‫محدش شاف وطن‬

by علي سلامة

ديوان شعر بالعامية

صورتك أكبر بكتير م البرواز الصغير
شوفى كام مرة لون الأوضة اتغير
و ريحتك لسة فيها

على سلامة

155 pages, Kindle Edition

First published November 1, 2013

About the author

شاعر مصري تميز شعره بالبساطه والعفويه
ولمس المشاعر ومناقشة القضايا فى واقعنا
وقدمت بعض اعماله غنائياً مع الفنان محمد منير ووجيه عزيز
وأصدر ديوانه الأول بعنوان" ناقص حتّه"

ولد وتربى
فى حى السيدة زينب بمصر 1960
درس الهندسة لكنة كان يتردد على قصر
ثقافة الغورى
مما ساعد على تكوين موهبتة الشعرية
هو لا يدعى أنة من شعراء المعلقات
أو أنه من اعظم شعراء هذا العصر
, لكنة يدعى انة مواطن شاعر
شاعر بالابيات
شاعر بأحاسيس المواطن.


احيانا يظهر الاكتئاب والحزن
واحيانا يظهر التفاؤل والامل
ابتسامة دهشة
إعجاب تساؤل
كلها ردود أفعال قد تراودك
عندما تقرأ قصيدة واحدة لعلى سلامة.


تأثر على سلامة فى شعرة بصلاح جاهين
وبديع خيرى
وبيرم التونسى

Reviews

[Amr Mohamed · Rating 3 out of 5]

حاجات بسيطة

كلها حاجات بسيطة

وأد إيه بتفرق معايا

أد إيه..

زي إيه..؟

زي لما الفرحة تيجي لوحدها

زي إحساس بالرضا

وزي ما حبك كده

وزي دمعة طيبة

أرتاح بعدها

وماعرفش ليه..

وزي إيه..

زي وردة ف عيد ميلادي

وزي يوم بسيط وعادي

عدي لكن مانستهوش..

وكلمة حلوة سمعتها

من قلب حد ماعرفهوش..

زي ما فضفض معاك

بكلمتين..

وف وسطهم أسرح

تقوللي روحت فين..

وزي إحساس بالأمان

لما ليلة أبات ف حضن

أصغر ولادي..

وزي غنوة من بعيد

فيها من ريحة بلادي

كلها حاجات بسيطة

وأد إيه بتفرق معايا..

أد إيه

96 ساعة أجازة

وانت بتبعد

ماعرفتش إن كانوا خدوك منى

ولا ردّوك من تانى..

طفل صغير..

ما بيعرفش ينام الليل إلا ف أحضانى..

معقولة كبرت.. كبرت

ووصلت لسن التجنيد..

ده أنا لسه امبارح باحسب عمرك

وبقول ع اليوم ده لسه بعيد

أتاريه كان بيقرب

قلتلى يامّه

ده أنا رايح الجيش

مش رايح أتغرب

شهر ونص.. يعدوا قوام

من يومها عرفت الصبر

واتعلمت أعد على إيدى الأيام

اسمريت اكتر من ما انت أسمر

واحلويت أكتر..

كلك أبوك.. الله يرحمه

وطولة العمر ليك..

واللى رزقنا بعد ما مات

قادر يحميك..

لايق فيك الأفرول لما اتأيف

بقيت أشتّى معك لما تشتّى

وأفتح قلبى للنسمة الحلوة

لماّ تصّيف..

البطة اللى فى الشنطة تاكلها مع زمايلك

ودى لقمة عشان ف القطر لما تجوع..

ما عرفش إزاى بتقدر تضحك من قلبك

وعينيك مليانة دموع..

ضحكت علىّ لما بقولك

فهّمنى يعنى إيه ٩٦ ساعة أجازة

العيش ده مخبوز طازة

قلتلى يامّه

عيش إيه وبطة إيه..؟

لو تعرفى تعبى شوية من حنية قلبك ف إزازة

كان على عينى

لو أقدر أنا متأخرش..

ورحت

وأتاريك زى الفرحة

اللى بتيجى فى العمر مرة ومابتتكررش..

[Ahmad Hamdy · Rating 2 out of 5]

آه لو تعرفى
قد إيه كلامك رقيق ..
كأنه ونس ..
وأصحاب ..
وزاد للطريق
كأنه نسمة م الزمن اللى راح زى البراح ..
ساعة ما الدنيا تضيق
عارفه
ساعات أقول دي مش حقيقه
ده حلم حلو
وكلها كام دقيقه
وبعدين خلاص
واستكتر على روحي الفرح
اشمعنى يعنى الدنيا
تختارني أنا
من دون الناس ؟
لكنى لما بحضنك
بقول لروحي ..؟لأ
ده إحساس بجد
وبحق وحقيق
إحساس جميل لدرجة تخض
وأنا اللي طول عمري يطاوعني الكلام
ماعرفش ليه لما اسمعك
غصب عنى أسكت
وماأعرفش أرد !
قولي كمان..
ماتسكتيش
مين فى الزمان ده يلاقي قلب يقوله عيش
عايز أسالك
عملتي ازاي غنوة فرح
من مفيش ؟
وازاى هربتي من حزن البيوت ؟
قولى كمان



