إعادة ضبط مصنع

by إسلام عبد الحليم سعيد

عيناها سرقتني !،كيف كان وجهها المستدير يجذبني منذ أول مرة التقينا فيها، كيف كان رحيق جسدها فاتنًا أخَّاذًا ، كيف يمكنني وصفها بأدق التفاصيل دون مبالغة ، إنها العشق ، إنها الكون عندما ينسجم بسعادته مع رجل تنحى عنه البهجة ، ولكن !!!!!
ماحدث كان أغرب من أن ينتمي إلى الخيال ، ماحدث كان جنونًا مضافًا إليه سحرًا إغريقيًا!

البداية..
“حكمت المحكمة حضوريًا بتحويل أوراق القضية إلى فضيلة المفتي”
إنه أنا ....
- أحمد رشاد مالك ...
- لا أعتقد أنها النهاية ، إن بداية قصتي كانت من نهايتها !

296 pages, Hardcover

First published January 1, 2020

Reviews

[Samar Shokri · Rating 5 out of 5]

#إعادة_ضبط_مصنع
الحقيقة أصحابي اللي يعرفوني عارفين إني نادر لما بجرب أقرأ لكاتب/ة مش عارفاه ببقى متخوفة الصراحة وبقالي فترة هما نفس الكتّاب اللي بقرأ لهم مش بجدد
اترشحلي إعادة ضبط مصنع، بدأت فيها إمبارح بالليل وخلصتها النهارده، وحقيقي مندمتش لحظة على وقتي وأنا بقرأها لاني خارجة مستمتعة بالرواية، من الآخر الرواية عملت لي دماغ
حبيت سلاسة الكاتب في أسلوبه وسرده، سلاسته وهو بيعرض الفكرة من البداية للنهاية، النهاية دي في حتة تانية لوحدها، بوصل عندها وبسأل نفسي نفس السؤال اللي سأله البطل لنفسه؛ دي البداية ولا النهاية؟
حبيت رسم الشخصيات جدا، وتفرد كل شخصية بدورها، مفيش شخصية طغت عالتانية
طريقة السرد والوصف كأني بشوف فيلم، المشاهد والأحداث متجسدة أدامي ودا شيء زود استمتاعي بالرواية
أستاذ إسلام شكرا عالوقت الجميل اللي قضيته وأنا بقرأ الرواية ومتعتي بها
أول مرة أقرأ لحضرتك ومش هتكون آخر مرة إن شاء الله

[Sara]

ضبط مصنع
إسلام عبد الحليم
المصرية السودانية الإماراتية
للنشر والتوزيع
___________________
من أنا ؟ من أكون ؟!
سحبني الفراغ ،سحبني إلى قعر الظلمة،انتهى عصري وكينونتي،تحطمت كل ذكرياتي حتي شف جسدي ..
"وما أردت العيش في هذه الدنيا..وما عشت في الحياة إلا ساعة".
____________________
عارفين جملة "ومن الحب ماقتل " وياريت القتل مرة واحدة لكن أكتر من مرة وكل مرة بيكون عن طيب خاطر وبنفس الطريقة ،إنك تحب لدرجه إنك تتنفس الحب دا بكل مميزاته وعيوبه وحط خط أحمر كبير تحت عيوبه الى توديك ورا الشمس وإنت راضى ومقتنع .الحب الى متعرفش هل هو غباء ولا جنون ولا مرض ،طب النهاية فين ؟ وياترى كانت نهاية ولا بداية ؟!
★أولا الإهداء مميز "أهدى هذا العمل المتواضع لقلوب عشقت ولن تنسى فعلقت روحها فى برزخ لا يفنى "حبيت الإهداء جدا ومناسب جدا مع الأحداث .
★فكرة مختلفة كأنك جوا أحداث فيلم ،بتاكل الحروف والكلمات عشان توصل وكل ما دماغك تشتغل فى حل اللغز تلاقى تحديات تانية بتتحط قدامك ،والمبهر إن الكاتب يخلف توقعاتك .
★اللغه عامى للحوار ،فصحى للسرد بتشبيهات بلاغية خاصة فى أجزاء السرد الذاتي على لسان البطل .حصل دمج مابينهم فى البدايات فى الحوار لكن اتظبطت بعد كدا .
★الحبكة متماسكة قوية بتزداد قوتها مع الأحداث فيها تشويق ممتع إنك تحل اللغز ،وجود الدراما والرومانسية مش هقول مفرحه محدش يتعشم برومانسية مفرحه انتوا تقريبا هتقضوها إكتئاب وعياط وحتى اللحظات المفرحه مش هتلحقوا ياعيني تكملوا الإبتسامة 🤦🤦🤦.
★الوصف ممتع بتفاصيلة للأماكن والمشاعر ورسمة شخصيات الأبطال ،استمتعت بكل حاجه فيها كأني جزء من الأحداث 👏
★النهاية بقى حدوته تانية ،نوعا ما توقعت النهاية أو جزء منها وراهنت نفسى يا أنا نجحت فى التوقع صح ،يا إما الكاتب هيبهرني ويخلف توقعاتي ودا الى حصل أستاذ إسلام أبدعت خليت دماغى تلف فى دواير 🥴🥴.
★النقطة الوحيدة الى حيرتني كانت السرد ،نوعين سرد فى رواية واحدة مش محبب ع الأقل ليا لأنى بتوه ،فى البداية حبيت تنوع السرد ومع الوقت بدأت اتوه وخاصة إن الأحداث بتكون إرتفعت لذروتها .
★العمل كمجمل رائع سلاسة الأسلوب ورقي الفكرة وإنك تلمس وتر الإحساس جوا القلب دا كان ممتع جدا ،طول الأحداث مش عارفه أكره مين وأحب مين أنا اتعاطفت مع الكل .
الغلاف مشوق ومناسب جدا 👏👏
تستحق القراءة جدا 👏👏👏👏🌹

