتباهي في دخلات بعض المشاهد والربط بين الفصول

ولا مانع في استخدام العاميه في لغه الحوار أو لإيضاح أمر يستدعي ذلك .. لأني أنا شخصيًا استخدم اللغه الثالثه في بعض كتاباتي لإيضاح موقف أو حدث ما، أعيب علي هذا العمل في اللغه المستخدمه ولكن ما يشفع له أنها عاميه دون ابتزال

_ الروايه أحداثها خفيفه و تخلص في جلستين، لكن ملامح الشخصيات مش واضحه اوي، مقدرش أمنحها وصف روايه لكن يليق وصفها سيناريو او سكريبت لعمل فني درامي

_ أحداث الروايه بعيد كل البعد عن أنها تكون قصه حقيقة حدثت بالفعل علي أرض الواقع لم أشكك في مصداقيه الكاتب و لكن رسمه للشخصيات والأحداث الميلئه بالتناقض قادره جدًا علي إبراز عدم صلتها بالواقع و المنطق

خاصه شخصيه وكيل النيابه المتعاطف مع ريم المتهمه في قضيه قتل واللي صار يبحث لها عن مخرج من التهمه مش بس كده ده كمان أعطاها ثغره قانونية تستند إليها كدليل براءه في القضيه، مش قادره أوصل لتفكير الكاتب وازاي رسم الشخصيه وتفاصيلها و صدقها .. دايما اقول ان اللي عاش الموقف غير اللي سمع عنه عشان كده أعتقد ان الكاتب لو حضر تحقيق من اللي مر عليا او محاكمه كان غير منظوره عن فكره العداله والقانون وإننا ليسوا في المدينه الفاضله

شخصيه ريم استفزتني جدا خصوصا ضعف شخصيتها و تسليمها الدائم غير المبرر لكل اللي بيحصل في حياتها من اول انانيه زوجها و خيانته ليها مرورا بقبولها تحكمات حماتها و سيطرتها عليها لدرجه انها تقطع صلتها بأمها و أختها وتزورهم كل سنه مره .. وانها متقدرش ترد علي أمها اللي فضلت تتصل بيها بالايام وهي تعبانه لغايه لما ماتت ودفنت بدون وجودها خشيه غضب حماتها !!

قبولها انا تتطلق علي الابراء ده حق من حقوقها أنها تتمسك بيه او تتنازل عنه ده يرجع لها اما انها تتنازل عن نفقه بنتها مريضه القلب اللي ممكن تموت في اي لحظه لو معملتش العمليه رغم عدم قدرتها علي الإنفاق عليها تصرف مستهتر مافهوش أي مسئوليه او أمومه، شرائها مسدس وتسلقها المواسير عشان تسرق سيده مسنه ساكنه معها في نفس الحي عشان تنقذ بنتها تصرف مقنع الي ��داً ما علي اعتبار ان غريزه الامومه وخوفها علي بنتها من الموت كان دافع قوي للسرقه ، لكن ان الست ثريا تقفشها جوا بيتها وتعرف انها جايه تسرقها وتسامحها لا وكمان تضايفها ورق عنب!! صعب تصديقها علي أي حد، الكاتب صور ريم شخصيه جميله و طيبه ظلمهتا الظروف والحياه و في نفس ذات الوقت هي نفس الشخصيه اللي ردت علي إحسان الست ثريا ووقفتها معاها في عمليه بنتها أنها خدعت أبنها و جوزته أختها اللي كانت متجوزه قبل كده في السر !!

إختفاء هشام عن باقي أحداث الروايه حتي بعد مرض بنته وخضوعها لعمليه خطيره مش منطقي !! توقعت ان هشام هو اللي دفع فلوس عمليه بنته بدل من هوسه

هوسه أكتر شخصيه كانت واضحه وملامحها محدده و تصرفاته و ردود أفعاله كانت مظبوطه بالملي

رغم كل ده الا ان الأحداث كانت لطيفه مسليه خاليه من الملل، وغيرت لي مودي جدااا، عجبني ان أحداثها دارت في شوارع سيدنا الحسين وحي الجماليه ، أغنيه فيروز اللي كانت موجوده بشكل متناسق مع الأحداث أجبرتني ادندن معاها و نسيت أنا كنت مضايقه من ايه ، قصه الأغنيه وربط الشبهه بينها و بين احداث الروايه واسمها كان اختيار مناسب

"راجعين يا هوى راجعين يا زهرة المساكين راجعين يا هوى على دار الهوى على نار الهوى راجعين".