--------------------------------------
مش انتى اللى قلتى
مفيش حاجة تستاهل الزعل
وعلى أد ما بتمرر
من وقت للتانى بتحن
وتحلى بقنا بمعقلة عسل ؟
مش انتى اللى قلتى
هما اللى زينا
يصحوا م النوم يجروا والدنيا تجري وراهم
عندهم وقت يحزنوا
ولا حتى يحسوا بالملل ؟
عارفة
فيه ناس نزلت الميدان اتصورت
وناس اتعورت
وناس رجعت على كرسي بعجل
والغريبه
هم دول اللى لسه عندهم أمل !

[Ethoo Xide · Rating 5 out of 5]

اول محاوله للقراءه ل علي سلامه

راااائع . اجمل مافيه بساطه وعمق المعنى اللي بيوصله في كل حرف وكل كلمه
كل مره يوصلك المعنى وتخس بعمقه هتلاقي بسمه اترسمت على وشك لوحدها ^_^
حاولت اني اسجل الحاجات اللي عاجبتني في للجيوان عشان ارجعلها بس من كتر الي شدني معرفتش اسجل ايه ولا ايه :)

** هيرجعك لمود القرايه لو كنت سبته فتره

---------------من اكتر الاشعار اللي عجبتني :
ازاي ...؟
زراير القميص
حاجات بسيطه
مصر اللي مخدنهاش في المدرسه
شقاوه خريف
رحتي فين

[Raneem · Rating 5 out of 5]

إمبارح قلت ان هقلب كده في كام صفحة علشان أغير مودي قبل ما أنام......... صفحة جرت صفحة لحد ما لقيت فضيلي كام صفحة في الأخر ...قلت أسيب شوية سعادة لبكرة محدش ضامن الظروف........ مع أني قريت معظم القصايد اللي في الكتاب قبل كده إلا أني أنبسطت و أنا بقرأهم كأني بشوفهم لأول مرة

[Ahmed Ramadan · Rating 3 out of 5]

مكنش على مستوى تطلعاتى و مش افضل قراءاتى فى الشعر العامى خصوصْا بعد قراءة بعض القصائد للكاتب من دواوينه السابقة اللى خلتنى متطلع للديوان دا بصورة كبيرة و لكن لم يكن الديوان على المستوى المطلوب

ليس بالديوان السئ و افضل ما فيه من وجهة نظرى 3 قصائد

محضر إثبات حالة
شقاوة خريف
معلقة عسل

[مصطفي سليمان · Rating 2 out of 5]

عادي بشدة
مش دا اللي كنت مستنيه بصراحة بعد طول أنتظار

علي سلامة فيه أقوي من كدا بكتير بشدة
مش سئ
مش ملل
لكنه عادي
قشطة يعني

ومش دا اللي انا استناه من شاعر انا بحبه

[Mona · Rating 5 out of 5]

آآآآآآآآآآآآه يا بلد!

كعادته علي سلامة لما يلاقي الجرح ويدوس ويغوط بكل رقة وبساطة. وفي وقته إني أكمل الديوان ده اللي بدأته من شهور وما قدرتش أكمله!

مصر بتاعتي اللي ضايعة وتايهة ومسروقة بشوفه بيدور عليها في كلماته وبرضو مش لاقيها

"بضمان محل الإقامة"

"مصر اللي ماخدنهاش في المدرسة"
واحنا بلد اتعود يقول نعم
لحد ما نسي كلمة لأَّه..
واحنا بلد بيلعب كتير ف الساعة
لحد ما باظت والوقت ضاع..

"بطاطا"
لسة شوارعنا بتخاف من المطر..
والمطر للي مش عارف..
يعني خير..
إزاي ف بلدنا الخير..
أصبح خطر؟!

"موسم امتحانات"
هي دي..
اللي بتقرا في كتاب التاريخ
عن معجزات..
وتبص ع الدنيا
تلخبطها الحقيقة ..
لما تلاقينا مطرودين م التاريخ
خارجين من كل البوابات..

"بطاطا بطاطا"

"تشابه أسماء"
يا ترى دي مصر بجد
ولَّا ده تشابه أسماء؟

"انتهت النشرة.." الطائفية

"يا عم يا بتاع البطاطين"
عارف..
كل بطاطين العالم مش هتدفيك..
طول ما الوطن بردان..

"ماحدش شاف وطن"
وطن..
ضربوه بالنار وبالعيشة الضيقة..
هددوه بالحبس..
وبحبل المشنقة.
قربوه م الموت..
اتعلق بالحياة أكتر..
سقوه المر..
دوَّر على حبة سكر
وقعت من طرف المعلقه ..
محدش شاف وطن؟

"منكم لله.."
منكم لله..
فكرتونا بمصر
بعد ما كنا نسينا إننا مصريين
ووجعتوا قلوبنا عليكم..
وانتم رايحين..
أنا مش عارف..
اتعلمتوا كل ده ..
فين.. وازاي؟

"نور الطرقه"
الأمان يا حبيبتي ..
مش عساكر في الشوارع
أو غفر تحت البيوت..

