ကျေးတစ်ရာ ရသစာစုများ

by ခင်ခင်ထူး

စာရေးသူ ရေးသားသည့် အညာဓလေ့ ဆောင်းပါး ၈ ပုဒ်၊ စာပေဆိုင်ရာ ဆောင်းပါး ၃ ပုဒ်၊ ခရီးသွား ဆောင်းပါး ၅ ပုဒ်၊ ရသဆောင်းပါး ၉ ပုဒ်တို့ကို စုစည်းကာ စာအုပ်အဖြစ် ထုတ်ဝေထားခြင်း ဖြစ်သည်။

260 pages, Paperback

Published November 1, 2012

About the author

၁၉၆၅ ဒီဇင်ဘာ(၁၇)ရက်နေ့တွင် မြင်းခြံမြို့၌ အဖ-ဦးညို၊ အမိ-ဒေါ်မြတင်တို့က မွေးဖွားသည်။ မွေးချင်း(၆)ယောက်တွင် တတိယမြောက် တစ်ဦးတည်းသော သမီးဖြစ်သည်။ အမည်ရင်းမှာ ဒေါ်ထူးထူး ပင်ဖြစ်သည်။ ငယ်စဉ်က မြင်းခြံမြို့တွင် ပညာသင်ကြားခဲ့သည်။

၁၉၈၅၌ မန္တလေးတက္ကသိုလ်မှ ဓာတုဗေဒဘာသာရပ်ဖြင့် ဘွဲ့ရရှိခဲ့ကာ ၁၉၈၉တွင် မူလတန်းပြဆရာမအဖြစ် တာဝန်ထမ်းဆောင်ခဲ့သည်။ ၁၉၉ဝပြည့်နှစ်တွင် အလယ်တန်းပြဆရာမဖြစ်လာကာ ၁၉၉၂၌ မန္တလေးသို့ ပြောင်းရွှေ့ခဲ့သည်။ ဧပြီလထုတ် ရွှေဝတ်မှုန် မဂ္ဂဇင်းတွင် ပါရှိသော ပန်းပန်ပါရစေ ဝတ္ထုတိုဖြင့် စာပေနယ်သို့ စတင်ဝင်ရောက်ခဲ့ သည်။

၁၉၉၃မှစ၍ မဂ္ဂဇင်းများတွင် ဝတ္ထုတို၊ ဝတ္ထုရှည်များရေးသားကာ အားကစားဂျာနယ်များတွင်လည်း ဘောလုံးဆောင်းပါးများ ရေးသားခဲ့၏ ။ အချို့ဝတ္ထုတိုများကို ဂျပန်ဘာသာ၊ ဂျာမန်ဘာသာသို့ ပြန်ဆိုခဲ့ကြသည်။ ၁၉၉၉တွင် မဂ္ဂဇင်းပါဝတ္ထုတိုများကို စုစည်းလျှက် သနပ်ခါး ဝတ္ထုတိုများထွက်ရှိခဲ့ကာ သူမ၏ ပထမဆုံး လုံးချင်းစာအုပ်ဖြစ်သည်။

၂၀၀၁ ရောက်သောအခါ အလယ်တန်းပြဆရာမအဖြစ်မှ နုတ်ထွက်၍ နောင်တစ်နှစ်တွင် 'ကျမချစ်သော ဘောလုံးသူရဲကောင်းများ' (စတားပလေယာကောက်ကြောင်း) စာအုပ်ထွက်ခဲ့သည်။ စာရေးဆရာ နေဝင်းမြင့် နှင့် အိမ်ထောင်ပြုခဲ့သည်။ ၂၀၀၃၌ ဖက်စိမ်းကွမ်းတောင်ရွှေဝတ္ထုတိုများ ဖြင့် အမျိုးသားစာပေ ဝတ္ထုတိုပေါင်းချုပ်ဆုရရှိခဲ့သည်။

စာနယ်ဇင်းများတွင် ဝတ္ထုတို၊ ဝတ္ထုရှည်၊ ဆောင်းပါးများ အပုဒ်(၁၀၀)ကျော်ရေးသားခဲ့ပြီး ဖြစ်လေသည်။