[Ahmed Abo Baker · Rating 3 out of 5]

#را��عين_يا_هوى
#تامر_عبده_أمين
▪️رواية باللغة العامية تحكي قصة حقيقية لبنت اسمها ريم التي تسكن في حي الحسين، وتتزوج من هشام زميلها في الجامعة وتنجب منه الطفلة لمى ثم تمر بعدة ابتلاءات من بداية موت أمها مرورا بإنجابها لطفلة مريضة بمرض في القلب ثم طلاقها من هشام الذي يصبح ممثلا مشهورا ويتزوج من زميلة له ثم تتوالى الابتلاءات التي تحدث لريم فتصدم في نتيجتها في الكلية ثم تجبر على بيع رسالة الدكتوراة الخاصة بها لبنت عميد الكلية حتى تستكمل علاج ابنتها وأيضا تبتلى بزواج أختها دينا العرفي من لؤي ابن عضو مجلس الشعب الذي رفض والداه زواجهما الرسمي وأثناء رحلة ريم في البحث عن مصادر دخل لاستكمال علاج ابنتها التي تخلى عنها والدها تضطر لسرقة السيدة ثريا التي تتحول بعد ذلك إلى أم لها ثانية تعوضها عن حنان أمها المتوفية وتكون هي اليسر بعد العسر فتتغير حياة ريم بعد ظهور السيدة ثريا وابنها أحمد فتتبرع هي بعلاج لمى وتعوضها ريم عن غياب ابنها أحمد لفترات طويلة ثم تنتهي القصة بالابتلاء الأخير لريم وهو قتلها لؤي الذي جاء لفضح أمر دينا عندما قررت الزواج من أحمد ولكن يشاء الله أن تقابل ريم وكيل نيابة إنسانا ورحيما يتفهم موقفها ويمليها ما تقوله لتبرئتها.
▪️رغم ركاكة اللغة وأن أسوأ ما فيها أنها بالعامية إلا أنها جاذبة جدا ولم أتركها حتى أنهيتها في يوم واحد رغم أن عدد صفحاتها كبير جدا (٢٩٥ صفحة) فكأنك تشاهد فيلما مشوقا تريد أن تعرف نهايته .
▪️غلاف الرواية عظيم جدا من أجمل أغلفة الكتب التي رأيتها.
▪️أكثر ما يميز الرواية هو تسارع الأحداث وذلك لأنها حقيقية وأكثر ما يعيبها أنها كتبت بالعامية فلم يكلف الكاتب نفسه عناء الخيال ولا حتى عناء تحويل القصة إلى فصحى.
▪️شخصية أحمد ابن السيدة ثريا تشبهني جدا وكنت أريد أن يزيد دورها في الرواية بدلا من دور هوسة الذي أخذ دورا أكبر من حجمه في الرواية بل كان من الممكن إزالة دوره وذكره فقط في عدة سطور.
▪️الرواية غلب عليها أكثر طابع الكاتب الفلسفي السهل فأنا من هواة قلم تامر عبده أمين الذي يعبر عما بداخلنا فكل من يقرأ له يعتبر قلمه مرآة لروحه.
▪️الدرس الذي تعلمته من الرواية أن الحياة اختبار لنا تكثر فيها الابتلاءات لنتعلم ونتعظ ولنعلم أن لكل عسرٍ يسر.
▪️تقييم الرواية : (٣ / ٥)

[أسمـاء محمد الصادق · Rating 4 out of 5]

هستني جزء تاني من الرواية بعد كام سنة للطفلة ..
حقيقي إن الرواية تبقي واقعية بالشكل دا مكنتش مقتنعة أوي .. بس في مغزي من حقيقة الأحداث بيثبت حاجات كتير ...
_ إن الأم تقدر تعمل أي حاجة عشان ولادها وبتعرف تكون ليهم الحياة اللي جوا وبرة بتبقي مراية ولادها .. بس الأم اللي بتنجب اطفال مش زي اللي بتربيهم
_ الدنيا بتوقعنا بإغرائها لينا في حاجات كتير تديك الحلو مرة واحدة وتنزلك علي جدور رقبتك في نفس اللحظة .. عشان كدا متتعشمش في حد ولا تآمن لأي حد .. القلوب شوافة واللي قلبه شايفك هيفضل حاسس بيك ومقدرك وبيعذرك مهما حصل
_ مش كل حبيب ينفع يكون زوج ولا كل زوج ينفع يبقي أب.. المسئولية دي صعبة أوي لما تشيلها بالتدريج وفي كل شيلة تصعب أكتر بس الشيلة عاوزة سند وريم كانت سند بس هشام مكنش شيال 💔
_ الطفل اللي يكبر من غير وجود أبوه وأبوه بيستنكره هيفضل حاسس أنه يتيم كل لما يكبر ويعيش في أذي نفسه ويجلد نفسه أنه جه الدنيا لما يكبر ويعرف دا ودا مكنش ذنب لمي .. أن أبوها تقريباً اعتبرها مش موجوده وكأنها مجتش الدنيا وبقي موجود ليها اسماً بس ..
_ لما حد ميعرفكش ينصحك نصيحة اعمل بيها
_ متغلبش مشاعرك في اختياراتك احكم بعقلك قبله ساعات العقل بيرفض حاجات القلب عاوزها وبتطلع صحيحة ف متجادلش معاه واسمع كلامه .. ومتقاوحش وتقول هجرب واعيش لأنه بيبقي إنذار ليك وانت بتعدي عليها وبردو تتجاهل
_ العمر مش بعزقة ومتسيبش حبايبك لوحدهم وخصوصاً لو قالولك أنهم محتاجينك وتقول بكرة ارجع ولا لما افضي اوعي تتشغل وتتلهي بالدنيا بيهم بيجي وقت والدنيا تسرقهم ونندم
_ مكتوب علي أي حد أنه يتوجع عشان يتعلم ويعيش وحيد عشان يتألم وميبقاش فارق معاه اللي بيحصل
الأم وجودها جنة ❤️ وشايلة عننا ياما ومحدش هيشيل زيها .. والوحيدة اللي لما بنغلط مبتشيلش وعتابها بيبقي محبة وزعل علينا
_ ربنا رحمته واسعة وفي كل مرة تحصل أي حاجة كانت بيبعت معاها حبل نجاة وباب يتقفل في الوش ويتفتح باب من غير ما ندري ولا نتوقع ..