"نزِّل إزازك.."
نزِّل إزازك..
عايز اسألك..
هي نزلة الأمل..
فاتت ..
ولا هيَّ اللي جاية؟
يفتح النور العالي ف عينيا
عشان يخطف اللي باقي فيها من ضي..
طريق دائري..
اللي رايح فيه
شبه اللي جاي..

"شوية أمل"
جربوا القسوة..
والبلطجة..
والمجرمين..
وكل ما يحرقوا الأرض
بيطلع الياسمين..
جربوا السيف
والنار والطبنجة..
ولسة ف الناي نفَس
ولسة بتغني الكمنجة..

"لازم تسمعني"
مصر

"معلقة عسل"
هم دول اللي لسة عندهم أمل!

"مساحة قلبي.."
ولو تفهم ف دمع العين
كنت عرفت إن الألم
ما يكسرنيش..
ده بيقرَّبني من روحي

[منار هانى · Rating 3 out of 5]

حسيت فى لحظة أنه كتاب قديم
























بعض الاقتباسات

http://manar-ahmed-hany.tumblr.com/ta...

[Mahmoud azab · Rating 5 out of 5]

لو تعرفي تعبي شوية من حنية قلبك ف ازازة !
كان ع��ى عيني
لو اقدر انا متأخرش ..
و روحت
و اتاريك ذي الفرحة
اللي بتيجي ف العمر مره ، و مابتتكررش!

[Amel Muhammed · Rating 5 out of 5]

و اقلق ليه
وانا امي اللي كانت لما تدعيلي
تقولي روح ..
ربنا ما يحوجك لحد
تعيش حر .. كما العصفور
ولا يدخل في قلبك برد

:)

[Emmy Soliman · Rating 3 out of 5]

حلو اوى. واحسن من ناقص حتة كمان.

[د أحمد مدين · Rating 2 out of 5]

كلمات عامية دارجة صادحة بما فى النفس
صائحة بكل ما يخالج شعور الإنسان
صارخة بصوت بيزعق من كل حته فى جسم انسان ..
نفسه يشوف كل حاجة جميلة

[Heba Shama · Rating 2 out of 5]

الديوان ده غريب .دورت عليه وجبته عشان عنوانه بس . في أول القراءة مكنتش معجبه بيه وندمت ،بعدين شوية شوية على الأواخر حبيته. لغته العامية مش أحسن شعر عامي قرأته. بس في قصايد بتظبط أو أبيات معينه لغتها وإحساسها بتكون مختلفة وبتوصل أوي. أحيانا بيكون عندي مشكلة مع تناول حب الوطن برومانسية أو كحب حبيبة وأحيانا بكون متفقة فبالتالي كنت شوية مع الكاتب وشوية مش عاجبني الكلام . غالبا الشاعر متلخبط زينا أو يمكن أنا بتمنى يكون كدة؛ لا عارفين نوصف مصر ولا عارفين نحبها أي نوع من الحب ولا عارفين نلاقيها تاني وتايهين كدة!
في جمل معينة أقوى من كل القصايد. بس شوية جمل ما ينفعش يكونوا ديوان قوي!

[Kareman Mohammad · Rating 2 out of 5]

& أنا لما بافرح
بحكي للدنيا كلها
حتي لطوب الأرض
واحزن أخبي
واسكت كأني
عمري ما عرفت الكلام ...

& بحلم بوطن
مفيهوش ولا حارة سد
وطن بيفرح بحاجة
غير وصول الأهلي لليابان
وحزنه أنبل
م الموع البلاستيك
وعمليات التجميل
والشفط والشد

خايف أقلق بالليل كده زي ما بقلق
أو علي وش الصبح
أو بعد العصر
وافتح الشباك
وابص
ومالاقيش مصر ...

[احمد محمود · Rating 4 out of 5]

علي سلامة
قصائده بها مواضيع وقصص وحكايات
القصائد بها ماهو رائع بأجمعه
أم القصائد التي لم تعجبني فموضوعوها حاضر أيضا
فالديوان ملئ بالقصص والمواقف والذكريات الذي كانت حاضرة في معظمه أكثر من حضور القصيدة نفسها

[Hosameldeen Shabeb · Rating 4 out of 5]

extra

[Rowan · Rating 5 out of 5]

the book is awesome it made me laugh like never before

[العاصمة بوك ستور]

متوفر لديناديوان محدش شاف وطن
https://www.facebook.com/el3asima

[Asmaa · Rating 3 out of 5]

القديم احلى :-\

[Reen Ezzat · Rating 4 out of 5]

<3 حبيته

[Lobna · Rating 4 out of 5]

جرّبوا القسوه.
والبلطجه..
والمجرمين..
وكل ما يحرقوا الأرض
بيطلع الياسمين..
جربوا السيف
والنار والطبنجه..
ولسه في الناي نفس
ولسه بتغني الكمنجه