Reviews

[Thinn · Rating 3 out of 5]

ကျေးတစ်ရာ ရသစာစုများ _ ခင်ခင်ထူး

အန်တီခင်ခင်ထူးရဲ့ စာအုပ်က ထုံးစံအတိုင်းပေါ့ အညာအကြောင်းကို စုံနေအောင်ရေးထားတယ်။ ပြီးတော့ ဒီထဲမှာတော့ သူစာပေဟောပြောပွဲသွားတုန်းက တချို့ခရီးစဉ်တွေအကြောင်းပါတယ်။ ဒီစာအုပ်ကို ဖတ်ဖူးတယ်ထင်တယ်။ သေချာတော့ မမှတ်မိဘူး။ ဒါပေမဲ့သူသွားခဲ့တဲ့ ဈေးတွေအကြောင်းကို ဖတ်မိမှ ကိုယ်လည်း မြို့တမြို့ရောက်ရင် ဈေးတွေလိုက်ပတ်ကြည့်တတ်တာကို သတိရတယ်။ သူ့စာအုပ်ဖတ်ဖူးလို့ လိုက်ကြည့်ဖြစ်တာလား မသိဘူးလို့ ပြန်တွေးမိလို့လေ။

ဒီထဲမှာ အပင်တွေအကြောင်း၊ စာအုပ်တွေအကြောင်းလည်းပါတယ်။ သူ့လိုမျိုးကိုယ်လည်း ဘယ်သူ့အတွက်ဘာညာဆိုပြီး ရည်စူးပြီးအပင်တွေစိုက်ခဲ့ဖူးတယ်။ စာဖတ်ပြီး မသိစိတ်ကလိုက်လုပ်ဖြစ်နေတာတွေထင်တယ်။

အန်တီခင်ခင်ထူးစာအုပ်ဖတ်နေတုန်းက သဘောမကျတာတစ်ခုက ဘာလို့ကောင်းတာတွေပဲရေးထားတာလဲလို့ တွေးမိတယ်။ မကောင်းတာတွေရော မရေးသင့်ဘူးလားလို့ ပထမဦးဆုံး သူ့စာတွေကို မေးခွန်းထုတ်မိတာပဲ။ ကိုယ့်ဟာကိုယ်နေမကောင်းနေတော့ ဘဝကအကုန်လုံးအကောင်းမှ မဟုတ်တာလို့ တွေးနေမိတာလည်းပါမယ်ထင်တယ်။

အန်တီခင်ခင်ထူးစာအုပ်ကတော့ သူ့ရေးဟန်အတိုင်းချစ်ခြင်းမေတ္တာတွေ၊ အညာအကြောင်းတွေကို လွှမ်းနေအောင်ရေးထားတာပါပဲ။

“ကျွန်မတို့အဘမှာ ကျေးတစ်ရာ ပုဆိုးတစ်ထည်ရှိသည်။ တော်ရုံ ပွဲလမ်းမင်္ဂလာကိစ္စမရှိဘဲ ကျေးတစ်ရာပုဆိုးကို ဝတ်လေ့မရှိ။ အဘ လူပျိုဘဝကတည်းက ဝတ်သည့်ပုဆိုးထင်ပါရဲ့။ ကျေးတစ်ရာပုဆိုးကို အဘ အင်မတန်မြတ်နိုးသည်။ အဘ အရွယ်ရသည်အထိ အဘဝတ်တာ ကျွန်မတို့ မီလိုက်သေးသည်။ ဝတ်ပြီးသည်နှင့် ခေါက်ရိုးမပျက် ပြန်ခေါက်ပြီး ပရုပ်လုံးနှင့် ထားလေ့ရှိသည့် ပုဆိုးပင်။ အဘ ကျေးတစ်ရာပုဆိုး ဝတ်ပြီဆိုလျှင် အင်မတန် ကျက်သရေရှိသည်။”

#ကျေးတစ်ရာရသစာစုများ #ခင်ခင်ထူး #20BOOKSBYBURMESEWOMEN