[My Novels · Rating 5 out of 5]

رواية:راجعين يا هوى❤️
الكاتب:تامر عبده أمين
تبدأ أحداث الرواية في مكتب وكيل النيابة وأمامه فتاة تُدعى "ريم" ومن بين جميع القضايا كان يتمنى وكيل النيابة أخذ قضية ريم لأنه شعر أن بها سر، شيئًا خفي لا يعلمه ألا ريم فيجلس أمامها ليطلب منها أن تسرد له كل شئ لتوافق ريم لانها شعرت بالرغبة ف الحديث وبدأت بسرد كُل شئ من البداية ونبدأ بأستكشاف أشخاص وأسرار وخبايا وأشياء كثيرة في حياة ريم...❤️
.....
الرواية عبارة عن ست فصول باللغة العامية، كان بقالي شهور منعزلة عن القراءة تمامًا وكان المفروض أكون قريتها أصلًا ندم رهيب حقيقي أني مقرتهاش من زمان، تحفة رواية واقعية جدًا وأحداثها تبدو لك أنها عادية موجودة في أي فيلم وأنك تقدر تتوقع اللي هيحصل ولكن أبدًا مش هتقدر تتوقع الأحداث ومش هتحس أبدًا بملل وهتحس بحماس لمعرفة أيه اللي هيحصل .. عيط كتير في الأخر بجد كانت النهاية جميلة جدًا وكل حرف فيها لمس قلبي وأقدر أقول أنها رجعتلي شغفي من تاني❤️
عدد صفحاتها:296 صفحة
عن دار نشر:المصري
غير متوفرة:pdf
تقييمي:10/10❤️❤️
أتمنى لكم قراءة ممتعة❤️

[Maha · Rating 4 out of 5]

ريفيو روايه راجعين يا هوي
انا لسه مخلصه الروايه بقالي ساعه و قاعده مشاعري ملخبطه مش عارفه اكتب ريفيو فيها من العياط🤦‍♀️ في العادي لما بخلص بحب اكتب في ساعتها اللي حسيته من ناحيه الروايه
الروايه دي مشاعرها عاليه جدا انا متلخبطه فيها اوي علي قد حلاوتها كنت فاكره اللغه العاميه هتقفلني منها لاني متعودتش أقرأ بالعاميه لكن السرد كان حلو اوي و بسيط حكي ب طريقه لطيفه جدا
عدد صفحاتها ٢٩٤ خلصتهم في يومين مشوقه جدا و نهايتها حلوه اوي اوي
محدش يتخض من حجمها مش هتحسوا بيه خالص بمجرد البدء فيها
تصنف روايه اجتماعيه
متخيلاها مسلسل او فيلم هتبقي جميله جدا
تقييمي لها ٤/٥
الغلاف حلو جدا و هوه اللي شدني ليها و انا بجيبها من معرض الكتاب
"للأسف في ناس تقدر بجره قلم تلغي تاريخ انسان كأنه متولدش"
"التجارب بتنشفنا و مع كترها بنتحول النهارده لنسخ اقوي مننا امبارح"
"التعامل مع حقيقه ان كلنا مراحل في حياه بعض بيريح اللي مروره كان درس و اللي مروره كان رحمه و اللي مروره كان لحظه اللي بيفرق مرحله عن مرحله هو اثرها و اللي بنتعلمه منها "
و فعلا القانون عادل البشر هيا اللي ظالمه