[Khalid Elsewisy · Rating 5 out of 5]

( الرواية عظيمة )
لو مش حابب تقرا كل كلامي ده اكتفى ب اول كلمتين فقط
انا بحب اقرأ اكتر من اني اتفرج على مسلسل أو فيلم لسبب بسيط ما بحبش الواقع المفروض عليا و احب خيالي هو اللي ينسج الأحداث براحته ويكون حر في المشاعر اللي هيركبها على الحدث ده
ده اللي اختبرته في الرواية دي ، عبقرية السرد واللغه وتتابع الأحداث والسلاسه بتاعتها أخدتني في عالم تاني خالص واختبار لبعض المشاعر اللي انت نفسك مش قادر تحددها ولا قادر تقف في صف شعور معين جواك
احداث ولا اروع ونهاية غير متوقعة اطلاقا زادت من الحدث جمال
( الحب والعقاب ) لما تخلص الرواية هتقعد كتير اوي اوي تفكر في الكلمتين دول

[Donia Mohmed · Rating 5 out of 5]

تحفة بجد ...أسلوب سرد متميز ومشوق وحبكة قوية والأجمل أنها فكرة جديدة ♥️♥️

[Mohmed Abd El-Rahman · Rating 5 out of 5]

بجد رواية من أروع ما يمكن بالتوفيق والنجاح

[Yasser Zahran · Rating 5 out of 5]

من أجمل ما قرأت احداثها متشابكة جدا و مليانة التواءات في الاحداث

[Mohammed Eldreny · Rating 5 out of 5]

الحبكه الدراميه رائعه بجد

[Aya Yahia · Rating 4 out of 5]

روايه جميله

[Farouk Elkhouly]

السرد اكتر من رائع ...الفكرة مبتكرة ...الاسلوب سلس وبسيط ...من اجمل ما قرأت وبداية طيبة لعام جديد2021

[Ahmed Ismail · Rating 5 out of 5]

I love it i started to read it but i found that i cant stop until i have finished 🤎🤎

[Farha · Rating 5 out of 5]

حقيقي الروايه إعادة ضبط مصنع تحفه
طريقة السرد كمان خلتني اعيش مع الاشخاص و ازاي ف كده و كنت متشوقه جدا اعرف اي النهاية و حقيقي انبهرت بالنهايه غير متوقعه خالص
من احلي الرويات اللي قريتها 😍😍 عظمه فعلا

[Nevine Elhadidy · Rating 5 out of 5]

استمتعت بقراه الروايه والفكره احسنت

[Mohamed Zidan]

جميلة

[Mohamed Mortada · Rating 5 out of 5]

جميله جدا وننتظر الثالثه

[Alyaa Mahfouz · Rating 4 out of 5]

الرواية ممتازة جدا جدا وعجبتني اوي فكرتها (الحوار حلو وبسيط) ونسج الأحداث ممتع وشيق جدددددا ومحسيتش من اي ملل من نسج اباحداث والرواية... وكان بالنسبالي دا شيء غريب لأني بطبعي ملولة وعشان كدا مش أي رواية تاخدني وتشدني بالشكل دا أحيي الكاتب المهندس اسلام على الجمال دا بصراحة واتمنى اقرالك روايات تانية كتير.... واشكرك على الاهداء (د.علياء محفوظ صديقة أسما عمر) ،،،،

ليا بس تعليق سلبي :
أسلوب الكتابة حسيت فيه بتباهي واضح اوي في اللعب بالاستعارات المكنية والتتشبيهات اللي خليتني بعض الأحيان فعلا أشعر بالضيق والزهق من كترها اللي هو كان كفاية ١ على ٥ منها (خمسها) وكان هيبقى كتير برضو .....

ملحوظة/ الكتابة فيها أخطاء بسيطة (الحروف لازقة في بعضها) لكن عددها كبير - مضايقنيش اوي- لكن هيفرق ف تعديل الطبعات ال بعد كدا ان شاء الله 👌❤️

بشكل عام انبسطت جدا لأني بحب طريقة الاثارة ال منسوج ف الرواية دي...

اتوقع كل رواية هتكون احلى من ال قبلها ان شاء الله ، واتمنى اقرالك حاجة تانية قريب..... بالتوفيق.....